Ezra 1

Ezra 1

Kôrasa a vaw beina (2 Tr 36: 22-23,)

1 Persia beipa Kôrasa a bei tua kô ta, Zeremiah pakah ta ABEIPA bie cha a tlô paki thei nawpa ta a khihnarâh zydua liata pathâhsa khai awpa nata ro awpa ta ABEIPA ta Persia beipa Kôrasa pathipalôh cha pathyu ta:

2 “Persia beipa Kôrasa chata he tana heta a tah: Khizaw khihnarâh zydua cha ABEIPA avâ Khazohpa chata na pie haw ta, Zudah râh liata Zerusale liana chata a o sapa awpa ta bi eina pie.

3 Nama hryta ano chyhsa zy maih hnohta a Khazohpa cha y mawh sy, chatanachata Zudah râh liata Zerusale lâna chata khy sala, ABEIPA Izarel sahlao Khazohpa o Zerusale liata a ypa cha sa mawh sy, ano cha Khazopa a châ;

4 chatanachata ahyrai, khataih su liata rai, ama yna liata a laibâhpa maih cha ama yna su liata chyhsa zy chata Zerusale liata a ypa Khazohpa o châta âmo lôhthai ta, ama thyupa rei leipa ta, tâkâri zy, ngôh zy, hmobaoh zy, sahroh zy ta vaw bao mawh sy,” tahpa ta.

Seichâpenawh Zerusale lâ ama kuana

5 Chatanachata Zudah nata Benzami chi liata chhôhkha pawhrâh viapa zy, theihthaipa zy, Livai sahlao zy, Zerusale liata ABEIPA o sa awpa ta Khazohpa ta ama pathipalôh a pathyupa zydua cha thyu haw ei ta;

6 âmo lôhthai ta a thyupa rei leipa ta, ama chheipâh liata chyhsa zydua chata tâkâri ta taopa hmobaoh zy, ngôh zy, hmodâh zy, sahroh zy hmo sôh ngaitapa zy pie ei ta, ama ku tha patlô ei ta.

7 Abei Kôrasa chhaota Nebukaneza ta ABEIPA o liata hmobaoh Zerusale tawhta a lapa, a khazohpa o liata a sopa zy cha la heih ta.

8 Chazy tlai cha Persia beipa Kôrasa chata a vaotuhpa Mithareda palasa ta, reih ta, Zudah pawhrâhpa Shebaza hlâ ta.

9 Hezy he a hluhna zie cha a châ: ngôh rahô sythôh, tâkâri rahô sâh kha, chaizôh syno nata miachaki,

10 ngôh nyu sythôh, tâkâri nyu chi nanopa za palih nata miahrawh, hmobaoh hropa sâh kha zy chhaota;

11 ngôh nata tâkâri hmobaoh zydua cha sâh pangawh nata za palih a châ. Seichâpa zy cha Babylaw tawhta Zerusale lâ amâ chhi nona khata Shebaza ta he zydua he cheih ta. 

Ezra (Ezra)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10

Ezra 2

Ezra 2

Seichâna tawhta a vaw kuapa zy

1 Zudah râh liatahpa seichâna ta a chhipa Babylaw beipa Nebukaneza ta Babylaw lâta a chhipa; Zerusale nata Zudah lâta a kua heihpa chyhsa to ama khih lâ chyuta a dipa zy cha hezy he ama châ.

2 He sahlao he Zerubabel zy, Zesua zy, Nehemia zy. Seraiah zy, Relai zy, Môdekai zy, Bilsa zy, Mispa zy, Bikvai zy, Rehu zy, Baanah zy hnohta a kuapa ama châ.

Izarel mozy paw tlohpa hluhna zie cha:

3 Paro pathlazy cha thy no nata za kha nata sysari nata pano.

4 Shephatiah pathlazy cha za thôh nata sysari nata pano.

5 Arah pathlazy cha za sari nata sysari nata papangawh.

6 Pahamôaba pathla hry liata Zesua nata Zôaba pathlazy cha sâh no nata za charie nata pahrawhleino.

7 Elama pathlazy cha sâh kha nata za no nata sypangawh nata papalih.

8 Zatu pathlazy cha za chaki nata sypalih nata papangawh.

9 Zakai pathlazy cha za sari nata sycharu.

10 Bani pathlazy cha za charu nata syno nata pathôh.

12 Azkada pathlazy cha sâh kha nata za no nata syno nata pano.

13 Adônika pathlazy cha za charu nata sycharu nata pacharu.

14 Bikvai pathlazy cha sâh no nata sypangawh nata pacharu.

15 Adina pathlazy cha za palih nata sypangawh nata papalih.

16 Atera pathlazy hryta Hezekiah pathlazy cha sychaki nata pacharie.

17 Bezai pathlazy cha za thôh nata syno nata pathôh.

18 Zôrah pathlazy cha za kha nata pahrawhleino.

19 Hasu pathlazy cha za no nata syno nata pathôh.

20 Kiba pathlazy cha sychaki nata papangawh.

21 Bethlehe pathlazy cha za kha nata syno nata pathôh.

22 Netôpha mozy, sypangawh nata pacharu.

23 Anathô mozy, za kha nata syno nata pacharie.

24 Azamave pathlazy cha sypalih nata pano.

25 Kiriathari zy, Kephirah zy, Berô pathlazy cha za sari nata sypalih nata pathôh.

26 Ramah nata Keba pathlazy cha za charu nata syno nata pakha.

27 Mikmasa mozy, za kha nata syno nata pano.

28 Bethel nata Ai mozy, za no nata syno nata pathôh.

29 Nebô pathlazy cha sypangawh nata pano.

30 Makabi pathlazy cha za kha nata sypangawh nata pacharu.

31 Elama hropa pathlazy cha sâh kha nata za no nata sypangawh nata papalih.

32 Hari pathlazy cha za thôh nata syno.

33 Lôda zy, Hadi zy, Ônô pathlazy cha za sari nata syno nata papangawh.

34 Zerikô pathlazy cha za thôh nata sypalih nata papangawh.

35 Senah pathlazy cha sâh thôh nata za charu nata sythôh.

36 Theihthaipa zy: Zesua chhôhkha zy hry liata, Zedaiah pathlazy cha za chaki nata sysari nata pathôh.

37 Ima pathlazy cha sâh kha nata sypangawh nata pano.

38 Pashu pathlazy cha sâh kha nata za no nata sypalih nata pasari.

39 Hari pathlazy cha sâh kha nata pahrawhleisari.

40 Livai chizy: Hôdavi pathla Zesua nata Kadmiel pathlazy cha sysari nata papalih.

41 Hla satupa zy: Asapha pathlazy cha za kha nata syno nata pacharie.

42 Ochhivaihtuhpa pathlazy: Shaluma pathlazy, Atera pathlazy, Talmô pathlazy, Aku pathlazy, Hatita pathlazy cha ama zydua ta pahlypa ta za kha nata sythôh nata pachaki.

