Asa abeina (1Ab 15:9-12)
1 Abizah cha a mahpawpa zy hnohta a mô ta, Davi khihpi liata pabu ei ta; ano vyuhpa ta a sawchapawpa Asa abei ta. A bei chhôh liana chata ama khihnarâh cha kô sypalih tlai thlahlôhpa ta y ta,
2 Asa chata ABEIPA Khazohpa mohmô liata hmo phapa nata a dopa tao tyh ta.
3 Râh hropa khazoh maisâh zy nata su sâhpa zy pahleipadia ta, lôbô zy parao ta, Asherazy thlu ta,
4 Zudah sahlaozy cha ABEIPA ama mahpawzy Khazohpa tlua awpa nata a ryhpa nata a biepiepa zyh awpa ta biepie ta;
5 Zudah khih zydua liata su sâhpa zy nata noh khazoh nohthlahpa zy pahlei khai haw hra ta. Ano ry liata khihnarâh cha thlahlôh ngaitapa ta y ta.
6 Zudah râh liana chata kuh a hneipa khihzy sa ta, khihnarâh cha thlahlôh ngaitapa ta y ta. Cha kô zy liana chata ahyhmah adyuhpa hnei vei, ABEIPA ta thlahlôhna a piepa vâta.
7 Zudah zy hnohna chata, “He khihzy he padua heih ei suh u, kuhzy ta dôh ei sih la, o sâhpa zy, kuh ochhi zy, a hraina zy tao ei suh u; ABEIPA eima Khazohpa he eima tlua hawpa vâta khihnarâh eima ry liata vaw y lymâ haw ta; ano cha tlua pi ta, ano chata ki to liata thlahlôhpa ta yna maniah a pie haw,” tah ta. Chatanachata padua pathi haw ei ta, thlao a chhi lymâ ei ta.
8 Asa chata Zudah chyhsa vyhphao nata asei a chabapa pheisaih thy sythôh hnei ta, Benzami chyhsa vyhphao nata libaw a keipa thy syno nata thy charie; cha zydua cha chyhsa thatlôpa riahphapa sai ama châ.
9 Ethiôpia chyhsa Zera pheisaih thy za kha nata talaili za thôh chhaota, âmo adyuh awpa ta pua ta, Maresa vaw tlô ta.
10 Asa cha ano adyuh awpa ta kei pua ta, Maresa liata Zephatha saikao liata a kei paziah ei ta.
11 Asa chata ABEIPA Khazohpa pado ta, “ABEIPA dei leipa ta cha chyhsa thatlô ngaitapa tawhtapa thatlô leipa a chakheituhpa y leipa ei ta. Hy ABEIPA eima Khazohpa y, maniah bao teh, nâma ngâpa ta, na moh ta he zawpi sahlao he adyuh pi ta. Hy ABEIPA y, eima Khazohpa châ chi ta; chyhsapa ta nâma cha cha pahnie khah se,” tah ta.
12 Chatanachata ABEIPA chata Asa nata Zudah zy hmiakô liana chata Ethiôpia mozy cha adyuh ta, Ethiôpia mozy cha a râpai haw ei ta.
13 Asa nata a sahlaozy chata Kera taihta a chadai ei ta, Ethiôpia mozy cha a thipa ama hluh ngaitapa vâta a chyh thei khao leipa ei ta; ABEIPA nata a pheisaih zy hmiakô liata panawhpa châ haw ei ta; hraona hmo hluhpi la ei ta.
14 Kera chheipâh liata khih zydua cha adyuh ei ta, ABEIPA cha chi haw ei ta, khih zydua cha hrao ei ta, hraona sôh a hluh kaw.
15 Sahroh a pasatuhpa poh-o zy chhao adyuh ei ta, mietahkupa nata râraoseihpa a hluhpi a chhi ei ta, Zerusale lâta kua haw ei ta.