Mara Holy Bible: Zakaria

Showing posts with label Zakaria. Show all posts

Zakaria 1

Abeipa pangai awpa ta hruana

1 Daria a beina kô nona, thla chariena liana chata Idô sawchapawpa, Berekiah sawchapawpa hrohsopa Zekaria hnohna chata ABEIPA bie vaw tlô ta,

2 “ABEIPA cha nama pawzy chô liana khata a palôh a châ lei ngaitapa a châ.

3 Chavâta he tana he ama hnohta reih teh: Pheisaihzy ABEIPA chata he tana he a tah. Kei lâ a vaw heih ula, Pheisaihzy ABEIPA ta a tah, kei chhao nâmo lâ ei vaw heih aw, Pheisaihzy ABEIPA ta a tah.

4 Hrohso hmiatuapazy ta, ‘Pheisaihzy ABEIPA chata nama yzie moleipa kha atahmâ a heisai ula, nama hmoparaopa cha a vaw heisai teh u,’ a tah,” tahpa ta. Nama pawzy ama chhopa chhaota nahthlie leipa ei ta, nah pachôh leipa ta ama ypa hawhna kha y khah u, ABEIPA ta a tah.

5 Nama pawzy cha khataihta e ama y? Hrohsopazy chhao chhâzaw ta ama hroh ma?

6 Ei bie nata ei bieraopazy, ei chakaotuhpa hrohsopazy hnohta ei pie nona khata, nama pawzy cha tlâ a ôpa kha châ vei ma? Chatanacha kua ei ta, Pheisaihzy ABEIPA chata eima chô liata tao a chhuah tyhpa hawhta eima yzie lymâ hawhta nata eima hmotaozie hawhta keimo liata a tao haw, ama tahpa kha,” tahpa ta.

Hrohsopa ta aluahna ta arâhzy a hmôzie

7 Daria kô nona, thla hrawhleikhana, cha cha Shebat thla châ ta, noh syno nata noh palihna liana chata Idô sawchapawpa Berakiah sawchapawpa hrohsopa Zekaria hnohna chata ABEIPA bie vaw tlô ta;

8 “Zâ ta arâ saihpa chôta chyhsa pakha a kiahpa hmô na ta! Saikao liata myrtle tho hry liata a duah ta; a hnôh lâna chata arâ a saihpazy, a peipa zy, a râhpa zy y ei ta.

9 Cha liana chata kei chata, ‘Hy ei beipa, hezy he khâpa maw?’ tahna ta. Vâlyuhchâpa na chhotuhpa chata ei hnohta, ‘’Hezy he khâpama a châ, keima ta ei cha pamosa aw,” tah ta.

10 Chatawhcha chyhsa, myrtle tho hryta aduahpa khata achhy ta, ‘Hezy he ABEIPA ta aleilô zydua chahryh khai awpa ta a tuapazy cha ama châ hih,’ tah ta.

11 Chatawhcha âmo chata ABEIPA vâlyuhchâpa myrtle kô hryta a duahpa cha a chhy ei ta, Alei zydua chahryh khai ha pi ta, alei cha y molo thlâh ha ta, a y thlâhthli,’ tah ei ta.

12 Cha liana cha ABEIPA vâlyuhchâpa chata a chhy ta, ‘Hy Pheisaihzy ABEIPA y, Zerusale nata Zudah khihpi chôta he kô sysari na pathi-iana he khachâ e ngiachhie leipa ta na y aw tly?’ tah ta,

13 ABEIPA chata vâlyuhchâpa bie pha ngaitapa, bie thlahlôh chhih ngaitapa ta nâ chhytuhpa cha a chhy ta.

14 Chatanachata vâlyuhchâpa bie na chhotuhpa chata ei hnohta, ‘He tana he va aw teh, Pheisaihzy ABEIPA chata he tana he a tah: Zerusale nata Zaio he pachâ hmeihseihta ta pachâ na ta.

15 Chatawhcha pho, phasapa ta a ypazy liana chata ei palôh cha lei ngaita ta; ei palôh châ leipa dei a châ tarawpa ta, âmo chata hmopha leipa cha ama tao rili.

16 Chavâta ABEIPA chata he tana he a tah, zawngiahna chhaota Zerusale lâ a heih hai na ta, cha liana cha ei o cha sapa a châ aw.

17 He tana he Pheisaihzy ABEIPA ta a tah: Ei khihpizy cha thlaochhina vâta pawh heih aw ei ta, ABEIPA chata Zaio cha thlahpalôh heih aw ta. Zerusale cha a tly hei aw,’ tahpa ta va aw heih teh,” tah ta.

Hrohsopa ta kizy nata syudaihpazy aluahna ta a hmôzie

18 Chatawhcha mohmia kaw pasaih na ta, moh na ta, ki miapalih hmô na ta!

19 Vâlyuhchâpa bie na chhotuhpa hnohna chata, “Hezy he khâpama ama châ?” tah na ta, Ano chata, “Hezy he Zudah zy, Izarel zy, Zerusale zy apapaituhpa ki ama châ hih.” tahpa ta nâ chhy ta.

20 ABEIPA chata syudaihpa papalih na pamosa ta.

21 Chatanachata kei chata, “Hezy he khâpa a vaw tah awpa ma ama châ?” tah na ta. Ano chata, “Haozy hao ahy hmah ta mohmia pasaih khao leina taihta Zuzy apapaituhpa ki cha châ ei ta; châhrasala hezy he, âmo palôh padua awpa nata Zudah râh papai awpa ta a vypa ama châ hih,” tahpa ta reih ta.

Zakariah (Zechariah)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10	Bo 11	Bo 12	Bo 13	Bo 14

Zakaria 2

Chyhsa pakha a ku liata thliena chabapa

1 Chatawhcha mohmia kaw pasaih na ta, moh na ta, chyhsa pakha a ku liata thliena chabapa hmô na ta!

2 Chatanachata kei chata, “Khataih lâ na sie aw?” tah na ta. Ano chata ei hnohta, “Zerusale he a hâ lâ khachâ ma châ ta, a doh lâ khachâ ma a châ tahpa pahno nawpa ta thlie awpa ta, tah ta.

3 Chatawhcha vâlyuhchâpa bie na chhotuhpa kha pua ha ta; vâlyuhchâpa hropa ano a tyh awpa ta vaw pua hra ta,

4 a hnohta, “A râ la, he satlia hnohna heta, ‘Zerusale he a chyhsapa hluh vâta nata sahroh hluh vâta khih dôhna a hnei leipa hawhta pahrâpa ta a y aw. Kei he a chheipâh liata mei kuh châ aw na ta, a liah liata rôhnahpa châ tlôh hra aw na ta,’ ABEIPA ta a tah, tahpa ta.”

