Mika 1

Mika 1

Samari nata Zerusale châta mâchhiesana

1 Zudah bei Zawtha zy, Ahaza zy, Hezekiah zy abei nota Môreshe chyhsa Mika hnohta ABEIPA bie a vaw tlôpa, Samari nata Zerusale kyh ta a hmôpa cha.

2 Nâmo chizy saih u, nama zydua ta thei ula, aleilô nata a chhôh liata a ypa zydua saih u, Abeipa KHAZOHPA, Abeipa cha a achhyna-o pathaihpa tawhta, nâmo chakhiapa ta, nâmo kyh liata a pahnosatuhpa châ mawh sy.

3 Pachâ teh u, ABEIPA cha a su tawhta vaw pua ta, za chô aw ta, alei su a sâhpazy cha thy tlôh aw ta.

4 Mei kiapâh liata kheihlô hawhta nata pâhdawhpa liata ti a chakhaopa hawhta, tlâhzy cha a ry liana chata zao aw ei ta, saikaozy cha ama kaichhei aw.

5 He zydua he Zakaw sahlao paraona vâta nata Izarel chhôhkhazy moleina vâta a châ. Zakaw sahlao paraona cha khâpa a châ? Samari châ vei ma? Zudah sahlao moleina o cha khataih liata e? Zerusale châ vei ma?

6 Chavâta Samari cha sibiepa su liata hmo chhiepa pahmaohpa hawhta tao aw na ta, kresahdô su hawh tlai ta; cha su liata alôzy cha saikao lâta pahluah aw na ta, a lôbôpazy cha ei palâsa aw.

7 A khazoh nohthlahpa zydua cha pakei khaipa châ aw ta, a sihryna ty cha mei ta rao khaipa châ aw ta, a khazoh nohthlahpa zydua cha roryhrapa ta ei tao aw; sihryna ty ta a pakhypa châ tlôh ta, sihryna ty ta ama cha heih hra aw.

8 He vâna heta cha aw na ta, thata sâh aw na ta; a hlaipa nata thluahruapa ta ei y aw; sihâ hawhta awh aw na ta, pavawpi hawhta ei rôh aw.

9 A hmahzy cha patlâh theipa châ vei; Zudah râh tlô tlôh ta; ei chyhsazy chhikao, Zerusale tlai chhao a tlô.

10 Katha lâta chho khah ula, cha cheita khah u; Bethaphrah liana chata buhchâ liata ei hluah.

11 Hy Saphi chyhsa, thluahruapa nata noza ngaitapa ta sie syulyu teh; Zaana chyhsa cha vaw pua vei; Bethezel mâchhiesana chata nâma tawhta a duana su a cha lapa aw ei.

12 Marô chyhsa chata tovyuh phapa to a ngiatiah leipa ta a y, ABEIPA tawhta hmopha leipa cha Zerusale chhikao kiapâh taihta a vaw tlôpa vâta.

13 Hy Lakisa chyhsa, talaili cha arâ chahrapa liana chata buh teh; ano he Zaio sawchanô moleina thabypa a châ, Izarel sahlao hmoparaonazy cha nâma liana heta a vaw ypa châ tlôh ta.

14 Chavâta Môresheka hnohna chata a pathliena hmopiepa na pie awpa a châ; Akziba ozy cha Izarel râh abeizy chata dôna a châ aw.

15 Hy Maresha chyhsa, nâma cha hneituh awpa nâ lâta ei vaw chhihtha aw; Izarel sahlao rôhnahna cha Adula taih tlaita a vy aw.

16 A pôlôpa ta a tao la, na saw kho ngaitapazy vâna chata a pôlôpa ta a ngyu teh; vâkhie hawhta thata a papôlô teh; nâ tawhtapa seichâna ta chhihthapa ta y haw tlôh ei ta. 

