Bei moleipazy chhoreina
1 Thlahpa chata na chalo ta, ABEIPA o nochhi lâ a ngiana nochhi lâchhâh liana chata na tlôkhei ta. Chatawhcha angiana ochhi kiapâh lâna chata chyhsa pakih nata papangawh vaw y ei ta; ama hry liata Azu sawchapawpa Za-azaniah nata Benaiah sawchapawpa Pelatiah zawpi molaipazy cha hmô na ta.
2 Chatawhcha ano chata ei hnohta, “Chyhsa y, hezy he hmoparaona a taotuhpazy châ ei ta, he khihpi liana heta moleina a papuatuhpazy ama châ;
3 O sa daihti châ vei; he khihpi he sa pasyuna beih châ ta, keimo he a sa cha eima châ,’ a tahtuhpazy cha.
4 Chavâta chhochhielie la, hy chyhsa y, ama chô liata chhochhielie teh,” tah ta.
5 Chatawhcha ABEIPA Thlahpa cha ei chô liata vaw tlô ta ano chata ei hnohta, “Reih teh, ABEIPA chata he tana heta a tah: He hawhta tah tyh eichi ta, hy Izarel chhôhkhazy saih u; nama palôhrupa liata hmo a vaw tlôpazy pahno khai tlôh na ta.
6 He khihpi liana heta nama thihpazy cha papôh rili eichi ta, othliahzy cha nama chyhsa thihpa ta pabie haw eichi ta.
7 Chavâta Abeipa KHAZOHPA chata he tana heta a tah: Na chyhsa thihpa a liah liata na sopazy cha a sa châ ei ta, he khihpi he a sa pasyuna beih cha a châ; châhrasala a liahliah tawhtapa pasiepa ta nama y aw na.
8 Zaozi cha chi eichi ta; nama chô liata zaozi ei vaw patlôsa aw, Abeipa KHAZOHPA chata a tah.
9 A liahliah tawhtapa cha papua aw ei na ta, khichhaipazy ku liata cha patusa aw ei na ta, nama thâtih ei pachia aw.
10 Zaozi ta thi aw eichi ta; Izarel râhri lâna chata nama thâtih ei pachia aw, chatanachata kei he ABEIPA cha ei châ tahpa nama pahno ha aw.
11 He khihpi he nama sa pasyuna beih châ leipa aw ta, nâmo chhao a chhôh liata sa châ hra aw veih eichi; Izarel râhri lâna chata nama thâtih pachia aw na ta;
12 ABEIPA cha ei châ tahpa nama pahno ha aw; ei ryhpa taopa cha a chhi leipa ta, ei bie reipa chhao zyh hra veih eichi, nama chheipâh ta phopizy taona zie cha tlao zyh haw eichi ta, a tah na,” tahpa ta.
13 Chatawhcha bie ei rei nona chata Benaiah sawchapawpa Pelatiah cha vaw thi haw ta. Chatanachata a khu lâta pao na ta, ao paro ngaitapa ta awh na ta, “Aw, Abeipa KHAZOHPA y! Izarel laibâhpazy pamona na tao aw ma?” tah na ta.
Kua heihna nata tao pathina bietaina
14 Chatawhcha ABEIPA bie cha ei hnohta vaw tlô ta,
15 “Chyhsa y, na unawhzy, na unawhzy tlai cha na chiheizy nata Izarel chhôhkha zydua, ama zydua ta Zerusale a pahrâtuhpazy ta, ‘ABEIPA tawhta sie syulyu teh u, he râh he keima eih a châ awpa ta piepa a châ haw na,’ ama tahpa zy kha châ ei ta.
16 Chavâta ‘Abeipa KHAZOHPA chata he tana heta a tah: Lâhlapi ta phopizy hry liata râh hluhpi liata ei papai tarawpa ta, bohpi leipa chhaota ama vaw tlôna râh liana chata supathaihpa ei châ aw,’ tah ta.
17 Chavâta ‘ABEIPA Khazohpa chata he tana heta a tah: ‘Phopizy hry tawhtapa cha cha pakhy aw ei na ta, namâ paihna râh tawhta cha pakhy heih aw ei na ta, Izarel râh cha ei cha pie aw ei,’ tah ta.
18 Chatawhcha cha liana chata a vy aw ei ta, hmo puapa zydua nata hmo pasi a chhihpa zydua, cha tawhtapa cha ama pahlei aw.
19 Chatawhcha pathipalôh su kha cha taopa aw ei na ta, palôhrupa thiehpa ei cha pie aw ei; ama sapa tawhta pathipalôh châkarupa cha lapa aw na ta, pathipalôh naipa ama hnohta ei pie aw,
20 ei ryhpa taopazy zyhpa ta, ei bieraopazy hneipa ta ama tao theina hâh ta; chatanachata ei chyhsazy châ aw ei ta, kei chhao ama Khazohpa ei châ aw.
21 Ama puana nata ama pasichhihna, ama pathipalôh liata a ypazy deikua cha ama molei viarithôna cha ei pakhosa aw, Abeipa KHAZOHPA chata a tah,” tahpa ta.
22 Chatanachata cherubi sahlao chata ama mathlawzy pakai ei ta, ama kiapâh liana chata talaili pheizy y ta; chatawhcha Izarelzy Khazohpa rôhnahna cha ama chô liata y ta.
23 Chatawhcha ABEIPA rôhnahna cha khihpi liahliah tawhta kiah ta, khihpi nochhi lâchhâh ta tlâh sâhpa liana chata a kaw duah ta.
24 Chatawhcha Thlahpa chata na chalo haw ta, aluahna liana chata Khazohpa Thlahpa ta Kaldia râh liata seichâna ta a ypazy hnohna chata na tlôkhei ta, aluana ei hmôpa chata na kiasai haw ta.
25 Chatanachata sei a châpa sahlao hnohna chata ABEIPA hmo eina pamosapa zydua cha reih haw na ta.