Hebrai Mozy 1

Hebrai Mozy 1

HEBRAI MOZY HNOHTA CHÂ PAPHAOPA

Khazohpa ta a Sawchapawpa hmâpata biereina

1 Khazohpa, hlâno ta maniah pathlatuhpazy hnohta ei hluhpi nata kyh tota hrohsopazy ta bie a vaw reituhpa khata;

2 he noh chhâna liana heta keimo hnohta a Sawchapawpa liana chata bie a reih haw. Khazohpa ta ano cha ato ryutotuhpa ta rao ta, ano zawhzi ta khizaw cha tao ta.

3 Sawchapawpa cha Khazohpa rônahna ta khaih ta. Khazohpa chhichâna a lyupa tlai cha ta, ano hmotaotheina bie ta ato patu ta. Moleinazy a pathai khai tawhta, chô lâta rônah chaipa chachâh lâna khita a kaw tyuh ta.

Sawchapawpa cha vâlyuhchâpazy hlâta a rônah via

4 Sawchapawpa cha vâlyuhchâpazy hlâta moh pha viapa Khazohpa ta a patosapa hawh tlaita âmo hlâta rônah viapata vaw châ haw tlôh ta.

5 Khazohpa ta vâlyuhchâpazy hry liata ahy hnohta hmahta he biezy he reih beih vei,“Nâ la, ei Sawchapawpa na châ, atanoh he na Paw ei châ,” “Ano châta paw châ aw na ta, ano cha ei châta Sawchapawpa a châ aw,” tahpa hih.

6 Khazohpa ta Sawchapawpa, saw tuapa cha khizaw liata a tuah nota,“Khazohpa vâlyuhchâpa zydua chhaota ano a naoh mawh sy,” tah heih ta.

7 Khazohpa ta vâlyuhchâpazy kyh liana chata he tana heta a reih, “Ano chata a vâlyuhchâpazy cha thlih ta pachâsa tyh ta, a chakaotuhpazy chhao mei paleih ta a pachâsa tyh,” tahpa hih.

8 Sawchapawpa kyh liata deikua cha he tana heta a reih, “Hy Khazohpa, na beidyuchhai cha chhâzaw ta a y awpa a châ, siana chôhchahrei chhao cha na khihnarâh chôhchahrei cha a châ.

9 Siana cha pasô chi ta hmoparaona cha nâ hao; chavâta Khazohpa na Khazohpa chata,na viasazy hlâna chata thaphana thaw thata a cha thu hih,” tahpa nata

10 “Nâ, Abeipa y, a thao tuana liata aleilô bôna bô haw chi ta, avâzy chhao na kuzy hriana a châ;

11 chazy cha leidia aw ta, nâ deikua a y palâh awpa na châ; cha zydua cha chysia hawhta paro aw ta,

12 poh hawhta chaty hra aw chi ta, chysia hawh tlaita a vaw nano ha aw. Nâ deikua cha na ualua ta khâ y chi ta,na kôzy chhao chhâ beih aw vei.” tahpata.

13 Khazohpa ta a vâlyuhchâpazy hry liata ahy kyh liata ma he tana heta a reih, “Na khakhaipazy na phei tlyna ta ei tao hlâ lei la, ei chachâh lâta a tyuh teh,” tahpa hih.

14 Âmo zydua ta chakaona thlahpazy, pachhana ryutotuh awpazy châta chakao awpata tuapa châ vei ei mâ? 

Hebrai Mozy (Hebrews)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10	Bo 11	Bo 12	Bo 13

Hebrai Mozy 2

Hebrai Mozy 2

Cha tluta pachhana rônahpa

1 Chavâta nahkhao ta eima theipazy kha phahnai khoh ngaitapata eimâ papeisa pachaih awpa a châ, chata leipata la eimâ sy pathlei aw na.

2 Vâlyuhchâpazy hmâpata bie reipa hmah kha a vaw ipata, hmoparaona nata rei ngiah leina tozy chata viarithôna sia ngaitapa a hmô lymâ tlôh khiahta cha,

3 he tlatluta pachhana rônahpa he diathlâ ei sihla, kheihta e eimâ boh thei aw? Cha pachhana bie a thaona liata Abeipa hmâpata reipa châ haw ta, a pahnotuhpazy chata maniah pa-ipa ei ta.

4 Khazohpa chhaota pahnonazy nata hmonoâhpazy nata hmotaotheina to chhaota ano khopa lymâ hawhta Thlahpa Pathaihpa hmo raipazy chhao chata âmo cha pahnokhei ta.

Pachhana a pietuhpa

5 Khizaw a vaw y awpa a thâtih eima reipa cha, vâlyuhchâpazy ry liata soh vei.

6 Châhrasala chyhsa ahy tlyma chata khataih liata tlyma he biezy he reipata tlao a pahnosa, “Chyhsapa he khâpa ma châ ta, nâ thei thlâh ha tyh tly? chyhsa sawchapawpa chhao he, khâpa ma châ ta na hmô tyh tly?

7 Ano cha vâlyuhchâpazy hlâta a hnai viapata tao chy chi ta, rônahna nata palyupalihna pakhosa chi ta,na ku hriapa chô liana zy chata hyutuhpa ta tao hra chi ta,

8 a phei ry liata ato soh chi ta.” tahpata. Chatanachata ato a ry liata a sopa vâta a ry liata so leipa khâpahmah y vei. Châhrasala atahmâ la ato a ry liata a ypata hmô mâh ma pi.

9 Châhrasala Zisu, vâlyuhchâpazy hlâta a hnai viapata tao chypa cha, thina pasa tao vâta rônahna nata palyupalihna pakhosapata ypata tlao eima hmô, Khazohpa ngiachhiena zawhzi ta thina cha chyhsa to châta a pachâ nawpata.

10 Ano châta ato ypata, a zawhzi ta ato a y hrapa châna chata, saw hluhpi rônahna lâta a chhihtha khiahtala, ama pachhana a taotuhpa kha pasa taonazy vâta pakipa cha â ngiapa rai châ tlôh ta.

11 Pathaisatuhpa nata pathaisapazy cha ama zydua ta mo pakha tawhta a puapa châ tlôh ei ta. Chavâta Zisu chata âmo sahlao cha unawhzy tah awpata a no za vei.

12 Ano chata, “Ei unawhpazy hnohta na moh chho aw na ta, ahmaohpakhypazy hry liana chata hla sapata ei cha reithai aw,” tah ta.

13 “Ano liata ei ngâna ei pahnieh aw.” tah heih ta. “Moh teh u, kei nata Khazohpa eina piepa sawnawhzy hih,” tah heih hra ta.

14 Chatanachata sawnawhzy he sapa nata thisaih a topazy ama châ chyupa vâta, ano tlai chhaota chazy cha to haw hra ta, thina ta thina biehneituhpa, cha cha ahripa a châ, a pahleipadia thei nawpa nata,

15 thi riah chi vâta hro chhôhta sei ta a ypa zydua cha a pachha thei nawpata.

16 A chakhei tyhpazy cha vâlyuhchâpazy châ tlôh leipa ei ta. Abaraha pathlazy cha tlao a châkhei tyhpa a châ.

17 Chyhsazy chata molei reiphacheina tao awpata, Khazohpa lâ hmozy liana chata theihthai beichaipa chyhsa thapasana a hneipa nata ngâchhih ngaitapa a châ thei nawpata, ato liata a unawhzy hawhta a vaw y awpa cha ano châta a byuhpa rai a châ.

