Mara Holy Bible: Biechhotuhpa

Showing posts with label Biechhotuhpa. Show all posts

Biechhotuhpa 1

Ato hrao leipa a châ

1 Zerusale beipa, Davi sawchapawpa, Biechhotuhpa biezy cha.

2 Biechhotuhpa chata hrao leipa,“hraoleipazy hraoleipa cha hraoleipa dei a châ! Hmo zydua he hmo hraoleipa a châ a tah.

3 Chyhsapa chata noh ry liata a hriapasana tawhta khâpa athôhna e a hmô?

4 Chhâzy lei ta, chhâ hropa vaw y heih ta, châhrasala alei deikua a y ngâthlâh haw.

5 Noh zy vaw chhi ta, tlâ tla heih ta, “a vaw chhina su lâ cha tlao â parah tyh.

6 Thlih cha chho lâ tawhta vaw pathli ta, maw lâta khô pathlah ta; pathli chahlô lymâ ta, a vaw pathli tuana lâ cha kua heih ta.

7 Vatie zydua cha tilaipi liata tla ei ta, châhrasala tilaipi cha bie hlei vei; vatiezy cha ama lona tyhpa lâna chata, loh pathi lymâ heih ei ta.

8 Hmo zydua he noaichhihpa sai a châ, rei tiahpa chhao châ vei; mo ta a hmo hmôpa liana cha lôhrâtlô leipa ta, nahkhao chhao chata a hmô theipa cha bie hra vei.

9 Hmo a vaw y hawpa kha a vaw y awpa raina a châ, hmo tao hapa kha tao awpa raina a châ;noh ry liana heta hmo thiehpa rai y vei.

10 “Moh teh, he he a thiehpa cha a châ, “tah theipa hmo a y rai ma? Eima y hlâpi ta a vaw y chiehpa saina a châ.

11 Chyhsa parohpazy pahno thlâh hana rai cha y khao leipa ta, a vaw pazipa pahno thlâh hana rai chhao y hra vei, ama hnôh lâ via heihta a vaw y awpa liata chhao.

Biechhotuhpa ta a chapiapazy

12 Biechhotuhpa na he Zerusale liata Izarel zy chôta abei ei châ haw.

13 Avâ ry ta hmo zydua he sona hmâpa ta ei palôhrupa ta ei tlua khai haw; Khazohpa ta chyhsazy hnohta hria awpa ta a vaw piepazy he riethei a chhih ngâsâ sai.

14 Noh ry ta hmotaopa zydua cha ei hmô khai haw; pachâ teh, hmo zydua he hraoleipa sai a vaw châ, khâpa hmah châ tlâ veih ei.

15 A koh chiehpa cha patlâh rimâ theipa châ leipa ta, a vy leipa cha rei thaipa rih châ vei.

16 Keimasasyh ta, “Zerusale liata a ypazy hlâta cha thata so via na ta; ei palôhrupa sona pahnona liata chhao ei pahno via syulyu,” a tah na ta.

17 Ei palôhrupa he sona pahno theina awpa nata ahrupa nata hruna kyh pahno awpa ta hmâh na ta. He chhao he hmo phahnai leipa deita a châ tahpa ei pahno haw.

18 Sona thata yna liana cha tymâna a hluh, pahnona papôhsatuhpa cha pachârôhna papôhsatuhpa a châ.

Biechhotuhpa (Ecclesiastes)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10	Bo 11	Bo 12

Biechhotuhpa 2

1 Keimasasyh ta, “Khaw, alyna ta duah ei cha pasia tua aw; nâmasasyh ta a palysa tyh,” a tah na ta. Châhrasala he chhao he hraoleipa a châ.

2 Pahneina chhao he hruna ta pahno na ta; alyna chhao he a phahnaina rai pahno va na.

3 Chyhsa sawzy ta ama hrona daihti bohpi leipa ta liata avâ ry ta ama hmotaopa phapa cha ei hmô theina awpa ta, ei palôhrupa sona chhihtha lymâna chôta, ei pôhpa cha kresawti ta palysa theina zie nata so leina kyh patu theina zie ei palôhrupa ta ei tlua tyh.

4 Rai ru ngaitapa hria na ta; ozy sa na ta, kresahdôzy ei tao;

5 sahdôzy nata su thothih zy tao na ta, cha liana chata chicheipa thozy ei loh.

6 Râhhmâhpa thozy a pasa awpa ta tipozy ei tao.

7 Seichapaw nata seichanô zy chalei na ta, ei o liata a pihpa seizy chhao ei hnei hra; viahchao hri nata mietahkupa zawzy chhao thata hnei hra na ta, Zerusale liata a y tuapenawh hlâ chhaota thata ei hnei.

8 Tâkâri nata ngôh, abeizy ryuto nata râh pha kawpa chhao pakhy na ta; chapaw hlasa thaipa nata chanô hlasa thaipazy hnei na ta, chapaw alyna châta nôtho a hluhpi ei hnei.

9 Chatanachata thata vaw hneirôh na ta, Zerusale liata a pahrâ tuapazy ei khô haw, ei sona cha a ualua ta a y thlâh haw hra.

10 Ei mokhaoh ta a khopa maih cha thlyu leipa na ta; ei palôh chhao alyna kheihhawhpa lia raita mao-oh va na, ei hriapasana zydua liana cha ei palôh cha aly ta; cha cha ei hriapasana zydua liata lymâ cha a châ.

11 Chatawhcha ei hriapasana zydua nata ei ku ta ei hriapa zydua pachâ na ta, cha zydua cha hraoleipa, khâpa hmah ta phahnai leipa a vaw châ thlâh haw, noh ry liata khâpa hmah ta athôhna hmôpa y vei.

