Râh pachhaihna nata a thliena siazie
1 “Cha tawhna heih chata ryuto châta râh nama rai tina chata ABEIPA lâta râh pathaihpa nama hlâ awpa a châ, a doh lâ cha dy thy no nata sâh pangawh, a hâ lâ cha dy thy no; a zydua ta râh pathaihpa a châ awpa a châ.
2 He liana he supathaihpa châta a doh dy za pangawh, a hâ dy zapangawh, ki palihpa châ aw ta, chatawhcha a chheipâh ta dy za pangawh a tlyna su a y awpa a châ.
3 Chatawhcha he thlie chiehpa tawhna heta a doh dy thy no nata sâh pangawh nata a hâ dy thy kha thlie aw chi ta, cha liana chata su pathaih chaipa cha a y awpa a châ.
4 Râh pathaihpa cha theihthaipa supathaihpa liata chakaotuhpa chakao awpa ta ABEIPA a hnia tyhtuhpa châta châ aw ta; ama o su châta nata supathaihpa châta râh pathaihpa a châ awpa a châ.
5 Su hropa a doh dy thy no nata sâh pangawh, a hâ dy thy kha, Livai chi o pipa liata chakaotuhpazy chata ama pahrâna khihpi châta a y awpa a châ.
6 “Râh pathaihpa hlâ chiehpa kiapâh liana chata khihpi hneipa a hâ dy sâh pangawh nata a doh dy thy no nata sâh pangawh nama rao awpa châ ta; Izarel chhôhkha tlokhuh châta a châ aw.
7 “Chatawhcha abeisaw vyuh cha râh pathaihpa hlâ chiehpa nata khihpi vyuh kâ lâ rairieh râh pathaihpa hlâ chiehpa hmia lâ nata khihpi vyuh hmia lâta notla lâtahpa, notla lâ heih ta, nochhi lâtahpa nochhi lâ heih ta a y awpa a châ, a doh cha notla râhri tawhta nochhi lâ râhri taihta râh hropa sa ta a châ hra.
8 Cha cha Izi râh liata ano tovyuh a châ awpa a châ. Chatawhcha ei abeisawzy châta ei chyhsazy pasaipa-i khao leipa aw ei ta; Izarel chhôhkhapazy cha âmo pho nanonazy lymâ hawhta râh tlao ama pie aw.
9 “Abeipa KHAZOHPA chata he tana heta a tah: Hy Izarel abeisaw saih u, a daih bâ se! Nohchhina nata a hraona cha bâhsai ula, a siapa ta pachiapa nata a dopa ta tao ula; ei chyhsazy a papua tyhpa cha bâhsai teh u, Abeipa KHAZOHPA ta a tah.
10 “Khopathliana dopa, ephah dopa, nata bath dopa nama hmâh awpa a châ.
11 Ephah nata bath cha a kho awpa a châ, bath cha homer su hrawh ta pachhaih ta su kha a tlohpa châ aw ta, ephah chhao homer su hrawh ta pachhaih ta su kha a tlohpa a châ hra aw; homer tawhta panua pasiapa a châ aw.
12 Chatawhcha sekel cha gerah syno châ aw ta; sekel sâpangawh cha sekel sâpangaw sikhua châ aw ta; sekel sâhrawh cha sekel sâhrawh sikhua châ aw ta, nama mina cha sekel sypangawh sikhua a châ awpa a châ.
Hmohlâpazy nata kuzy
13 “He he hmohlâpa nama hlâ awpa a châ aw: uit sâh homer hmo kha lymâ ta ephah su charu ta pachhaih ta su kha nata bâli sâh homer hmo kha lymâ ta ephah su charu ta pachhaih ta su kha nama pie awpa a châ,
14 chatawhcha sathaw hlâna yzie awpa cha kor hmo kha lymâ ta bath su hrawh ta pachhaih ta su kha, kor cha bath hmo hrawh a châ, homer tluta a châ hra, homer hmo kha cha bath hmo hrawh châ tlôh ta;
15 Izarel sahroh bâpa su phapa tawhta mietahkupa zaw hry liatahpa za no lymâ liata taw pô kha. Niepa hlâna châta zy, raona hlâna châta zy, adyhna hlâna châta zy, âmo châta padysana taona awpa ta ama hlâ awpa a châ, Abeipa KHAZOHPA ta a tah.
16 Râh chyhsa zydua chata Izarel abeisaw hnohta he hmohlâpa he ama pie aw.
17 Kyhchhi liata zy, thla thiehpa liata zy, pahânoh liata zy, Izarel chhôhkhapa kyhchhi noh zydua liata raona hlâna zy, niepa hlâna zy, dopa hlâna zy, abeisaw ta pachâ aw ta: moleina hlâna zy, niepa hlânazy, raona hlâna zy, adyhna hlâna zy, Izarel chhôhkhazy padysana châta ano ta a taopa awpa a châ.
18 “Abeipa KHAZOHPA chata he tana heta a tah: Thla khana, cha thla noh kha noh liana chata viahchao tôh dawpa seina a hnei leipa hmâh aw chi ta, supathaihpa cha na pathaisa awpa a châ.
19 Theihthaipa chata moleina hlâna thisaih cha la aw ta, o pipa chhikao tôhzy liata nata maisâh chhâh ki palihzy liata nata a dôhpachhôh viapa chhikao tôh pâhchhô chatipa liatazy a hnia aw.
20 Cha thla noh sari noh liana chata tao pathleipa tlyma, pahno leina vâta hmo paraotuhpazy châta chhao, cha hawhna hra chata tao aw chi ta; cha hawhna chata o pipa padysana na tao awpa a châ.
21 “Thla hmiatuapa, cha thla noh hrawhleipalih noh liana chata zawpakhô kyhchhi nama ô aw, chatawhcha noh sari chhôh cha viahchhâ thinô a hlao leipa nama nie aw.
22 Cha noh liana chata abeisaw ta ano nata a râh liata chyhsa zydua chata moleina hlâna châta viahchao tôh dawpa a chhuahdy aw.
23 Chatawhcha kyhchhi noh sari chhôh zydua chata viahchao tôh dawpa seina a hnei leipa pô sari nata mietahkupa tôhpa pô sari lymâ noh sari chhôh liata ABEIPA châta raona hlâna châta a chhuahdy aw; chatawhcha noh tato ta moleina hlâna châta mie tôhpa chhao.
24 Chatawhcha niepa hlâna châta viahchao tôhpa pôkha lymâ liata ephah hmo kha, mietahkupa tôhpa pôkha lymâ liata ephah hmo kha nata ephah hmo kha lymâ liata sathaw hin miakha a chhuahdy awpa a châ.
25 Thla sarina, cha thla noh hrawhleipangawh noh liata, kyhchhi liana chata noh sari chhôh cha cha hawhna chata tao aw ta, moleina hlânazy, raona hlâna zy, niepa hlâna zy nata sathawzy a chhuahdy khaipa ta,” tah ta.