18 Ano tlai chata reipasaona a tyhpata pasa a vaw tao hawpa vâta reipasaona a tyhpazy cha a châkhei thei. 

Hebrai Mozy (Hebrews)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10	Bo 11	Bo 12	Bo 13

Hebrai Mozy 3

Hebrai Mozy 3

Zisu cha Mawsi hlâta a rônah via

1 Chavâta unawh pathaihpa, vârâh awna a to hrapazy saih u, eima biezyhpa Apôstôl nata Theihthai Beichaipa, Zisu cha pachâ teh u.

2 Khazohpa chhôhkha zydua hry liata Mawsi ngâ a chhihpa hawhna hra khata, ano cha raotuhpa liana chata ngâchhihpa a châ.

3 Chhôhkha pawhrâhpa cha a chhôhkhazy hlâta ama palyupalih viapa hawh tlaita, ano cha Mawsi hlâta rônah pachaina hmô tlâh châpata raopa châ haw tlôh ta.

4 Chhôhkha to heta pawhrâhpa ahy tlyma chhâ hnei chyu tlôh ei ta, ato pawhrâhpa deikua cha Khazohpa a châ.

5 Cha hnôh lâta bie rei awpazy pahnosa nawpata. Mawsi cha Khazohpa chhôhkha zydua hry liata chakaotuhpa hawhta ngâchhihpa tlai châ ta,

6 Krista deikua cha Khazohpa chhôhkhazy chôta Sawchapawpa hawhta ngâchhihpa a châ. A chhôhkhazy cha keimo eima châ, a chhâna taihta eima riaphana nata eima hnabeiseina a palaikheina he â i ngaitapata eima patu hnokua ta cha.

Khazohpa chyhsazy châta pahâna

7 Thlahpa Pathaihpa reipa hawhta. ‘Atanoh he a ao nama thei khiahtala,

8 râhpathopa liata reipasaona nota a ru ama pachhôpa hawhna khata, nama pathipalôh pachyu khah u.

9 Cha liana chata nama pathlatuhpazy chata na pasiapata, na reipasao ei ta, kô sypalih chhôhta ei hmotaopazy cha hmô ei ta.

10 Chavâta cha chhâ sahlao chô liata ei palôhtlâh leipata, Ama pathipalôh ta khâ pachâ pasi tyh ei ta. ei lahpizy chhao pahno veih ei,’ tah na ta.

11 Ei hiehâhpata chhie ei sapa hawhna khata. ‘Ei pahâna liana chata a ngia aw veih ei.’ tahpata”.

12 Unawh saih u, a chado teh u, chata leipata la Khazohpa hropa cha bâhsai awpata nama hry liata ahy chhôh liata rai ngiapâ leina pathipalôh moleipa a vaw y pathlei aw na.

13 “Atanoh,” ama tah chhôhna heta nohcharei ta a pasyu rairieh teh u, chata leipata la nama hryta ahyrai he moleina dôna liata kuchhapata nama y pathlei aw na.

14 Krista a totuhpazy châ haw tlôh pi ta, eimâ ngiapâ chhâpa a thaona kha a chhâna taihta â i ngaitapata eima patu hnokua ta cha.

15 He he Khazohpa châ bie reipa a châ: “Atanoh he a ao nama thei khiahtala. a ru ama pachhô no hawhna khata. nama pathipalôh pachyu khah u,” tahpata.

16 Cha khiahtala ahyzy ma pahno thlâh ha tlôh ta ru apachhôpa ei kha. Izi râh tawhta Mawsi chhihthapata a puapa zydua kha châ veih ei ma?

17 Ahyzy chô liata ma kô sypalih chhôh ta a palôh a tlâh leipa kha? A paraotuhpa, ama ri râhpathopa liata a paopazy chô liana khata châ vei mâ?

18 Chatawhcha rei ngia leipazy hnohta dei leipata cha, ahy hnohta ma a pahâna liata a ngia lei awpata chhiesapata bie a taih?

19 Chatanachata ngiapâ leina vâta a ngia thei* khao veih ei, tahpa eima pahno. 

Hebrai Mozy (Hebrews)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10	Bo 11	Bo 12	Bo 13

Hebrai Mozy 4

Hebrai Mozy 4

1 Chavâta chi ei suh u, chata leipata la pahâna liata a ngiana bietaipata y thlâh ha tlôhpata, nama hry liata ahyrai tloh leipa hawhta nama y pathlei aw na.

2 Ama hnohta chhopa a châpa hawhna hra khata. Thâtihpha eima hnohta chhopa châ tlôh ta; châhrasala ama bie nahthliepa chata âmo paphahnaisa tlôh lei khâh ta. nahthlietuhpa hmeiseihpazy nata ngiapâna liata pazaopata ama y leipa vâta.

3 Keimo ngiapâ hawpazy pi he, cha pahâna liana chata eimâ ngia hai hih. “Ei hiehâhpa ta chhie ei sapa hawhna khata, ‘Ei pahâna liana chata a ngia aw veih ei,’” tahpata a reipa hawna khata, aleilô bô tua no tawhta raizy cha palohpa a châ ha tarawpata.

4 Khataih su liata tlyma, nohsari noh kyh he hawhta a reih mâ tâh, “Nohsari noh liana chata Khazohpa ta a raihria zydua a pahâsai haw ta,” tahpata.

5 A machhua liata eima rei hapa hawhna khata. “Ei pahâna liata a ngia aw veih ei,” tah heih ta.

6 Thokha cha pahâna liana chata amâ ngia awpa kyh a ypa vâta nata eikhano ta Thâtihpha chhopa a theituhpazy cha ama zyh leipa vâta a ngia leipata ama y hawpa vâta,

7 bohpi tawhna khata Davi liana chata, “Atanoh he,” tahpata noh kheihawhpa tlyma a rao chanei heih. “Atanoh he a ao nama thei khiahtala, nama pathipalôh pachyu khah u,” tahpata cha hlâta ei reipa hawhna khata.

8 Zawsua chata âmo sahlao cha a pahâsa haw tlôh khiahta cha, cha hnôh lâna chata noh hropa kyh cha reih aw vei.

9 Khazohpa chyhsazy châna chata pahânoh ta pahâna khâ y thlâh ha ta;

10 a pahâna liata a ngia hawpa cha Khazohpa ta ano raihriazy a pahâsaipa hawhna khata, cha chyhsa chhao chata a raihriazy a pahâsai haw hra ta.

11 Chatanachata ahyhma châ ngiapâ leina pamosana hawhta ypata, ama pao lei nawpata cha pahâna liata a ngia awpa chata phahnai khoh ei suh u.

12 Khazohpa bie he hroh ta, hmotao thei ta, zaozi ko nata hâh a tiah rairiepa hlâ chhaota tiah ta, hrona nata thlahpa, ru nata lathli pachhaih theina taihta chhô thei ta, pathipalôh liata pachâna nata a chhuahpazy he thlai a pahno thei.

13 Hmotaopa ano mohmô liata a lâ leipa y vei. Eima thâtih eima tlôkheina awpa mohmô liana chata ato thluahruapa nata pahy chiehpata tlao a y.

Zisu theihthaipa abei rônahpa

14 Chatanachata avâzy liata a sie palâh hawpa theihthai beichaipa rônah ngaitapa, Zisu Khazohpa Sawchapawpa cha eima hneipa vâta eima biezyhpa he khâchâ a pyh ei suh u.

15 ‘Theihthai beichaipa eima chieh-leinazie a pahnonazy maniah a pahnokhei leipa a hneipa châ tlôh lei khâh pi ta, keimo hawhta ky to liata reipasaona a tyh hawpa, molei deikua a molei leipa tlao eima hnei.