12 Chatawhcha sona nata hruna kyh nata hruna zy pachâ na ta; chyhsa ta a hnôh lâta a vaw bei awpa châta khâpama a tao thei tly? Hmo a y chiehpa dei leipa ta cha.

13 Chatawhcha khaihna ta zohna thata a khôpa hawhta, sona chhao heta hruna cha a khô hra.

14 Chyhsa sopa cha a luh liata mo hnei ta, ahrupa chyhsa deikua zohna liata a charei; châhrasala yzie miakha ta ama zydua chô liata a tlô thlâh ha thlyu tahpa ei pahno.

15 Chatawhcha keimasasy ta, “‘Chyhsa hrupazy chôta a tlôpa cha ei chôta tlô tlôh aw ta; khâpa awpa ta ma ei so via rai?” ei tah tyh. Chatanachata keimasasyh ta he chhao he hraoleipa deita na a châ ei tah tyh.

16 A sopa chyhsa châ chhao ahrupa chyhsa châ chhao pahno thlâhna he y leipa aw ta, noh a vaw y awpa zy liana chata mypa ta ama châ rairieh aw. A sopa chhao cha ahrupa hawhta a thi thlâh ha hra aw cha zaw.

17 Chavâta hro he a hao na ta, noh ry ta hmo zydua he pachâ na parôhtuhpa deita na a châ; hmo zydua he hraoleipa nata khâpa hmah a châ leipa saina a vaw châ.

18 Noh ry liata ei hriapasana zydua ei hao haw, ei hnôh lâta a vaw y awpa chata ei râsaipa deita châ tlôh ta;

19 chyhsa sopa ma a châ ahrupa ma ahy e a pahno hlei aw? Noh ry liata sona hmâpa ta ei hriapasana zydua totuhpa a vaw châ thlâh ha aw. He chhao he hraoleipa dei a vaw châ.

20 “Chatanachata a heihâ na ta, noh ryta ei raihria hriapasana zy liana cha ei hnabei a dy haw.

21 A châh ta cha chyhsa ta sona nata novâhna zôthaina hmâpa ta hriapasa ta, cha cha a hriapasa leipa to awpa ta tlao a siesai thlâh haw. He chhao he hraoleipa nata hmopha lei ngaitapa a châ thlâh haw.

22 Chyhsa ta noh ry ta a hriapasana nata a palôhrupa rietheipa ta a pachâna liata khâpa e a hnei?

23 a hro chhôh noh zydua cha pasana saita châ ta, a raihriana chhao ruchhôna tlâ a châ; zâ ta chhao a palôhrupa tha a hno hlei leipa ta. He chhao he hraoleipa deita a châ.

24 Chyhsapa châ heta nie nata doh ta hriapasana kyh liata alyna hleikhôpa he y vei. He chhao he Khazohpa tawhtapa a châ tahpa ei pahno haw;

25 ano leipa ta ahy e nie nata dopa ta miah palysa theipa a y aw?

26 Ano a palysatuhpazy hnohna chata, Khazohpa ta sona nata novâhna nata alyna pie tlôh ta; moleipazy deikua cha Khazohpa palôh a patlâhsatuhpazy ota pie awpa ta lapakhypa nata pahmaohpakhypa rai pie ta. He chhao he hraoleipa nata khâpa hmah a châ leipa dei a châ.

Biechhotuhpa (Ecclesiastes)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10	Bo 11	Bo 12

Biechhotuhpa 3

Ato châta daihti

1 Ato châta daihti raopa châ ta, avâ ry ta ato châta daihti rypaohpa a y:

2 pina daihti y ta, thi daihti a y; lo daihti y ta, lo chiehpa phia daihti a y;

3 thi daihti y ta, patla daihti a y; phie daihti y ta, sa heih daihti a y;

4 cha daihti y ta, pahnei daihti a y; mâchhiesa daihti y ta, lâ daihti a y;

5 alô thy daihti y ta, alô pahmaoh daihti a y; a pyh daihti y ta, a pyh lei daihti a y;

6 tlua daihti y ta, pahlei daihti a y; padopazy daihti y ta, thy pathla daihti a y;

7 hrie daihti y ta, bie daihti a y; a chalih daihti y ta, bierei daihti a y;

8 kyhpachâ daihti y ta, ahao daihti a y; adyuh daihti y ta, adyh daihti a y.

9 Raihriatuhpa ta a hriapasana tawhta khâpa athôhna e a hmô?

10 Khazohpa ta chyhsa sawzy ota atymâkhei awpa ta rai a vaw piepa cha ei pahno haw.

11 Ato he ama daihti chyu liana cha ângia ngaitapa ta tao ta; chyhsa palôhrupa liana cha chhâzaw pahneisa ta; châhrasala ano chata Khazohpa ta a thao tuana tawhta a chhâna taihta hmo a taopa cha pahno thei hlei vei

12 Aly ngaitapa ta y ta, âmosasyh ta ama hro chhôhta apalysapa hleikhô ta ama châta hmo khochhihpa rai he y vei tahpa ei pahno haw;

13 nie nata do ta a hriapasana kyh zydua liata alyna cha chyhsa ota Khazohpa hmosaipa piepa a châ.

14 Khazohpa ta a taopa maih cha a y kôzaw thlâh ha aw tahpa ei pahno; khâpa hmah ta baichha theipa châ leipa aw ta, thy theipa châ hra aw vei; chyhsapa ta Khazohpa chi theina awpa ta a taopa châ tlôh.

15 Hmo a y haipa he, a y chiehpa kha châ ta; hmo a vaw y awpa chhao a y chiehpa kha a châ; Khazohpa chata a lei ha chiehpa kha a vaw paysa lymâ heih.

Chyhsapa hrona khâpa hraoleipa a châna zie

16 Cha dei chhao châ leipa ta noh ry ta siana a yna su liana chata hmoparaona y ta, adona a yna lia chhao cha hmoparaona a y thlâh haw.

