Hlazy 22
Hiehâhna ao nata palyupalihna hla
Hla chhihthatuhpa châta: Aijeleth hash-Shahar ta sa awpa. Davi Reilhaina Hla.
1 Ei Khazohpa, ei Khazohpa, khazia e eina pathlua chi? Khazia e, na bao awpa ta nâ hla chi ta, ei hrona biezy tawhta einâ hla chi?
2 Hy Khazohpa, nohchhô ta na cha aw na ta, nâ chhy tlôh chi va; zâ ta chhao cha aw na ta, a pahâ hlei va na.
3 Hy Izarel reithaina liata atyuh tyhpa, nâ cha pathaih tlôh chi ta.
4 Maniah pathlatuhpa zy chata cha ngâ ei ta; cha ngâ ei ta, nâ ta âmo cha na pachha ei.
5 Cha aw ei ta, pachhapa ta ama y tyh; cha ngâ ei ta, ama hnabeidy beih vei.
6 Kei cha chyhsa châ leipa na ta, châkariepa tlao ei châ; chyhsazy ta na mohnao ei ta, eina mopakhô hra ei.
7 Na hmôpa maihta na pahneisao ei ta, ama hmao na pabyuh chie ei ta, ama luh eina chahua chie ei;
8 ABEIPA liana chata a pahnieh sala; ano ta a pachha aw, a chôta alypa vâta ano cha pachha mawh sy!” tah ei ta.
9 Nâ deikua cha chhi tawhta na latuhpa châ chi ta; ei nâ sâhpi chôta ei y nona khata eina vaih chi.
10 Chhi tawh raita nâma liata pahniehpa châ na ta, ei nô py liata ei y no tawhta nâ cha ei Khazohpa na châ.
11 Nâ hla cheita kha la, tymâna cha na hnia tlôh,na baotupa rai y veih ei.
12 Viahchao tôhpa hluhpi ta na chadô ei ta, Basana râh liata viahchao tôhpa thatlôpa zy ta eina dôh ei;
13 chakeibarôhhneipa a pahâpahaohpa, a rôh ngâpa hawhta, ama pakah kawh ngaitapa na â chie ei ta.
14 Ti hawhta leithapa ta y na ta, ei rupa chhao tlokhuh â suhlie; ei palôhrupa cha kheihlô hawhta châ ta. ei chachôhnazy liana heta a ti khai haw;
15 ei thatlôna cha beikaopa hawhta hi karâ ta. ei paleih chhao he ei dâh lâta a bai ta; nâ ta thina dohlei liata eina soh chi.
16 Izy ta na chadô ei ta; moleina hmotaotuhpa zy ta eina chadô khai ei; ei ku nata ei pheizy cha ama papyu.
17 Ei rupa zy he reih thei na ta, na moh ei ta, na tawpâ thlâh ha ei ta;
18 ei chysia cha a rai ei ta, ei viahpakao châta ama pachao.
19 Châhrasala hy ABEIPA, nâ la, nâ hla kha y! Hy nâ baotuhpa, na bao awpa ta a parah mah y!
20 Ei hrona he zaozi tawhna chata pachha la, ei hrona he i hmotaotheina tawhtapa pabohsa mah y!
21 Chakeibarôhneipa pakah tawhna chata na pachha la, chaoliah ki tawhtapa cha nâ chhy mah y!
22 Ei unawhpazy ota na moh pahnosa aw na ta; apakhypazy hry liata ei cha reithai aw:
23 ABEIPA a chipazy saih u, ano reithai teh u! Zakaw pathla zydua saih u, ano cha palyupalih teh u, Izarel pathla zydua sai u, ano cha chi teh u!
24 Ano cha pasa a taopazy pasana cha mohnao ta pasi vei; a hmia chhao cha ano tawhta nyu hra vei, ano ama aw ti deikua cha, tlao a nahthlie.
25 Apakhyna rôhnah ngaitapa liata ei cha reithaina he nâma tawhtapa na a châ; ano chituhpazy ota cha ei bietaina ei patlô aw.
26 Pasa a taopazy cha nie aw ei ta, ama rih a bie aw; ano a tluatuhpazy chata ABEIPA cha ama reithai aw! Nama palôhrupa cha chhâzaw ta hroh thlâhpa ta y mawh sy!
27 Kaokih chhâna zydua ta pahno ei ta, ABEIPA lâ amâ heih ha aw; pho to nata chi to hry tawhta nâma ama châ chhy aw.
28 Khihnarâh cha ABEIPA eih a châ,phopizy chô liata ryu a reih.
29 Alei liata apalaipa zydua ta ano cha amâ nao aw; dohlei lâta a zu awpa zydua ta a hmiakô liata ama bôh aw, âmosasyh ta a pahro thei leipazy tlai cha.
30 Chi pathlapa ta ano ama chakao aw; thyutliapa a vaw y lymâ awpazy hnohta ABEIPA thâtih cha ama pahnosa lymâ aw,
31 chyhsa a pachha awpa a pih mâh leipazy hnohna chata, a tao khai hana zie ama pahnosa aw.