16 Chatanachata zawngiahna eima hmô thei nawpa nata bao eimâ ngiah tita, baona ngiachhiena eima hmô thei nawpata, ngiachhiena abeidyuchhai cha riahpha ngaitapata a hnia ei suh u. 

<

Hebrai Mozy (Hebrews)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10	Bo 11	Bo 12	Bo 13

Hebrai Mozy 5

Hebrai Mozy 5

1 Theihthai beichaipa maih, moleipazy vâta hmopiepa nata atheihnazy ama hlâ pabao thei nawpata chyhsapa hry liatahpa pananopata ypata Khazohpa lâ hmozy liana chata chyhsapazy châta raopa châ tyh tlôh ei ta.

2 Chazy chata khâpahma a pahno leipazy nata lâpi a pahleipazy chô liata nôphapata ama y thei tyh, âmo tlai chhao chieh-leina chadôpata ama y hrapa vâta.

3 Cha vâna chata chyhsazy chata ama hlâpa hawhta âmo châ tlai chhao moleinazy vâta a hlâ hra awpa a châ.

4 Ahyhma ta cha palyupalihna cha âmosasy ta a bai beih veih ei, ano cha Khazohpa awpa châ ta, Arawna hawhta.

5 Cha hawhna hra chata Krista chhao cha theihthai beichaipa ta tao awpata, anosasy ta a parônahsa vei. Cha vyuhpata Khazohpa ta a hnohta, “Nâ la, ei sawchapawpa na châ, atanoh he na Paw ei châ,” tahpata, tlao a parônahsa;

6 ano ta su hro lâta tlao reih heih ta, “Nâ la, Melkizedeka yzie hawhta chhâzaw ta theihthaipa na châ.” tahpata.

7 Zisu chata a sapa phao nozy liana khata, thina tawhta ano a pachha theituhpa lâna chata thata awpa nata mothlih tlana chôta thlahchhânazy nata hianazy hlâ ta, Khazohpa zana vâta nahthliepata y hra ta.

8 Sawchapawpa hmah châ hrasala, a hmo pasa taopazy liana chata reingiahna a chu haw.

9 Ano cha pha pakipata a y nota, a bie a ngiapa zydua chata chhâzaw pachhana thabypa a vaw châ haw,

10 Melkizedeka yzie hawhta theihthai beichaipa ta Khazohpa ta bi ta.

Paosaina zikyurâna

11 Cha thâtih liana chata bie hluhpi rei awpa hnei pi ta, chhopasia chhao a ru, nama nah a pâpa vâta.

12 A daihti pachâpata cha pachutuhpa châ ha awpa nama châ tarawpata Khazohpa bie thabypa pachu byuh haw heih eichi ta. Lao châpa châ leipata, sâhpiti a ngiahpa hawhta tlao nama châ hih,

13 sâhpiti a ngiahpa maih chata siana kyh liana heta pahnona hnei tlôh lei khâh ei ta, hawsai ama châpa vâta.

14 Lao châpa deikua cha pitlohpazy châta a châ. Chazy chata khâ ama hmâpa vâta pha nata chhie pasia nawpata ama pahno theinazy cha ama hmâh haw. 

Hebrai Mozy (Hebrews)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10	Bo 11	Bo 12	Bo 13

Hebrai Mozy 6

Hebrai Mozy 6

1 Chatanachata Krista bie thabypa chho khao leipata, machâ lâ pangai ei suh u, hmotaopa thiehpa rona zy,

2 Khazohpa lâta ngiapâna zy, bâtina zy nata ku pahniehpa nata athihpa thyutheina nata chhâzaw ryureina kyh lâ pachunazy lôbô cha bô heih khao leipata.

3 Khazohpa ta a ryh a tah khiahtala cha cha eima tao tlai aw.

4 Ei kha no pavâpata, avâ hmopiepa padipata. Thlahpa Pathaihpa patosapata.

5 Khazohpa bie phapa nata daihti a vaw y awpa liata hmotaotheina padi haw ta.

6 a paosaipazy kyh cha, chazy cha ama ro nawpata tao pathi theipa rimâ châ veih ei. Khazohpa Sawchapawpa cha âmo châta khaipâ heipata a pamaohphyupa ama châpa vâta.

7 Alei, a chô liata vâsua ti a tla tyhpa cha doh hawpata, chyhsa ta ama hria pâpazy chata âhnalasi nie tiah châpa a vaw papuatuhpa chata Khazohpa tawhta byhnâ a hmô tyh.

8 Châhrasala ahloh nata bobawzy a papua khiahta cha hnypata vaw y ta, chhiesapa hriana vaw châ tyh ta; a chhâna lâta cha mei ta rao awpa a châ tyh.

Hnabeiseina pahno pasiana

9 Châhrasala kho ngaitapa saih u, cha hawhpa kyh rei hra ei sihla, nâmo tala cha hawhpa hmo hlâta hmopha viapa, pachhana liata a hlaopa hmozy cha, nama tao awpa eima cha pangiasa.

10 Nama raihria nata â mo chôta kyhpachâna nama pasuasapa, mopathaihpazy nama chakaopa, atahmâ taih chhaota nama chakaopa cha, my awpata Khazohpa cha a sia leipa châ tlôh leipata.

11 A chhâna taihta hnabeiseina pakipa hmô awpata nama tiama tyhpa hawhna khata, tiama khâ papua chyu ula, eima tah ngaita.

12 chatanachata diathlâ leipa aw eichi ta, ngiapâna nata hâ hohna vâta bietaipazy ryu a to hawpazy hâ a lapa sahlao tlao nama châ aw.

Khazohpa bietai siapa

13 Khazohpa ta Abaraha hnohta bie a vaw taih nona khata, ano hlâta a rônah viapa reipata a chhie a sa thei leipa vâta anosasy a reipata.

14 “Byhnâ cha awpa tlai aw na ta, ei cha papôh tlai aw,” tahpata chhie sa haw ta.

15 Abaraha cha tiama ngaitapata pasa a tao khai tawhta bietaipa cha hmô haw tlai ta.

16 Chyhsapazy heta âmo hlâta a rônah viapa reipata chhie sa tyh ei ta. amâ eina to liata chhao pa-i nawpata chhiesapa he pachhâsana a châ tyh.

17 Khazohpa bietaipa ryu a to awpazy hnohna chata a pachiana a nano thei leizie tha via ta pamosa khohpata chhiesana bie ta pa-isa ta.

18 Khazohpa a haihpa rih a châ leina hmo a nano thei leipa miano vâta keimo apachha nawpata eima hmiakô liata hnabeiseina sopa cha patu awpata a râpazy heta pasyuna thata eima hnei thei nawpata.

19 Cha hnabeiseina cha hrona thuacha-ia ta hnei pi ta, ngâchhihpa nata pachyu ngaitapa a châ, poh raipa chhôh lâtahpa liana chhao chata a ngia ta.

20 Cha liana chata Zisu, Melkizedeka yzie hawhta, chhâzaw ta theihthai beichaipa cha hawpata eima châta hmiasatuhpa ta a vaw ngia haw ta. 

Hebrai Mozy (Hebrews)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10	Bo 11	Bo 12	Bo 13

Hebrai Mozy 7

Hebrai Mozy 7

Melkizedeka theihthaipa

1 Cha Melkizedeka cha Salema beipa nata Khazohpa Chônôchaipa theihthaipa cha a châ. Abaraha cha abei sahlao thi ta a vaw kua heih nota, Melkizedeka ta vaw dy ta, byhnâ aw pata.

