Ruthi Bo 1

 Ruthi Bo 1

Ruthi nata Naomi

1 Ryureituhpa zy chata ryu ama rei nozy liana cha cha râh liana chata chakâhna vaw tlô ta, Bethlehe Zudah liatahpa chyhsa pakha Môaba râh liata y awpa ta ano nata a lahpinô nata a sawchapaw zy pano chhaota sie ei ta.

2 Cha chyhsa moh cha Elimeleka châ ta, a lahpinô moh cha Naomi a châ, a sawchapaw zy pano moh cha Malô nata Kiliôna Bethlehe Zudah liata Ephrai chyhsa ama châ. Môaba râh lâna chata sie ei ta cha liana chata y thlâh haw ei ta.

3 Elimeleka, Naomi vahpa cha thi ta, ano nata a sawchapawzy pano deita châ haw ei ta.

4 Môaba chanô lahpinô ta hnei ei ta; a pakhapa moh cha Ôrpa châ ta, a pakhapa moh cha Ruthi a châ. Cha liana chata kô hrawh tlyma y ei ta;

5 Malô nata Kiliôna cha thi rairieh ei ta, cha chanô cha a sawzy pano nata a vahpa chata thisai haw ei ta.

6 Chatanachata a myuhnô zy chhao chata Môaba râh tawhtapa cha kua hei awpa ta thyu ei ta, ABEIPA ta niepa piepa ta a chyhsa zy cha a tlyna zie zy Môaba râh tawhta a theipa vâta.

7 A yna tawhtapa cha a myuhnô zy pano chhao chata pua ei ta, Zudah râh lâta kua heih awpa ta sie ei ta.

8 Naomi chata a myuhnô pano hnohna chata, “Nama nô o lâ rairieh ta a di heih awpa ta sie teh u, a thipa chô nata keima chô liata nama taopa hawhna heta ABEIPA chata nama chô liata nôpha ngaitapa ta tao hra mawh sy.

9 ABEIPA chata nama pano ta vahpa zy o liata khihsana nama hnei thei nawpa ta cha ngiachhie ei se!” tah ta. Chatanachata âmo cha sy ta, ao puapa tlaita cha chaimâh ei ta.

10 Âmo chata a hnohta, “Sie aw ma pi, na chizy lâta nâ dina lâna chata tlao eimâ hlao hra aw,” tah ei ta.

11 Naomi chata, “Sawchanô zy saih u, tlao a di heih teh u, khazia ei hnohta nama sie hra aw? Nama vahpa awpa sawchapawpa ei phaoh thei khao aw mâ?

12 Ei sawchanô zy saih u, a di heih ula, sie teh u, vahpa hnei awpa ta machâ tu haw tlôh na ta. Hnabeiseihna hnei hraw sala, atazâ tlai chhao heta vahpa hneipa ta, sawchapaw zy chhao hnei hraw sala,

13 ama pitlohna taihta nama hâ aw ma? Vahpa leipa ta nama y thlâh ha aw ma? Châ bao va, ei sawchanô zy saih u, nâmo vâna heta ei pachâ a rôh rili, ABEIPA ku cha ei chô liata a tla haw hih,” tah ta.

14 Chatawhcha ao tlih-li ta thata cha heih ei ta; Ôrpa chata a nohnô cha sy ta, Ruthi deikua chata khâchâ patu ta.

15 Chatawhcha ano chata, “Pachâ teh, na narônô cha a chizy lâta nata a khazoh lâna chata kua haw heih ta, nâ chhao na narônô a chadaipa ta a di hra mah y,” tah ta.

16 Ruthi chata, “Nâma a chhaih awpa nata nâma zi leipa ta a di heih awpa ta na reipasao cheita khâ; na siena maihta sie aw na ta, nâ riena maihta a rie aw na ta, na chizy cha ei chizy châ aw ei ta, na Khazohpa cha ei Khazopa a châ aw;

17 na thina maih liata thi aw na ta, cha liana chata eina pabu hra aw ei. Nâ nata kei he, thina dei leipa ta cha hmo hropa ta maniah pachhaih awpa khiahtala ABEIPA ta keima chôta tao se, cha hlâta a hluh via chhaota,” tah ta.

