Mara Holy Bible: Zawna

Zawna 1

Abeipa tawhta Zawna a râsainazie

1 Amitai sawchapawpa Zawna hnohta ABEIPA bie vaw tlô ta,

2 “Thyu la, Niniva khih, khihpi rôhnah ngaitapa lâna chata sie la, kei chho teh; ama hmoparaona cha ei hmiakô liata kaw tlô ta,” tahpa ta.

3 Châhrasala Zawna cha ABEIPA hmiakô tawhtapa Tasi lâta a râ awpa ta thyu haw ta. Zôpa khih lâta zu ta, Tasi a pangai awpa balyh hmô ta; a siena ty cha pie ta, ABEIPA hmiakô tawhtapa cha Tasi a pangai awpazy chhaota sie awpa ta balyh liana chata a ngia haw ta.

4 Châhrasala ABEIPA chata thlih ru ngaitapa tilaipi liana chata pathlisa ta, tilaipi liana chata thlihpi ru ngaitapa pathli ta, balyh cha rao daihmâpa ta y haw ta.

5 Chatawhcha balyh hiatuhpazy chata chi ei ta, âmo khazoh pado chyu ei ta; balyh cha âmo chata a hua thei nawpa ta balyh chhôh liata hmozy cha tilaipi liana chata thy haw ei ta. Zawna deikua cha balyh chhôh chaipa liata angia ta, a zia ta, a mô haw ta.

6 Chatanachata balyh hyutuhpa cha ano lâta a vy ta,” Hy nâ a môpa y, kheihtazie ta e? Thyu la, na khazoh pado teh! Khazoh chata eima leidia lei nawpa ta maniah a pachâ ngyu aw la,” tah ta.

7 Chatawhcha balyh hiatuhpazy chata “Avy teh u, he hmopha leipa eima chô liata a tlôpa he ahy vâta ma tahpa eima pahno thei nawpa ta pachao ei suh u,” tahpa ta a chho chyu ei ta. Chatanachata pachao ei ta, pachaona cha Zawna chô liata tlu ta.

8 Chatanachata a hnohna chata, “He hmopha leipa eima chô liata a ypa he ahy vâta e a châ, maniah chho teh, eima châ haw na? Na raihria khâpa e a châ? Khataih tawhta a vypa e na châ? Khâpa pho e na châ?” tah ei ta.

9 Ano chata ama hnohta, “Hebrai chyhsa châ na ta; tilaipi nata alei a taotuhpa ABEIPA, avâ Khazohpa cha ei chi na,” tah ta.

10 Chatawhcha balyh hiatuhpazy cha chi ngaita ei ta, a hnohta, “Khâpama na vaw tao haw?” tah ei ta. A chho hawpa vâta chyhsazy chata ABEIPA hmiakô tawhta a râpa a châpa tahpa pahno tlôh ei ta.

11 Chatanachata a hnohta, “Eima châta tilaipi he a chatlao lei nawpa ta, na chô liata khâpa eima tao aw?” tah ei ta. Tilaipi cha chatlao via ngâ tlôh ta.

12 Ano chata ama hnohta, “Na chalo ula, tilaipi lâna heta na thy teh u; keima vâta nama chô liata he thlihpi ru ngaitapa he a pathli tahpa pahno tlôh na ta,” tah ta.

13 Châhrasala balyh hiatuhpazy chata ngiakâ lâta kua awpa ta thata hia ei ta; anodeikuacha tao thei leipa ei ta; tilaipi hra cha ama chô lâta a chatlao rili tlôh ta.

14 Chavâta ABEIPA cha pado ei ta, “Hy ABEIPA, he chyhsa hrona vâna heta maniah pahleipadia leipa la, athaipa thisaih eima chô liata rie na pahnieh lei awpa ta eima châ haw, eima cha haw chaimâh na; hy ABEIPA y, nâma ta na khopa hawhta na taopa châ tlôh ta,” tah ei ta.

