Hôsia 1

Hôsia 1

Hôsia lahpinô ngâchhih leipa nata a sawzy

1 Zudah abei Uzia zy, Zawtha zy, Ahaza zy, Hezekia zy amâ bei nota nata Izarel abei Zerôbaw, Zôasha sawchapawpa a bei nota Beri sawchapawpa Hôsia hnohta ABEIPA bie a vaw tlôpa cha.

2 Hôsia hmâpa ta ABEIPA bie reih pathaona cha, ABEIPA chata Hôsia hnohta, “Sie la, sihrypa pathla sihrypa chyhsa lahpinô ta hnei teh, he râh heta ABEIPA cha siesaipa ta a sihry haw,” tah ta. 

3 Chatanachata sie ta, Diblai sawchanônô Kôma cha hnei haw ta, chatawhcha saw phaoh ta, sawchapaw sapa ta. 

4 ABEIPA chata a hnohta, “A moh ta Zezrel bi teh; Zezrel thisaih phuh cha Zehu chhôhkhapazy chô liata la aw na ta, Izarel chhôhkhazy khihnarâh cha ei pachhâsa aw. 

5 Cha noh liana chata Zezrel saikao liata Izarel sahlao libaw cha ei thlie aw,” tah ta.

6 Saw phaoh heih ta, sawchanô sa ta. Chatawhcha ABEIPA ta a hnohta, “A moh ta Lôruhama bi teh: Izarel chhôhkhapazy cha thapasa khao aw va na, angiahthai cheita khao aw va na. 

7 Zudah chhôhkhazy deikua cha thapasa aw na ta, libaw tlyma, zaozi tlyma, adyuhna tlyma, arâ tlyma, arâ a kiahpa chyhsa tlyma ta âmo pachha leipa ta, ABEIPA ama Khazohpa chata ei pachha aw,” tah ta.

8 Lôruhama cha sâhpi pabâsa na ta, saw phaoh heih ta, sawchapaw sa ta. 

9 ABEIPA chata: “A moh ta Lôami bi teh: nâmo he ei chyhsazy châ tlôh lei khâh eichi ta, chatawhcha kei nama Khazohpa châ aw va na,” tah ta.

10 Anodeikuacha Izarel sawzy cha tilaipi leisadi, panua thei awpa rimâ a châ leipa nata rei thei awpa rimâ a châ leipa zie châ aw ei ta; ama hnohta, “Ei chyhsazy châ veih eichi; tahna su liana chata, ‘Khazohpa hroh sawzy bipa ta ama châ aw,” tah ta. 

11 Zudah nata Izarel sawzy cha pôh pakhy aw ei ta, ama luhpa awpa rao aw ei ta; cha râh tawhna chata ama khy aw; Zezrel noh cha rôhnah tlôh aw ta. 

Hosia (Hosea)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10	Bo 11	Bo 12	Bo 13	Bo 14

Hôsia 2

Hôsia 2

A chyhsa ngâchhih leipazy chôta ABEIPA kyhpachâna

1 Nama unawhpazy hnohta, “Ei chyhsa nama châ,” tah ula, nama sietanôzy hnohna chata, “Kyhpachâpa,” tah teh u.

2 “Nama nô lâta haw chaimâh ula, haw chaimâh teh u; ano he ei lahpinô châ tlôh lei khâh ta, kei chhao a vahpa châ va na; a hmia tawhta a sihryna taopa he thy pathlah sala, a kalachhôh tawhta a phei hmâna he thy pathlah mawh sy;

3 chata leipa ta la pathluahruasa awpa ta, a pi nota yzie hawhta paysa aw na ta, râhpathohpa hawhta tao aw na ta, râhchawhpa hawhta paysa aw na ta, dâhphipa ta ei thi aw.

4 A sawzy chhao thapasa aw va na, sihrypa sawzy châ tlôh ei ta.

5 Ama nô chata sihry tyh ta; âmo a phaohtuhpa cha zakhei chhihpa ta a y. ‘Ei khopa cha ei chadai aw, niepa zy, ei ti zy, ei sahmi zy, ei pala zy, ei sathaw zy, nata ei niepa zy na pietuhpa cha,’ a tah.

6 Chavâta a lâpi cha ahlô ta pamai aw na ta; ano pakhâpa ta diah tao aw na ta, a lâpizy hmô aw vei.

7 A khopazy a chadai hrasala pha aw vei; âmo tlua aw ta, hmô aw vei. ‘Ei vahpa tuapa hnohta ei kua aw, atahmâ hlâta cha hmialâ kha ei châta pha via tlôh,’ a tah aw.

8 Sa zy, kresawti zy, sathaw zy he, tâkâ ei papôhpa zy he ngôh Baal châta ama hmâpazy chhaota, keima piepa a châpa pahno tlôh va.

9 Chavâta ei sa cha a daihti ta, ei kresawti chhao a daihti ta ei la heih aw. ei sahmi nata ei pala, a thluahrua khu nawpa cha ei lapa aw.

10 Chatanachata a kyhpachâpazy hmiakô liata a thluahruana ei palâsa aw, ei ku tawhta ahy hmah pachha aw veih ei.

11 A thaphana zydua, a kyhchhi zy, a thla thiehpa zy, a pahânoh zy, nata a pôhpakhyna daihti zydua zy ei pachhâsa aw.

12 A krezô nata a theiku kô, ‘Hezy he ei khopazy ta eina piepa ei, ei hlao a châ,’ a tah tyhpazy cha roryhrapa ta ei tao aw: lyurâhpa ta tao aw na ta, lyurâhpa sazy ta ama nie aw.

