Ezekiel 24
Beih a tlao haipa pakhona
1 Kô chakina, thla hrawhna, cha thla noh hrawhna liana chata ABEIPA bie cha ei hnohta vaw tlô heih ta:
2 “Chyhsa y, noh moh, atanoh ta noh moh tlai he roh teh: He noh tlai heta Babylaw beipa chata Zerusale vaw siehnao pathao ta.
3 Chatawhcha atyhmâhpa chhôhkha hnohna chata pakhona bie reih la, ama hnohta, Abeipa KHAZOHPA ta he tana heta a tah: Beih khaih la, khaih teh, a chhôh liata ti chhoh la;
4 sa tlozy thla la, a sa phapa zydua, a phei sa zy, a palaih zy; a rureihpa phapazy ta pabie teh.
5 Sahroh zawzy hry liata a pha chaipa la la, a ry liata tho thata chahrao la; a tlao ngâ se, a rureihpazy cha pachaopa châ mawh sy.
6 “Chavâta Abeipa KHAZOHPA chata he tana heta a tah: Thisaih palo a hmâhpa khihpi beih a chhoh a upa, a upa a lei beih leipa cha a hu a po na! A tly hlei leipa ta a sa tlo miakha miakha ta thao teh u.
7 A thisaih palopa cha ano chhôh liata y tlôh ta; doh-lei ta vaoheih thei nawpa ta alei liata patlai châpa ta lôpanô chô liata tlao patlai haw ta.
8 Phuh la awpa ta pathi-iana a vaw thyu thei nawpa ta vaohei leipa ta a thisaih palopa cha lôpanô chô liata ei patlai haw.
9 Chavâta Abeipa KHAZOHPA chata he tana heta a tah: Thisaih palo a hmâhpa khihpi cha a hu a po na! Keima tlaita ei pahmaoh aw.
10 Tho thata phôh ula, mei patih ula, sazy cha pasyuh ula, sa tihâh cha a kuapa ta, a ruzy chhao kâ patlô mawh sy.
11 Chatanachata beih cha a ruapa ta mei-ia chô liata khaih thlâh hapa châ sala vaw sa aw ta, a daw cha vaw sai aw ta, a puana cha vaw zao aw ta, a kâupa cha a kâ patlô thei nawpa ta.
12 Aina taihta taopa chhaota; a kâupa cha sia hlei leipa ta, mei chhaota kâ pasia hra vei.
13 Na pua leina cha haohna châ ta. Cha pathai na ta, na pathaih hlei leipa vâta na chô liata ei pathi-iana ei leithlu khai hlâ lei ta cha, khatita hmah na pualeina tawhtapa cha pathaipa châ khao aw va chi.
14 Kei ABEIPA heta ei reih haw; a vaw tlô tlai aw, kei ta tao tlôh aw na ta; a sy leipa aw na ta, pahlôh hra leipa aw na ta, pathlei hra aw va na; na yzie zy nata na hmotaopa hawh lymâ ta ei cha pachia aw, Abeipa KHAZOHPA ta a tah, tah mah y,” tah ta
Ezekiel lahpinô thina
15 ABEIPA bie cha ei hnohta vaw tlô heih ta:
16 “Chyhsa y, sôkha ta na mo lôhrâ tlôna chaipa cha cha lapa aw na ta; mâchhie na sa awpa châ leipa ta, na cha awpa châ hra vei, na mothlih chhao a tla awpa châ vei.
17 Aru lâta a rôh la; athihpa mâchhiesana hnei khah y. Na khutho a khu la, na pheiky a ky la, na hmao chahu kha la, chyhsazy pati chhao nie khah y,” tah ta.
18 Chatanachata my ta zawpizy hnohta bie reih na ta, zâlâna chata ei lahpinô vaw thi thlâh ha ta. Chatawhcha my ta bie eina piepa hawhna chata tao na ta.
19 Chatawhcha chyhsazy chata ei hnohta, “He hawhta na hmotaopazy he eima châta khâpa ma a châ tahpa maniah chho aw va chi mâ?” tah ei ta.
20 Chatanachata kei chata ama hnohta, “ABEIPA bie ei hnohta vaw tlô ta;
21 Izarel chhôhkhazy hnohna chata reih la, Abeipa KHAZOHPA chata he tana heta a tah: Ei supathaihpa nama thatlôna, namâ palaikhei chaipa, nama mo lôhrâtlôna chaipa, nama pasa ngaitapa cha ei papua aw; nama sawchapawzy, nama sawchanôzy hnôh lâta nama siesaipazy cha zaozi ta ama pao aw.
22 Ei taopa hawhna tlai heta nama tao hra aw: nama hmao chahu leipa aw eichi ta, chyhsazy pati nie hra aw veih eichi.
23 Nama khuthozy chhao a khu aw eichi ta, nama pheiky namâ ky aw; mâchhie sa leipa aw eichi ta, cha hra aw vei eichi, nama hmoparaona lianazy chata leilô aw eichi ta, nama chakhei rairieh aw.
24 He hawhta Ezekiel he nama châta pamosana châ aw ta; a taozie lymâ hawhta nama tao awpa a châ. He he a vaw tlô tina chata Abeipa KHAZOHPA cha ei châ ei cha tahpa nama pahno aw, a tah,’ tah na ta.
25 “Chatawhcha nâ, chyhsa y, âmo tawhta ama thatlônazy, ama rôhnahna alynazy, ama mo lôhrâtlôna chaipazy, ama pachâ chaipazy, ama sawchapaw nata ama sawchanôzy, ei lapa hawpa noh liana chata,
26 cha noh liana tlai chata a râpa cha na hnohta a vy aw ta, cha pahnosa aw vei ma?
27 Cha noh liana chata a râpa hnohna chata, na pakah â aw chi ta, a hnohta bie reih aw chi ta, a chalih thlâh ha leipa aw chi ta. Chatanachata ama châta pamosana châ aw chi ta; chatanachata ABEIPA cha ei châ tahpa ama pahno aw,” tah ta.