43 Achhyna-o chakaotuhpa zy: Ziha pathlazy, Hasupha pathlazy, Tabao pathlazy,

44 Kerô pathlazy, Siaha pathlazy, Pado pathlazy,

45 Lebanah pathlazy, Hakaba pathlazy, Aku pathlazy,

46 Haka pathlazy, Shalmai pathlazy, Hana pathlazy,

47 Kidel pathlazy, Kaha pathlazy, Reaia pathlazy,

48 Rezi pathlazy, Nekôda pathlazy, Kazama pathlazy.

49 Uza pathlazy, Pasia pathlazy, Besai pathlazy,

50 Asnah pathlazy, Nephuse pathlazy,

51 Bakbu pathlazy, Harhu pathlazy,

52 Bazlu pathlazy, Mehida pathlazy, Harsa pathlazy,

53 Bakô pathlazy, Sisera pathlazy, Temah pathlazy.

54 Neziah pathlazy, Hatipha pathlazy.

55 Sawlawmaw chakaotuhpa zy pathlazy: Sôtai pathlazy, Hasôphera pathlazy, Peruda pathlazy,

56 Zalah pathlazy, Dakô pathlazy, Kidel pathlazy,

57 Shephatiah pathlazy, Hati pathlazy, Pôkerehazibai pathlazy, Ami pathlazy,

58 Achhyna-o chakaotuhpa zydua nata Sawlawmaw chakaotuhpa sahlao pathlazy cha za thôh nata sychaki nata pano.

59 He sahlao he Telmelah tawhta zy, Telhasa tawhta zy, Keru tawhta zy, Adana tawhta zy, Ima tawhta zyta a khypa sahlao châ ei ta, châhrasala ama mahpaw zy pho nata ama pathla lymâ zy Izarel mo ama châpa nata châ leipa a laichadai thei leipa ei ta:

60 Delaiah pathlazy, Tôbiah pathlazy, Nekôda pathlazy cha za charu nata sypangawh nata pano ama châ.

61 Theihthaipa hry liatahpa: Habai pathlazy, Hakôza pathlazy, Kilia chyhsa Barzilai sawchanô hry liatahpa lahpinô ta hneipa ta ama moh a phaohpa Barzilai pathlazy cha.

62 Chazy sahlao chata pathlatuhpa laichadai a tlôhpa ta rona liana chata ama moh rona tlua ei ta, châhrasala hmô leipa ei ta, chavâta pathaih leipa hawhta pachâpa ta y ei ta ama theihthaipa châna cha pabâ ei ta

63 Tirsatha chata ama hnohta, “Urim nata Thumim a hneipa theihthaipa a dua hlâ lei cha hmo pathaihpa zy cha nie thei aw veih eichi,” tah ta.

64 Zawpi pôhpakhypa zydua cha thy palih nata sâh no nata za thôh nata sycharu châ ei ta,

65 ama chakaotuhpa chapaw nata chanô sâh sari nata za thôh nata sythôh nata pasari rei leipa ta; hlasatuhpa chapaw nata chanô za no hnei hra ei ta.

66 Ama arâ cha za sari nata sythôh nata pô charu châ ta, ama sabaitu cha za no nata sypalih nata pô pangawh châ ta,

67 ama râraoseihpa cha za palih nata sythôh nata pô pangawh châ ta, ama alâ cha sâh charu nata za sari nata syno a châ.

68 Zerusale liata ABEIPA o ama tlô nata chhôhkha pawhrâhpa thokha zy chata Khazohpa o cha a su ualuapa liata padua heih nawpa ta aly ngaitapa ta pie ei ta;

69 ama pie theipa hawhta o sana thyupakhyna châta ngôh darik thy charu nata sâh kha, tâkâ minas sâh pangawh, theihthaipa chysia za kha pie ei ta.

70 Theihthaipa zy, Livai chizy, vâtlâh thokha zy cha Zerusale nata a chheipâh ta pahrâ ei ta; hlasatuhpa zy, ochhivaihtuhpa zy nata achhyna-o chakaotuhpa sahlaozy cha ama khihzy liata y ei ta; Izarel mo zydua cha âmo khih liata y hra ei ta. 

Ezra (Ezra)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10

Ezra 3

Ezra 3

Achhyna padua heihna zie

1 Chatawhcha thla sarina a vaw tlô nata, Izarel mozy cha khihzy liata ama y nona chata chyhsa zy cha reikha tlapa ta Zerusale liata a pakhy ei ta.

2 Chatanachata Zôzada sawchapawpa Zesua nata a unawhpa theihthaipa zy nata Shaltiel sawchapawpa Zerubabel nata a unawhpa zy cha thyu ei ta, Khazohpa chyhsa Mawsi ryhpa liata ropa hawhta raopa hlâna châta Izarel zy Khazohpa maisâh tao ei ta.

3 Maisâh cha a su ualuapa liana chata padua ei ta, cha râh liata a ypa zy cha chi kaw tlôh ei ta, maisâh liana chata ABEIPA chata raopa hlâna zy hlâ ei ta, my nata zâlâ ta raopa hlâna cha ama hlâ tyh.

4 Ama ropa hawhna khata byureih zy kyhchhi cha hnei ei ta, nohchareih ta tao awpa rakha raopa a yzie ta hawh lymâ ta nohchareih ta raopa hlâna cha hlâ ei ta,

5 cha hnôh lâna chata ama nohchareih raopa hlâna zy, thla thiehpa hlâna zy, ABEIPA chata kyhchhi noh ama raopa amâ ôna maihta hmohlâpa zy, âmo lôhthai ta hlâpa, ABEIPA lâta aly ngaitapa ta hlâ tyhpa zy cha hlâ ei ta.

6 Thla sarina, noh kha tawhta raopa hlâna zy ABEIPA lâta hlâ pathao ei ta. Châhrasala ABEIPA achhyna-o lôbô cha bô mâh leipa ei ta.

7 Alô a daihtuhpa nata tho raihriatuhpa zy chhao tâkâ pie ei ta; chatawhcha Persia beipa Kôrasa a pasaina zie lymâ hawhta sidy tho Lebanaw tawhta tilaipi, Zôpa taihta vaw cheih awpa ta Sidaw mozy nata Tyre mozy cha niepa zy nata dopa zy nata sathaw zy pie ei ta.

Achhyna-o sa pathipa a châ

8 Chatawhcha Zerusale liata Khazohpa o ama tlôna kô nona, thla nona liana chata Shaltiel sawchapawpa Zerubabel zy, Zôzada sawchapawpa Zesua zy ama unawhpa theihthaipa nata Livai chi hropa zy nata seichâna tawhta a puapa Zerusale lâ a khypa zydua chhaota tao pathao ei ta. Livai zy cha kô synopa tawhta a chôlâ tahpa zy cha ABEIPA o sapa hyutuhpa châta rao ei ta.

9 Zesua cha a sawchapawpa zy nata a unawhpa zy chhao, Kadmiel nata a sawchapawpa zy chhao, Zudah sawchapawpa zy chhao chata Khazohpa o a satuhpa zy cha mohôh chyu ei ta, Henada nata Livai sawchapawpa zy, ama sawchapaw zy nata ama unawhpa Livai chizy chhaota.

10 Chatawhcha a satuhpa zy ta ABEIPA o lôbô ama paryh nata theihthaipa zy cha ama chysia a bupa ta chiahmie chabapa ta Asapha sawchapawpa zy, Livai chizy, paotlâ zy chhaota Izarel beipa Davi taozie raopa hawhta, ABEIPA reithai awpa ta paduasa ei ta;

11 “Ano cha pha tlôh ta, a zawngiahna cha Izarel mozy chô liata chhâzaw ta a y aw,” tahpa ta ABEIPA reithaipa nata ano lâta alyna bie reipa ta, hla ta a chhy ei ta, ABEIPA o lôbô ama bô hawpa vâta ABEIPA ama reithaina liana chata zawpi zydua cha thata aw ei ta.