13 Rohpahâhpa a raopa tyhpa Baal nohzy cha a chô liata viari ei thô aw, cha nona chata a rahyzy nata atobinazy cha a tobi ta, a khopazy pangai ta, kei eina my ABEIPA ta a tah.

14 “Chavâta reipasao aw na ta, râhpathohpa liata a chhi aw na ta, thlahpalôhpa ta ano bie ei chho aw.

15 Cha rakha tawhta a kresadô a hnohta ei pie aw. Akaw saikao chhao hnabeiseina chhikao châ ta, cha liana chata a thyutliana nohzy nata Izi râh tawhta a vaw pua no hawhna khata a chhy aw.

16 “ABEIPA ta he tana he a tah; cha noh liana cha, ‘Ei vahpa,’ tahpa ta na aw aw ta, ‘Ei Baal;’ na tah khao aw vei.

17 A hmao tawhta Baal mozy cha pachha aw na ta, a palôh liata ei mo cha cha khao aw vei. 

18 Cha noh liana chata lyurâhpa sazy, a zawpa pavawzy, alei liata lôvâpazy chhaota biehrai ama châta tao aw na ta; libaw zy, zaozi zy, adyuhnazy he alei tawhta pahlei aw na ta; a bohpa ta hmaohkhata ei pabyusa aw. 

19 Chhâzaw ta kei chata khâchâ ei cha pahawh aw; siana zy, pachiana zy, ngiachhiena zy, thapasana zy ta kei châta ei cha pahawh aw. 

20 Ngâchhihna ta kei chata châ pahawh aw na ta; chatanachata ABEIPA cha na pahno aw.

21 “Cha noh liana cha bie ei chho aw, ABEIPA ta a tah. Avâzy bie a chho aw na ta, âmo ta alei a chho aw ei ta;

22 alei chata sa zy, kresawti zy sathawzy a chho aw; chatawhcha âmo ta Zezrel ama chho aw;

23 chatawhcha ano cha kei chata alei liata hie aw na ta. Thapasa leipa cha thapasa aw na ta, ei chyhsa leipa cha, ‘Ei chyhsa na châ,’ tah aw na ta, ano ta, ‘Ei Khazohpa na châ; a tah aw,” tah ta. 

Hosia (Hosea)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10	Bo 11	Bo 12	Bo 13	Bo 14

Hôsia 3

Hôsia 3

Hôsia nata a pheinô

1 ABEIPA chata ei hnohta, “Sie heih la, chanô chyhsa hropa a khopa, sihrynô cha a kyh pachâ teh: Izarel pathlazy cha khazoh hropa lâ a heipa ta kre tlâ pasoh kaw hra sala, ABEIPA ta kyh a pachâ thlâh hapa hawhna heta,” tah ta. 

2 Chatanachata tâkâ tlaw hrawhleipangawh nata bâli sâh homer hmo kha nata homer khophie ta ano cha chalei na ta. 

3 A hnohta, “Noh hluhpi chhôh cha kei châta na y awpa a châ; sihrypa ta na y awpa châ leipa ta, ahy lahpinô ta hmahta na y awpa châ vei: cha hawhna hra chata kei chhao nâma liata ei y aw,” tah na ta. 

4 Izarel pathlapazy cha noh hluhpi abei chaipa nata molaipa nata lôbôpa a zipa nata ephod tlyma, khazoh nohthlahpa tlyma hnei leipa ta y tlôh aw ei ta: 

5 cha tina chata Izarel pathlazy cha kua aw ei ta, ABEIPA ama Khazohpa nata ama beipa Davi cha tlua aw ei ta; noh hnôh lâ liana zy chata ABEIPA nata a phana cha a chalyuna chôta ama pangai aw. 

Hosia (Hosea)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10	Bo 11	Bo 12	Bo 13	Bo 14

Hôsia 4

Hôsia 4

ABEIPA ta Izarel a eina

1 Izarel pathla saih u, ABEIPA bie cha nahthlie teh u; he râh liana heta hmeihseihna nata ngiachhiena nata Khazohpa pahnona a y leipa vâta, ABEIPA chata râh a pahrâtuhpazy adyuhna awpa a hnei;

2 chhiesapa zy, adopa zy, athipa zy, parupa zy, aphei hmâhpa zy pôh ta; thisaih a zaohmia thlâh haw.

3 Chavâta râh ta machhie sa aw ta, a chhôh liata a pahrâpa to a panao aw, lyurâhpa sazy a zawpa pavawzy chhaota; tilaipi liata ngazy taihta siekheipa ta a châ aw.

4 Anodeikuacha ahy hmahta anosasyh ta a siehnao kha sala, ahy hmahta anosasyh ta a ra hra kha se; na chyhsazy cha theihthaipa adyuhtuhpazy hawhta châ tlôh ei ta.

5 Nohchhô ta pao aw chi ta, hrohsopa chhao zâ ta pao aw ta; na nô chhao ei pahleipadia aw.

6 Ei chyhsazy cha pahnohna aphahlapa vâta pahleipadiapa châ ei ta, pahnona na dythapa vâta kei chhaota ei theihthaipa na châna tawhta eicha dytha ha aw. Na Khazohpa ryhpa my bao hra chi ta, kei chhaota na sawzy ei my hra aw.

7 Ama pôh nata ei chô liata molei rili bao hra ei ta, ama rôhnahna cha maohphyuna ta ei pachâsa aw.

8 Ei chyhsazy moleina nie ei ta, ama hmoparaona liana chata ama pathipalôh soh ei ta,

9 A zawpi nata theihthaipa chhaota miakha ama châ aw, ama hmotaopazy viari ei thô aw.

10 Nie taraw aw ei ta, lôhrâtlôpa ta y tlôh aw veih ei; sihry hmah aw ei ta, poh aw veih ei, ABEIPA apapeisana ama hnei leipa vâta; sihrypa ta ama y.

