Hlazy Hla 1

Hlazy Hla 1

Myuh nata Zerusale sawchanônôzy

1 Hlazy hry liata hla pha chaipa," Sawlawmaw hla cha.

2 Na sy sala, a hmao syna chata! Na kyhpachâna cha kresawti hlâta a pha via,

3 na sathaw hniapa roh cha a pahâh tlaina, na moh cha rohpahâhpa baopa hawh a châ; chavâta laihsa zy ta kyh a cha pachâ ei.

4 Na patu la, thlai eimâ râ khoh aw. Abei chata a chhôhpadâhpa zy chhôh lâ einâ chhi. Nâma liata thapha ta aly aw pi; na kyhpachâna he eima reithai aw kresawti hlâta; kyh ama cha pachâ hmeihseih.

5 Hy Zerusale zuazy saih u, vyh chhei ha hraw sala, kho ei pao. Keda poh-ozy hawhta nata Sawlawmaw poh-raipazy hawhta.

6 Ei vyhpa vâta na mohnao khah u, noh ta eina la vâta a châ. Ei nô sawchapawzy ta ei chôta ama hiehâh ta, Kresahdô vaihtuhpa ta eina tao haw ei; keima kresahdô deikua vaih tlôh na va!

7 Na chho mah y, hy nâ ei kho nô y, na sahro hri khataih liata na pasa, nohchhô ta khataihta e na pahâsa; khazia kei ei viavi aw, na viasazy sahro hri khôlâ na cha?

8 Na pahno vei khiahtala, hy nâ chanô hropa hryta chhithai chaipa, sahro hri hniehnôh chathô laih la, na mie tawzy pasa la, mietahkuvaihtuhpazy poh-ozy kâ lâna cha.

Myuh nata myuhneituhpa

9 Ei cha pakho tyh, ei kyhpachâpa, Phirao talaili a daophituhpa arâ zeinô nata.

10 Na ozy cha â hmie tlai na, na pachhihzy chhao, na rao liata lôsôhpa rizy cha.

11 Ngôh pachhih eima cha taopa aw, tâkâri baipa chhaota.

12 Rakhô liata abei a tyu nota, ei spina rohpahâhpa cha a charao.

13 Ei kho ngaitapa cha kei châ myrby a châ, ei chachôhna a hniehpa hawhta.

14 Ei khonô cha kei châ he na paw hawh a châ Engedi kresahdô liatahpa cha.

15 Nâ ngia kaw dia ei khochai nô; pachâ teh, nâ ngia tlai na; na mozy cha vachhuh hawhta a châ.

16 Pachâ teh, ei kho chai nô, nâ ngia na, kho nâ pao hmeihseih tlai na. Eima rakhô chhao a hroh nôlô;

17 eima pâkôzy cha sidy tho, eima seihâh cha meisa tho. 

Hlazy Hla (Song of Solomon)

Bo 1	Bo 2	Bo 3	Bo 4	Bo 5	Bo 6	Bo 7
Bo 8

Hlazy Hla 2

Hlazy Hla 2

1 Sharaw rose paw ei vaw châ, saikao tlôma-u hawhta ei châ.

2 Ahloh hryta tlôma-u hawhta ei châ, cha hawhna cha ei khonô a châ, laihsazy hryta.

3 Thothi hryta apple tho hawh, ei kho paw a châ, satlia hry ta. A nohpahli ry ta ei tyu palôh tlâh ngaitapa ta, a theilâpa cha kei châ a thlôh tlai na.

4 Kyhchhina lâna cha kei nâ chhi ta, ei chôta a kyhpachâna poh a zawh.

5 Kre tla ta na pahro la, apple thei ta na pasa teh; kyhpachâna ta ei tha a zei.

6 A ku chavei lâ cha a bâh-lô pahuapa ta, a ku chachâh lâ chata nâ pyh tua se!

7 Hy Zerusale zuahzy y, ei châ haw chaimâh ei na, lyurâh sasu nata sakhi reipa ta, kyhpachâna cha pathyupa ta pahra hra lei awpa ta, ano ta a khoh hlâ lei cha.

