Habaku 1

Habaku 1

Ryurei sia leina vâta Habaku reipasipasuana

1 Hrohsopa Habaku ta aluahna ta bietapa a hmôpa.

2 Hy ABEIPA, khachâ e cha aw aw na ta, eina nahthlie vei aw chi? Nôchhiena kyh vâta nâ lâta cha padona ta, na pachha aw va chi ma?

3 Khazia hmoparaonazy na pamosa chi ta, hmo tao do lei ngaitapazy he na moh thlâh haw? Ahraona nata nôchhiena zy ei hmiakô liata y tlôh ei ta; ahryuna nata atah-ualuana zy avaw pua.

4 Chavâta ryhpa bie chata paphahnaisa thei leipa ta, pachiana bie pua beih hra vei. Chyhsa siapazy cha moleipazy ta chadô ei ta, chavâta pachiana cha a do lei ngaitapa ta a pua tyh.

Kaldia mo ta Zudah ama hrie nawpa zie

5 Phozy cha moh ula, sai thlâh ha ula; thata noâh teh u. Nama hro chhôhta hmo kyh kha ei taopa he, cha hmotaopa cha chyhsa ta cha chho hra ei sala zo cheita aw veih eichi.

6 Kaldia mo, pho chichhih ngaitapa nata rarôh ypa pathyu aw na ta, pahrâna su, âmo ei leipa chhao hnei a chhuahpa, alei ha a sie palâh tyhtuhpazy cha.

7 Chi a chhihpa ta ama rarôh a y ngaita; ama pachiana nata ama rôhnahna cha âmo tawhta a puapa a châ.

8 Ama arâzy chhao keichho hlâta ama chatlie chakoh via, a zohna liata changiezy hlâta chhao chi amâ chhih via; ama arâ a kiapazy cha athyu ngâ kaw ei ta. Ama arâ a kiahpazy cha lâhlapi tawhta avypa ama châ; pahmôpi sa niepa ta a pangaipa hawhta a pathlô hnao ei ta.

9 Nôchhiena hmah a chhuahpa ta a vy chyu ei ta; hmia lâ khâchâ amâ heih. Leisadi doh-lei hawh tlaita seizy ama patu tyh.

10 Abeizy chhao taola ei ta, molaipazy cha pahneiparâsao ei ta. Kuh a ipa zydua khâpasaw ta reih veih ei, alei pacho ei ta, la thlâh ha tyh tlôh ei ta.

11 Thlih hawh tlaita vaw chanao ei ta, sie pakhô ngâ ei ta, ama thatlôna cha khazoh ta ama hneipa vâta thai lei ama châ!

Abeipa chôta Habaku nahtla leina zie

12 Hy ABEIPA Khazohpa, ei Moh Pathaihpa, chhâzaw tawhtapa châ va chi ma? Na thie beih va chi. Hy ABEIPA, nâ ta âmo cha pachia nawpa ta a tlyh chi ta; hy Lôpanô, nâ ta âmo cha chhorei nawpa ta na padua.

13 Na mo cha moleipazy mo nawpa ta pathaih tu ha ta, riethei a taopa moh thei leipa ta, khazia e piepie ngaitapa ta a taotuhpazy cha moh theipa ta, hmoparaopazy ta âmo hlâta mosiapa ama nie khai nota nâ thlih thlâh haw?

14 Chyhsapa he tilaipi liata ngazy nata lôvâpa ama chô liata ryureituhpa hnei leipazy hawhta na tao tly?

15 Keipa ta chalo khai ta, a sao chata pahly pakhy ta; chavâta thaphapa ta âly.

16 Cha hawhpa vâta a sao lâta atheihna hlâ ta, a sao lâta rohpahâhpa rao ta; âmo vâta a tovyuh laipa ta niepa hluhpi a hnei haw vâta.

17 Chavâta a sao cha parua heih tyhpa ta, phozy thi ei leipa ta khâ a y aw ma? 

Habaku (Habakkuk)

Bo 1	Bo 2	Bo 3

Habaku 2

Habaku 2

Habaku hnohta Abeipa ta a chhyna zie

1 Ei vaihna liata a duah aw na ta, kuh chô lâ kiah aw na ta, ei ruchhôna kyh liana khata ei hnohta khâpama reih aw ta, kei ta kheihta ma ei chhy aw tahpa hmô nawpa ta ei sai aw.