Mika (Micah)

Bo 1	Bo 2	Bo 3	Bo 4	Bo 5	Bo 6	Bo 7

Mika 2

Mika 2

Chyhsa dyhchhiepazy taolatuhpazy chôta hupona y se

1 Ama rakhô liata hmoparaona a pachâpadytuhpazy nata hmo pha leipa a pachâtuhpazy cha ama hu a po na! My ta khih a vaw deih nata cha cha tao tyh ei ta, âmo ku hmotaotheina a châpa vâta.

2 Chyhsa lyuzy uava ei ta, lapa ei ta; ozy uava ei ta, la hra ei ta; chyhsa nata a chhôhkhazy, chyhsa nata a ryu taihta amâ pasaipa-i.

3 Chavâta ABEIPA ta he tana heta a tah: He chhôhkha chô liana heta hmopha leipa ei pachâ, cha tawhna chata na rao pasei leipa aw chi ta, a palai ngaitapa ta sie khao hra aw va chi, daihti pha leipa châ tlôh aw ta.

4 Cha noh liana chata nâmo seipa ta pakhona bie tao aw ei ta, chaphôtuna palôh a pazao ngaitapa reipa ta, “Hrao khaipa ta ei y ha hih: ei chyhsazy tovyuh panano teh; kei tawhta a pasie haw hih! Atyhmâhpazy lâta eima lyu a rai khai haw,” ama tah aw.

5 Chavâta ABEIPA chyhsa apakhypa sahlao hry liana chata pachaopa ta khawhri ta cha thlie patuhpa ahy hmah hnei aw va chi.

6 “Bie chho khah u,” tahpa ta ama reih tyh, “He chyhsazy hnohna heta bie chho aw veih ei; reipachhiena cha apai aw vei,” tahpa ta.

7 Hy Zakaw chhôhkhapazy saih u, ABEIPA Thlahpa cha cha-iepa ta a y ma? ‘Hezy he a hmotaopa a châ ma, tao awpa a châ ma? Ado ngaitapa ta a y tuhpa chô liana chata ei biezy heta hmophapa tao vei ma?

8 Châhrasala ei chyhsazy cha atlia ta khakhaipa hawhta ama vaw duah; adyuh khoh leipa ta thlahlôh ngaitapa ta a khiekhâpazy tawhtapa ama chysia viahpakao pasihpazy pahluh ei ta.

9 Ei chyhsa chanôzy cha âmo o pha ngaitapa tawhta to eichi ta ama hawti chyhpa ta zy tawhta ei rôhnahna cha chhâzaw châta nama la khai haw.

10 Thyu ula, sie syulyu teh u; he he nama pahâna su châ tlôh leipa ta; raona ru ngaitapa taihta a parao tyhtuhpa pualeina cha a ypa vâta.

11 Chybia hnei leipa ta nata a do lei ngaitapa ta, “Kresawti nata sahmah kyh ei cha chho aw,” tahpa ta, chyhsa ta haipa a reih khiahtala he chyhsazy hrohsopa dei he a châ aw.

12 Hy Zakaw sahlao zy, nama zyduata cha aw pakhy tlai aw ei na ta, Izarel laibâhpazy cha ei pakhy tlai aw; mietahkupa hawhta pahmaoh pakhy aw na ta: sahroh zaw ama sibiepa su liata a ypa hawh tlai ta, zawpi ama châpa vâna chata kalihpi topa ta ama y aw.

13 Chatôhtuhpa cha ama hmia lâta sie ta; chatôh pathla ei ta, ochhi taihta sie lymâ ei ta, cha liana cha ama pua. Ama abei cha ama hmia lâta sie ta, ABEIPA chata âmo chhihtha ta. 

Mika (Micah)

Bo 1	Bo 2	Bo 3	Bo 4	Bo 5	Bo 6	Bo 7

Mika 3

Mika 3

Izarel chhihthatuhpazy reipachhiena

1 Hy nâmo Zakaw sahlao hyutuhpazy nata Izarel chhôhkha ryureituhpazy saih u, nahthlie ula! Ei tah na: Pachianazie cha nama pahno awpa châ vei ma?