Atâhpazy awna

6 Pua teh u, pua teh u, maw râh tawhta a râ teh u, ABEIPA ta a tah; avâ thli miapalih hawh tlaita cha papai haw tlôh ei na ta, ABEIPA ta a tah.

7 Pua teh u, Zaio, Babylaw sawchanô hryta a pahrâpa, a râ teh.

8 Pheisaihzy ABEIPA ta he tana he tah tlôh ta, rôhnahna zie awpa hawhta cha paraotuhpa pho lâta eina tuah, nâmo cha hriatuhpa chata ano mosawpa a hriapa cha.

9 “Nahthlie teh u, ei ku chatho thlu tlôh aw na ta, âmo chakaotuhpazy hraona ama châ aw. Chatanachata Pheisaihzy ABEIPA chata eina tuah tahpa nama pahno aw.

10 Zaio sawchanô, thaphapa ta sâh teh; nahthlie teh, ei vy na, na hnohta pahrâ tlôh aw na ta, ABEIPA ta a tah.

11 Cha noh liana chata pho hluhpi ta ABEIPA cha vaw zyh aw ei ta, ei chyhsazy ama châ aw; na hnohta pahrâ aw na ta. chatanachata Pheisaizy ABEIPA chata nâ lâta eina tuah tahpa na pahno ha aw.

12 ABEIPA chata râh pathaihpa liata a tovyu chata Zudah cha a ryu to aw ta, Zerusale cha â tlyh aw.

13 Chyhsa zydua saih u, ABEIPA hmiakô liata sidiapa ta y teh u; ano cha a su pathaihpa tawhta thyu haw tlôh ta, tahpa ta va reih teh,” tah ta.

Zakariah (Zechariah)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10	Bo 11	Bo 12	Bo 13	Bo 14

Zakaria 3

Hrohsopa ta Zawsua theihthai beipa a hmôzie

1 Theihthaipa beichaipa Zawsua, ABEIPA vâlyuhchâpa hmiakô liata a duahpa nata adyuhtuh awpa Sâtâ ano chachâh lâchhâh ta a duahpa cha na pamosa ta.

2 ABEIPA chata Sâtâ hnohta, “Hy Sâtâ y, ABEIPA chata cha ra mawh sy! ABEIPA Zerusale atlytuhpa chata cha ra se! He he thothu mei tawhta chhupa cha châ vei ma?” tah ta.

3 Chatanachata Zawsua cha a chysia puapa a kypa ta vâlyuhchâpa hmiakô liana chata a duah ta.

4 Chatawhcha a hmiakô liata a duahpazy cha bie a chho ta, “A chysia puapa cha pahluhpa teh u,” tahpa ta. Chatawhcha ano hnohna chata, “Pachâ teh, khâpa hrao leipa na châna zy cha, cha pahleipa haw na ta; chatanachata chysia rôhnah ngaitapa ta ei cha tobi aw,” tah ta.

5 Chatawhcha kei chata, “Lakho a ngia ngaitapa pakho mawh sy,” tah na ta. Chatanachata lakho a ngia kawpa cha pakhosa haw ei ta, chysia ta tobi ei ta; ABEIPA vâlyuhchâpa cha a kiapâh liata a dua ta.

6 ABEIPA vâlyuhchâpa chata Zawsua hnohta,

7 “Pheisaihzy ABEIPA chata he tana he a tah: Ei lâpizy achhi lymâpa ta, ei biepiepazy na tao khiahtala, ei o chhôh ryureina suzy cha a vao hra aw chi ta, he a duahpa sahlao hry ta a hlao thei hawpa ei chapie aw.

8 Atahmâ pachâ teh, hy Zawsua, theihthai beichaipa y, nâma nata na viasazy na hmiakô liata atyuhpazy khata pachâ teh u, chyhsa, kheihhawhpa tlyma pamosana châ tlôh ei ta: ei chakaotuhpa Chhy cha vaw pathaosa tlôh aw na ta.

9 Nahthlie teh u, Zawsua hmiakô liata ei alô sopa cha, alô miakha liana chata alô miasari a y; a chô liana chata hmo ropa zy roh aw na ta, cha râh hraoleinazy cha noh noh khata ei pahlei khai aw. Pheisaihzy ABEIPA ta a tah.

10 Cha noh liana chata chyhsa to ta krezô ry liatazy nata theiku kô ry liatazy nâmo vaihzy nama hrua chyu ha aw, Pheisaihzy ABEIPA ta a tah,”

Zakariah (Zechariah)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10	Bo 11	Bo 12	Bo 13	Bo 14

Zakaria 4

Meiôh patyuna nata Ôli thozy

1 Chatawhcha vâlyuhchâpa bie na chhotuhpa kha a vy heih ta, a môpa pahrapa hawhna heta na vaw pahra ta.

2 Ei hnohta, “Khâpama na hmô?” na tah ta. Keima ta, “Ngô meiôh sona, a pawhmao liata biebuhzy nata cha liata meiôh miasari chhaota.

3 Chatawhcha a pawhmao liata meiôh tôh miasari a hnei chyupazy nata ôli tho miano biebu chachâh lâta miakha, chavei lâta miakha a ypa ei hmô,” tah na ta.

4 Chatawhcha vâlyuhchâpa na chhotuhpa hnohna chata, “Hezy he khapa a châ, ei beipa?” tah heih na ta.

5 Chatawhcha vâlyuhchâpa bie na chhotuhpa chata nâ chhy ta, ei hnohta, “Hezy he khâpama ama châ pahno va chi ma?” tah ta. Kei chata, “Pahno va na, ei beipa,” tah na ta.

6 Cha liana cha ano chata ei hnohta, “Hezy he Zerubabel kyh, ABEIPA bie cha châ ta; thatlôna châ leipa ta, hmotaotheina châ hra leipa ta ei Thlahpa ta tlao châ se, tahpa ta Pheisaihzy ABEIPA chata a tah.

7 Ahy e na châ? Hy tlâh laipapi, Zerubabel hmiakô liana chata bypi ta na châ aw; ano chata a alo pei chaipa cha ano chata byhnâ awna chhaota, thaphana awna ao chhaota a vaw tlôkhei aw!” tahpa ta nâ chhy haw ta.

8 Cha leipa chhao cha ABEIPA bie ei hnohta vaw tlô heih ta:

9 “Zerubabel ku chata he a lôbôzy he bô ta; ano ku lilawta pi patloh aw ta. Chatanachata Pheisaihzy ABEIPA chata nâmo lâta eina tuah, tahpa nama pahno ha aw.

10 Hmo chynawhpa daihtizy he ahyma a mohnao? Thapha ngaitapa ta y aw ei ta, Zerubabel ku liata padonari hmô tlôh aw ei ta. “He miasari zy tlai he ABEIPA moh cha châ hra ei ta; alei pôhpalôhpa chô liana heta amâ khie chahlô tyh,” tahpa ta.

