Ephesi Mozy 1

Ephesi Mozy 1

Anaona

1 Pawla, Khazohpa khonazie hawhta Krista Zisu apôstôl chata— Mopathaihpa Ephesi khih liata a ypa Krista Zisu liata ngâchhihpazy lâna chata:

2 Khazohpa eima Paw nata Abeipa Zisu Krista tawhtapa ngiachhiena nata adyhna nama hnohta y mawh sy.

Krista liata thlahpa lâ byhnâzy

3 Eima Beipa Zisu Krista Khazohpa nata Paw cha reithaipata y mawh sy, ano chata avâ suzy liana khita Krista liana chata thlahpa lâ byhnâ to maniah pie ta.

4 A kyhpachâna liata pathaihpa nata seina hnei leipata ano hmiakô liata eima y thei nawpata aleilô y hlâta Krista liata maniah a tlypa hawhna khata.

5 A ngiachhiena rônahzie reithai awpata, ano khopata a lynazie hawhta,

6 Zisu Krista zawhzi ta ano chata saw ta tao awpata maniah a raochhielie hawpa vâta, cha ngiachhiena cha kho ngaitapa liana chata a saipata maniah pie ta.

7 A thisaih vâta ano liana chata chatlaina eima hnei, a ngiachhiena hnei thluzie lymâ hawhta eima hmoparaonazy a ngiahthaina cha,

8 cha ngiachhiena chata ano ta so ngaitapa nata aryhna pahno ngaitapata maniah a vaohei.

9 Khazohpa ta a chhuahnohna bienyupa pahno awpata maniah pasai ta,

10 ano abeina khonazie ta khizaw zydua Krista liata pakipata ypata, avâ liata nata alei liata hmo a ypa zydua ano liana chata sia pakipa châ nawpata.

11 Khazohpa khopa a ryraonazie lymâ hawhta hmo ato a taotuhpa a chhuahpa hawhta raochhieliepa cha hawpata ano liana chata a ryu châta taopa eima châ,

12 keimo Krista liata hnabeiseina a hnei tuapazy pi he a rônahna reithaina eima vaw châ nawpata.

13 Ano liana chata nâmo chhao, bie hmeiseihpa nama pachhana Thâtihpha cha nahthlie eichi ta, namâ ngiapâ ha tawhta ano liana chata Thlahpa Pathaihpa bietaipa châta ngiapata nama ypa kha.

14 Cha cha Khazohpa rônahnazie reithai nawpata ano eih tlai chatlai nawpata eima ryutona awpata bietaina a châ.

Sona nata novâhna hneipata thlahchhâna

15 Cha vâna chata kei chhaota Abeipa Zisu liata ngiapâna nama hry liata a ypa mopathaihpa zydua chôta nama paluahsa tyhpa cha ei vaw thei nahta,

16 eima Beipa Zisu Krista Khazohpa rônahna Paw chata, ano pahnona kyh liata sona nata pahnopasiasana Thlahpa a cha pie thei nawpa ei ta,

17 ei thlahchhâna zy liana chata mo padopata nama chôta alynabie reipa bâh va na.

18 Nama pathipalôh mozy pavâhsapata ypata, ano awna hnabeiseinazy mopathaihpa sahlao liana chata a ryu to awpa rônahpa hnei thluzie zy,

19 athihpa hry tawhtapa a pathyu nota nata abeina zy, biehneina zy, hmotaotheina zy, ryureina zydua zy he khizaw liata dei châ leipata,

20 khizaw a vaw tlô awpa liata chhao moh bipa to chô via syulyu ta, avâ suzy liata a chachâh lâta a patyusa nota Krista liata a hriapa a thatlôna hriazie lymâ hawhna khata.

21 Keimo ngiapâtuhpazy lâta a hmotaotheina lai ngaitanazie zy he kheihawhpa a châ tahpa nama pahno thei aw.

22 Khazohpa hmo ato a phei ry liata soh ta; ano cha ato chô liata luh châta awnanopa sahlao lâna chata a pie,

23 awnanopa sahlao cha a pôhpa a châ, ato ta pabietuhpa pakina cha. 

