Titu 1

Titu 1

Anaona

1 Pawla, Khazohpa sei nata Zisu Krista apôstôl cha.

Khazohpa a tlypa chyhsazy angiana kyh liata baopata nata eima phôryhpa dopa pachâna lâta chhihtha awpata raopa ei châ.

2 Cha chhâzaw hrona cha Khazohpa haipa a reih thei leipa chata khizaw y hlâta bie taih ta.

3 Châhrasala ano daihti tlai liana chata a bie cha bietahpa liana chata a palâsa haw. Cha bietapa cha Khazohpa eima Pachhatuhpa biepiepa lymâ hawhta pavaosapa ei châ.

4 Titu ngiapâna dopa liata ei saw hmeiseihpa hnohta: Paw Khazohpa nata Krista Zisu eima Pachhatuhpa tawhtapa ngiachhiena nata adyhna y mawh sy.

Krita liata Titu raihriana

5 He vâna heta Krita liahpahlô liana chata ei cha siesai, hmo pasia bâhpazy cha na pasia lymâ nawpa nata bie ei cha piepa hawhna khata khi to liata machâzy na rao nawpata,

6 ahyrai seina hnei leipa lahpinô pakha a hneipa, sawzy Khazohpa bie a ngiapâpa, piepie-aohraona kyh liata seina hnei leipa, ryhpa bie a parao leipa a hneipa ama châ khiahtala.

7 Awnanopa hyutuhpa cha Khazohpa sôh a mokhâhtuhpa a châpa vâta seina hnei leipa a châ awpa a châ; chyhsa chhorupa, pathi chhiepa, kresawti pari hmâhpa, chyhsa tu thaipa, a vyuhna puapa karâ-ypa chyhsa a châ awpa châ leipata,

8 khichhaipa pasôzie a thaipa, phana a khohpa, palôhrupa dopa, chyhsa siapa, mopathaihpa, a sohsi theipa tlao châ awpa a châ;

9 pachuna do ngaitapa kyh liana chata chyhsa a pasyu thei nawpa nata, eituhpazy cha thai lei a pachâsa thei nawpata pachuna lymâ hawhta bie ngâchhihpa cha khâchâ a pyhpa a châ hra awpa a châ.

10 Ryhpa leipa hawhta a ypa bie a rei chakhypazy nata dôtuhpazy chyhsa hluhpi y tlôh ei ta, Zu sahlao hry liatahpa ama châ via chai;

11 cha sahlao pakah cha chahupa awpa a châ, a vyuhna puapa ama khohpa vâta bie pachu lei awpa pachupata, chyhsazy chhôhkha duata patypamâ tyh tlôh ei ta.

12 Âmo hry liatahpa âmo hrohsopa pakha tlaita. “Krita liahpahlô liata chyhsazy cha haihthaipa zy, sahrâhpa moleipa zy, thathipa rikawhpa zy ama châ,” tahpata a reipa kha.

13 Cha bie pahnopasapa châ â do. Cha vâna chata Zu sahlao phôhpazy nata bie hmeiseihpa aheisai tyhpazy,

14 biepiepazy cha pachâ leipata, ngiapâna liana chata a dopata ama y thei nawpata pasa kawpata chhorei teh.

15 Mopathaihpazy chata ato a pathaih tyh, châhrasala chyhsa puapa nata ngiapâ leipazy chata khâpahma a pathaihpa rai y tyh vei; ama palôhrupa nata ama ngiaryna ryh leina chhao a pua haw.

16 Khazohpa eima pahno tahpata, reih tyh ei ta. Châhrasala pasichhihpa zy, reingia leipa zy, hmophapa to taona kyh liata Khazohpa kho leinazie châ ei ta, ama hmotaopa ta amâ paphasai tyh. 

Titu (Titus)

Bo 1	Bo 2	Bo 3

Titu 2

Titu 2

Pachuna dopa pachuna

1 Nâ deikua chata pachuna dopa nata a ryhpa bie reih teh.

2 Pawpipazy cha a sohsi theipa, zachhihpa, palôhrupa siapa, ngiapâna nata kyhpachâna nata tiamana liata a do ngaitapa châ awpata pasyu teh.

3 Nôpipazy chhaota Khazohpa bie cha reipachhiepata a y lei nawpata chanôzy cha ama vahpazy kyhpachâ awpa zy, ama sawzy kyhpachâ awpa zy,

4 palôhrupa sia ngaitapata y awpa zy, pathaih ngaitapata y awpa zy, ama o liata raihriatuhpata y awpa zy, nôphapata y awpa zy, âmo vahpazy reisai ta y awpa zyta ama chhorei thei nawpata,

5 ama yzie liata Khazohpa a zapa chyhsazy, a leituhpazy nata kresawti a parâpa chyhsazy châ leipata phana lâ pachutuhpazy châ awpata pasyu hra teh.

