Zami 1

Zami châpaphaopa Bo 1

Anaona

1 Zami, Khazohpa nata Abeipa Zisu Krista sei ta: Pho hrawhleino a paipatlapazy cha a naoh na.

Ngiapâna nata panawhna

2 Unawh saih u, namâ ngiapâna pasiana chata tiamana a tao tahpa pahnopata,

3 reipasaona to namâ tyh tita alyna saita a ngia teh u.

4 Chatawhcha khâpa hmah aphahla leipata, pakipata nama pôhpa zydua ta namâ boh thei nawpata, tiamana chata hria paki mawh sy.

5 Nama hry liata ahyrai ta sona a phahla khiahtala thlyu leipa ta, a pietuhpa Khazohpa cha hiah mawh sy. Chatanachata a hnohta piepa a châ aw.

6 Châhrasala a lôlei cha chei leipata, ngiapâna hneipata hiah mawh sy, a lôleituhpa cha tilaipi chatlaopa, thlih ta a hmôpa, a phaohpa nata a pathluapa hawhta châ tlôh ta.

7-8 Cha hawhpa chyhsa palôhrupa chybia a hnei leipa, a hmotaopa zydua liata â i leipa chata, Abeipa liata khâhma hmô awpata a pangiasa kha se.

9 Unawhpa sipasapa cha Khazohpa ta apahneirôhsa khiahtala aly mawh sy,

10 hneirôhpa chhao chata Khazohpa ta a pahnaisa khiahtala aly hra mawh sy, sibiepa paw hawhta lei thlâh ha tlôh aw ta.

11 Noh vaw chhi ta, thlih lalôhpa a vaw pathli nahta sibiepa pa-uah sa ta, a paw cha zô ta, a yzie angiapa cha a lei tyh. Cha hawhna hra chata chyhsa hneirôhpa cha a siena liana chata uah tlôh aw ta.

Pasiana nata reipasaona

12 Reipasaona pasa a tao hualuapata cha a nohhlao na, pasiapata a y khai tawhta hrona beilakho Abeipa ta ano kyh a pachâtuhpazy hnohta a taipa cha hmô tlôh aw ta.

13 Ahyhmah ta reipasaona amâ tyh nota, “Khazohpa tawhtapa reipasaona a châ,” tah kha se; Khazohpa cha moleina ta reipasao theipa rimâ châ vei, ano chhaota ahyhma reipasao beih vei;

14 chyhsa ta âmo aohraona lâta chhihthapa nata sypata ama y khiahtala, reipasaona amâ tyhpa tlao a châ.

15 Chatawhcha aohraona chata saw phaoh ta, moleina sa tyh ta; moleina chata a vaw pitloh nata thina a tlô khei tyh.

16 Unawh kho ngaitapa saih u, dôpata y khah u.

17 Hmopie phapa nata hmopie pakipa zydua cha chôlâ Khazohpa tawhtapa a vaw pua tyh, ano liana chata ananona nata pananona dita hmahta y vei.

18 A hmotaopazy hmia a satuhpa hawhta eima châ thei nawpata, ano khona zieta bie hmeiseihpa liana chata maniah a sa.

Rietheina nata taona

19 Unawh kho ngaitapa saih u, chazy cha nama pahno na; chyhsa to ta nahthlie awpa a pachhu ei se, bierei tlao a pachhu leipa ei sala, ama pathi-ia ru se.

20 Chyhsapa pathi-iana ta Khazohpa siana cha tao tlôh va.

21 Chavâta apuapa zydua nata moleina a khô pathlahpa pahlei khai ula, bie chi hawhta a pyupa nama thlahpa a pachha theipa cha a reisi ngaitapata a pyh teh u.

22 Châhrasala nâmosasy ta a dopata a nahthlietuhpa dei châ leipata, bie a zyhtuhpa tlao vaw châ teh u.

23 Ahyrai bie a theituhpa châ pata, a zyhtuhpa a châ tlôh vei khiahta cha, chyhsa thlalâ liata a pikheina hmia a phapata a mopa hawhpa cha a châ;

24 pakhâtata a mo ta sie ta, kheihawhpa chyhsa ma a châ tahpa thlai a my ha tyh tlôh ta.

25 Châhrasala ahyrai ryhpa pakipa, khotalaina ryhpa he liahsa moh ta, cha hawhta y thlâh ha ta, thei ta thlai a my thlâh hatuhpa châ leipata, zyhpata rai khâ a hriatuhpa tlao a châpa cha, cha chyhsa cha a hmotaopa liata byhnâ hmôpata a y aw.