8 Ei khochaipa ao cha, nahthlie teh, âvy hai na! Tlâhpizy liata a chapie-chalyupa ta, tlâh lia chhao chaki a zoh.

9 Ei khochaipa chata sakhi tlyma zuneidawpa tlyma a lyu. Moh teh, â duah thlâh haw eima pâhchhô pahlipa ta, opyzy liata â vaw mô, samokaw tawhta saipa ta.

10 Ei khochaipa cha a reih, ei hnohta: Thyu teh, kyhpachâpa, ei chhithaipa, a vy tua;

11 pachâ tua, chasipaw a chhâ haw, vâsua bâh ta a pai haw.

12 Alei liata pawpizy a vaw lâ ei ta, pavaw to sâ daihti a châ haw, eima râh liata vachhuh sâpa ao chhao.

13 Theikuzy thei patheipa ta, krezy a vaw pawh haw; ama rohpahâhpazy cha raopa ta. Thyu la, ei kyhpachâ, ei chhithaipa, a vy tua.

14 Hy ei vachhuh, lôpanô keipa liata a nyupa, lôkâhpa khua liata a ypa, na hmia na pahmô la, na ao na patheisa teh, na ao a pha na, na hmi hra cha pha tlôh.

15 Na patupa teh u, changie zy, changietaw zy, kresahdô a paraotuhpazy cha, eima kresahdô cha a paw lochô hai tlôh.

16 Ei khochaipa cha kei eih a châ, keichhao ano eih ei châ, tlôma-u paw bypi liana cha a sahroh hri a palaosa tyh.

17 Noh vaw nai ta, noh hawh a lei hlâ leina cha, ei khochaipa, tlâh sakhi, zuneih dawpa lâta vaw châ teh. 

Hlazy Hla (Song of Solomon)

Bo 1	Bo 2	Bo 3	Bo 4	Bo 5	Bo 6	Bo 7
Bo 8

Hlazy Hla 3

Hlazy Hla 3

Myuh chânazy

1 Zâ ta khôphei chô tawh ei rohpady, ei kyhpachâpa cha; tlua na ta, hmô tlôh na va; aw na ta, nâ chhy tlôh va.

2 “Thyu aw na ta, khihpi ngiathliah ei chahry tua aw, khiliah nata hawka to liana cha; ei tlua lymâ aw, ei kyhpachâpa,’ ‘tah na ta.Tlua na ta, hmô tlôh na va.

3 Khihpi vaihtuhpazy ta na hmô ei ta, khihpi ama chahlô nota. “Ei kyhpachâpa kha nama hmô ma?” tah na ta.

4 Âmo ei khô tawhna chata, ei kyhpachâpa cha ei hmô haw. Ei patu haw, pathlie khao aw va na, ei nâ o lâ ei tlôkhei hlâ lei cha, na phaohtuhpa chhôhpadâhpa liana cha.

5 Hy Zerusale zuahzy y, ei châ haw chaimâh ei na, lyurâh sasu nata sakhih reipa ta, kyhpachâna cha pathyupa ta pahrâ hlei awpa ta ano ta a khoh hlâ lei cha.

Myuh hneina alyna

6 Ahymaw râhpathohpa tawhta meikhuh aduahpa hawhta a vypa he, myr nata deiryh roh ta a charao ngâpa cha, sôhdaotuhpa pôdâh rohpahâhpa zydua tlupa cha?

7 Moh tua, Sawlawmaw a syna talaili cha! Riahphapa sycharu ta ama dôh Izarel riahphapazy hryta zy cha,

8 ama zydua ta zaozi a vao ei ta, ama chakhai lia, zâchhôh chichhihna vâ heta.

