Nahu 1

Nahu 1

Abeipa hiehâhna viarithôna

1 Niniva khih phaohripa cha. Elkôsa chyhsa Nahu aluahna hmôpa châbu cha.

2 ABEIPA cha hiatlia hmâhpa Khazohpa nata phuh la a hmâhpa a châ, ABEIPA chata phuh la ta, pathi-iana ta a bie; ABEIPA chata adyuhtuhpazy chô liata phuh la ta, a khakhaipazy châta pathi-iana a pachô pakhy.

3 ABEIPA cha nônaipa châ ta, hmo a tao thei ngaitapa châ ta, moleipa cha thai pachâsa aw vei. ABEIPA chata khisô liata thlihpi lâpi hnei ta,meihdozy cha a phei doh-lei a châ.

4 Tilaipi cha ra ta, pakua ta, chavah zydua chhao pakua khai ta; Basana nata Kamel chawh khai ta, Lebanaw pawpi cha a uah.

5 Tlâh laipazy cha ano vâta a chalyu ei ta, tlâh chyhpazy cha zao ei ta; a hmiakô liana chata a lei he roryhrapa ta y ta, khizaw nata a chhôh liata a ypa zydua chhaota.

6 A hiehâhna leina hmiakô liana chata ahy e a duah thei aw ta? A pathi-iana ru ngaitapa liana chata ahy e a y thei aw?A pathi-iana cha mei hawhta patlaipa châ ta, lôpanôzy cha a pazao khai.

7 ABEIPA cha pha ta, nôpo noh liata kuh a ipa a châ; ano liata ama ngâna a pahnietuhpazy cha a pahno.

8 Anodeikuacha ti laipa a khôpa hmâpa ta cha su leidia khaina cha patlôsa aw ta, a khakhaipazy cha a zohpa lâta a chadaipai aw.

9 ABEIPA chakhiapa ta khazia e na pachâ? Ano chata chhâ pathlana a patlôsa aw; rietheina ei nona tlô aw vei.

10 Hlohzy hawhta ypa ta ama kresawti dopa chata a dâpa ta pachiepa hawhta y hra sala, sâhkô raohpa hawh tlaita pahleipadia khaipa ama châ aw.

11 Nâma liata a puapa chyhsa pakha ABEIPA chakhiapa ta hmo moleipa a pachâtuhpa, hmoparaona bie a pahruatuhpa a y.

12 ABEIPA chata he tana heta a tah: “A chhuahdypa ta hluh hra ei sala, chhawh pathlahpa ta pahleipadiapa ama châ khai aw. Rietheipa ta cha vaw chhorei haw hra ei sala, rie cha pathei khao aw veih ei na.

13 Atahmâ cha na rao tawhta raopaky cha ei thlie aw, nama chahryna rizy cha ei chhie khai aw.

14 ABEIPA chata na kyh liata bie pie ta: “Na mo chi tawhta hiepa châ khao leipa aw ta; na khazohzy o tawhtapa nohthlahpa taopa nata nohthlahpa leipazy cha pahleipadia aw na ta. Na thlâ ei tao aw, molei tlôh chi ta,” tah ta.

Niniva pao nawpa thâtihzy

15 Tlâhzy liata thâtihpha tlôkheipa ta, dyhna bie tlâh awhkheituhpa phei cha moh tua! Hy Zudah y, na kyhchhizy cha zi la, na bietaipazy cha patlô teh, moleipa chata cha sie pakhô khao tlôh leipa aw ta, pahleipadia pathlah hapa a châ haw. 

Nahu (Nahum)

Bo 1	Bo 2	Bo 3

Nahu 2

Nahu 2

1 Padizaotuhpa cha na hmiakô liata a vaw pua. Kuh sâhpa cha mohôh la; lâpi cha vaih teh; na chai a pachyupa ta tao la, na hmotaotheina cha thatlô ngaitapa ta tao pathi teh.

2 Izarel sahlao rôhnahna hawhta Zakaw sahlao rôhnahna cha ABEIPA chata padua heih tlôh ta, a parutuhpazy chata âmo paru khai haw ei ta, ama kre chiahzy parao khai haw tlôh ei ta.

3 A chyhsa thatlôpazy vyhphao cha pasaipa châ ta, chyhsa riahphapazy cha a saihlawpa ta a tobi ei ta.Achhuahdyna noh liana chata talailizy chathuatô hawhta pathlie ta, aseizy cha rarôh y ngaitapa ta a pathlie.

4 Talailizy cha othliah liata a râ ngâ ei ta, lâlai kawhpazy liana chata aty ei ta; meirei hawhta a lâ ei ta,dôhla hawhta amâ râ hra.

5 A molaipazy cha awpa châ ta, hmaohkha ta ama siepa cha pavia ei ta, kuh pâhchhô lâ pangaipa ta a parah ei ta, hmô pahlie awpa ta tao ei ta.

6 Chavah ochhizy cha pahypa châ ta, abei o cha patlôpa ta y ta;

7 Huza cha pahluhpa ta siekhei ei ta, a seichanôzy chata ama chachôhna a chôpa ta vachhuh sâpa hawh tlaita chakhei ei ta.

8 Hlâno tawhta Niniva khih he tipo hawhta châ ta; châhrasala a râsai ei ta, ”Aduah teh! Aduah teh!” tahpa ta awh ei ta; châhrasala ahy hmahta kua veih ei.

9 Tâkâri sôhzy cha lapa ula, ngôh sôhzy cha lapa teh u! Hmo pahmaohpakhypa nata hmobaoh phapa zydua rôhnahzie chata chhâna hnei tlôh lei khâh ta.