11 Chatawhcha kei chata a chhy na ta, a hnohta, “He ôli tho miano, meiô sona chachâh lâ nata chavei lâtahpa he khâpa ma a châ?” tah na ta.

12 Chatawhcha a ei nona ta a chhy na ta, a hnohta, “Ngôh meiô tôh miano kiapâh liata he ôli chiah miano, ngôh thaw vaw puanazy he khâpa ma a châ?” tah na ta.

13 Ano chata nâ chhy ta, “Hezy he khâpama a châ aw tahpa pahno va chi ma?” na tah ta. Kei chata, “Pahno bao va, ei beipa,” tah na ta.

14 Ano ta, “He sathaw thupa pano, alei chô zydua liata ABEIPA kiapâh liata a duahpazy cha ama châ hih,” tah ta.

Zakariah (Zechariah)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10	Bo 11	Bo 12	Bo 13	Bo 14

Zakaria 5

Châ chatypa a zaw haipa

1 Cha liana chata mohmia kaw pasaih heih na ta, moh na ta, châ chatypa a zaw ngâpa he hmô na ta.

2 Ano chata ei hnohta, “Khâpa ma na hmô?” tah ta. Kei chata a chhy na ta, “Châ chatypa a zaw ngâpa ei hmô; a doh cha dy syno châ ta, a hâ cha dy hrawh a châ,” tah na ta.

3 Ano chata ei hnohta, “He he râh pôhpalôhpa chopa chhiesana a puapa cha a châ hih; a tlaw rakha yzie lymâ hawhta parutuhpa maih cha pasi pathaipa châ tlôh aw ei ta; a râkha lâ yzie lymâ hawhta chhiesapa maih chhao pasi pathaipa ama châ hra aw.

4 Pasia aw na ta, parutuhpa o liata nata ei moh reipa ta a do lei ngaitapa ta chhiesatuhpa ozy liana chata a ngia aw ta; ama o chhôh liana chata y thlâh ha aw ta, a thophiazy, a alôzy chhaota a patlô khai aw, Pheisaihzy ABEIPA ta a tah,” tah na ta.

Ephah liata chanô

5 Chatawhcha vâlyuhchâpa na chhotuhpa cha sie ta, ei hnohta, “Atahmâ mohmia kaw pasaih la, a sie hawpa kha khâpa maw moh tua?” na tah ta.

6 Kei chata, “Khâpa maw?” tah na ta. Ano ta, “He he ephah a puapa kha a châ,” tah ta. Ano lilawta, “He he râh pôhpalôhpa liata ama hmoparaopa cha a châ,” tah ta.

7 Chatawhcha moh teh, ky talent miakha chalopa ta y ta; ephah chhôh liata chanô a tyuhpa cha a châ!

8 Chatawhcha ano chata, “He he hmoparaona cha a châ,” tah ta; ephah chhôh liana chata a pangia; kyh a hri ngaitapa chata phiehru haw ta.

9 Cha liana chata mohmia kaw pasaih na ta, moh na ta, chanô pano a vypa hmô na ta! Ama mathlaw liana chata thlih y ta; mathlaw cha vawpô mathlaw hawhpa hnei ei ta. Ephah cha alei nata avâ likawta chalo ei ta.

10 Chatawhcha kei cha vâlyuhchâpa na chhytuhpa hnohna chata, “Ephah cha hezy heta khataih lâ ma ama siekhei aw?” tah na ta.

11 “Ano chata ei hnohta, “Shina râh liata ano chata o sa nawpa lâna chata; o cha palohpa a châ tina chata, cha liana chata ano su tlai liata ama soh aw,” tah ta.

Zakariah (Zechariah)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10	Bo 11	Bo 12	Bo 13	Bo 14

Zakaria 6

Talaili miapalihpa

1 Chatawhcha kei cha mohmia kaw pasai heih na ta, kaw moh na ta, tlâh miano likawhta arâ talaili miapalih a vaw puapa hmô na ta; tlâhzy cha dawh tlâh châ ei ta.

2 Talaili miakhana liatahpa cha arâ saihpa châ ei ta, talaili mianona liatahpa cha arâ vyhpa châ ei ta,

3 talaili miathôhna liatahpa cha arâ râhpa châ ei ta, talaili miapalihna liatahpa cha arâ saihrulupa, chahra ngaitapa châ ei ta.

4 Vâlyuhchâpa bie na chhotuhpa hnohna chata hiahri na ta, “Hezy he khâpa maw ei beipa?” tah na ta.

5 Vâlyuhchâpa chata ei hnohta, “Hezy he avâ thli miapalih, aleilô zydua ABEIPA hmiakô liata yna tyhpa, a siepazy cha ama châ hih.

6 Arâ vyhpa yna talaili cha maw lâta sie ta, a râhpa ta pazi ta, chatawhcha a saihrulupa cha chho râh lâta sie ta,” na tah ta.

7 ‘Chatawhcha a saihpa cha pua ta, alei chô liata ama khiechahlô thei nawpa ta tlua ta: “He tawhna heta sie la, alei chô liata a khiechahlô teh u,” tah ta.

8 Chatanachata ei hnohta, “Nahthlie teh, maw lâta a siepazy kha maw râh liana chata ei palôh tha ama padâh,” tahpa ta na aw sao ta.

Zawsua beilakho pakho nawpazie

9 ABEIPA bie cha ei hnohta vaw tlô ta:

10 “Seichâna liata a ypa Heldai zy, Tôbizah zy, Zôdaiah zy liata hmo cha la la: cha noh lilaw liana chata a vy la, Babylaw tawhta ama vaw pangaipa Zephania sawchapawpa Zôsiah o liana chata a ngia teh.

11 Âmo tawhna chata tâkâri nata ngôhzy la la, abeilakhozy tao la, Zehôzada sawchapawpa Zawsua, theihthaipa beipa luh liana chata pakho teh;

12 a hnohna chata, ‘He tana heta Pheisaihzy ABEIPA ta a tah: “Pachâ teh, chyhsa a moh Chhy ano su tawhta vaw thao aw ta, ABEIPA o cha a vaw sa aw.

13 ABEIPA o tlai cha a vaw sa aw, rôhnahna cha a kho aw ta, a abeidyuchhai liata a tyuhpa ta ryu a reih aw. A beidyuchhai liana chata theihthaipa châ aw ta, adyhna chhosiena cha ama pano likawh ta a y aw.”

14 Chatawhcha abeilakhozy cha Heldai zy, Tôbizah zy, Zedaiah zy, Zephania sawchapawpa Zôsiah zy chata ABEIPA o liata a thei thlâh ha nawpa a châ aw.

