Chaphôhtuna 1

Chaphôhtuna 1

Zaio sei atâhpa pachârôhnazy

1 Zawpi ta a bie tyhpa khihpi kha yrupa ta a tyuh hawh cha! Phopizy hry liata a rôhnah tyhpa kha nôhmei hawhta vaw châ haw ta! Khihpizy hry liata a lai chai tyhpa kha khih taw a vaw châ haw na.

2 Zâ ta vâsâ-lôtlao-khaohpa ta cha ta, hmia liata mothlih a loh na; a kyhpachâpa zydua hry liata thlahpalôhtuh awpa hnei vei; a viasazy cha dôpa ta a khakhaipa ama vaw châ khai haw.

3 Zudah cha sei tâhna khaoh a ngia haw ta, rietheipa nata sei ta hmâpa ta; phopi hry liata pahrâ ta, pahâna rai hmô vei; a chadaituhpazy ta a bua chaina liata ama pha haw.

4 Zaio khihpi lâpizy cha mâchhiesapa ta y ta, kyhchhi raopa a siepa ama y leipa vâta; kuh chhikao zydua roryhrapa ta a y, a theihthaipazy a rôh ei ta; a laihsakôpazy ta pasa tao ei ta; ano hra ta a pasa tah ngaita ta.

5 Ano a dyutuhpazy cha hyutuhpa ta ama châ khai haw, khakhaipazy vânohtopa ta ama y, taopasina a hluhpa vâta ABEIPA ta pasa a pataosa haw hih; adyutuhpa hmiakô liata a sawzy sei tâhna khaoh amâ ngia haw na.

6 Zaio sawchanô cha a rôhnahna zie ta a leisai haw na. Abeisawzy sakhi bâna su a hnei leipa hawhta ama vaw châ khai haw; thazô hnei leipa ta chadaituhpa hmiako liata amâ râ na.

7 A riethei nôpo noh liata Zerusale chata a thei thlâh ha ta, hlâno ta hmo sôhpa zydua zy, dyutuhpa ku liata a chyhsazy ama pao no ta, ano cha ahy hmah ta bao veih ei, dyutuhpazy ta moh ei ta, a chopa cha eilaw ei ta.

8 Zerusale molei ngaita haw ta, chavâta hmo pathaih leipa ta a châ haw; a zatuhpazy ta mohnao ei ta, thluahruapa ta ama hmôpa vâta; pachârôhpa ta a rôh ta, hiakha lâ a heih.

9 A hnorâh liata a puapa a hlao; a daihti chhâ awpa pachâ vei; chavâta noâhpa ta a nawh, thlahpalôhtuhpa rai hnei vei. “Moh teh, hy ABEIPA y, ei rietheina he, khakhaipa ta anosasyh ta a parao na!” tah ta.

10 A hmo sôhpa zydua chô liana chata, a dyutuhpa ta a ku pathla ta, a su pathaihpa liana chata phopi sahlao ama ngiapa a hmô na, apakhyna su liata a ngia awpa na khapa sahlao kha.

11 A chyhsa zydua amâ rôh na, nie tluapa ta; ama hmo sôhpa zydua ama pie khai, hrona pasana niepa chata. “Hy ABEIPA y, pachâ la, moh tua, mohnao chhihpa ei châ haw hih,” tah ta.

12 “Lâpi liata a khiekhâpa zydua saih u, nama châta khâpa hrao leipa a châ ma? Pachâ ula, moh teh u, ei chô liata a tlôpa pachârôhna hawhta pachârôhna a y ma? a hiehâna ru ngaitapa noh liata ABEIPA ta ei rie eina patheina he.

13 “Chôlâ tawhta mei tuah ta; ei rupa chhôh liata pangiasa ta; ei phei châta sao parai ta; na pakuasa ta; palôhrupa leina taihta thazeipa ta na tao ta.

14 “Ei taopasina raopakypa châ ta, chahrypa châ ta, ano ku tlaita a chahry; ei rao liata ama pangai; ei tha a pazei khai haw; ABEIPA tlai chata ei dyuh thei leipazy ku liata na pie ta.