9 Abei Sawlawmaw chata a châta asyna byh a tao Lebanaw thozy hry tawhtapa cha.

10 Tâkâ ta a tozy tao ta, a hneina cha ngôh ta, a chhôh cha khochhih ngaitapa ta ama paryh Zerusale zuah zy chata.

11 Hy Zaio zuah y, thlai sie la, Abei Sawlawmaw cha moh teh u, a nô ta lakho a pakhopa kha a lahpinô hneina noh, a palôhrupa aly chaina noh châ ta. 

Hlazy Hla (Song of Solomon)

Bo 1	Bo 2	Bo 3	Bo 4	Bo 5	Bo 6	Bo 7
Bo 8

Hlazy Hla 4

Hlazy Hla 4

Myuhneituhpa ta myuh a reithaina zie

1 Pachâ teh, ei kyhpachâpa y, nâ ngia tlai na, aw nâ ngia tlai na! Na mo ta vachhuh a lyu na khuna poh ry tawh. Na sâ cha mie hri, Kilia Tlâh liata a byupa hawh a châ.

2 Na hâhzy cha mietahkupa panô hri hmi ngyupa, pasi thiehpa tlaina a lyu, ama zydua ta taw pô no hnei chyupa ta, ama hryta a hnei leipa rai y veih ei.

3 Na hmao cha pala saihpa a lyu, na pakah chhao kho â chhih. Na ôhkhaih ta pawmikranat patlawpa a lyuna khuna poh ry tawh.

4 Na rao cha Davi o sapa a lyu, chaihrai sona châta taopa cha, vyhphao sâ kha ama baih, riahphapazy vyhphao tlai cha.

5 Na sâhpi miano heta sakhi dawpa pô no a lyu, sasu ta taw a phiehpa, tlôma-u zy hry liana cha.

6 Nô nai ta, noh hawh a lei hlâ lei cha, ei pangai lymâ aw myr tlâhpi nata deiry tlâh lâna cha.

7 Nâ ngia paki tlai na, ei kyhpachâpa; seitiana rai y va chi.

8 Lebanaw tawhta a zu mah y, ei myuhnô; Lebanaw tawhta a zu mah y. Amana laki tawhta vaw pua la, Senira nata Hamaw laki tawhna cha, chakeibarôhneipazy lôpu tawhna khawh, keichhozy tlâh tawhna chhao chata.

9 Ei palôh na pahnie haw, ei sietanô, ei myuhnô, ei palôh na pahnie haw, na eikha mopa ta, na rao liata lôsôhpa chhei kha khata.

10 Na kyhpachâna a thlôh zie cha, ei sietanô, ei myuhnô! Kresawti hlâta na kyhpachâna a pha via zie rimâ cha, rohpahâhpa zydua hlâta a pahâh syulyu, na sathaw roh cha!

11 Hy ei myuhnô, na hmao tawhta a thlao; kheihti nata sâhpiti nah reikah phapa cha; na chysia rôh cha Lebanaw rôh a lyu.

12 Ei kyhpachânô cha sahdô khawpa hawh a chô, ei myuhnô cha sahdô khawpa, tihnawh khawpa cha.

13 Kho nâ chhih zie, pawmikranat su hawhta na châ, thei phapa to puana cha hena nata spina zy,

14 spina nata iasamaipa, basu rohpahâhpa nata lôiasoh, deiry chi to chhao, myr nata alôs, rohpahâh pha chaipa cha.

15 Sahdô tikhaoh, tikhaoh reipa ti hrohpa cha na châ, Lebanaw tawhta vatie zy a lohpa cha.

16 Hra la, hy maw thlih, a vy teh, hy chho thlih! Ei sahdô he vaw hmô ula, a rohpahâhna charao mawh sy. Ei khochaipa cha a sahdô liata a vaw ngia sala, a thei pha chaipazy cha nie mawh sy.

Hlazy Hla (Song of Solomon)

Bo 1	Bo 2	Bo 3	Bo 4	Bo 5	Bo 6	Bo 7
Bo 8

Hlazy Hla 5

Hlazy Hla 5

1 Ei sahdô liana cha a ngia na ta, ei sietanô, ei myuhnô, ei myr nata ei rohpahâhpa zy lapakhy na ta, ei kheihti nata kheihthlaw nie na ta, ei sâhpiti nata kresawti chhao ei doh. Hy ei viasa zy, nie ula, doh teh u; thata doh teh u, hy khochaipa zy!

