Kalatia Mozy 1

Kalatia Mozy 1

Anaona

1 Pawla apôstôl - chyhsapa tuapa châ leipata, chyhsapa zawhzi chhaota châ leipa, Zisu Krista nata athihpa hry tawhta a pathyutuhpa Paw Khazohpa zawhzi ta tlao a châpa tawhta châ paphaopa cha a châ.

2 Ei hnohta unawh a ypa zydua chhaota Kalatia râh liata awnanopa sahlaozy eimâ châ naoh:

3 Eima Paw Khazohpa nata Beipa Zisu Krista tawhtapa ngiachhiena nata adyhna nama hnohta y mawh sy.

4 Krista chata eima Khazohpa nata eima Paw khonazie hawhta, atahmâhlâ khizaw molei ngaitapa tawhna heta maniah a pachha thei nawpata eima molei vyuhpata anosasy ta a pie ta.

5 Khazohpa lâna chata rônahna chhâzaw ta y mawh sy! Amen.

Thâtihpha hropa y leina

6 Krista ngiachhiena zawhzi ta châ awtuhpa ei kha, cha hawhta sôkha ta thâtihpha nanopa lâta namâ heisaipa he ei no a âh kaw.

7 Cha cha thâtihpha châ hra tlôh va, nâmo patypamâpata Krista thâtihpha a panano khohpa ahyzy tlyma ama ypa châ ta.

8 Châhrasala keimo ta tlyma, avâ tawhta a zupa vâlyuhchâpa rai ta tlyma, thâtihpha eima cha chhopa leipa khata cha thâtihpha hropa cha vaw chho ei sala, chhiesapata y mawh sy.

9 Eikhano ta eima reipa hawhna khata, atahmâ ei reih heih aw, thâtihpha namâ pyhpa leipa khata cha thâtihpha hropa ahyrai ta cha chho ei sala, chhiesapata y mawh sy.

10 Cha khiahtala atahmâ he chyhsa ma ei reipasao, Khazohpa maw? A châ vei khiahtala chyhsapa ma palysa ei chhuah tly? Chyhsapa palysapata y aw sala, Krista sei châ aw va na.

Pawla apôstôl a chânazie

11 Unawh saih u, ei thâtihpha chhopa kha chyhsapa lâ kyh châ vei tahpa ei cha pahnosa ei.

12 Chyhsapa tawhta a hmôpa châ hra va na, chyhsapa pachupa châ hra va na, Zisu Krista aluahna vâta a hmôpa tlao châ tlôh na ta.

13 Zuzy phôryhpa achhyna yzie liata cha eikhanota ei yzie cha pahno kaw tlôh eichi ta, kha tawhta Khazohpa awnanopa sahlao thata taolapata pahleipadiapata ei chhuahpa kha.

14 Na pathlahtuhpazy bie ryuhipa chôta phahnai ei khoh pachaipa vâta, Zuzy phôryhpa achhynazie kyh liana chata ei chiheihzy hry liata ei rihchâhkha a hluhpizy khoh na ta.

15 Châhrasala ei nô chhi tawhta na pananotuhpa nata a ngiachhiena vâta nâ awtuhpa Khazohpa chata,

16 Zenitaizy hry liata a Thâtihpha ei chho thei nawpata Sawchapawpa cha palôhtlâh ngaitapata keima liata a paluahsa nona khata ahyhmah ta a chhohia leipa na ta,

17 eima hmialâta apôstôl a châ hawpazy hnohta Zerusale khih lâ khy hra leipata, Arabia râh lâ tlao sie syulyu ha na ta, chatawhcha Damaska khih lâta kua heih na ta.

18 Kô thôh hnôh lâta Pity a hmô awpata Zerusale khih lâ khy na ta, ano hnohta noh hrawhleipangawh châh na ta.

19 Abeipa unawhpa Zami dei leipata cha apôstôl hropa ahyhma ta hmô leipa na ta.

20 Nâmo lâta bie ei ropazy he Khazohpa mohmô liata chhao haih va na!

21 Cha hnôh lâna chata Suria nata Kilikia râh lâta a vy na ta.

22 Cha no chhaota Zudia râh awnanopa sahlao hry liata pahnopa châ mâh lei khâh na ta.

23 “Eikhanota maniah taolatuhpa khata hmialâta ngiapâna kyh a parao tyhpa kha, atahmâ tlao a chhô haw,” tahpa chyhsa reipa deita thei ei ta.