15 Eima hry liata ABEIPA ta ei chyhsa thatlôpazy khâpa hrao leipa ta a tao; nâ dyuh awpa ta zawpi a awpakhy ei, satliazy ta parao awpa ta; Zudah sawchanô laihsakôpa cha, kresaona khaoh hawhta ABEIPA ta â tlyh.

16 Hezy vâna heta cha na ta; ei mothlih ti hawhta a loh na; thlahpalôhtuhpa na pahratuh awpa yna a hlapa vâta; khakhaipa ta a pahniepa vâta ei sawzy cha roryhrapa ta ama y,” tah ta.

17 Zaio ta a ku a pazawh, thlahpalôhtuh awpa y veih ei; ABEIPA ta Zakaw sahlao kyh liata a chheipâh ta a ypa zydua adyuhpa cha awpa ta a pathlu haw: Zerusale cha ama hry liata hmo pathaih leipa a châ haw na.

18 ABEIPA cha a sia na, a biepiepa chô liata aty tlôh na ta; zawpi zydua saih u, nahthlie ula, ei pachârôhna he moh teh u; ei laihsakôpa nata satliazy seichâna khaoh amâ ngia haw na.

19 “Ei kyh na pachâtuhpazy aw na ta, âmo chata tlao na dô ei ta; ei theihthaipa nata ei machâpazy khihpi liatahpazy nodipa ta y ei ta, niepa khâpa hmah hmô leipa ei ta, tlua hra ei sala hmô veih ei.

20 “Hy ABEIPA y, ei chhôh liata a tymâ khai haw, ei pathipalôh maoh ta, ei chhôh liata molei ngaitapa ta aty haw tlôh na ta. Othliah liata zaozi ta thina paysa ta; o chhôh liata chhao thina hawhta a châ.

21 “Ei rôhpa ama thei, thlah na palôhtuh awpa rai y veih ei. Ei khakhaipazy ta ei typamâna he ama thei; hmo na tao hawpa he amâ ly na. Noh na rao hawpa cha patlôsa chi ta, âmo cha keima hawhta châ hra mawh sy.

22 “Ama hmoparaona zydua na hmiakô liata vaw tlô mawh sy; ei taopasinazy vâta ei chô liata na taopa hawhna heta, ama chô liata tao hra mah y; ei rôhna hluh tlôh ta, ei pathipalôh a maoh haw,” tah ta. 

Chaphohtuna (Lamentations)

Bo 1	Bo 2	Bo 3	Bo 4	Bo 5

Chaphôhtuna 2

Chaphôhtuna 2

Zaio pachârôhnazy cha Abeipa tawhta a vypa a châ

1 ABEIPA pathi-iana ta Zaio sawchanô cha zohna ta a khu haw cha zaw! Izarel a ngiana cha avâ tawhta alei liata a thy pathla haw; a pathi-iana noh liana chata a phei tlyna a thei thlâh ha vei.

2 ABEIPA chata ngiachhie leipa ta parao khai ta, Zakaw sahlao pahrâna zydua pahlôh vei; a pathi-iana ta Zudah sawchanô kuh a ipazy cha; alei tlôna taihta pachopa ta a panawh haw na, râh nata abeisawzy cha.

3 Izarel ki zydua cha pathi-ia ngaitapa ta tai pathla ta; khakhaipa hmiakô liata a ku chachâh lâ a dao haw na; mei palei a chheipâh a kâ pasiatuhpa hawhta, Zakaw sahlao hry liata a pua na.

4 Khakhaipa hawhta libaw a kei, adyutuhpa hawhta a ku chachâh lâ paduasa ta; Zaio sawchanô poh-o liata mokhuapa phapa zydua thie khai haw ta; mei hawhta a hiehâhna patlai ta.

5 ABEIPA cha khakhaipa hawhta a vaw châ haw, Izarel a parao khai haw; a o rôhnahpa zydua a parao khai a kuh a ipazy a parao; Zudah sawchanô hry liata mâchhiesana nata chaphôtuna a papôh haw.