17 Ei palôhrupa ta, Khazohpa ta a siapa nata hmoparaopazy ryu a reih aw, hmo to châta nata rai to châta Khazohpa ta daihti rao khai ha tlôh ta, tah na ta.

18 Chyhsa sawzy he sahroh zy deita ama châ tahpa ama pahno theina awpa ta Khazohpa ta âmo a pasiapa hawhta pachâ na ta.

19 Chyhsa sawzy chôta tovyuh nata sahroh zy chôta tovyuh cha alyu thlâh ha tlôh ta; pakha thihpa hawhta, a hrohpa chhao thi thlâh ha hra ta. Husopa alyupa sai châ ei ta, chyhsapa cha sahroh hlâna chata nohhlao via hlei vei, ato zydua he hraoleipa ama châ.

20 Ama zydua ta pangaina su lâta pangai ei ta; dohlei tawhtapa sai châ ei ta, ama zydua ta dohlei lâta ama kua heih.

21 Ahyma chyhsapa thlahpa cha a chôlâ a kiahpa pahno ta, sahroh thlahpa cha alei ry lâchhâh a zupa a pahno?

22 Cha vâna chata chyhsapa chata a raihriana kyh liata alypa hleikhô ta a pha viapa rai y vei, cha cha a tovyuh tlâ a châpa ta ei pahno, a hnôh lâta hmo a vaw y awpa hmô awpa ta ahy e a vaw kuakhei heih bao aw?

Biechhotuhpa (Ecclesiastes)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10	Bo 11	Bo 12

Biechhotuhpa 4

1 Vaw sai heih na ta, noh ry liata pasaipa-ina zydua cha hmô na ta. Chatawhcha pasaipa-ipa ta a ypazy mothlihzy cha thlahpalôhtuhpa hnei leipa ei ta! Âmo a pasaipa-ituhpazy chata hmotaotheina hnei ei ta, âmo deikua cha thlahpalôhtuhpa rai hnei veih ei.

2 Chyhsa a hroh thlâh hapa zy hlâta athihpa, a thi hapa zy cha uava amâ chhih via;

3 chazy hlâ chhaota a vaw pih leipa, noh ry ta moleina hmotaopa rai a hmô leipa châ awpa cha a pha via heih.

4 Chatawhcha hriapasana nata zôthaina zy chhao he vaihzy uavana vâta a vaw ypa a châ tahpa ei pahno haw. He zydua chhao he hraoleipa nata khâpa hmah a châ leipa a châ.

5 Ahrupa chata a ku pakoh thlâh ha ta, ano sapa a nie.

6 Hriapasana khâpa hraoleipa pazah hmo no hlâta cha a chalih thlâh hapa pazah hmo kha a pha via.

7 Ei vaw sai ngâ nah ta, noh ry liana cha hraoleipa sai a châpa ta ei hmô;

8 chyhsa pakha deipa ta, saw tlyma, unawhpa tlyma a hnei leipa, a hriapasana kyh liata a daihdaona a hneirôna kyh liata a palôh tlâh beih leipa, cha chyhsa chata anosasyh ta, “Ahy châta he tlupo ta hriapasana nata hro pahâh leina taih ei hria?” a tah ta. He chhao he hraoleipa, riethei chhihpa deita a châ.

9 Panopa cha pakhapa hlâta a pha via, ama hriapasana lymâ ama hmô vâta.

10 “Amâ hluah khiahcha pakha chata a viasa hropa cha a patu aw; viasa a hnei leipa deikua cha a hu a po na, a hluah tita a patutuhpa a y leipa vâta.

11 Pano ta ama zia khiahcha amâ hniehpa vâta a lalôh aw, pakha deipa cha kheihta e alalôh thei aw?

12 Pakha deipa kha cha chyhsa ta pahnie thei hrasala, panopa cha amâ dyuh thei aw, ri thôh ta charipa cha tlâ chie thlâh ha beih vei.

13 Abei ahrupa machâ hapa, chhoreina a patu thai khao leipa hlâta chyhsa rietheipa thyutliapa a sopa cha a pha via,

14 atâhna o tawhtapa cha abei awpa ta a vaw puapa châ tlôh ta, a râh chhôh liata rietheipa ta a pihpa châ hrasala.

15 Noh ry liata a chareipa chyhsa a hropa abei vyuhpa ta a ypa thyutlia lâchhâh ama saipa ta hmô na ta;

16 zawpizy cha rei tiahpa chhao châ veih ei, ama zydua chô liana chata y tlôh ta. A daihti hnôh lâta a vaw y awpa zy cha ano liana cha aly hlei aw veih ei. He chhao he hraoleipa nata khâpa hmah hraoleipa châ hmeihseih tlai ta.

Biechhotuhpa (Ecclesiastes)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10	Bo 11	Bo 12

Biechhotuhpa 5

A charâ baikhaipa ta bietaina a pha leina zie

1 Khazohpa o lâta na pangai nona cha na phei a phapa ta vaih teh; ahrupa zy atheihna hlâpa hlâna cha nahthlie awpa ta a vaw hniapa he pha via tlôh ta; hmo moleipa ama taopa cha pahno tlôh ei va.

2 Na pakah cha a parah khah se, Khazohpa hmiakô ta bie na rei awpa cha na pathipalôh parah tu khâ, Khazohpa cha avâ liata y ta, nâ cha alei liata y tlôh chi ta; chavâta na biezy chhao tlao chyh se.