12 Theihthaipa nata Livai chi nata chhôhkha pawhrâhpa hluhpi a o hmiatuapa a hmôtuhpa pawpipa sahlao zy deikua cha ama mohmô liata he o lôbô ama bô nahta thata cha ei ta, chyhsa hluhpi cha amâ lypa vâta thata awh hra ei ta;

13 chatanachata chyhsa zy chata alypa vâta awh pa pyu nata zawpi chapa pyu cha panano thei leipa ei ta, zawpi cha a paro ngaitapa ta awh ei ta, ama pyu cha lâhlapi tawhta. 

Ezra (Ezra)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10

Ezra 4

Ezra 4

Khakhaipazy rai chalihsana zie

1 Zudah mo nata Benzami mozy khakhaipazy chata seichâna tawhta a puapa sahlao ta ABEIPA Izarel zy Khazohpa achhyna-o ama sa tahpa ama thei nahta,

2 Zerubabel nata ano chhôhkha pawhrâhpazy lâta vawh ei ta, ama hnohta, “Eima cha sakhei aw; keimo chhaota nama tluapa hawhna heta nama Khazohpa cha tlua hra pi ta, he liata maniah a kaw chhituhpa Asuria beipa Esahadô a bei noh tawhna khata ano lâta atheihna eima hlâ tyh,” tah ei ta.

3 Châhrasala Zerubabel nata Zesua nata Izarel chhôhkha pawhrâhpa hropa zy chata ama hnohta, “Eima Khazohpa o sana liana heta namâ hlao hrana kyh rai y vei; Persia beipa Kôrasa bie maniah a piepa hawhta keimo deita ta ABEIPA Izarel zy Khazohpa châta eima sa aw,” tah ei ta.

4 Cha râh liata chyhsa zy chata Zudah mozy ku cha tha pazeisa ei ta, ama o sapa cha patypamâ ei ta,

5 Persia beipa Kôrasa a bei chhôhta Persia beipa Daria a beina taihta ama hmotaopa a chhuahpa zy khâpa leipa pachâsa nawpa ta reikheituhpa zy pahrua ei ta.

6 Ahasuara a bei tua nota Zudah râh nata Zerusale liata a ypa zy leihna châ tao ei ta.

7 Chatawhcha Artazerzia a bei nona khata Bisla zy, Mithareda zy, Tabel zy nata ama viasa hropa zy chhaota Persia beipa Artazerzia cha châ paphao ta; ama châ ropa cha Suria mozy chata Suria reih ta ropa a châ.

8 Hyutuhpa Rehu nata châ rohtuhpa Shimsai chata Zerusale liata chyhsa zy leipa ta, Persia beipa Artazeria cha he hawhpa châ he paphao ei ta:

9 Hyutuhpa Rehu nata châ rohtuhpa Shimsai nata ama viasa zydua nata ryureituhpa zy, râh luhpa zy, hyutuh chaipa zy nata Babylaw nata Ereka chyhsa zy, Elami Susa liata a ypa zy.

10 chyhsa rôhnah ngaitapa nata pha ngaitapa Ôsnapa a chhipa Samari khihzy nata Chavah Haosâ râh hropa zy liata sopa pho hropa zy chhaota ama châ.

11 Abeipa Artazerzia châ ama paphaopa cha he hawhna heta a châ: “Na chyhsa sahlao Chavah Haosâ nata râh hropa zy liata a ypa zy cha,

12 nâ tawhta Zudah chyhsa a khypa zy cha eima hnohta Zerusale lâ a vy ei ta. Khih aty thaipa nata moleipa cha padua pathi ei ta, a kuh cha paloh haw ei ta, a lôbô cha ama tao pathi haw tahpa abei chata vaw pahno mawh sy.

13 He khih he paduapa ta a kuhzy ama tao khai nata chhie zy, hmo hneipa mâ zy nata lei mâ zy cheih khoh leipa aw ei ta, a chhâna lâta cha abeizy châta pasa taona a vaw châ aw tahpa abei ta pahno mawh sy.

14 Abei o liata alôh a paliepa eima châpa vâta abei ngia leina hmôpa he eima châta a sia leipa châ tlôh ta,

15 chavâta na mahpaw zy hmo pahnona rona châbu liata tlua nawpa ta na pahno nawpa ta châ paphao pi ta, abei eima pahnosa. Châ rona châbu liana chata hmôpa ta, he khih he aty hmâhpa khih a châpa nata abeizy nata ama khihnarâh zy chata hmo chi a chhihpa hluhpi châpa ta chhâzaw ta atypa ta, cha vâna chata he khih he roryhrapa ta a y.

16 He khih he paduapa ta, a kuh zy ama paloh khai khiahtala, Chavah Haosâ lâna chata tovyuh hnei leipa ta na y aw tahpa abei eima pahnosa,” tah ei ta.

17 Abei chata hyutuhpa Rehu nata chârohtuhpa Shimsai nata ama viasa hropa Samari râh nata Chavah Haosâ lâta a ypa zy cha a chhyna châ paphao ta, “Thlahlôhna y mawh sy.

18 Keimo lâta nama châ paphaopa kha ei hmiakô liata asiapata ta reih ei ta.

19 Chatawhcha bie pie na ta, tlua ei ta, he khih he hlâno tawhta abei chôta aty tyh ei ta, cha liana chata atyna nata atymâna a y tyh tahpa cha eima hmô.

20 Zerusale liana khata abei hmotaothei ngaitapa Chavah Haosâ râh taihta ryu a reipa zy chhao y haw ei ta, chhie zy, hmo hneipa mâ zy, leimâ zy la tyh ei ta.

21 Kha chyhsa zy kha pabâsa ula, bie ei pie hlâ lei cha khih cha padua kha se.

22 Haw cheita khah u; khazia e abeizy chata raona hmo pei ngaitapa a vaw tlô aw?” tah ta.

23 Chatanachata Abei Artazerzia cha cha Rehu nata chârohtuhpa Shimsai nata ama viasa zy hmiakô liata ama rei khai nata a chatlie ngaitapa ta Zerusale lâ Zuzy lâta sie ei ta, biehneina nata tha chahra ta pabâsa ei ta.

24 Chatanachata Zerusale liata Khazohpa o ama sapa cha bâhsai haw ei ta; Persia beipa Daria a beina kô nona taihta a chalihsaipa châ ta. 

Ezra (Ezra)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10

Ezra 5

Ezra 5

Achhyna-o cha palohpa a châ

1 Chatanachata hrohsopa zy, Hakai nata Idô sawchapawpa Zekaria zy chata Zudah nata Zerusale liata Zu a ypa zy hnohta Izarelzy Khazohpa moh ta bie reih ei ta.

2 Chatanachata Shaltiel sawchapawpa Zerubabel nata Zôzada sawchapawpa Zesua chata Zerusale liata Khazohpa o cha pathao heih ei ta; ama hnohta âmo baopa ta Khazohpa hrohsopa zy cha y ei ta.

