Philipi Mozy 1

Philipi Mozy 1

Anaona

1 Pawla nata Timawthy, Krista Zisu seizy chata—Krista Zisu liata mopathaihpa Philipi khih liata a ypa zydua lâta awnanopa hyutuhpazy nata chakaotuhpazy lâta chhao:

2 Khazohpa eima Paw nata Abeipa Zisu Krista tawhtapa ngiachhiena nata adyhna nama hnohta y mawh sy.

Philipi Krizyhpazy chata Pawla thlahchhâna

3 Noh hmiatua chaipa tawhna khata atahmâ taihta thâtihpha phuana liata nama hlao tyhpa vâta,

4 ei châ theina maih ei ta ei Khazohpa lâta alynabie ei reih tyh,

5 nâmo zydua chata thlah ei chhâna maihta thapha ngaitapata hiah tyhpata.

6 Nâmo liata hmophapa tao a pathaotuhpa khata Krista Noh taihta a paki lymâ aw, cha tlai cha khâchâ angiapâ tlôh nata.

7 Nâmo zydua lâta cha hawhpa palôhrupa phaopa cha, kei châta cha â ngiahpa raina a châ, ei pathipalôh liata ei châ vaopa vâ ei ta, ei keihrai dainazy thâtihpha thaina bie ei reina liata nata ei pa-inazy liata chhao, nama zydua ta ngiachhiena cha nâ hlykheituhpazy châ tlôh eichi ta.

8 Krista Zisu thapasana chata nama zydua ta ei cha vâzie ei cha, Khazohpa na pahnokheituhpa a châ mâ tâh.

9 Chatawhcha nama kyhpachâna ta pahno pakina nata sona to a hnei pachai nawpata thlah ei chhâ tyhpa he,

10 chatanachata Khazohpa rônahna nata reithaina awpata Zisu Krista zawhzi ta siana thei a ypa chata biepata.

11 Krista Nô châna chata a hmeiseihpa nata seina y leipa nama châ thei nawpata hmopha pachaipazy cha a pha nama tah thei aw.

Keima châta la hrona he Krista a châ

12 Unawh saih u, ei chô liata hmo a vaw tlôpazy kha, thâtihpha pathâsana awpa tlao a vaw châ tahpa nama pahno awpa ei khoh.

13 Chatanachata ei keihrai zy he pritôria pheisaih sahlao zydua hry liata nata mo hropa zydua lâna chata Krista vâta a châ tahpa a lâ haw.

14 Abeipa liata unawh a hluh viazy chhao chata ei keihraizy vâta khâchâ a vaw ngiapâpata, chi leipata Khazohpa bie chhona kyh liata ama ria a pha rili.

15 Thokha ta cha hiatliana nata eina vâ chhaota Krista bie tlâh ama awhkhei tyh, thokha deikua chata alypa vâta tlâh ama awhkhei tyh hra.

16 Hlao kha chata thâtihpha thaina bie reih awpata raopa ei châpa pahnopata kyhpachâna vâta ama chho tyh;

17 hlao kha deikua chata ei keihrai chô liana heta pachârôhna na baichha a chhuahpata, a hmeiseihpa châ leipata, eina vâta Krista bie tlao ama chho tyh.

18 Kheihtazie ta ma a châ tly? Khâpa hropa châ leipata, kyh to rai liata a pakheipata tlyma, a hmeiseihpata tlyma Krista bie chhopata ama ypa a châ, chazy liana chata aly na ta.

19 Cha cha ei châta thlah nama chhâna vâta nata Zisu Krista Thlahpa tawhta baona eina piepa vâta ei pachhana a vaw châ aw tahpa pahno tlôh na ta.

20 Khâpa liata hmahta maophyupata y leipa aw na ta, riahpha ngaitapata ei y tyhpa hawhna heta, atahmâ chhao hrona vâta tlyma, thina vâta tlyma, ei pôhpa liata Krista palyupalihpata tlao ei y aw tahpa ei hnabeiseina nata ei byuhna lymâ hawhna heta.

