Zephania 1

Zephania 1

Abeipa hiehâhna noh

1 Zudah beipa Amawna sawchapawpa Zôsiah a bei nota, ABEIPA bie Zephania, Kusi sawchapawpa, Kedalia sawchapawpa, Amariah sawchapawpa, Hezakiah sawchapawpa hnohta a vaw tlôpa cha.

2 “Alei chô tawhtapa hmo zydua ei pahleipadia khai aw,” ABEIPA ta a tah.

3 “Chyhsa nata sazy pahleipadia aw na ta; A zawpa pavawzy nata tilaipi ngazy pahleipadia aw na ta. Moleipazy papao aw na ta; alei chô tawhtapa chyhsapa ei pahlei aw,” ABEIPA ta a tah.

4 “Zudahzy nata Zerusale pahrâtuhpa zydua chô liata ei ku hy aw na ta; he su tawhna heta Baal laibâhpazy cha chhaw pathla aw na ta, ama nohthlahpa theihthaipazy chhao;

5 o laki liata vâ lâ hmozy lâta a bôh tyhpazy, ABEIPA lâta chhiesapa ta Milkô moh reipa ta chhiesapa ta a bôh tyhpazy,

6 ABEIPA a heisaituhpazy nata ABEIPA tlua leipa ta, ano a chhohia leituhpazy cha ei pahleipadia aw,” tah ta.

7 Abeipa KHAZOHPA hmiakô liana chata a thlih thlâh ha teh! ABEIPA noh cha a hnia hawpa vâta; ABEIPA chata atheihna a chhuahnoh aw ta, a chyhsa hmâpazy chhao pathaisa haw tlôh ta.

8 ABEIPA atheihna noh liana chata “Hyutuhpazy nata abei sawchapawzy nata pho hropa chysia ta a tobipa zydua cha ei hrie aw.

9 Cha noh liana chata chhikao a chakâpa zydua, ama hyutuhpazy o nôchhiena nata dona ta a pabietuhpazy ei hrie aw.”

10 “Cha noh liana chata Nga Chhikao tawhta awna pyu zy, Misneh tawhta sâh ngâna zy, tlâh tawhta paro ngâpazy a y aw,” ABEIPA ta a tah.

11 Môrta mo saih u, Kana mo zydua ama leidia vâta sâh ngâ thlâh teh u! Tâkâri a phaohtuhpa zydua ama leidia khai haw.

12 Cha daihti liana cha meiôh pakhaihpa ta Zerusale tlua aw na ta, chyhsa kresawti didâpa hawhta ypa ta, ama palôhrupa ta, ‘ABEIPA ta papha leipa aw ta, parao hra aw vei,’ a tahtuhpazy cha ei hrie aw.

13 Ama sôhzy cha hraona ta châ aw ta, ama ozy cha a ry aw. Ozy sa aw ei ta, châhrasala pahrâ aw veih ei; kresahdôzy tao aw ei ta, châhrasala a kresawti cha doh aw veih ei,” tah ta.

14 ABEIPA noh rôhnah ngaitapa cha a hnia na; a hniapa ta a tlô patoh aw, ABEIPA pyu cha, cha liana chata chyhsa thatlôpa cha thata a sâh aw.

15 Cha noh cha hiehâhna noh châ ta, nôpona nata rietheina noh, raona nata roryhrana noh, zohna nata vâpanoh noh, amei nata zohkaluhna noh châ ta,

16 kuh dôhpa khihpizy chô liata nata khihchaki kuh sâhpazy chô liana chata chiahmie nata chariah pyu y noh châ ta.

17 Chyhsazy chô liata rietheina vaw patlôsa aw na ta, mochaopa hawh tlaita sie aw ei ta, ABEIPA chô liata ama moleipa vâta; ama thisaih cha doh-lei hawhta patlai aw na ta, ama sapazy chhao ie haw tlaita.

18 ABEIPA hiehâhna noh liana chata ama ngôh tlyma, ama tâkâri tlyma chhaota âmo pachha thei leipa aw ta. Râh tlokhu he a hiatliana mei liana chata a kâ khai aw, râh liata a pahrâpa zydua pahlei aw ta, pahleina rarôh y ngaitapa tao tlôh aw ta. 

Zephania (Zephaniah)

Bo 1	Bo 2	Bo 3

Zephania 2

Zephania 2

Chheipâh liata phopizy raona

1 Hy pho zana cha a pahno leipazy saih u,

2 saviah hawhta papaipa ta nama y hlâta nata, ABEIPA hiehâhna chichhih ngaitapa cha nama chô liata a tlô hlâta nata ABEIPA hiehâhna noh cha nama chô liata a tlô hlâna heta a vy pakhy u la, a vaw hmaoh teh u.

