Malakhai 1

Malakhai 1

Abeipa ta Zakaw kyh a pachânazie

1 Izarel sahlao hnohta ABEIPA bietapa Malakhai hnohta piepa cha.

2 ABEIPA chata, “Kyh ei cha pachâ ei,” tah ta. Nâmo deikua chata, “Khâpa liata ma kyh maniah na pachâ?” tah eichi ta, Esaw cha Zakaw unawhpa châ vei ma?” ABEIPA ta a tah: “Zakaw cha a kyh pachâ na ta;

3 ‘Esaw deikua cha a hao na ta; a tlâhzy cha roryhrapa ta tao na ta, a ryuto cha râhpathohpa sihâzy pie na ta.

4 Edôma mozy chata, “Parao ta eima y tarawpa ta, vaw kua heih aw pi ta, su rypazy eima padua heih aw,” tah hra ei sala, Pheisaihzy ABEIPA chata he tana heta a tah: “Âmo ta padua heih taraw aw ei ta, keima ta ei parao heih aw; chyhsazy chata âmo cha râh moleipa nata chhâzaw ta ABEIPA ta ama chôta a hiehâhpa,” ama tah aw.

5 Nama mo tlaita hmô aw eichi ta, “Izarel râhri khôpa ta ABEIPA cha palyupalihpa ta y mawh sy!” nâmo tlaita nama tah aw.

Theihthaipazy Abeipa ta a ranazie

6 “Sawchapawpa chata a paw palyupalih tyh ta, sei chata a zibeipa, Kei he paw ei châ khiahtala eina palyupalihna chi cha khei he? Kei he nama zibeipa ei châ khiahtala eina palyupalihna chi cha khei he? Hy theihthaipa, ei moh a mohnaotuhpazy saih u, Pheisaihzy ABEIPA chata a cha tah ei. Nâmo deikua chata, ‘Khâpa liana chata ma na moh eima mohnao?’ tah eichi ta.

7 Ei maisâh liana chata viahchhâ pualeipa nama hlâ mâ tâh. Nâmo ta, ‘Khâpa liana khata ma eima cha papua?’ tah eichi ta. ABEIPA tlâkhai he mohnao chhihpa a châ nama tah tyhpa liana heta a châ.

8 Atheihna châta mochaopa nama hlâ nota hmopha leipa châ vei ma? A pheisypa nata a chaopa nama hlâ nota hmopha leipa châ hra vei ma? Cha khiahtala a châ vaw ly aw ei ma? Pheisaihzy ABEIPA ta a tah.

9 Atahmâ he maniah a ngiachhie thei nawpa ta Khazohpa palôh patlâhna tlua teh u. He hawhpa he nama ku hriana tlai châ tlôh ta, a châ vaw ly aw ei ma? Pheisaihzy ABEIPA ta a tah.

10 Khâpa hrao leipa ta ei maisâh liata mei nama patih lei nawpa ta nama hry liata chyhsa, ochhi a khaw awpa ama y mawh sala! Nama chô liata alyna rai hnei leipa na ta, nama ku tawhta hmohlâpa chhao apy hra aw va na; Pheisaihzy ABEIPA ta a tah.

11 Noh chhina tawhta a tlana taih chhaota Zenitaizy hryta ei moh cha rôhnah tlôh ta, su to liata ei moh châta rohpahâhpa hlâpa châ ta, hmohlâpa pathaihpa chhaota; Zenitaizy hry liata ei moh rôhnah tlôh ta, Pheisaihzy ABEIPA ta a tah.

12 Nâmo deikua cha ABEIPA tlâhkhai cha a pualei na, a theipa a niepa tlai cha mohnao â chhih, nama tahpa liana khata a papua paleituhpa nama châ.

13 Chatawhcha Ai a chhih kaw na’, tah hra eichi ta, nama hnapasu tô chie eichi ta, Pheisaihzy ABEIPA ta a tah. Nama parupa sahroh, asypa zy, a chaopazy vaw cheih eichi ta; cha hawhna chata hmohlâpa cha vaw cheih eichi ta! Chazy cha nama ku tawhtapa ei cha hlâ aw ei ma? ABEIPA ta a tah.