3 Cha daihti ualuana chata Chavah Haosâ râh a vaotuhpa Tatenai nata Shethabôzenai nata ama viasazy cha ama hnohta sie ei ta, ama hnohta he tana heta reih ei ta, “He o sa awpa nata he kuh paloh awpa heta ahyma bie châ pie ei?” tah ei ta.

4 He hawhna heta ama hnohta, “He o satuhpa zy moh he ahyzy ma ama châ?” tah ei ta.

5 Châhrasala Khazohpa moh cha Zu machâ zy chô liana chata mohôhpa ta y ta, Daria lâta ama bie cha tlôkheipa ta achhyna a vaw tlô hlâ lei cha pabâsa hlei leipa ei ta.

6 Chavah Haosâ râh a vaotuhpa Tatenai nata Shethabôzenai nata a viasa Chavah Haosâ ta a ypa râh chahlôtuhpa zy ta Abei Daria lâta ama châ paphaopa cha;

7 ano lâta châ ama phaopa liana chata he hawhna heta roh ei ta: Abei Daria hnohta thlahlôhna kipa y mawh sy.

8 He he abei ta vaw pahno mawh sy, Zudah râh liata Khazohpa rôhnah ngaitapa o alô lai ngaitapa ta sapa nata pâchhô tho ta taopa tiama ngaitapa nata a phapa ta ama vaw sa hawna lâna chata sie pie ta.

9 Chatanachata he o sa awpa nata he kuh paloh awpa heta ahyma bie châ pie ei?” tahpa ta ama machâ zy hiahri pi ta.

10 Ama hyutuhpa mohzy cha roh pi ta, eima cha pahnosa pasia thei nawpa ta ama mohzy chhao hiahri pi ta.

11 Âmo chata he tana heta maniah achhy ei ta; Alei nata avâ Khazohpa chakaotuhpa zy châ pi ta, khati kô sy sapa Izarel beipa rôhnah ngaitapa pakha sapa a palohpa o cha eima sa pathi.

12 Anodeikuacha eima mahpaw zy ta avâ Khazohpa cha pathi-iana taihta palôh châ leipa ta ama paysapa vâta Kaldia mo Babylaw beipa Nebukaneza ku liata pie ta, ano chata he o he parao ta, chyhsa zy cha Babylaw lâta a chhi ta.

13 Châhrasala Babylaw beipa Kôrasa a bei tua kô ta Abei Kôrasa chata he Khazohpa o he sa heih awpa ta bie pie ta.

14 Khazohpa o liata ngôh nata tâkâri ta taopa hmobaoh Zerusale liata Khazohpa o liatahpa Nebukaneza ta a lapa, Babylaw liata achhyna-o liata a sopa zy cha Abei Kôrasa chata Babylaw achhyna-o tawhtapa la ta, chyhsa pakha a moh Shebaza râh a vaotuhpa châta a taopa châ pi ta;

15 a hnohta, “He hmobaohzy he la la, sie la, Zerusale liata achhyna-o liata soh la, chatanachata achhyna-o cha a su ualuapa liata sa pathipa châ mawh sy,” tah ta.

16 Chatanachata Shebeza tlai cha sie ta, Zerusale liata achhyna-o lôbô cha bô ta; cha rakha tawhta atahmâ taihta sapa châ thlâh ha ta. Châhrasala paloh leipa châ thlâh ha ta,’ tahpa ta.

17 Chatanachata abei a pha a tahna zie a châ khiahtala, cha hawhna cha a châ tlai tlyma Babylaw liata abei sôh o liatahpa cha tlua sala, chatawhcha abei chata he kyh liana heta a khonazie na chho mawh sy,” tahpa ta. 

Ezra (Ezra)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10

Ezra 6

Ezra 6

1 Chatanachata Abei Daria chata bie pie ta, Babylaw liata ama ryu pahmaohna châbu sona o cha tlua ei ta.

2 Media râh liata Ekbatana khih liata abei o liata châbu chatypa hmô ei ta, cha liana chata a phapa ta a vao awpa ta he hawhna heta ropa y ta,

3 “Abei Kôrasa a bei tua kô ta, Abei Kôrasa chata bie pie ta; Zerusale liata Khazohpa o kyh liana chata ama atheihna o cha sa sala, chatawhcha a lôbô cha â ipa ta bôpa châ mawh sy; chatawhcha a sâhna lâ cha dy sycharu, a kawhna lâ cha dy sycharu châ aw ta,

4 alô laipapi tlâh tho nata thophiapa thiehpa tlâh kha châ aw ta; chatawhcha pahryupa zydua cha abei o tawhta piepa châ sala.

5 Khazohpa o liata ngôh nata tâkâri hmobaoh Nebukaneza ta Zerusale achhyna-o tawhta a lapa Babylaw lâta a cheipa cha pakuapa châ sala; Zerusale liata achhyna-o liata a su ualuapa lâta kuakheipa ta Khazohpa o liata na soh awpa a châ aw,” tahpa ta.

6 “Chavâta Chavah Hoasâ râh a vaotuhpa Tatenai nata Shethabôzenai nata Chavah Haosâ ta a ypa nama viasa râh a vaotuhpa sahlao saih u, tlei teh u;

7 he Khazohpa o ama sapa he kheihta hmah tah khah u; Zuzy a vaotuhpa nata Zu machâzy chata he Khazohpa o he a su ualuapa liata sa ei se.

8 Cha dei châ leipa ta he Khazohpa achhyna-o ama sana liata he Zu machâzy chô liana heta nama tao awpa chhao bie ei cha pie aw ei; chatanachata Khazohpa o cha ama sa pathi nawpa ta, abei sôh Chavah Haosâ ta chhie hry liatahpa tlai chhao he chyhsa zy châna heta thlai hmâh awpa a châ, amâ phahla lei nawpa ta.

9 Chatawhcha avâ Khazohpa chata raopa hlâna awpa ta ama byuhpa maih viahchao tôh dawpa zy, mietahkupa tôhpa zy, mietahkupa taw zy, sa zy, alôh zy, kresawti zy, Zerusale liata theihthaipa zy bie lymâ hawhta noh chareih ta pie thlyu awpa a châ.

10 Chatanachata avâ Khazohpa cha rohpahâhpa ta atheihna zy hlâ thei aw ei ta, abei nata a sawchapawpa zy cha ama hroh parei nawpa ta thlah ama chhâpa thei hra aw.

11 Ahyrai he bie a pananopa maih, cha chyhsa vâna chata a pâkô phiapa ta, ano cha cha liana chata khaipâpa ta, a o cha ie sona su châta a châ aw tahpa bie ei pie hra.

12 Cha liata a moh a paysatuhpa Khazohpa chata Zerusale liata Khazohpa o parao a chhuahpa ta, he bie panano awpa ta a ku a hypa maih abei zydua nata pho zydua cha pahleipadia khai mawh sy. Kei Daria ta bie ei pie; thlai zyh awpa a châ,” tah ta.

13 Chatanachata Chavah Haosâ râh a vaotuhpa Tatenai nata Shethabôzenai nata a viasa zy chata Abei Daria châ paphaopa vâta cha hawhna chata thlai taopa ei ta.

14 Chatawhcha hrohsopa Hakai nata Ido sawchapawpa Zekaria bie reipa vâta Zu machâ zy a phapa ta sa ei ta. Izarel zy Khazohpa biepiepa hawhta nata Persia beipa Kôrasa nata Daria nata Artazerzia biepiepa hawhna khata sa ei ta; paloh haw ei ta;

15 he o he Abei Daria a kô charu a bei kô ta, Adar thla, noh thôh nota paloh ei ta.