10 Paruapa ta y ta! Rua haw ta, rypa ta a y! Pathipalôh cha zao ta, pakhuzy cha a chakhy ta, chai zydua pasa ta, ama zydua hmia hlâh khai ta!

11 Ahy hmahta ria pachhie leipa ta ama y na, chakeibarôhneipa tôhpa zy, chakeibarôhneipa panô zy, chakeibarôhneipa taw zy, ama sievawna chakeibarôhneipa khaoh nata chakeibarôhneipa tawzy ta ama niena su cha khataih liata e a y?

12 Chakeibarôhneipa tôhpa chata a taw rih bie nawpa taihta hriechhei ta. chakeibarôhneipa panôzy chata tai ta, a lôpuzy cha sa taipa ta pabie ta, a khaoh zy cha sa taipa hriechheipazy ta.

Niniva tlokhu paraopa a châna zie

13 Pheisaihzy ABEIPA chata pachâ teh, ei châ dyuh, a talailizy cha raopa ta pakhusa ngâ aw na ta, na chakeibarôhneipa tawzy cha zaozi ta a pahleipadia aw; alei liata na sa taipa he pachhâsa aw na ta, na lyuhchâpazy ao cha theipa cha khao aw vei, tah ta.; 

Nahu (Nahum)

Bo 1	Bo 2	Bo 3

Nahu 3

Nahu 3

1 Thisaih a palo hmâhpa khihpi cha a hu a po na!haipa nata a hraona ta bie khai ta; ama sa taipa cha chi beih vei.

2 Chheina pyu zy, talaili phei a chalyupa pyu zy, arâ a thluapa zy, talaili a râ ngâpazy chhaota!

3 Arâ a kiahpa chyhsa, arâ a kiahpa zy, zaozi pathlie ngâpa zy, asei a pathlie ngâpa chhaota; chyhsa thiepa a y hôlôpa zy, ri a zawh hôlôpa zy chhaota: ri ta a chhâna rai hnei vei; ama rizy cha a chapia ei ta!

4 Chazy cha sihrypa hmiphapa, dyuthainô, apheina vâta pho zuahpa ta, adyu hmâna vâta chhôhkha a zuahtuhpa, apheina hluh ngaitapa vâta a vaw ypa a châ.

5 Pheisaihzy ABEIPA chata he tana heta a tah, pachâ teh, ei châ dyuh na, na hmia liata na poh hlai aw na ta; na thluahruana phozy lâta nata na maohphyuna abei khihnarâhzy lâta ei pamosa aw.

6 Pualeipa pasichhih ngaitapa ta cha hie aw na ta, nozachhih ngaitapa ta cha tao aw na ta, mo phapa châta ei cha soh aw.

7 Chatawhcha cha hmôpa maihta nâ tawhtapa a râpai aw ei ta, Niniva cha roryhrapa a vaw châ haw; ahy e mâchhie a sa aw? Khataih tawhtapa e na châta thlahpalôhtuhpa ei tlua aw? ama tah aw.

8 Nile kiapâh ta a ypa Nôamô a chheipâh ti ta a chadôpa, a kuh châta tilaipi hmâpa ta, a kuh pâhchhô chata tilaipi a hneipa hlâna khata na pha via ma?

9 Ethiôpia nata Izi cha a thatlôna châ ta, cha cha chhâna rakha a hnei leipa a châ; Puta nata Libia cha nâma baotuhpazy ama châ.

10 Chata chôna chhao chata lapa ta y ta, seichâna ta y ta; othliah to chhâna liata a sawnawh chyhpazy cha a zaona taih thypa ta y ei ta; a chyhsa phapazy chata pachao ei ta, a chyhsa laipa zydua cha bâlia ta chahrypa ama châ.

11 Nâ chhao pari hra aw chi ta, nyupa ta na y aw; khakhaipa vâta kuh a ipa na tlua hra aw.

12 Na kuh zydua cha theiku kô, a pathei tuapa a hmôpa hawhta châ aw ei ta ama chalyu khiahta cha a nietuhpa pakah liata a ngia tyh.

13 Pachâ teh, na chhôh liata na zawpizy cha chanôzy châ ei ta. Na khakhaipazy chata na râh chhikao cha pahy ta; na hrai khâhna thuatlaizy cha mei ta a kâ patlô.

14 Padôpa ta na y chhôh chata ti thaih la, na kuhzy pa-i teh; Beih-lei yna lâna chata sie la, alô baina cha tly la, beih-lei raopa lômathu cha pa-i teh!

15 Cha liana chata mei ta cha kâ patlô aw ta, zaozi ta cha chhawsao aw ta. Khawsu hawhta a cha pahleipadia aw. Khawsu hawhta a pahluh la, khawthlôhraipa hawhta a pahluh teh.

16 Na sôhdaotuhpazy cha avâ awhsi hlâta hluhpa ta papôh chi ta. Tholôpa chata parao ta, a zaw syulyu tyh.

17 Na chyhsa beilakho a khopazy cha khawsu hawhta châ ei ta, na pheisaih hyutuhpazy cha chasi nota sahdô liata khawsu a pahmaohpa hawhta ama châ, anodeikuacha noh vaw chhi ta â zawpai khai ei ta, ama yna su rai pahnopa châ veih ei.

18 Hy Asuria bei, na mietahkuvaihtuhpazy cha ama tla-uah, na molaipazy cha a pahâ ei ta. Na zawpizy cha tlâhzy lâna chata paipatla khai ei ta, a pakhytuhpa ahy hmah y veih ei.

19 Na pasapa tlâh nawpa ta y leipa ta, na hmah cha a ru ngaita kaw. Na pyu a theipa maihta ama ku ama cha chabai chie. Na moleina ta a khu tyh leipa ahy e a y? 

Nahu (Nahum)

Bo 1	Bo 2	Bo 3