2 ABEIPA chata he tana heta einâ chhy aw; ‘Aluahna châ roh la, a reihtuhpa ta thlai a reih thei awpa ta a siapa ta alôphia chô liata roh teh.

3 Aluahna he daihti raopa chhôh châta châ tlôh ta; aluahna cha a do, thlai a chhâ awpa a châ. Hawh hra sala, hâ teh; a vaw tlô tlai awpa vâta hawh hlei aw vei.

4 Moh tua, a palai kaw dia, a palôhrupa palâ vei, chyhsa siapa deikua cha ngiapâna ta a hroh aw.

5 Cha leipa chhao kresawti a parâpa cha dôhmâhpa a châ, chyhsa a palaipa, o a hrâ leipa châ ta. A khona cha Sheôl hawhta a kawhpi ta pahy ta; thina hawhta châ ta, lôhrâ patlô theipa châ vei. Ano lâta pho to a chhi ta, chyhsa zydua a pakhy,” tah ta.

A sialeipazy hnohta hupona yna

6 He zydua heta a chô liata taolapa ta, nata lô-aina bie ta reih ei ta, “Sôhkâ hmota a pahneirôhsatuhpa cha a hu a pona! Khachâ e a hmâh aw tly?” tahpa reih aw veih ei ma?

7 Nâma cha nietuh awpa sôhkâ ta a duahpa ta rie cha patheituh awpa a hrâh aw ei ta, ama châta hraona dei châ aw va chi ma?

8 Pho hluhpi na hrao hawpa vâta, pho hluhpi ta ama cha hrao hra aw ei, chyhsazy thisaih vâta nata râh chô liata zy, khihpi nata a chhôh liata pahrâtuhpa zydua hnohta, na nôchhiena vâna khata.

9 A o sa nawpa vâta chyhsa chôta a do leina a taotuhpa, a bu chhao su sâhpa liata a tu ta, china tawhta a pabohsa a chhuahpa cha a hu po na!

10 Chyhsa hluhpi pahleipadiapa ta na o châta maohphyuna na taopa châ ta; na hrona chô liata hmo na parao.

11 Alô cha pâhchhô tawhtapa aw aw ta, tho hmobaoh tawhta pâkô ta a chhy aw.

12 Thisaih ta khihpi paduapa ta, hraoleina ta khihpi a taotuhpa cha a hu a po na!

13 Chyhsa ta mei kâ awpa ta hriapa ta phozy khâpa hrao leipa châta anosasyh rie ama patheipa he Pheisaihzy ABEIPA taopa châ vei ma?

14 Tilaipi cha ti ta a bie khaipa hawhta ABEIPA rôhnahzie pahnona ta alei he bie khai tlôh aw ta.

15 A vaih hnohta sahmah do awpa a pietuhpa cha a hu a po na! Nâma ama thluahruapa na hmô thei nawpa ta na châmaih pahlaopahlipa a parisatuhpa chi cha!

16 Rôhnahna vyupa ta nozana ta a pabie chi ta. Nâ chhaota doh la, paochheichhâ hra teh! ABEIPA ku chachâh lâ nyu cha nâ lâta a vaw lie aw ta, na rôhnahna chô liata a pualeipa zakhei chhih ngaitapa a y aw.

17 Lebanaw nôchhiena chata cha khu aw ta; sazy leidiana chata a cha pachisa aw, chyhsa thisaih vâta nata râhzy, khihpizy nata a chhôh liata pahrâtuhpazy nôchhiena na tao hawpa vâta,

18 Nohthlahpa taopa he khâpa e phahnai ta, a taotuhpa ta a tao tly? Nohthlahpa leipa haipa a pachutuhpa dei, a taotuhpa ta ano ku hriana a ngiapâ chhyhpa, nohthlahpa reih pathlie thei hlei leipa taopa he khâpa a phahnai na?