16 Chatawhcha Izarel pathla theihthaipa zy, Livai chizy nata seichâna tawhta a puapa sahlao hrohsopa zy chata cha Khazohpa o ama hlâna cha aly ngaitapa ta hmâh ei ta.

17 Khazohpa o hlâna liana chata viahchao tôhpa za kha, mietahkupa tôhpa za no, mietahkupa taw za palih hlâ ei ta, Izarel zydua chata molei atheih nawpa ta Izarel pho hluhzie hawhta mie tôhpa pô hrawhleino.

18 Mawsi châbu liata a rohpa hawhta Zerusale liata Khazohpa chakao awpa ta theihthaipa zy nata Livai chizy cha âmo py chyu liata paysa ei ta.

19 Chatawhcha seichâna tawhta a puapa sahlao zy chata thla khana, noh hrawhleipalih noh cha zawpakhô noh châta hmâh ei ta.

20 Theihthaipa zy nata Livai chizy cha hmaohkha ta a pathai ei ta; âmo zydua châta pathai haw ei ta. Chatanachata seichâna tawhta a puapa sahlao zydua châta nata ama unawhpa theihthaipa zy nata âmo châta zawpakhô mietahkupa taw cha thie ei ta;

21 Izarel pathla seichâna tawhta a vaw puapa zy nata ABEIPA Izarel zy Khazohpa tlua awpa ta âmo sahlao a pazaopa zydua chata nie ei ta.

22 Viahchha thinô pahlao leipa kyhchhi cha aly ngaitapa ta noh sari hmâh ei ta; ABEIPA chata âmo cha palysa ta, Izarelzy Khazohpa, Khazohpa o sana liata ama kuh zy tha patlô awpa ta Asuria beipa palôhrupa cha âmo lâta a paheisa. 

Ezra (Ezra)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10

Ezra 7

Ezra 7

Ezra nata sahlaozy Zerusale ama vaw pangai

1 Cha hnôh lâna chata Persia beipa Artazerzia a bei nota, Ezra cha Babylaw tawhta khy ta, cha cha Seraiah saw châ ta, cha cha Azariah saw châ ta, cha cha Hilkia saw châ ta,

2 cha cha Shaluma saw châ ta, cha cha Zadôka saw châ ta, cha cha Ahitu saw châ ta,

3 cha cha Amariah saw châ ta, cha cha Azariah saw châ ta, cha cha Meraiô saw châ ta,

4 cha cha Zerahiah saw châ ta, cha cha Uzi saw châ ta, cha cha Buki saw châ ta,

5 cha cha Abisua saw châ ta, cha cha Phineha saw châ ta, cha cha Eliaza saw châ ta, cha cha theihthai bei chaipa Arawna saw châ ta;

6 Ezra cha chârohtuhpa ABEIPA Izarelzy Khazohpa a piepa Mawsi ryhpa a thai ngaitapa châ ta; ABEIPA a Khazohpa ta ano a khokheina lymâ hawhta abei chata a hiapa zydua cha pie lymâ ta.

7 Chatawhcha Abei Artazerzia kô sari a bei kô ta, Izarel pathla thokha zy, theihthaipa thokha zy, Livai chi thokhazy hla satuhpa thokha zy, ochhivaihtuhpa thokha zy, achhyna-o chakaotuhpa thokha zy cha Zerusale lâ khy ei ta.

8 Chatawhcha abei cha kô sari a bei kô, thla pangawhna liata, ano cha Zerusale lâ sie ta;

9 thla khana noh kha nota Babylaw tawhta pua ta, a Khazohpa ta ano cha vaih lymâpa ta, thla pangawhna noh kha noh ta Zerusale a tlô.

10 Ezra chata ABEIPA ryhpa cha pahnopa ta zyh awpa nata Izarel sahlaozy cha bieraopa zy nata pachiapa zy pachâ awpa ta a pathipalôh khâchâ tao ta.

11 He he abei Artazerzia ta theihthaipa Ezra chârohtuhpa ABEIPA biepiepa bie nata Izarel mozy châta a bieraopa zy a rohtuhpa tlai hnohta, a châ paphaopa bie a châ:

12 “Abeizy beipa Artazerzia ta theihthaipa Ezra avâ Khazohpa ryhpa rohtuhpa hnohta,

13 ei khihnarâh chhôh liata Izarel chyhsa zydua nata ama theihthaipa zy nata Livai chizy Zerusale lâta âmo lôhthaita ta sie byuna a hneipa maih cha na hnohta sie awpa ta bie ei pie.

14 Nâ vaopa Khazohpa ryhpa lymâ hawhta Zudah nata Zerusale thâtih pasia awpa nata,

15 Zerusale liata a ypa Izarelzy Khazohpa âmo lôhthai ta abei nata a ryureituhpa zy ta ama piepa tâkâ nata ngôh a phaoh awpa ta abei nata a ryureituhpa pasari ta a cha tuapa ei châ ta,

16 Babylaw râh zydua liata na hmôpa hluhzie maih tâkâ nata ngôh âmo lôhthai ta zawpi zy nata theihthaipa zy ta ama piepa, Zerusale liata ama Khazohpa o châta aly ngaitapa ta ama piepa zy chhaota.

17 He tâkâ heta viahchao tôhpa zy, mietahkupa tawzy niepa nata dopa hlâ nawpa chhao chalei aw chi ta, Zerusale liata nama Khazohpa o liata maisâh liana chata na hlâ aw.

18 Tâkâ nata ngôh hmâ laibâhpa zy cha nama Khazohpa a ryh a tahna zie awpa hawhta, nâma nata na unawhpa zy ta a pha nama tahna zie hawhta tao muh vy.

19 Na Khazohpa o chakao nawpa ta hmobaoh ama cha piepa cha Zerusale liata Khazohpa lâta hlâ mah y.

20 Na Khazohpa o châta byuhpa hropa hmâh byuhna a y khiahtala abei sôh o liatahpa hmâh mah y.

21 “Kei Abei Artazerzia tlaita Chavah Haosâ râh sôh mokhâhtuhpa zydua cha: Theihthaipa Ezra avâ Khazohpa ryhpa rohtuhpa ta a cha hiapa maih cha,

22 tâkâ cha talent za kha, sâh cha khopathliana za kha, kresawti cha bath za kha, sathaw cha bath za kha, alôh cha khazie tahpa y hlei leipa ta piepa muh vy, tahpa ta bie ei pie.

23 Avâ Khazohpa ta bie a piepa maih cha, cha hawhna tlai cha avâ Khazohpa o châta taopa châ mawh sy, hiehâhna cha abei nata a sawzy khihnarâh chô liana heta khazia e a y aw tly.

24 Theihthaipa zy, Livai chizy, hlasatuhpa zy, ochhivaihtuhpa zy, achhyna-o chakaotuhpa zy, he Khazohpa o liata chakaopa zy he chhie zy, hmo hneipa mâ zy, leimâ zy chapacheisa lei awpa a châpa eima cha pahnosa hra.