21 Kei châta la hro he Krista châ tlôh ta, thi chhao hlaona a châ.

22 Sapa hrona he ei tovyuh a châ khiahta cha, raihria phapa ei pazao thei aw. Cha tana chô chhaota a kheihawhpa ma ei tlyh aw tahpa pahno va na.

23 A liah liana heta a pachâna pahno leipata ei y, sie ta Krista hnohta y khona ei hneipa vâta, cha cha pha via ngaita tlôh ta.

24 Châhrasala nâmo vâta sapa liata y thlâh hapa he tlao a byuh via.

25 Cha cha khâchâ ei ngiapâpa vâta ei y thlâh ha aw tahpa ei pahno, ngiapâna liana chata nama laiseih nawpa nata namâ ly nawpata nama zydua hnohta ei y thlâh ha aw tahpa ei pahno,

26 chatanachata nama hnohta ei y awpa vâta einâ palaikheina eichi cha, Krista Zisu liata thata a châ rili thei nawpata.

27 Khâparai châ sala nama hro yzie cha Krista thâtihpha nata a hmie tua se, chatanachata nâmo cha vaw hmô hra aw ei sala, nama hnohta y vei hra aw sala, thlahpa miakha liata a ipata a duahpata palôhrupa miakha ta thâtihpha ngiapâna bie a châkheipata tei chyupata dyutuhpazy khâpa kyh liata hmahta chi leipata nama y tahpa

28 nama thâtih ei pahno thei aw. Cha cha âmo chata leidia awpa ama châpa pahnosana sia ngaitapa a châ, nâmo châta deikua cha pachha awpa nama châpa pahnosana sia ngaitapa tlao a châ. Cha chhao cha Khazohpa tawhtapa a châ.

29 Krista vâta ano namâ ngiapâpa dei châ leipata, ano vâta pasa nama tao awpa chhao pasaipa châ tlôh ta,

30 adyuhna keima liata nama hmô tyhpa, atahmâ chhao keima liata a y tahpa nama pahnopa, cha tlai cha nama hnei haw hra hih. 

Philipi Mozy (Philippians)

Bo 1	Bo 2	Bo 3	Bo 4

Philipi Mozy 2

Philipi Mozy 2

Krista nawhna nata rônahna

1 Krista liata châkheina rai zy, kyhpachâna thlahlôhna rai zy, thlahpa a kaona rai zy, thapasana nata ngiachhiena rai zy a y khiahtala,

2 palôhrupa miakha ta ypata kyhpachâna miakha hneipata, rei a raohpata palôhrupa miakha ta ypata ei lyna paki teh u.

3 Karâhnei nata apalaipa vâta khâpahma tah leipata, chyhsa to reisi ngaitapata nâmo hlâta mo hropa a pha viapata rao chyu teh u.

4 Nâmo eih dei moh leipata mo hropa eih chhao tlao moh chyu teh u.

5 Krista Zisu liata palôhrupa pachâna nama hneipa hawhta, nâmo hry lia chhaota hnei teh u.

6 Ano ta cha Khazohpa hawhta y ta, Khazohpa tluta ypa cha tlaichhai thei awpata rao leipata,

7 chyhsapazy hawhta vaw pihpata, sei hawhta a tao ta, anosasy ta tlao a panawh ta.

8 Chyhsa hawhta vaw ypata a panawh ta, thina taihta reingiahpata y haw ta, kraws liata thina tlai cha.

9 Cha vâna chata Zisu moh ta chyhsa to avâ liatahpa zy, alei liatahpa zy, alei ry liatahpa zy chhaota, ama pakhu paneih nawpa nata,

10 Paw Khazohpa parônahsa nawpata Zisu Krista cha Abeipa a châ tahpata paleih to ta a phuah nawpata,

11 Khazohpa ta ano cha thata palyupalih ta, moh zydua ta moh chônôchaipa cha pie haw ta.

Khizaw liata meiôh hawhta khaihna

12 Chatanachata ei kho ngaitapazy saih u, bie nama zy tyhpa hawhna khata, ei y nota dei hria leipata, atahmâ ei y vei chhôh heta tlao hria viapata, chipa nata chalyupata nâmo pachhana* châta hria teh u;

13 ano a lynazie chata tao a chhuah awpa nata tei awpata nâmo liata a hriatuhpa cha Khazohpa châ tlôh ta.