26 Ahyrai phôryhpa pachâpata a pangiasa ta, a paleih a vaih tlôh leipa cha, ano pathipalôh tlao a dôpa a châ, cha phôryhpa achhyna zie cha khâpahma châ vei.

27 Eima Khazohpa nata Paw mohmô liata phôryhpa achhyna pathaihpa nata molei a hlao leina cha he he a châ, hârapa nata nôhmeizy ama riethei nota a hmô nata khizaw puapa kiah leipata a taopa hih. 

Zami (James)

Bo 1	Bo 2	Bo 3	Bo 4	Bo 5

Zami 2

Zami 2

Khokheina hneina kyhta zikyurâna

1 Ei unawh saih u, eima Beipa Zisu Krista rônahna Beipa cha ngiapâna chôta chyhsa thleipa hlei hnei khah u.

2 Namâ pakhyna liata chyhsa ngôh kusadi a kypa, poh ngia ngaitapa a bupata a vaw ngia sala; chatawhcha chyhsa sipasapa poh chhie ngaitapa a bupata a vaw ngia hra sala;

3 poh ngia ngaitapa a bupa cha papeisa via eichi ta, a hnohna chata, “Nâ, he su phapa liana heta atyuh teh,” tah eichi ta, chyhsa sipasapa hnohna chata, “Nâ, hao liana hao ta aduah la,” cha leipata, “Ei pheitlyna kiapâh liata atyuh teh,” nama tah khiahta cha,

4 nama palôhrupa liata thleina hneipata pachâna moleipa phaohpata reipachhietuhpazy châ aw veih eichi mâ?

5 Unawh kho ngaitapa saih u, pachâ teh u! Khazohpa ta he khizaw hmo liata sipasapazy he ngiapâna liata a rônah awpa nata ano kyhpachâtuhpazy hnohta a taipa râh cha a totuh awpazy ta rao vei ma?

6 Nâmo ta chyhsa sipasapazy cha maoh tlao nama paphyu sa. Chyhsa hneirôhpazy cha cha pasipasawtuhpa nata ryureina lâta cha daophi tyhtuhpa châ tyh veih ei ma?

7 Moh zachhih ngaitapa nama phaohpa he reipachhietuhpazy châ veih ei mâ?

8 Khazohpa châ bie ta, “Nâma kyh nâ pachâpa hawhta na vaihzy kyh na pachâ awpa a châ,” tahpa abeina ryhpa he nama zyh khiahtala, nama tao pha na.

9 Châhrasala chyhsa thlei hlei nama hnei khiahta cha hmo nama parao, ryhpa ta hmoparaotuhpa ta cha pachâsa tlôh ei ta.

10 Ahyrai ta ryhpa zyh pakipata kyh kha a parao tlôh khiahta cha, a zydua liata thai lei châpata a y aw.

11 “Aphei khâ,” tahtuhpa chata, “Liany cheih khâ,” tah tlôh hra ta. Chatanachata aphei vei hra la, liany na cheih tlôh khiahta cha, ryhpa a paraotuhpa na châ haw.

12 Chatanachata khotalaipa ryhpa ta ryu reipa awpazy hawhta bie reih ula, hmo tao hra teh u.

13 Chyhsa ngiachhiena a hnei leipa cha, ngiachhiena a hlao leipata ryureipata a y aw; ngiachhiena cha pachiana a pahnie tyh.

Raihria leipata ngiapâna a thizie

14 Unawh saih u, chyhsa ta ngiapâna ei hnei tah hra sala, hmotaopa a hnei tlôh leipa khiahta cha khâpa a phahnai aw. Cha hawhpa angiapâna cha ano a pachha thei aw ma?

15 Unawhpa tlyma, sietanô tlyma thluahruapata ypata ama nohcharei niepa a phahla ei sala, “nama hryta ahy tlyma ama hnohta,

16 “Thlahlôh ngaitapata sie ula, a lalôh ngaitapa nata rihbie ngaitapata y teh u,” tah ula, pôhpa châta hmo byuhpa cha nama pie tlôh leipa khiahtala, khâpa a phahnai aw?

17 Cha hawhna hra chata angiapâna cha hmotaopa hnei leipata, ano deita a y khiahtala a thipa a châ.

18 Chyhsa ahy tlyma ta, “Nâ ta ngiapâna hnei chi ta, kei ta hmotaopa ei hnei. Nâ ngiapâna cha hmotaopa a hlao leipata na pamosa teh, kei ta ei hmotaopa ta ei ngiapâna ei cha pamosa aw.