Ephesi Mozy (Ephesians)

Bo 1	Bo 2	Bo 3	Bo 4	Bo 5	Bo 6

Ephesi Mozy 2

Ephesi Mozy 2

Thina tawhta hrona

1 Nâmo chhao nama hmoparaona nata nama moleinazy vâta athipa nama châ nona khata a cha pahro ei.

2 Chazy liana chata eikhanona khata he khizaw ryhpa hawhta nama chareipa kha, a ruapa hmotaotheina beipa atahmâ ta ngiapâ leipa sawzy chôta a hria haituhpa thlahpa ryhpa hawhna heta.

3 Cha ngiapâ leipa sawzy hry liana chata keimo chhao eikhanota cha sapa nata palôhrupa khopa taopata eima sapa aohraonazy hawhta y khai pi ta, mo hropazy hawh hra ta, hiehâhna saw ta a pihpa eima châpa kha.

4 Châhrasala Khazohpa chata ngiachhiena hnei thlupata, a kyhpachâna a hluh ngaitapa vâna khata,

5 keimo paraonazy vâta athipa eima châ nona tlai chhaota, Krista hnohta maniah pahro hra ta (ngiachhiena ta pachhapa nama châ haw),

6 Krista Zisu liana chata ano hnohta maniah pathyupata, avâ suzy liata ano hnohta maniah patyusa haw ta.

7 Daihti a vaw tlô awpazy liana chata Krista Zisu liana heta eima chôta zawngiahna hneipata a ngiachhiena hnei thluzie cha a pamosa thei aw.

8 Ngiapâna vâta ngiachhiena ta pachhapa châ tlôh eichi ta; cha chhao cha nâmo tawhta a puapa châ leipata, Khazohpa hmosaipiepa a châ,

9 hmotaopa vâta châ vei, chata leipata la chyhsa ta amâ palaikhei pathlei aw na.

10 Hmopha tao awpata Krista Zisu liana chata taopata ano ku hriapa châ tlôh pi ta, cha hmopha taopa cha eima chânazie awpata Khazohpa ta a chhuahnoh chhieliepa a châ.

Krista liata pôhkha châna

11 Chavâta eikhano nâmo sapa lâta Zenitai, Zuzy, chopawtaipa atahpazy ta, chopawtai leipa ama tahpazy saih u (he he sapa liata âmosasy ta ama taopa a châ) —

12 kha nona khata Krista leipata Izarel sahlao khihnarâh nata amaniahpata khizaw liana heta hnabeiseina rai hnei leipata nata Khazohpa leipata ypata, bietaina biehrai liana zy chata khichhaipa nama châpa kha a thei thlâh ha teh u.

13 Atahmâ deikua cha Krista Zisu liata, nâmo eikhanota lâhlapita a ypazy kha Krista thisaih chata pahniapata y haw eichi ta.

14 Ano cha eimâ ryhna châ tlôh ta, ano chata a pachhaina hmotao awpazy liata biepiepa ryhpa a ypa cha.

15 a sapa ta pahleipata hlao nozy cha pôhkha ta taopata ama likaw chhôhpadâhna pâhchhô cha parao ta, chatanachata ano liana chata panozy cha chyhsa thiehpa pôhkha ta taopata adyhna a tao thei nawpata.

16 Kraws liata a thina zawhzi ta pôhpa pôhkhata panozy cha Khazohpa nata a paryhsa thei ta, cha kraws chata a pachhaina a thi hawpa vâta.

17 Chatawhcha Krista a vy nahta nâmo Zenitai, Khazohpa tawhta lâhlapita a y tyhpazy hnohta adyhna Thâtihpha cha chho ei ta, Zuzy ano tawhta lâhniata ta a y tyhpazy hnohta chhao;

18 Krista zawhzi ta Zu nata Zenitaizy cha Thlahpa miakha ta Paw lâta a ngia theina eima hnei rairieh.

19 Chatanachata nâmo Zenitaizy, atahmâ khichhaipa nata khitlyhpa dei châ khao leipa eichi ta, mopathaihpazy nata khih chhôhkha nata Khazohpa chhôhkhapazy tlao nama châ haw.