14 Molei hnei leipa nata nôphapazy, chhâ dyutlai leipa nata chhorupazy hryta Khazohpa saw seina a hnei leipazy nama châ thei nawpata

15 paphôna nata a einazy y leipata, ato tao teh u. Cha sahlao hry liana chata hrona bie hlâpata khizaw liana heta pakhaituhpa hawhta nama la tyh,

16 khâpahrao leipata a râpa châ leipata, khâpahrao leipata hriapasapa ei châ hra leipa vâta Krista Noh liana chata palaikhei awpa ei hnei thei aw.

17 Namâ ngiapâna atheihna nata chakaona chô liana chata leithapata y hra aw sala ei ly, nama zydua ta ei châ lykhei hra ei.

18 Cha hawhna hra chata nâmo chhao aly ula, nâ lykhei hra teh u.

Timawthy nata Epaphrôdita

19 Nama thâtih pahnopata ei thlah a lôh thei hra nawpata, bohpi leipata Timawthy he nâmo lâ vaw tuah awpata Abeipa Zisu liana chata ei hnabei a seih.

20 Ano hawhta palôhrupa a phaohpa nama yzie hmeiseihpata cha pachâpatu awpa ahyhma hnei tlôh lei khâh na ta.

21 Ama zydua ta Zisu Krista chata tlua leipata âmo khopa châta tlao ama tlua tyh.

22 Châhrasala ano he cha pasiapata a y hawnazie nama pahno, saw ta a paw a chakaopa hawhta thâtihpha hie patlana kyh liata eina chakao khei tyhpa kha.

23 Ei thâtih awpa ei pahno patanahta ano he thlai vaw tuah aw sala, ei tah;

24 châhrasala keima tlai chhao thlai a vy awpa Abeipa liana chata khâchâ ei pangiasa.

25 Epaphrôdita ei unawhpa, ei raihrialâhpa, ei pheisailâhpa nata nama lyuhchâpa ei hmô a phahlapa na deichhytuhpa he, nâmo lâ vaw tuah awpa a byuhpata ei pahno,

26 ano chata nama zydua ta cha vâ ngaita tlôh ei ta, a pasa tahpa nama vaw theipa vâta a pachâ thata rôh ha ta.

27 Thi daihmâna taihta a pasapa châ tlai ta. Châhrasala Khazohpa ta ano cha ngiachhie ta, ano dei châ leipata, pachârôhna chôta pachârôh via heihna ei hnei lei nawpata keima na ngiachhiepa a châ hra.

28 Ano he nama hmô heih tita namâ ly thei nawpa nata kei ei pachârôhna a phahnai thei nawpata, a chatlie viata ei vaw tuah.

29 Chatanachata ano he thapha ngaitapata Abeipa liana chata a vaw ly ula; he hawhpa chyhsa he pasô teh u,

30 nâmo eina deichhyna paki nawpata thi pachâ leipata, teipata Krista raihriana vâta thi daihmâpata y haw tlôh ta. 

Philipi Mozy (Philippians)

Bo 1	Bo 2	Bo 3	Bo 4

Philipi Mozy 3

Philipi Mozy 3

Siana dopa

1 A chhâ chaina ta cha, ei unawh saih u, Abeipa liata aly teh u. Bie hmopazy nama hnohta roh chaneipa he kei châta la noai a chhi vei, nâmo chata phahnai hra tlôh ta.

2 Izy liata a chado teh u, hmopha leipa a taotuhpazy liana chata a chado teh u, ama sapa a âpa sahlao liana chata a chado teh u.

3 Keimo Khazohpa Thlahpa zawhzi ta, Khazohpa achhypa nata Krista Zisu a palaikheipa nata sapa chôta ngâna rai a pachhô leituhpazy pi he, chopawtaipa sahlao hmeiseihpa tlao châ tlôh pi ta.

4 Ei khoh khiahtala kei chhao sapa chôta ngâna a pachhô theipa ei châ mâ tâh. Mo hropa rai ta sapa chôta ngâna pachhôna hneipata ama rao khiahtala, kei ei rao pachai.