24 Chatawhcha keima vâta Khazohpa palyupalih haw ei ta. 

Kalatia Mozy (Galatians)

Bo 1	Bo 2	Bo 3	Bo 4	Bo 5	Bo 6

Kalatia Mozy 2

Kalatia Mozy 2

Lyuhchâpa hropazy ta Pawla amâ pyhna

1 Kô hrawhleipalih hnôh lâta Titu chhao cha a chhi hrapata, Banaba chhaota Zerusale khih lâ khy heih na ta.

2 Khazohpa ta aluahpata eina pahnosana vâta khy na ta; Zenitaizy hryta thâtihpha tlâh ei awhkhei tyhpa he, âmo chho na ta, châhrasala molai viapazy cha ano eih tata chho na ta, chata leipata cha khâpahrao leipata ei tah pathlei aw na, a châ vei khiahtala a hrao leipata a râpa ei châ pathlei aw na.

3 Titu ei hnohta a ypa chhao cha Krika chyhsa châ hrasala chopawtaipata y hlei leipata.

4 Cha cha unawh pakheipa aru lâta ama pangiapa vâta a châ, chazy cha seita maniah ama tao thei nawpata, Krista Zisu liana chata khotalaina eima hneipa he moparu awpata aru lâta a ngia ei ta.

5 Châhrasala thâtihpha bie hmeiseihpa cha nama hnohta a y thlâh ha thei nawpata, dawh khata dâhdei chhao a ngiarihpata ama bie zyh leipa pi ta.

6 Chatawhcha molai viapata ama raopazy liana chata kheihawhpa chyhsa rai châ ei sala ei châta khâpahmah châ hlei vei; Khazohpa ta ahyhma panano hlei leipata molai viapata ama raopazy chata khâpahma na baichha hlei tlôh lei khâh ei ta;

7 cha hawhta châ leipata, chopawtaipazy thâtihpha Pity hnohta pavaosapata a ypa hawhta, chopawtai leipazy thâtihpha keima hnohta pavaosapata a ypa pahno ei ta.

8 Chopawtaipazy apôstôl châ awpata Pity chata a hriatuhpa tlai chata Zenitaizy apôstôl châ awpata kei châta chhao na hriapa tlôh ta.

9 Ngiachhiena eina piepa cha ama pahnopa chhaota, Zami zy, Sifasa zy, Zawhana zy, awnanopa otôh ta ama raopazy chata keimo Zenitaizy lâta sie awpa nata âmo cha chopawtaipazy lâta sie awpata kei nata Banaba cha a kaona ku chachâh lâ tlao maniah pie ei ta.

10 Sipasapazy eimâ thei thlâh ha awpa deita ama khoh, cha tlai cha tao ei chhuah tyhpa tlai a châ.

Antiôka liata Pawla ta Pity a rana

11 Sifasa cha Antiôka khih lâ a vy nota, â do leipata a ypa vâta hmiadaisâ tlaita adyuh na ta.

12 Chyhsa ahyzy tlyma Zami tawhta amâ vy hlâna chata ano chata Zenitaizy hnohta pati nie tyh ta; châhrasala ama vaw tlô patanahta chopawtaipa chyhsazy cha a chipa vâta a hlao khao leipata a panano ha tlôh ta.

13 Zu hropazy chhao piepie kaw sai ei ta, chatanachata Banaba chhao tlai ama piepiena lâta chhihthapata y pâ ha ta.

14 Châhrasala thâtihpha bie hmeiseihpa hawhta a siapata ama y leipa ei pahno nahta ama zydua hmiakô liata Sifasa hnohta “Nâ, Zu chyhsa châ tlôh chi ta, Zuzy ypa hawhta y leipata, Zenitaizy ypa hawhta tlao na y khiahta cha, kheihtazieta e Zenitai sahlaozy Zuzy ypa hawhta na paysa raruah tyh tly?” tah na ta.

15 Keimo cha Zu chyhsa tlaita a pihpa châ pi ta, Zenitai mozy moleipa châ leipata;

16 châhrasala ryhpa hmotaopazy vâta thai châpata y leipata, Zisu Krista ngiapâna vâ deita ta thai châpata tlao a y, tahpa pahno tlôh pi ta, keimo chhaota ryhpa hmotaopa vâta châ leipata, Krista Zisu ngiapâna vâta thai châpata eima y thei nawpata Krista cha eimâ ngiapâ; ryhpa hmotaopazy vâta chyhsapa rai thai châpata y tlôh leipa aw ei ta.

