Achhyna-o chakaonazie
1 Chatawhcha supathaihpa chhikao khôtho viapa nochhi lâ a heihpa lâna chata nâ chhi ta; khawpa vaw châ ta.
2 Chatawhcha ABEIPA chata ei hnohta, “He chhikao he a khaw thlâh ha aw ta, a pahy leipa aw ta, ahy hmah ta a ngia hra aw veih ei; ABEIPA Izarel Khazohpa cha a vaw ngia hawpa vâta a khaw thlâh ha aw.
3 Abeisaw deikua ABEIPA hmiakô liata pati nie awpa ta cha liana chata a tyu aw; aikah chhikao liata a ngia aw ta, cha liana chata a pua heih aw,” tah ta.
4 Chatawhcha maw lâ a heihpa chhikao lâna chata o pipa tlyhmia liana chata nâ chhi ta; vaw moh na ta, ABEIPA o cha ABEIPA rôhnahna ta bie khai haw ta; a khu lâta pao na ta.
5 Chatawhcha ABEIPA chata ei hnohta, “Chyhsa y, ABEIPA o bieraopa zydua thâtih nata ryhpa bie zydua na hnohta ei reipa cha na nah pachôh la, mohmia pasaih la, na palôhrupa ta pakhâta ta ngia tua; a o pipa a ngiana zie zy, a supathaihpa tawhta puana zie zy cha na palôhrupa ta pakhâta ta ngia mah y.
6 Chatawhcha atyhmâhpa Izarel chhôhkhazy tlai hnohna chata, ‘Abeipa KHAZOHPA chata he tana heta a tah: Hy nâmo Izarel chhôhkhazy saih u,
7 nama pasichhihna zydua baichha awpa ta khichhaipa chyhsa pathipalôh nata sapa chopawtai leipa, ei viahchhâ zy, thaw zy, thisaih zy, nama hlâ nota ei supathaihpa, ei o tlai papuapalei awpa ta a chhi eichi ta. Ei biehrai nama paraopa liana khata nama pasi achhihna zydua cha chhâ bâ mawh sy.
8 Chatawhcha ei hmo pathaihpazy nâmo ta a vao leipa eichi ta; he khichhaipa chyhsazy he, ei supathaihpa liata nâmo vyuhpa ta a vaotuhpa ta tlao rao eichi ta.
9 Abeipa KHAZOHPA chata he tana heta a tah: Khichhaipa chyhsa ahy hmah ta pathipalôh nata sapa chopawtai leipa, Izarel pathlazy hry liata khichhaipa chyhsa rai cha, ei supathaihpa liata amâ ngia awpa châ vei.
10 Livai chi Izarelzy khazoh nohthlahpa a chadaipa ta ama viavi nota, kei tawhta lâhlapi ta a sie hawpazy deikua chata ama hmoparaona phaoh ei ta.
11 Ei supathaihpa liana chata chakaotuhpa ta ama châ aw, o pipa chhikaozy vaih aw ei ta, o pipa chhôh liana chata chakaona rai ama hria aw, raona hlânazy chata atheihna zy thie aw ei ta, zawpi chata chakao awpa ta ama hmiakô liata amâ duah aw.
12 A khazoh nohthlahpazy hmiakô liata chakao ei ta, Izarel chhôhkhazy chata hmoparaona ta ahluana ama châ tyhpa vâta, ama chô liata ei ku hy na ta, ama hmoparaona cha ama phaoh tlai aw, Abeipa KHAZOHPA ta a tah.
13 Ei hnohta theihthaipa raihria awpa ta na vaw hnia leipa aw ei ta, ei hmo pathaihpa zy, hmo pathaih chaipa zy a vaw hnia hra aw veih ei; ama maohphyuna nata ama hmo pasichhihpa tao hawpazy cha tlao ama phaoh aw.
