Tiah nawpa ta thlahchhâna
Hla chhihthatuhpa châta: Davi Reithaina Hla.
1 Pachârôhna noh liana cha ABEIPA ta cha chhy aw ta! Zakaw Khazohpa moh chata cha pabohsa mawh sy!
2 Su pathaihpa tawhna chata baona cha tuapa sala, Zaio tawhna cha tha cha patlô mawh sy!
3 Na hmohlâpa zydua cha thei thlâh ha sala, na raopa atheihna cha aly mawh sy!
4 Na palôhrupa khona cha cha pasai sala, nâ chhuahna zydua hlao cha patloh mawh sy!
5 Na tiana liana chata alypa ta aw pata, eima Khazohpa moh ta poh-rai zawh si y! ABEIPA chata na hlâna zydua hlao cha patloh mawh sy!
6 ABEIPA ta a sathaw thupa cha a pachha tahpa atahmâ ei pahno; a ku chachâh lâ pachhana thatlôna ta avâ pathaipa tawhna khita ano a chhy aw.
7 Thokha cha talailizy a palaikhei ei ta, thokha ta arâzy amâ palaikhei; keimo deikua cha ABEIPA eima Khazohpa moh tlao eimâ palaikhei.
8 Ano lâ a bôh ei ta, pao haw ei ta; keimo deikua cha a duah pi ta, tlao eima patlâh haw.
9 Hy ABEIPA, abei cha tiahna pie la, eima aw tita maniah a chhy mah y.