5 Noh charie nohta chopawtaipa, Izarel pathla Benzami chi, Hebraizy liata Hebrai ta a pihpa châ na ta; ryhpa lâta cha Pharisai châ na ta,

6 phahnai khohna lâta cha awnanopa sahlao a taolatuhpa châ na ta, ryhpa kyh liata siana lâta cha seina hnei leipa ei châ.

7 Châhrasala ei châta hlaona awpa maih cha, chazy cha Krista vâta kyna ta ei tao haw.

8 A châ tlai na, ei Beipa Krista Zisu pahnona rônah pachainazie vâta hmo a to chhao kyna ta ei rao. Ano vâta hmo zydua ky khai na ta, cha zydua cha a pualeipa hawh deitata a ngiah na ta, Krista ei hmô theina awpa nata

9 keima siana, ryhpa siana cha hnei leipata, Krista ngiapâpa vâta siana, ngiapâna vâta Khazohpa liata siana cha tlao hneipata, ano liata a ypa ei châ thei nawpata;

10 a thina a lyupata thipata, ano nata a thyuheihna hmotaotheina nata a pasa taonazy a hlykheina chhao ei pahno thei nawpata,

11 athihpa hry tawhtapa thyuheihna cha ei to thei ngyu aw la, tahpa ta.

Anuana lâ pangaina

12 A hmô hawpata a reih leipa na ta, paki hawhpata a reih hra va na; Krista Zisu eina patu chhâpa cha ei patu thei ngyu aw la, tahpa ta tlao ei chadai.

13 Unawh saih u, a patupata a pachâ va na; anodeikuacha he hmo miakha he ei tah tyh, hnôh lâta hmo a ypazy cha mypata, hmia lâta hmo a ypazy cha pazapa ta.

14 Krista Zisu liata Khazohpa chôlâ aw chhâna lymâ hmô awpata taihpa lâna cha ei pangai lyliah.

15 Chatanachata machâpa maih cha hawhpa palôhrupa phaohpa ta y ei suh u; chatawhcha khâpa kyh liata rai palôhrupa nanopa a phaohpa nama châ khiahtala, cha chhao cha Khazohpa ta a cha pahnosa aw ei.

16 Khâparai châ sala eimâ phapa rakha lymâ hawhna heta a dopata y ei suh u.

17 Unawh saih u, ei hâ nâ lapa châ chyu teh u, chatawhcha a mopâ awpata keimo maniah hnei eichi ta, cha lymâ hawhta a ypazy cha a phapata moh teh u.

18 Chyhsa hluhpi sie ei ta, cha chyhsazy cha Krista kraws khakhaipa ama châpa ama thâtih khâ ei cha chhopa ei kha, atahmâ chhao chana chôta ei cha chho ei hih.

19 Cha sahlao chhâna cha leidiana a châ, ama khazoh cha ama py a châ, ama rônahna chhao cha ama maohphyuna a châ, khizaw hmo ama pachâ tyh.

20 Keimo la eima khihsana cha avâ liata châ tlôh ta, cha tawhna chata pachhatuhpa Abeipa Zisu Krista cha eima hâ thlâh haw,

21 ano chata a hmotaotheina ta ato chhao ano reisai ta a paysa thei, cha hriazie lymâ hawhta eima pôhpa chieh-leipa thi theipa cha ano pôhpa rônahpa hawhta y awpata a taopathi aw. 

Philipi Mozy (Philippians)

Bo 1	Bo 2	Bo 3	Bo 4

Philipi Mozy 4

Philipi Mozy 4

Abeipa liata thaphana

1 Chavâta ei unawh kho ngaitapa nata vâ ngaitapa ei lyna nata ei lakhozy saih u, cha hawhna chata Abeipa liata a ipata a duah teh u, ei kho ngaitapa saih u.

2 Abeipa liana chata palôhrupa miakha phaoh awpata Eudia a haw na ta, Syty-ke chhao ei haw hra.

3 A châ na, nâ chhao ei raopakylapa hmeiseihpa ei châ haw hra, kha chanôzy kha bao teh, thâtihpha liana chata na teikhei tyh tlôh ei ta, Klemena chhao, ei hrialâhpa hropa hrona châbu liata moh a rohpazy chhao khata.