25 “Chatawhcha nâ, Ezra y, nâ vaopa Khazohpa sona a cha piepa lymâ hawhta Chavah Haosâ ta a ypa sahlao zydua ama pachia thei nawpa ta, hyutuhpa zy nata ryureituhpa zy, na Khazopa ryhpa a pahnopa chyhsa zy rao la; a pahno leipa zy cha pachu teh u.

26 Ahyrai na Khazopa ryhpa nata abei ryhpa a zyh leipa maih cha thina taihta tlyma, khihnarâh tawhta papuapa ta tlyma, ama hmobao lapa ta tlyma patâhna o liata patâhpa ta tlyma, ama chô liata ryureina thlai a y awpa a châ,” tah ta.

27 Zerusale liata ABEIPA o pangia awpa ta abei he hawhta palôhrupa a paphaosatuhpa nata abei nata a ryureituhpa hmiakô nata abei molai ngaitapa sahlao hmiakô liata,

28 ei chôta ngiachhiena a paysatuhpa ABEIPA eima mahpaw zy Khazohpa cha reithaipa ta y mawh sy. ABEIPA eima Khazohpa eina ngiachhiena zie lymâ hawhta tha patlôpa ta y na ta, chatanachata ei hnohta a sie hra awpa ta Izarel hryta hyutuh viapa zy a tlyh na ta. 

Ezra (Ezra)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10

Ezra 8

Ezra 8

1 Hezy he Abei Artazerzia a bei nota Babylaw râh tawhta ei hnohta a khypa sahlao chhôhkha pawhrâhpa nata ama pathlazy moh cha a châ:

2 Phineha pathlazy hry liata Kesaoma, Ithama pathlazy hry liata Daniel, Davi pathlazy hry liata Hatu,

3 Shekaniah pathlazy, Paro pathlazy hry liata Zekaria, chapaw za kha nata sypangawh ama reipa chhaota.

4 Pahamôaba pathlazy hry liata, Zerahia saw Elihôenai, chapaw za no chhaota.

5 Zatu pathlazy hry liata Shekaniah saw Zahaziel chapaw za thôh chhaota.

6 Adina pathlazy hry liata, Zawnatha saw Ebeda, chapaw sypangawh chhaota.

7 Elama pathlazy hry liata, Athaliah saw Zesai, chapaw sysari chhaota.

8 Shephatiah pathlazy hry liata, Mikhael saw Zebadiah, chapaw sycharie chhaota.

9 Zôaba pathlazy hry liata, Zehiel saw Ôbadiah, chapaw za no nata pahrawhleicharie chhaota.

10 Shelômi pathlazy hry liata, Zôsiphiah saw chapaw za kha nata sycharu chhaota.

11 Bedai pathlazy hry liata, Bebai saw Zekaria, chapaw syno nata pacharie chhaota.

12 Azkada pathlazy hry liata, Hakata saw Zôhana, chapaw za kha nata pahrawh chhaota.

13 Adônika pathlazy hry liata, a hnôh chaipa châ ei ta, ama mohzy cha he he a châ, Eliphele, Zeiel zy, Shemaiah zy, chapaw sycharu chhaota.

14 Bikvai pathlazy hry ta, Uthai nata Zaku, chapaw sysari chhaota.

15 Ahava chavah lâta a lohpa liana chata hmaohkha ta paysa na ta, cha liana chata noh thôh y pi ta. Zawpi zy nata theihthaipa zy cha moh na ta, Livai pathlazy rai hmô khao leipa na ta.

16 Chatanachata pawhrâh viapa Elieza, Ariel, Shemaiah Elnatha, Zari, Elnatha, Natha, Zekaria, Mesula zy bieta na ta, pachutuhpa Zôiari nata Elnatha zy chhao,

17 chatawhcha Kasiphia su liata hyutuhpa Idô lâta tuah na ta, eima Khazohpa o liata chakaotu awpa ta a vaw chhi awpa ta Kasiphia su liata Idô nata a unawhzy achhyna-o chakaotuhpa sahlao lâta ama kei rei awpa chho na ta.

18 Khazohpa eina ngiachhiena vâta Mahli pathlazy hry liata, Izarel sawchapawpa, cha sawchapawpa Livai, Sherebiah a sawzy nata a unawh pahrawhleicharie chhaota;

19 Hasabiah, Merari pathlazy hry liata Zesai unawhzy nata a sawzy syno chhaota:

20 achhyna-o chakaotuhpa sahlao Davi nata ama molaipa zy ta Livai chizy chakao awpa ta ama piepa zy hry liatahpa achhyna-o chakaotuhpa sahlao za no nata syno chhaota na chhipa ta; ama zydua moh ropa chyu a châ.

21 Chatanachata eima Khazohpa hmiakô liata a panawh pi ta, ano lâta keimo nata eima sawzy nata eima hmobaoh zydua chhaota a phapa ta sie theina hia awpa ta, Ahava chavah liana chata nie leina kyh phuah na ta.

22 Eima Khazohpa khokheina cha ano a tluatuhpa zydua chô liata ama pha nawpa ta y lymâ ta, a hmotaotheina nata a hiehâhna deikua cha ano a heisaituhpa zy chô liata a y lymâ tyh,” tahpa ta abei lâta eima vaw rei hawpa vâta, lâpi liata eima khakhaipa zy hryta maniah bao awpa ta pheisaih nata arâ kiahpa chyhsa zy abei lâta hiapa cha nozachhihpa ta reih tlôh na ta.

23 Chatanachata nie leipa ta y pi ta, cha cha eima Khazohpa hiah chaimâh pi ta, eima hiana cha mania nahthlie ta.

24 Chatanachata theihthaipa pawhrâh viapa zy hry liatahpa pahrawhleino; Sherebiah nata Hasabiah nata ama unawhpa zy hry liatahpa pahrawh panano na ta.

25 Chatawhcha abei nata a ryureituhpa zy nata a molaipa zy nata cha liata a ypa Izarel zydua ta eima Khazohpa o châta ama hmo hlapa, tâkâri zy, ngôh zy, hmobaoh zy cha khopathliana ta ama ku liata ei hlapa cha tâkâri talent za charu nata sypangawh, tâkâri hmobaoh talent za kha, ngôh talent za kha,

27 ngôh biebu syno, darik sâh kha chyu, dawh pathliepa a ngia ngaitapa ngôh hawhpa a sopa hmobao miano châ ta.

28 Chatawhcha ama hnohta, “ABEIPA châta pathaisapa châ eichi ta, hmobaohzy chhao pathaisapa a châ; tâkâri nata ngôhzy he ABEIPA nama pawzy Khazohpa châta ama lôhthai ta hlapa sai a châ.

29 Theihthaipa pawhrâh viapa zy nata Livai chizy nata Izarel mozy chhôhkha pawhrâhpa hmiakô liata Zerusale liata ABEIPA o liata chhôhpadâhpa liata kho nama pathliah hlâ lei cha vaih ula, avao teh u,” tah na ta.

30 Chatanachata theihthaipa zy nata Livai chizy chata Zerusale liata eima Khazohpa o lâta cheih awpa ta tâkâri nata ngôh nata hmobaoh khopathliapa zy cha la ei ta.

31 Chatanachata Zerusale lâ sie awpa ta thla khana, noh hrawhleino noh ta, Ahava chavah tawhna chata pua pi ta; eima Khazohpa maniah ngiachhie ta, khakhaipa hry tawhta nata lâpi liata aru lâta a byhtuhpa zy tawhtapa cha maniha hrôbieh lymâ ta.