2 Hmophapa a hao eichi ta, hmopha leipa nama pasô, ama vo hlaipa eichi ta. ama rupa tawhta sapa a kao eichi ta;

3 ei chyhsa sa nie hra eichi ta, ama vo pahluh eichi ta, ama rupa thliepa ei ta, beih liata chho awpa hawhta cha-â ei ta, sa pasyuna beih chhôh liata ama cha-âpa hawh tlai ta.

4 Cha tina chata ABEIPA pado aw ei ta, châhrasala âmo a chhy aw vei; cha tina chata âmo tawhta a hmia nyu aw ta, ama hmotaopazy a moleipa vâta.

5 Ei chyhsazy paviasa pata chaeipa hneipa ta, “Thlahlôhna” tahpa ta awpa ta, ama pakah liata a pabaw leituhpa maih adyuhpa tlao achhuahdytuhpa hrohsopazy kyh cha ABEIPA ta he tana heta a tah.

6 Chavâta aluahna nama hnei leina awpa taihta nâmo lâta zâ vaw tlô aw ta, nama pachao thei leina taihta nâmo lâta zohna vaw y aw ta. Hrohsopazy châta noh khô aw ta, nohchhô chhao ama chô liata zohna a châ aw;

7 hmô theituhpazy cha nozapa ta y aw ei ta, pachao thaipazy cha ama maohphyu aw; ama zydua ta ama hmao ama chahu aw, Khazohpa achhyna y tlôh leipa ta.

8 Châhrasala Zakaw sahlao lâta ama hmoparaona pahnona awpa nata, Izarel sahlao lâta ama moleina pahnosa awpa ta, ABEIPA Thlahpa vâta hmotaotheina zy, ryureinazy nata thatlônazy châta ei bi tlai.

9 Nâmo Zakaw sahlao chhôhkha hyutuhpazy nata Izarel chhôhkha pachiatuhpa, pachiana pasipa ta, adona to a paliepalâtuhpazy saih u, he he nahthlie teh u,

10 Zaio cha thisaih ta sa ei ta, Zerusale cha hmoparaona ta.

11 Cha liata hyutuhpazy chata lymâ hnabeiseipa ta ryureih ei ta, cha liata theihthaipazy chata hlao hnabeiseipa ta pachu ei ta, cha liata hrohsopazy cha tâkâ hnabeiseipa ta ama pachao; chata chôna chhaota, “ABEIPA cha eima hry liata y vei ma? Hmopha leipa eima chô liata tlô aw vei,” tahpa ta ABEIPA chô liata ama pahnie.

12 Chavâta Zaio cha nâmo vâna chata lyu hawhta alei paliepa châ aw ta; Zerusale cha hmo chhiepa pahmaohpa châ aw ta, achhyna-o yna tlâh cha lyurâhpa su sâhpa hawhta a châ aw. 

Mika (Micah)

Bo 1	Bo 2	Bo 3	Bo 4	Bo 5	Bo 6	Bo 7

Mika 4

Mika 4

Khizaw liata adyhna ta Abeipa ryureina (Is 2:1-4)

1 Châhrasala noh hnôh lâta cha ABEIPA o yna tlâh cha tlâh laipazy chô liana chata pa-ipa ta y aw ta, tlâh chyhpa chô liana chata pasâhsapa ta a y hra aw; cha liana chata chi to cha ama sie ngâ thlâh aw,

2 chatawhcha pho hluhpizy cha sie aw ei ta, “A vy ula, ABEIPA tlâh lâ, Zakaw Khazohpa o lâna chata khy ei suh u; chatanachata ano ta a lâpi thâtihzy cha maniah pachu aw ta, a lâpizy liana chata eima sie aw,” ama tah aw. Zaio tawhna chata ryhpa bie cha vaw pua tlôh aw ta, ABEIPA bie cha Zerusale tawhta avaw pua aw.