17 Krista liata thai châpata ypata eima chhuahna chô khata, keimo tlai chhao moleipa eima châ haw khiahta cha, Krista cha moleina a chakaotuhpa a vaw châ tly ma? Châ bao va.

18 Ei hmo phihpazy kha ei sa heih tlôh khiahta cha, paraotuhpa ei châpa ei pahnosapa tlâ a châ aw.

19 Khazohpa lâ kyh liata ei vaw hroh thei nawpata kei la ryhpa vâta ryhpa kyh liata thi ha tlôh na ta.

20 Krista hnohta khaipâpata ei y haw; châhrasala ei hroh; keima deikua châ khao va na, Krista cha keima liata tlao a hroh; chatawhcha atahmâ sapa liata ei hropa he, ngiapâna liata a hrohpa ei châ, Khazohpa Sawchapawpa, kyh na pachâ ta ei vyuhpata anosasy a pietuhpa ngiapâna liana chata.

21 Khazohpa ngiachhiena cha khâpahma châ leipata paysa va na, ryhpa vâta siana a y tlôh khiahta cha Krista cha khâpahrao leipata a thipa a châ aw. 

Kalatia Mozy (Galatians)

Bo 1	Bo 2	Bo 3	Bo 4	Bo 5	Bo 6

Kalatia Mozy 3

Kalatia Mozy 3

Ryhpa nata ngiapâna

1 Hy Kalatia mo ahrupa saih u! Ahyma dyu ta châ dyu ei? Nama mohmô tlai liata Zisu Krista cha khaipâpata a ypa a siapata palâsapa a châ thlâh bao na ta.

2 He deita he nâmo tawhta pahno ei khoh: Ryhpa hmotaopazy vâta ma Thlahpa cha nama hmô, nahthliepata namâ ngiapâna vâta maw?

3 He tlu ngâsâ ta ma nama hru tly? Thlahpa ta pathao ha tlôhpata, sapa ta nama paloh aw mâ?

4 Hmo cha tlatlu dua chata phahnaikhei leipata pasa nama tao ma? Phahnaikhei hmeiseih leipa châ ha sala.

5 Nama hnohta Thlahpa a pietuhpa vâta nama hry liata hmonoâhpa a taotuhpa chata ryhpa hmotaopazy vâta ma a tao, nahthliepata ngiapâna vâta ma?

6 Abaraha ta, “Khazohpa a ngiapâ ta, cha ngiapâna cha a siana ta raopa a châ,” tahpa ropa a châpa hawhna khata.

7 Chatanachata pahno teh u, ngiapâna liata a ypazy, chazy tlai cha Abaraha sawzy ama châ.

8 Khazohpa châ bie chata Khazohpa ta ngiapâna vâta Zenitaizy thai a pachâsa aw tahpa pahno chhieliepata, “Nâma liana chata pho to byhnâ topata ama y aw,” tahpata Abaraha hnohta Thâtihpha cha a chho chhieliepa kha.

9 Abaraha cha ngiapâ ta byhnâ patosapa châ ta, ano hawhna chata a ngiapâpazy cha byhnâ patosapa ama châ aw.

10 Ryhpa hmotaopa liata a ngâpa maih cha chhiesana ry liata y tlôh ei ta; “Ryhpa châbu liata bie ropa zydua hawhta tao awpata a y thlâh ha leipa maih cha chhiesapata ama y tyh,” tahpa ropa châ tlôh ta.

11 Chatawhcha Khazohpa mohmô ta ahyhma ta ryhpa vâta thai a châpa y vei ei, tahpa a lâ thlâh haw; “Angiapâna vâta thaipachâsapa chyhsa chata hrona a hnei aw,” tahpa ropa châ tlôh ta.

12 Châhrasala ryhpa cha ngiapâna liatahpa châ vei, “Chazy hawhta a taotuhpa cha chazy liana chata a hroh aw,” tahpa tlao a châ.

13 Krista cha eima vyuhpata chhiesapata ypata ryhpa chhiesana tawhtapa maniah a pachha haw; “Tho liata khaipâpa maih cha chhiesapa ama châ,” tahpa ropa châ tlôh ta.

14 Abaraha chôta byhnâ awna cha Krista Zisu liana chata Zenitaizy chôh liata vaw y thei aw ta, chatanachata ngiapâna vâta Thlahpa taipa cha eima hmô thei aw.