32 Zerusale cha tlô pi ta, cha liana chata noh thôh y pi ta.

33 A noh palih noh chata tâkâri zy, ngôh zy, hmobaoh zy cha eima Khazohpa o liata khopathliapa ta theihthaipa Uriah sawchapawpa Meremô ku liata hlâ pi ta, a hnohna chata Phineha sawchapawpa Eliaza y ta, chatawhcha ama hnohna chata Livai chi, Zesua sawchapawpa Zôzaba nata Binui sawchapawpa Noadiah zy y ei ta.

34 Rei khaipa nata khopathlia khaipa châ ta, a khopathliana hluhzi cha cha nona tlai chata roh khai ei ta.

35 Seichâna tawhta a puapa sahlaozy chata Izarel zy Khazohpa lâta raopa hlâna hlâ ei ta, Izarel zydua chata viahchao tôhpa pô hrawhleino, mietahkupa tôhpa sychaki nata pô charu; mietahkupa taw sysari nata pô sari, molei atheihna châta mie tôhpa pô hrawhleino, he zydua he ABEIPA lâta raopa hlâna sai a châ.

36 Abei bieraopa zy cha abei machâ zy nata Chavah Haosâ râh avaotuhpa zy cha chho ei ta; chatawhcha âmo chata zawpizy cha baopa ta Khazohpa o sapa cha pazaokhei ei ta. 

Ezra (Ezra)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10

Ezra 9

Ezra 9

Ezra thlahchhâna ta a palâhâhna

1 Cha hmozy tao khai nahta, molaipa zy chata, “Izarel mozy nata theihthaipa zy nata Livai chizy cha he râh chyhsa zy tawhna heta a panano hlei leipa ta, Kana mozy, Hiti mozy, Periza mozy, Zebu mozy, Amawna mozy, Môaba mozy, Izi mozy, Amawri sahlaozy hmotaopa pasichhih ngaitapa ama taopa hawhta tao hra ei ta.

2 Ama sawchanô zy cha âmo nata ama sawchapaw zy ta hnei thlâh ha ei ta; chatanachata chi pathaihpa cha he râh chyhsa zy nata pahlao pahli ei ta. Molaipa zy, ryureituhpa zy cha he paraona kyh liana heta a pawhra chaipa zy ama châ,” tahpa ta na vaw chho ei ta.

3 ‘Cha hmo cha ei pahno nahta ei viahpakao nata ei poh hrie na ta, ei sâ nata ei kâhmi phia na ta, a pachâna pahno leipa ta a tyu thlâh ha na ta.

4 Chatanachata seichâna tawhta a puapa sahlao paraona vâta Izarel zy Khazohpa bie ta a chalyupa maih cha kei lâta a vy ei ta, zâlâ atheihna daihti taihta a pachâna pahno leipa ta atyuh thlâh ha na ta.

5 Chatawhcha zâlâ atheihna daihti chata ei pachârôhna tawhta ei viahpakao nata ei poh a hriena chôta thyu na ta, pakhu paneih na ta, ABEIPA ei Khazohpa hmiakô liata ei bâh pazawh na ta:

6 Hy ei Khazohpa y, na lâta a vaw heihpa he ei no za ta, ei hmia zy a saih ngâ kaw, ei Khazohpa, eima paraona zy cha eima luh a pamôhna taihta pôh ta, eima thai leina châta avâ pha ta.

7 Eima mahpaw zy no tawhta atahmâ taihta thai leipa eima châ; eima paraona vâta eima abei zy, eima theihthaipa zy chhao, râh hropa abei patupa zy, zaozi ta thiepa zy, maophyuna zy a tyh pi ta, atanoh hawhna heta.

8 Chatawhcha atahmâ he eima Khazohpa ta eima mozy pavâhsa ta, seichâna ta eima ypa maniah pahra ta, a su pathaihpa liana chata â ipa ta maniah paysa awpa ta a laibâhpa zy cha maniah papuapa ta, ABEIPA eima Khazohpa ngiachhiena eima to chypa châ ta.

9 Chakaotuhpa cha pie ta; châhrasala eima Khazohpa châta chakaotuhpa eima châ chhôh chhaota maniah pathlua leipa ta, maniah pahra awpa nata eima Khazohpa o padua awpa nata Zerusale liata kuh hnei awpa ta Persia abeizy mohmôna liana chata eima chô liata ngiachhiena tlao pa ysa ta.

10 “Hy eima Khazohpa y, atahmâ he khâpa e eima reih aw? Na biepiepa zy cha a heisai haw tlôh pi ta,

11 Na chakaotuhpa hrohsopa zy hmâpa ta, Nama siena awpa, nama râh pahrâ awpa cha a râh liata a ypa zy pualeina vâta pualeipa ta y ta, su to liata ama pasichhihna ta pasichhihpa ta tao ei ta.

12 Chavâta nama sawchanôzy cha ama sawchapaw zy pahneisa khah ula, ama sawchanô zy cha nama sawchapaw zy pahneisa hra khah ula, ama nohlaona nata ama thlaochhina rai tlua hra khah ula, thatlôpa ta ypa ta, cha râh liata hmo phapa cha niepa ta, chhâzaw ta nama sawzy ryu nama patosa thei nawpa ta,’ tahpa ta bie a piepazy cha.

13 Chatawhcha eima hmo paraopa vâta nata eima thai leina hluh ngaitapa vâta, eima chô liata he hawhta hmo vaw y ta, nâma eima Khazohpa ta eima hmoparaona ta a phuhpa hlâta a nai viapa ta maniah na hrie tawhta a y tlakaihpa zy maniah na hnei tahpa pahnona chôta,

14 na biepiepa zy cha parao heihpa ta, he hmo pasichhihpa a taopa zy nata eima hnei pahlao lymâ aw ma? A laibâhpa rai y leipa nata khôkhâhna rai chhao y leipa ta, maniah pahleipadiana taihta eima chô liata na pathi-ia aw vei ma?

15 Hy ABEIPA Izarelzy Khazohpa y, nâ cha sia chi ta, a laibâhpa a râpa zy châ pi ta, atanoh keimo hawhpa he thai leipa ta na hmiakô liata y pi ta, he vâna heta ahyhmah na hmiakô liata a duah theipa rai y ma pi,” tah na ta. 

Ezra (Ezra)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10

Ezra 10

Ezra 10

Râh hropa nata chi hropa lahpinô ta ama hneipa nata ama sawzy cha ama thy

1 Chatawhcha Khazohpa o lâ aheihpa ta â khu lâta paopa ta, chana chôta, Ezra cha thlahchhâ ta, reihpha a cheih nona chata a hnohta Izarel chyhsa, chyhsa hluhpi a chanô a chapaw ta hawti zy chhaota a vaw pahmaohpakhy ei ta; zawpizy cha thata cha ei ta.

2 Chatawhcha Elama pathla hry liatahpa Zehiel sawchapawpa Shekaniah chata Ezra hnohta, “Eima Khazohpa chô liana chata hmo parao haw tlai pi ta, he râh liata pho hropa chanô zy cha lahpinô ta hnei pi ta, anodeikuacha Izarel mozy chata he kyh liana heta hnabeiseina khâ a y thlâh haw.