3 Ano chata chi hluhpi likaw liata pachia aw ta, lâhlapi liata phopi thatlô ngaitapa chhao a chhorei aw; chatawhcha ama zaozizy cha a leipaliena hmao pazaopazy lâta daih aw ei ta, ama aseizy cha theilâpa kô taih nata kô a kohpazy lâta ama daih aw; pho hropa ta pho hropa chô liata zaozi hy khao leipa aw ta, adyuhna yzie chhao a chu khao hra aw vei ei;

4 chyhsa to cha ama krezô ry liata nata ama theiku kô ry liata tlao a tyuh aw ei ta, Ahy hmah ta pachisa aw veih ei; Pheisaihzy ABEIPA pakah chata reih haw tlôh ta.

5 Chi to âmo khazoh moh chyuta charei aw ei ta, keimo deikua cha ABEIPA eima Khazohpa moh ta chhâzaw ta eima charei aw.

Seichâna tawhta Izarel chatlaina

6 ABEIPA ta he tana heta a tah, cha noh liana chata aleipa pakhy aw na ta, chadaipa ta a ypa nata rie ei patheipa ta a ypa cha ei pakhy aw;

7 aleipa cha a laibâhpa ta tao aw na ta; lâhlapi ta topa ta a ypa cha phopi thatlô ngaitapa ta ei tao aw; atahmâ tawhta cha Zaio Tlâh liata chhâzaw ta ABEIPA chata ama chô liata ryu a reih aw.

8 Hy nâ, sahro zaw kuh, Zaio sawchanô yna tlâh, nâ lâta a vaw tlô aw, abeina hmiatuapa cha a vaw tlô aw, Zerusale sawchanô abeina cha.

9 Khazia e thata na cha ngâ tly’. ‘Na chô liata abei y vei ma? Na ryraotuhpa a leidia haw ma? Chanô sawzeipa pasana ta a cha patu haw tly?

10 Hy Zaio sawchanô, chanô sawzeipa saw sa awpa hawhta pasa tao la, a zeih teh; atahmâ khihpi tawhta pua aw chita, lyurâhpa liata pahrâ aw chi ta; Babylaw taih chhaota sie tlôh aw ta, Cha liata pachhapa ta y aw chi ta, cha liana chata na khakhaipazy ku tawhta ABEIPA chata a cha pachha aw.

11 Atahmâ pho hluhpi nâma adyuhpa ta apakhy ei ta, “Patypamâpa ta y sala, eima moh heta Zaio chô liata a khôpa cha hmô mawh sy,” tah ei ta.

12 Châhrasala ABEIPA pachânazy cha pahno leipa ei ta, a ryraopa cha pahno thai hra veih ei, sawhri liata sâhkô pahmaohpa hawhta amo pakhy haw tlôh ta.

13 Hy Zaio sawchanô y, thyu la tly teh, na ki cha thua hawhta tao aw na ta, na pheipazah cha dawh hawhta tao tlôh aw na ta; chi hluhpizy cha a dina taih na parao khai aw, âmo hmo nyupazy cha ABEIPA châta panano aw chi ta, ama sôh cha alei pôhpalôhpa Abeipa châta na panano aw. 

Mika (Micah)

Bo 1	Bo 2	Bo 3	Bo 4	Bo 5	Bo 6	Bo 7

Mika 5

Mika 5

1 Nâ bohna thokhy pâhchhô lâna cha a heihpa ta moh teh, ano chata maniah a padô haw; Izarel sahlao pachiatuhpa a baih liata chôhchahrei ta ama tu aw.

Bethlehe tawhta pachhatuhpa ryureina

2 Châhrasala nâ, Bethlehe Ephratha, Zudah pho hry liata a hlaopa ta chyhta hra la, nâma tawhna heta Izarel sahlao ryureituhpa cha vaw pua aw ta; a vaw puana cha hlâno tawhtapa chhâzaw tawhta a châ.

3 Chavâta saw a zeituhpa saw a sa hlâ lei cha ABEIPA ta âmo a heisai aw; chatawhcha a laibâhpa a hroh tlakaihpazy cha Izarel pathlazy lâta ama kua heih aw.

4 Ano cha a duah aw ta. ABEIPA thatlôna ta a sahroh zaw cha a pasa aw, ABEIPA a Khazohpa moh rôhnahna tlai chata. Chatawhcha âmo cha ama y thlâh ha aw; ano cha alei chhâna taihta rôhnahpa ta y tlôh aw ta.