15 Chatanachata Zawna cha chalo ei ta, tilaipi liana chata thy haw ei ta; tilaipi cha a chatlaopa a chalih ha ta.

16 Chatanachata chyhsazy chata ABEIPA cha thata chi ei ta, ABEIPA lâna chata atheihna hlâ ei ta, biezy a taih ei ta.

17 ABEIPA chata Zawna a palâ awpa ta nga laipapi vaw rao haw ta. Cha nga py chhôh liana chata Zawna chata noh thôh nata zâ thôh y ta.

Jonah (Zawna)

Bo 1	Bo 2	Bo 3	Bo 4

Zawna 2

Zawna alyna bie hlâna thlahchhâna

1 Zawna chata nga py chhôh tawhna chata ABEIPA a Khazohpa lâta thlahchhâ ta,

2 he tana heta tah ta: “Ei rietheina vâta ABEIPA cha pado na ta, ano ta nâ chhy ta; Sheôl py chhôh tawhta pado na ta, nâ ta ei ao thei chi ta.

3 A thuh ngaitapa liata, tilaipi chhôh chaipa liana chata nâ ta na thy chi ta, ti hluh ngaitapa cha na chadôpa ta y ta; na ti chatlaopa nata na ti chalâparâpa zydua chata na khu lymâ ta.

4 Chatawhcha, ‘Na mohmô tawhtapa thypa châ na ta; kheihta e, na chhyna-o pathaihpa lâ ei heih aw?’ tah na ta.

5 Tizy chata ei hrona taihta na pado ta, ti a thuhpa cha na chadopa ta y ta; sipopazy chata ei luh a pahly.

6 Alei ry chhâpachiena lâna cha zu na ta, alei chata chhâzaw châta a hrainazy chata na khawhlôh ta; anodeikuacha nâ ta, hy ABEIPA ei Khazohpa, Khaotlô tawhtapa cha ei hrona na thao.

7 Ei hrona ei chhôh liata a panao nona chata. ABEIPA cha athei thlâh ha na ta; ei thlahchhâna cha na chhyna-o pathaihpa liata nâ lâta a vaw tlô.

8 Hmo hraoleipa haipa thlâhthlipa a papeisatuhpazy chata âmo nôphana cha amâ heisai.

9 Kei deikua chata alyna bie reina ao chhaota nâ lâta atheihna hlâ aw na ta; bie ei taih hawpa cha ei patlô aw. Pachhana cha ABEIPA eih a châ,” tahpa ta.

10 ABEIPA chata nga cha chho ta, Zawna cha ngiakâ liata pali haw ta.

Jonah (Zawna)

Bo 1	Bo 2	Bo 3	Bo 4

Zawna 3

Niniva rôhnah

1 ABEIPA bie cha Zawna hnohta vaw tlô chanei heih ta,

2 “Thyu la, Niniva khih, khihpi rôhnah ngaitapa lâna chata sie la, bie rei awpa ei cha tahpa he tlâh kei awhkhei teh,” tahpa ta.

3 Chatanachata Zawna cha thyu ta, ABEIPA bie hawhna chata Niniva khih lâta sie ta. Niniva cha khihpi rôhnah ngaitapa, noh thôh sie a tlohpa châ ta.

4 Zawna cha noh kha sie rakha khihpi chhôh liana chata a ngia ta. “Atahmâ tawhta noh sypalih liata Niniva he pahleipadiapa a châ aw na!” tahpa ta awh ta.

5 Niniva chyhsazy chata Khazohpa angiapâ haw ei ta; nie leipa ta y awpa phuah ei ta, ama hry liata a lai chaipa tawhta a chyh chaipa taihta latho poh a bu haw ei ta.

6 Cha biezy cha Niniva khih beipa kô tlô haw ta, a abeidyuchhai tawhna cha thyu ta, a abei poh cha hlai ta, latho poh a bu ta, buhchâ liata a tyuh ta.