4 Abeipa liana chata khâ aly teh u; ei tah heih aw, aly teh u.

5 Nama nôphana chyhsa zydua pahnopa châ mawh sy. Abeipa cha a hnia na.

6 Khâpa liata hmahta nôpopata y khah u, ato liata thlahchhâpa nata hiapata alynabie rei lymâpata nama khopazy cha Khazohpa lâta pahnosapata tlao y se.

7 Chatanachata Khazohpa thlalôhna palôhrupa raita pahno tiah leipa khata, nama pathipalôh nata nama pachânazy cha, Krista Zisu liana chata a cha vaipa aw ei.

He hmozy he pachâ teh u

8 A chhâ chaina ta cha, unawh saih u, a dopa maih zy, za a chhihpa maih zy, a siapa maih zy, a pathaihpa maih zy, kho a chhihpa maih zy, a ngiapata a pathâhpa maih zy, phana rai ypata, reithaina rai a y khiahtala, chazy cha pachâ teh u.

9 ‘Nama hmo achupa zy, nama hmo a pyhpa zy, nama hmo pahnopa zy, keima liata nama hmo hmôpa zy chhao kha, khazy hawhpa kha tao tyh muh vy; chatanachata thlalôhna Khazohpa chata a cha ylâh aw ei.

Philipi mo hmosaipiepa pahnokheina

10 Keima chata nama pachâna cha atahmâ tawhta nama vaw pathieh heihpa vâna heta Abeipa liana chata ei ly kaw; cha hawhpa kyh cha pachâ ngaita eichi ta, a rypaohna deikua cha nama hmô leipa a châ.

11 Ei phahlana kyh a reihpa châ va na; kei la kheihta rai ta y hra aw sala, palôhtlâhpata ei y thlâh haw.

12 A nawh ngaitapata yzie thai na ta, hneirôhpata yzie chhao thai hra na ta; hmo to liata nata hmo zydua liata lôhrâtlôpa nata nodipata yzie, hneirôhpa nata phahlapata yzie bienyupa cha ei pahno haw.

13 Tha na patlôtuhpa liana chata ato ei tao thei.

14 Châhrasala ei nôponazy liana heta nama nô eina pokheipa eichi he nama tao pha kaw na.

15 Nâmo Philipi mozy saih u, thâtihpha tlôkhei tua nota, Masidônia râh tawhta ei pua nona khata, nâmo dei leipata cha awnanopa hlao miakha hmahta hmopiepa nata hmo topa kyh liana chata na bao veih ei tahpa, nâmo tlaita pahno hra eichi ta.

16 Thysalawnika khih liata ei y nona chhao khata ei phahlana pazao nawpata ei kha dei châ leipata, ei no dua nama vaw paphaopa kha.

17 Hmopiepa cha a tluapa châ leipa na ta; theilâpa nama lymâ lâta a pôh awpa cha a tluapa tlao ei châ.

18 Châhrasala ato hnei na ta, ei hnei thlu; Epaphrôdita ku liata nama hmo eina paphaopazy chi cha vaw hmô na ta, ei dôkhâ haw, chazy cha khâpaleipa ropahâhpa roh atheina chyei tlâh châpa Khazohpa alypa a châ.

19 Chatawhcha ei Khazohpa chata Krista Zisu liata a rônahna hnei thluzie lymâ hawhta namâ phahlana to chhao a cha pazaopa aw ei.

20 Eima Khazohpa nata Paw lâna chata chhâzaw ta rônahna cha y mawh sy. Amen.

Byhnâ awna chhâna

21 Krista Zisu liata mopathaihpa to nâ naohpa muh vy. Ei hnohta unawh a ypazy heta ama châ naoh ei.

22 Mopathaihpa zydua ta châ naoh ei ta, Kaisara chhôhkhazy hry tahpa heta a châ naoh pachai ei.

23 Abeipa Zisu Krista ngiachhiena cha nama thlahpa hnohta y mawh sy. 

Philipi Mozy (Philippians)

Bo 1	Bo 2	Bo 3	Bo 4