2 Abaraha ta a hneipa to tawhta su hrawh liata su kha a hnohta pie ta. Melkizedeka moh yzie hmiatuapa cha Siana Beipa châ ta, Salema beipa a châ heih, a moh yzie cha, “Adyhna Beipa” a châ.

3 Ano cha paw hnei leipata, nô hnei leipata. pathlatuhpa thâtih hnei leipata y tuana noh hnei leipata, hro chhâna chhao hnei leipata. Khazohpa Sawchapawpa hawhta taopa tlao a châ. Chhâzaw ta theihthaipata khâ y ta.

4 Cha chyhsa rônahzie cha pachâ teh! Chi pathlatuhpa Abaraha ta adyuhna liata hraona phapa maih hrytahpa su hrawh liata su kha a piepa cha.

5 Livai pathla hryta theihthaipa raihria a topa maih chata ryhpa bie hawhta chyhsazy tawhta su hrawh liata su kha la awpa bie ama hmôpa tlai a châ. Cha cha ama unawhzy tawhta a châ. Cha sahlao cha Abaraha pathlazy châ hra ei sala.

6 Melkizedeka cha Livai pathla châ leipa ta, anodeikuacha Abaraha tawhta su hrawh liata su kha dao ta, bietaizy a vaotuhpa cha byhnâ awpa ta.

7 Ei awpa rimâ châ leipata a nawh viapa cha a rônah viapa ta byhnâ awpa ta a y tyh.

8 Theihthaipazy kyh liata, chyhsa thi thei awpa ama châna chôta su hrawh liata su kha dao tyh ei ta. Melkizedeka kyh liata deikua cha Khazohpa châ bie ta a hroh thlâhpa a tahpa khata a daopa a châ.

9 Livai, su hrawh liata su kha a la tyhtuhpa hmahta, Abaraha ku liana khata su hrawh liata su kha a pie haw tah theipa a châ.

10 Melkizedeka ta Abaraha a vaw dy nona khata Livai cha pie mâh vei, a pathlatuhpa kalachhôh liata y thlâh tlôh ta.

11 Chatanachata Livai sahlao theihthaipa châna vâta pakina hmô theipa a châ khiahta cha, cha ry liana chata chyhsazy ta ryhpa bie hmô tlôh ei ta, Arawna yzie hawhta rao leipata, Melkizedeka yzie hawhta theihthaipa hropa a vaw ypa he khâpa a byuhna a châ?

12 Theihthaipa châna cha a vaw nano hawpa vâta ryhpa bie cha panano a byuhpa rai a châ.

13 He eima Beipa a thâtih ama reipa he pho hropa châ tlôh ta, cha pho hry liatahpa cha ahyhmahta maisâh liata chakao beih veih ei.

14 Eima Beipa cha Zudah pho hryta a vaw puapa a châ tahpa a lâ pasia tlôh ta, cha pho kyh liana chata Mawsi ta theihthaipa sahlao kyh khâpahmah reih vei.

15 Melkizedeka hawhta theihthaipa hropa sapa biepiepa ryhpa bie hawhta taopa a châ leipa,

16 hro chhâna a hnei leipa hmotaotheina hawhta tlao taopa a vaw y awpa khiahta cha, eima bie reipa kha thata a sia rili aw.

17 Khazohpa châ bie ta, “Nâ la, Melkizedeka yzie hawhta, chhâzaw ta theihthaipa na châ.” tahpata pahnosapa châ tlôh ta.

18 A chieh-leina nata a phahnai leina vâta biepiepa a y tuapa cha thy ta.

19 Ryhpa bie chata khâpahmah paki tlôh leipata; hnabeiseina pha viapa Khazohpa eimâ hniana tyhpa he pangiapata tlao a vaw y haw.

20 Chatawhcha chhiesa leipa a châ leipa vâta,

21 âmo lâ chhiesa leipata theihthaipata taopa châ tlôh ei ta. Zisu deikua cha.“Nâ la, chhâzaw ta theihthaipa na châ,’ tahpata. Abeipa ta chhie sa ta, pathlei khao aw vei,” tahpata a hnohta a reituhpa ku khata chhiesapata theihthaipa ta taopa tlao a châ.

22 Cha tlatluna chata Zisu cha biehrai pha viapa a pa-ikheituhpa a vaw châ haw.

23 Âmo cha thina vâta ama pazao lymâ thei leipa vâta theihthaipa ta taopa hluh kaw ei ta;

24 Zisu deikua cha chhâzaw ta a y thlâh hapa vâta, theihthaipa châna cha a thla theipa rimâ châ leipata tlao a hnei haw.

25 Chatanachata ano liata Khazohpa lâta a vypazy cha a chhâna taihta a pachha thei hra, âmo chata thlahchhâ awpata chhâzaw ta a hroh thlâh hapa vâta.

26 Cha hawhpa theihthai beichaipa Zisu, pathaihpa, haidihaiduah leipa, a puapa a bai leipa, moleipazy tawhta a nano ta a ypa, avâzy hlâta a chô viapata tao hawpa cha eima châta y thlâh ha tlôh ta.

27 Ano chata cha theihthai beichaipazy hlâpa hawhna chata, nohcharei ano moleina vâta atheihna hlâ tuapata, cha hnôh lâna chata chyhsazy moleina vâta hlâ byuh vei; cha cha eikha ta vaw pangohpa ha tlôh ta, anosasy ta a hlâ nona tlai khata.

28 Ryhpa bie chata chyhsa chieh-leina, a hneipazy cha theihthai beichaipa ta rao tyh ta; chhiesana bie, ryhpa bie hnôh lâta a vaw ypa deikua chata, Sawchapawpa chhâzaw chôta paki hawpa cha tlao a rao. 

<

Hebrai Mozy (Hebrews)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10	Bo 11	Bo 12	Bo 13

Hebrai Mozy 8

Hebrai Mozy 8

Biehrai Thiehpa theihthaipa beipa

1 Eima bie reipazy hry liana heta a pei chaipa cha he he a châ: cha hawhta theihthai beichaipa avâzy liana khita rônah chaipata.

2 abeidyuchhai chachâh lâta a kaw tyuhpata, supathaihpa nata achhyna byureih hmeiseihpa chyhsapa sapa a châ leipa, Abeipa a sapa chakaotuhpa cha eima hnei tahpa he.

3 Theihthai beichaipa maih cha hmopiepa nata atheihnazy hlâ awpata raopa châ tlôh ei ta; chatanachata he theihthai beichaipa chhao heta khâpa tlyma chhâ hlâ awpa hnei a byuh.

4 Alei liana heta vaw y sala, theihthaipa rai châ aw vei, ryhpa bie lymâ hawhta hmopiepa a hlâtuhpazy a y chiehpa ama ypa vâta.

5 Chazy chata avâ hmozy cha a nohthlahpa nata a nohpahlipata chakao tyh ei ta; Mawsi ta achhyna byureih a sa chyta Khazohpa chhopata a ypa hawhna khata, “Tlâh liata mopâ awpa cha ama cha pamosapa hawhna khata ato tao awpata a chado teh,” a tahpa kha.

6 Atahmâ deikua cha biehrai pha viapa lyuhchâpa a châpa lymâ hawhta, chakaona raihria pha viapa a vaw to haw. Cha biehrai cha bietai pha viapa chôzy liata taopa a châ.