5 Chatawhcha cha cha thlahlôhna a châ aw, Asuria chyhsa eima râh lâ a vypa ta, eima abei ozy a vaw tly tina chata, ano adyuh awpa ta mietahku vaihtuhpa pasari nahta tlyma, chyhsa rôhnahpa pacharie nahta tlyma eima thyu aw;

6 Asuria râh cha zaozi ta parao aw ei ta, Nimraw râh cha angiana liana chata ama parao hra aw; ano chata eima râh liata Asuria chyhsa a vy ta, eima râh a vaw tly tita, ano tawhtapa maniah a pachha aw.

7 Zakaw sahlao laibâhpazy cha chi hluhpizy hry liata ABEIPA tawhta diati a tlapa hawhta nata sibiepa chô liata avâ suapa hawhta ama y aw, cha chata chyhsa hâ leipa ta, chyhsa sawchapawpazy ngiachhie hra vei.

8 Zakaw sahlao a laibâpazy cha phozy hry liata nata chi hluhpi zy hry liana chata lyurâhpa sazy hry liata chakeibarôhneipa hawhta nata mietahkupa zaw hry liata chakeibarôhneipa dawpa hawhta a y aw, ano chata a sie palâh tlai khiahta cha, tlypa ta hrie chhei ta, a pachhatuh awpa rai ahy hmah y veih ei.

9 Na ku cha nâma châ dyuhtuhpazy chô liata hypa ta y sala, na khakhaipa zydua cha pahleipadiapa ta y mawh sy.

10 Cha noh liana chata ABEIPA ta a tah, nâ tawhtapa na arâzy pahleipadia aw na ta, na talailizy ei parao aw;

11 na râh khihpizy cha pahleipadia aw na ta, na kuh sâhpa zydua cha ei pacho aw;

12 na ku tawhtapa dyuthainazy pahleipadia aw na ta, pachao thaipazy hnei khao aw va chi;

13 nâ tawhtapa na khazoh nohthlahpa taopa nata na lôbôzy cha pahleipadia aw na ta, na ku ta taopa hmo a chhy khao aw va chi;

14 nâ tawhtapa na Asherazy cha phia aw na ta, na khihpizy cha ei parao aw.

15 Chatawhcha bie a nahthlie leipa phozy chô liana chata hiehâhna nata pathi-iana phu lana pi ei patlô aw. 

Mika (Micah)

Bo 1	Bo 2	Bo 3	Bo 4	Bo 5	Bo 6	Bo 7

Mika 6

Mika 6

Abeipa ta Izarel a eina zie

1 ABEIPA bie reipa atahmâ nahthlie teh u: Thyu la, tlâh laipazy hmiakô liana chata a kho la, tlâh chyhpazy chata na ao nahthlie mawh sy.

2 Hy tlâh laipazy saih u, ABEIPA a khona cha nahthlie ula, nâmo leilô bôna hlôpazy saih u, nahthlie teh u; ABEIPA cha a chyhsazy nata a kho ei ta, Izarel sahlao cha bie pasia ta.

3 “Hy ei chyhsazy saih u, nama chô liata khâpa ma ei tao haw tly? Khâpa kyh liata e nama rie ei cha pathei ei? Nâ chhy teh u!

4 Izi râh tawhna chata cha chhihtha ei na ta”, sei tawhtapa cha cha chatlai ei na ta, nama hmiakô liata Mawsi, Arawna o nata Miria zy ei vaw tuapa kha.

5 Hy ei chyhsazy saih u, ABEIPA hmotaopa siapa cha nama pahno thei nawpa ta, Môaba beipa Balaka bie pahruapa nata Beôra sawchapawpa Balama ta achhyna zie, Shiti tawhta Kilkal taihta hmo yzie kha atahmâ a thei thlâh ha teh u,” tah ta.