3 Chavâta a vy teh u, ei zibeipa nata eima Khazohpa biepiepa ta a chalyupa maih ryhraopa lymâ hawhta chazy lahpinô zydua nata âmo liata a pihpa maih cha pachhaih awpa ta eima Khazohpa lâta bie hraih ei suh u; cha cha ryhpa lymâ hawhta taopa châ mawh sy.

4 Thyu teh, he he na vyuhpa châ ta, keimo chhao na chhâh a châpa châ pi ta, riahpha ngaitapa ta y la, tao teh,” tahpa ta taokhei ta.

5 Chatanachata Ezra cha thyu ta, theihthaipa pawhrâh viapa zy nata Livai chizy nata Izarel mo zydua cha cha bie hawhta tao awpa ta chhie pasasa ta. Chatanachata chhie sa haw ei ta.

6 Chatanachata Ezra cha Khazohpa o lâ a heihpa cha thyu ta, Eliashi sawchapawpa Zôhana chhôhpadâhpa liata a ngia ta, cha liata a vaw ngia nahta viahchhâ nie chachei leipa ta, ti chhao doh vei, seichâna tawhta a puapa sahlaozy hmotaopa moleipa vâta pacharôhpa ta a ypa châ tlôh ta.

7 Chatawhcha Zudah râh zydua nata Zerusale liata sei a puapa sahlao zydua hnohna chata Zerusale liata a pakhy khaipa ta,

8 ahyrai ama molaipa zy nata ama machâ zy ryhraopa hawhta noh thôh chhôh ta a vy leipa maih cha a hmobaoh zydua la khaipa ta, ano chhao cha sei a puapa sahlao hry tawhta papua awpa a châ aw; tahpa bie phuah ei ta.

9 Chatanachata Zudah chyhsa nata Benzami mozy cha, cha noh thôh chhôh liana chata Zerusale liata a pakhy khai ei ta; cha cha thla chakina noh syno noh châ ta. Khazohpa o tlyhmia kawhpa lialiah liana chata zawpi zydua cha atyuh ei ta, cha biezy vâta nata vâsua ru ngaitapa vâna chata a chalyu ngâ kaw ei ta.

10 Chatawhcha theihthaipa Ezra cha a duah ta ama hnohta, “Hmo parao haw eichi ta, Izarel mozy thai leina bailai ta, pho hropa chanô zy lahpinô ta hnei ei chi ta.

11 Chavâta ABEIPA nama mahpaw zy Khazohpa lâna chata reihpha chei ula, a kho viapa tao teh u; he râh liata pho hropa nata ama chanô zy tawhtapa he a panano teh u,” tah ta.

12 Chatanachata zawpi zydua chata achhy ei ta, a paro ngaitapa ta, “A châ tlaina; na reipa hawhna tlai chata eima tao awpa a châ.

13 Anodeikuacha chyhsa hluh tlôh pi ta, vâsua daihti châ tlôh hra ta; khôtho liana heta a duah thlâh ha thei leipa pi ta. Noh kha tlyma noh no tlyma ta tao thlâh awpa châ hra vei; he kyh liana heta thata vaw parao haw tlôh pi ta.

14 Zawpi zydua chata eima molaipa zy raopa châ sala; eima khih liata pho hropa chanô a hneituhpa zydua cha khi to liata ama machâzy nata ryureituhpa zy chhaota ama vyna daihti raopa liata a vy lymâ ei sala, eima chô liata Khazohpa hiehâhna ru ngaitapa he paipa ta he bie he eima pasia hlâ lei cha.” tah ei ta.

15 Asahel sawchapawpa Zawnatha nata Tikvah sawchapawpa Zahzeiah zy deita ta he bie he khoh leipa ei ta, chatawhcha Livai chi Mesula nata Shabethai ta a châkhei ei ta.

16 Chatawhcha seichâna tawhta a puapa sahlao chata cha hawhna chata tao ei ta. Theihthaipa Ezra cha ama chhôhkha pawhrâhpa thokha chhaota, ama chhôhkha pawhrâhpa lymâ hawhta ama moh rei khaipa ta rao ei ta. Thla hrawhna noh kha noh ta cha bie cha pachâpa ta a pakhy ei ta;

17 thla khana noh kha noh ta pho hropa chanô a hneituhpa zy cha pasia khai ei ta.

18 Theihthaipa sawzy hryta pho hropa chanô lahpinô ta a hneipa ama pahnopa zy cha Zesua pathlazy hry liata, Zôzada sawchapawpa nata a unawhpa Maasei, Elieza, Zari nata Kedaliah zy.

19 Âmo chata ama lahpinô zy a chhaih awpa ta bie hraih ei ta, chatawhcha ama thai leipa vâta ama thai leina cha mietahkupa zaw hry liatahpa mietahkupa tôhpa pô kha ta atheih ei ta.

20 Ima pathlazy hry liata: Hanani nata Zebadia.

21 Hari pathlazy hry liata: Maasei, Elaiza, Shemaiah, Zahiel nata Uziah zy.

22 Pashu pathlazy hry liata: Eliônai, Maasei, Ishmael, Nethanel, Zôzaba nata Elasa zy châ ei ta.

23 Livai chizy hry liata: Zôzaba zy, Shimei zy, Kelaiah (Kelita ama tah tyh hra), Pathahia, Zudah nata Elieza zy châ ei ta.

24 Hla satuhpa zy hry liata: Eliashi châ ta. Ochhivaihtuhpa zy hry liata: Shaluma, Telema nata Uri zy châ ei ta.

25 Chatawhcha Izarel sahlaozy hry liata: Paro pathla liata: Ramiah, Iziah, Malkizah, Mizami, Eliaza, Malkizah nata Benai zy,

26 Elama pathla liatahpa: Mataniah, Zekaria, Zehiel, Abdi, Zeremô nata Elaiza zy.

27 Zatu pathla liatahpa: Eliônai, Eliashi, Mataniah, Zeremô, Zaba nata Aziza zy.

28 Bebai pathla liatahpa: Zehôhana, Hananiah, Zabai nata Athlai zy.

29 Bani pathla liatahpa: Mesula, Malu, Adai, Zasu, Sheal nata Zeremô zy.

30 Pahamôaba pathla liatahpa: Adna, Kela, Benai, Maasei, Mataniah, Bezalel, Binui, nata Manase zy.

31 Hari pathla liatahpa: Elieza, Ishizah, Malkizah, Shemaiah, Simeôna,

32 Benzami, Malu nata Shemariah zy.

33 Hasu pathla liatahpa: Matenai, Matata, Zaba, Eliphele, Zeremai, Manase nata Shimei zy.

34 Bani pathla liatahpa: Maadai, Amra, Uel,

35 Benai, Bedei, Keluhi,

36 Vania, Meremô Elisahi,

37 Mataniah, Matenai nata Zaasu zy.

38 Binui pathlazy liatahpa: Shimei,

39 Shelemiah, Natha, Adai,

40 Makhadebai, Shasai, Bharai,

41 Azarel, Shelemiah, Shemariah,

42 Shaluma, Amariah nata Zawsi zy.

43 Nebô pathla liatahpa: Zeiel, Matithia, Zaba, Zebina, Zadai, Zôel nata Benai zy ama châ.

44 He zydua heta pho hropa lahpinô ta hnei ei ta, thokha chata cha ama lahpinôzy liana chata sawzy sa ei ta. 

Ezra (Ezra)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10