3 Tymâna hluhpi cha ziachaphapa châ tlai tlôh ta, bie hluhpi reipa chhao hruna ao a châ.

4 Khazohpa lâta chhie nâ sakhâh hapa cha diathlâ khâ; ahrupa cha aly tlôh va. Chhie nâ sakhâh hapa cha patlô teh.

5 Chhie liahsa a sakhâh ha ta patlô leipa hlâta cha chhi a sakhâh leipa tlao a pha via.

6 Na pakah chata chapa moleisa khah se, vâlyuhchâpa hmiakô ta chhao taopasipa a châ tah khâ; khazia e Khazohpa cha na awna kyh liata a hiehâh ta, na ku raihriana zy a parao?

7 Mâsana a hluhna lia maih ta, bie ruapa a hluh: chavâta Khazohpa tlao chi teh.

Hrona dadiena zie

8 Râh pachhaihpa liata rietheipazy pasaipa-ina y ta, siana nata adona kyh cha thachahra ta a pahleina kyh liata noâh khâ; hyutuhpa a sâhpa cha a sâh viapa ta vaih ta, cha zydua hlâta a sâh chaipa pakha a y.

9 Chyhsa ta râh tawhta a lyu hneipa a thôhna zydua liana cha abei ta athôhna a hmô hra.

10 Tâkâ sôh a pachâtuhpa cha tâkâ liata a palôh tlâh leipa aw ta; hneirôna a chadaituhpa chhao chata a khopa hawhta a thôh hlei vei. He chhao he hraoleipa tlâ a châ.

11 Sôh nata piah hluhna liata cha a nietuhpa ama pôh; a hneituhpa chata mo ta a hmô dei leipa ta khâpa e a phahnai?

12 Raihriatuhpa cha a nie hluh tlyma, chyh tlyma, a mokuh pahâh ngaita kaw ta; a hneirôhpa deikua cha a hneina cha tlao a môkhei thei vei.

13 Hmo molei ngaitapa noh ry liata ei hmôpa cha; chyhsa ta âmo chata pei awpa ta sôh a pachôpa hih,

14 sôh a pachôpa zy cha moleipa moleina vâta lei khai ha ta; saw a hneipa chhaota a ku liata khâpa hmah y khao vei.

15 A nô chhi tawhta thluahruapa ta a vaw puapa hawhta kua heih ta, a hriapasana theilâpa a ku ta a chei theipa chhao cha khâpa hmah a chei aw vei.

16 He chhao he hmo pachâ pachhiesa kawpa a châ; a vaw puana ta hawhta a kua heih awpa he; a ruapa châ deita a hriapasana he khâpa e a thôhna,

17 a hro chhôh noh zydua cha pachârôhna nata zohna ta hmâh ta, a palôh tlâh tiarâh leipa ta, pasa tao nata hiehâh ngaitapa ta a y thlâh haw.

18 Pachâ teh, hmophapa nata ngiapa ei hmôpa cha chyhsa ta nie ta, a dopa, a hriapasana Khazohpa ta a piepa, a hro chhôh noh zydua ta noh ry liata a hria tyhna liata hmophapa zy cha thaphapa ta a hmâhpa cha, cha cha a tovyuh tlâ a châ.

19 Chyhsa ahy hnohta rai Khazohpa ta hneirôna nata sôh nata piah a piepa cha, cha cha a to awpa ta theina a piepa zy, a tovyu a pyh thaina zy, a hriapasana kyh a pha tah theina a piepa he, he he Khazohpa hmopiepa a châ.

20 A hro chhôh nohzy cha pahno hlei khao leipa aw ta, a palôh lyna liana cha Khazohpa ta a pachha vâta.

Biechhotuhpa (Ecclesiastes)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10	Bo 11	Bo 12

Biechhotuhpa 6

1 Noh ry liata hmo moleina ei hmôpa cha, chyhsazy chata a hri ngaita kaw:

2 chyhsapa Khazohpa ta hneirôna zy, sôh nata piah zy, zachhihna zy a piepa cha, chavâta a palôhrupa ta a byuhpa maih cha a phahla leipa ta; châhrasala Khazohpa ta cha zydua chô liata biehneina cha pie tlôh va, khichhaipa zy ta lôhhrâtlôpa ta tlao y ei ta; he chhao he hraoleipa a châ; riethei a chhih ngâsâpa a châ.

3 Chyhsa ta saw za kha sa sala, kô hluhpi hrohpa ta; châhrasala a hroh nohzy cha a khozie hawhta hmâh leipa ta, pabutuhpa chhao hnei leipa sala, cha hawhpa chyhsa hlâta cha a daihti leipa ta pihpa chhao a pha via ei tah.

4 Ano cha khâpa hraoleipa ta vaw pua ta, zohna lâ sie ha ta, zohna ta a moh cha a khu haw;

5 cha leipa chhaota noh hmô leipa ta khâpa hmah pahno hra vei, a hropa hlâna khata tlao a vâhnei via.

6 Kô sâh lie no chhao hroh hrasala, hmophapa a hmô tlôh vei khiahta cha su a miakhasaipa liata siepa châ aw veih ei mâ?

7 Chyhsapa hriapasana zydua cha aoh châta tlâ a châ; châhrasala a khopa a daih hlei vei.

8 Chyhsa sopa cha ahrupa hlâta khâpa athôh viana e a hnei? Cha vei khiahta sipasapa chyhsa a hrohpa hmiakô liata a charei thaipa chata khâpa e a hmô?

9 Khona a zawvawpa hlâta cha mo ta hmôpa cheingei a pha via; he chhao he hraoleipa nata khâpa hraoleipa dei a châ.

10 Hmo a vaw ypa maih he moh bi chiehpa sai châ ta, chyhsa châna chhao he pahno chiehpa sai a châ, chyhsapa cha khâpa châ ta ma, ano hlâta thatlô viapa cha kheihta e adyuh thei aw.

