Mara Holy Bible: Amôsa

Showing posts with label Amôsa. Show all posts

Amôsa 1

Izarel chheipâh ta râhzy chôta ryureina

1 Zudah beipa Uzia a bei nota nata Izarel beipa Zôasha sawchapawpa Zerôbaw a bei nota, alosih hlâ kô nona liana khata Tekôa su liata sahroh zaw a vaihtuhpazy hry liatahpa Amôsa bie Izarel kyh liata a hmôpa cha.

2 Chatawhcha ano chata:“ABEIPA cha Zaio tawhta a rôh ta ,Zerusale tawhta a ao papua ta; mietahkuvaihtuhpazy sahroh bâna suzy cha pachârôhpa ta y ei ta, Kamel laki cha a uah,” tah ta.

3 ABEIPA ta he tana heta a tah: “Damaska hmoparaona miathôh vâta, nata miapalih vâta a hriena cha padia aw va na; Kilia râh cha sâhcharona thuazy chata ama charopa vâta.

4 Chavâta Hazael o liata mei tuah aw na ta, Benhada abei ozy a kâ khai aw.

5 Damaska ochhi thua cha thlie aw na ta, Ave Saikao tawhtapa a pahrâtuhpazy nata, Beida o tawhtapa ryureina chôhchahrei a chabatuhpa cha pahlei aw na ta; Suria râh chyhsazy cha Kira râh lâta sei ta ama y aw,” ABEIPA ta a tah.

6 ABEIPA chata he tana heta a tah: “Kaza hmoparaona miathôhna vâta,nata miapalih vâta a hriena cha padia aw va na; Edôma hnohta pie awpa ta chyhsa zydua sei ta amâ chhipa vâta.

7 Châhrasala Kaza kuh chô liata mei tuah aw na ta,abei ozy cha a kâ khai aw.

8 A sahdô tawhtapa a pahrâtuhpa nata, Askelaw tawhtapa ryureina chôhchahrei a chabatuhpa pahleipadia aw na ta; Ekraw khih chô liata ei ku hy aw na ta; Philistina molaipazy cha ama leidia aw, “Abeipa KHAZOHPA ta a tah.

9 ABEIPA ta he tana heta a tah: “Tyre hmoparaona miathôh vâta nata miapalihna vâta a hriena cha padia aw va na; Edôma hnohta chyhsa zydua chapiepa ta, unawhpa biehraipa cha ama thei thlâh ha leipa vâta.

10 Chavâta Tyre kuh chô liata mei tuah aw na ta, abei ozy cha a kâ khai aw,” tah ta.

11 ABEIPA ta he tana heta a tah: Edôma hmoparaona miathôh vâta, nata miapalih vâta a hriena cha padia aw va na; a unawhpa cha zaozi ta a chadai ta, a ngiachhiena zydua thy khai ta, a pathi-iana chata hriechhei tyh ta, chhâzaw ta a hiehâhna cha a vao thlâh hapa vâta.

12 Chavâta Tema su chô liata mei tuah aw na ta, Bôzra khih abei ozy cha a kâ khai aw,” tah ta.

13 ABEIPA ta he tana heta a tah:” Amawna pathlazy hmoparaona miathôh vâta, nata miapalih vâta a hriena cha padia aw va na; ama râh ama pakawh thei nawpa ta, Kilia liata chanô saw a phaohpa zy ama hriechheipa vâta.

14 Chavâta Rabah kuh chô liata meipatih aw na ta, adyuh nota awpa nata, khisô nota thlihpipa chhao, abei ozy cha kâ khai aw ta;

15 ama abei cha sei ta patu ei ta, a molaipazy chhaota hmaohkha ta, ABEIPA ta a tah.

Amos (Amosa)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9

Amôsa 2

1 ABEIPA ta he tana heta a tah: “Môaba hmoparaona miathôh vâta nata miapalih vâta a hriena cha padia aw va na; Edôma beipa ruzy cha chinai hawh tlaita a kâpa vâta.