20 Krista Zisu tlai cha a ki liata alô phahnai chaipa châpata apôstôlzy nata hrohsopazy lôbôpa chôta a sapa châ eichi ta.

21 Ano liana chata alô bôpa nanopazy a ryh ngaitapata pazaopata Abeipa liana chata achhyna-o pathaihpa ta châ lymâ tyh ta;

22 nâmo chhao ano liana chata Thlahpa zawhzi ta, Khazohpa pahrâ nawpata sapa nama châ. 

Ephesi Mozy (Ephesians)

Bo 1	Bo 2	Bo 3	Bo 4	Bo 5	Bo 6

Ephesi Mozy 3

Ephesi Mozy 3

Zenitaizy hnohta Pawla chakaona

1 Cha vâna chata kei, Pawla, nâmo Zenitaizy vyuhpata Krista Zisu châta atâhpa heta—

2 nâmo chata Khazohpa ta ngiachhiena mohôhna raihria eina piepa kha vaw pahno ha bâ aw eichi ta.

3 Khazohpa ta a bienyupa cha aru lâta aluahna ta pahnosapata ei ypa kha, eikhano a chyutata ei roh ha khaw.

4 Cha cha nama reih khiahta cha Krista bienyupa ei pahnonazie he nama pahno thei aw,

5 cha cha atahmâhlâ a lyuhchâpa pathaihpazy nata a hrohsopa pathaihpazy hnohta Thlahpa pahnosapata a ypa hawhna heta cha hlâna khata chyhsapa sawzy hnohta pahnosapata y beih vei.

6 Cha bienyupa cha he he a châ, thâtihpha vâna heta Krista Zisu liana chata Zenitaizy he ryutolâhpa zy, pôhpa pachiahpa zy, bietaipa a tolâhpa zy keimo Zuzy hawhta ama châpa hih.

7 A hmotaotheina hriazie hawhta a saipata piepa Khazohpa ngiachhiena cha eina pienazie lymâ hawhta, cha thâtihpha chakaotuhpa ta taopa ei châ.

8 Zenitaizy hnohta Krista hneirôna reitiah leipazy thâtih chho awpa nata bienyupa chhâzaw tawhta Khazohpa ato a taotuhpa liata nyupata a ypa mohôhna cha.

9 khâpa ma a châ tahpa chyhsa zydua pamosa awpata, kei mopathaihpa zydua hryta a chyh chaipa hlâta a chyh viapa hnohna heta cha ngiachhiena cha piepa a châ.

10 Chatanachata eima Beipa Krista Zisu liata tao a chhuahpa a chhâzaw ryhraopa lymâ hawhta.

11 Atahmâhlâ avâ suzy liana khita abeina nata hmotaotheinazy lâna chata Khazohpa sona to awnanopa sahlao vâta pahnosapata a y thei aw.

12 Cha Krista Zisu eimâ ngiapâna zawhzi ta nata ano liata pôhkha eima châna liana chata Khazohpa hmiakô liata ngâh ngaitapata a ngia theina khotalaina cha eima hnei.

13 Chatanachata nâmo vyuhpata ei pasa taonazy vâna heta hnabeidy lei awpata châ haw chaimâh ei na ta, chazy cha nama rônahna a châ.

Krista kyhpachâna pahnona

14 Cha vâna chata Krista cha ngiapâna vâta nama pathipalôh liata a pahrâ thei nawpata,

15 a rônahna hnei thlunazie lymâ hawhta a Thlahpa zawhzi ta chyhsapa chhôh lâna chata hmotaotheina ta tha patlôpata a cha paysa thei nawpa ei ta,

16 Paw, alei nata avâ liata chhôhkha to moh bi chhâpa hmiakô liana chata ei pakhu paneih tyh na ta.

17 Chatanachata Khazohpa pakina ta pabiepata nama y thei nawpata,

18 nâmo cha a kyhpachâna liata thari thlapa nata abôna hneipata ypata,

19 mopathaihpa zydua nata a kawhzie zy, a seihzie zy, a sâhzie zy, a thuhzie zy pahnopasia theina nata Krista kyhpachâna pahno pha leipa pahno theina nama hnei thei nawpata.