11 Bie a hluhna maihta hraoleipa hmo a hluh, chyhsapa chata kheihhawhpa e a pha via aw?

12 Chyhsa a hro khâpa hraoleipa noh chyuta, nohpahlipa hawhta a hrona chhôhta heta a châta pha chaipa awpa cha ahy e a pahno? Noh ry liana heta chyhsa, a hnôh lâta hmo a vaw y awpa cha ahy e a chho thei aw?

Biechhotuhpa (Ecclesiastes)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10	Bo 11	Bo 12

Biechhotuhpa 7

Sona phana zie

1 Moh phapa cha sathaw sôhpa hlâta a pha via; pih noh hlâta, thi noh chhao.

2 Kyhchhina o lâ pangai hlâta cha,mâchhiesapa o lâ pangai a pha via; he he chyhsa zydua chhâna châ tlôh ta,ahrohpa zy ta ama palôh liata ama pachâpa cha.

3 Pahneipa hlâta pachârôhpa a pha via, hmia phao liata pachârôhpa chata palôh palysana a tao.

4 A sopa palôhrupa cha mâchhiesana o a châ; ahrupa palôh deikua cha lôhawhpa o a châ.

5 Chyhsa hrupa hla sapa nahthliepa hlâta chyhsa sopa chhoreina nahthliepa a pha via.

6 Beih khaipa ry ta ahloh kâpa pyu hawhta, ahrupazy pahneipa cha a châ; he chhao he hraoleipa a châ.

7 Pasaipa-ina heta chyhsa sopa pahrusa ta, panaopapâna heta palôh a parao.

8 A thaona hlâta hmo a chhâna a pha via; palôh mao-oh theina he palôh laipa hlâta a pha via.

9 Hiehâh awpa ta a parah khâ, Hiehâhna cha ahrupa zy kalachhôh lia y tlôh.

10 Na châta, “Khazia atahmâhlâ nohzy hlâta hlâno noh zy kha a pha via?” tah khâ. "He na hiahripa he, sona vâta châ tlôh va.

11 Sona a pha, ryutopa hawhta, noh hmôtuhpazy châta ama nohhlao kaw.

12 Sona patosapa he tâkâ pabosapa hawhta a châ; pahnona phahnai zie cha sona a pabohsatuhpa ta ano hrona hneipa a pabohsapa hawhta a châ.

13 Khazohpa raihria duah pachâ teh; a pakoh ha chiehpa cha ahy e a patlâh thei khao aw?

14 Phana noh liana cha aly la, chhiena noh liana cha pachâ teh; Khazohpa chata pakhapa a hrohpa hawhta a tao hra, chavâta chyhsa ta a hnôh lâ tahpa cha khâpa hmah ta a pahno leina awpa ta.

15 Ei hro khâpa hraoleipa liana heta ato vaw hmô haw na ta; asiapa siana chata a leidiapa ta ypa ta, hmoparaopa hmo moleipa taona chôta hro a pasih kawpa zy he.

16 Sia tupa ta y leipa la, so tupa ta y hra khâ; khazia e nâmasasyh ta na pahleipadia?

17 Hmoparao tuhpa ta y leipa la, hrupa ta y hra khâ; na daihti leipa ta khazia e na thi aw?

18 He he na patu awpa ta a pha, cha chhao cha pathlie cheita khâ; Khazohpa a chituhpa chata puasai khai tyh tlôh aw ta.

19 Khihpi liata ryureituhpa pahrawh hlâta sona chata chyhsa sopa cha tha a patlôsa via.

20 Hmopha a taopa, hmo parao beih leipa chyhsa cha alei chô liana heta y tlai veih ei.

21 Chyhsa bie reipa maih ta nahkhao pachôh khâ, na chakaotuhpa khata chhie a cha sapa tlamaw aw na;

22 nâma tlai chhaota ei hluhpi chyhsa châta chhie na sapa haw tahpa a pahno tlôh chi ta.

Sona tluana zie

23 He hmo zydua he sona ta ei pasia khai haw; “Ei so thlyu aw na,” tah na ta; châhrasala a hniasia vei.

24 Cha hmo yzie hmeihseihpa cha a hla ngaita ta, athuh ngaita hra, ahy e a hmô thei aw?

25 Sona nata hmo yzie pahno kawhpa zy hmô awpa zy ta tlua na ta, ei palôhrupa ta a heihâ na ta, hmoparaona he hrungâna hruna he ngâ kathluna a vaw châ tahpa ei pahno.

26 Chatawhcha thina hlâta a khah viapa hmo ei vaw pahnopa cha chanô a pathipalôh khohei nata sao hawhta châ ta, ku ta a patupa hrapa cha keihrai hawhta a châpa cha a châ; ahyrai Khazohpa apalysatuhpa cha ano tawhtapa a boh aw ta; moleipa deikua cha a patu tlai aw.

27 Biechhotuhpa chata he tana heta a tah, nahthlie teh, bie dopa pahno awpa ta ei hmôpa cha he he a châ, ei palôhrupa ta khâ ei tlua tyhpa, ei hmô thei tyh leipa cha a châ.

28 Chapaw thy kha hry liana chata pakha hmô na ta. Chanô hry tawhta chhochhi la hmô va na.

29 He deita he ei hmôpa cha a châ, Khazohpa ta chyhsapa he a dopata ta tao ta, âmo deikua chata hmo a hluhpi ama papua tyh tahpa hih.

Biechhotuhpa (Ecclesiastes)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10	Bo 11	Bo 12

Biechhotuhpa 8

Sonô phana nata tlyuna zie

1 Sonô châ awpa ta, pahnothaina cha a ao papua vei ma?

2 Lâthlôh kiah su a sâhpa chô liata zy, lâpi a tyhna liata zy a duah tyh ta;

3 khihpi angiana chhikao khô, chhikao thaby liata zy a paro ngaitapa ta awh ta:

4 “Hy nâmo chyhsa saih u, ei cha aw ei hih; ei ao cha chyhsa sawzy châta a châ.