18 Naomi ta Ruthi a hnohta sie awpa ta khâchâ â chhuahpa a pahno nata a chalih sai haw ta.

19 Ama pano ta Bethlehe taihta sie khoh ei ta; Bethlehe ama tlô nahta, a khihpi ta a tymâpa ta y ei ta; chanô zy chata, “He he Naomi kha ma a châ?” tah ei ta.

20 Ano chata ama hnohta, “Naomi na tah khah u, Mara tlao na tah teh u, Atotaotheipa chata nôpo ngaitapa ta na tao haw tlôh ta.

21 A bie ngaitapa ta pua na ta, ABEIPA chata ku chamiehpa ta eina padisa heih, ABEIPA ta ei chô liata a palôh châ leina palâsa ta; Atotaotheipa chata rie eina patheina zy pahno thlâh hapa ta, khazia e Naomi khâ eina tah eichi?” tah ta.

22 Naomi cha vaw kua ta, a myuhnô Môaba zuah Ruthi nata Môaba râh tawhna chata ama vaw kua. Bali sâh hria a thao nota Bethlehe cha ama tlô. 

Ruthi (Ruth)

1	2	3	4

Ruthi Bo 2

Ruthi Bo 2

Ruthi, Bôaza lyu liata kâmo a tho

1 Naomi chata a vahpa heinawh Elimeleka pathla chyhsa hneiro ngaitapa sanawh hnei ta, a moh cha Bôaza a châ.

2 Môaba zuah Ruthi chata Naomi hnohta, “Lyu lâ sie aw na ta, na ngiachhietuhpa maih sâh kâmo ei tho aw,” tah ta. A nohnô chata a hnohta, “Sie mah y, ei sawchanônô y,” tah ta."

3 Chatanachata sie ta, lyu liata sâh a hriatuhpa zy ama mypa cha kâmo tho ta; Elimeleka pathla Bôaza lyu liana tlai chata kei sie chho ta.

4 Bethlehe tawhta Bôaza cha sie ta; sâh hriatuhpa zy hnohna chata, “Nama hnohta ABEIPA y mawh sy!” tah ta. Âmo chata, “ABEIPA ta byhnâ cha pie mawh sy,” tahpa ta a chhy ei ta.

5 Chatanachata Bôaza chata a chakaotuhpa, sâh hriatuhpa zy chô liata hyutuhpa hnohna chata, “He he khataih lâta laihsa ma a châ tly?” tah ta.

6 Sâh hriatuhpa zy chô liata hyutuhpa, a chakaotuhpa chata, “Môaba laihsa, Môaba râh tawhta Naomi hnohta a vy hrapa a châ.

7 Ano chata, ‘Na ngiachhie la, nama sâh kâmo tho aw na ta, sâh hriatuhpa zy ama sapiah ama pakhy khai nahta kâmo ei tho lymâ aw,’ tah ta. Chatanachata a vy ta, o liata buakha ta a ypa dei leipa ta cha my tawhta a y ngâthlâh haw,” tahpa ta a chhy ta.

8 Bôaza chata Ruthi hnohta, “Ei sawchanônô y, pachâ teh, lyu hro lâ cha kâmo tho awpa ta sie kha la, he tawhna heta a pasie kha y, ei chakaotuhpa laihsa zy hnohna heta y thlâh ha teh.

9 Ama sâh hriapa he moh thlâh ha la, ama hnie chathô lymâ teh. Satliazy cha kheihta hmah a cha tah lei awpa ei ta bie ei pie haw vana ma? Chatawhcha na dâhphina maihta ti beih liata satlia zy ti thai chiehpa doh tyh mah y,” tah ta.

10 A hmiakô liata a bôh ta, alei lâ a khupa ta, pakhu paneih ta, a hnohta, “Pho hropa châ tlôh na ta, nâma ta he hawhta na pahno khoh chi ta, eina ngiachhiepa chi he kheihta zie ta e a châ?” tah ta.

11 Bôaza chata a chhy ta a hnohta, “Na vahpa a thi tawhta na nohnô chô liata na hmotao zie zydua chyhsa ta na chho khai ei ta, na nô nata na paw nata na pina râh siesaipa ta, cha hlâta na pahno beih leipa zy lâta na vyna zie chhao he.

12 ABEIPA Izarel zy Khazohpa a paboh nawpa ta a mathlaw ry liata nâ vaw ngiapa chata na phana thata cha pie mawh sy;” tah ta.