Abeipa ta a hawpa

6 “Khâpa nata e ABEIPA hmiakô liana chata a vy aw na ta, Khazohpa chônôpa hmiakô liana chata ei bô aw? Raopa hlânazy, viahchao taw kô khapazy nata a hmiakô liana chata ei vy aw ma?

7 ABEIPA cha mietahkupa chapawpa sâh hluhpi tlyma, chavah thaw thy hrawhzy tlyma ta a palôhtlâh awpa a châ ma? Ei hmoparaona vâta ei saw tuapa chapiepa ta, ei thlahpa moleina vâta ei pôhpa pathaihpa cha ei pie aw ma?” tah ta,

8 Hy chyhsapa, phapa cha a cha pamosa haw; ABEIPA ta a châ hnawpa cha khapa e a châ? A do ngaitapa ta taopa nata ngiachhiena pasôpa nata na Khazohpa nata reisi ngaitapa ta hmaohkha ta chareipa he châ vei ma?

9 ABEIPA chata khihpi cha a aw, sona a hneipa chyhsa chata na moh a chi aw; byuthôh nata a chhuahdytuhpa cha thei teh u, “Hy Zudah nata ahmaohpakhyna khihpi nahthlie teh!

10 Moleipa o liana chata moleina ryu-byhzy cha ypa ta, panuana a pasichhih ngaitapa cha khâ a y ma?

11 Khopathliana a do leipazy nata sykhao liata dôpakheina kholô a hneipa chyhsazy ta pathaisapa ta ei châ aw ma?

12 Chyhsa hneirôhpazy cha nôchhiena ta bie tlôh ei ta, a pahrâpazy chata haipa reih ei ta, ama pakah chhôh liata ama paleih cha dô hmâhpa a châ.

13 Chavâta kei chhaota thata hmahphaohpa ta cha tu na ta, na moleinazy vâta roryhrapa ta ei cha tao.

14 Nie aw chi ta, na rih bie leipa aw ta, na niepa cha na pavyh liata a hriepa ta y aw ta; châhrasala a bohpa ta siekhei thei aw va chi, na siekheipazy cha zaozi liata ei pie aw.

15 Chi cheih aw chi ta, châhrasala hria aw va chi; ôli theizy cha saoh aw chi ta, châhrasala a thaw cha a thu aw va chi; kre saoh hra la, a kresawti cha doh aw va chi.

16 Ômri bieraopazy cha a vao thlâh ha tlôh tah chi ta. Ahaba chhôhkha hmotaopa zydua chhaota; ama ryhraopazy liana chata nama sie; chatanachata su roryhrapa ta cha tao ha aw na ta, a chhôh liata a pahrâpazy he pahnei parâsaona châta; ei chyhsazy moh chhiena cha nama phaoh aw,” tah ta. 

Mika (Micah)

Bo 1	Bo 2	Bo 3	Bo 4	Bo 5	Bo 6	Bo 7

Mika 7

Mika 7

Izarel ngâchhih leina

1 Ei hu a po kaw dia! Nopinoh theilâpa ama pakhy daihti nota ypa hawhta nata kre lyu daihti nota kre kâmothopa hawhta châ tlôh na ta: theilâpa sao nie awpa y vei, ei hrona ta theiku hmo tuapa â phahla.

2 Khazohpa a pachâpa chyhsa cha alei tawhta leidia ei ta, thisaih palo awpa ta a byhpa sai châ ei ta; chyhsa tota âmo unawhpa cha saota chadi ei ta.

3 Ama kuzy cha hmopha leipa chô liata tiama ngaitapa ta tao awpa ta pahnieh ei ta; abei chata a haw ta, ryureituhpa chata lymâ a haw ta, molaipa chata a palôhrupa hmoparaona reih ta; cha hawhna chata hmaohkha ta bie amâ paraoh.

4 Ama hry liata chyhsa pha chaipa cha bôbaw hawhta châ ta: chyhsa a do chaipa chhao cha sipopa hloh hneipa hlâta a chhih via. Na mota na hmô pata nahta na paona noh a vaw tlô; cha cha ama nôpona noh a châ aw.