2 Chavâta Môaba liata mei tuah aw na ta; Môaba cha tymâna nata awpa nata chiahmie pyu ta thie aw ta;

3 cha hry tawhtapa ryureituhpa cha pahlei aw na ta, a molaipa zydua nata, ano chhaota ei thie aw,” ABEIPA ta a tah.

4 ABEIPA chata he tana heta a tah: “Zudah hmoparaona miathôh vâta nata miapalih vâta a hriena cha padia aw va na; ABEIPA ryhpa cha dytha ei ta, a biepiepazy a ngiah leipa ei ta, ama pawzy tao tyhpa ama haipa reipazy khata âmo a chhihthapa vâta.

5 Chavâta Zudah chô liata mei tuah aw na ta, Zerusale abei ozy cha a kâ khai aw,” tah ta.

Izarel chôta ryureina

6 ABEIPA chata he tana heta a tah: “Izarel paraona miathôh vâta nata miapalih vâta a hriena cha padia aw va na; tâkâri ta chyhsa siapa ama zuapa vâta nata pheiky baokha ta chyhsa sipasapa ama zuapa vâta

7 sipasapa luh chô liata doh-lei a sokhohpazy nata nônaipazy lâpi a pahleipazy cha; paw nata saw cha laihsa miakhapa hnohta a ngia ei ta, ei moh pathaihpa papuapalei thei nawpa ta;

8 maisâh zydua liata chhie sakhâhna pohzy chô liata azia tyh ei ta; ama Khazohpa o liana chata chyhsa ama pacheisapa kresawti doh tyh ei ta.

9 Châhrasala âmo hmiakô liata Amawri mo, sidy tho hawhta a sâhpa nata oaka hawhta a châpa chhao kha pahleipadia na ta; a chôlâ tawhtapa a theipa, nata a rylâ tawhtapa a thari chhao pahlei na ta.

10 Amawri mo râh hnei awpa ta Izi râh tawhta cha chhihtha ei na ta, râhpathohpa liata kô sypalih chhôhta cha chhihtha ei na ta.

11 Chatawhcha hrohsopa châ awpa ta nama satliapazy hry liatahpa tao na ta, thokha cha Nazarai ta ei tao. Hy Izarel sawzy saih u, cha hawhna chata châ vei ma?” ABEIPA ta a tah.

12 Châhrasala Nazarai chyhsazy hnohta kresawti do awpa pie eichi ta, hrohsopazy hnohta, ‘Bie chho khah u, ‘tahpa ta bie pie eichi ta.

13 Pachâ teh u, sapia ta a biepa talaili tlypa hawhta, nama su liata ei cha vi aw ei.

14 Chyhsa a râ chahrapazy chahrana lei aw ta, chyhsa thatlôpa ta a tha patlôsa via thei leipa ta y aw ei ta, chyhsa thatlô ngaitapa chhao a paboh thei leipa aw ta;

15 Libaw a hmâhtuhpa chhao a duah thei hra aw vei, a sie chahrapa chyhsa chhao a duah thei hra aw vei; arâ a kiahpa chhao a paboh thei hra leipa aw ta;

16 cha noh liana chata chyhsa hmotaothei ngaitapa hry liata chyhsa riahphapa chhao cha chhaichhi leipa ta a râ aw,” ABEIPA ta a tah.

Amos (Amosa)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9

Amôsa 3

Hrohsopa raihria

1 Hy Izarel pathlazy saih u, Izi râh tawhta ei chhihthapa chhôhkhazy saih u, ABEIPA ta he hawhta a cha rei pasipasuana bie he nahthlie teh u:

2 Nâmo deita he khizaw liata chhôhkha zydua liata ei pahnopa cha châ eichi ta; chavâta nama hmoparaona zydua liata ei cha hrie aw ei.

3 Ama dy leipa ta cha, mo pano ama sie khoh aw ma?

4 Chakeibarôhneipa ta râhhmâhpa liata sa a tai no leipa ta cha a rôh beih ma? Chakeibarôhneipa a khoh lochopa ta khâpa hmahta a tai leipa ta cha a khaoh tawhtapa a rôh beih ma?

