Hlazy 48
Zaio angiana nata rôhnahna
Hla. Kôrah Sawchapawpazy Reithaina Hla.
1 ABEIPA cha rôhnah ta, thata reithai awpa a châ. Khazohpa khihpi liata a tlâh pathaihpa liana chata!
2 A sâhna zie liata a ngia ngaitapa, khizaw zydua thaphana cha, Zaio Tlâh cha a châ, maw lâchhâh ta, abei rôhnah ngaitapa khihpi cha.
3 Abei o rôhnahpa zy liana chata Khazohpa ta a bohna a châpa a pahnosa ta.
4 Abeizy cha ahmaohpakhy ei ta, hmaohkha ta ama sie haw.
5 Hmô ei ta, chatanachata noâh chheipa ta y ei ta, ama nôpo ta thlai sie syulyu haw ei ta;
6 cha liana chata a chalyuna ta patu hra ta, chanô saw a zeihpa pasana hawhta patu hra ta.
7 Nochhi thlih ta Tasi balyh laipazy cha parao tyh chi ta.
8 Pheisaihzy ABEIPA khihpi liata eima Khazohpa khihpi liana chata, nah ta eima theipa hawh tlaita eima hmô haw; Khazohpa ta cha khihpi cha chhâzaw châta a pa-i aw. Selah
9 Hy Khazohpa y, na chhyna-o chhôh liana chata na kyhpachâ ngiachhiena he pachâ haw pi ta.
10 Hy Khazohpa, na moh hawh tlaita na reithaina cha kaoki taihta y ta. Na ku chachâh lâ cha tiana ta a bie;
11 na pachiana zy vâta Zaio Tlâh cha aly ngaitapa ta y sala! Zudah sawchanô zy cha thaphapa ta y ei se!
12 Zaio cha padôpa ta, chahlô ula, a riahvaina o sâhpa zy chhao reih teh u,
13 a kuhzy cha pakhâta ta ngia ula, abei o rôhnahpa zy cha pachâ teh u; chhâ a vaw y heih awpa zy hnota nama chho thei nawpa ta
14 he Khazohpa he chhâzaw nata chhâzaw ta eima Khazohpa châ tlôh aw ta. Thina taih chhaota maniah a chhituhpa a châ aw.