5 Vaih liata ngâna pachhô khah la, viasa liana chata ngâna pachhô khah u; na kalachhôh liata a ypa lahpinô tawhna chata na pakah ochhizy cha a phapa ta vaih teh.

6 Sawchapawpa ta paw moh pachhie ta, sawchanô ta a nô adyuh ta, myunô ta a nohnô a dyuh tlôh ta, chyhsapa khakhaipazy cha ano chhôhkhapa tlai ama châ.

Abeipa ta khaihna nata pachhana a tlôkhei zie

7 Kei deikua cha ABEIPA lâta moh aw na ta, ei pachhana Khazohpa cha ei hâ aw ei Khazopa chata ei na nahthlie aw.

8 Hy ei khakhaipa y, na palôh nâ eih khâ; ei pao tina chata ei thyu heih aw; zohna liata ei tyuhpa chhaota ABEIPA cha ei châta khaihna a châ aw.

9 ABEIPA chô liata hmo ei parao haw vâta, a palôh châ lei ngaitana cha ei phaoh aw, ei kyh na reikheipa ta, ei châta pachiana cha a patlô hlâ lei cha. Khaihna liata na chhihtha aw ta, chatawhcha a siana cha ei hmô aw.

10 Chatanachata ei khakhaipa ei hnohta, “Khataih liata e ABEIPA na Khazohpa cha?” A tahtuhpa chata cha cha hmô aw ta. maohphyuna ta ano cha a khu aw. Ei mozy heta ano cha moh aw ta; ‘atahmâ cha othliah chiatlao hawhta tlypâpa a châ ha aw.

11 Na kuh pâhchhôzy taona noh awpa cha! Cha noh liana chata a bie raopa cha lâhlapi taihta pakawhpa a châ aw.

12 Cha noh liana chata Asuria tawhta Izi taihta zy. Izi tawhta Euphrate taihta zy, tilaipi tawhta tilaipi taihta zy nata tlâh tawhta tlâh taihna zy chata nâ lâta amâ vy aw.

13 Chata chôna chhao chata râh cha, a chhôh liata a pahrâpazy vâta nata ama hmotaopa theilâpa vâna chata roryh pahrasapa a châ aw.

Izarel chôta Abeipa thapasana

14 Kamel Tlâh likawhta lyurâhpa liata yru ngaitapa a ypa na ryuto mietahkupa zaw, na chyhsazy cha na byuthô hmâpa ta pasa la; hlâno hawhna khata Basana nata Kilia liata pasapa ta y ei se.

15 Izi râh tawhta na pua no hawhna khata a hnohta hmonoâh ngaitapa zy ei pamosa aw.

16 Pho to ta cha cha hmô aw ei ta, ama hmotaotheina zydua cha ama zakhei aw; ama pakah a chahu aw ei ta, ama nahkhaozy a pâ aw;

17 Parih hawhta buhchado palie aw ei ta, alei liata alyhpa hawhta ama y na khaoh tawhna chata a chalyuna chôta a vy aw ei ta, ABEIPA eima Khazohpa o lâna cha chi na chôta a heih aw ei ta, ano cha ama chi ha aw.

18 Nâma hawhta hmoparaona a ngiahthaituhpa nata a ryuto a laibâhpazy hmoparaona a sie pakhôtuhpa Khazohpa ahy e a y? A pathi-iana cha chhâzaw ta a pa-i thlâh ha vei, ngiachhiena liata aly ngaita tyhpa vâta.

19 A hei heih aw ta, eima chô liata ngiachhiena a hnei aw; eima hmoparaonazy cha a phei ry liata a tlypâ aw. Nâma ta eima moleina zydua cha tilaipi ry a thuh ngaitapa liana chata na thy aw.

20 Hlâno eima mahpawzy hnohta chhie na sa hawpa, Zakaw hnohta bie hmeihseihpa nata Abaraha hnohta ngiachhiena cha na patlô aw. 

Mika (Micah)

Bo 1	Bo 2	Bo 3	Bo 4	Bo 5	Bo 6	Bo 7