5 Hy nâmo angâpa saih u, a ryhna pahnona he novâhpa ta y teh u; nâmo a hrupa saih u, sona pathipaloh a hneipa chyhsa vaw châ teh u.

6 Nahthlie teh u, hmo pha ngaitapa ei reih aw, ei bie reipazy cha hmo dopa sai a châ aw;

7 ei pakah chata hmeihseihna kyh reih aw ta; hmoparaona cha ei hmao châta pasichhihpa a châ.

8 Ei pakah liata bie zydua cha a siakhaipa a châ; bie a kohpa nata dyutlai leipa rai y vei.

9 A pahno thaipazy chata sia khai ta, sona a hmôtuhpa zy châta â do khai.

10 Ei pachunazy aly teh u, tâkâzy châ leipa ta, sona cha ngôh khochhihpa hlâ chhaota;

11 sona cha rubi lôsôpa hlâta pha via tlôh ta, saduthiepa hmo zydua a khô theipa y veih ei.

12 Kei, Sonô chata ei pahrâna liata aryhna pahnona tao na ta, sona nata pachâpady thaina ei pahno tyh.

13 ABEIPA chipa cha moleipa a haopa he a châ. Palaina zy, pasâhsana zy, hmo moleipa taona zy, pakah nôchhiepa zy he ei hao hmeihseih.

14 Ryhraopa nata pahnona dopa he kei eih châ ta, Pahnothaina châ na ta, thatlô ngaitapa ei châ.

15 Keima baona ta abeizy ryureih ei ta, abeisawzy ta ryureina siapa ta bie ama pathlu tyh,

16 keima baona ta abeisawzy ta ryureih ei ta, molaipazy leilô liata pachiatuhpa zydua chhaota.

17 Ei kyh nâ pachâtuhpa cha a kyh pachâ na ta, phahnai khohpa ta nâ tluatuhpa chata eina hmô aw.

18 Hneina nata zachhihna zy ei hnohta y ta, hneina nata siana tlyu ngaitapa cha.

19 Ei patheipa cha ngôh hlâta pha via ta, ngôh suapa hlâ chhaota, ei pangiapa cha tâkâ ri a suapa hlâta.

20 Siana lâpi a chhih na ta, pachiana lâpi liana tlaita,

21 ei kyh na pachâtuhpa zy cha hneina ryu patosa na ta, ama ryubyh zy ei pabie hra.

22 ABEIPA ta a hmotaopa thaby chaipa ta na tao ta, hlâno ta hmotao thaby chaipa ta.

23 Tlyzaw tawhta a thao tuana liata taopa ei châ, leilô y hlâ rai ta.

24 Ti a thuhpa y hlâpi ta, y haw na ta, tihnawh ti hluhpi y hlâpi ta.

25 Tlâhpi zy yzie a hnei hlâta nata, tlâhzy y hlâta ei y haw;

26 leilô tao hlâta nata sibiepa su zy tao hlâta, khizaw liata dohlei chhao a y hlâpi ta.

27 Avâzy a pa-i nota y haw na ta, tilaipi a thuhpa chô liata chahlôna a tao nota,

28 chô lâ avâ a pa-i nota, a thuhpa tihnawhzy tha patlôpa ta a y nota,

29 tizy chata a biepiepa ama parao lei nawpa ta, tilaipi râhri zy taopa ta leilô bôna a tao nona khata,

30 cha nona chata a kiapâh liata raihria thaipa ta y na ta; a hmiakô liata khâ alypa ta, noh tato alyna châ na ta,

31 pahrâ theina a leilô liata thaphapa ta ypa ta, ei lyna cha chyhsa sawzy chô liata a châ.

32 Chavâta ei saw saih u, ei bie nahthlie teh u; ei lâpi a chhihtuhpa zy cha byhnâ atopa châ tlôh ei ta.

33 Pachuna cha nahthlie ula, so ula, khoh leipa ta y khah u.

34 Ei chhikao thaby liata hâpa ta, ei dôhpachhôh chhikao liata noh tato hâpa ta, ei bie a nahthlietuhpa cha a nohhlao na.

35 Na hmôpa maih chata hrona a hmôpa châ tlôh ta, ABEIPA khokheina to aw ta;

36 na hmô leipa maih deikua chata anosasyh ta pasana a tao, nâ haopa zydua cha thina kyh apachâpa ama châ,” tah ta.

Biechhotuhpa (Ecclesiastes)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10	Bo 11	Bo 12

Biechhotuhpa 9

Hrona a khoh leina zie

1 He zydua pahno khai awpa heta pachâ ngaita tyh na ta, a siapa chyhsa nata a sopa chyhsa zy hmotaopa cha Khazohpa ku liatahpa a châ; kyhpachâpa ma, a haona kyh ma a châ tahpa chyhsapa ta pahno vei. Âmo hmialâ tahpa zydua chhao hraoleipa deita ama châ.

2 Chyhsa zydua chôta tovyuh miakhapa sai a tlô, a siapa nata moleipa, a phapa nata a chhiepa, a pathaihpa nata a puapa, atheihna a hlâpa nata a hlâ leipa chôta chhao. Chyhsa phapa hawhna hra chata, moleipa chhao; chhiesa a thaipa nata thai leipazy chô liata chhao.

3 Noh ry liata hmopha leipa zydua cha he he a châ, chyhsa zydua ota tovyuh miakhapa saita a châpa he; chyhsazy palôhrupa cha moleina sai ta bie ta, ama hro chhôhta ama pathipalôh liata hruna y ta, cha hnôh lâna cha athihpa lâta ama pangai.

4 Ahrohpa hnohta a pahlao chypa châta cha hnabeiseihna y ta, chakeibarôhneipa thi chiehpa hlâta i a hrohpa cha a phahnai via.