6 A byurei cha a pacho haw sahdô byureih hawh, a kychhizy su parao ta; ABEIPA chata Zaio liata kyhchhi pipa nata pahânoh pamysa ta. Palôh châ lei ngaitapa ta abei nata theihthaipazy cha thy ta.

7 ABEIPA ta maisâh thy pathla ta, a supathaihpa pasi haw ta; khakhaipa ku liata a pie haw, o rôhnahpazy kuh cha; kyhchhi pipa noh hawhta ABEIPA o liata awh ngâ ei ta,

8 ABEIPA chata Zaio sawchanô kuh cha pacho a chhuah haw ta; thlih nata ngiana tao ta; parao awpa ta a ku a kua vei; kuh nata lôdônazy cha mâchhie pasasa ta, thazeipa ta ama y rairieh.

9 A kuh chhikaozy alei liata amâ pamôh; a thuatlai a parao; a beipa nata abeisawzy cha phopi hry liata ama y; ryhpa cha y khao vei, a hrohsopazy hra ta ABEIPA tawhtapa aluahna rai hmô veih ei.

10 Zaio sawchanô machâpazy cha alei liata amâ tyuh, a thlih thlâh hapa ta; ama luh liata buhchâ amia ei ta, lathopala poh a sai ei ta; Zerusale laihsakôpazy chata alei lâ a khupa ta amâ bôh.

11 Ei chana ta ei mo chao ta; ei pathipalôh tymâpa ta y ta; ei palôhrupa alei liata tlapa ta a y, ei zawpizy leidiapa vâta, hawsaih nata sâhpi a pazypazy cha khihpi othliah liata ama panaopa vâta.

12 Ama nôzy hnohna chata,“Sa nata kresawti khataih liata a y?” tahpa ta. Hmah phaohpa hawh tlaita khihpi othliah liata panao ei ta. Ama nôzy kalachhôh liata ama hrona a leidia.

13 Khâpa e cha pahnosa aw na ta, khâpa e ei cha pakho aw? Hy Zerusale sawchanô y, khâpana na lyu? Ei cha tah aw, thlah ei cha palôh theina awpa ta, hy Zaio sawchanô laihsakôpa y. Na raona he tilaipi hawhta a kawh na; ahy e cha patlâh thei aw?

14 Na hrohsopazy ta na châta aluahna khâpa hrao leipa nata hruna kyh hmô ei ta; cha tao pathi awpa ta na hmoparaona zy palâsa leipa ei ta, na châta bie hrao leipa nata dôna ta a biepa tlao ama hmô.

15 Lâpi liata sie pakhôpa zydua ta ama ku cha chabaih chie ei ta; Zerusale sawchanô hmao tô chiepa ta ama luh chahuah chie ei ta; ‘He khihpi he ma, angiana pakipa, aleilô tlokhu thaphana ama tahpa cha?” tahpa ta.

16 “Na khakhaipa zydua ta cha paphôh thlu ei ta; ama hmao cha tô chie ei ta, ama hâh riehpa ta, “Eima parao khai haw! He noh he eima sai tyhpa tlai kha a châ; pahrâpa ta eima hmô haw na!” ama tah.

17 ABEIPA ta a chhuahpa cha tao khai ta, a bie patlô haw ta; hlâno ta a raopa hawhta a parao, thapasa leipa ta; khakhaipa cha na chô liata a palysa, na dyutuhpazy ki a pasasa haw.

18 Hy Zaio sawhanônô y! Ao paropa ta, Abeipa cha awsao teh! a mothlih a chhô a zâ ta chavah hawhta loh ngâ mawh sy! A pahâ khah la, na mothlih chhao hi khah se!

19 Thyu la, zâ ta vaina thaona liata awh teh! ABEIPA hmiakô liata na pathipalôh cha ti hawhta leitha mah y! Ano lâta na ku pazawh la, na sawnawh othliah to liata nodipa ta a panaopazy hrona chata.