19 Khazohpa cha pakha a châ tahpa a ngiapâ chi ta, a pha na. Ahripazy chhaota angiapâ ei ta, amâ chalyu tyh mâ tâh,” a tah aw.

20 Hy chyhsa a paphaopalyupa y, hmotaopa a hlao leipata angiapâna dei cha khâpahma châ vei tahpa na pahno khoh ma?

21 Eima pathlatuhpa Abaraha khata a sawchapawpa maisâh chô liata a hlâ nona khata hmotaopa vâta thai a châpa châ vei mâ?

22 Ngiapâna chata a hmotaopa nata hria kho ta, hmotaopa vâta angiapâna cha a paki haw tahpa na pahno na,

23 Khazohpa châ bie ta, “Abaraha chata Khazohpa a ngiapâ ta, cha ngiapâna cha siana ta raopa a châ,” tahpa bie kha vaw tlô ta; chatanachata Khazohpa keih ta bipata y haw ta.

24 Ngiapâna vâta dei châ leipata, hmotaopa vâta chyhsa ta thai tlao a châ tyh, tahpa nama pahno haw.

25 Cha hawhna hra chata Rahabi sihrypa chhao khata lyuhchâpazy cha a vaw ly ta, lâpi hro lâta a pasiesa nona khata hmotaopa vâta thai a châpa châ vei ma?

26 Thlahpa a hlao leipa pôhpa cha a thipa a châ, cha hawhna hra chata hmotaona a hlao leipata ngiapâna cha a thipa a châ. 

Zami (James)

Bo 1	Bo 2	Bo 3	Bo 4	Bo 5

Zami 3

Zami 3

Paleih

1 Unawh saih u, nama hryta chyhsa hluhpi he pachutuhpazy ta y kha u, pachutuhpazy pi chata pachiana tha viapa eimâ tyh aw tahpa pahno tlôh pi ta.

2 Hmo hluhpi liana cha eima zydua ta molei tyh tlôh pi ta, ahyrai bierei kyh liata a molei vei khiahtala, cha chyhsa cha chyhsa pakipa châ ta, a pôhpa zydua chhao a vaih theipa a châ.

3 Eima bie amâ ngiah thei nawpata arâ pakah liatazy chhâri eima pabaw khiahta cha ama pôhpa chhao eima khona lâ maihta eima pasiesa thei.

4 Balyzy chhao he lai ngaita taraw ta, thlih ru ngaitapa phaohpata a y tyh, châhrasala a pasiesatuhpa chata a khona lâ maihta a pahiena chypata chata a pahie tyh.

5 Cha hawhna hra chata paleih chhao he pôhpa pachiapa chyhpata cha ta, thata a palai tyh. Mei chyhpatata thothi laipapi a kâ thei zie he!

6 Chatawhcha paleih he mei a châ. Eima pôhpa pachiahpazy hryta, mei tluta chi a chhihpa châ ta, moleina tao awpata a thatlô ngaita kaw. Cha chata pôhpa zydua papuapalei ta, pikheipa yzie zydua pakâ ta, ano cha hrienasu pakâsapa a châ.

7 Sa chi to zy, pavaw chi to zy, lôvâpa chi to zy, tilaipi liatahpa chi to zy he pangâh theipa châ tlôh ei ta, chyhsapazy ta pangâhpata y ei ta.

8 Châhrasala paleih he ahyhma ta pangâh thei leipa a châ, thina châmaih ta a biepa molei a y molo thei leipa a châ.

9 Cha chata Abeipa nata Paw reithai tyh pi ta, cha lilaw chata Khazohpa hawhta taopa chyhsazy chôta chhie eima sa tyh hra.

10 Pakah miakha tawhta reithaina nata chhiesana a pua tyh. Unawh saih u, cha hmozy cha cha hawhta a châ awpa châ vei.

11 Tikhaoh heta a hnawh miakha tawhta a pahâpa nata a pahâ leipa a papua beih ma?

12 Unawh saih u, theiku kô liata ôli thei a patheih beih ma? Cha leipata krezô liata theiku a pathei thei ma? Cha hawhna hra chata ti-iapa khaoh heta ti pahâhpa papua thei hra vei.

Chôlâ tawhta sona

13 Nama hryta ahyma sopata bie a pahno theipa a y? Reisi ngaitapa nata so ngaitapata a hmotaopazy yzie phapata pamosa mawh sy.

14 Châhrasala nama pathipalôh liata hia atliana thata nata kho-hlei khona nama hnei khiahtala, bie dopa chôta apalai leipa ula, biedopa adyuhpata haipa reih kha u.