Ryhpa nata bietaina

15 Unawh saih u, chyhsapa hawhta ei reipa he, chyhsapa ryuhipa rai châ hrasala, pa-i ha tawhta phie beih leipa ei ta, baichha beih hra veih ei.

16 Chatawhcha Abaraha hnohta bie cha taipata a y, a chi pathla hnohta chhao. Chyhsa hluhpi chata bie reipa hawhta, “Chi pathlazy hnohta chhao,” tah leipata; chyhsa pakha kyh reipa hawhta, “Na chi pathla hnohta chhao,” a tahpa tlao châ ta, cha cha Krista cha a châ.

17 He tana heta ei tah: Biehrai, Khazohpa vaw pa-i hawpa cha, ryhpa kô za palih nata kô sythôh tawhta a vaw ypa khata, bietaipa cha khâpahrao leipata taopata pahlei vei.

18 Ryu to awpa cha ryhpa ta a châ khiahta cha, bietaipa ta châ khao leipa aw ta; châhrasala Khazohpa ta bietaipa ta Abarahâ liata a pie.

19 Cha khiahtala, kheihtazie ta ryhpa cha a ypa ma a châ tly? Chi pathla bietaina cha, a vy hlâ lei cha paraonazy vâta baichhapata y ta; vâlyuhchâpazy hmâpata lyuhchâpa ku ta taopa a châ.

20 Chatawhcha lyuhchâpa rai mo pakha liata lyuhchâpa châ beih vei; Khazohpa deikua pakha a châ.

Ryhpa chhuahna

21 Cha khiahtala, ryhpa chata Khazohpa bietaipazy cha adyuh tlyma? Châ bao va; ryhpa chyhsa a pahro theipa rai piepata a y haw tlôh khiahta cha, siana cha ryhpa vâta a y tlai awpa a châ.

22 Châhrasala Zisu Krista ngiapâna vâta a taipa cha, ngiapâtuhpazy hnohta piepa a châ thei nawpata Khazohpa châ bie chata moleina ry liata ato a khawhlôh khai haw.

23 Châhrasala ngiapâna vaw tlô hlâna khata, ngiapâna a vaw luah awpa chata khawhlôpata ryhpa ry liata vaipa eima châpa kha.

24 Chatanachata ngiapâna vâta thai eima châ thei nawpata, ryhpa cha Krista a vaw tlô hlâ lei maniah vaihtuhpa châ ta.

25 Châhrasala atahmâ ngiapâna a vaw tlô tawhna heta, vaihtuhpa ry liata y khao ma pi;

26 Krista Zisu liata ngiapâna vâta Khazohpa sawzy châ khai tlôh eichi ta.

27 Nama hryta Krista liata bâti a châpa maih kha, Krista chata a bu haw tlôh eichi ta.

28 Cha liana chata Zu chyhsa y hlei leipata, Krika chyhsa chhao y hlei hra vei, cha liana chata sei y hlei leipata, sei leipa chhao y hlei hra vei, cha liana chata chapaw nata chanô chhao y hlei vei, Krista Zisu liana chata nama zydua ta pôh kha châ tlôh eichi ta.

29 Chatawhcha Krista ei nama châ khiahta cha, Abaraha pathla, bietaipa hawhta ryutotuh awpazy nama châ. 

Kalatia Mozy (Galatians)

Bo 1	Bo 2	Bo 3	Bo 4	Bo 5	Bo 6

Kalatia Mozy 4

Kalatia Mozy 4

1 Châhrasala he tana heta ei tah; ryutotuh awpa cha ato chô liata hyutuhpa châ hra sala, hawti a châ chhôhta cha sei nata khâpa liata hmah a nano hlei veih ei,

2 a paw raopa daiti a tlô hlâ lei cha vaituhpa nata mohôhtuhpazy ry liata tlao a y.

3 Cha hawhna chata keimo chhao hawti eima châ nona khata khizaw ryhpa ry liata sei ta eima y;

4 châhrasala a daihti a vaw ki nahta saw châna eima hmô thei nawpata ryhpa ry liata a ypazy cha,

5 chatlai awpata Khazohpa ta a Sawchapawpa, chanô sapa, ryhpa ry liata vaw pihpata, tuah haw ta.

6 Chatawhcha saw nama châpa vâta Khazohpa ta a Sawchapawpa Thlahpa cha, “Abba! Ei Paw! tahpata awpata, eima pathipalôh liata vaw tuah ta.

