Kaolaosa Mozy 1

Kaolaosa Mozy 1

Anaona

1 Pawla, Khazohpa khonazie hawhta Krista Zisu apôstôl nata Timawthy eima unawhpa chata—

2 Kaolaosa khih liata Krista liata mopathaihpazy nata unawh ngâchhihpazy hnohna chata: Khazohpa eima Paw tawhtapa ngiachhiena nata adyhna nama hnohta y mawh sy.

Kaolaosa Krizyhpazy chata Pawla thlahchhâna

3 Avâ liata nama hnabeiseina sopa a châpa vâta Krista Zisu namâ ngiapânazie

4 nata mopathaihpa zydua chôta kyhpachâna nama hneizie eima vaw pahno rakha tawhta

5 nama châta thlah khâ chhâpata Khazohpa eima Beipa Zisu Krista Paw lâna chata alynabie reih tyh pi ta. Cha hnabeiseina thâtih cha eikhano Thâtihpha bie hmeiseihpa liana khata nama pahno haw.

6 Cha thâtihpha cha khizaw zydua liata patheipata a pôh lymâpa hawhna hra heta nama hnohta a vaw tlôpa kha, cha hawhna hra chata Epaphra eima sei heih kho ngaitapa liata namâ chupa hawhta

7 hmeiseihpata Khazohpa ngiachhiena cha nahthliepata nama thei noh rakha tawhna khata nâmo liata chhao patheipata a pôh lymâ tyh. Epaphra he keimo vyuhpata Krista chakaotuhpa ngâchhih ngaitapa châ ta,

8 ano heta Thlahpa liata nama kyhpachâ na cha maniah chho hra ta.

9 Cha vâna chata thlahpa lâ sona nata novâhna zydua kyh liata ano khopa pahno pakina liana chata nama vaw bie thei nawpata, eima pahno noh rakha tawhta cha keimo chhaota nama châta thlahchhâna nata hiana bâh ma pi,

10 chatanachata raihria to liata patheipata, Khazohpa pahno pakina kyh liata phahnai rilipata, thapha ngaitapata, tiamana nata nôphana to hnei awpata.

11 A rônahna thatlônazie lymâ hawhta, thatlôna to liata thatlôpata. Paw khaihna liata mopathaihpa sahlaozy ryuto cha a hly tlâh châpata maniah a taotuhpa lâna chata

12 alynabie reipata kyh tota ano palôhpatlâh awpata Abeipa zi tlâh châpata nama y thei aw.

13 Ano chata zohna biehneina tawhtapa maniah pachhapata, a Sawchapawpa kyhpachâ ngaitapa khihnarâh liata maniah pakiasa haw ta,

14 ano liana chata eima chatlaina eima hmô, eima moleizy ngiahthaina cha.

Khazohpa pakina

15 Ano cha hmô thei leipa Khazohpa a lyupa, hmotaopa zydua liata a pih tua chaipa cha châ ta;

16 ano liata ato taopa châ ta, avâ liata a ypazy, alei liata a ypazy chhao, hmô theipazy, hmô thei leipazy chhao, abeidyuchhaizy chhao, ryureinazy chhao, abeinazy chhao, biehneinazy chhao ato ano taopa a châ, ano châta taopa a châ.

17 Chatawhcha ano he ato a y hlâta a y thlâh hawpa a châ, ano liana chata ato hmaohkha ta a duah hra.

18 Awnanopa cha a pôhpa châ ta, ano cha a luh a châ; ato liata chônôchaipa a châ thei nawpata, thina tawhta a thyupa a pih tua chaipa a châ.

19 Khazohpa ta ano cha a pakina to rai yna châta a tlyh ta,

20 a kraws thisaih chata adyhna taopata ano liana chata ato ano nata a paryhsapa he, Khazohpa palôh châ ngaitana châ tlôh ta, ano liana tlai chata alei liata hmo a ypazy chhao, avâ liata hmo a ypazy chhao, ano nata a paryhsapa he.

