Asa ta a tao pathina zie (1Ab 13:15)
1 Odeda sawchapawpa Azariah chô liata Khazohpa Thlahpa vaw tlô ta,
2 Asa dy awpa ta pua ta, a hnohta, “Asa nata Zudah chyhsa zydua nata Benzami mozy saih u, ei bie nahthlie teh u; ano chhâh nama châ chhôh zydua ABEIPA cha nama chhâh a châ ta, ano nama tlua khiahtala hmô aw eichi ta, ano namâ heisai khiahtala, ano chhaota a châ heisai aw ei.
3 Izarel mozy cha bohpi Khazohpa hmeihseihpa hnei leipa nata pachutuhpa nata theihthaipa hnei leipa ta nata ryhpa hnei leipa ta y ei ta;
4 anodeikuacha ama nôpo ta ABEIPA Izarel zy Khazohpa lâ a heihpa ta ama tlua pata nahta ano cha ama hmô.
5 Cha nona chata a puapa nata a ngiapa zy chata thlahlôhpa ta yna y leipa ta, khihnarâh chhôh liata a ypa zydua chata nôpona ru ngaitapa sai tlao châ ta.
6 Pho nata pho, khih nata khih, thata a paraoh ei ta, Khazohpa ta rietheina to ta ama nô a papo.
7 Châhrasala nâmo la thatlô ngaitapa ta y ula! Diathlâ khah u, nama hmotaopa ty cha nama hmô aw,” tah ta.
8 Asa ta cha biezy nata hrohsopa Ôdeda bie reipa zy cha a thei nahta a riah a paphasa ta, Zudah râh nata Benzami râh zydua tawhtapa nata Ephrai tlâh râh liata a khih lapa tawhtapa hmo pasichhipa zy cha pahlei khai ta, ABEIPA aikah kiapâh liata ABEIPA maisâh cha padua pathi ta
9 Zudah râh nata Benzami râh liatahpa zydua ano hnohta khih a sa hrapa Ephrai nata Manase nata Simeôna râh liatahpa zydua chhao pakhy khai ta, ABEIPA Khazohpa a hnohta a y tahpa ama thei nahta Izarel râh tawhtapa ano lâta thata a vaw bai ei ta
10 Asa kô hrawhleipangawh a bei kô a thla thôhna liata Zerusale liata ahmaohpakhy chaimâh ei ta.
11 Cha noh liana chata ama hraona hmo lapa viahchao tôhpa za sari nata mietahkupa sâh sari ta ABEIPA lâta atheih ei ta.
12 Chatawhcha ama palôhru nata ama pathipalôh zydua ta ABEIPA ama mahpaw zy Khazohpa tlua awpa nata
13 ahyrai ABEIPA Izarel zy Khazohpa a tlyh leipa cha a lai a chyh, a chapaw a chanô ta, thie awpa ta biehraih ei ta
14 ABEIPA lâta ao paro ngaitapa awna ao ta chiahmie pyu nata ki pyu chhaota chhie sa ei ta.
15 Zudah zydua cha ama chhiesapa liana chata aly ei ta; ama pathipalôh hmeihseihpa ta chhiesapa châpa ta bie a raoh ngaitapa ta a tluapa ama châpa vâta hmô ei ta, ABEIPA ta su to liata thlahlôhpa ta yna pie ta.
16 Abei Asa nô Maaka chhao cha khazoh nohthlahpa pasichhih ngaitapa Ashera a taopa vâta abeinô a châna pabâsa ta. Asa chata a khazoh nohthlahpa cha chhawh pathla ta, padizao khai ta, Kidraw chavah liata mei ta rao ta.
17 Anodeikuacha Izarel râh tawhtapa su sâhpa zy cha pahleipadia leipa ta, châhrasala Asa palôhrupa cha a bei chhôh liana chata a sia ngaitapa châ ta.
18 Chatawhcha a paw ta hmo a hlâpa nata anô hlâpa tâkâri zy, ngôh zy hmobaoh zy cha Khazohpa o liata a ngiakhei ta.
19 Asa a bei no kô sythôh nata kô pangawh chhôh cha adyuhna rai y leipa ta.