Achhaihna a pasana zie

2 Azia na ta, ei palôh deikua cha a hra thlâh ha ta. Nahthlie tua! Ei khochaipa ta a vaw chakhy chu. “Na pahy la, ei sietanô, ei kho nô, ei vachhuh, ei lyna pakituhpa; ei luh diati ta dâ khai ta, ei sâ riasiepa zâ diati a tlapa zy chata a pahnasa,” tah ta.

3 Ei chysia ei pahluh haw, khazia ei ky aw? Ei phei ei si haw, khazia ei papua aw?

4 Ei khochaipa cha opyu tawhta a ku a vaw chahrao, ei palôh thata eina hria chhôhso lia.

5 Ei khochaipa ochhi pahy awpa ta ei thyu, ei ku cha myr ta â thlao ngâ, ei kuparoh chhao myr ta a zi ngâ, ochhi hraina chô liana cha.

6 Ei khochaipa châta pahy na ta; châhrasala ei khochaipa cha sihnôh a kua, ei palôh tao thei vei, a kua hapa cha, ei tlua lai, tyh tlôh na va; awh na ta, nâ chhy tlôh va.

7 Khihpi vaihtuhpa zy khihpi a chahlôpazy ta na hmô ei ta; na tu ei ta, hmah eina paphao ei, kuh dôna vaihtuhpa zy ta ei chysia ama pahluh.

8 Hy Zerusale zuahzy y, ei châ haw chaimâh ei na, ei khochaipa kha nama hmô khiahtala, kyhpachâna ta zeipa ta ei y tahpa chho muh vy.

Myuhta myuhneituhpa a reithaina zie

9 Chyhsa hropa hlâta na khochaipa cha kheihta e a y pachai, hy chanôzy hryta a chhithai pachaipa? Chyhsa hropa hlâta na khochaipa cha kheihta e a y pachai, cha tlupo ta maniah nâ hawpa cha?

10 Ei khochaipa cha a thisaih tloh chai na, thy kha hryta a chônô pachai.

11 A luh cha ngôh suapa; a sâ ria cha ra-awh vyhpathliepa hawh.

12 A mokhaoh zy cha chavah zy ti kiah vachhuh hawhta sâhpiti ta a sipa, a sia ngaitapa ta a tyuhpa cha.

13 A ôhkhaih zy cha rohpahâh su rohpahâhpa a papua tyhpa a châ. A hmaozy cha tlôma-u paw hawh, myr ti ta a di â ngieh.

14 A kuzy cha ngôh pahlypa. lôsôhpa pahupa hawhta a châ. A pôhpa cha sianaoh, saphai lô tobipa hawhna tlai cha.

15 A pheizy cha alabasta lô, â tyuna ngôh paryhpa. A thyutô Lebanaw hawhta, sidy thopha chaipa hawhpa cha.

16 A reikah a thlôh tlai na, kho â pao tlai na. He he ei khochaipa a châ, he he ei viasa a châ. Hy Zerusale zuah zy y. 

Hlazy Hla (Song of Solomon)

Bo 1	Bo 2	Bo 3	Bo 4	Bo 5	Bo 6	Bo 7
Bo 8

Hlazy Hla 6

Hlazy Hla 6

1 Na khochaipa cha khataih lâ e a sie haw, hy chanô hryta, atlai chaipa? Khataih lâ ma na khochaipa sihnôh a kua tly, keimo chhaota duah eima cha tluakhei tua awpa tlai?