15 “Chatawhcha lâhlapi ta a ypazy kha a vy aw ei ta, ABEIPA o cha vaw sa heih aw ei ta; Pheisaihzy ABEIPA chata nâmo lâta eina tuah tahpa nama pahno aw. ABEIPA nama Khazohpa ao cha pakhâta ta nama nahthlie tyh khiahtala he biezy he a vaw tlô tlai aw, a tah, tahpa ta reih teh,” tah ta.

Zakariah (Zechariah)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10	Bo 11	Bo 12	Bo 13	Bo 14

Zakaria 7

Nie leipa ta yna ngâchhih leipa chhoreina

1 Abei Dana kô palihna, thla chakina, Kisleva noh palih noh liana tlai chata Zekaria hnohta ABEIPA bie cha vaw tlô ta.

2 Bethel chyhsazy chata Shareza nata Rekemele nata ama chyhsazy vaw tuah ei ta, ABEIPA ngiachhiena cha a haw ei ta,

3 Pheisaihzy ABEIPA o liata ei vaw tao haw tyhpa hawhta kei ta a pananopa ta thla pangawhna liana chata ei cha aw ma? tahpa ta.

4 Cha liana chata Pheisaihzy ABEIPA bie cha ei hnohta vaw tlô ta;

5 “Râh liata chyhsa zydua nata theihthaipazy hnohta, he kô sysari chhôh tlai chhaota thla pangawhna nata thla sarina liata nie leipa ta ypa ta pachârôhpa ta nama y tyhpa zy kha, ei moh ta, keima moh tlaita nie leipa ta a ypa ma nama châ?

6 Chatawhcha nie eichi ta, nama doh no chhaota nâmo chata niepa ta nama dohpa châ vei ma?

7 Zerusale nata a chheipâh liata khihpizy chyhsa ta bipa ta thlaochhi ngaitapa ta ama y nota nata chho lâ nata râh bypi zy chhao chyhsa ta bipa ta ama y nota hrohsopa hmiatuapazy hmâpa ta ABEIPA bie reipazy kha nama vaw pahno ha bâ awpa châ vei mâ? tahpa ta reih teh,” tah ta.

Seichâna chhâpa reingiah leina

8 ABEIPA bie cha Zekaria hnohta vaw tlô ta,

9 “Pheisaihzy ABEIPA chata he tana heta a reih, pachiana ado ngaitapa ta pathlu ula, chyhsa tota ama unawhpa chô liata zawngiahna nata ngiachhiena papua mawh sy.

10 Nôhmei zy tlyma, hârapazy, khichhaizy, sipasapazy tlyma, pasaipa-i hra khah u; ahyrai hmahta nama palôh ta nama unawhpazy châta pha lei awpa cha pachâ khah u,” tahpa ta.

11 Châhrasala nahthlie khoh leipa ei ta, ama hnokhi chhy ei ta, ama thei lei nawpa ta ama nah a chahu ei ta.

12 Pheisaihzy ABEIPA chata hrohsopa hmiatuapazy ku ta a bie paphaopa nata ryhpa biezy cha ama nahthlie lei nawpa ta ama palôhzy cha alô châkarupa hawhta pachâsa ei ta. Chavâta Pheisaihzy ABEIPA tawhtapa pathi-iana ru ngaitapa a vaw tlô.

13 “Chatawhcha âmo a awpa nahthlie khoh leipa ei ta, cha hawhna hra cha ama awpa nahthlie hra aw va na,” Pheisaihzy ABEIPA chata a tah.

14 “Chyhsa ama pahno beih leipazy hry ta khisô ta âmo tlao ei papai aw. Cha hawhta ama hnôh lâna cha roryhrapa ta y aw ei ta, ahy hmah a khiekhâ khao aw veih ei, râh pha ngaitapa cha rory pahrasa tlôh aw ei ta.

Zakariah (Zechariah)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10	Bo 11	Bo 12	Bo 13	Bo 14

Zakaria 8

Zerusale taopathi heihna bietaina

1 Pheisaihzy ABEIPA bie cha ei hnohta vaw tlô ta,

2 “He tana heta Pheisaihzy ABEIPA chata a tah: Zaio cha pachâ hmeihseihpa ta ei pachâ, a chô liata pathi-iana taihta ei hia a tlia tahpa ta.

3 ABEIPA chata he tana heta tah ta: Zaio lâ a vaw heih ha heih na ta. Zerusale liah liata pahrâ aw na ta, Zerusale cha Bie dopa khihpi tahpa a châ ha aw; Pheisaihzy ABEIPA tlâh cha tlâh pathaihpa tahpa a châ hra aw.

4 Pheisaihzy ABEIPA chata he tana heta a tah: Zerusale othliahzy liana chata pawpipazy nata nôpipazy ama kô hluhpa vâta chôhchahrei a chhypazy chhao cha ama pahrâ aw.

5 Chatawhcha othliah liata palaopa ta khihpi othliahzy cha chanô hawti nata chapaw hawti ta ama bi aw.

6 Pheisaihzy ABEIPA chata he tana heta a tah: Cha nohzy liana chata he chyhsa a y tlakaipazy mohmô liana heta noâhpa a châ khiahtala, kei mohmô liata noâhchhihpa a châ hlei hra aw ma? Pheisaihzy ABEIPA ta a tah.

7 Pheisaihzy ABEIPA chata he tana heta a tah: Nahthlie teh u, ei chyhsazy cha nochhi lâ râh tawhtapa zy notla lâ râh tawhtapa zy pachha aw na ta;

8 a vaw chhi aw na ta, Zerusale chhôh liata ama pahrâ aw; ngâchhihna nata siana liata ei chyhsazy cha aw ei ta, kei chhao ama Khazohpa ei châ aw,” tah ta.

9 Pheisaihzy ABEIPA ta he tana heta a tah: “Achhyna o tlai he sapa a châ thei nawpa ta Pheisaihzy ABEIPA o lôbô bô no ta hrohsopazy pakah ta bie a puapa, nâmo atahmâ a nahthlietuhpazy chi heta nama kuzy tha pachyu teh u.

10 Kha hlânazy khata chyhsa châta a hlaona y leipa ta, sahroh hmâ nawpa chhao y hra vei, khakhaina vâta a ngiapa nata a puapa châta chhao thlahlôhna y vei; chyhsa zydua a vaih nata ei padyusapa châ tlôh ta.

11 Atahmâ deikua cha he chyhsa a y tlakaipazy hnohna heta kha hlâ hawhna kha châ khao aw va na, Pheisaihzy ABEIPA ta a tah.

12 Adyhna chi y ha tlôh aw ta; krezôzy cha pathei aw ta, alei ta kô veina papua aw ta, avâ ta diati a patlasa aw; he chyhsa a y tlakaipazy he, cha cha ei patosa aw.