3 Nâmo alei liata a reisipa zydua, a bie a ngiahpa saih u, ABEIPA cha tlua teh u; siana tlua ula, a reisi a chhuah teh u: ABEIPA hiehâhna noh liana chata nyupa ta nama y thei ngyu aw la.

4 Kaza cha siesaipa ta y aw ta, Askelaw cha rory pahrasapa ta y tlôh aw ta; Nohchhô ta Asadô papua aw ei ta, Ekraw cha a daophipa ta a y aw.

5 Tilaipi ngiakâ liata a pahrâpa Kere pho zy cha ama hu a po na! Hy Kana, Philistina mo râh, ABEIPA bie cha na chô liata a vaw tlô; pahrâtuhpa y leina taihta ei cha pahleipadia aw.

6 Chatawhcha tilaipi ngiakâ cha sibiepa hrohpa su châ aw ta, mietahkuvaihtuhpazy ariena su nata mietahkupazy yna a châ aw.

7 Tilaipi ngiakâ cha Zudah chhôhkhapa laibâhpazy châta châ aw ta, chazy liana chata ama mietahkupa zawzy bâ aw ei ta, zâlâ ta Askelaw ozy liana chata amâ rie aw. ABEIPA ama Khazohpa chata a vaw hmô aw ei ta, ama seichâna cha a palie aw.

8 “Môaba leina nata Amawna pathlazy awsaona, ei chyhsazy ama leina nata ama râhri liata ama parôhnahsana thei haw na ta.

9 Chavâta ei hropa tlai hawhta, Môaba cha Sawdawma hawhta châ aw ta, Amawna pathlazy cha Kawmawra hawhta ama châ tlai aw, thlahbei thih nata alôh khaoh nata chhâzaw pahrâ leipa a châ aw. Ei chyhsa laibâpazy chata âmo hrao aw ei ta, ei pho laibâhpazy chata ama pahrâ aw, “Pheisaihzy ABEIPA, Izarel Khazohpa ta a tah.

10 Cha cha amâ palaina vyuhpa ta ama hnei aw, Pheisaihzy ABEIPA chyhsazy chô liata a palaipa ta ama taolapa vâta.

11 Âmo chata ABEIPA cha chichhih ngaitapa châ aw ta, alei khazohzy cha chakâhpa ta y khai tlôh aw ei ta, chatawhcha chyhsazy ta ano amâ chhy aw, chyhsa to ta âmo su chyu liata, phozy yna liana chata.

12 Nâmo Ethiôpia mozy chhao ei zaozi ta thiepa ta nama y aw.

13 Chatawhcha maw lâ râh chô liata a ku hy aw ta, Asuria râh pahleipadia aw ta, Niniva khih rory pahrasa aw ta, râhpathohpa hawhta a chawhkaraipa ta apaysa aw.

14 A chhôh liata sa zaw chi to, Lyurâhpa sa zydua amâ byu aw; palika nata sawku zy chhao a tôh luh byupazy liata pahrâ aw ei ta; vaku zy cha opyzy liata hla ama sa aw; chhikao thaby zy liana chata ra-awhzy a sâh aw; sidy tho ta taopa zy chhao a meikiana y khao tlôh leipa ta.

15 He he khihpi thapha thei ngaitapa, ano a ngâ ngaitapa, a pathipalôh ta, “Keima hleikhô, ahy hmah y veih ei,” a tahpa cha a châ. Sazy a byuna su châ ta, a dâh kaw ha dia! A chapiapa maihta hmao to chi aw ei ta, ama ku ama chatho thlu aw. 

Zephania (Zephaniah)

Bo 1	Bo 2	Bo 3

Zephania 3

Zephania 3

Zerusale moleina nata chatlaina

1 Tyhmâhpa nata puapa, pasaipa-i hmâhpa khihpi cha a hu a po na!

2 Ao cha zo leipa ta, chhoreina a pyh leipa ta. ABEIPA cha ngâ leipa ta, a Khazohpa lâ a hnia khoh vei.

3 A chhôh liata a hyutuhpa cha, chakeibarôhneipa a rôh ngâpa châ ei ta; a pachiatuhpazy cha zâ changie châ ei ta, a mylâ taih cha-eih awpa khâpa hmah pahlôh veih ei.

