Achhyna-o tawhta Khazohpa rôhnahna a diana zie
1 Chatanachata vaw moh na ta, cherubi sahlao luh chô liata avâ khuna ypa liana khita âmo chô liata saphai lô alyu kawpa ryureina dyuchhai hawh tlaita aluahpa he a vaw lâ ta.
2 Chatawhcha ano chata lini poh a bupa hnohna khata, “Cherubi ry liata talaili phei a pahiepazy likawh liana hao vâ ngia la; cherubi sahlao likawh ta mei paoh hao na ku karâ no a biepa ta vâ pha la, khihpi chô liata hie teh,” tah ta. Chatawhcha ei mohmôna lia tlaita a ngia haw ta.
3 Chatawhcha chyhsa a ngia nona khata cherubi sahlao cha o kâ lâ chachâh lâchhâh ta a duah ei ta; dôhpachhôh chhôh viapa cha meihdo ta bie haw ta.
4 Chatawhcha ABEIPA rôhnahna cha cherubi sahlao tawhna chata kiah ta, chhikao chô liana chata a kaw duah ta; o cha meihdo ta bie ta, dôhpachhôh cha ABEIPA rôhnahna khaihpa chata bie haw ta.
5 Chatawhcha cherubi sahlao mathlaw pyuzy cha dôhpachhôh khôtho lâ viapa liana zy chhao chata Khazohpa Atotaotheipa ta bie a rei nota a ao hawhna tlaita theipa ta y ta.
6 Chatawhcha lini poh a bupa hnohta, “Cherubi sahlao likawh ta talaili phei a pahiehpa likawh tawhta mei kei la teh,” tahpa ta bie a pie nata, ano cha a kei ngia ta, talaili phei kiapâh liana chata a duah ha ta.
7 Chatawhcha cherubi chata cherubi sahlao likawh tawhna chata, cherubi sahlao likawh liata mei a ypa cha paza ta, la ta, lini poh a bupa ku liana chata pie ta, ano chata la ta, pua haw ta.
8 Cherubi sahlao cha ama mathlawzy liata chyhsapa ku hawhna tlai he a vaw lâ ta.
9 Chatawhcha moh na ta, cherubi sahlao kâ lâna chata talaili phei miapalih, cherubi pakha kiahpa liata talaili phei miakha; cherubi hropa kiapâh liata talaili phei hropa hmô na ta, talaili phei a lânazie cha bery lô hawhna he châ ta.
10 Amâ lânazie liana chata ama papalih ta miakha châ ei ta, talaili phei miakha chhôh liata talaili phei hropa a ypa hawhna he châ ta.
11 Ama sie nota, ama kâ lâ miapalih ta sie thei ei ta, ama sie no chhaota a pahieh beih veih ei; anodeikuacha a hmiatuapa a heina lâ maih zi ei ta, ama sie nota a pahieh hlei veih ei.
12 Chatawhcha ama pôhpa zydua cha ama kyzy, ama kuzy, ama mathlawzy nata talaili pheizy chhao kha mokhaoh ta bie ta, ama papalih liata talaili pheizy chhao kha.
13 A talaili pheizy kha cha ei nahkhao theina lia tlaita talaili phei pahiepa, tahpa ta a châ.
14 Chatawhcha âmo zydua ta hmia sâpalih hnei chyu ei ta, a hmiatuapa hmia cha cherubi hmia châ ta, a hmia mianona cha chyhsapa hmia châ ta, a miathôhna cha chakeibarôhneipa hmia, a mia palihna cha pahmôpi hmia châta
15 Chatawcha cherubi sahlao cha kiah haw ei ta. He he Keba chavah kiah liata hmohrohneipa ei hmôpa cha a châ.
16 Chatawhcha cherubi sahlao ama sie nona chata talaili pheizy cha ama kiapâh liata sie hra ta; cherubi sahlao khata alei tawhta kiah awpa ta ama mathlawzy ama pakai nona chata talaili pheizy chata a chhaih beih leipa ta.
17 Amâ dua nota, hezy he aduah hra ei ta, ama kia nota hezy he kiah tyh hra ei ta; hmohrohneipa thlahpa cha âmo liata y tlôh ta.
18 Chatawhcha ABEIPA rôhnahna cha o chhikao chô tawhna chata pua ta, cherubi sahlao chô liana chata a duah haw ta.
19 Chatawhcha cherubi sahlao chata ama mathlaw pakai ei ta, ama pua nata ei mohmô tlai liata alei tawhta kiah ei ta, talaili pheizy cha ama kiapâh y lymâ ta; ABEIPA o a ngiana nochhi lâ ochhi kiapâh liana chata a duah ei ta; Izarel Khazohpa rôhnahna cha ama chô liata y ta.
20 He he Keba chavah kiapâh ta Izarel Khazohpa ry liata hmohrohneipa ei hmôpa cha a châ; cherubi sahlao ama châ tahpa ei pahno.
21 Ama zydua ta hmia nanopa miapalih nata mathlaw miapalih hnei chyu ei ta, ama mathlaw ry liata chyhsapa ku hawhna tlai heta y ta.
22 Chatawhcha ama hmia kyh liata cha Keba chavah kiapâh ta ei hmôpa hmiazy hawhna hra kha amâ lâna yzie nata âmo tlai chhao châ ei ta. Chatawhcha ama hmia lâ lymâ ta sie chyu ei ta.