13 Ano chata, “Ei beipa y, na ngiachhie mah y, nâma ta thlah na palôh chi ta, na chakaotuhpa laihsa zy hry liatahpa châ vei hraw sala, na chakaotuhnô he a pha ngaitapa ta bie na chho haw tlôh chi ta,” tah ta.

14 Pati nie tina chata Bôaza ta a hnohta, “A vy tua, viahchhâ zy he vaw nie hra la, viahchhâ tlawzy cha kresawti thaopa liata ny hra teh,” tah ta. Chatanachata sâh hriatuhpa zy kiapâh liana chata a tyuh ta, viahchhâ cha pie ei ta; a khodâh hawhta nie ta, a rih bie tawh chhaota a nie bâhpa y ta.

15 Kâmo tho heih awpa ta a thao heih nata Bôaza chata a satlia zy hnohta, “Sapia zy hry liatahpa chhao he a huah lymâ sala, ra khah u.

16 A ty zy hry liatahpa chhao thaopa ula, ano hua awpa ta siesai lymâ ula, ra khah u,” tahpa ta bie pie ta.

17 Chatanachata lyu liata sâh kâmopa cha zâlâ taihta tho ta; a tlua chiehpa cha chakhy ta, bali sâh ephah miakha tlyma a châ.

18 Sâh phaoh ta, khih lâna chata sie haw ta; a nohnô cha a kâmo thopa cha pahmô ta, a rih bie tawhta a nie bâhpa cha pachhi ta, a nohnô pie ta.

19 A nohnô chata a hnohta, “Atanoh he khataih lâ kâmo na tho? Khataih liata e na hria? Cha pahno khohtuhpa cha byhnâ topa ta y mawh sy,” tah ta. Chatawhcha ano chata ahy hnohta a hria tahpa a nohnô chho ta. “Atanoh ei kei hriapa paw cha a moh cha Bôaza a châ,” tah ta.

20 Naomi chata a myuhnô hnohta, “ABEIPA a hropa nata athiehpa chô liata ngiachhiena a bâh beih leipa chata ano cha byhnâ pie mawh sy.” tah ta. Naomi chata a hnohta, “Cha chyhsa cha eima heinawh hniapa, eima sanawhpa a châ mâ tâh,” tah ta.

21 Môaba zuah Ruthi chata, “Cha leipa chhaota ei hnohta, ‘Ei sâh he ama hria khai hlâ lei cha ei satlia sahlao hnohna heta a hlao thlâh ha mah y,’ eina tah mâ tâh,” tah ta.

22 Naomi chata a myuhnô Ruthi hnohta, “Ei sawchanônô y, lyu hro lâ sie leipa ta a chakaotuhpa laihsa sahlao hry liana sai chata sie la, a pha aw,” tah ta.

23 Chatanachata bali sâh nata uit sâh hria khaina taihta Bôaza chakaotuhpa laihsa sahlao hry liana sai ta kâmo thopa ta sie ta, a nohnô hnohna chata pahrâ lymâ ta. 

Ruthi (Ruth)

1	2	3	4

Ruthi Bo 3

Ruthi Bo 3

Ruthi nata Bôaza sâh tlyna su liata

1 Chatawhcha a nohnô Naomi chata a hnohta, “Ei sawchanônô y, na châta a pha awpa khihsana cha tlua pa aw vana mâ?

2 Eima heinawh Bôaza, a chakaotuhpa laihsa zy chhaota rai na kei hrianapa kha y vei mâ? Atazâ he bali sâh sawhri liata a zie aw.

3 Na ngai a si la, sathaw a thu la, nâ tobina poh a bu la, sawhri lâna chata zu teh; anodeikuacha pati zy niepa ta a doh khai hlâ lei cha a hnohta a pahnosa cheita kha y.

4 A zia tina chata â ziana ngia la; a ngia la, a phei lâ poh hy la, a zia teh; ano chata na tao awpa a cha chho aw,” tah ta.