11 Kresawti zy, kresawti thiehpa zy chata pathipalôh a pahlei tyh.

12 Ei chyhsazy chata tho ta ama taopa a chhohia ei ta, ama chôhchahrei chata a chhô tyh ei. Sihryna palôhrupa chata paviakhei ta, ama Khazohpa siesaipa ta sihry haw tlôh ei ta.

13 Tlâhpizy laki liana chata atheih ei ta, tlâh byuhpazy liana chata rohpahâhpa rao ei ta,oaka nata pôpla nata teribia kôry liana zy chata a nodi a phapa vâta; chavâta nama sawchanôzy chata sihry ama hmâh.

14 Nama sawchanônôzy ta sihry ei ta,  nama myunôzy ama sihry nota hrie aw va na; âmo tlai chhao sihrypazy nata sie nano ei ta, sihrypazy nata atheih tlôh ei ta; pahno thai leipa zawpizy cha ama pao aw.

15 Izarel, nâ chata sihry hmâh haw hrala, Zudah la pao cheita hra khah se. Kilkal lâ a khy khah ula,Bethave lâ khy hra khah ula, “ABEIPA a hroh chhôh cha,” tahpa ta chhiesa hra khah u:

16 Viahchao zeinô chhorupa hawh tlaita Izarel sahlao chhoru ei ta; atahmâ cha ABEIPA ta mietahkupataw hawhta su kawh ngaitapa liata a pasa aw ma?

17 Ephrai chata khazoh nohthlahpa a zaokhei haw ta, ano y ta y se.

18 Ama sahhmah dopa cha thao ta,Sihry haw tyh ei ta; a ryureituhpazy chata hmo noza chhihpa tao ama pasô kaw.

19 Thlih ta a mathlawzy ta hmô ta, ama theina zy vâta âmo no a za aw. 

Hosia (Hosea)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10	Bo 11	Bo 12	Bo 13	Bo 14

Hôsia 5

Hôsia 5

Izarel paosaina vâta hriena

1 Hy nâmo, theihthaipazy saih u,he he thei ula! Nâmo Izarel chhôhkhazy saih u, nahthlie ula! Hy abeichaipa chhôhkha saih u, nah pachôh teh u! Ryureina cha nama châta châ tlôh ta; Mizpah liata khohei nata Tabaw liata sao paraipa nama châpa vâta.

2 Atypazy chata thihpa pasâhsa ngaita ei ta. Kei deikua âmo zydua a ra tuhpa ei châ.

3 Ephrai ei pahno, Izarel cha kei tawhta nyupa châ vei: atahmâ he, hy Ephrai, na sihrypa vâta Izarel cha papuapaleipa a châ.

4 Âmo Khazohpa lâta a heih awpa ta ama hmotao tyhpazy cha bâhsai leipa ei ta. Sihryna palôh âmo liata y tlôh ta,ABEIPA cha pahno veih ei.

5 Izarel a palaipa chata hmiadaisâ ta pahnosa ta, Ephrai cha a hmoparaona liata pao aw ta,Zudah chhao âmo hnohta a pao hra aw.

6 Ama mitakupa zaw nata ama vaichaohrizy chhaota ABEIPA tlua awhpata si awh a ei ta, chahrasala ano cha hmo awh vei ei. Amo tawtapa a panano hawh tloh ta.

7 ABEIPA cho liata pipi ngaitapata taoei ta; pho hropa sawzy sa tlo ei ta. Thla thipa chata ama lyuzy tai chhaota leidiana a tlokhei awh.

8 Kibia liata ki to ula, Ramah liata chiami to te u. Bethave liata adyuna pyu parosa te u; hy Benzami, achalyu te!

9 Ephrai cha hrina no liata rory pahrasapa a cha awh; hmo a vaw cha tlai awhpa cha Izarel chizy hry liata ei pahnosa hawh

10 Zudah abeisawzy cha rari pasiatupazy hawta cha ei ta; Ei hihana cha ama cho liata ti hawta ei patlai awh; pasaipa-ipata y ta, ryureina ta pavipata a y.

11 Ephrai cha bipipa a py kho kawhpavata, sisaipata yta, ryureina cha paraopaa cha.

12 Chavata Ephrai chata chhoma-u hawta cha na ta, Zudah chhokhapa chata hmyna hawta ei cha.

13 Ephrai chata a pasana hmo ta, Zudah chata a hmah hmo ta, Ephrai cha Asuria lata si ha la, abei ronapa hnota thlai tua la Chahrasala ano ta cha patla theileipa ta, nama hmah cha patlasapa thei vei.

14 Ephrai chata cha chakeibarohneipa hawta, Zudah chhokha chata chakeibarohneipa dawpa hawta cha tlo awh na ta. Keima, keima tlai ta hrichhei awhna ta, si awh na ta, leikhei awh na ta,pachhahtupa ahyhma y awh vei ei.

Izarel rona ngachhi leina

15 Amo thai leina a pahnopata, ei hmia ama tlua hla lei cha si awh na ta, ei su la ei kua awh, ama pasa taona liana chata eina tlua pato awh ei. 

Hosia (Hosea)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10	Bo 11	Bo 12	Bo 13	Bo 14

Hôsia 6

Hôsia 6

1 Avy teh u, ABEIPA lâ kua ei suh u; maniah a hrie chhei khai ha tarawpa ta maniah patlâh heih tlôh aw ta; maniah a tu haw tarawpa ta maniah chahry heih tlôh aw ta.