5 A chôkhâhpa y leipa ta, pavaw cha alei chô liata khohei liata a ao thei ma? Khohei cha khâpa hmahta a ao leipa ta alei tawhtapa a pie beih ma?

6 Khihpi liata chiahmi tôpa ta chyhsa ta chi leipa ta ama y ma? ABEIPA tah leipa ta khihpi liata pha leina a vaw y aw ma?

7 A dopata ta Abeipa KHAZOHPA châta a chakaotuhpa, a hrohsopazy hnohta a bieru chho leipa ta khâpa hmah tao aw vei.

8 Chakeibarôhneipa a rôh ta, ahy e achi vei awh? Abeipa KHAZOHPA chata bie reih ta, ahy e a chho lei thei aw?” tah ta.

Samari raona

9 Asahdô abei ozy nata Izi râh abei ozy liana chata chho ula, “Samari tlâhzy chô liata a pakhy ula, cha liata tymâna lai ngaitapa a ypazy nata cha hry liata pasaipa-ina a ypazy cha moh teh u,” tahpa ta.

10 Ama abei ozy liata thachahrana nata hraona a pachôpazy chata adopa ta taonazie pahno thei veih ei, ABEIPA ta a tah.

11 Chavâta Abeipa KHAZOHPA chata he tana heta a tah: “Râh chheipâh liana chhao chata khakhaipa y aw ta, na thlahlôhna cha nâ tawhtapa la haw ta, na abei ozy a parao aw.

12 ABEIPA chata he tana heta a tah: “Mietahkuvaihtuhpa ta chakeibarôhneipa pakah tawhta phei miano tlyma, nahkao tlaw tlyma a lapa hawhta, cha hawhna chata Samari khih liata rakhô ki liata nata rakhô poh tâtâh lahua chô liata Izarel pathla a ypazy cha ama pachha aw,” tah ta.

13 “Nahthlie ula, Zakaw chhôhkhazy chô liana chata pahnosa teh u,

14 Izarel hmoparaonazy cha ano chô liata ei hrie khiahtala, cha noh liana chata Bethel liata maisâhzy chhao ei hrie aw; maisâh kizy cha tai aw ei ta, alei liata ama tla aw, “Pheisaihzy Khazohpa, Abeipa KHAZOHPA chata tah ta.

15 Chasipawno o nata nopinoh o parao aw na ta; sianaoh ozy cha leidia aw ta, o rôhnahpazy chata chhâna ama hnei aw,” ABEIPA ta a tah.

Amos (Amosa)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9

Amôsa 4

1 Namo Basana su viahchao chanôhpa, Samari tlâh chô liata a ypa, sipasapazy pasaipa-ipa ta, phahlapazy cha-ie ta, ama abei hnohta, “Vaw cheih ula, dô ei suh u!’ a tahtuhpazy saih u, he bie he thei ula.

2 Abeipa KHAZOHPA chata ano pathaina reipa ta chhie sa ta: thua a kohpa ta cha chhipa ta, nama sawzy cha keipa ta a cha chhina noh ei a vaw tlô aw.

3 Chatawhcha pâhchhô pyupa liatazy pua aw eichi ta, chyhsa to a patlâh ngaitapa ta ama sie aw; Hamaw su liata nâmosasyh ta a thy aw eichi ta,” ABEIPA ta a tah.

Khazohpa hrienazy cha Izarel ta a phahnaikhei leizie

4 “Bethel lâna chata a vy ula, hmoparao teh u; Kilkal lâna chata a vy ula, hmoparaona papôh teh u; nama atheihnazy cha my chareih ta vaw cheih ula, nama su hrawh liata su khazy cha nohthôh padai lymâ ta vaw cheih teh u;

5 thinô pahlaopa alyna bie rei atheihna cha hlâ ula, lôhthai ta hlânazy cha chho ula, phuah teh u: Hy Izarel pathla saih u, he he khoh tlôh eichi ta, “Abeipa KHAZOHPA chata tah ta.

6 “Kei chata nama khihpi zydua liata hâh pathaina nata nama su zydua liata phahlana cha pie aw ei na ta, cha tana chhao chata kei lâta vaw kua leipa eichi ta, “ABEIPA chata tah ta.