7 Chatanachata sei châ khao leipa chi ta, saw tlao na châ. Chatawhcha saw na châ khiahta cha, Khazohpa zawhzi ta ryutotuh awpa na châ.

Ngiapâtuhpazy châta Pawla khokheina

8 Châhrasala Khazohpa nama pahno vei nona khata ama piezie rai chhaota Khazohpa a châ leipazy sei châ eichi ta;

9 atahmâ Khazohpa nama vaw pahno tawhna heta cha, châ vei, Khazohpa pahnopa nama vaw châ tawhna heta, khizaw ryhpa chileipa nata chhipa, a sei ta y heih awpa nata nama aohraopazy lâna chata kheihtazie ta a kua heipa nama châ?

10 Noh zy, thla zy, daihti zy, kô zy namâ ô tyh!

11 Nâmo chata khâpahrao leipata tha ei pahryu pathlei aw tahpa ei cha chikhei ei.

12 Unawh saih u, ei châ haw chaimâh ei, keima hawhta y teh u, kei chhao nâmo hawhta y tlôh na ta. Kei lâta hmopeipa khâpahma tao veih eichi;

13 thâtihpha nama hnohta ei cha chho tua nona kha, ei sapa chieh-leina vâta a châ tahpa pahno tlôh eichi ta;

14 ei sapa liata nama châta tao thei leipa a ypa cha mohnao leipa eichi ta, pasi hra veih eichi; Khazohpa vâlyuhchâpa hawhta, Krista Zisu hawh tlaita tlao eina lypa eichi kha.

15 Nâmo hnohta ei ypa nama thaphana kha khataih lâ a vawh haw? Tao theipa chhochhi châ sala nâmo ta nama mozy thaopata eina pie ha aw ei chi, tahpa ei cha pahnokhei ei mâ tâh.

16 Chatanachata bie hmeiseihpa ei cha chhopa vâ ei ta, nama khakhaipa ei vaw châ haw ma?

17 Cha chyhsazy chata phana lâ châ chachei tlôh leipata, phahnai khohpata cha reithai ei ta; âmo nama reithai nawpata khôtho lâta ama cha khawhlôh awpa ama khoh.

18 Hmotao phapa châta deikua cha khatino rai ta phahnai khoh ngaitapata ypa he a pha, nama hnohta ei y nota dei châ leipata.

19 Ei nawhta saih u, Krista cha nâmo liata pi patlohpata a y hlâ lei cha sawzei ta ei châ zeih heih ei hih!

20 Atahmâ he nama hnohta ypata ei ao panano ei byuhzie rimâ cha, nâmo kyh liata ei nôpo tlôh ta.

Hakara nata Sarai pakhona

21 Ryhpa ry liata y a khohpa saih u, na chho teh u, ryhpa bie cha nahthlie tyh vei eichi ma?

22 He hawhna heta ropa châ tlôh ta, Abaraha ta sawchapaw pano hnei ta, pakha cha seichanô chôta, pakha cha khotalaipa chanô chôta.

23 Châhrasala seichanô chôtahpa cha sapa ryhpa hawhta pie ta, khotalaipa chanô chôtahpa deikua cha bietaipa vâta a pie, tahpa hih.

24 Cha kyhzy cha pakhona a châ: cha chanôzy cha biehrai miano ama châ. Miakha cha Sinai Tlâh liatahpa, sei châ awpata saw a satuhpa cha; cha cha Hakara a châ.

25 Hakara he Arabia râh liata Sinai Tlâh cha châ ta; Zerusale atahmâ ta a ypa nata miakha ama châ, a sawzy chhaota sei ta y tlôh ei ta.

26 Chô lâ Zerusale deikua cha sei châ leipata, cha tlai cha keimo noh a châ.

27 Khazohpa châ bie ta, “Nâ, saw leipa saw a sa beih leipa, thaphapata y teh; nâ, saw a zei beih leipa awh teh; vahpa a hneipa hlâta yrupa chata sawzy a hluh via hnei tlôh ta,” a tahpa hawhna khata.

28 Chatanachata unawh saih u, keimo he Aisika hawhna khata, sawzy eima châ.

29 Cha nona chata sapa ryhpa ta a vaw pihpa chata Thlahpa ryhpa ta a vaw pihpa cha a taolapa hawhna khata, atahmâ chhao cha hawhna hra chata a châ.