21 Chatawhcha nâmo, eikhano nama hmotaona moleina liana khata, ano tawhta pachhaihpata y eichi ta,

22 nama pachâna liana chata ano khakhaipa nama châ hrapa kha, châhrasala atahmâ la a hmiakô liana chata pathaih ngaitapa nata thai pachâsapa nata seina hnei leipata a cha paduasa awpa ei ta, a thina ta a sapa pôhpa liana chata ano nata a cha paryhsa haw ei,

23 a bôna hneipata, a ipata ypata, thâtihpha nama theipa hnabeiseina tawhta apasie tyh leipata, ngiapâna liana heta nama y thlâh ha khiahta cha, cha thâtihpha cha avâ ry liata hmotaopa zydua tlâh-awhkheipa a châpa kha, kei Pawla he, cha chakaotuhpata taopa ei châ.

Awnanopa châta Pawla chakaona

24 Atahmâ nama châta pasa ei taona liana heta alyna ta, Krista riethei tao laibâpa cha a pôhpa vâta ei sapa liana heta ei pazao lymâ, a pôhpa cha awnanopa sahlao he ama châ.

25 Khazohpa bie chho paki awpata mohôhna raihria Khazohpa ta nama châta eina piepa lymâ hawhta, cha sahlao chakaotuhpata taopa ei châ.

26 Cha Khazohpa bie cha chhâzaw nata chhâ y rakha tawhta bieru a nyupa cha a châ, atahmâ deikua cha a mopathaihpazy hnohta paluahsapata a y haw.

27 Chazy hnohna chata Zenitaizy hry liata cha bienyupa rônahna hnei thluzie cha Khazohpa ta pahnosa a khohpa a châ, cha bienyupa cha Krista nâmo liata a ypa, rônahna hnabeisei chhâpa a châ,

28 Chyhsa to Krista liana chata pha pakipata eima paduasa thei nawpata, chyhsa to chhoreipata, chyhsa to sona tota pachupata, a thâtih eima chho tyhpa he.

29 Cha hawhta paduasa thei awpata thata keima liata a hriapa, cha hriazie lymâ hawhta tei lyliahpata ei hria pasa tyh hra. 

Kaolaosa Mozy (Colossians)

Bo 1	Bo 2	Bo 3	Bo 4

Kaolaosa Mozy 2

Kaolaosa Mozy 2

1 Nâmo nata Laodisi khih liata a ypazy nata sapa liata hmia ei hmô leipa maih chata, kha tlu rimâ ta ma nama châta ei tei lyliah tahpa he nama pahno awpa khoh tlôh na ta,

2 chatanachata Khazohpa bienyupa sona nata novâhna ryu zydua nyuna Krista cha ama pahno thei nawpata, pahnopata khâchâ ngiapâna hneirôna zydua cha to awpata,

3 a kyhpachâna liata a chahry pabaohpata ama pathipalôhzy cha thlalôhpata a y thei aw.

4 Ahyhma ta reikah thaipa ta ama cha dô lei nawpata chazy cha ei tah.

5 Sapa ta nama hnohta y vei hra aw sala, aly ngaitapata ypata nama siazie nata Krista namâ ngiapâna a yzie mopata, thlahpa liana chata nama hnohta y tlôh na ta.

6 Chavâta Krista Zisu Abeipa cha namâ lypa hawhna khata ano liata thari thlapa nata

7 a paryh rilipata ypata pachupata nama ypa hawhna khata, namâ ngiapâna liana chata â i ngaitapata ypata, alyna bie hluhpi reipata ano liana chata y teh u.

Krista liata hrona biena

8 A chado teh u, chata leipata la ahyrai ta Krista bie hawhta châ leipata, chyhsapa bie ryuhipa nata khizaw yzie hawhta, ama bie sopa nata dona khâpahrao leipata a châ chhi pathlei aw ei na.