2 Noh no rakha tawhta maniah pahro aw ta; noh thôh noh ta maniah pathyu aw ta, a hmiakô liata eima hroh aw.

3 ABEIPA pahnona cha a chadai lymâ ei suh u, pahno ei suh u; a siana cha my nohchhipa hawhta châ tlôh, eima hnohta vâsua hawhta, vâsua hnôh chaipa, alei a padâtuhpa hawhna tlaita a vaw tlô aw.”

4 Hy Ephrai, kheihta e ei cha tao aw? Hy Zudah, kheihta e ei cha tao aw? Nama phana cha my ta meihdo nata diati thlai apai tyhpa hawhna heta châ tlôh ta.

5 Chavâta hrohsopazy hmâpa ta âmo chhaw pachhô na ta, ei pakah biezy ta âmo ei pahleipadia, na chô liata pachianazy cha khaihna khaih ngâpa hawhta a châ.

6 Atheihna khoh leipa ta ngiachhiena khoh tlôh na ta, raopa hlânazy hlâta cha Khazohpa pahnona ei khoh via.

7 Châhrasala Adâh hawhta biehrai cha parao ei ta; cha liana chata piepie ngaitapa ta ei chô liata ama tao.

8 Kilia cha hmoparaotuhpazy khihpi châ ta, thisaih a bai hôlô.

9 Phihmâhpa sahlao ta chyhsa ama byhkhâh tyhpa hawhta, theihthaipa pyzy chata Sekhe lâpi liata chyhsa ama thie tyh; pasichhih ngaitapa ta ama tao.

10 Izarel chhôhkha liana chata hmo rarôh y ngaitapa ei hmô; Ephrai liata sihryna y ta, Izarel cha papuapaleipa ta a y.

11 Hy Zudah, na châta chhao a theilâpa hria awpa ta raopa a châ. 

Hosia (Hosea)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10	Bo 11	Bo 12	Bo 13	Bo 14

Hôsia 7

Hôsia 7

Izarel moleina nata atyna

1 Ei chyhsazy seichâna tawhtapa ei chhihtha tina chata, Izarel patla a chhuah na ta, Ephrai hmoparaona a vaw lâ, Samari moleina chhao; dô hmâh ei ta, chho lâta paruna a vaw ngia ta, khôtho lâta phihmâhpa sahlao ta tlô ei ta.

2 Ama hmoparaona zydua ei thei thlâh haw tahpa ama palôh ta pachâ veih ei. Atahmâ cha ama hmotaopazy tlaita padô haw ta, Ei hmiakô liata ama y.

3 Ama hmoparaona ta beichaipa palysa hra ei ta, ama haipa bie ta molaipazy palysa hra ei ta.

4 Ama zydua ta a pheipa châ ei ta; viahchhâ taotuhpa ta lômathu a pasâh, viahdie a nypa thyu hlâta, pathyusapa hlâta a chalihsai chypa hawhpa ama châ.

5 Eima beichaipa noh liana chata molaipazy cha kresawti pachâpahia ngaitapa ta a parisa ei ta; ano chata eilawtuhpazy hnohta a ku pazawh ta.

6 Aru lâta amâ byh nota ama pathipalôh cha lômathu hawh tlaita tao haw tlôh ei ta; ama pathi-iapa cha zâkhidei a daih tyh; my ta mei paleih hawhta ia ta.

7 Lômathu hawh tlaita sa khai ei ta, ama pachiatuhpazy pahleipadia ei ta. Ama beichaipa maih pao ei ta; ama hry liata ahy hmah na padopa y veih ei.

8 Ephrai hra cha pho hropa hryta a pahlao ta; Ephrai cha viahchhâ palie leipa a châ.

9 Khichhaipazy ta a tha niepa ei ta, ano chata pahno vei; sâ pawhpa a lâ hôlô ta, ano chata pahno vei.

10 Izarel rôhnahna chata a hmiakô liata pahnosa tyh ta; châhrasala he zydua liana chhao heta ABEIPA ama Khazohpa lâ cha aheih leipa ei ta, ano cha tlua hra veih ei.

11 Ephrai cha vachhuh palôh leipa, novâhna a hnei leipa hawhta châ ta, Izi lâ padô ei ta, Asuria lâta sie ei ta.

12 Ama siepa cha ama chô liata ei sao parai aw na ta; avâ liata pavaw a zawpa patupa hawhta patu aw na ta; âmo apakhypa sahlao ta ama thei hawpa hawhta âmo ei hrie aw.

13 Ama hu a po na, kei tawhta viavi syulyu haw tlôh ei ta! Leidiana ama chôta a tlô na, ei chô liata aty haw tlôh ei ta! Kei chata pachha khoh ei na ta, âmo deikua cha haipa eina rei thlu ei.

14 Ama palôh hmeiseih ta na pado leipa ei ta, ama rakhô liata amâ chiaburapa tlao a châ; sa nata kresawti chata a pakhy ei ta,ei chô liata aty tlôh ei ta.

15 Kei chata ama bâhzy pachupa ta thapatlô na ta, châhrasala ei chô liata pha leipa ama pachâpady.

16 Baal lâta a heih ei ta, Libaw hmâ tlâh leipa hawhta châ ei ta, ama molaipazy cha ama sâlâna vâta zaozi ta ama pao aw. He he Izi râh liata pahneichhipa ama châna a châ aw. 