7 Beichaipa nata a molaipazy biepiepa ta; beichaipa chata Niniva khih chhôh liata bie phuahpa ta “Chyhsa tlyma, sahroh tlyma, viahchao hri tlyma, mietahkupa zaw tlyma chata khâpa hmah padi khah se;

8 niepa ta ti chhao doh kha se; chyhsa nata sahrohzy chata latho poh tlao a bu ei sala, thata Khazohpa pado ei se; chyhsa tota ama paraona tawhta a vaw heih ei sa la, ama ku liata nôchhiena cha a heisai ei se.

9 Eima leidia lei nawpa ta Khazohpa lâ cha kuapa ta, palôhrupa paliepa ta a pathi-iana ru ngaitapa tawhna chata a palôh a nano aw vei, tahpa ahy e a pahno?” tahpa ta.

10 Chatanachata Khazohpa ta ama hmotaopazy cha mopa ta, ama paraona tawhta ama heisai tahpa hmô ta; ama hnohta a rei hawpa, tao a chhuahpa hmopha leipa cha Khazohpa chata a palôh a nano ta, tao khao vei.

Jonah (Zawna)

Bo 1	Bo 2	Bo 3	Bo 4

Zawna 4

Zawna aly leina nata Khazohpa zawngiahna

1 Anodeikuacha, cha chata Zawna palôh pachâsa lei ngaita ta, a pathi-ia ta.

2 ABEIPA lâna chata thlahchhâ ta, “Hy ABEIPA, ei châ haw na, he he eima râh liata ei y nota ei reipa kha châ vei ma? He vâna heta Tasi lâta thlai ei siepa kha; nâ cha ngiachhiena a hnei ngaitapa, hmopha leipa tawhta a pathlei tyhpa na châ tahpa ei pahno.

3 Chavâta hy ABEIPA atahmâ ei hrona he eina lapa awpa chi ta ei châ haw; kei châta hro hlâta thi pha via tlôh ta,” tah ta.

4 ABEIPA chata, “Na pathi-iapa he a do ma?” tah ta.

5 Chatanachata Zawna cha khihpi tawhtapa cha pua ta, khihpi nochhi lâchhâh ta a tyuh ta, cha liana chata tlâhphia hy ta, khihpi chô liata hmo a vaw tlô awpa cha hmô a chhuahpa ta a ry nohdi liana chata a tyuh thlâh ha ta.

6 ABEIPA Khazohpa chata tithei zôh vaw paysa ta, cha cha Zawna chô liata pazawhsa ta, a rietheina tawhta pachha awpa ta a luh a pahlituhpa châ ta. Chatanachata Zawna cha tithei zôh vâna chata aly ngaita ta.

7 Anodeikuacha Khazohpa ta a my lâ zovâ a thua nota, alôpa paysa ta, cha chata tithei zôh cha chaih ta, uah haw ta.

8 Chatawhcha noh a vaw chhi nahta Khazohpa ta nochhi thlih lalôhpa tuah ta; noh chata Zawna luh cha aih ta, a no maoh ta; thi awpa ta hiah ta, “Kei châna heta hro hlâta thi a pha via na,” tah ta.

9 Châhrasala Khazohpa chata Zawna hnohta, “Tithei zôh ky liata na pathi-iapa he â do ma?” tah ta. Ano chata, “Thi daihmâna taihta ei pathi-iapa he â do na,” tah ta.

10 ABEIPA chata, “Na hriapasakhei leipa, na palaiseisapa chhao a châ leipa, zâ zâ kha ta vaw y ta, zâ zâ kha ta a leidia heihpa tithei zôh he na tha pasa ta. “Niniva khih, khihpi rôhnah ngaitapa, a chhôh liata chyhsa thy kha nata sâh no hlâta a hluhpa, ama chachâh nata chavei chhao panano thei leipazy nata sahroh zaw hluhpi yna he, ngiachhie aw va na mâ?” tah ta.

Jonah (Zawna)

Bo 1	Bo 2	Bo 3	Bo 4