19 Tho hnohta, a hra teh, tahpa ta, alei reih pathlie thei leipa hnohta, thyu teh, a tahtuhpa cha a hu a po na! He heta a pachu aw ma? Moh tua, ngôh nata tâkâri ta pahupa châ ta, a chhôh liata hu rai y vei.

20 ABEIPA deikua cha a o pathaihpa liata a y; alei liata chyhsa zydua cha a thlih ei se. 

Habaku (Habakkuk)

Bo 1	Bo 2	Bo 3

Habaku 3

Habaku 3

Habaku thlahchhâna

1 Shigionoth aozie ta hrohsopa Habaku thlahchhâna.

2 Hy ABEIPA, na thâtih ama chhopa thei na ta, chi na ta. Hy ABEIPA, he kô chhôh liana heta na raihria pathieh heih la, he kô chhôhzy liana heta pahnosa mah y; pathi-iana liata zawngiahna pahlao tyh mah y.

3 Temana râh tawhta Khazohpa a vy ta, Mo pathaihpa cha Paran Tlâh tawhta. A rôhnahna ta avâzy khi pahly ta, a reithaina ta alei bie ta. Selah

4 A pathliezie cha khaihna hawhta châ ta; a ku tawhta khaihna nori hawhta vaw pua ta, cha liana chata a hmotaotheina anyupa ta a y.

5 A hmia lâta sie ta, patlâhna cha, a hnôh lâta pachie pathlie ngâ ta.

6 A duah ta alei chalyusa ta; mohmia pasaih ta, phozy cha ama thlah pazoh ta; tlâh hlôpazy cha papai ta, chhâzaw bypizy chhao a bôh ei ta. A lâpizy cha chhâzaw tawhtapa ta a châ.

7 Kusa poh-ozy cha riethei taopa ta ei hmô; Midia pohraipazy cha a chalyu ei ta.

8 ABEIPA cha chavahzy chô liata palôh châ leipa ta a y ha ma? Chavah chô liana chata na pathi-iapa ta, tilaipi chô liata na pathi a ia ma, nâ arâ, na pachhana talaili chô liata na kiah haw?

9 Amâ chiehpa a châ na, na libaw, phozy châta chhiesapa â i na. Selah Na patlaw haw alei cha chavahzy chhaota.

10 Tlâhpizy ta cha hmô ei ta, ama cha chi; chalâhparâpazy chhao lytlâh ama khô haw; ti thu ngaitapazy ta ao ama papua, a sâh ngaitapa liata a bâh a pazawh haw.

11 Noh nata thlâpâ ama dua, âmo su liata, na châtai a zawpa khaina liata nahta, na asei pathlie ngâpa liana chata

12 Pathi-iapa ta lyurâh tly khai chi ta, hiehâhpa ta phozy na chapia.

13 Na chyhsazy pachha nawpa ta na pua, na sathaw thupa pachha nawpa ta Moleipa o cha pacho chi ta, a bohna a lâna taih na tao. Selah

14 Na chôhchahrei ta a luh hmah na paphaosa, ano zituhpazy cha thlihpipa ta a phaoh khai ei, ama pakah â ei ta, chyhsa rietheipa zy cha ama nie khai.

15 Na arâ ta tilaipi na sao, chalâhparâpa ru ngaitapa tlai cha.

16 Ei thei nahta ei chhorupa ta ei chalyu, a ao ta ei hmao a chakhy; ei ru hmy ta, ei su liata a chalyu na ta, Atymâna noh cha hâ na ta, zawpizy ta chariahpa amâ dyuhpa hawhta.

17 Theiku kô pawh vei hra sa, krezô pathei vei hra sa, ôli tho chhao pathei leipa ta, lyu ta niepa papua vei hra sa, sahdô tawhtapa sahroh zaw pahleipa ta, sahroh o liata sahroh y vei hra sa,

18 ei ly lymâ aw ABEIPA liata, ei pachhana Khazohpa liana chata khâ ei ly aw.

19 Abeipa, KHAZOHPA ei thatlôna; ei phei a tao, sakhi phei hawhta, ei su sâhpa lia na chareisa aw. 

Habaku (Habakkuk)

Bo 1	Bo 2	Bo 3