20 Moh la, hy ABEIPA y, pachâ tua! He hawhta na tao hawpazy he? Chanôzy ta ama saw kho ngaitapa, ama pasôpazy cha ama nie awpa ma a châ? Theihthaipa nata hrohsopa cha Abeipa supathaihpa liana chata thiepa ta ama y aw ma?

21 Thyutliapa nata machâpa othliah alei liata ama zawh thlâh ha na; ei laihsakôpa nata satliazy zaozi ta ama pao;

22 Kyhchhi pipa noh hawhta ei chipazy su to tawhtapa awh chi ta; ABEIPA hiehâhna noh liana chata papuapa nata pahlôhpa rai y veih ei; ei pasuapalipa nata ei chhypazy cha ei khakhaipa ta a pahleipadia haw. 

Chaphohtuna (Lamentations)

Bo 1	Bo 2	Bo 3	Bo 4	Bo 5

Chaphôhtuna 3

Chaphôhtuna 3

Khazohpa zawngiahna nata thadâhna hnabeiseina

1 A hiehâhna sômasi ry liata rietheina a pahnotuhpa châ na ta;

2 Zohna liata na chhihtha ta, na pasiesa ta, khaihna liata châ leipa ta;

3 eima chô liata noh y ta a ku a pathla ngâthlâh haw.

4 Ei sapa nata ei vo pazao ta, ei ruzy thlie ta;

5 kei ma liata a dia chahry ta, khana nata rietheina ta eina dô;

6 su zohpa liata na paysa ta, zâkhano ta a thi hawpazy hawhta.

7 Ei pua thei leina awpa ta na dô ta; ei bâlia pahrisa ta;

8 bao a hawpa ta ei awpa chhaota,ei hiana khoh leipa ta,

9 alô khaipa ta ei lâpizy papo ta,ei lâpizy pakoh ta.

10 Keima lâta chavyh chyhsa a byhpa hawhta,chakeibarôhneipa a nyupa hawh tlaita a châ;

11 ei lâpizy na pakosa ta, na hrie chhei ta; yru ngaitapa ta na tao ta;

12 a libaw a kei ta châtai a nuana châta na tawh ta,

13 A lavah liata châtaizy cha ei chhôh liata pangia haw ta;

14 ei chyhsa zydua châta pahneiparâsaopa ei vaw châ haw, noh y ta pahneisaopa hlazy ta ei vaw châ haw.

15 Ano chata hmo khapa ta na pabie ta, khana ta na parisa ta.

16 Lô châpa ta ei hâhzy na palaosa ta, Doh-lei liata na pakhiesa ta;

17 Nâ ta thlahlôhna tawhta ei hrona pasie syulyu chi ta, huhiena cha khâpama a châ tahpa chhao pahno khao va na;

18 “Ei rôhnahna nata ABEIPA tawhta ei hnabeiseina cha a lei khai haw,” ei tah.

19 Ei pasa taona nata ei viavina, khana nata hmo khapazy cha a thei thlâh ha mah y.

20 Ei hrona heta chazy cha a thei lymâ thlâh ha ta, ei chhôh liata a bôh thlâh haw.

21 He he pahno pathi heih na ta, chavâta hnabeiseina ei hnei haw.

22 Pahleipadiapa ta eima y leipa he ABEIPA zawngiahna a vaw châ, a thapasanazy cha a chhâ beih leipa vâta;

23 ama thi lymâ tyh, myta to ta; na ngiachhiena a rôhnah na.

24 “ABEIPA cha ei vyuh a châ,”ei hrona ta tah ta,”Chavâta ano cha ei hnabei a seih aw.

25 ABEIPA cha ano a hâtuhpazy châta pha ta. Ano a tluatuhpazy châna chata.

26 ABEIPA pachhana hnabeiseipa ta hâ thlâh hapa cha a phana.

27 Chyhsa a thyutlia nota raopakypa a kypa cha a pha na.

28 A pakysa hawpa vâta ano deita a tyuh sala, a thlih thlâh ha mawh sy;

29 a pakah doh-lei liata soh sala, hnabeiseina a y ngyu aw na;

30 a chabaituhpa hnohta a baih dao sala, reipachhiepa ta bie mawh sy.