14 A sahroh zaw hryta a chapawhpa y thlâh ha ta, bie chhao a taih ta, Abeipa lâta seina a hneipa hlâpa ta a dôtuhpa cha chhiesapa a châ; kei cha Beipa rôhnah ngaitapa châ tlôh na ta, ei moh chhao Zenitaizy hry liata chi a chhih, Pheisaihzy ABEIPA ta a tah. 

Malakhai (Malachi)

Bo 1	Bo 2	Bo 3	Bo 4

Malakhai 2

Malakhai 2

Izarel ngâchhih leina chhoreina

1 Theihthaipazy saih u, he biepiepa he nâmo châta a châ.

2 Ei moh parôhnahsa awpa ta nahthlie leipa ta pathipalôh ta nama vao leipa khiahtala nama chô liata chhie ei patlôsa aw, Pheisaihzy ABEIPA ta a tah, nama byhnâ hmôpazy lâna cha chhie ei sa aw; nama hry liata pathipalôh ta a vaopa nama y lei vâta chhie ei sa haw.

3 Pachâ teh u, nâmo vâta nama chizy ra na ta, nama hmia zy liana chata ie ei hnia aw, nama kyhchhihna ie tlai cha; cha chhao chata siekheipa nama châ aw.

4 Livai hnohta ei vaw papua tahpa nama pahno aw, Pheisaihzy ABEIPA ta a tah.

5 Ei biehrai cha a hnohta y ta, hrona nata thlahlôhna pie na ta, eina chi nawpa ta;_ na chi ei ta, ei moh cha ama za nawpa ta.

6 Bie hmeihseihpa ryhpa cha a pakah liata y ta, bie pha leipa a hmao liata y vei. Thlahlôh ngaitapa nata a do ngaitapa ta ei hmiakô liata charei tyh ta, chyhsa hluhpi ama khâpa hrao leipa tawhta a pakuasa.

7 Theihthaipa hmaozy cha novâhna a vao awpa châ tlôh ta, a pakah tawhta ryhpa cha ama tlua tyh awpa a châ; ano cha Pheisaihzy ABEIPA lyuhchâpa châ tlôh ta.

8 Nâmo deikua cha lâpi tawhtapa cha tlei ha eichi ta; ryhpa liana chata chyhsa hluhpi nama chapiasa; Livai liata biehrai cha nama parao, Pheisaihzy ABEIPA ta a tah.

9 Chavâta kei chhaota ei lâpizy ahy hmahta a chhih leipa ta ryhpa liata chyhsa pathlua hlei nama hneizie lymâ hawhna heta, chyhsa zydua hmiakô liata mohnao chhihpa nata nawhpa ta ei cha tao ei,” tah ta.

10 Eima zydua ta paw khâpa châ mapi ma? Khazohpa pakha taopa châ mapi ma? Khazia e eima pawzy biehrai paraopâpa ta, unawh nata unawh eimâ dô tyh?

11 Zudah chata dôvei hmâh ta, Izarel nata Zerusale liata hmo pasichhihpa taopa châ ta, ABEIPA ta kyh a pachâ tyhpa supathaihpa cha Zudah chata papuapalei tlôh ta, râh hropa khazoh sawchanô a hnei.

12 He hawhta a taopa cha ahyrai, Zakaw poh-o tawhta ABEIPA ta a papai khai aw, Pheisaihzy ABEIPA lâta hmo hlâtuhpa taihta!

13 Chatawhcha he chhao he tao heih eichi ta. Mothlih nata chana nata ahrona ta ABEIPA maisâh cha pabi eichi ta, hmohlâpa a papeisa khao leipa ta nama ku liatahpa cha aly a chhihpa ta angia hra vei.

14 Nâmo chata, “Khâpa vâta tlyma,” tah eichi ta. Nâma nata na satlia noh lahpinô likawh ta bie pahnotuhpa cha ABEIPA châ ta, nâ kaolâhpa nata na biehrai lahpinô a châna chôta a chô liata dôna hmo na tao tyhpa vâta a châ.