5 Ahrohpa chata ama thi awpa ama pahno; châhrasala athihpa chata khâpa hmah pahno veih ei, lymâ rai hnei khao veih ei; ama pahnona cha lei ha tlôh ta.

6 Ama kyhpachâna zy, amâ haona zy, ama uavana zy a leidia khai haw, noh ry liata hmotaopazy liana heta tovyuh rai hnei khao veih ei.

7 Sie la, aly ngaitapa ta na pati nie teh, palôh thaphapa ta na kresawti doh teh; Khazohpa ta na hmotaopazy a pyh ha tlôh ta.

8 Na chysia cha khâ ngyuh thlâh ha se; na luh chhao parôh khah se.

9 Noh ry liata daihti a cha piepa hraoleipazy liana cha aly ngaitapa ta na lahpinô, na kyhpachâpa hnohna chata y teh, cha cha na hro chhôhta nata noh ry ta na hriapasana chhôhta na tovyuh cha a châ.

10 Na ku ta hriapa a hmôpa maih cha, na hria theipa hawhta hria teh; Sheôl na pangaina awpa liana chata hmotaopa tlyma, pachâpa tlyma, pahnona tlyma, sona tlyma y khao tlôh lei khâh ta.

11 Noh ry liata ei hmô heihpa cha arâpasuana liata thatlôpa cha hlao tloh leipa ta, adyuhna liata thatlôpa hlao tloh hlei vei, asopa ta niepa a hmô hlei leipa ta, hneirôhpa ta a ryhpaona hmô hlei vei, zôthaipa chhao khokheina hlei y vei; châhrasala daihti nata a ryhpaona chata chyhsa to tlao a tlôkhei pa ei tahpa he a châ.

12 Chyhsa ta ano daihti chhao a pahno tlôh va. Ngazy sao chichhihpa liata a ao ei ta, pavawzy khohei liata amâ aopa hawhta, chyhsa sawchapawpazy he ama chô liata sôkhata ta daihti pha leipa chata vaw tlôthlu ta amâ ao tyh.

Sona cha taotheina hlâta a pha via

13 Noh ry liana chata sona pamosana hmô heih na ta, keima châta la a rôhnah ngâsâpa hawhta a châ.

14 Khihpi chyhpa ta chyhsa chyhta yna he y ta; abei rôhnah ngâsâpa ta vaw siehnao ta, dô ha ta, diah thata sakhâh ta.

15 Cha khih liana cha chyhsa rietheipa pakha a so ngâsâpa he y ta, a sona chata cha khihpi cha a pabohsa haw. Châhrasala ahy hmah ta cha chyhsa rietheipa cha pahno thlâh ha vei ei.

16 Chyhsa rietheipa sona cha mohnao hra ei sala, a biezy chhao cha pasâhsa hra veih ei sala, kei la, “Thatlôna hlâta sona he a pha via,” ei tah thlyu aw.

17 Ahrupazy hryta ryureituhpa a paro ngaitapa ta awh ngâpa hlâta cha chyhsa sopa bie nota ta reihpa cha a phahnai via.

18 Sona cha adyuna chaihrai hlâta pha via ta; châhrasala moleipa pakha ta hmophapa a hluhpi a parao tyh.

Biechhotuhpa (Ecclesiastes)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10	Bo 11	Bo 12

Biechhotuhpa 10

Hruna thei zy

1 Mathyu thi chiehpa ta rohpahâhpa taotuhpa thaw roh cha a pahlei; cha hawhna cha sona nata zana kyh hruna kyh chyhta ta a pahlei.

2 A sopa palôh a chachâh lâ a heih, ahrupa palôh deikua chavei lâ.

3 Ahrupa cha lâthlôh liata a khiekhâpa chhao a sona a phahla. "Mo to hnohta, “A hrupa a châ,” a tah tyh.

4 Ryureituhpa na chôta pathi-ia hrasa na su puasai khâ, zawngiahna ta palôh tlâh leina a padia.

5 Noh ry ta ei hmôpa hryta moleina a y, ryureituhpa tawhta hmo su leipa a vaw puapa cha:

6 Ahrupa su a sâhpa liata soh ta, hneirôhpa cha su a hnaipa liata.

7 Arâ chô liata seizy ei hmô; châhrasa abeisawzy deikua sei hawhta pheita tlao ama sie.

8 Khaotlôh a chaotuhpa cha a khaotlôh chaopa lia a tla aw; dona a chatôhtuhpa cha parih ta a pachu aw.

9 Alô a papuatuhpa hmah a phaoh aw; tho a patlawtuhpa châta chi â chhih.

10 Thua a tiah leipa a y, chyhsa ta a chatah vei khiah cha,tha chahra a byuh pachai aw; sona deikua chata hlaotlona a pie.

11 Parih ta a pamao hlâta a pachu khiah cha, pamaoh a thaina phahnaina hnei aw vei.

12 Asopa pakah bie puapazy a sôh, ahrupa pakah deikua ano a palâ.

13 A pakah bierei tuapa cha hru chhielie thlâh ha ta, a pakah biereipa chhâna chhao hruna pei a tyhpa chi a châ.

14 Ahrupa cha bie a pahluh sa, hmo a vaw y awpa cha chyhsa ta pahno veih ei, ahy a reih thei aw, hnôh lâta hmo a vaw y awpa cha?

15 Ahrupa cha hriapasana ta a tha a pachhâsa, chavâta khihpi lâpi chhao pahno vei.

16 Na hu a po na, hy râh, na beipa cha a hawti no nata, na beisawzy my ta kyhchhi a tao tyhpa a hneituhpa y.

17 Hy râh, na beipa cha khotalaipa chyhsa sawchapaw a châ tita, a daihtita ta na beisawzy kyhchhi cha a châ aw, parina chata do leipa ta, thatlôna chata a dopa cha na nohhlao na.