13 Chatawhcha pho hropazy hryta chhiesapa na châ tyhpa vâta, hy Zudah chhôhkhazy nata Izarel chhôhkha saih u, cha pachha aw ei na ta, byhnâ awpa ta nama y aw. Chi leipa ula, nama ku deikua pachyu mawh sy,” tah ta.

14 He hawhna heta Pheisaihzy ABEIPA ta tah tlôh ta: “Nama pathlatuhpazy ta ei hie eina pahâh nota nama chôta hmopha leipa tao awpa ei pachâ nota pathlei leipa na ta;

15 atahmâ he Zerusale nata Zudah chhôhkha châta hmophapa tlao ei pachâ heih aw; chi khah u, Pheisaihzy ABEIPA ta a tah.

16 Hezy he nama hmotao awpa cha a châ aw: Chyhsa tota âmo vaih hnohta bie dopa reih chyu ula, nama chhikao kiahpa ta biedopa nata adyhna ryurei teh u,

17 ahyrai ta nama pathipalôh liata nama vaihzy châta a pha lei awpa cha pachâ leipa ula, haipa ta chhiesapa cha a pyh khah u, he zydua he ei haopa cha a châ, Pheisaihzy ABEIPA ta tah tlôh ta,” tah ta.

18 Pheisaihzy ABEIPA bie cha ei hnohta vaw tlô heih ta,

19 “He tana he Pheisaihzy ABEIPA ta a tah: Thla palihna nie leina nata thla pangawhna nie leina nata thla sarina nie leina nata thla hrawhna nie leinazy cha Zudah chhôhkhapazy châna chata thaphana nata alyna, kyhchhi aly y ngaitapa lâta châ aw ta; chavâta biedopa nata adyhna cha pasô teh u,” tah ta.

20 “He tana heta Pheisaihzy ABEIPA ta a tah: Phozy nata khihpi hluhpi liata chyhsazy cha amâ vy aw;

21 khihpi miakha a pahrâtuhpazy cha su hro lâ sie aw ei ta, ‘Avy teh u, ABEIPA khokheina a haw awpa ta vaw parah ei suh u, Pheisaihzy ABEIPA cha tlua ei suh u, tah aw ei ta’, kei chhao ei sie hra aw.

22 ABEIPA tlua awpa nata ABEIPA khokheina cha a haw awpa ta zawpizy hluhpi nata phopi thatlôpazy Zerusale lâ amâ vy aw tah ta.

23 Pheisaihzy ABEIPA chata he tana heta a tah: Cha nohzy liana chata chyhsa pahrawh, pho to tawhta a vaw puapazy chata Zu chyhsa pakha a viahpakao pasihpa ta patu aw ei ta. ‘Na hnohta Khazohpa a y tahpa eima pahnopa vâta na hnohta eima sie aw! ama tah aw,” tah ta.

Zakariah (Zechariah)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10	Bo 11	Bo 12	Bo 13	Bo 14

Zakaria 9

A chheipâh liata phopizy chôta pachiana

1 Hadra râh liata ABEIPA bie bietapa nata Damaska chô liata a hrie awpa cha. ABEIPA mokhaoh cha chyhsa chô liata nata Izarel pho zydua chô liata a choh tlôh ta;

2 châ a rohtuhpa Hama khih chô liata chhao, Tyre nata Sidaw chhao, ama so ngaita vâta.

3 Tyre chata ano chata khihpi tao ta, tâkârizy cha buhcha hawhta pachô ta, ngôh phapa cha othliah liata chiatlao hawh tlaita a pachô.

4 Nahthlie teh u, ABEIPA chata papai aw ta, tilaipi liata a thatlôna parao aw ta, mei ta patlô khaipa ta a y aw.

5 Askelaw chata hmô aw ta, a chi aw, Kaza chhaota hmô aw ta, a pasa a tah ngaita aw; Ekraw cha a hnabeiseina vâna chata ano za aw ta. Beichaipa cha Kaza tawhtapa leidia aw ta; Askelaw cha pahrâpa ta châ aw vei;

6 Asadô liana chata riasaw sahlao pahrâ aw ei ta, Philistina mo apalaina cha ei pahleipadia aw.

7 Ama pakah tawhta ama thisaih lakhai aw na ta, ama hâh likawh tawhta ama pasichhihna ei la khai aw; âmo chhao eima Khazohpa châta a y tlakaipa châ aw ei ta, Zudah râh liana chata hyutuhpazy chhao châ aw ei ta, Ekraw mozy cha Zebu mozy hawhta ama châ aw.

8 Chatawhcha ei o cha pheisai hri tawhtapa vaih aw na ta, ahy hmahta sie palâhpa ta a lie heih leipa aw ei ta; pasaipa-ituhpa ahyhmah sie pahlie beih khao aw veih ei; ei mokhaoh ta hmô tlôh na ta.

Nohhro ta Zaio Beipa

9 Hy Zaio sawchanô y, thapha ngaitapa ta y la! Hy Zerusale sawchanô y, awh teh! Nahthlie teh, na beipa cha nâ lâta a vy, mosiapa châ ta, pahnietuhpa a châ; a reisi ngaitapa ta alâ chô liata kiah ta, alâ taw chô lia tlaita.

10 Ephrai tawhtapa talaili nata Zerusale tawhtapa a râh cha pahleipadia aw na ta; adyuhna libaw cha ei tai aw, phozy hnohna chata adyhna kyh reih aw ta; a ryureina cha tilaipi tawhta tilaipi taihta, chavah tawhta kaoki taihta a châ aw. Zaio taopathi heihna

11 Nâma kyh liata chhao, na biehrai thisaih vâta khaotlô ti y leina tawhtapa na chyhsa atâhpazy cha ei vaw papua aw.

12 Hnabeiseina a hneipa atâhpa saih u, kuh lâna chata kua ula; atanoh tlai he a lie no ta ei cha pie aw ei tahpa ei phuah.

13 Zudah cha ei libaw chata akei na ta; libaw liana chata Ephrai ei pataih haw. Hy Zaio y Krika sawzy tawhtapa na sawzy cha pathyu aw na ta, chyhsa thatlô ngaitapa zaozi hawhta ei cha tao aw.

14 ABEIPA cha ama chôta a luah aw ta, a châtai cha dôhla hawhta a pua aw; ABEIPA Khazohpa chata chiahmie tô aw ta, chho lâ khisô chhaota a sie aw.

15 Pheisaihzy ABEIPA chata âmo hrôbieh aw ta, âmo chata ama khakhaipazy cha nie khai aw ei ta, vawna alôzy chhao ama tlypa aw; do aw ei ta, kresawti paripa hawh tlaita ama palopasa aw, biebu biehpa hawh tlaita bieh aw ei ta, maisâh ki hawh tlaita.

