Khazohpa cha su to liata pahrâ ta ato zydua a pahno
Hla chhihthatuhpa châta: Davi Reithaina Hla.
1 Hy ABEIPA, nâ ta liahsa na moh chi ta, eina pahno chi!
2 Nâma ta ei tyupa nata ei duapa he pahno tyh chi ta; ei pachâna he â hla ngaitapa tawh chhaota na pahno thai tyh.
3 Ei siepa nata ei môpa he liahsa na moh tyh chi ta, ei yzie zydua he pahno khai chi ta.
4 Hy ABEIPA, nâma ta na pahno khai leipa cha, ei paleih liana heta bie rai y vei.
5 Nâma ta ei hnôh lâ nata ei hmia lâta na pado chi ta, ei chô liata na ku na pahnieh hra.
6 Cha tluta pahnona cha kei châta noâh chhih tu ha ta; â sâh ngaita ta a pha va na.
7 Na thlahpa tawhna heta khataihla ei sie aw tly? Cha leipa ta na hmiakô tawhtapa he khataih lâ ei râsai aw tly?
8 Avâ lâta kiah aw sala, cha liana chata y tlôh chi ta! Sheôl liata a ziana tao aw sala, cha liana chata y tlôh hra chi ta!
9 Nochhi chhâna lâ ei zaw khiahta nata tilaipi chhâna liata y aw sala,
10 cha liana chhao cha na ku ta na chhihtha aw ta, na ku chachâh lâta na patu tlôh aw ta.
11 “Zohna ta na khu khai tlai aw ta, ei chheipâh liata khaihna he zâ a châ aw,” tah aw sala.
12 zohna chhaota nâ tawhtapa khâpa hmah pahli vei, zâ he chhô hawhta tlao a khaih; nâ chata zohna nata khaihna he miakha sai a châ.
13 Nâma tlaita ei pathipalôh hnei chi ta, ei nô py chhôh liata na khu chi ta.
14 Nâ lâta alyna bie ei cha hlâ aw, chichhih ngaitapa nata noâh chhihpa ta taopa châ tlôh na ta. Na hmotaopazy he noâhchhih ngaitapa châ ta! Cha cha ei hrona he a pahno pasia ngaita;
15 a ru lâta taopa ta ei y nota, alei su ry chaipa liata a ngia ngaitapa ta taopa ta ei y nona khata, ei rureihpa cha nâ tawhta nyupa ta y vei.
16 Ei pôhpa kyh paki leipa cha na mo ta hmô ta; na châbu liana chata ei pachiapa zydua he roh khaipa châ ta, a noh chareih ta taopa ta y lymâ ta, miakha hmah a y hlâta.
17 Hy Khazohpa, na pachâna zy cha kei châta a sôh kaw dia! a pahlypakhypa cha thata a châ kaw dia!
18 Reih aw sala, a hluhna lâ cha raphyu leisadi hlâta a hluh via aw. Ei vaw hra nona chata nâ liata khâ ei y tyh.
19 Hy Khazohpa, hmoparaopazy cha na thie tlai aw, nâmo thisaih a palo khohpa saih u, na siesai teh u,
20 âmo chata hmoparao ngaitapa ta cha reipachhie tlôh ei ta, nama khakhaipazy chata na moh cha khâpâ hrao leipa ta ama reih tyh!
21 Hy ABEIPA, nâma châ haotuhpa zy cha a hao va na mâ? Nâma châ thyuhnaotuhpa zy chô liana chata palôh châ leipa ta y vana mâ?
22 Âmo cha a hao ngaita na ta; ei khakhaipazy ta ei rao ei.
23 Hy Khazohpa pakhâta ta na moh khai la, ei pathipalôh he pahno mah y! Na pasia la, ei pachâna zy he pahno mah y!
24 Keima liana heta hmoparaona kyh rai a y ma, y vei moh la, chhâzaw lâpi liana chata nâ chhi mah y!