6 Cha hawhna hra chata satliazy cha palôhrupa sia ngaitapa phaoh awpata pasyu teh.

7 Hiakha lâta a chapazy hrytahpazy ta eima chô liata bie pha leipa rai reih awpa ama hnei leipa vâta ama no a za thei nawpata ato liata hmophapa taona kyh liata a pamosatuhpa ta a palâsa la.

8 na pachuna liana chata na hmeiseihnazie zy, na zachhihzie zy, na bie reipa a dozie reipasipasua awpa rimâ a châ leipa zy cha palâsa teh.

9 Seizy chata Khazohpa eima Pachhatuhpa pachuna bie ato liata ama palyupalih thei nawpata

10 ei leipata, kusisua hnei leipata, ngâchhihna phapa zydua tlao palâsapata, ama zibeipazy reisai ta y awpa nata ato liata amâ lynazie hawhta y awpata pasyu teh.

11 Chyhsa zydua hnohta pachhana vaw tlôkheipata Khazohpa ngiachhiena a vaw lâ haw tlôh ta.

12 hnabeiseina a lychhihpa eima Khazohpa rônah ngaitapa nata Pachhatuhpa Zisu Krista rônahna aluahna cha hâpata, Khazohpa pachâ leina nata khizaw aohraonazy bâhsaipata,

13 atahmâhlâ khizaw liana heta a sohsipa nata sia ngaitapa nata Khazohpa pachâpata eima y awpa a châ tahpa maniah pachu ta,

14 ano chata hmoparaona zydua tawhtapa maniah a chatlai thei nawpa nata chi a tlypa hmophapa taopata phahnai khohpa ano chata a pathai thei nawpata eima vyuhpa ta anosasyh a piepa kha.

15 Biehnei ngaitapata cha biezy cha chho la, pasyu la, chhorei teh. Ahyhma ta cha mohnao kha ei se. 

Titu (Titus)

Bo 1	Bo 2	Bo 3

Titu 3

Titu 3

Rai phapa tao hualuapa

1 Abeizy nata biehneituhpazy liata a ngiarih awpata bie zyh awpa zy, hmophapa to taopata amâ chiehpata y awpa zy,

2 ahyhma reipachhie lei awpa zy, chhoru lei awpa zy, chyhsa zydua liata a reisina to palâsapata nônaipata y awpata, âmo pahnosa heih teh.

3 Keimo chhao hmialâna khata hru ngaitapa zy, reingiah leina zy, dôpata yna zy, aohraona nata alyna to rai chakaona zy, moleina nata hnâchhaona hmâpata yna zy, pasichhihna zy, ahao rairiehpata a ypazy châ tlôh pi ta;

4 châhrasala Khazohpa eima Pachhatuhpa nôphazie nata chyhsa chô liata a kyhpachânazie cha a vaw lâ nona khata,

5 mosia ngaitapata taopa, keimo tlai taopazy cha, chavâta châ leipata, taopathina pasina nata Thlahpa Pathaihpa taopathina chata a ngiachhiena lymâ hawhta maniah a pachha haw.

6 Cha Thlahpa Pathaihpa cha Zisu Krista eima Pachhatuhpa zawhzi ta thata eima chô liata a hrypa kha,

7 chatanachata a ngiachhiena liata thai pachâsapata ypata chhâzaw ta hrona hnabeiseina lymâ hawhta ryutotuh awpata taopa ta eima y thei aw.

8 He he biereipa ngâchhihpa a châ. Khazohpa a ngiapâ hawpazy chata hmophapa tao lymâ awpata pachâ mawh sy, cha biezy thâtih cha riahpha ngaitapata na chho awpata ei khoh. Cha biezy cha chyhsazy châta pha ta, a phahnai.

9 Châhrasala hiahrina hrupa zy, pathlatuhpazy bie a laichadaina zy, a eina zy, ryhpa bie liata a hryuna zy cha a heisaih lymâ teh; chazy cha hmo phahnai leipa nata khâpahrao leipa châ tlôh ta.

10 Ngiapâna nanopa a hneipa cha ei kha ei no chhôh tawhta cha chho khao khâ.

11 Cha hawhpa chyhsa cha sie chhei ta, a molei tahpa na pahno na; anosasy ta thai lei a pachâsapa châ tlôh ta.

Mo pakha thâtih reina

12 Artema tlyma, Tykika tlyma nâ lâ ei vaw tuah tita, Nikôpôli khih lâ ei hnohta a vy thlyu mah y, cha liana chata chasipaw ta y a chhuah tlôh na ta.

13 Zena ryhpa pahnotuhpa nata Apôlôsa chata khâpahma ama phahla lei nawpata ama khitlyna liana chata phahnai khoh ngaitapata bao mah y.

14 Eima chyhsazy chhao chata pathei leipata ama y lei nawpata phahlana byuh ngaitapazy chata hmophapa tao lymâ awpata a chu ei se.

15 Ei hnohta a ypa zydua heta a châ naoh ei. Ngiapâna liata kyh maniah pachâtuhpazy kha maniah a naohpa mah y.

Nama zydua hnohta ngiachhiena y mawh sy. 

Titu (Titus)

Bo 1	Bo 2	Bo 3