20 Keimo liata a hria tyhpa hmotaotheina lymâ hawhta, eima hiapa nata pachâpa zydua hlâta tha viata a tao theituhpa Khazohpa lâna tlai chata,

21 chhâzaw ta chhâ zydua taihta awnanopa sahlao liata nata Krista Zisu liana chata, rônahna y mawh sy. Amen. 

Ephesi Mozy (Ephesians)

Bo 1	Bo 2	Bo 3	Bo 4	Bo 5	Bo 6

Ephesi Mozy 4

Ephesi Mozy 4

Thlahpa miakhanazie

1 Chatanachata a reisina nata a panawhna zydua hneipata, kyhpachâna ta a chhyh thai rairiena chôta tiamana hneipata,

2 adyhna chahryna liana chata Thlahpa apôhkhana cha a vao awpata teipata,

3 a cha awna ei a phuhpata y awpata, kei Abeipa liata atâhpa heta ei châ haw ei.

4 A cha aw chhâna hnabeiseina miakha ta awpa nama châpa hawhna khata, pôhpa miakha nata Thlahpa miakha deita y ta,

5 Abeipa pakha, ngiapâna miakha, bâtina miakha,

6 ato Khazohpa nata Paw pakha deita y ta; ano cha ato chô liata y ta, ato chahry khaipata, ato chhôh liata a y hrapa a châ.

7 Châhrasala a saipata Krista hmopiepa panuana lymâ hawhta ngiachhiena cha eima hnoh chyuta piepa a châ.

8 Khazohpa châ bie ta: “A chô lâ a khy nona khata seichâna kyh cha sei ta a chhi ta, chyhsapazy lâta chhao hmosaipiepazy pie ta,” a tahpa cha.

9 Chatanachata, “A khy,” tahpa he, alei su ry chaipazy lâta a za chô tua leipa khiahta cha, kheihta e a châ aw?

10 A za chôpa cha ato a pabie thei nawpata avâ zydua chô syulyu lâta a kiahpa kha a châ.

11 Chatawhcha ngiapana nata Khazohpa Sawchapawpa pahnona kyh liana chata reikha tlapata, pitlohpata, Krista pakina lainazie tluta eima zydua ta eima y hlâ lei cha,

12 chakaona rai hria awpata mopathaihpazy paki nawpata, Krista pôhpa taopathi nawpata,

13 thokhazy apôstôl châ awpata zy, thokhazy cha hrohsopa châ awpata zy, thokhazy cha thâtihpha chhotuhpa châ awpata zy, thokhazy cha awnanopa a pasatuhpa nata pachutuhpa châ awpata zy pie ta.

14 Chatanachata, do leina reipasaona hawhta piepiepata chyhsa dôpata pachuna thlih ta hiakha lâ, hiakha lâta phaopahai ngâpa hawtipa châ khao leipa aw pi ta.

15 Kyhpachâpa ta bie do ngaitapa reipata ato liata ano liata tlao eima laiseih thei aw, ano cha luh a châ, Krista chuh,

16 ano zawhzi ta pôhpa tlokhu chata, a pazaona to hriapa vâta a ryh ngaitapata a pazaopata nata a pazao pakhipata pachiapa to hriazie hawh chyuta, kyhpachâna liata a taopathi awpata pôhpa cha a vaw papôhsa tyh.

Krista liata hrona thiehpa

17 He he reih na ta, Abeipa liana chata ei cha pahnosa ei, Zenitaizy palôhrupa khâpahrao leipa phaohpata ama ypa hawhta y khao leipa ula;

18 pahno leina âmo liata a y, cha pahno leina vâna chata Khazohpa hrona tawhta pachhaihpata ypata ama pahnona liana chata a zopa ama vaw châ haw, ama pathipalôh a kuhchhapa vâta.

19 Chazy chata âmosasy ta a pahno theina rai ama hnei khao leipa vâta hmo puapa to karây ngaitapata tao awpata, parâna liata ama pôhpa duata a pie haw ei ta.