15 Cha sona cha chôlâ tawhta a za tlôpa châ leipata, khizaw nata pôhpa aohraona nata ahripa tawhtapa tlao a châ.

16 Hiatliana nata kho-hlei khona a yna liana chata, atymâna nata hmoparaona pasichhihpa to a y tyh.

17 Chôlâ tawhta sona a za puapa deikua cha a hmiatuata pathaih ta, cha hnôh lâna chata adyhna khoh ta, a nônai ta, chhoru leipata, ngiachhiena nata thei phapata bie ta, thlei hlei hnei leipata piepie vei.

18 Siana thei cha adyhna a taotuhpazy châta adyhna ta tupa a châ. 

Zami (James)

Bo 1	Bo 2	Bo 3	Bo 4	Bo 5

Zami 4

Zami 4

Khizaw nata a viasana

1 Nama hryta adyuhna nata a einazy he khataih tawhta a puapa ma a châ? Nama pôhpa pachiahpazy liata adyuhna a taotuhpa nama khonazie tawhna chata a vaw puapa châ vei ma? Khoh eichi ta, hnei tlôh leipa eichi ta; liany cheih eichi ta. Uava eichi ta, hnei tlôh leipa eichi ta; chavâta a ei eichi ta, adyuh eichi ta. Nama hiah leipa vâta hnei leipa eichi ta.

3 Hiah eichi ta. nama hiapa â su leipa vâta hmô veih eichi, nama phasa nawpata a chhuah tlôh eichi ta.

4 Nâmo apheinô saih u, khizaw viasa châna he Khazohpa khakhaina a châ tahpa pahno veih eichi ma? Chavâta ahyrai khizaw viasa châ a khohpa maih chata Khazohpa khakhaipata a tao tyh.

5 A châ vei khiahtala, “Thlahpa keimo liata a pahrâsapa chata hiatliana taihta maniah a khoh,” tahpa he Khazopa châ bie ta khâpahrao leipata a reih nama pangiasa ma?

6 Châhrasala ngiachhiena a hluh via a pie tyh; Khazohpa châ bie ta, “Khazohpa ta apalaipazy a dyuh tyh ta, a reisipazy deikua cha ngiachhiena a pie tyh,” a tah.

7 Chavâta Khazohpa reisai ta y teh u. Ahripa cha adyuh ula, ano chata a châ râsai aw ei.

8 Khazohpa a hnia teh u, chatanachata ano ta a châ hnia aw ei. Moleipa saih u, nama kuzy pasi teh u, palôhrupa a zawvawpa saih u, nama pathipalôh pathai teh u.

9 Ngiaroh ula, pachârôh ula, cha teh u. Nama pahneipa pachârôhna ta châ sala, nama thaphana hnabeidyna ta châ mawh sy.

10 Abeipa mohmô ta a reisi teh u, chatanachata a cha palyupalih aw ei.

Unawhpa seina

11 Unawh saih u, a reipachhie rairieh kha u, ahyrai ta a unawhpa reipachhiepata tlyma, a unawhpa a seipata tlyma cha ryhpa reipachhiepata a seipa a châ. Châhrasala ryhpa na sei khiahtala ryhpa zyhtuhpa châ leipa chi ta, pachiatuhpa tlao na châ.

12 Ryhpa a pietuhpa nata a pachiatuhpa pakha deita a y, pachha theipa, pahlei theipa a châ. Na vaihzy a seituhpa chi cha ahyma na châ tly?

Noh hro hmo apalaikheina

13 Atahmâ pachâ teh u, nâmo, “Atanoh tlyma, mylâ tlyma cha khihpi lâna cha vaw aw pi ta, cha liana chata kô kha kei y aw pi ta, sôhdao aw pi ta, athôhna eima hmô aw,” a tahtuhpa saih u;

14 mylâ khâpa a y aw tahpa pahno tlôh eichi va. Nama hrona cha khâpa e a châ? Tihu buakha a vaw lâ ta, a lei thlâh ha heihpa hawhpa he châ tlôh eichi ta,

15 Cha vyuhpata, “Abeipa ta a ryh a tah khiahtala hroh aw pi ta, chata khata eima tah aw,” nama tah awpa a châ.

16 Châhrasala nama pachânazy liata tlao apalai eichi ta. Cha hawhpa a palaina zydua cha moleina a châ.

17 Chatanachata ahyrai hmopha tao awpa pahno ta, tao tlôh leipa cha ano châta moleina a châ. 

Zami (James)

Bo 1	Bo 2	Bo 3	Bo 4	Bo 5

Zami 5

Zami 5

Hneirôhpazy lâta zikyurâna

1 Hneirôhpa saih u, nahthlie teh u, nama chôta rietheina a vaw tlô haipa vâna chata cha ula, thata sâh teh u.

2 Nama ryuzy rao ha ta, nama chysiazy chhôma-uh ta a chaih khai haw.

3 Nama ngôh nata tâkâzy a sai ta ie khai ha ta, a sai-iepa cha nama thai leizie pahnosana châ aw ta, nama sapa cha mei kâpa hawhta a nie aw. Noh hnôh lâ châna chata ryu nama pachô hih.