31 ABEIPA chata chhâzaw ta thy tlôh leipa aw ta,

32 pachârôhsa hra sala, a zawngiah ngaitana zie lymâ hawhta a ngiachhie aw;

33 sawzy riepatheipa nata rupachhôpa he a kho viapa châ tlôh leipa ta.

34 Alei sei atâhpa zydua tlysaopazy.

35 Chônôchaipa hmiakô liata chyhsa thaipa thypazy,

36 chyhsa bie khâpa hrao leipa ta pachâsapa zy he, Abeipa a ryh a tahna zie châ vei.

37 Abeipa ta bie a pie leipa khiahta cha, bie reipa a patlô theituhpa cha ahy e a châ?

38 Hmophapa nata hmopha leipa he. Chônôchaipa pakah tawhta a puapa châ vei ma?

39 A moleina hriena liata khazia e chyhsa a hropa a paphô rai?

40 Eima lâpizy cha pasiapa ta pakhâta ta moh ei sila, ABEIPA lâ a heih ei suh u.

41 Eima pathipalôh cha eima kuzy chhaota avâ lâ Khazohpa lâna chata chaluah ei suh u:

42 “Taopasi pi ta, aty pi ta, nâ ta maniah a ngiahthai va chi.

43 “Pathi-iana ta a khu chi ta, maniah a chadai chi ta, thapasa leipa ta thie chi ta;

44 meihdo ry ta a nyu chi ta, chatanachata thlahchhâna sie palâh thei vei.

45 Zawpizy hry liana heta puapa nata phypahlypa ta maniah tao haw ta.

46 Eima khakhaipa zydua chata eima chô liata ama pakah a kawhpa ta â ei ta;

47 china nata khaotlôh ta maniah pha ta; paraona nata leidiana chhaota;

48 Ei zawpi sawchanô leidiapa vâta, ei mothlih cha chavah ti hawhta a loh haw na.

49 “Ei mothlih cha chi leipa ta, a chalih hlei leipa ta loh aw ta,

50 “ABEIPA ta avâ tawhta za mopa ta eina hmôna taihta;

51 ei khihpi sawchanô zydua vâta ei mo ta, ei palôh pachâ a parôh na.

52 A chhâpa y leipa ta ei khakhaipa zy chata pavaw hawhta nâ chadai ei ta;

53 a hropa ta khaotlô liata na pathla ei ta,ei chô liata alô pathla ei ta;

54 Ti ta na vao ta, ‘Ei leidia haw,’ tah na ta.

55 Khaotlô ry chaipa tawhna chata, hy ABEIPA y, na moh pado na ta;

56 ei ao cha nâ ta thei chi ta, ei husopa ta ei awpa pyu liata na nah a chahu hra khah y.

57 Ei cha aw noh liana khata a vaw hnia chi ta,‘Chi khâ!’ tah chi ta.

58 Hy Abeipa y, ei thaina bie na rei pachi ta, ei hrona chatlai chi ta.

59 Hy ABEIPA y, ei chô liata hmo a do leipazy he hmô chi ta; ei bie na pachiapa mah y.

60 Ama viarithôna zydua nata eina teina zydua cha hmô chi ta.

61 Hy ABEIPA y, eina reipachhie nata eina teina zydua cha na thei na.

62 Na siehnaotuhpazy hmao nata pachânazy, Noh y ta ei chô liata y ta.

63 Ama tyuna nata ama duapazy he moh tua; thata eina reipachhie ei.

64 Hy ABEIPA y, ama ku raihriazy lymâ hawhta, nâ chata viari na thô aw.

65 Pathipalôh châkarupa pahneisa aw chi ta; na chhiesapa ama chô liata a tla aw.

66 Pathi-iapa ta a chadai aw chi ta, ABEIPA avâ ry tawhtapa na pahleipadia aw,” tahpa ta. 

Chaphohtuna (Lamentations)

Bo 1	Bo 2	Bo 3	Bo 4	Bo 5

Chaphôhtuna 4

Chaphôhtuna 4

Zaio hriena a kina zie

1 Ngôh cha a zoh kaw ha dia, ngôh sua chaipa cha â nano kaw dia! Su pathaihpa alôzy cha othliah to liata hie pathlapa ta a châ aw.