20 Nâmo deikua chata cha hawhta Krista cha a chu veih eichi!

21 A ao nahthliepata ano liata pachupata a ypa nama châ haw khiahtala Zisu liata bie hmeiseihpa a ypa hawhpa he.

22 Hlâno ta nama yzie kyh liata chyhsa parohpa dôna piepie aohraona hawhta a chhi via ngâpa kha pahluh ula,

23 nama palôhrupa thlahpa liana chata a thiehpata y ula.

24 chyhsa thiehpa bie hmeiseihpa siana nata pathaihna ta Khazohpa hawhta taopa khata a bu ula, tahpa kyh hih.

25 Chatanachata haipa bâhsaipata nâmo vaih lâta bie dopa reih chyu teh u, a pachia rairieh chyupa châ tlôh pi ta.

26 Pathi-ia ula, molei deikua cha molei khah u; nama hiehâhpa cha noh ta tlakhei khah se,

27 ahripa cha su patlypa khah u.

28 A parupa chata paru khao leipa sala, phahlapa lâna chata pie awpa a hnei thei nawpata a ku ta hmophapa hriapata tlao hria pasa mawh sy.

29 Bie pha leipa rai nama pakah tawhta pua khah se, a byuhnazie lymâ hawhta taopathina awpata bie phapa maih tlao pua mawh sy, a nahthlituhpazy châta ngiachhiena a châ thei nawpata.

30 Chatawhcha Khazohpa Thlahpa Pathaihpa cha pachârôhsa khah u, chatlaina noh chata ano ta ngiapata nama ypa kha.

31 Khana zy, hiehâhna zy, pathichhiena zy, paphôhna zy, reipachhiena zydua zy cha bâhsaipata y mawh sy, moleina zydua chhaota,

32 a ngiachhie rairiehpata thapasana hneipata tlao y ula, Khazohpa ta Krista liata a châ ngiahthaipa hawh ei ta, a ngiahthai rairieh teh u. 

Ephesi Mozy (Ephesians)

Bo 1	Bo 2	Bo 3	Bo 4	Bo 5	Bo 6

Ephesi Mozy 5

Ephesi Mozy 5

Khaihna sawzy hawhta chareina

1 Khazohpa saw kho ngaitapazy nama châ, a yzie hâ a latuhpazy châ teh u.

2 Krista ta nama kyh pachâ ta, rohpahâhpa châta Khazohpa lâta hmohlâpa ta nata atheihna ta eima vyuhpata a piepa hawhna hra khata kyhpachâna liata y teh u.

3 Khazohpa chyhsazy nama châ tawhta cha, apheina nata pualeina zydua, karây-na chhao; nama hry liata a rei rai reipata y khah se.

4 Nozachhihpa bie zy, bie pualeipa reipa zy, saisopa zy chhao, chazy cha angia vei, chazy taopa hlâta cha alynabie tlao reih teh u.

5 Apheihmâhpa nata chyhsa pathaih leipa nata karâypa rai chata, (karâ-ypa cha nohthlahpa a chhytuhpa châ ta), Krista nata Khazohpa Khihnarâh liana chata topa rai hnei vei ei tahpa pahno tlôh eichi ta.

6 Ahyhma ta bie khâpahrao leipata cha dô khah ei se, cha hmozy vâna chata Khazohpa pathi-iana cha ngiapâ leipa sawzy chô liata tlô tyh tlôh ta.

7 Cha chyhsazy cha a hlykhei khah u,

8 eikhanona khata a zohpa châ eichi ta, atahmâ deikua cha Abeipa liana chata khaihpa nama vaw châ haw hih.

9 Abeipa khopa khâpa ma a châ tahpa pasiapata

10 khaihpa sawzy hawhta y teh u, khaihna theilâpa cha phana nata siana nata bie hmeiseihpa zydua liata a lâ tlôh ta.

11 Zohna hmotaopa a pathei beih leipa liana zy chata, a hlaona rai hnei leipa ula, a hlao châpata a thai leizie tlao pahnosa teh u.

