Biesozy 31
Abei châta chhosiena
1 Abei Lemuel, Massa beipa bieso, a no ta a pachupazy cha:
2 Ei sawchapawpa, hy ei chhi thei, hy ei chhiesakhâhpa sawchapawpa vaw nahthlie tua.
3 Na thatlôna cha chanô pie kha la, abei a parao tyhpa lâta na hrona zy chhao cha.
4 Hy Lemuel y, abeizy châta châ leipa ta, abei ta kresawti do awpa châ leipa ta, abeisaw zy ta “Khataih liata e sahhmah a y, ”ama tah awpa châ hra vei;
5 ama doh khiahtala ryhpa my aw ei ta, rietheipazy chô liata ryureina do leipa ta ama tao pathlei aw na.
6 Leidia daihmâpazy cha pari theipa dopa pie ula, pachârôhpa cha kresawti pie teh u;
7 doh sala ano rietheina cha my sala, a rietheina zie a thei thlâh ha leipa ta y mawh sy.
8 Reihpathlie thei leipazy chata na pakah â la, roryhrapa ta siesaipazy kyh liata zy.
9 Na pakah â la, a siapa ta ryureih la, sipasapa nata angiana a hneipazy chô liata ryureih teh.
Lahpinô phapa reithaina
10 Chanô kôpa ahy e a hmô thei aw? A mâ cha rubi lôsôhpa hlâta a sâh syulyu tlôh ta.
11 A vahpa pathipalôh chata ngâ ta, tovyuhna hnei leipa ta y aw vei.
12 A hro noh zydua chhôhta a chhiena lâ châ leipa ta phana lâ saita hmo a taopa tyh.
13 Mietahkupa hmi nata lini pala tlua ta, a ku ta palôh tlapa ta a hria tyh.
14 Sôhryhpa balyh hawhta châ ta, râh hlapapi tawhta niepa a la tyh.
15 Khih pavâ hlâta thyu ta, a chhôhkhapazy niepa a pie tyh, a chakaotuhpa laihsazy lâta ama tao awpa zy.
16 Lyu awpa pachâ ta, chalei ta; a ku tlai ta kre thei loh ta.
17 Thatlôna ta a chai a saih ta, a bâhzy a tha a patlô tyh.
18 A sôh zuana a thôh tahpa pahno ta. Zâ ta chhao a meiôh thi beih vei.
19 A ku ta rahâ ku patu ta, a ku ta lahmi patu ta.
20 Aku sipasapa lâta pazawh ta, a ngiana a hneipazy taihta a kuzy paza ta.
21 A chhôhkhapazy châta dâhaw chaleipa ta, a chhôhkhapa zydua cha poh saihlawpa pabupa ta y tlôh ei ta.
22 Ano chata siphia poh kiky a ngiapa tao ta; a chysia cha lini pala nata poh nohsaipapa a châ.
23 Kuh chhikao liata ama râh machâ zy chhaota amâ tyu nota, a vahpa cha a pahno.
24 Lini chysia tao ta, zuah tyh ta; sôh zuapazy lâta chaisaina zy a paphao tyh.
25 A chysia cha thatlôna nata rôhnahna châ ta, daihti a vaw tlô awpa châta chhao pahnei ta.
26 Sona ta a pakah â ta, a paleih liana chata nohphana ryhpa bie a y.
27 Âmo chhôhkha khihsana zie a phapa ta moh ta, thathina viahchhâ cha nie vei.
28 A sawzy cha thyu ei ta, “Nohhlaopa tah ei ta; a vahpa chhaota reithai ta.
29 “Chanô hluhpi kô ngaitapa ta y ei ta, châhrasala nâ chata na khô khai haw,” tahpa ta.
30 Khokheina he dôna châ ta, chhithaina cha khâpa hrao leipa a châ. ABEIPA a chituhpa chanô deikua cha reithaipa a châ aw.
31 A kuzy theilâpa cha pie la, a hmotaopa ta kuh chhikao liana chata reithai mawh sy.
| Bo 1 | Bo 2 | Bo 3 | Bo 4 | Bo 5 | Bo 6 | Bo 7 |
|---|---|---|---|---|---|---|
| Bo 8 | Bo 9 | Bo 10 | Bo 11 | Bo 12 | Bo 13 | Bo 14 |
| Bo 15 | Bo 16 | Bo 17 | Bo 18 | Bo 19 | Bo 20 | Bo 21 |
| Bo 22 | Bo 23 | Bo 24 | Bo 25 | Bo 26 | Bo 27 | Bo 28 |
| Bo 29 | Bo 30 | Bo 31 | ||||