18 Thathina vâta vâphuh a zao, diathlâna vâta o a zu.

19 Lôhawhna vâta kyhchhi taopa a châ, kresawti chhao hro palysana châ ta.

20 Abei cha chhie sapa khâ, na palôh ta chhao,hneirôhpa cha chhie sapa khâ, rakhô tawh chhao; a zawpa pavawzy ta na bie phuah aw ei ta, mathlaw hneipazy ta cha cha ama reih aw.

Biechhotuhpa (Ecclesiastes)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10	Bo 11	Bo 12

Biechhotuhpa 11

Chyhsa sopa nôchâ

1 Ti chô liana cha na viahchhâ thy la, noh hluhpi tawhta na hmô heih aw.

2 Chyhsa pasari hnoh tovyuh pie la, pacharie hnoh chhao pahno tlôh chi va, lei chô liata hmo chhie a vaw tlô awpa cha.

3 Meihdo cha vâsua a hnei khiah, a parua tyh alei chôta; tho cha chho lâ hei ma, maw lâ heih a pao khiah, a paona su lia a y thlyu aw.

4 Thlih a papeisapa chata chi tu aw vei; meihdo a ngia thlâh hatuhpa chhaota taih aw vei.

5 Ziza lâpi cha pahno leipa chi ta, chanô saw phaohpa rupa laiseihna zie chhao pahno va chi. Kheihta e Khazohpa Atotaotheipa hmotaopa cha zua na pahno thei rai aw.

6 My ta na chi hneipa cha tu la, zâ lâ cha na ku pakoh thlâh ha kha; a laiseihna awpa zie pahno tlôh chi va, he he ma, hao hao ma, pha rairieh khai thlâh tlôh ei ta.

7 Khaihna cha a pha ngâsâ, mo châta chhao noh hmôpa cha aly hra.

8 Chyhsa ta kô hluhpi a hroh khiahtala cha zydua liana cha aly mawh sy; zohna nohzy kha a thei thlâh ha mawh sy, a hluhpi châ tlôh ta. Hmo a vaw tlôpa zydua he hraoleipa deita na a châ.

Thyutliazy chhoreina

9 Hy satlia, na thyudyuna lia heta aly teh, na satlia daihti liana heta na palôh cha palysa mawh sy; na palôh khona zie nata na mo khona zie hawhta charei teh. Châhrasala he zydua heta Khazohpa hmiakô ta ryureina lâ a châ chhi aw ei tahpa pahno thlâh ha teh.

10 Na palôhrupa tawhta pachârôhna pahlei la, na pôhpa tawhta pasana zydua chhao; thyudyuna nata locho noh chhao he hraoleipa châ thlâh ha tlôh ta.

Biechhotuhpa (Ecclesiastes)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10	Bo 11	Bo 12

Biechhotuhpa 12

1 Na thyutlia noh liata châ Taotuhpa a thei thlâh ha teh, moleina nohzy a vaw tlô hlâta nata, “Alyna rai hnei va na,” tahpa ta kôzy a vaw hnia hlâna heta,

2 noh zy, khaihna zy nata thlâpâ nata awhsi zy a zoh hlâta nata vâsua amei lâta a kua khai hlâna cha;

3 o vaihtuhpa zy a chalyupa ta, a thatlôpazy cha a boh aw ei ta, ama chyh hapa vâta sâhchariehtuhpa cha pabâsa ei ta, opy tawhta zohna lâ cha ama sai,

4 othliah chhikaozy a khaw ta; sâhchariehpa pyu a dia, pavaw sâpa vâta chyhsa thyu ei ta, hla satuhpa zy hla pyu dia ta;

5 a sapa hmo cha chi ei ta, lâthlôh liata chichhihpa y ta; almond tho a paw pawh ta, khawsu cha a patypamâpa a châ aw, byuhna a lei aw; chavâta chyhsapa cha a chhâzaw o lâ a di aw. mâchhiesatuhpa cha hawka lâ a pangai aw;

6 tâkâ ri a chie hlâta, ngôh biehbu cha a kei hlâta, alei beih cha tikhaoh liata kei ta, ahluah theipa cha tipa-opa kiapâh liata a tao hlâna khata,

7 dohlei cha châna tyhpa alei lâta â lie heih ta, thlahpa chhao cha a pietuhpa Khazohpa lâta a kua.

8 Biechhotuhpa cha hraoleipazy hraoleipa; hmo zydua he hraoleipa a châ tah ta.

9 Biechhotuhpa cha a sopa dei châ leipa ta, chyhsazy hnohta pahnona pachu ta, bieso phapa a hluhpi pachâ ta, tlua ta, a paryhpakhy hra.

10 Biechhotuhpa chata bie a pyh tlâhpa hmô awpa ta tlua ta, a do ngaitapa ta a ropa bie hmeihseihpa zy cha.

11 A sopa biezy cha achôna chôhchahrei pazaopa, bieso lapakhypa Mietahkuvaihtuhpa pakha ta a piepa, khaina a pamôhna taihta khaipa hawhta a châ.

12 Ei sawchapawpa y, he dei he cha leipa ta hmo to a chado teh. Châbu a hluhpi taopa heta chhâkhuna hnei leipa ta, thata achuna heta sapa rietheina a tao.

13 He bie zydua chhâna he duah pachâ tua ei si. Khazohpa chi la, a biepiepa zy a pyh teh; he he chyhsa to châta taopa cha a châ.

14 Khazohpa chata hmotaopa zydua chôta ryureih tlôh aw ta, a pha tlyma a chhiepa chhao rai.

Biechhotuhpa (Ecclesiastes)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10	Bo 11	Bo 12