12 A ru lâta ama hmotao tyhpazy cha reipa chhaota nozachhihpa châ tlôh ta.

13 Hmo ato a thai leizie pahnosapata a ypa he, khaihpa palâsapata a châ tyh, a to palâsapata a ypa maih cha khaihpa châ tlôh ta.

14 Chavâta, “Nâ a môpa, a hra la, athihpa hry tawhtapa thyu teh! Chatanachata Krista chata a cha khaipahlie aw.” a tahpa kha.

15 Chatanachata a so leipazy hawhta y leipata, a sopazy hawhta tlao ypata, nama yzie liata a chado teh u.

16 Nohzy he a pha leipa vâta rypaonazy chalei lymâ teh u.

17 Cha vâna chata hru leipa ula, Abeipa khopa khâpa ma a châ tahpa tlao pahno teh u.

18 Kresawti paripata y khah u, cha liana chata a sohsi leina y tlôh ta; Thlahpa ta biepata tlao y teh u,

19 reithaina hlazy, Khazohpa hlazy, thlahpa lâ hlazy ta a chho rairiehpata, Abeipa châta nama pathipalôh ta hla sapata totâ tôh teh u.

20 Eima Beipa Zisu Krista moh ta Khazohpa, Paw tlai lâna chata ato chôta alynabie khâ reih teh u.

Vahpazy nata lahpinôzy

21 Krista chipata nâmosasy a ngiarih rairieh chyu teh u.

22 Lahpinô saih u, Abeipa lâta namâ ngiarihpa hawhna heta nama vahpazy lâta a ngiarih teh u.

23 Krista cha ano tlai pôhpa pachhatuhpa châpata awnanopa sahlao luh a châpa hawhna hra heta, vahpa cha lahpinô luh châ tlôh ta.

24 Awnanopa sahlao Krista lâta amâ ngiarihpa hawhna hra heta, lahpinôzy cha ato liata ama vahpa lâta a ngiarih ei se.

25 Vahpa saih u, nama lahpinôzy kyhpachâ teh u, Krista ta awnanopa sahlao kyhpachâ ta, ama vyupata ano a piepa hawhna khata,

26 âmo cha ti ta pasipata, bie ta pathaisapata a pathaisa thei nawpata.

27 Chatanachata awnanopa sahlao cha a puapa kiah leipa nata a dao leipa nata cha hawhpa hmo rai phaoh leipata, pathaih nata seina y leipata, awnanopa sahlao rônah ngaitapa liata anosasy ta a pie thei aw.

28 Cha hawhna hra chata vahpazy chhaota âmo pôhpazy hawhta ama lahpinôzy cha kyh ama pachâ awpa a châ. Âmo lahpinô kyh a pachâtuhpa cha anosasy ta kyh a pachâpa a châ.

29 Ahyhma ta ano sapa a hao beih tlôh leipata, pasapata tlao ama dao tyh, Krista awnanopa sahlao pasapata a daopa hawhna heta,

30 a pôhpa pachiahpazy châ tlôh pi ta.

31 “Cha vâna chata chapaw ta a nô nata a paw siesaipata a lahpinô patu aw ta, chatawhcha ama pano ta sapa miakha ama vaw châ ha aw.”

32 Cha bienyupa cha a rônah, châhrasala kei tala Krista nata awnanopa sahlao kyh ei reih;

33 khâparai châ sala nâmo hry liatahpa chhaota âmo kyh ama pachâpa hawhta ama lahpinô kyhpachâ chyu mawh sy, lahpinô chhaota a vahpa za awpata a chado mawh sy. 

Ephesi Mozy (Ephesians)

Bo 1	Bo 2	Bo 3	Bo 4	Bo 5	Bo 6

Ephesi Mozy 6

Ephesi Mozy 6

Reingiahna nata kyhpachâna

1 Sawnawh saih u, Abeipa liana chata nama nô nata nama pawzy bie zyh teh u, cha cha hmo dopa châ tlôh ta.

2 “Na nô nata na paw palyupalih teh,” cha cha biepiepa bietai a hnei tua chaipa a châ,

3 “Chatanachata na châta pha aw ta, alei liana heta na hro a pareih hra aw.