16 ABEIPA ama Khazohpa chata a sahroh zaw hawhta, cha nohzy liana chata âmo a paboh aw; abeilakho liata alôzy hawhta he râh chôh liana heta pasâhsa tlôh aw ta.

17 Thaphanazy cha thata châ ta, angiana zy cha thata a châ kaw dia! Sa-biazy thiepa chata satlia pasa tlôh aw ta, kresawti thiehpa chata laihsazy pasa aw ta.

Zakariah (Zechariah)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10	Bo 11	Bo 12	Bo 13	Bo 14

Zakaria 10

Abeipa ta a chyhsazy chatlaina

1 Vâsua daihti hnôh lâtahpa liana heta ABEIPA cha vâsua hiah teh u, ABEIPA dôhla a pathliesatuhpa tlai cha; ano ta lyu liata sibiepa to châta vâkatlâ a pasuasa aw.

2 Khazoh nohthlahpa chata khâpa hmah a châ leipa reih ta, pachaothaipazy hmo hmôpa cha haipa châ tlôh ta; mâ do leipazy reih ei ta, chyhsa thlah ama palôhpa khâpa hrao leipa cha ta. Chavâta mietahkupa zaw hawhta âmo lâpi chyu lâ a heih ei ta, mietahkuvaihtuhpa a y leipa vâta riethei tao ei ta.

3 “Mietahkuvaihtuhpa chô liata ei pathi-ia ngaita ta, mie tôhpazy cha ei hrie aw; Pheisaihzy ABEIPA chata a sahroh hri, Zudah chhôhkhazy cha vaw tly ta, adyuhna liata arâ pha ngaitapa hawhta tao tlôh aw ta.

4 Ano tawhtapa a ki alô zy, khaina thua zy, a dyuhna libaw zy, ryureituhpazy hmaohkha ta ama vaw pua aw.

5 Chyhsa thatlô ngaitapa hawhta châ aw ei ta, adyuhna othliah chiatlao liana chata ama khakhaipazy ama tlypâ aw; ABEIPA cha ama hnohta a ypa vâta thata amâ dyuh aw; arâ a kiahpazy cha ama maohphyu aw.

6 “Zudah chhôhkhazy tha patlô aw na ta, Zawsi chhôhkhazy cha pabohsa aw na ta, ei chhi heih aw, âmo cha ei thapasa tlôh ta, ei thy leipa hawhta châ aw ei ta; kei ABEIPA nama Khazohpa cha châ tlôh na ta, âmo ei nahthlie ha aw ei.

7 Ephrai mo cha chyhsa thatlô ngaitapa hawhta châ aw ei ta, kresawti palysapa hawhta ama pathipalôh aly aw. Ama sawzy chata hmô aw ei ta, thapha aw ei ta, ABEIPA liana chata ama pathipalôh âly aw.

8 “Pahi aw na ta, âmo ei aw pakhy aw, âmo cha chatlai haw tlôh na ta, ama vaw pôh hapa hawh tlaita ama pôh lymâ aw.

9 Râh nano lâ saita to patla na ta, râh hlapi liata eina thei thlâh ha aw, ama sawzy chhaota y aw ei ta, ama vaw kua heih aw.

10 Izi râh tawhtapa chhao a vaw chhi heih aw na ta, Asuria râh tawhtapa ei pakhy khai aw; Kilia râh nata Lebanaw lâna chata vaw chhihtha aw na ta.

11 Taolana tilaipi cha sie palâh aw ta, chalâhparâpazy cha tu aw ta, Nile athupa zy cha a kua aw. Asuria apalaina cha panawhsapa châ aw ta, Izi râh beipa chôhchahrei cha a lei syulyu aw.

12 ABEIPA liana chata âmo tha patlô aw na ta, ano moh ta ama hlai lymâ aw,” ABEIPA ta a tah.

Zakariah (Zechariah)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10	Bo 11	Bo 12	Bo 13	Bo 14

Zakaria 11

1 Na ochhizy pahy teh, hy Lebanaw y,na sidyzy mei ta a kâ khai thei nawpa ta!

2 Hy meisa tho y, sâh ngâ teh, sidy cha a pao hawpa vâta, a phapazy cha parao hawpa châ tlôh ta! Basana oaka tho zy saih u, sâh ngâ teh u, râhmâhpizy chhao di khai ha tlôh ta!

3 Mietahkuvaihtuhpa sâh ngâpa pyu zy rimâ cha, Zawdâh lyurâh cha roryhrapa ta a y.

Mietahkuvaihtuhpa dyutlai leipazy

4 ABEIPA ei Khazohpa chata he tana heta a reih: “Sahroh hri thi awpa hawhpazy cha mohôh teh,

5 a hneituhpazy chata thie tyh ei ta, thai leipa ta a rao hlei veih ei; âmo a zuahtuhpazy chata,’ ABEIPA cha reithaipa ta y mawh sy, vaw hneirôh haw tlôh pi ta’, tah ei ta; âmo vaihtuhpa zy tlai chhaota ngiachhie hra veih ei.

6 Râh pahrâtuhpazy cha ngiachhie khao tlôh leipa aw na ta,” ABEIPA ta a tah. Chatawhcha nahthlie teh u, chyhsa to cha a vaih ku liata nata a beichaipa ku liata ei pie aw; râh cha parao aw ei ta, ama ku tawhta pachha aw va na,”

7 Chatanachata sahroh zaw thi awpa hawhpa cha mohôh na ta, sahroh zaw hryta ngiachhie a chhipa tlai cha, chôhchahrei miano la na ta; miakha cha ‘Zawngiahna’ bi na ta, a hropa cha ‘Pazaona’ bi na ta; sahroh zaw cha pasa na ta.

8 Thla kha chhôh ta mietahkuvaihtuhpa pathôh pahleipadia na ta, ei hrona heta âmo cha ai kaw tlôh na ta; âmo hrona chhaota nâ hao hra ta.

9 Chatawhcha kei ta, “Cha pasa aw veih ei na. A thipa maih cha thi thlâh ha sala; pahleipadia awpa maih cha pahleipadiapa châ mawh sy; a laibâhpazy cha ama sapa âmosasyh ta a nie ei se,” tah na ta.

10 Ei biehrai, zawpizy hnohta ei hraipa cha ei parao thei nawpa ta ei chôhchahrei Zawngiahna cha la na ta, tai pathlah na ta.

11 Chatawhcha cha noh liana chata pathlapa ta y ta, sahroh zaw hry liata ngiachhie a chhipa, na papeisatuhpazy chata ABEIPA bie a châ haw tahpa pahno haw ei ta.