9 Ano liana chata Khazohpa pakina to cha pôhpa hneipata y thlâh ha tlôh ta;

10 ano liana chata paki haw hra eichi ta, ano cha abeina nata biehneina zydua luhpa a châ.

11 Krista chopawtaina liana chata sapa pôhpa pahluh khaipata, ano liana chata ku ta chopawtaipa châ leipata, chopawtaipa nama châpa kha;

12 bâtina liana chata ano hnohta pabupa vaw châ haw hra tlôh eichi ta, cha liana chata athihpa hry tawhtapa ano a pathyutuhpa Khazohpa raihria ngiapâpa vâta ano hnohta pathyupa nama châ hrapa kha.

13 Chatawhcha nâmo nama paraonazy nata nama sapa liata chopawtai leina vâta a thipa châ eichi ta, nâmo tlai cha ano nata a cha pahropa ei kha, eima paraona zydua maniah a ngiahthai ta,

14 a bana cha biepipata ropa eima chôta a ypa maniah dyu tyhpa cha pahlei haw tlôh ta; cha tlai cha la haw ta, kraws liata khaipâpa ta.

15 Chatawhcha abeina nata biehneinazy cha pahluhpata, cha kraws liana chata chazy cha tiapata alâhâh ta pahnosa nawpata hmâh haw ta.

Chôlâ hmozy tluana

16 Chatanachata nie kyh ta tlyma, do kyh ta tlyma, kyhchhi noh kyh ta tlyma, thla thiehpa kyh ta tlyma, pahânoh kyh ta tlyma ahyhma ta cha sei kha ei se.

17 Chazy cha hmo a vaw tlô awpazy nohpahlipa a châ, a hmeiseihpa deikua cha Krista a châ.

18 Ahyhma ta âmo reisai ta reisina vâta vâlyuhchâpa achhyna hmâpata nama lymâ cha cha chhu kha ei se, ama hmo hmôpazy liana chata y thlâh hapata, ama sapa lâ palôhrupa vâta apalaipata,

19 luhpa cha khâchâ patu tlôh leipata ama y, ano zawhzi ta pôhpa tlokhuh cha a pazaona nata chahrynazy vâta pasapa nata a pazao pakhypata Khazohpa laiseihna ta laiseih tyh ta.

20 Khizaw hrona yzie cha Krista hnohta na thisai haw khiahtala, khazia khizaw liata a hrohpa hawhta chyhsapazy bietaipa nata

21 pachuna hria khao leipa la, pachâ khao leipa la, hria rai hria khâ tahpa hawhta

22 biepiepazy liana heta nama ngiarih tly? Cha hawhpa hmo zydua cha hmâna chôta a leidia awpa a châ.

23 Cha hawhpa hmozy cha ama khopa hawhta achhypa nata reisipa nata sapa a pasâhsapa liana chata, tao awpa hawhta a lâ tlai ta; châhrasala sapa khopa zyhna pakhâpa kyh liana chata khâpahma phahnai hlei vei. 

Kaolaosa Mozy (Colossians)

Bo 1	Bo 2	Bo 3	Bo 4

Kaolaosa Mozy 3

Kaolaosa Mozy 3

1 Chatanachata Krista hnohta pathyupata nama y haw hra khiahtala, chôlâ Khazohpa chachâh lâta a tyuhpa Krista yna liata hmo a ypazy cha tlua teh u.

2 Chô lâta hmo a ypazy liana chata nama palôhrupa khâchâ pachhô teh u, alei liata hmo a ypazy liana chata pachhô leipata.

3 Thi haw eichi ta, nama hrona cha Khazohpa liana chata Krista hnohta nyupata y tlôh ta.

4 Krista eima hrona cha a vaw luah tita, nâmo chhao ano hnohta rônahpa hryta namâ luah hra aw.

Hrona parohpa nata a thiehpa

5 Chavâta nama pôhpa pachiahpa alei liata a ypazy he thie teh u; apheina zy, pualeina zy, parâna zy, aohraona moleipa zy, uavana zy he, uavana cha nohthlahpa achhyna châ tlôh ta.