7 Cha biehrai hmiatuapa cha seina y leipata vaw y sala, a mianona châna chata su ama tlua awpa châ vei.

8 Âmo seipata hezy he reih tlôh ta: “Nahthlie teh, nohzy a vaw tlô aw, Abeipa ta a tah. cha nohzy liana chata Izarel chhôhkhazy nata Zudah chhôhkhazy hnohna chata biehrai thiehpa ei tao aw;

9 ama pathlatuhpazy Izi râh tawhta chhihtha awpata ama ku ta ei patu nota, ama hnohta ei biehraipa hawhna khata châ leipata; ei biehrai liana chata y thlâh ha tlôh lei khâh ei ta, chatanachata âmo cha ei pachâ khao veih ei. Abeipa ta a tah.

10 Cha noh hnôh lâna chata Izarel chhôhkhazy hnohta bie ei hraih awpa cha hezy he a châ, Abeipa ta a tah: Ama palôhrupa liata ei biepipazy soh aw na ta, ama pathipalôh liata roh hra aw na ta, chatawhcha âmo châta Khazohpa châ aw na ta. kei châta âmo cha ei chyhsazy ama châ hra aw.

11 Chyhsa to ta, Abeipa cha pahno teh,’ tahpata, âmo khih chhôhkha nata âmo unawhpa pachu khao aw veih ei, a chy chaipa tawhta a lai chaipa taihta, âmo zydua ta na pahno khai tlôh aw ei ta.

12 Ama hmoparaopazy liata zawh a ngiah aw na ta. ama moleinazy chhao a thei thlâh ha khao tlôh leipa aw na ta,” tahpata.

13 Biehrai thiehpa tahpata a reipa vâna khata, a hmiatuapa cha a paroh haw, Chatanachata vaw parohpata a vaw machâ hawpa cha a lei daihmâ haw. 

Hebrai Mozy (Hebrews)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10	Bo 11	Bo 12	Bo 13

Hebrai Mozy 9

Hebrai Mozy 9

Alei nata avâ achhyna-ozy

1 Biehrai hmiatuapa chhao khata Khazohpa chakaona yziezy nata he khizaw liata supathaihpa cha hnei ta.

2 Achhyna byureih tao ei ta, a tytuapa cha meiôh sona zy, tlâhkhai zy, viahchhâ Sopa zy yna a châ; cha cha Su Pathaihpa ama tah.

3 Poh-raipa mianona khô liana chata achhyna byureih Su Pathaih chaipa ama tahpa cha y ta,

4 cha liana chata ngôh rohpahâhpa raona maisâh nata biehraina byh ngôh pahupa cha y ta, cha biehraina byh chhôh liana chata mana yna ngôh beih zy, Arawna chôhchahrei chhyh thaopa zy, biehraina alôphiapa zy y ta;

5 a chô lâta zawngiahna dyuchhai khupata rônahpa cherubizy y hra ei ta. Cha kyhzy cha atahmâ la a kipata reih thei aw ma pi.

6 Cha hmozy cha cha hawhta taopa vaw châ ta, theihthaipa sahlao ta Khazohpa chakaopata achhyna byureih tytuapa liana chata khâ a ngia tyh ei ta;

7 a pazipa liana deikua cha theihthai beichaipa deita kô chareih eikha thisaih a cheipata a ngia tyh, cha cha ano châta nata chyhsazy moleina châta a hlâ tyh.

8 Thlahpa Pathaihpa ta he he pahnosa ta, supathaihpa liata a ngiana ochhi cha pahypa châ mâh vei, achhyna byurei tytuapa cha a duah chhôhta cha, tahpa hih.

9 Cha cha atahmâhlâ pamosana he a châ, cha hawh lymâ ta hmopiepa nata atheihnazy chhao ama hlâ tyh. chazy ngiaryna ryh leina kyh liana chata achhytuhpa pakisa thei vei.

10 chazy cha niepa zy, dopa zy, a bupa nanopazy chhaota, sapa lâ ryhpazy deita taopathina daihti taih chata raopa cha a châ.

11 Châhrasala Krista cha hmophapa a vaw y awpazy liata theihthai beichaipa ta a vypata, achhyna byureih ku ta sa leipa, cha cha he hmotaopazy hry liatahpa châ vei tahna a châ. Rônahpa nata paki viapa sie pahliepata,

12 eima châta chhâzaw ta chatlaina hmô hawpata miezy nata viahchao tawzy thisaih vâta châ leipata, ano thisaih vâta Su Pathaihpa liana chata eikha ta a ngiapata pangoh haw ta.

13 Mie nata viahchao tôhpazy thisaih nata viahchao zeinô paopa chyhsa pathaih leipa chôta hipa hmahta sapa pathaihna taihta a pathaisa tlôh khiahta cha.

14 Krista chhâzaw ta Thlahpa zawhzi ta seina hnei leipata, Khazohpa lâta a hlâna thisaih châta Khazohpa hropa chakao awpata nama ngiaryna ryh leina cha hmotaopa thiehpazy tawhna chata a pathaisa ngaita aw dia.

15 He vâna heta ano cha biehrai thiehpa lyuhchâpa a châ, biehrai hmiatuapa ry liata hmoparaonazy tawhtapa chatlai nawpata a vaw thi hawpa vâta, awpazy chata chhâzaw ta ryuto awpa bietai cha ama to thei aw.

16 Bie ryuhipa yna maih liata a hituhpa thina y hra lei theipa châ tlôh va.

17 Chyhsa ama thi tawhta bie ryuhipa ta bie hnei tyh tlôh ta, a hituhpa hro chhôh deikua cha bie rai hnei vei.

18 Biehrai hmiatuapa chhao kha, thisaih leipata pa-i veih ei.

19 Ryhpa bie lymâ hawhta biepiepa maih cha. Mawsi ta chyhsa zydua a chho khai nahta, “He he Khazohpa ta nama hnohta khâchâ a piepa biehrai thisaih a châ hih,” tahpata

20 viahchao tawzy nata miezy thisaih cha ti nata sahmi pala saihpa nata hisaw chhao la ta. châbu tlai nata chyhsa zydua chhao cha hi ta.

21 Cha leipa chhao cha achhyna byureih nata chakaona hmobaoh zydua cha, cha hawhna hra chata thisaih ta hi ta.

22 Ryhpa bie ta cha ato zydua he thisaih ta pathaisapata y tyh ta, thisaih palo leipata molei ngiahthaina rai y vei.

Krista ahlâna ta moleina a pahleinazie

23 Cha hawhna chata avâ liata hmo a ypa hawhpazy cha, chazy chata pathaisapata a y awpa rai a châ. Avâ hmo hmeiseihpazy deikua cha, chazy hlâta atheihna pha viapazy ta pathaisapata a y awpa a châ.

24 Krista cha ku ta sapa supathaihpa a hmeiseihpa a lyupa liana chata a ngia tlôh leipata, atahmâ Khazohpa hmiakô liata eima vyuhpata a duah awpata avâ liata tlai tlao a ngia haw ta.

25 Theihthai beichaipa cha kô chareih ta sa thisaih a cheina chôta Su Pathaihpa liata a ngia tyh ta. Châhrasala Krista cha anosasy ta ei hluhpi ahla awpata a ngiah vei;

26 cha hawhta châ leipa sala aleilô a y tua rakha tawhta ei hluhpi pasa a tao ha awpa a châ. Châhrasala atahmâhlâ daihti chhâna liana heta atheih nawpata anosasy ta a hmâpata molei pahlei nawpata eikha ta a vaw luahpa haw.