12 Chatawhcha ama hnohta, “A pha nama tah khiahtala, ei hlao cha na pie ula; nama tah leipa khiahtala na pie khah u,” tah na ta. Chatanachata ei hlao châta tlaw sythô kho pathliah ei ta.

13 ABEIPA chata ei hnohta, “Ei ty châta a phapa ta a reipa rakha cha beihvituhpa pie teh,” tah ta. Chatawhcha tlaw sytho cha la na ta. ABEIPA o liana chata beihvituhpa hnohta ei pie.

14 Chatanachata Zudah nata Izarelzy likawhta a unawhna cha ei parao thei nawpa ta ei chôhchahrei hropa Pazaona cha la na ta, tai pathla haw na ta.

15 ABEIPA chata ei hnohta, “Mietahkuvaihtuhpa hropa chaihrai cha kei la heih tlai mah y.

16 Pachâ teh, râh liana chata mietahkuvaihtuhpa paduasa aw na ta, cha chata pahlei awpa zy cha tly leipa aw ta, papai hawpazy cha tlua hra aw vei; a tlie hawpazy cha patlâ khai leipa aw ta, hri-ia pathaihpazy chhao cha pasa hra leipa aw ta, a thaw chiehpazy cha tlao niepa ta ama châkizy cha a hriechheih aw.

17 Mietahkuvaihtuhpa dyutlai leipa, sahroh zaw a siesaituhpa cha a hu a po na! Zaozi cha a bâh liata nata a mokhaoh chachâh lâta tla aw ta! A bâh cha rao khai aw ta, a mokhaoh chachâh lâ cha a zohkaluh ha aw!” tah ta.

Zakariah (Zechariah)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10	Bo 11	Bo 12	Bo 13	Bo 14

Zakaria 12

Noh hrota Zerusale pachha nawpazie

1 Izarel kyh liata ABEIPA bie bietapa cha: ABEIPA a vâ a paraituhpa, aleilô bôna a bôtuhpa, chyhsapa chhôh liata thlahpa a taotuhpa chata he tana heta a tah:

2 “Pachâ teh u, Zerusale cha a chheipâh ta zawpi zydua châta parina nyu ta tao aw na ta; Zerusale dôna liana chata Zudah châta chhao a châ hra aw.

3 Cha noh liana chata Zerusale cha zawpi zydua chata alô ahri ngaitapa ta ei tao aw: châ a paphaosatuhpa zydua cha pasa ngaitapa ta hmah phaohpa ta ama y aw. Chatawhcha alei liata pho zydua cha ano a chhai awpa ta amâ hmaoh pakhy aw.

4 Cha noh liana chata arâ to pahlaw aw na ta, a chô liata a kiahtuhpazy cha hruna ta ei hrie aw, ABEIPA ta a tah. Zudah chhôhkhazy chô liana chata ei mo padeih aw na ta, zawpizy arâzy cha mochaona ta ei hrie aw.

5 Zudah hyutuhpazy chata, ‘Zerusale a pahrâtuhpazy cha Pheisaihzy ABEIPA ama Khazohpa liana chata thatlôna ama hnei’, ama palôhrupa ta ama tah aw.

6 Cha noh liana chata Zerusale hyutuhpazy cha tho hry liata meipaoh hawhta tao aw na ta, sapiah hryta meirei hawhta ei tao aw; a chheipâh liata zawpizy cha a kâ patlô aw, chachâh lâ nata chavei lâta; Zerusale cha ano su tlai, Zerusale lâna chata a duah heih aw.

7 “Davi chhôhkha rôhnahna nata Zerusale a pahrâtuhpa rôhnahna cha Zudah lypa ta palaisapa ta a y lei nawpa ta, ABEIPA chata Zudah poh-ozy cha a pachha tua chai hra aw.

8 Cha noh liana chata ABEIPA chata Zerusale a pahrâtuhpazy cha a paboh aw; cha noh liana chata ama hryta chyhsa chiehleipazy chhao cha Davi hawhta ama vaw châ aw; Davi chhôhkhazy cha Khazohpa hawhta vaw châ aw ei ta, ama hmiakô ta ABEIPA vâlyuhchâpa hawhna cha ama vaw châ aw.

9 Chatawhcha cha noh liana chata Zerusale a dyuhtuhpa cha pahleipadiana ei tlua aw.

10 “Chatawhcha Davi chhôhkhazy chô liana nata Zerusale a pahrâtuhpazy chô liana chata ngiachhiena nata hiana thlahpa hry aw na ta, chyhsa ta a sawchapaw matlupa châta mâchhie a sapa hawhta mâchhiesapa ta ama y aw, chyhsa ta a saw tuapa chôta pasa a taopa hawhta pasa a tao aw.

11 Cha noh liana chata Zerusale liata mâchhiesana thata y aw ta, Mekidô saikao liata Hadarimô su liata mâchhiesana hawhna tlai khata.

12 Chatawhcha râh chata mâchhie sa aw ta, chhôhkha chyu ta, â nano chyu ta; Davi pathla chhôhkha chhao â nano ta, ama lahpinôzy a naoh ta;

13 Livai pathla chhôhkha â nano ta, ama lahpinôzy â nano ta; Shimei chhôhkhazy a nano ta, ama lahpinô zy â nano ta;

14 chhôhkha hropa zydua chhao, chhôhkha to â nano ta, ama lahpinôzy â nano chyu ta.

Zakariah (Zechariah)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10	Bo 11	Bo 12	Bo 13	Bo 14

Zakaria 13

1 “Cha no hliana chata moleipa nata pualeipa zy chata Davi chhôhkhazy nata Zerusale pahrâtuhpazy hnohta tikhaoh pahypa ta a y aw.

2 “Chatawhcha cha noh liana chata Pheisaihzy ABEIPA chata he tana heta a tah, râh tawhtapa khazoh nohthlahpa mohzy cha pahlei aw na ta, a thei thlâh hapa châ khao aw veih ei; chatawhcha râh tawhtapa hrohsopazy nata thlahpa puapa cha ei papua khai aw.

3 Chatawhcha ahyrai ta bie khâ a chho khiahtala a nô nata a paw ano a satuhpazy khata a hnohta, ‘Hroh aw va chi, ABEIPA mohta haipa reih tlôh chi ta,’ ama tah aw; a nô nata a paw ano a satuhpazy khata, bie a reih hai nota ano cha ama chô pahlie aw.

4 Cha noh liana chata hrohsopa ta bie a chho nahta a luahna hmôpa maih cha a zakhei ha aw; chyhsa dô nawpa ta viahpakao pasihpa hmizy ky hra leipa aw ei ta,

5 Hrohsopa châ leipa na ta, lyu a thlyupa ei châ, ei thyudyu noh tawhta sei ta taopa châ tlôh na ta,’ tlao a tah aw.

6 Chatawhcha chyhsa ahy tlyma a hnohta, ‘Na bâh likawh ta hmahzy he khâpa maw?” tah aw ta, ano ta, ‘Hezy he cha ei viasazy o liata ei hmah a châ,’ tahpa ta â chhy aw”.