15 Hrona chi hneipa ta pôhkha ta tao vei ma? Khazia pôh khata a tao? Chi pathla Khazohpa a pachâpa a tlua. Chatanachata nama hrona cha pakhâta ta a vao ula, ahy hmahta ano satlia noh lahpinô cha dô khah se.

16 “Amapa he a hao tlôh na ta. ABEIPA Izarel sahlao Khazohpa chata a tah; âmo chysia pasaipa-ina ta a khutuhpa chhaota, Pheisaihzy ABEIPA ta a tah. Chatanachata nama hrona cha pakhâta ta avao ula, a dô khah u,” tah ta.

Ryureina noh a tlô daihmâna zie

17 Nama biezy ta ABEIPA cha a rie nama pathei. Nâmo deikua chata, “Khâpa liana khata ma a rie eima pathei?” tah eichi ta. “Hmopha leipa taotuhpa maih ABEIPA mohmô liata chyhsa phapa châ ei ta, ama chô liata chhao ano cha aly tyh,” nama tahpa zy liana heta, “Ryurei siana Khazohpa cha khei he maw? nama tahna zy liana heta a châ. 

Malakhai (Malachi)

Bo 1	Bo 2	Bo 3	Bo 4

Malakhai 3

Malakhai 3

1 “Nahthlie teh u, ei lyuhchâpa vaw tuah na ta, ei hmiakô liata lâthlôh a chhuahdy aw: Nama tluapa ABEIPA cha achhyna-o liata sôkha ta a vy aw; nahthlie teh u, biehrai lyuhchâpa namâ ly ngaitapa cha; a vy na, Pheisaihzy ABEIPA ta a tah.

2 Anodeikuacha a vaw tlô no cha ahy e a tao thei aw, ano a vaw luah tina chata ahy e a duah thei aw? Ano cha patina mei hawhta nata poh pasutuhpazy sâhbaw hawhta châ tlôh ta,

3 tâkâri a patituhpa nata a pathaituhpa hawhta atyuh aw ta, Livai sawzy pathai aw ta, ngôh nata tâkâri hawhta âmo pasia aw ta, ABEIPA chata siana ta hmohlâtuhpazy ama châ aw.

4 Chatanachata hlâno nohzy nata hlâno kôzy hawhta Zudah râh nata Zerusale hmohlâpa cha ABEIPA châta khochhihpa a châ heih aw.

5 “Pachia awpa ta ei cha vaw hnia aw ei; dyuthaipazy, a pheihmâhpazy, haipa ta chhie a satuhpazy chô liata nata nôhmei nata hâra nata a hlaopa hlao khâpa hrao leipa pachâsapa ta pasaipa-ituhpazy nata pho hropa a thy pathlatuhpazy nata na chi leipazy chô liana chata bie pahnotuhpa pha ngaitapa ei châ aw. Pheisaihzy ABEIPA ta a tah.

Su hrawh su kha piena kyh

6 “Kei ABEIPA he a nano tlôh lei khâh na ta; chavâta hy Zakaw sawzy saih u, pahleipadiapa châ veih ei chi.

7 Nama mahpawzy daihti tawhta ei bieraopazy tleisai eichi ta, zyh beih veih ei chi. Kei lâta vaw kua ula, chatanachata nâmo lâta ei vaw kua aw, Pheisaihzy ABEIPA ta a tah. Nâmo deikua chata, ‘Khâpazy liana he ma eima kua aw?’ tah eichi ta.

8 Chyhsapa ta Khazohpa eih a parupa awpa ma a châ? Châhrasala nâmo chata eina parupa tyh eichi. Nâmo deikua chata, ‘Khâpazy liana heta ma eima cha parupa?’ tah eichi ta. Su hrawh liata su khapa nata hmohlâpazy liana heta.