2 Zaio sawchapaw so ngaitapa, ngôh suapa nata pakho theipazy cha, beih-lei beihvituhpa vipa hawh tlaita pachâpa haw hra ta.

3 Sihâ hmahta ama tawzy ama sâhpi pazysa ei ta, ei zawpi sawchanô deikua cha a nôchhie ta, râhpathohpa liata pavawpi hawh tlaita.

4 Hawsaih sâhpi a pazypa paleih cha dâhphipa vâta a dâh liata a bai ta; hawtizy chata niepa haw ei ta, ahy hmah pie veih ei.

5 Aoveipazy cha othliah liata leidia ei ta; poh sailawpa a bupa ta a laiseihpazy cha taih pahmaohna su liata thypa ta y ei ta.

6 Ei zawpi sawchanô hmoparaona cha Sawdawma moleina hlâta ru via ta, ku rai chhaota hria leipa ta movi hlâta paraopa kha.

7 A molaipazy cha dâhaw hlâta a pathaihpa châ ei ta, sâhpiti hlâta a ngyuhpa ama châ; sapa liana chata rubi hlâta a noh thyu via ta,  amâ ngianazie cha saphai hawhta a châ.

8 Ama lâna yzie cha lôiatheipa hlâta vyh via ta, othliahzy liana chata pahnopa châ veih ei; ama vo cha ama ruzy liata a bai ta, masô hawhta rao ta.

9 Nodipa ta thiepa hlâta la zaozi ta thiepa a pha via, hezy he leidia tlôh ei ta, lyu chicheipazy a phahlapa ta.

10 Tha pasatuhpa chanôzy ku chata âmo sawzy ama ku tlaita chhô aw ei ta,ama sawzy cha ama riethei nota niepa ama vaw châ haw.

11 ABEIPA ta a hiehâna a patlô haw, a pathi-iana chichhihpa a leitha; Zaio liata mei patih ta, a lôbôzy taihta a kâ khai.

12 Alei abeizy chata pangiasa leipa ei ta. khizaw liata a pahrâpa zydua chhaota, pasaipa-ituhpa nata khakhaipa Zerusale kuh chhikao liata ama thei awpa cha.

13 He he a hrohsopazy moleina nata a theihthaipazy hmoparaona vâta a châ, a chhôh liata chyhsa dopa thisaih a papuatuhpazy cha.

14 Mochaopa ta othliahzy liata viavi ei ta, thisaih ta pua ei ta, chyhsazy ta ama chysiazy dâhdei hria khoh veih ei.

15 “Sie syulyu teh u! Pathaih leipa saih u! Sie syulyu teh u! Sie syulyu teh u! Hria khah u!” tahpa ta chyhsazy ta awh ei ta. Chatanachata a râpaipa nata viavipa vaw châ haw ei ta; chyhsazy ta, “Phopizy hry liata pahrâ khao aw veih ei,” tah ei ta.

16 ABEIPA tlai chata hie patla ta, uasa khao aw vei; theihthaipazy ta zana hlao leipa ei ta, machâzy ta khokheina hlao hra veih ei.

17 Baona hrao leipa saipa ta, eima mo charawh khai ha ta; pachha thei leipa phopi cha a hâ la eima hâ na.

18 Chyhsa ta eima hnie cha thô ei ta, khih liah charei thei ma pi; eima chhâna a hnia; eima noh â ki; eima chhâna tlô haw tlôh ta.