5 Ano chata a hnohta, “Na reipa maih ei tao aw na,” tah ta.

6 Chatanachata sawhri lâna chata zu ta, a nohnô a chhopa hawhna maih chata tao ta.

7 Bôaza chata pati nie ta, a doh khai nata a palôhrupa thapha ngaitapa ta y ta, sâh thlu kiapâh liana chata a zia awpa ta vawh ta. A nota ta vawh ta, a phei lâ poh cha hy ta, a zia haw hra ta.

8 Zâcho ta cha chapaw chata chi ta, hiakha lâ a heih ta, chatawhcha pachâ teh, a phei thaby liana chata chanô a vaw zia thlâh ha ta.

9 Ano chata, “Ahy na châ?” tah ta, ano chata “Na chakaotuh nô Ruthi ei châ; na chakaotuhpa he, na poh nâ hy teh, a heinawh; hniapa cha tlôh chi ta,” tah ta.

10 Ano chata, “Ei sawchanônô y, ABEIPA byhnâ cha pie mawh sy; satlia sipasapa tlyma, hneirôhpa tlyma na zieh leina zie liana heta hmia lâta hlâ chhaota a hnôh lâ heta phana thata palâsa via chi ta.

11 Ei sawchanônô y, chi khah y, na reipa lymâ hawhta na chô liata ei tao aw, eima khih liata chyhsa zydua heta chanô sia ngaitapa na châ tahpa pahno khai tlôh ei ta.

12 Anodeikua heinawh hniapa châ tlai pi ta, keima hlâta a hnia viapa pakha y ta.

13 Atazâ cha y thlâh ha tua tlai la, mylâ my ta na chô liata ano chata a heinawh tao awpa a tao khoh khiahtala a phapa châ aw ta; heinawh tovyuh cha tao mawh sy; anodeikuacha heinawh tao awpa na chô liata a tao khoh leipa khiahtala, heinawh tao awpa cha ABEIPA a hropa hawhna tlai heta keima ta ei tao tlai aw. My taihta a zia thlâh ha teh,” tah ta.

14 Chatanachata my taihta a phei thaby liana chata a zia ta, ahyhmah hmô pasia thei hlâta thyu ta; Bôaza ta, ”Sawhri lâna chata chanô cha â vy tahpa rai ahyhmah pahno kha se,” a tahpa rai châ ta.

15 Chatawhcha Bôaza ta a hnohta, “Na poh kha la la, dao teh,” tah ta. Chatanachata dao ta, bali sâh cha hmo charu panua ta, patlai ta, paphaosa ta; khih lâ sie haw ta.

16 A nohnô lâta a tlô nahta, “Ei sawchanônô y, kheihta e na chhi châ?” vaw tah ta. Ano chata chapaw ta a chô liata hmo a taopa zydua cha chho ta.

17 “He bali sâh hmo charu he na pie ta, ‘Na nohnô lâta ku ruapa ta a di chachei ta kha y,’ eina tah,” tah ta.

18 Naomi chata, “Ei sawchanônô y, kheihawhta e a vaw y aw tahpa na pahno hlâ lei cha, y thla ha teh, atanoh liata he hmo he a tao khai hlâ lei cha cha chapaw cha a thlih thlâh ha tlôh leipa aw ta,” tah ta. 

Ruthi (Ruth)

1	2	3	4

Ruthi Bo 4

Ruthi Bo 4

Bôaza ta Ruthi lahpinô ta a hnei

1 Bôaza cha kuh chhikao lâna chata khy ta, cha liana chata a tyuh ta; ama heinawh hniapa kyh Bôaza ta a reipa kha a vy ta. Cha chyhsa hnohna chata, “Nâ kha a vy la; a vaw tyuh tua,” tah ta. Ano cha vawh ta, a tyuh ta.

2 Cha khih liata machâ sahlao hry liatahpa pahrawh a chhi ta, ama hnohta, “He liata a tyuh teh u,” tah 

ta; chatanachata a tyuh haw ei ta.

3 Ama heinawh a hniapa hnohna chata, “Môaba râh tawhta a vaw kuapa Naomi chata eima unawhpa Elimeleka râh kha zuah ta.

4 Cha thâtih cha ei cha chho khoh, na khohpa khiahla he a tyuhpa zy mohmô liata nata eima machâ zy mohmô liana heta chalei teh; anodeikuacha na chatlai khoh vei khiahtala ei pahno thei nawpa ta na chho mah y, nâma leipa ta cha ahyhmah a chatlaituh awpa hropa y tlôh lei khâh ei ta, chatawhcha kei he, cha pazipa châ na ta,” tahpa ta pahnosa ta. Cha chyhsa chata, “Ei chatlai aw na,” tah ta.

