Narô pano
1 ABEIPA bie cha ei hnohta vaw tlô ta:
2 “Chyhsa y, chanô pano, nô pakha saw y ei ta;
3 Izi râh liata sihryna kyh tao ei ta; ama laihsa dyuta tawhta sihryh ei ta; chazy liana chata ama sâhpizy hria ei ta, ama laihsa kôna sâhpizy thata hmiepa ei ta.
4 Pakha a uhthei viapa moh cha, Ôhôlah châ ta, a narônô cha Ôhôlibah châ ta. Kei eih vaw châ haw ei ta, sawchapawzy nata sawchanôzy sa ei ta. Ama moh liana chata Ôhôlah cha Samari châ ta, Ôhôlibah cha Zerusale a châ.
5 “Ôhôlah cha kei eih a châ tawhta sihry haw heih ta; a khopa a vaih moh Asuria cha a hyhia ta,
6 a vaotuhpazy, ryureituhpazy, satlia hiatlia chhih ngaitapa sai, arâ chô liata a kiahpa a sailawpa a bupazy cha.
7 Hezy Asuria chyhsa phapa zydua liana heta a papuapalei ta, ahyhiapazy, khazoh nohthlahpa zydua chata a papuapalei heih ta.
8 A laihsa dyuta tawhta a sâhpizy ama hriapa tyhpa nata amâ ziakhei tyhpa vâta Izi tawhna khata a sihryhpa bâh hlei vei; âmo chhaota ama sihrypa chô liata lei thlu ei ta.
9 Chavâta a khopazy, Asuria ahyhiapazy ku tlai liata ei patusa.
10 Hezy heta a thluahruana cha hmôpa ei ta; a sawchapaw nata a sawchanôzy lapa ei ta; ano chhao cha zaozi ta thie ei ta; chanôzy hry liata a pachhiparyna chaipa a vaw châ haw, a chô liata pachiapa hawhna cha ama patlô haw.
11 “A narônô Ôhôlibah chata he he hmô ta, châhrasala a uhta hlâta ano khopa hyhiana liana chata paru via ta, a sihryna chhao cha a uhta sihryna hlâta paru via hra ta.
12 Asuria mo a vaih, râh a vaotuhpa nata ryureituhpa satlia hiatlia chhih ngaitapa, arâ a kiahpa a ngia ngaitapa ta a tobipazy cha ahyhia ta.
13 Papuapaleipa ta a y tahpa hmô na ta; ama pano ta a yzie miakhasai amâ chhih.
14 Châhrasala a sihryna cha papôh rili ta; chapaw nohthlahpa pâhchhô liata taopa, Kaldia mozy nohthlahpa sailawpa tobipa,
15 a chai liata chaisaihna saipa ta, khutho a ngia ngaitapa a khupa, ama zydua ta abei hmia phaoh ngaitapa Kaldia râh ama pina râh liata Babylaw mo alyu ngaitapazy cha a hmôpa vâta.
16 Âmo a hmô pata nahta ahyhia ta, ama hnohta Kaldia taihta chyhsa tuah ta.
17 Chatawhcha Babylaw mozy cha a hnohta apheina rakhô liata a vy ei ta, ama sihryna ta papuapalei ei ta; âmosasyh ta pasichhihpa ta a tao haw ei ta, ano chata âmo â hao.
18 A sihryna palâsa ta, a thluahruapa palâsa nota, a narônô tawhta ei chhaihpa haw tlaita, ano chhao cha a chhaih haw na ta.
19 Châhrasala a laihsa nota Izi râh liata a sihry notapa a thei thlâh hapa vâta sihry rili ta,
20 a sihrytuhpa a sâpa alâ sâhpa hawh tlaita, a chi arâzy chi arâzy chi hawhpa tlai cha papua ta.
21 He hawhna heta na thyutlia noh sihryna, Izi chyhsa ta na thyutlia noh sâhpizy ama cha hriapa ama hmiepa kha na pahno haw heih.
22 Chavâta hy Ôhôlibah y, he hawhna heta Abeipa KHAZOHPA chata a tah: “Cha khotuhpa na pathipalôh ta a tlai chhai kaw hawpazy cha pathyu aw na ta, su to tawhta ei pakhy aw:
23 Babylaw mozy nata Kaldia mo zydua, Pekô zy, Shôa zy, Kôa zy nata ama hnohta Asuria mo zydua chhaota, âmo zydua chhaota, âmo zydua ta satliapa khochhih ngaitapazy, râh a vaotuhpazy, ryureituhpazy ama zydua ta molaipazy nata moh pathâhpazy, ama zydua ta arâ kiapa ta amâ vy aw.
24 Chatawhcha chaihraih zy, adyuhna talaili zy, talailizy nata zawpi pôhpakhypa ta ama châ dyuh aw; vyhphao nata chhôhkhanazy, dawh lakhuzy chhaota na chheipâh ta ama cha chadô aw, ama hnohta pachiana pavaosa aw na ta, ama bie pachiapa lymâ hawhta na chô liata ama patlô aw.
25 Chatawhcha na chô liata ei hiatliana patlôsa aw na ta, hiehâh ngaitapa ta a cha tah aw ei. Na hnapasuzy nata na nahkhaohzy hlaih aw ei ta, a laibâhpazy zaozi ta thie aw ei ta. Na sawchapawzy nata na sawchanôzy cha lapa aw ei ta, a laibâhpazy cha mei ta a kâ sao aw.