Hosia (Hosea)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10	Bo 11	Bo 12	Bo 13	Bo 14

Hôsia 8

Hôsia 8

Izarel nohthlahpa achhyna kyh chhoreina

1 Chiahmie cha na hmao liata paryh teh, ABEIPA chhôhkhazy chôta pahmôpi hawhta a vy na; ei biehrai paraopa ta, ei ryhpa ama paraopa vâta.

2 Eima Khazohpa, keimo Izarel sahlao ta eima cha pahno, tahpa ta kei lâta ama aw aw.

3 Izarel sahlao chata hmophapa khoh leipa ei ta, khakhaipa ta a chadai aw.

4 Ei taopa châ leipa ta âmo ta abei tao ei ta. Ei pahno leipa ta hyutuhpazy tao ei ta. Ama leidia nawpa ta ama tâkâri nata ngôh ta âmosasyh chata khazoh nohthlahpa ama tao.

5 Hy Samari, na viahchao taw nohthlahpa cha khoh leipa ta a y. Ama chô liata ei pathi a ia ngai ta: pathaipa ta ama y thei hlâta cha khachâ ma a châ aw tly?

6 Raihriatuhpazy ta hmo ama taopa cha; Khazohpa châ vei. Samari viahchao taw nohthlahpa cha parao khaipa a châ aw.

7 Thlih chi hie aw ei ta, thlih chhiepa hria tlôh aw ei ta. Kô a duahpa hnei leipa ta,a chô zihta thei pathei aw vei; patheipa rai châ sala khichhai ta ama nie khai aw.

8 Izarel sahlao cha palâ khaipa ta ama y; pho hropa hryta bei hmâh tlâh leipa hawhta ama châ.

9 Lyurâhpa alâ hrapa hawhta Asuria râh lâta khy tlôh ta, Ephrai chata khohpazy a ryru.

10 Pho hropazy hry liata aryru hmâh hra sala, atahmâ âmo cha ei pakhy aw. Abei nata hyutuhpazy phaohripa vâta ama pai pathao.

11 Ephrai chata hmoparao nawpa maisâh a papôhpa vâta, ama châta maisâh rai cha moleina dei a châ.

12 Ei ryhpa bie thy kha ropa hra aw sah la, hmo hrao leipa ta ama pachâ.

13 Keima lâta hmohlâpa atheihnazy cha, sa hlâ ei ta, nie ei ta, chazy cha ABEIPA ta a pyh vei. Chatanachata ama hmoparaona athei thlâh ha ta, ama moleina hrie ta; âmo cha Izi râh lâta ama kua heih aw.

14 Izarel chata ano a Taotuhpa my ta, o rôhnahpazy sa ta; Zudah chata khihpi kuhzy papôh ta, châhrasala a khihpizy liana chata mei tuah aw na ta, a o rôhnahpa zy a kâ khai aw. 

Hosia (Hosea)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10	Bo 11	Bo 12	Bo 13	Bo 14

Hôsia 9

Hôsia 9

Izarel chhoruna vâta hriena

1 Hy Izarel, pho hropazy hawhta thapha ngaitapa ta aly khâ; na Khazohpa tawhtapa cha sihry haw chi ta. Sawhri to liata a ty cha paso tlôh chi ta.

2 Sawhri nata kre saona khaohzy chata âmo lôhra patlô leipa aw ta, kresawti thiehpa hnei aw vei.

3 ABEIPA râh liana chata pahrâ leipa aw ei ta, Ephrai cha Izi lâta tlao kua aw ta, Asuria râh liata niepa pathaih leipa ama nie aw.

4 ABEIPA lâta kresawti patlai leipa aw ei ta, ama hmohlâpazy cha ano chata alypa châ hra aw vei. Ama viahchhâ cha mâchhiesapa zy pati hawhta châ aw ta; a niepa maih papuapaleipa ama châ aw;ama viahchhâ cha ama nodina châta deita châ aw ta, ABEIPA o lâta a vaw ngia aw vei.

5 Pakhypi pathaihpa noh liata nahta, ABEIPA kyhchhi noh liana chata khâpa nama tao tly?

6 Pachâ teh u, paraona cha siesai ei ta, Izi chata âmo cha tlao pakhy aw ta,Memphi chata a vaw pabu aw. Ama tâkâri hmo khochhihpazy cha thlahbei ta by aw ta; ama poh-ozy liana chata a hloh a y aw.

7 Hriena nohzy cha vaw tlô ta, viarithôna nohzy cha a vaw tlô na; Izarel chata cha cha a pahno aw. Na hmoparaona hluh ngaitapa nata nâ a haona cha thata a châpa vâta, hrohsopa cha hrua ta, thlahpa a hneipa chyhsa cha a hrupa a châ.

8 Ephrai riahvaihtuhpa cha ei Khazohpa hnohta a ypa châ ta, hrohsopa hra cha a lâpi zydua liata khohei chôhtuhpa khohei y ta, a Khazohpa o liata chhao ahaona a y.

9 Kibia liata ama y nozy hawhna khata thata âmo a papuapalei ei ta: Ama paraona pahno thlâh ha aw ta, ama moleinazy cha viari a thô aw.

10 Izarel cha râhpathohpa liata kre patheipa hawhta hmô na ta. Nama pawzy cha theiku, a daih tuapa liata a hmô tuapa hawhta ei hmô. Châhrasala âmo cha Baalpeôr su lâta a vy ei ta, Baal hnohta pôhpa duata a pie ei ta, ama pasô ngaitapa hawhna hra chata pasichhihpa ama châ haw.