4 Nama lyu liata sâh hriapata a hlaopazy hlao dopata nama pie leipa kha aw ta, a hriatuhpazy nôpona awna pyu chhao cha Pheisaihzy Abeipa nahkhao liata a ngia ha tlôh ta.

5 Khizaw liana heta phasa ngaitapata y eichi ta, viahchao hawhta nâmosasy ta apathaw eichi ta; thina noh atahmâ a vaw tlô haw.

6 Chyhsa siapa cha thai lei pachâsa eichi ta; thi haw eichi ta, ano chata châ dyuh veih ei.

Tao hualuana nata thlahchhâna

7 Chavâta unawh saih u, Abeipa a vy hlâlei la tiama ngaitapata y teh u. Pachâ teh u, lyuhneituhpa chata vâsua hmiatuapa nata hnôh lâtahpa cha a hmô hlâlei cha tiama ngaitapata alei thei sôhpa cha a hâ tyh.

8 Nâmo chhao tiama ngaitapata y teh u. Nama pathipalôh cha pa-i teh u, Abeipa avyna cha a hnia ha tlôh ta.

9 Unawh saih u, thai lei châpata nama y lei nawpata apaphôhthlu kha u; nahthlie teh u, Ryureituhpa cha ochhi thaby liata a duah thlâh ha tlôh ta.

10 Unawh saih u, Abeipa mohta biereituhpa cha pasa taozie nata tiamana zie kyh liana chata a mopakhona chata hmâh teh u.

11 Pasa a taotuhpazy cha nohlaopa tah pi ta. Zawba tiamana zie kha pahno eichi ta, Abeipa ta a chhâna lâta a tao zie kha hmô hra eichi ta, Abeipa cha ngiachhiena ta a biezie nata zawh a ngiah theizie chhao kha.

12 Châhrasala unawh saih u, khâparai tao hra ula. chhie sa khah u, avâ reipata tlyma, alei reipata tlyma, hmo hropa rai chhao reipata chhiesa kha u; yh, nama tahpa cha yh châ sala, châ vei, nama tahpa cha châ vei châ se, chata leipata la thai lei châpata nama y aw.

13 Nama hry liata hmopha leipa pasa a taopa ama y ma? Thlahchhâ mawh sy. Thaphapa ama y ma? Reithaina hla sa mawh sy.

14 Nama hry liata a tlâh leipa ama y ma? Awnanopa machâ pa-awsa sala, ano ta Abeipa mohta sathaw thupata a chô liata thlahchhâ mawh sy.

15 Ngiapâna ta thlahchhâna ta tlâh leipa cha pachha aw ta. Abeipa ta ano cha a pathyu aw; hmo a vaw parao haw khiahtala a ngiahthaipa a châ aw.

16 Chavâta patlapata nama y thei nawpata nama moleinazy reihpha a cheipa rairieh teh u. Thlah a chhâpa rairieh hra teh u. Chyhsa siapa thlahchhâna ta hmo a hlupi a tao tyh.

17 Elaiza cha keimo hawhpa nôchâ a phaohpa chyhsapa châ hra ta, ano chata avâ sua lei nawpata phahnai khoh ngaitapata thlah chhâ ta, kô thôh nata thla charu chhôh zydua alei chô liata avâ suah khao leipata.

18 Chatawhcha thlahchhâ heih ta, avâ ta avâ pasuasa ta, a lei ta a theizy patheisa ta.

19 Unawh saih u, nama hryta ahyrai bie hmeiseihpa tawhna chata pavia sala, ahy tlyma ta a hnôh lâ pakuasa sala,

20 moleipa a lâpi paviana tawhtapa a pakuasatuhpa chata thina tawhtapa a thlahpa pachha aw ta, molei hluhpi a khupa hra aw, tahpa apahno mawh sy. 

Zami (James)

Bo 1	Bo 2	Bo 3	Bo 4	Bo 5