Khakhaipa tawhta abohna vâta reithaina
Hla chhihthatuhpa châta: Davi Reithaina Hla.
1 Hy ABEIPA, abei cha na thatlôna liata â ly aw; na châkheina liana heta a lypa zie rimâ cha!
2 A palôh khopa cha pie chi ta, a hmao ta a hiapa cha thlyu hra va chi. Selah
3 Phana byhnâ zy ta ano cha dy chi ta; a luh liata ngôh pasua chiehpa lakho pakho chi ta.
4 Ano chata hrona cha hiah ta; na vaw pie, tlyzaw ta hroh thlâh hana cha.
5 Na pachhana liana chata a rôhnahna cha thata a châ; palyupalihna nata rôhnahna ano cha na pie.
6 Chhâzaw ta byhnâ thata pataosa chi ta; na hmiakô liata phana ta na palysa.
7 Abei ta ABEIPA cha a ngâ; Chônôchaipa zawngiahna vâta a chalyu aw vei.
8 Na ku ta na khakhaipa zydua cha hmô khai aw ta; na ku chachâh lâta cha haotuhpazy cha a hmô hra aw.
9 Nâ vaw luah tita cha âmo cha lômathu sahpa hawhta na kâ khai aw. ABEIPA cha hiehâhna ta âmo a palâ khai aw; mei chata a kâ pamo khai aw.
10 A pathlazy cha alei tawhta pahleipadia aw chi ta, ama pathlazy cha chyhsa sawzy tawhta na pahlei aw.
11 Na chôta moleina ta dyuhpa ama châ chhuah khiahtala, moleina pachâ hra sala, hlaotloh aw veih ei.
12 Nâ ta âmo cha hnôh pachhysa chi ta; na châtaizy ama hmia mopâpa ta a kei chi ta.
13 Hy ABEIPA, na thatlôna liana cha palyupalihpa ta y mah y! Na hmotaotheina reithaipa ta hla eima sa aw.