5 Bôaza chata, “Naomi hnoh tahpa cha râh na chalei noh liana chata a thipa lahpinô, Môaba chanô Ruthi liata a thipa moh dia leipa ta a ryu a totuh awpa ama y lymâ thei nawpa ta na chalei hra awpa a châ,” tah ta.

6 Ama heinawh a hniapa chata, “Keima chata chatlai thei va na, cha leipa ta la keima ryuto kyh liata ei parao pathlei aw na. A chatlai thei awpa ei châna tovyuh cha nâma ta to teh, kei la chatlai thei va na,” tah ta.

7 Hlâno ta Izarel zy hry liata hmo ato ama pa-i nawpa ta ama chatlaina zie nata amâ riena zie cha he hawhna he a châ; pheiky pahluh ei ta, ama vaihzy pie ei ta, cha cha Izarel zy hry liata ama pa-ina zie a châ.

8 Chatanachata ama heinawh a hniapa chata Bôaza hnohta, “Nâma ta na châta tlao chalei teh,” tah ta, a pheiky pahluh ta.

9 Bôaza chata machâ zy nata zawpi zydua hnohta, “Atanoh he nâmo sahlao heta Elimeleka hmo hneipa zydua nata Kiliôna nata Malô hmo hneipa zydua, Naomi liatahpa ei chalei tahpa a pahnotuhpa châ eichi ta.

10 Cha dei cha leipa ta a thipa cha a moh dia leipa ta ryutotuhpa taopa awpa nata a thipa cha a unawhpa zy hry liata nata a yna su kuh chhikao liata a moh a lei lei nawpa ta Môaba chanô Ruthi, Malô lahpinô cha ei lahpinô châta chalei na ta; cha cha atanoh he nâmo sahlao he a pahnotuhpa zy nama châ,” tah ta.

11 Chatawhcha kuh chhikao liata zawpi zydua nata machâ zy chata, “Pahnotuhpa zy eima châ, na o liata chanô a vaw ngiapa cha, Rakheli nata Liah, Izarel chhôhkha a paduatuhpa pano hawhna khata ABEIPA ta tah mawh sy. Ephratha liana chata hlaotlohpa ta tao la, Bethlehe liana chata mohpathâhpa ta y mah y;

12 ABEIPA ta he laihsa liana heta pathla a cha taopa awpa vâna heta na chhôhkha cha Tamari ta Zudah a sa pâpa Periza chhôhkha hawhta vaw châ mawh sy,” tah ei ta.

13 Chatanachata Bôaza chata Ruthi cha a chhi ta, a lahpinô vaw châ haw ta; chatawhcha hnei ta, ABEIPA chata saw paphaosa ta, sawchapawpa sa ta.

14 Chatawhcha chanô zy chata Naomi hnohta, “Atanoh tlaita heinawh a hniapa phahla leipa ta cha paysatuhpa ABEIPA cha reithaipa ta y sala; Izarel zy hry liana heta a moh vaw pathâh mawh sy!

15 Ano cha na hrona cha pathiehtuhpa nata na machâna lâta cha pasatuhpa châ aw ta; na myuhnô kyh châ pachâtuhpa, sawchapawpa pasari hlâta na châta a pha viapa chata ano cha sa haw tlôh ta,” tah ei ta.

16 Naomi chata hawsaih cha la ta, a pyh ta, hâ ta.

17 Chatawhcha a vaih chanô zy chata a moh bi pa ei ta, “Naomi chata sawchapawpa vaw pih ta,” tahpa ta! A moh Obeda bi ei ta; ano cha Davi paw, Zese paw châ ta.

18 Hezy he Periza pathlazy ama châ. Periza ta Hezraw sa ta,

19 Hezraw ta Ramah sa ta, Ramah ta Aminada sa ta,

20 Aminada chata Nashona sa ta, Nashona chata Salmô sa ta,

21 Salmô chata Bôaza sa ta, Bôaza chata Obeda sa ta,

22 Obeda chata Zese sa ta, Zese chata Davi a sa. 

Ruthi (Ruth)

1	2	3	4