Abeipa mietahkuvaihtuhpa tuna

7 “Hy zaozi y, ei mietahkupa nata ei kaolâhpa chô liana chata a hra teh, “Pheisaihzy ABEIPA ta a tah. “Mietahkuvaituhpa cha tu la, mietahkupazaw ama pai aw; a tawzy chô liana chata ei ku ei hy aw.

8 Râh zydua liata su no lymâ paraopa châ aw ta, a thi aw: su thôna deikua cha siesaipa a châ aw.

9 Chatawhcha su thôna cha mei lâta cheih aw na ta, tâkâri pathaisapa hawhta âmo pathai aw na ta, ngôh pasiapa ta a ypa hawhta âmo ei pasia aw. Ei moh pado aw ei ta, âmo ei nahthlie aw, âmo cha, ‘Ei chyhsazy ama châ,’ tah aw na ta; âmo ta, ‘ABEIPA cha eima Khazohpa a châ’, ama tah aw.

Zakariah (Zechariah)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10	Bo 11	Bo 12	Bo 13	Bo 14

Zakaria 14

Zerusale nata phopizy

1 Nahthlie teh, ABEIPA noh a vaw tlô aw na, cha liana chata nama hrona hmozy nama hry liata pachhaihpa a châ aw.

2 Zerusale adyuh awpa ta pho zydua pakhy tlôh aw na ta. Khihpi cha lapa châ aw ta, ozy chhao cha hraopa châ aw ta, chanôzy cha taochhiepa ama châ aw. Khihpi khophie cha seichâna lâta chhihthapa ta y aw ei ta, zawpi a y tlakaihpazy cha khihpi tawhtapa pahleipa châ aw veih ei.

3 Cha daihti liana chata ABEIPA cha pua aw ta, adyuhna noh liata adyuh tyhpa hawhta cha phozy cha a dyuh aw.

4 Cha noh liana chata Ôli Tlâh nochhi lâta Zerusale a vaw daihpa liana chata a phei pahnie aw ta, Ôli Tlâh cha nochhi nata notla ta a liah liata a pachhaih aw ta, saikao lai ngaitapa a y aw; chatawhcha tlâh khophie cha maw lâta a pasie aw ta, a khophie cha chho lâta.

5 Chatawhcha ei tlâh likawh saikao zy liana chata arâpai aw eichi ta, tlâh likawh saikao chata Asal su tlô tlôh aw ta, nama râpai aw, Zudah beipa Uzia a bei nota alosihpa ta namâ râpaipa hawhna khata ABEIPA ei Khazohpa cha a vy aw, a moh pathaihpa zydua chhao nâ lâta amâ vy aw.

6 Cha noh liana chata chasina y leipa aw ta, dâhaw tla hra aw vei.

7 Châhrasala ABEIPA pahnopa noh khapa cha châ aw ta, chhô châ leipa, zâ a châ leipa; zâlâ deikua chata khaihna a vaw y aw.

8 Cha noh liana chata Zerusale tawhta ti hrohpa vaw pua aw ta, a khophie nochhi lâ tilaipi liata, a khophie notla lâ tilaipi liata; nopi noh nata chasipaw noh liata chhao cha hawhna cha a châ aw.

9 Chatawhcha alei chô zydua liata ABEIPA cha beichaipa a vaw châ aw; cha noh liana chata ABEIPA cha pakha châ aw ta, a moh chhao miakha a châ aw.

10 Râh zydua cha Keba tawhta Zerusale chho Rimô taihta Arabah hawhta a vaw châ aw. Zerusale cha pasâhsapa ta y aw ta, Benzami Chhikao ama tahpa tawhta chhikao miakhana taihta a Ki Chhikao taihna chata, Hananel O sâhpa tawhta abeichaipa kresawti saona khaoh taihta a su cha a pahrâ aw.

11 Chatawhcha cha liana chata chyhsazy pahrâ aw ei ta, chhiesana rai y khao aw vei; Zerusale cha a bohpata ta tlao a y ha aw.

12 Chatawhcha Zerusale adyuhtuhpa zawpi zydua chôta ABEIPA ta hri a chareisa awpa cha he he a châ: ama mokhaoh chhôh liata ama mozy chhao a zao aw.

13 Chatawhcha cha noh liana cha ABEIPA tawhtapa tymâna ru ngaitapa ama hry liata y aw ta, chyhsa to ta ama vaih ku patu aw ei ta, a vaih ku chô liata a ku a hy hra aw;

14 Zudah chhaota Zerusale adyuh aw. A chheipâh liata pho zydua sôh nata piah, ngôh zy, tâkâri zy, chysia zy cha a hluhpi lapa a châ aw.

15 Cha hawhna hra chata arâ hri zy, sabaitu hri zy, râraoseihpa hri zy, alâ hrizy vaw y aw ta, chatawhcha rihmo liata sahroh a ypa zydua hri rupa hawhpa kha a châ aw.

16 Chatawhcha pho zydua Zerusale a vaw dyuhtuhpa siesaipa ta a ypazy cha kô chareih byureih kyhchhi a ô awpa nata Beichaipa, Pheisaihzy ABEIPA a naoh awpa ta amâ khy tyh aw.

17 Chatawhcha alei chô chhôhkha zydua Beichaipa Pheisaihzy ABEIPA a naoh awpa ta a khy leipa maih chô liata avâ suah aw vei.

18 Chatawhcha Izi râh chhôhkha kho leipa ta, a khy leipazy chô liana chata suah hra leipa aw ta, byureih kyhchhi a ô awpa ta a khy leipa phozy ABEIPA ta a hriena chi hri rupa cha a tlô aw.

19 He he Izi râh hriena nata byureih kyhchhi a ô awpa ta a khy leipa phozy hriena cha a châ aw.

20 Cha noh liana chata arâ kaly liata chhao, “Pathaihna cha ABEIPA ei,” tahpa ropa châ aw ta. ABEIPA o liata hmobaoh maih cha maisâh hmiakô liata rahô hawh rôta ama vaw châ aw.

21 Zerusale nata Zudah hmobaoh zydua cha Pheisaihzy ABEIPA châta pathaipa ama vaw châ ha aw; a theipa zydua chata vaw la aw ei ta, chhona ta ama hmâh aw. Cha noh liana chata Pheisaihzy ABEIPA o liana chata Kana chyhsa rai y khao aw veih ei.

Zakariah (Zechariah)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10	Bo 11	Bo 12	Bo 13	Bo 14