26 Na chysiazy cha pahluhpa hra aw ei ta, nâ tobina a ngia ngaitapazy cha ama la aw.
27 Na sihrykheina nata Izi râh tawhta na sihryna cha cha pabâsa aw na ta; chatanachata âmo lâta mohmia pasaih khao leipa aw chi ta, Izi râh cha a thei thlâh ha khao aw va chi.
28 Abeipa KHAZOHPA chata he tana heta tah tlôh ta: Nâ hao hawpa, nâ chhaih hawpazy ku tlai chata ei cha patusa aw;
29 thata châ hao aw ei ta, na hriapasana theilâpa zydua cha lapa aw ei ta, thluahruapa ta nata sasaihpa ta a cha siesai aw ei. Na sihryna thluahruana na haona nata na sihryna chhao tlai cha palâsapa ta a y aw,
30 he hmozy he na chô liata a vaw tlô aw, pho hropazy a chadaipa ta sihry chi ta, ama khazoh nohthlahpazy ta papuapaleipa ta na ypa vâta.
31 Na narônô lâpi a chhih hra chi ta, chavâta a nyu cha na ku liata ei cha pie aw,” tah ta.
32 Abeipa KHAZOHPA chata he tana heta a tah: “Na narônô nyu tôh seihpa laipapi tlai cha doh aw chi ta; pahneisaopa nata taolapa ta na y aw, tlô ngaita kaw tlôh ta;
33 parina nata pachârôhna ta bie aw chi ta. Noâhna nata roryhrana nyu, na narônô Samari nyu chhaota doh khai aw chi ta;
34 doh aw chi ta, a nyu chhao a siapa ta na sy khai aw, na sâ phia aw chi ta, na sâhpizy na hriechheih aw; kei ta rei haw tlôh na ta, Abeipa KHAZOHPA ta a tah.
35 Chavâta Abeipa KHAZOHPA chata he tana heta a tah: Na my chi ta, hnôh lâ eina chhypa vâ chi ta, nâ haona nata na sihryna maoh cha na phaoh awpa a châ.”
36 ABEIPA ta ei hnohta reih heih ta; “Chyhsa y, Ôhôlah nata Ôhôlibah cha na pachia aw ma? Ama pasichhihnazy cha ama hnohta phuah mah y.
37 Aphei haw tlôh ei ta, thisaih cha ama ku liata a hlao ta; ama khazoh nohthlahpa hnohna chata amâ phei haw; ama sawchapawpazy ei châta ama sapa cha, ama hnohta kâ patlô awpa ta mei liata thy ei ta.
38 Cha leipa chhaota ei hnohta he he ama tao: Âmo lilaw ta ei supathaihpa cha papuapalei ei ta, ei pahânohzy chhao ama parao.
39 Ama khazoh nohthlahpazy chata ama sawzy, ama thi tawhta âmo lilaw chata ei supathaihpa papuapalei awpa ta a ngia tyh tlôh ei ta. Chatawhcha he hawhna heta ei o chhôh liata tlai ama tao tyh.
40 Lâhlapi tawhta chyhsa avy awpa ta bie tah eichi ta, chyhsa tuah ei chi ta, a vy ei ta. Âmo châta na ngai a si chi ta, na mozy liata hlyu hnia chi ta, hmobaoh hropazy ta a tobi chi ta;
41 rakhô rôhnah ngaitapa liata a tyu chi ta, a hmiakô liata tlâhkhai a chhuahdy chi ta, ei rohpahâhpa nata ei sathawzy cha liana chata na sopa tyh.
42 Cha liana chata zawpi alypa pyu theipa châ ta; chyhsa zawrâpa dei leipa chhao râhpathohpa tawhta sahmah paripazy a vaw chhi ei ta, ama pano ta lâkyuzy a ky ei ta, lâkyu a ngiapazy a ky ei ta.
43 “Chatawhcha kei chata sihrypa nôpi hawpa he ama ykhei khoh nata ano ta a hoh aw va ma i? tah na ta.
44 Sihrypa chanô hnohta ama siepa hawhta a hnohta a ngia hra ei ta. Cha hawhna chata chanô haopa Ôhôlah nata Ôhôlibah hnohna chata amâ ngia haw.
45 Châhrasala chyhsa siapazy chata apheipa chanôzy nata thisaih palo a hmâhpa chanôzy ama pachiapa hawhta apheipa chanôzy châ ei ta; ama kuzy liata thisaih a hlaopa vâta,” tah ta.
46 Abeipa KHAZOHPA chata he tana heta tah tlôh ta: “Âmo chô liata zawpi pakhy aw na ta, pahraosa aw na ta, ei pataochhiesa aw.
47 Chatawhcha pôhpakhypa sahlao chata alô ta vawh aw ei ta, ama zaozi ta chhawsao aw ei ta; ama sawchapawzy, ama sawchanôzy thie aw ei ta, ama ozy mei ta ama rao aw.
48 He hawhna heta sihryna cha râh tawhta pahlei aw na ta, chanô zydua ta nama sihryna he tao khao chacheita lei awpa a châ tahpa nama pahno nawpa ta.
49 Chatawhcha nâmo chô liata nama sihryna cha cha thô aw ei ta, nama khazoh nohthlahpa moleinazy cha pasa nama tao aw; chatanachata kei he Abeipa KHAZOHPA ei châ tahpa nama pahno aw,” tah ta.