30 Châhrasala Khazohpa châ bie ta kheihta a reih? “Seichanô cha a sawchapawpa nata papua teh; seichanô sawchapawpa chata khotalaipa chanô sawchapawpa cha ryutolâh aw vei,” tah ta.

31 Chatanachata unawh saih u, seichanô chôta sawzy châ leipa pi ta, khotalaipa chanô chôta sawzy tlao eima châ. 

Kalatia Mozy (Galatians)

Bo 1	Bo 2	Bo 3	Bo 4	Bo 5	Bo 6

Kalatia Mozy 5

Kalatia Mozy 5

Khotalaina liata â ipata aduana

1 Khotalaipata y awpata Krista chata maniah a papuapa kha; chavâta a ipata aduah ula, sei raopakypa liana chata a tâh heih khao khah u.

2 Pachâ teh u, kei Pawla ta nâmo hnohta ei reipa he chopaw nama pataisa khiahtala, Krista cha nama châta khâpahma phahnaina châ aw vei.

3 Chopaw a pataisapa maih cha ryhpa bie zydua zyh paki awpa ama châ tahpa ei pahnosa heih.

4 Nâmo ryhpa ta thai châ a chhuahpazy saih u, Krista nata namâ chhaih haw; ngiachhiena cha nama paosai haw.

5 Keimo cha Thlahpa zawhzi ta ngiapâna ta siana hnabeiseina hâ tlôh pi ta.

6 Krista Zisu liana chata chopawtaipa khâpahma phahnai vei, chopawtai leipa chhao khâpahma phahnai hra vei, ngiapâna kyhpachâna ta hriapa deikua cha a phahnai.

7 A phapata nama ra tyhpa kha; bie hmeiseihpa cha nama zyh lei nawpata ahy cha pakhâ haw ei?

8 He reipasaona he châ awtuhpa tawhtapa châ vei.

9 Thinô chyhtata viahchhâ tlâ cha tlokhuh ta a pathyu tyh.

10 Kei pachâna leipata pachâna hropa hnei hlei aw veih eichi tahpa Abeipa liana chata ei cha ngâ ei; châhrasala cha patypamâtuhpa cha ahyrai châ sala a chôta bie a tlu awpa cha pasa a tao aw.

11 Unawh saih u, kei heta chopawtaina kyh kha ei chho tlôh khiahta cha, khazia taolapata khâ ei y? Cha cha a do tlôh khiahta cha, Krista kraws thâtih ei tlâh awhkheipa cha buana châ aw vei.

12 Cha patypamâtuhpazy nâmo tawhta chhao pathla lâlaopata y ei sala tahpa ei khoh.

13 Nâmo unawh saih u, khotalai awpata awpa châ tlôh eichi ta; châhrasala nama khotalaina cha sapa châta rypaona ta hmâh leipa ula, kyhpachâna ta tlao a chakao rairieh chyu teh u.

14 “Nâma kyh na pachâpa hawhta na vaihzy kyh na pachâ hra awpa a châ,” tahpa bie piepa miakha liana heta ryhpa bie zydua a paki hawpa châ tlôh ta.

15 Châhrasala a sipata, nama nie rairieh tlôh khiahta cha, nama pahleipadia rairieh lei nawpata a chado teh u.

Thlahpa theilâpa nata sapa raihriana

16 He tana he ei tah, Thlahpa ta charei teh u, sapa aohraona cha pipatlohsa aw veih eichi.

17 Sapa khona heta Thlahpa a dyuh tyh, Thlahpa khona chhaota sapa a dyuh tyh tlôh hra ta; hmotao namâ chhuahpazy cha nama tao thei lei nawpata chazy cha a chakhia tlôh ta.

18 Châhrasala Thlahpa chhihthapata nama y khiahtala, ryhpa ry liana chata y veih eichi.

19 Chatawhcha hmotaopazy cha a lâ pasia; cha cha hezy he a châ: apatlana zy, pathaih leina zy, parâna zy,

20 nohthlahpa achhyna zy, dyuthaina zy, ahaona zy, ahryuna zy, hiatliana zy, pathi-iana zy, akhona zy, apananona zy, ngiapâna apananona zy,

21 hiatliana zy, sahma parina zy, atlaokalina zy hawhpa hih, chazy kyh liana chata cha hlâta cha hawhpa hmo a taotuhpazy chata Khazohpa Khihnarâh to aw veih ei, tahpa ei cha chhochhieliepa hawhna khata, ei cha chhochhieliepa ei he.