11 Ephrai rôhnahna hra cha pavaw hawhta a zaw syulyu aw ta, saw sapa zy, saw phaohpa zy, nawh hneipa zy y aw veih ei!

12 Ama sawzy pitloh hra ei sala, chapaw rai y lei awpa ta mâchhie ei pasasa tlai aw. Âmo ei heisai tina chata ama hu a po pachaih aw dia!

13 Tyre ei hmôpa hawh hrata Ephrai cha su ngiarychhih ngaitapa liata sopa ta y ta: châhrasala Ephrai chata a sawzy cha thietuhpa lâta a chhihtha aw.

14 Hy ABEIPA, pie teh: khâpa na pie aw tly? Chhi, nawh rao tyhpa nata sâhpi chawhkaraipa cha pahneisa mah y.

15 Ama hmoparaona zydua cha Kilkal liata y ta; cha liana chata âmo cha ahao tlôh na ta; ama hmoparaopazy vâna chata ei o tawhta ei papua aw. Âmo sahlao kyhpachâ khao aw vana; ama hyutuhpa zydua cha tyhmâhpa ama châ.

16 Ephrai cha tupa ta y ta, ama thari cha a rao khai haw, pathei aw veih ei: pathei hra sala, ama chhi thei khochhih ngaitapa cha ei thie thlâh ha pyly aw.

17 Ei Khazohpa chata âmo cha a thypathla aw, khâpasaw ta ama reih leipa vâta; chatanachata pho hropa hryta viavipa ta ama y aw. 

Hosia (Hosea)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10	Bo 11	Bo 12	Bo 13	Bo 14

Hôsia 10

Hôsia 10

1 Izarel cha krezô buh rôhpa pathei  ngaitapa châ ta: a pathei hluhna zie lymâ hawhta a maisâh zy papôh ta; a râh phanazie lymâ hawhta lôbôna phapazy tao haw ta.

2 Ama pathipalôh cha hru ha ta; atahmâ cha thai lei châpa ta ama y ha aw. ABEIPA ta maisâhzy cha phie aw ta,ama lôbôpazy cha a parao aw.

3 “Abei hnei ma pi, ABEIPA chi tlôh lei khâh pi ta; cha abei chata khâpa maniah a taopa thei aw?” tahpa ta,atahmâ cha ama reih ha bâ tlai aw.

4 Biehrai ama taona lâta haipa ta chhiesapa ta; bie hrao leipa reih ei ta; chavâta lyu alei paliepa a tlâh liata sipopa châmaih a hneipa hawhta pachiana a kaw pua.

5 Samari râh liata a pahrâpazy cha Bethave viahchao taw vâna chata thlahzopa ta ama y aw. Ano tawhtapa ama lei hawpa vâta cha liata chyhsazy cha ama pachârôh aw ta, cha liata theihthaipa sahlao a rôhnahna chô liata alytuhpazy chhao.

6 Cha hmo cha Asuria lâta siekhei aw ei ta, bei rôhnah chaipa lâta ama pie aw. Ephrai chata maohphyuna hmô aw ta, Izarel chata ano bie pahruapa tlai cha a zakhei aw.

7 Samari beipa cha ti chô liata thopahrei dipa hawhna heta pahleipadiapa châ ta.

8 Izarel moleina Aven su sâhpazy chhao cha paraopa châ aw ta. Ama maisâhzy liana chata ahloh nata bôbaw pyuh aw ta; tlâhpi lâna chata, maniah khu teh, tah aw ei ta, tlâhzy lâna chata, maniah vi teh, ama tah aw.

9 Hy Izarel Kibia no tawhna khata na molei; cha cha tao lymâ ta; Kibia cha adyuhna ta pha aw vei ma?

10 A byh aw na ta, âmo cha ei hrie aw ei; zawpizy cha âmo dyuh awpa ama pahmaoh aw, ama paraona miano liata amâ ao tina cha.

11 Ephrai cha viahchao zeinô pachu chiehpa, sâh tly chahra ngaitapa châ ta; châhrasala kei heta a rao angia ngaitapa liata raopaky pakysa aw na ta, Ephrai chô liata chyhsa pakiasa aw na ta, Zudah chhao chata alei palie aw ta, Zakaw chata a baotlâzy cha a padi aw.

12 Nâmo chata siana ta tu ula, chatanachata ngiachhiena lymâ hawhta hria teh u; nama chhaolei a khaipazy palie heih teh u; ABEIPA cha a vypa ta nama chô liata siana a pasuasana taih ano cha tlua daihti châ tlôh ta.

13 Hmoparaona alei palie eichi ta, hraoleina hria eichi ta, haipa theilâpa nama nie. Na talailizy nata na chyhsa thatlôpazy hluhpa he ngabao hra chi ta.

14 Chavâta na chyhsazy hry liata tymâna vaw pua aw ta, Shalma chata adyuh noh liata Bethabela paraopa hawhna khata na kuh zydua paraopa ta a châ aw; nô cha a sawzy chhaota thy saopa ta ama y.

15 Na paraona vâna khata, cha hawhna chata Bethel cha taopa a châ aw. Izarel abei cha khihpavâ no tlaita pahleipadiapa a châ aw. 

Hosia (Hosea)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10	Bo 11	Bo 12	Bo 13	Bo 14

Hôsia 11

Hôsia 11

Khazohpa ta a chyhsa kyhpachâpazy a vânazie

1 Izarel pho cha a hawti no tawhta a kyhpachâna ta, Izi râh tawhtapa ei sawchapawpa ei aw.

2 Awpa ama châ nahta a hla via ei ta, Baal sahlao lâta tlao atheih tyh ei ta, nohthlahpa taopa lâta rohpahâhpa ama rao.

3 Kei deikua chata Ephrai cha ei bâhta deipa ta lasi pachu na ta, âmo ei patlasa tahpa deikua pahno veih ei.

4 Kyhpachâna ta chahry ei na ta. khawhrizy ta ei chhi ei, âmo châta cha ama kâ liata hmaohina a latuhpa hawhta châ na ta, pasô ngaitapa ta ama hmiakô liata niepa hô ei na ta.