27 Chyhsapa châta eikha thi raopa a châ, cha hnôh lâna chata pachiana a y aw.

28 Cha hawhna hra chata Krista chhao chyhsa hluhpi moleinazy siekhei awpata eikha hlâpata y ta, moleina châta châ leipata pachhana kipa hmô awpata ano a hâtuhpazy hnohna chata einona ta a vaw luah heih aw. 

Hebrai Mozy (Hebrews)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10	Bo 11	Bo 12	Bo 13

Hebrai Mozy 10

Hebrai Mozy 10

1 Ryhpa bie chata hmophapa a vaw y awpazy hmeiseihpa châ leipata, a nohpahlipa deita a hneipa vâta, kô chareih ta atheihna tyhpa khâ ama hlâpazy chata a vaw tlô awpazy cha khatita hmahta pakisa thei tlôh vei.

2 Chata châ leipa sala achhytuhpazy cha eikha ta pathaisapata ypata molei a pahnonazy ama hnei leipa vâta ama hlâpa bâh syulyu ha aw veih ei mâ?

3 Châhrasala cha atheihnazy liana chata kô chareih ta moleinazy a theih heina khâ a vaw y tyh.

4 Viahchao tôhpazy nata miezy thisaih chata moleinazy pahlei theipa rimâ châ tlôh va.

5 Chatanachata khizaw liata Krista a vaw vy nona khata. Khazohpa hnohta: “Atheihna nata hmohlâpa khoh leipa chi ta, ei châta pôhpa tlao a chhuahnoh chi ta;

6 raopata hlânazy liata nata molei châta atheihnazy liana cha alyna rai hnei va chi.

7 Cha patanahta kei ta. ‘Hy Khazohpa y, pachâ teh, châ chatypa liata ei kyh ropa hawhta, na khopa tao awpata ei vy,’ tah na ta.” tah ta.

8 A machhuana liana khita, “Atheihnazy, hmohlâpazy, raopa hlânazy khoh leipa chi ta, chazy liana chata alyna hnei hra va chi,” tah ta, chazy cha ryhpa bie hawhta hlâpa châ ta,

9 cha patanahta, “Pachâ teh, na khopa tao awpata ei vy,” vaw tah haw ta. A mianona he a padua thei nawpata a hmiatuapa cha a pahlei haw.

10 Cha khopa hawhna chata, Zisu Krista pôhpa eikha ta hlâ hapa vâna khata pathaisapata eima y haw.

11 Theihthaipa to ta noh chhina maihta chakaopata moleina khati nota hmahta pahlei thei leipa atheihna tyhpa kha hlâpata, amâ duah tyh.

12 Krista deikua cha chhâzaw châta moleinazy châta atheihna miakha deita a hlâ khai tawhta Khazohpa chachâh lâta tlao a kaw tyuh ha ta.

13 Cha rakha tawhna chata a khakhaipazy a pheipazah tlyna ta taopa ama châ khai hlâ lei cha hâ thlâh ha ta.

14 Hmohlâpa miakha deitata pathaisa chiehpazy cha chhâzaw châta paki ha tlôh ta.

15 Thlahpa Pathaihpa chhao chata maniah pahnosa hra ta;

16 “Cha nohzy hnôh lâna chata, ama hnohta bie ei hrai awpa cha hezy he a châ, Abeipa ta a tah; ama pathipalôh liata ei biepipazy soh aw na ta, ama palôhrupa liata ei ro hra aw,” tahpata a reih tawhna khata,

17 “Ama moleinazy nata ama hmoparaonazy athei thlâh ha khao aw va na,” tah tlôh ta.

18 Cha hawhpazy ngiahthaina maih liana chata moleina chata hmohlâna y khao vei.

Ahnia viapa nata a ipata a duahna

19 Chatanachata unawh saih u, eima châta lâpi a raopa, lâpi thiehpa nata hropa liana chata poh-raipa cha, cha cha a pôhpa tahna a châ, sie pahliepata.

20 Zisu thisaih vâna chata supathaihpa liana khata a ngia eima ngâhpa vâta nata

21 Khazohpa chhôhkhazy chô liata theihthaipa rônah ngaitapa eima hneipa vâta,

22 eima pathipalôh liata ngiaryhna ryh leina pha leipa cha pathaisapata ypata, eima pôhpa chhao ti pathaihpata pasipata, ngiapâna pakipa hneipata pathipalôh hmeiseih phaopata a hnia ei suh u.

23 Eima hnabeiseina palâhâhna he a zawvaw lei nawpata khâchâ a pyh ei su u, bietaituhpa cha ngâchhihpa châ tlôh ta.

24 Kyhpachâ nata hmophapa taopata tha a pathyu awpata a pachâ rairieh ei suh u,

25 thokha taozie hawhta eimâ pakhypazy bâsai leipata tlao a pasyu rairieh ei suh u, noh cha a vaw hnia via rilipata nama pahno nata thata a pasyu pachai ei suh u.

26 Bie hmeiseihpa pahnona pakipa cha eima to ha tawhta hmo eima parao raruah tlôh khiahta cha, moleinazy chata atheihna y khao chachei leipa aw ta,

27 ryureina chi chhihna rarô-y ngaitapa kheihawhpa tlyma nata, dyutuhpazy a kâ patlô awpa hiehâhna mei tlao a y ha aw.

28 Mawsi ryhpa bie a papeisa leipa chyhsa cha pahno tuhpa pano tlyma, pathôh tlyma bie ta thapasana a hlao leipata ama thi tyh.

29 Khazohpa Sawchapawpa tlypa ta, biehrai thisai ano pathaisana cha hmô thlâthlihpata rao ta, ngiachhiena Thlahpa ru a pachhôtuhpa cha, cha hlâna chata kha tluta hriena tha viapata pasa tao tlâh ta rao awpata ma nama pachâ?

30 “Phuh la keima la awpa a châ. Keima ta viari ei thô aw,” tahpa nata, “Abeipa chata a chyhsazy a pachia aw,” a tah heihtuhpa cha pahno tlôh pi ta.

31 Khazohpa hrohpa ku liata paopa cha hmo rarô-y ngaitapa a châ.

32 Châhrasala eikhano ta pakhaipata nama y hnôh lâta pasa taona tymâ ngaitapa nama tao nozy kha a thei heih teh u,

33 kyh kha liata cha mohnaopa nata rietheinazy chhao taopata mo phapa châta taopata y eichi ta, kyh kha liata cha cha hawhta hmâpata a ypazy cha pasa taokheituhpazy châ eichi ta,

34 Keihrai daipazy cha thapasa eichi ta, sôh pha viapa a y palâh awpa cha nâmo ta nama hnei tahpa pahnopata, nama sôh ama lapazy chhao aly ngaitapata pasa tao haw hra tlôh eichi ta.

35 Chavâta namâ ngiapâna lymâ pipa thata nama hneipa cha thy khah u.

36 Khazohpa khopa taopata bietaipa cha nama hmô thei nawpata, tiamana namâ ngiah mâ tâh.

37 “Bohpi leipata, a vy awpa cha a vy tlôh aw ta," bohpi daih khao aw vei.

38 Châhrasala ei chyhsa siapa cha a ngiapâ ta, a hroh aw, hnôh lâ a sypa deikua cha ano liana chata alyna rai hnei aw va na.”

39 Châhrasala keimo la leidia awpata, hnôh lâ a sypa sahlao liatahpa châ leipa pi ta, hrona paboh awpata ngiapâna a hneipa sahlao liatahpa tlao eima châ. 