7 “Chatawhcha sâh hria daihti awpa thla thôh a châ nota; nama chô liata avâ a sua awpa pakhâ na ta, khihpi miakha chô liata pasuasapa ta, khihpi hropa chô liata pasuasa leipa na ta; su kha chô liata suah tyh ta, a suah leina su cha chawhkarai tyh ta;

8 chatanachata khihpi miano tlyma, miathô tlyma cha khihpi miakha liata ti doh awpa ta a khie ei ta, a daih leipa ta; cha tana chhao chata kei lâta vaw kua veih eichi. “ABEIPA chata tah ta.

9 “Chawhkaraina nata maona ta cha hrie ei na ta; nama sahdôzy nama kre sahdôzy, nama theiku kôzy nama ôli tho zydua cha chângyuzy ta nie khai haw ta; cha tana chhao chata kei lâta vaw kua veih eichi.” ABEIPA ta tah ta.

10 “Izi râh hawhta nâmo hry liata hrie tua na ta; zaozi ta nama satliazy cha thie haw na ta; nama arâzy ei la haw hra; nama zawpi su roh chhiepa cha nama hnapasu liata a pahnâhna taihta paysana ta; cha tana chhao chata kei lâta vaw kua veih eichi,” ABEIPA chata tah ta.

11 Sawdawma nata Kawmawra cha Khazohpa ta a pachô no hawhta, nama hry liata chyhsa thokha pachona ta, tho a kâpa lapa hawhta châ eichi ta; cha tana chhaota kei lâta vaw kua veih eichi,” ABEIPA chata tah ta.

12 “Chavâta hy Izarel y, na chô liata he tana heta ei tao aw; na chô liata he tana he ei tao awpa vâta, hy Izarel y, na Khazohpa a tyh awpa ta amâ teh!” tah ta.

13 Pachâ teh, tlâhzy paduapa ta, thlih taopa ta, chyhsapa hnohta a pachâna khâpama a châ tahpa reipâpa ta; my cha pazohpa ta, alei su a sâhpazy a tlytuhpa cha, a moh ABEIPA, Pheisaihzy Khazohpa cha châ tlôh ta!

Amos (Amosa)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9

Amôsa 5

Ro awpa ta awna

1 Hy, Izarel chi saih u, he bie nâmo mâchhiesa nawpa ta ei reipa he thei teh u:

2 “Laihsa Kôpa Izarel cha pao haw ta; a duah hei khao aw vei, a râh chô liata thypa a châ; ano padua awpa ta ahy hmah y veih ei,” tah ta.

3 Abeipa KHAZOHPA chata he tana heta tah tlôh ta: “Izarel chizy hnohna chata khihpi sâkha puana khata za kha siesai aw ta, khihpi za kha puana khata pahrawh a siesai aw,” tah ta.

4 ABEIPA chata Izarel chizy hnohna chata he tana heta tah tlôh ta: “Na tlua ula, nama hroh aw;

5 anodeikuacha Bethel tlua khah ula, Kilkal liata a ngia khah ula, Besheba lâta sie khah u; Kilkal cha sei ta patu tlai aw ei ta, Bethel cha khâpa hrao leipa a châ aw,” tah ta.

6 ABEIPA cha tlua ula, nama hroh aw; chata leipa ta cha Zawsi chhôhkha liata mei hawhta pua aw ta, kâ patlô aw ta, Bethel liata a pachhai awpa ahy hmah y aw veih ei,

7 ryureina hmo khâpa ta pachâsapa ta, siana cha alei liata a thy pathlahpa saih u!

8 Awhsicharu nata Vaothawlapiapa ataotuhpa nata thina nohpahlih my a pachâsatuhpa nata, chhô cha zâ zohpa ta a taotuhpa, tilaipi tizy awpa ta alei chô liata a palosatuhpa cha ano cha tlua ula, amo cha ABEIPA a châ,

9 kuh chô liata leidiana vaw tlôna taihta, chyhsa thatlôpazy chô liata leidiana a patlôsatuhpa cha.