5 Izi râh lâna chata kua hei khao aw vei; châhrasala hnôh lâ kua ama khoh leipa vâta Asuria cha abei a châ aw.

6 A khihpizy liana chata zaozi pahiepa châ aw ta, a kuhzy cha pahleipadia aw ta, a pahleipadia aw âmo a vaw chhohiana vâ tlai ta.

7 Ei chyhsazy chata nâ heisai a chhuah thlâh ha ei ta; chônôchaipa lâta hruapa ama châ tarawpa ta, ahy hmah ano a palyupalihpa y chachei veih ei.

8 Hy Ephrai, kheihta ei cha pathlua thei aw! Hy Izarel, kheihta e ei cha pathlie thei aw! Kheihta e Admah hawhta ei cha paysa thei aw! Kheihta e Zebôi hawhta ei cha paysa thei aw! Ei chhôh liata ei pathipalôh a ei ta,ei ngiachhienazy cha a pa-iapa ta y ta.

9 Ei pathi-iana ru ngaitapa cha patlô leipa aw na ta, Ephrai cha pahleipadia a chhuah khao aw va na; kei cha chyhsapa châ leipa na ta. Khazohpa châ tlôh na ta; nâma liata a ypa Mo Pathaihpa cha, khihpi cha a vaw ngia hnao aw va na.

10 ABEIPA cha zi aw ei ta, chakeibarôhneipa hawhta a rôh awpa cha; chatatlyh, a rôh tlai aw ta, chatawhcha notla lâ tawhta a sawzy cha ama kaw râ ngâ aw.

11 Izi râh tawhna chata rieta hawhta, Asuria tawhna chata vachhuh hawhta mathlaw pakaipa ta amâ vy aw, ama o ei pahrâsa aw, ABEIPA ta a tah.

Haiphiana nata taolana vâta Ephrai chhoreina a chânazie

12 Ephrai chata haipa bie ta na pado ta, Izarel chhôhkhapazy chata dôna ta; Zudah chhaota Khazohpa lâ pachâ leipa ta, Mo Pathaihpa ngâchhihpa liata chhao. 

Hosia (Hosea)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10	Bo 11	Bo 12	Bo 13	Bo 14

Hôsia 12

Hôsia 12

1 Ephrai chata thli ta apasa ta, nochhi thlih cha zi tyh ta; haipa bie nata roryhrapa papôhsa rili ta, Asuria nata bie hrai ei ta; Izi lâta sathaw a phaoh.

2 ABEIPA chata Zudah chô liata chhao a eina awpa a hnei hra, Zakaw cha a yzie lymâ hawhta hrie aw ta; a hmotaozie lymâ hawhta viari a thô aw.

3 Chhi liana chhao khata a unawhpa cha a phei ngavâhmaothy liata vaw patu ta; a vaw pitloh nata Khazohpa a pia ta.

4 Vâlyuhchâpa a pia ta pahnie haw ta, cha ta, khokheina a haw ta: Bethel su liana chata ano hmô haw ta, cha liana chata eima hnohta bie reih ta.

5 ABEIPA tlai, Pheisaihzy Khazohpa cha, ABEIPA tahpa cha ano pahnona a châ.

6 “Chatanachata nâ chata na Khazohpa lâ a heih la; ngiachhiena nata pachiana hmâh la, na Khazohpa liana chata khâ a pahnie teh,” tah ta.

7 Sôhdaopa a ku liata khopathliana dôna a y, pasaipa-i a khoh.

8 Ephrai chata, “Ei hneirôh kaw haw, ei pahneirôhsa haw na: ei raihria zydua liata hra cha,” tah ta. Keima liata paraona hmo moleipa hmô awpa y va.

9 Châhrasala kei he Izi râh tawhna khata ABEIPA na Khazohpa cha châ na ta; kyhchhi no hawhna khata poh-o liata ei cha pahrâsa heih aw.

10 Hrohsopazy hnohta chhao bie reih tyh na ta, aluahnazy papôh na ta; hrohsopazy hmâpa ta pakhona ei tao tyh.

11 Kilia cha hmoparaona châ vei ma? Khâpa hrao leipa ama châ mâ tâh; Kilkal liana cha viahchao tôhpa hlâ tyh ei ta; ama maisâhzy cha leipalie tlâh liata alô pahmaohpa hawhta ama châ.

12 Zakaw cha Arama râh lâta a râ ta, Izarel chata lahpinô châta a chakao, lahpinô mâ châta mietahkupa a vaih.

13 Hrohsopa hmâpa ta Izarel cha Izi râh tawhta ABEIPA ta chhihtha ta, hrohsopa hmâpa ta hrôbieh hra ta.

14 Ephrai hra chata a hie pahâh ngaita ta; chavâta a thisaih palopa cha ano chô liata tla ta, a reipachhiena cha ano chô liata ABEIPA ta a patlasa aw. 

Hosia (Hosea)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10	Bo 11	Bo 12	Bo 13	Bo 14

Hôsia 13

Hôsia 13

Ephrai rao khai nawpazie chhochhieliena

1 Ephrai ta bie a reih khiahtala chyhsazy amâ chalyu; Izarel chyhsazy hry liata pasâhsapa tlai châ ta, Baal lâta a pao rakha tawhna deikua cha a thi haw.