4 Nâmo pawzy saih u, nama sawzy ru pachhô khah u, Abeipa chhoreina liata nata pachuna liana chata tlao mohôh teh u.

5 Sei saih u, Krista bie a ngiapa hawhta chipa nata a chalyupata pathipalôh miakha phaohpata.

6 chyhsapa a palysatuhpa hawhta dei, mokhaoh ta chakao leipata, Krista sei hawhta pathipalôh ta Khazohpa khopa tlao taopata,

7 chyhsapa chakaopa hawhta dei châ leipata, Abeipa chakaopa hawhta kho ngaitana chôta chakaopata.

8 Sei rai châ sala, sei châ leipa rai châ sala, chyhsa to ta hmophapa ama taopa maih cha Abeipa tawhta a ualuapata ama hmô heih aw tahpa pahnopata sapa liata nama hyutuhpazy bie a ngiah teh u.

9 Nâmo hyutuhpa saih u, cha hawhna hra chata âmo nata nâmo hyutuhpa cha avâ liata a y tahpa nata ano chata chyhsa khokheipa hlei hnei vei tahpa pahnopata, pachhipary leipata ama chô liata tao hra teh u.

Khazohpa chaihrai zydua

10 A chhâ chaina ta cha, Abeipa liata nata a thatlôna liana chata hmotaotheina hneipata y teh u.

11 Ahripa reipasaonazy cha namâ dyuh thei nawpata Khazohpa adyuhna chhaichhi pakipata a tobi teh u.

12 Eimâ piapazy he sapa nata thisaih châ tlôh lei khâh ei ta, abeinazy nata biehneinazy nata he zohna chô liata khizaw ryureituhpazy nata avâ suzy liata thlahpa moleipa sahlao a ypazy tlao ama châ.

13 Chavâta noh pha leipa liana chata namâ dyuh thei nawpa nata nama tao khai tawh chhaota namâ duah thei nawpata, Khazohpa chariah chhaichhi pakipa cha la teh u.

14 Chatanachata nama chai cha bie hmeiseihpata a saipata, siana chachôhna vyhphao cha a kypata,

15 adyhna Thâtihpha a chhuahnohna cha nama phei liata a kypata a duah teh u;

16 cha leipa chhao cha ngiapâna vyhphao la ula, cha chata moleipa châtai a ia theipa zydua cha nama pachhai thei aw.

17 Chatawhcha pachhana lakhu nata Thlahpa zaozi, Khazohpa bie cha la ula.

18 Thlahchhâna nata hiana to ta khatino raita Thlahpa ta thlahchhâpata y teh u. Cha kyh liana chata mopathaihpa zydua châta phahnai khoh ngaitapa nata a haw chaimâhpata y teh u.

19 Thâtihpha bienyupa riahpha ngaitapata phuah awpata ei pakah âpata bie pareisapata ei y thei nawpata, kei châta chhao na hiapa teh u.

20 Cha kyh liana chata ei reih awpa hawhpa cha riahpha ngaitapata ei reih thei nawpata, cha thâtihpha lyuhchâpa bâlia a kypa ei châ.

Byhnâ awna chhâna

21 Nâmo chhaota kheihta ma ei y, ei thâtih nama pahno thei nawpata Tykiku Abeipa liata unawh kho ngaitapa nata chakaotuhpa ngâchhih ngaitapa heta ato a cha pahnosa aw ei.

22 He vâna tlai heta ano cha nâmo lâta ei vaw tuah, eima thâtih nama pahno theina awpa nata ano heta nama pathipalôh thlah a palôh thei nawpata.

23 Paw Khazohpa nata Abeipa Zisu Krista tawhtapa adyhna nata ngiapâna a hlaopa kyhpachâna, unawhzy hnohna khata y mawh sy.

24 Eima Beipa Zisu Krista dialeipata kyh a pachâtuhpa zydua hnohta ngiachhiena y mawh sy. 

Ephesi Mozy (Ephesians)

Bo 1	Bo 2	Bo 3	Bo 4	Bo 5	Bo 6