2 Ei khochaipa cha a sahdô lâ a zu, rohpahâhpa su lâ, sahdô liata a sahroh hri a patlaisapa nata a tlôma-u lyu awpa ta.

3 Ei khochaipa eih cha châ na ta, ei khochaipa cha kei eih a châ; tlôma-u paw hryta a sahroh hrizy a patlaisa.

Myuh hneituhpa ta myuh reithaina zie

4 Nâ ngia tlai na, hy ei kyhpachâpa, Tirza, na lyu, Zerusale khihpi tluta kho nâ chhih, pheisaih hri hawh chi nâ chhih.

5 Keima tawhta na mo la ha la, eina paty ngâsâ hih—Na sâ ria ta mietôhpa hmi a lyu, Kilia tlâh tawhta a za chôpa cha.

6 Na hâhzy cha mietahkupa panô hri pasi thiehpa hawh a châ, ama zydua ta taw pôno hnei chyupa ta, ama hry liata a hnei leipa rai y veih ei.

7 Na ôhkhaih zy cha pawmikranat patlawpa hawh a châ, na khuna ry tawhna cha.

8 Abeinô sycharu nata nôtho sycharu ama y, laihsa rei tiah leipa chhaota.

9 Ei vachhuh la, pakha deina a châ, seina hnei leipa cha, a nô ta sawchanô a hnei chhôhpa, a satuhpa mo pasai leipa cha. Chanô zy ta ano hmô ei ta, nohhlao ama tah; abeinô zy nata nôtho zy chhao chata ama reithai tyh.

10 “Ahy tlyma my khihdei phapa hawhta a vaw lapa kha, chôthlahpi hawhta panyupa nata noh-lyno hawhta khaihpa cha, pheisaih hri hawh chi a chhihpa cha?” tah na ta.

11 Thei hyh châpa su lâna cha zu na ta, bypi paw ngiana sai awpa ta, Kre a pabyu tlyma, pawmikranat a pawh tlyma mo awpa ta.

12 Aminadi talaili zy liata ei khona chata ei pahno vei chhôhta eina soh.

13 Kua la, kua la, hy Shula chyhsa, kua la, kua la, eima cha sai tuana hâh ta. Khazia Shula chyhsa na sai thlâh haw, Mahanai lâzie hawhta ngâsâ ta? 

Hlazy Hla (Song of Solomon)

Bo 1	Bo 2	Bo 3	Bo 4	Bo 5	Bo 6	Bo 7
Bo 8

Hlazy Hla 7

Hlazy Hla 7

1 Pheiky nâ kypa nâ tlai rimâ cha, hy Abeinô sawchanô y! Na byhpi zy cha lôsôhpa lyu ta, zôthaipa ku hria hawh tlai ta.

2 Na paliah hra biehbu patyuna kresawti pahlao chiehpa a phahla beih leipa. Na py cha sâh thlu a lyu, tlôma-u paw ta a chadôpa cha.

3 Na sâhpi miano cha sakhi dawpa pô no a lyu, sakhi ta taw a phiehpa hawhta.

4 Na raota sianaoh o sâhpa a lyu, na mokhaoh zy cha Hesbaw liata tipo Barabi chhikao a ngiana a lyu. Na hnapasu Lebanaw o sâhpa a lyu, Damaska saina lâ khawh.

5 Na luh cha Kamel tlâh a lyu, na luh sâ cha nohsaihpapa; sâ a ngiapa liata abei cha a ao haw ta.

Myuh nata myuhneituhpa amâ tlaichhai rairiehna

6 Na chhithai zie nata palôh na patlâh zie he, hy kyhpachâpa, alyna zy hryta!

7 Na pôraoh cha thiahrakô a lyu, na sâhpi zy ta a thei sao a lyu.

8 Bakô tho kiah aw na ta, a chiahzy ei patu aw, tah na ta. Aw! na sâhpizy ta kre sao lyu sala, na husopa ta apple lyu sala,

9 na synazy kresawti pha chaipa hawhta a loh nai zyly ta, amôpa hmao chôta loh mawh sy.