Hebrai Mozy (Hebrews)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10	Bo 11	Bo 12	Bo 13

Hebrai Mozy 11

Hebrai Mozy 11

Ngiapâna

1 Chatawhcha ngiapâna he hmo hnabeiseipazy a y tlaipata pahnona, hmo hmô leipazy pahnopasiapa a châ,

2 Cha liana chata machâ sahlaozy khata reithaina hlao tlôh ei ta.

3 Ngiapâna ta khizawzy he Khazohpa bie ta taopa a châ haw tahpa eima pahno, chatanachata hmo hmô theipazy he hmo a lâ theipazy ta taopa châ vei.

4 Ngiapâna ta Abela chata Kaina hlâta atheihna pha viapa Khazohpa lâta hlâ ta, cha vâna chata mo siapa a châ tahpa pahnona hlao ta. Khazohpa ta a hmopiepazy kyh liana chata bie pahnosa ta; cha ngiapâna vâna chata ano chata a thi ha tawhta bie khâ reih ta.

5 Ngiapâna ta Enawka kha thina pahno lei awpata lapata y ta; Khazohpa ta a la hawpa vâta hmô theipa châ khao leipata. Lapata a y hlâta Khazohpa alypa chyhsa a châ tahpa pahnosa haw ei ta.

6 Châhrasala ngiapâna leipata ano alypa chyhsa cha theipa rimâ châ vei, Khazohpa lâ a vypa chata ano cha a y tahpa nata, a tluatuhpa lâta lymâ pie a hmâhpa a châ tahpa a ngiapâ awpa a châ.

7 Ngiapâna ta Naw cha hmo a lâ leipazy kyh liata Khazohpa chhopata ypata, Khazohpa zapata a chhôhkhazy pachha nawpata balyh sei ta; cha chata khizaw cha thai lei pachâsa haw ta, ngiapâna vâta siana a ypa cha ryutotuhpa vaw châ haw hra ta.

8 Ngiapâna ta Abaraha cha awpata a y nona khata a ryu to awpa su lâta a ngia awpata pua awpa bie zyh ha ta; chatawhcha a sie nawpa lâ chhao pahno leipata pua haw ta.

9 Ngiapâna ta râh taipa liana khata chyhsa râh liata ypa hawh tlaita y thlâh ha ta, bietaipa su kha a ryutolâh awpa Asika nata Zakaw zy chhao chata poh-o liata y ei ta.

10 Khih lôbôzy a hneipa, Khazohpa sapa nata taopa cha hâ thlâh ha tlôh ta.

11 Ngiapâna ta Sarai tlai chhaota bie a taihtuhpa cha ngâchhihpa ta a pyhpa vâta, a nôpi tawhta chi phao theina hmô ta.

12 Chatanachata chapaw pakha liata ano cha athiehpa hawhta châ tlôh ta, avâ liata awhsizy hawhta a hluhpa, tilaipi ngiakâ liata leisadi reitiah leipa hawhta vaw pua haw ei ta.

13 Cha zydua cha ngiapâna hneipata thi haw ei ta, hmo taipazy cha to mâh leipata; châhrasala chazy cha lâhlapi tawhta hmôpata a vaw naoh haw ei ta, alei liana heta khichhaipa nata khi tlyhpa dei ama châ tahpa apahnosa haw hra ei ta.

14 Cha hawhpa kyh reipazy chata âmo râh awpa ama tlua tahpa palâsa tlôh ei ta.

15 Ama puana râh cha saiheipa châ ei sala, kuana rypaohpa ama hmô tlai awpa a châ.

16 Châhrasala atahmâ la râh pha viapa a saduthiepa vaw châ haw ei ta, cha cha avâ liatahpa a châ. Chavâta Khazohpa ta ama Khazohpa ta bi awpata a noza vei, ama châta khihpi tai a chhuahnohpa haw tlôh ta.

17 Ngiapâna ta Abaraha cha pasiapata a y nona khata Aisika cha hlâ ta, bietaipazy aly ngaitapata a totuhpa.

18 “Aisika liana heta na pathlazy ama tah aw,” ama tahpa tlai khata.

19 Khazohpa ta athihpa hry tawhtapa chhao pathyu theipata raopata, a sawchapawpa matlupa a hlâ, cha tawhtapa cha pakhona ta hmô heih tlai hra ta.

20 Ngiapâna ta Aisika chata hmo a vaw tlô awpazy kyh liata chhao. Zakaw nata Esaw chata byhnâ aw ta.

21 Ngiapâna ta Zakaw chata a thi chyna khata, Zawsi sawzy cha byhnâ aw pa rairieh ta, a chôhchahrei pawhmao a hâpata Khazohpa a chhy hra ta.

22 Ngiapâna ta Zawsi cha a thi chyna khata, Izarel pathlazy pua awpa kyh reih ta, a ruzy kyh liata bie pie hra ta.

23 Ngiapâna ta Mawsi a pi nona khata, hawsai hmi pha ngaitapa a châ ama tahpa vâta, thla thôh chhôh a nô nata paw ta nyupata y ta; abei biepiepa chhao chi veih ei.

24 Ngiapâna ta Mawsi chata a vaw machâ tawhna khata, Phirao sawchanônô sawchapawpa ta bipa khoh leipata,

25 bohpi leipa chata moleina phasana thaphakhei hlâta cha, Khazohpa chyhsazy nata taola tao tlao a tlyh ta.

26 Krista ama mohnaona cha, Izi râh ryuzy hlâna chata sôh rônah viapata rao ta, lymâ pie awpa cha a sai tyhpa vâta.

27 Ngiapâna ta abei hiehâhna cha chi leipata, Izi râh siesai ta; hmô thei leipa cha a hmôpa vâta, pasa tao hualua ta.

28 Ngiapâna ta Zawpakhô nata thisaih hipa kha tao ta, saw tuapa pahleipadiatuhpa chata âmo a hria lei nawpata.

29 Ngiapâna ta tlâh lâta siepa haw ta, Tilaipi Saihpa liana khata chaka ei ta; Izi mozy ta cha hawhna cha tao a chhuah hra ei ta, leidia khai haw ei ta.

30 Ngiapâna ta Zerikô kuh kha noh sari ama padô tawhta cho ha ta.

31 Ngiapâna ta Rahabi sihrypa kha ngiapâ leipa sahlao hry liana chata leidia vei, mohparutuhpazy a phapata a lypa vâta.

32 Chatawhcha khâpa eima reih khao aw? Kidia kyh zy, Baraka kyh zy, Sasawna zy, Zephatha kyh zy, Davi kyh zy, Samuel kyh zy, hrohsopa sahlao kyh zy reih ei sih la, daihti ta nâ daih tlôh leipa aw ta,

33 chazy chata ngiapâna ta khihnarâhzy la ei ta, hmo siapa tao ei ta, bietaipazy to ei ta, chakeibarôhneipa pakazy pamosa ei ta,

34 mei hmotaotheina pachhai ei ta, zaozi tiahpa khôkhâh ei ta, chieh-leina tawhtapa thatlô ngaitapata taopata y ei ta, adyuna liana chata machhyumahrâhpa châ ei ta, pho hropa adyuhpa sahlaozy parâ-paisa ei ta.

35 Chanôzy ta ama athihpazy thyu heihpa hmô ei ta. Mo hropazy chhao taochhiepata y ei ta, thyuheina pha viapa ama to thei nawpata pachhapata y khoh leipa ei ta.