9 Chhiesapa nama châ; nâmo he phopi ualuana heta kei he na parupa tyh tlôh eichi ta.

10 Ei o liata niepa a y thei nawpa ta su hrawh liata su kha zydua cha thyupakhyna o liata vaw cheih teh u, avâ opyzy cha nama chata pahypa ta byhnâ mohôh thei leina taihta ei cha vaohei ei ma vao heih vei ma, na pasia tua rai teh u, Pheisaihzy ABEIPA chata a tah.

11 A niebawhtuhpa cha pakhâpa aw ei na ta, chatanachata nama chhaolei patheipazy cha cha paraopa leipa aw ei ta; sahdô liata nama kre patheipa cha patah leipa ta y khao aw vei, Pheisaihzy ABEIPA ta a tah.

12 Chatawhcha pho zydua ta nohhlaopa cha tah aw ei ta, râh khochhih ngaitapa nama châ awpa vâta Pheisaihzy ABEIPA ta a tah.

Mo siapa nata moleipazy pananona

13 “Ei chôta nama biezy cha a pachyu kaw, ABEIPA ta a tah. Nâmo deikua chata, ‘Khâpa liana khata ma na chô liata cha hawhpa bie cha eima reih,’ tah eichi ta.

14 Khazohpa chakaopa he khâpa hrao leipa a châ: a bietapa eima zyhpa nata Pheisaihzy ABEIPA hmiakô liata mâchhiesapa hawhta eima charei tyhpa he phahnaina khâpa a y?

15 Chatawhcha chyhsa apalaipazy cha a nohhlao na, hmo moleipa a taotuhpazy cha thlao a chhi hra ei ta, Khazohpa pasia ei ta, pachhapa ama châ tyh hra,’ nama tah,” tah ta.

16 Chatanachata ABEIPA a chituhpazy cha a chhohia ei ta: ABEIPA chata vaw nahthlie ta, vaw thei ta, ABEIPA a chituhpazy nata a moh a papeisatuhpazy chata a thei thlâhna châbu cha a hmiakô liata ropa châ ta.

17 “Ryubyh sôh ngaitapa ei paki nota kei eih ama châ aw. Pheisaihzy ABEIPA chata a tah; chatawhcha chyhsa ta a sawchapaw, a chakaotuhpa cha hrôbieh a khohpa hawhta âmo cha ei hrôbieh aw.

18 Chatanachata vaw kua aw eichi ta, chyhsa siapa nata hmoparaopa, Khazohpa chakaotuhpa nata a chakaoleituhpa cha nama panano thei ha aw. 

Malakhai (Malachi)

Bo 1	Bo 2	Bo 3	Bo 4

Malakhai 4

Malakhai 4

Abeipa noh a tlô haipa

1 “Moh teh u, noh cha a vaw tlô hai, chyhsa apalaipa nata moleipa cha sawphaoh kâpa hawhta ama châ aw; cha nona chata âmo a kâ aw; thari nata a pachiahpa chhao pahlôh aw vei, Pheisaihzy ABEIPA ta a tah.

2 Nâmo ei moh a chituhpazy châta deikua chata siana noh, a mathlaw ta patlâna chhaota, vaw pua aw ta. Pua aw eichi ta, viahchao taw a laopiena liata chakizopa hawhta nama y aw.

3 Hmoparaopazy cha tlypâ aw eichi ta; noh ei raopa liana chata nama pheipazah ryta buhchâ châ tlôh aw ei ta, Pheisaihzy ABEIPA ta a tah.

4 “Ei chakaotuhpa Mawsi ryhpa, Hôriba liata a hnohta ei biepiepa, Izarel mo zydua châta bieraopazy nata biepiepazy khâ athei thlâh ha teh u.

5 “Pachâ teh, ABEIPA noh rôhnahpa nata rarôh y ngaitapa a vaw tlô hlâta hrohsopa Elaiza cha ei cha za tuapa aw ei.

6 Ano chata pawzy pathipalôh sawzy lâta nata sawzy pathipalôh pawzy lâta a paheisa aw; chata leipata la a vy aw na ta, chhiesana ta alei he ei taochhie pathlei aw na!’ 

Malakhai (Malachi)

Bo 1	Bo 2	Bo 3	Bo 4