10 Ei khochaipa eih châ na ta, keima liata a chhôhso a pahnie.

11 Ei khochaipa y, a vy tua la, râh lâ pua khoh tua ei si, thotlâh khizy lâ a rie tua ei sih la;

12 my ta kresahdô lâ charei tua ei si, kre cha a pabyuh ma, duah moh tua ei sih la, kre paw cha pakaipa ta, pawmikranat cha a pakai tlyma. Cha liana cha ei kyhpachâna ei chapie aw.

13 Kho-iah chata rohpahâhpa papua ta, eima ochhi thaby liata thei phapa to a y. A thiehpa nata a parohpa chhao, hy khochaipa y, na châta ei cha khaipa thlâh haw. 

Hlazy Hla (Song of Solomon)

Bo 1	Bo 2	Bo 3	Bo 4	Bo 5	Bo 6	Bo 7
Bo 8

Hlazy Hla 8

Hlazy Hla 8

1 Hy rilâhpa, ei nô sâhpi pazylâhpa nâ châ mawh la! Khôtho liata ei cha hmôpa chhaota ei cha sy aw, ahy hmahta na reipachhie aw veih ei.

2 Cha dy aw na ta, ei nâ o lâna cha ei châ chhi aw, ano ta ei naw pachu awpa tlai. Kresawti rohpahâhpa ei cha pado aw, ei pawmikranat thei tipa tlai cha.

3 A ku chavei lâ cha bâh-lô pahuapa ta, a ku chachâh lâna chata nâ pyh tua se!

4 Hy Zerusale zuah zy, ei châ haw chaimâh ei; kyhpachâna cha pathyu leipa ta, pahrâ hra lei awpa ta ano khota a hra hlâ lei cha.

Kyhpachâna cha thina tluta thatlôpa a châ

5 Ahyma a châ, râhpathohpa tawhta a khy ta, a khochaipaw a hnieh thlâh hapa he? Apple tho ry liata cha pahrâ na ta, na nô ta a cha zeina liana khata, cha liana cha châ satuhpa ta a cha zeina lia khawh.

6 Na chachôhna liata chahnaona hawh na paysa la, na ku liata chahnaona hawh nâ ky la; kyhpachâna cha thina tlu thatlô tlôh, nohkâna cha thlâ hawh a nôchhie. A paleih kâpa cha mei paleih hawh châ ta, mei thata kâpa hawhna cha.

7 Ti hluhpi chhaota padia thei vei, kyhpachâna he la tilaipa chhaota vao thei vei. Chyhsa ta a ochhôh hneina zydua a kyhpachâpa vyuhpa ta pie sala, mohnaopa ta a y thlyu aw.

8 Sietanô chyhpa ta hnei pi ta, a sâhpizy pabyu mâh vei. Eima sietanô chata khâpa e eima taopa aw, ano chata tha ama hiah no cha?

9 Ano cha thokhy châ thei sala, tâkâri thokhy eima taopa aw; ano cha ochhi a châ khiahtala, Sidy thophia ta eima dôh aw.

10 Thokhy cha ei châ tlai mâ tâh, ei sâhpizy chhao thokhy a lyu; a mohmô liana cha thlahlôhna hneituhpa ei vaw châ.

11 Sawlawmaw cha Beihamaw liata kresahdô a hnei; mokhâhtuhpazy hnohta a pavaisa; chyhsa tota ama vaw la awpa theilâpa ty tâkâ sâh kha.

12 Ei kresahdô, keima ei cheingei, keichâ tlai a châ; Hy nâ Sawlawmaw, nâ cha sâhkha hnei chi ta, sahdô vaihtuhpa zy deikua za no.

13 Sahdôzy liata a pahrâ tyhpa y, ei viasazy chata na ao nahthlie ei ta; na nahthliesa hra mah y.

14 Ei khochaipa y, a parah la, sakhi nata sasu taw hawhna cha châ mah y, tlâhpi rohpahâhpazy liana cha.

Hlazy Hla (Song of Solomon)

Bo 1	Bo 2	Bo 3	Bo 4	Bo 5	Bo 6	Bo 7
Bo 8