22 Thlahpa theilâpa deikua cha kyhpachâna zy, thaphana zy, adyhna zy, nôphana zy, ngiachhiena zy, phana zy, ngâchhihna zy,

23 reisina zy, a sohsina zy tlao a châ; cha hawhpa pakhânazie ta ryhpa biepiepa rai y vei.

24 Chatawhcha Krista Zisu chyhsazy chata sapa cha a molei pachâna nata a aohraona chhaota ama khaipâ haw.

25 Thlahpa ta a hrohpa eima châ khiahtala, Thlahpa ta charei hra ei suh u.

26 A pahao rairiehpata, a hnâchhao rairiehpata, a pasâhsa khah ei suh u. 

Kalatia Mozy (Galatians)

Bo 1	Bo 2	Bo 3	Bo 4	Bo 5	Bo 6

Kalatia Mozy 6

Kalatia Mozy 6

Phaohri adeichhy chyuna

1 Unawh saih u, chyhsa ta moleina kheihawhpa rai a tao nota pachhaipata y sala, a reisi ngaitapata padua teh u. Nâmo thlahpa chyhsazy saih u, reipasaopata nama y lei nawpata a vaih teh u.

2 Nama phaohripazy cha a phaokhei rairieh teh u, chatanachata Krista ryhpa bie cha nama zyh pakipa a châ aw.

3 Chyhsa khâpahma châ tlôh leipata anosasy ta molaipa ta a pachâ khiahtala, anosasy ta adopa châ tlôh ta.

4 Chyhsa tota ama hmotaopa tlao pasia chyu ei se; cha tina chata mo hropa chôta châ leipata, âmosasy chô lia deita ta a palaikhei awpa a hnei aw.

5 Chyhsa to ta âmo phao chyu phaoh tlôh aw ei ta.

6 Chyhsa bie pachupata a ypa chata hmo phapa zydua ta pachutuhpa cha bao hra mawh sy.

7 Dôpata y khah u; Khazohpa cha mohnao awpa rih châ vei, chyhsa ta a hiepa maih, cha tlai cha hria tlôh aw ta.

8 Ano sapa lâta a hietuhpa chata sapa lâtahpa raona hria aw ta; Thlahpa lâta a hietuhpa deikua chata Thlahpa lâtahpa chhâzaw hrona a hria aw.

9 Chatanachata hmo phapa tao ai khah ei suh u, eima diathlâ leipa khiahtala, a daihti ta hria tlôh aw pi ta.

10 Chatanachata rypaohna daihti eima hneipazie lymâ hawhta, chyhsa zydua chôta hmo phapa tao ei suh u, ngiapâna chhôhkhazy hrytahpa chô liata tao pachai ei suh u.

Zikyurâna chhâna nata byhnâ awna

11 Keima ku tlaita nâmo lâta hawrawh pahreipapi ta ei ropa he moh teh u.

12 Sapa liata ama hmia a papha khohpa maihta chopawtaipata y awpata ama cha pataosa tyh, khâpavâta hmah châ leipata, Krista kraws vâta taola ama tao lei nawpa deita a châ.

13 Chopawtaipazy tlai chhao chata ryhpa bie a ngiah tlôh leipa ei ta, nama pôhpa liata a palaikhei awpa ama hnei thei nawpata chopaw pataisa ama cha khoh.

14 Kei deikua chata eima Beipa Zisu Krista kraws leipata cha ei palaikhei lei awpazie cha, cha zawhzi na chata khizaw he kei châta khaipâpata a y haw, kei chhao khizaw châta khaipâpata ei y.

15 Taopathi heihna leipata cha chopawtaipa he khâpahma châ leipata, chopawtai leipa chhao khâpahma châ hra vei.

16 Cha ryhpa hawhta a ypa maih Khazohpa Izarel hmeiseihpazy chô liana chata adyhna nata ngiachhiena y mawh sy.

17 Atahmâ tawhna heta ahyhma ta na patypamâ khao khah se; ei pôhpa liana heta Zisu pahnosazy phaoh tlôh na ta.

18 Unawh saih u, Abeipa Zisu Krista ngiachhiena nama thlahpa hnohta y mawh sy. Amen. 

Kalatia Mozy (Galatians)

Bo 1	Bo 2	Bo 3	Bo 4	Bo 5	Bo 6