14 A o pipa mohôhtuhpa ta zy tao aw na ta, chakaona zydua nata tao awpa a ypa maih tao awpa ta.
15 “Theihthaipa Livai chi Zadôka sawchapawpa, kei tawhta Izarel pathlazy ama viavi nota ei supathaihpa a vaotuhpazy deikua chata na chakao awpa ta einâ vaw hnia aw ei; thaw nata thisaih hlâ awpa ta ei hmiakô liata amâ duah aw, Abeipa KHAZOHPA ta a tah;
16 ei supathaihpa liana chata a ngia aw ei ta, na chakao awpa ta ei tlâhkhai a hnia aw ei ta, na mohôtuhpa ta ama châ aw.
17 Dôhpachhôh viapa chhikao liata amâ vy no ta, lini chysia a ky aw ei ta, dôhpachhôh viapa nata ochhôh lâta ama chakao chhôhta sahmi chysia amâ ky awpa châ vei.
18 Lini khutho a khu aw ei ta, lini chaopasypa a pasy aw ei ta; mathlai a paleisa theipa rai cha amâ ky awpa châ vei.
19 Chatawhcha dôhpachhôh khôtho viapa vâtlâh mo lâta ama vaw pua nona chata, ama chakaona chysiazy cha pahluh aw ei ta, chhôhpadâhpa pathaihpa liana chata soh aw ei ta; chysia hropa amâ ky aw, zawpizy cha ama chysia ta chyhsa pathaihpa ta tao lei nawpa ta.
20 Ama luh zy pôlô awpa châ leipa ta, ama sâ amâ paseih awpa châ hra vei; ama sâ ama ngyu awpa a châ.
21 Theihthaipa chata dôhpachhôh viapa ama ngia nona cha kresawti ama do awpa châ hra vei.
22 Nôhmei tlyma, mah chiehpa tlyma, lahpinô ta ama hnei awpa châ hra vei, Izarel chhôhkha chi laihsakôpa tlyma, theihthaipa thisaipa nôhmei tlyma ama hnei awpa tlao a châ.
23 Ei chyhsazy cha hmo ziehpa nata zieh leipa a nanona zie amâ pachu awpa a châ, hmo pathaihpa nata a pathaih leipa ama pananosa awpa a châ.
24 Biepeipazy chhao amâ paryh awpa châ ta, ei pachiana zie lymâ hawhta ama pachia aw. Ei ahmaopakhyna zydua liata ei ryhpa biezy nata ei bieraopazy ama zyh awpa châ ta, ei pahânohzy chhao ama ô awpa a châ.
25 Âmo a papuapalei awpa ta chyhsa ri amâ hnia awpa châ vei; anodeikuacha paw tlyma, nô tlyma, sawchapaw tlyma, sawchanô tlyma, unawhpa tlyma, sietanô a vahpa a hnei leipa tlyma châta cha ama papuapalei thei aw.
26 A papuapalei tawhta ano chata noh sari reipa châ aw ta, chatanachata a vaw pathaih ha aw.
27 Dôhpachhôh viapa su pathaihpa liata chakao awpa ta su pathaihpa liata a ngia nona chata moleina hlâna ano châta a hlâ awpa a châ, Abeipa KHAZOHPA ta a tah.
28 Ryuto khâpa hmah hnei aw vei; a ryuto cha keima eih châ aw; Izarel liata topa khâpa hmah nama pie awpa châ vei; ama topa cha keima eih châ hi.
29 Niepa hlâna zy, moleina hlâna zy, hmoparaona hlâna zy nie aw ei ta, Izarel hry liata hmo pathaihpa maih cha âmo eih a châ aw.
30 Thei hmiatuapazy hry liata a pha chaipa maih, nama hmohlâpa to a pha chaipa, nama hmohlâpa zydua liatahpa cha theihthaipazy châta a châ aw; nâmo o liata byhnâ a y palâh thei nawpa ta viahdi pahlypa pha chaipa cha theihthaipa hnohta nama pie awpa a châ.
31 Theihthaipa chata sawsawpa rai rai, pavaw tlyma, lyurâh sa tlyma, taipa tlyma, ano kho ta a thipa tlyma ama nie awpa châ vei.