6 Cha hmozy vâna chata Khazohpa hiehâhna cha ngiapâ leipa sawzy chôta a tlô tyh.

7 Nâmo chhao eikhano cha hmozy liana chata nama hro nona khata, chazy liana chata nama y tyhpa kha.

8 Atahmâ deikua cha nâmo chhaota he zydua, tahpalôhna zy, hiehâhna zy, ahaona zy, reipachhiena zy nama pakah tawhta bie chhiepa a puapa zy he, pahlei teh u.

9 Haipa a chho rairieh kha u, chyhsa parohpa cha a hmotaopazy chhaota pahluh haw eichi ta,

10 chyhsa thiehpa chata a bu haw tlôh eichi ta, cha chyhsa thiehpa cha pahno pakina hnei awpata a taotuhpa lyupa hawhta tao pathipata a y hai.

11 Cha liana chata Krika chyhsa nata Zu chyhsa, chopawtaipa nata chopawtai leipa, râh hropa chyhsa zy, Skythia mozy, sei zy, khotalaipa zy chhao y thei vei, Krista cha ato tlao châpata ato liata a y hra.

12 Chatanachata Khazohpa chyhsa a tlypa mopathaihpa nata kho ngaitapazy hawhta thapasana pathipalôh zy, nôphana zy, reisina zy, bie a padiana zy, dao theina zy chata a tobi teh u,

13 ahyrai ta ahy chô liata rai biepeipa hnei ula, a chhy thai rairiehpata a ngiahthai rairieh ula; Abeipa ta a châ ngiahthaipa hawhna tlai khata a ngiahthai hra teh u.

14 Chatawhcha cha zydua chôna chata kyhpachâna hnei ula, kyhpachâna chata ato chahry paki khai tlôh ta.

15 Krista thlalôhna chata nama pathipalôh liata ryu reih mawh sy, cha hawhta châ awpata pôhpa miakhata awpa nama châ mâ tâh. Alypata y teh u.

16 Krista bie cha sona tota nâmo liata thata y mawh sy, reithaina hlazy, Khazopa hlazy, thlahpa lâ hlazy ta a pachupata, a chhorei rairieh ula, pathipalôh liata ngiachhiena hneipata Khazohpa châta hla sa teh u.

17 Chatawhcha nama taopa maih cha, bie rei liata tlyma, hmotaopa liata tlyma, ano zawhzi ta Paw Khazohpa lâta alynabie reina chôta Abeipa Zisu moh ta tao khai teh u.

Hrona thiehpa vâta vâtlâh châta tao awpazy

18 Lahpinô saih u, Abeipa liata a ngiapa rakha lymâ hawhta nama vahpazy lâta a ngiarih teh u.

19 Vahpa saih u, nama lahpinôzy kyhpachâ ula, âmo liata a hrâhrao kha u.

20 Saw saih u, ato liata nama nôpawzy bie zyh teh u, cha cha Abeipa liana chata alyna châ tlôh ta.

21 Paw saih u, nama sawzy patysa kha u, chata leipata la ama hnabei a dy pathlei aw na.

22 Sei saih u, sapa liata nama hyutuhpazy bie he ato liata a ngiah teh u; chyhsapa palysatuhpazy hawhta dei mokhaoh ta chakao leipata, pathipalôh miakhata phaohpata. Abeipa china chôta tlao zyh teh u.

23 A thôhna ryuto awpa cha Abeipa tawhta nama hmô awpa pahnopata,

24 nama taopa maih cha chyhsapa châta hawhta tao leipata, Abeipa châta hawhta tlao taopata, kho ngaitapata tao teh u; Abeipa Krista nama chakao hih.