2 Atahmâ zy he molei rili ei ta, ama tâkâri ta nohthlahpa leipa a tao ei ta, âmo pachânazie lymâ hawhta nohthlahpa cha; cha zydua cha zôthaipazy taopa châ tarawpa ta. Atheihna a hlâtuhpa maih chata, Viahchao taw cha sy mawh sy! ama tah tyh.

3 Chavâta tihu hawhta nata diati sôkha ta a lei hai tyhpa hawhta zy, sawhri liata sawsipa, khisô ta phaohpa hawhta zy, meikhu puana meikhu hawhta zy ama châ aw.

4 Kei deikua he Izi râh tawhta ABEIPA na Khazohpa cha châ na ta; keima leipa ta cha Khazohpa hropa pahno beih leipa chi ta. Keima leipa heta cha pachhatuhpa hropa y veih ei.

5 Râh chawhkaraipa râhpathohpa liata chakao tyhtuhpa kha châ na ta.

6 Ama niepa topa liata rihbiepa ta y ei ta, ama rihbiena cha ama pathipalôh ta apalai tyh ta, chatanachata eina my haw ei.

7 Chavâta âmo chata chakeibarôhneipa hawhta châ na ta, keichho hawhta lâpi liata âmo ei byh aw.

8 Chavyh a taw a pahleipa hawhta âmo adyuh aw na ta, cha su liana chata chakeibarôhneipa hawhta âmo ei nie khai aw, lyurâhpa sazy chata âmo a hrichheih khai aw.

9 Hy Izarel, ei cha pahleipadia aw; ahy cha bao thei?

10 Na khihpi zydua cha atahmâ khataih lâ a y haw?” Abei nata hyutuhpazy na pie teh, “na tahpazy na pachiatuhpazy cha khataih lâ ama y?

11 Ei pathi-iapa ta abei cha pie na ta, ei hiehâhpa ta ei la haw heih.

12 Ephrai hmoparaona cha pachârôhpa châ ta,a moleina cha pachôpakhypa a châ.

13 Chanô sawzeipa pachârôhna hawhpa cha a chô liata a vaw tlô aw, ano cha sawchapaw so leipa a châ; a daihti ta liata nawh vaw pina su liata y tlôh va.

14 Sheôl ku tawhtapa âmo ei chatlai aw ma? Thina tawhtapa âmo ei pachha aw ma? Hy thina, na hri-iazy cha khataih liata a y? Hy Sheôl, na paraona cha khataih liata a y? Rona cha ei mokhaoh tawhta nyupa a châ aw.

15 A unawhzy hry liata thlao a chhi chaipa châ hra sala, nochhi thlih vaw pathli aw ta, râhpathohpa tawhta ABEIPA hu tlai cha a vy hai na; a tihnawzy cha kua haw ta, a tikhaohzy cha a chawhkarai aw; hmobao phapa zydua,a ryu cha a parao khai aw.

16 Samari rohryhrapa ta a y aw, a Khazohpa chô liata aty tlôh ta; zaozi ta papaopa ta y aw ei ta, ama hawsaizy cha taichheipa ta y aw ei ta, ama chanô, saw a phaohpa cha hriechheipa ta ama châ aw. 

Hosia (Hosea)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10	Bo 11	Bo 12	Bo 13	Bo 14

Hôsia 14

Hôsia 14

Izarel cha ABEIPA lâta kua awpa ta chhoreina a châzie

1  Hy Izarel, ABEIPA na Khazohpa lâna chata kua teh, na hmoparaona vâ tlaita na pao haw hih.

2 Bie cheina chôta ABEIPA lâta kua heih la, “Hmoparaona zydua cha la khai la; aphapa maih a pyh mah.y; chatanachata alyna hnei heih aw pi ta, nâ lâta reithaina eima vaw pie ha aw.

3 Asuria chata maniah pachha leipa aw ta, arâzy chô liata kiah aw ma pi; eima ku hmotaopazy hnohna chata,‘Eima Khazohpa nama châ na,’ tahkhao hra aw ma pi. Hârapazy chata nâma liana heta ngiachhiena ama vaw hmô tyhpa châ tlôh ta,” tah teh u.

4 Hnôh lâ amâ syna he patlâh aw na ta; âmo tawhtapa ei pathi-iana cha a pai ha aw, âmo cha ama kyh ei pachâ aw.

5 Izarel liana cha diati pasopa hawhta châ aw na ta; ano cha lili hawhta vaw pawh aw ta, Lebanaw tho hawhta thari a pathla aw;

6 a chiahzy cha thata pazawh aw ta, angiazie cha li thô hawh tlai châ aw ta, Lebanaw hawhta aroh a pahâh aw.

7 A nohdi liata a pahrâpazy cha vaw kua aw ei ta, sa hawhta hroh heih aw ei ta; krezôh hawhta a pathlu ngâ aw,a laiseihzie cha Lebanaw kresawti hawhta a châ aw.

8 Ephrai, nohthlahpa nata akaona khâpa e a hnei? a reihtuhpa nata pa-ituhpa ei châ. Kei cha meisa tho hrohpa hawhta châ na ta, na thei phapazy cha keima liatahpa a châ na.

9 Chyhsa sopa ta cha he hmozy he pahno se; a pachâpa maihta ama pahno aw; ABEIPA lâpizy cha a do ta, chysa sopazy ta amâ chhih awpa châ tlôh ta, hmoparaotuhpa deikua cha a chapia aw. 

Hosia (Hosea)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10	Bo 11	Bo 12	Bo 13	Bo 14