4 A hrohsopazy cha chyhsa leipa, dôhmâhpazy châ ei ta; a theihthaipazy ta su pathaihpa ama papua palei, ryhpa cha thata ama parao.

5 A chhôh liata ABEIPA cha a sia na, hrao leina tao aw vei; my chareih ta a ryureina cha palâsa ta, khihdei maihta khoh beih leipa ta, châhrasala chyhsa sia leipa chata zana châh rai pahno vei.

6 “Phopizy cha pahleipadia na ta. ama kuhzy roryhrapa ta y ta; âmo othliahzy cha ahy hmah sie pahlie lei nawpa ta a dâh karopa ta tao na ta; ama khihpizy cha ama rao khai haw; ahy hmah y khao leipa ei ta, pahrâtuhpa rai y khao veih ei.

7 ‘Nâ ta na chi la, chhoreina he a pyh la; ano kyh liata ei raopa zydua hawhna khata, a yna cha pahlei syulyupa châ aw vei,’ tahna ta. Châhrasala my ta thyu ei ta. ama hmotaopa zydua hrao leipa pachâsa khai ei ta,” tah ta.

8 “Chavâta hraona hrao awpa ta ei hria noh taihta na hâ teh u,” ABEIPA ta a tah: “Ei hmo a chhuahpa cha ama chô liata ei hiehâna, ei hiehâna chichhih ngaitapa cha patlai awpa ta. Abeina khihnarâhzy pakhysapa ta phozy aw pakhypa he châ ta, alei zydua he ei hiatliana mei ta kâ pasia khai tlôh aw ta.

9 “Cha tina chata zawpizy cha hmao pathaihpa ei pahneisa heih aw, ABEIPA moh cha ama zydua ta padopa ta reihkha tlapa ta ama chakao chyu thei nawpa ta.

10 Ethiôpia chavah khôlâ tawhta kei lâta a hiatuhpazy, ei chyhsa a paihpazy sawchanô chata ei hmohlâpa a vaw cheih aw.

11 “Cha noh liana chata ei chô liata na paraona hmotaopazy vâna chata na no za aw vei ma? Cha daihti na liana chata na chhôh tawhtapa na chyhsa, palaina thaphakheituhpazy cha pahlei aw na ta, ei tlâh pathaihpa liana heta palaina hmâpa ta y khao aw va chi.

12 Châhrasala na chhôh tawhtapa sipasapazy nata pasipasaw a taopazy pahlôh aw na ta. ABEIPA moh cha ama ngâ aw.

13 Izarel mo laibâhpazy chata hmoparaona tao leipa aw ei ta, haipa reih hra aw veih ei, ama pakah liata chhao dona y hra leipa aw ta. Niepa ta a mô aw ei ta, Ahy hmah ta pachisa khao aw veih ei,” tah ta.

14 Hy Zaio sawchanô hla sa teh; Izarel, thata awh teh; hy Zerusale sawchanô, na pathipalôh tlokhuh ta aly la, thapha teh!

15 ABEIPA ta na kyh pachianazy cha la haw ta, na khakhaipa a thy pathlah haw, Izarel Beichaipa ABEIPA cha na chhôh liata a y na; hmopha leipa chi beih khao aw va chi.

16 Cha noh liana chata Zerusale hnohta: “Chi khâ, hy Zaio; na ku tha chhao zei khah se,” ama tah aw.

17 ABEIPA na Khazohpa cha na chhôh liata a y na, pachhatuh awpa mo thatlô ngaitapa cha; alypa ta na chô liata thapha aw ta, a kyhpachâna pathieh aw ta, hla sapa ta na chô liata aly aw.

18 “Nâma liatahpa, a pakhypi liata a hlao pha leipa ta pachârôhpazy cha. ei chhi pakhy aw, nâma vâta reipachhiena phaohri a phaohtuhpazy cha.

19 Pachâ teh, cha tina chata cha taolatuhpa zydua ei pachâ aw. Chatawhcha pheisypa cha pachha aw na ta; topa ta a ypa ei pakhy aw. A lei chô zydua liata ama vaw maohphyuna cha reithaina nata moh pathâhna ta ei pachâsa aw.

20 Cha tina chata cha pangiasa aw ei na ta, cha tina chata ei cha pakhy aw ei; nama mohmô tlai liata nama seichâna ei palie tina chata alei chô chyhsa zydua hry liata mohpathâhna nata reithaina cha taopa aw ei na ta,” ABEIPA ta a tah. 

Zephania (Zephaniah)

Bo 1	Bo 2	Bo 3