36 Mo hropazy chhaota taochhiepa nata tuna tao ei ta, cha leipa chhao cha, keihrai daih nata patâhna o liata khôpazy a tyh hra ei ta.

37 Alô ta vawpata y ei ta, tho-âna ta taipachhôpa ta y ei ta, reipasaona a tyh ei ta, zaozi ta chhawsaopata y ei ta; mietahkupa vo nata mie vo a bupata viavi ei ta, sipasa ngaitapata, riethei ngaitapata taolapata y ei ta.

38 Cha sahlao châna chata khizaw he yna tlâh châ vei, râhpathohpa liata zy, tlâh liata zy, lôpu liata zy, khaotlô liata zy a khie tyh ei ta.

39 Cha zydua chata amâ ngiapâna vâta, reithaina hlaopata hmo taipa cha to leipa ei ta.

40 keimo a hlao leipata âmo cha pakipata ama y lei nawpata Khazohpa ta keimo kyh liata hmo kheihawhpa tlyma a pha viapa a chhuahnoh hawpa vâta. 

Hebrai Mozy (Hebrews)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10	Bo 11	Bo 12	Bo 13

Hebrai Mozy 12

Hebrai Mozy 12

Khazohpa eima Paw

1 Chatanachata saituhpazy cha tlatluta meihdo ru ngaitapa pahlypata eima ypa vâna heta, maniah a pahny pakhawpa maih nata moleina keimo liata khâchâ a baipa cha soh ei suh u,

2 Zisu eimâ ngiapâna a taotuhpa nata pakituhpa lâ cha mopata eima hmiakô liata a râpasuana awpa a ypa liana heta tiama ngaitapata a râ lymâ ei suh u, ano chata a hmiakô liata thaphana a ypa vâna chata maophyuna cha papeisa leipata kraws cha pasa tao ta. Khazohpa abeidyuchhai chachâh lâna khita a kaw tyuh ha ta.

3 Nama pathipalôh lâta thazeipata nama rie thei lei nawpata âmo chô liata a pha lei awpata moleipazy cha hawhta eina pasa taotuhpa cha pachâ teh u.

4 Moleina adyuhpata thisaih puana taihta adyuh leipa eichi ta.

5 Pasyuna bie sawzy chhoreipa hawhta chhoreina kha nama my ha mâ? “Ei saw, Abeipa chhoreina papeisa leipata y khâ, a chhoreipata na y nahta uah hra khâ,

6 Abeipa chata a kyhpachâpa cha chhorei tyh ta, saw a lypa maih cha a chhei tyh mâ tâh,” tahpa hih.

7 Nama pasa taopa he nâmo chhorei nawpata a châ. Sawzy chôta taopa hawhta Khazohpa ta nama chô liata a tao hih; Paw chhorei leipa saw ahyma a y beih tly?

8 Saw zydua to tyhpa chhoreina cha to leipata nama y khiahta cha, saw hmeiseihpa châ leipata, riasawpa nama châ aw mâ tâh.

9 Cha leipa chhaota, maniah chhorei awpata eima sapa pawzy eima hneipa kha. Chazy cha za tlôh pi ta, cha hlâta pha viapata eima hrona awpata, thlahpazy paw reisai ta y aw ma pi mâ?

10 Âmo chata he hro chhôh daihti chyuta châ heta a pha ama tahnazie lymâ hawhta maniah chhorei tlai ei ta, ano deikua chata a pathaina cha eima to thei hra nawpata, eima phana awpata tlao maniah a chhorei.

11 Chhoreina he pasa tao nota cha ly a chhihpata a lâ leipata pachârôhpata tlao a lâ tyh; pasa tao khai tawhta deikua cha, cha liata hriepata a ypazy châna chata thei thlahlôh chhih ngaitapa siana cha a papuapa tyh.

Khazohpa ngiachhiena apyh leina kyh zikyurâna

12 Chatanachata ku pathliahpazy cha patlâh teh u. pakhu thazeipazy tha patlô teh u.

13 pheisypazy cha pasuhlie leipata patlâhpata tlao a y nawpata nama pheizy châta lâpi palâhpazy tao teh u.

14 Chyhsa zydua nata adyhna nata pathaihna a chadai teh u. Cha pathaihna leipa chata ahyhmahta Abeipa hmô aw veih ei.

15 Pakhâtata moh teh u, chata leipata la Khazohpa ngiachhiena atlô leipa ahy tlyma vaw y aw ei ta, “khana thari kheihawhpa tlyma” vaw thaopata cha patypamâpata, cha chata chyhsa hluhpi cha papuapaleipata y aw ei ta;

16 apheihmâhpa tlyma, Esaw hawhta Khazohpa a za leipa tlyma ama vaw y pathlei aw na, ano chata a saw tuapa châna cha pati eikha nie lâta zuah ta.

17 Cha hnôh lâna chata byhnâ awna cha ryuto a khohpa chhaota mohthli tlana chôta phahnai khoh ngaitapata tlua hrasala palôhrupa rônah rypaohpa a hmô leipa vâta, thypata a y haw tahpa, pahno tlôh eichi ta.

18 Nâmo la tlâh hria theipa, mei ta a kâpa zy, meihdo a tikalupa zy, zohna zy, thlihpipa zy,

19 chiahmie parona zy, bie reipa pyu yna zy kha a tlôpa châ tlôh lei khâh eichi ta, cha pyu a theituhpazy chata bie hropa rai ama hnohta reih khao lei awpata a haw ei ta.

20 “Sa tai chhaota tla cha hria sala alô ta vaw saopata a y awpa a châ.” tahpa biepiepa kha, pasa tao thei khao tlôh lei khâh ei ta.

21 Ama hmo hmôpa chhao cha chichhih ngaitapa châ ta, chatanachata Mawsi ta, “Ei chipata thata ei chalyu.” a tahpa kha.

22 Zaio Tlâh zy, Khazohpa hrohpa khi avâ Zerusale zy, reitiah leipa sahlao vâlyuhchâpa apakhypi zy,

23 saw tuapa avâ liata moh a rohpa awnanopa sahlao zy, Khazohpa chyhsa zydua pachiatuhpazy, chyhsa siapa pha pakipa sahlao thlahpazy,

24 Zisu biehrai thiehpa lyuhchâpa zy, thisaih hipa Abela thisaih hlâta bie pha viapa reituhpa zy a tlôpa tlao nama châ.

25 Biereituhpa cha kho leipata nama y pathlei aw na, a chado teh u. Alei liata âmo zikyurâtuhpa ama kho leipa hmahta hriena amâ khôkhâh tlôh vei khiahta cha, keimo avâ tawhta zikyu maniah a râtuhpa a heisaituhpazy pi heta eimâ khôkhâ lei pachai aw.

26 Cha nona chata a ao khata alei he chalyu ta; châhrasala “Atahmâ he eikha cha alei dei châ leipata, avâ chhao ei chalyu heih aw,” tahpata bie tlao taih ta.

27 “Eikha cha ei chalyu heih aw,” tahpa heta hmo a chalyu leipazy cha a y thlâh ha thei nawpata hmo a chalyupazy cha hmotaopazy hawh deitata pasiepata a y aw tahpa a pahnosa.

28 Chatanachata khihnarâh a chalyu thei leipa eima topa vâna heta ngiachhiena hnei ei suh u, cha zawhzina chata zapa nata china chôta Khazohpa khonazie eima chakao thei aw;

29 eima Khazohpa he a tlôna taih kâ hmâhpa mei châ tlôh ta. 

Hebrai Mozy (Hebrews)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10	Bo 11	Bo 12	Bo 13