25 Hmo do leipa a taotuhpa chata, a hmo do leipa taopa mâ cha a hmô heih aw, chyhsa thlei hleina rai y tlôh lei khâh ta. 

Kaolaosa Mozy (Colossians)

Bo 1	Bo 2	Bo 3	Bo 4

Kaolaosa Mozy 4

Kaolaosa Mozy 4

1 Hyutuhpa saih u, nâmo chhaota avâ liata hyutuhpa nama hneipa pahnopata, nama seizy chôta a siapa nata a ngiapa rakha ta tao teh u.

2 Thlahchhâ lyliah ula, cha liana chata alynabie reina chôta hrohrua teh u;

3 eina patâhna chhâpa Krista bienyupa cha chho awpata, Khazohpa ta bie chata ochhi maniah a pahypa thei nawpata keimo chhao thlah maniah chhâpa teh u,

4 ei reih awpa hawh tlaita ei phuah thei nawpata.

5 Rypaohna chalei lymâpata khôtho lâta chyhsazy liana chata, so ngaitapata y teh u.

6 Chyhsa to kheihtazie ta a chhy chyu awpa ma tahpa nama pahno thei nawpata, nama reikah a puapa cha a ngiapa nata ngiachhiena a hlaopa châ mawh sy.

Byhnâ awna chhâna

7 Abeipa liata unawh kho ngaitapa chakaotuhpa ngâchhihpa, eima sei heih Tykika heta ei thâtih zydua a cha pahnosa aw ei.

8 He vâna tlai heta ano cha nâmo lâ ei vaw tuah, eima thâtih nama pahno thei nawpa nata nama pathipalôh thlah a palôh thei nawpata,

9 Ônesima unawh ngâchhihpa nata kho ngaitapa, nâmo hry liatahpa chhao heta, Âmo chata he lâta hmo yzie zydua he ama cha pahnosa aw.

10 Aristaku ei tâlâhpa heta a châ naoh ei, Maka, Banaba tupapa chhaota a châ naoh ei, (ano kyh liata biepiepazy nama hmôpa kha, nâmo lâ a vy khiahtala a vaw ly teh u).

11 Zisu, Zusta ama tahpa heta a châ naoh hra ei. Chazy dei ta cha Khazohpa Khihnarâh kyh lâna chata chopawtaipa ei hrialâhpa, ei thlah na palôhtuhpazy ama châ.

12 Epaphra nâmo hry liatahpa, Krista Zisu sei heta a châ naoh ei, ano chata Khazohpa khopa maih lâta pitlopa nata ngiapâna khâchâ hneipata namâ duah thei nawpata a thlahchhâna zy liana chata nâmo châta a tei tyh.

13 Nâmo châta zy, Laodisi khih liata a ypa sahlao châta zy, Hirapôli khih liata a ypa sahlao châta zy, phahnai khoh ngaitapata a hriapa ei pahnokhei mâ tâh.

14 Luka dawty kho ngaitapa nata Dema heta a châ naoh ei.

15 Laodisi khih liata unawh a ypazy kha na naohpa muh vy. Nypha nata a o liata awnanopa apakhypa sahlao nâ naohpa muh vy.

16 Chatawhcha he châ paphaopa he, nama hryta nama rei khai tawhta, Laodisi awnanopa sahlao hry liata chhao pareisa hra teh u; nâmo chhaota Laodisi khih liatahpa kha vaw reih hra teh u.

17 Chatawhcha Arkhipa hnohna khata, “Chakaona, Abeipa liata na hmôpa kha patlô awpata a chado teh,” tah muh vy.

18 Kei, Pawla ta, keima ku tlaita ei châ naoh ei hih. Ei keihraizy he a thei thlâh ha teh u. Ngiachhiena nama hnohta y mawh sy. 

Kaolaosa Mozy (Colossians)

Bo 1	Bo 2	Bo 3	Bo 4