19 Maniah chadaituhpazy cha avâ pahmôpizy hlâta ama chatlie via; tlâhzy liana chata maniah a chadai ei ta, râhpathohpazy liana chata maniah abyh ei ta.

20 Eima hnapasu liata hu. ABEIPA sathaw thupa cha khaotlô liata patupa ta a y haw. “Phopizy hry liata a nohpahli ry liata eima pahrâ hra aw,” eima tah tyhpa kha.

21 Hy Edôma sawchanô y, Uza râh liata a pahrâpa cha, Thaphapa ta aly teh; nyu cha na hnohta chhao vaw tlô aw ta; pari aw chi ta, nâsasyh ta thluahruapa ta na tao aw.

22 Hy Zaio sawchanô y, na hmoparaona hriena cha â ki haw, sei ta a chhipa châ khao aw va chi; hy Edôma sawchanô y, na hmoparaona cha vaw hrie aw ta, na moleinazy cha a hmô aw. 

Chaphohtuna (Lamentations)

Bo 1	Bo 2	Bo 3	Bo 4	Bo 5

Chaphôhtuna 5

Chaphôhtuna 5

Zawngiah nawpa ta thlahchhâna

1 Hy ABEIPA y, eima chô liata a vaw tlôpa cha a thei thlâh ha mah y; pachâ la, eima maohphyuna he moh tua!

2 Eima ryutopazy cha khichhaipazy hnohta piepa châ khai haw ta, eima ozy cha hmia pahno leipa chyhsazy hnohta.

3 Hârapazy nata paw hnei leipazy châ haw pi ta; eima nôzy cha nôhmei hawhta ama châ haw.

4 Eima ti dopazy cha a ty chhaopa ta doh haw pi ta, eima tho tipazy chhao eima hnohta zuapa a châ haw.

5 Rao dipa ta y pi ta; panao pi ta, pahâna rai hnei ma pi.

6 Izi chyhsa nata Asuria chyhsa lâta eima ku dao pi ta, rihbiena khi niepa hmô awpa ta.

7 Eima pawzy molei ei ta, y khao leipa ei ta; ama hmoparaonazy eima phaoh.

8 Seizy cha eima chô liata ryu reih ei ta; ama ku tawhtapa maniah a pachha awpa ahy hmah y veih ei.

9 Hro pahlei chi a chhihna taihta eima niepa eima nie tyh, râhpathohpa liata zaozi vâna chata.

10 Eima vozy cha lômathu hawh vyh khai ha ta, chakâhpa noh kâhna sapa vâta.

11 Zaio liata chanôzy cha a lyhnao ei ta, laihsazy cha Zudah khihpi liata zy.

12 Abeisawzy cha ama ku ta bangie ei ta; machâzy hmia za veih ei.

13 Satliazy sâh chariesa ei ta; hawtizy tho ty ry liata a viavô ei ta.

14 Machâpazy ta kuh chhikao siesai ei ta, satliazy ta ama hla sa thei khao veih ei.

15 Eima pathipalôh thaphana a lo haw; eima lâpa mâchhiesana ta a châ haw.

16 Eima luh tawhta lakho a tla haw; eima hu a po na, molei haw tlôh pi ta.’

17 He vâna heta eima pathipalôh panao ta, hezy vâna heta eima mo a zoh.

18 Zaio tlâh cha roryhrapa ta a y hawpa vâta;sihâzy a chô liata ama charei.

19 Nâ cha ABEIPA y, chhâzaw ta a bei chi ta; na beidyuchhai cha chhâ zydua taihta.

20 Khâpa vâta e chhâzaw ta maniah my chi ta, cha ti cha sa maniah na siesai tly?

21 Hy ABEIPA y, nâma ta nâ lâta maniah paheisa la, chatanachata eimâ vaw heih aw. Hlâno hawhta eima nohzy vaw taopathi mah y.

22 Cha khiahtala nâma ta maniah na thy pathlah ma? Eima chô liata na pathi a ia ngaita ma? 

Chaphohtuna (Lamentations)

Bo 1	Bo 2	Bo 3	Bo 4	Bo 5