Hlazy 138
Abeipa ngiachhiena vâta alyna bie reina
Davi Reithaina Hla.
1 Hy ABEIPA, nâ liata ei pathipalôh zydua ta alyna bie reih aw na ta; khazohzy hmiakô liana chata nâma reithaipa ta ei sa aw.
2 Na pakhyna-o pathaihpa lâ a heihpa ta châ chhy aw na ta, na kyhpachâ ngiachhiena nata na hmeihseihna vâta na moh ei reithai aw; na bie cha na moh hlâna chata palaisa tlôh chi ta.
3 Ei cha pado nona khata nâ ta na chhy chi ta, ei hrona tha patlôpa ta na pasyu chi ta.
4 Hy ABEIPA, alei liata abeizy châta alyna bie ama cha chho aw, na pakah liata bie a puapazy cha pahno tlôh ei ta;
5 ABEIPA yzie biezy cha hla ta ama sa aw, ABEIPA rôhnahna zie cha thata châ tlôh ta,
6 ABEIPA cha chônô kawpa a châ tarawpa ta, chyhsa nawhpa zy cha pachâ tyh ta; chyhsa apalaipazy deikua cha a hlâ kawpa tawhta a pahno tyh.
7 Nôpona hry liata charei hra ei sih la, nâma ta eina pahra aw chi; khakhaipazy hiehâhna liana chata na ku pazawh aw chi ta, na ku chachâh lâta na pachha aw chi.
8 ABEIPA chata ei chô liata a tao awpa cha a patlô aw; hy ABEIPA, na zawngiahna cha chhâzaw ta y aw ta. Na ku hmotaopazy he bâhsai kha y.