10 Chhikao liata chhoreituhpa a hao ei ta, bie siapa a reituhpa cha pasie ei ta.

11 Chavâta sipasapazy tlypâpa ta sa lapa eichi ta, alô daipa ta ozy sa eichi ta, châhrasala a chhôh liata pahrâ aw veih eichi; kresahdô ngiary chhihpazy tao eichi ta, châhrasala a kresawti doh aw veih eichi.

12 Nama paraona hluhzie nata nama moleina hluhnazie pahno tlôh na ta; chyhsa siapazy taolapa ta, a ryruna lapa ta, chhikao liata phahlapazy ku hlaotlona a dythapazy saih u.

13 Chavâta chyhsa sopa cha cha hawhpa daihti liana chata a thlih thlâh ha aw ta; daihti pha leipa a châpa vâta.

14 Nama hroh thei nawpa ta pha leina tlua leipa ta, phana tlua ula; nama reipa hawhta, ABEIPA Pheisaihzy Khazohpa cha nama hnohta a y aw.

15 Moleina cha a hao ula, phana pasô ula, chhikao liata ryureina cha a ipa ta padua teh u; Zawsi mo a laibâhzy chô liana chata ABEIPA Pheisaihzy Khazohpa chata ngiachhiena a hnei ngyu aw la.

16 Chavâta ABEIPA, Pheisaihzy Khazohpa, Abeipa chata he tana heta a tah: “Tlyhmia kawhpa zydua liata thata sana y aw ta; othliah zydua liata, ‘A pei rimâ cha! A pei rimâ cha!’ tah aw ei ta. Pachârôh awpa ta lyu hneituhpazy nata thata sa awpa ta chaphôtu a thaipa ama aw awh,

17 kresahdô zydua liata thata sana y aw ta, nama hry liata sie palâh tlôh aw na ta, “ABEIPA ta tah ta.

18 ABEIPA noh a khohpa saih u, nama hu a po na! Khazia e ABEIPA noh cha nama khoh? Khaihna châ leipa ta zohna tlao a châna;

19 chakeibarôhneipa râsaipa ta chavyh atyhpa hawhta na ta, o liata a ngiapâ ta, pâhchhô chô liata ku pahniehpa ta parih ta a pachupa hawhpa cha a châ.

20 ABEIPA noh cha khaihna châ leipa ta zohna châ aw vei ma? Zohna chha kalupa nata khaihna rai hnei leipa ta?

21 “Nama kyhchhizy a haopa ta, nawhtawna ta, nama pakhypi pathaisapazy liana chata aly hra aw va na.

22 Nama raopa hlâna nata niepa hlâna na hlâ hra ula, a pyh aw va na, nama sahroh thawpa adyhna hlânazy chhao khâpa sawta reih leipa aw na ta.

23 Na totâ pyu ngiapa cha nahthlie aw va na; chavâta na hla palôhpasapa cha kei tawhtapa sie khei syulyu teh.

24 Châhrasala ryureina cha tizy hawhta nata siana cha vahpi hawhta loh mawh sy.

25 “Hy Izarel chhôhkhazy saih u, kô sypalih chhôhta râhpathohpa liana khata atheihnazy nata hmohlâpazy kei lâta nama vaw cheih ma? 26 Nama beichaipa Saku nata khazoh nohthlahpazy, nama awhsi khazoh, âmosasy chata ataopa cha la eichi ta; 27 chavâta Damaska khô lâta sei ta ei cha pasiesa aw,” ABEIPA a moh Pheisaihzy Khazohpa chata tah ta.

Amos (Amosa)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9

Amôsa 6

Izarel paraona

1 “Zaio liata huhie ngaitapa ta a ypazy nata Samari tlâh liata a boh ngaitapa ta a ypazy nata phopi lai chaipa chyhsa rôhnahpazy, âmo lâta Izarel chhôhkhazy ama sienazy cha a hu a po na!

2 Kalne khih lâta sie ula, moh teh u; cha tawhna chata Hama khih rôhnahpa lâta sie ula; Philistina râh Katha lâna chata zu ula. He râhzy hlâna heta ama pha via ma?

3 Nâmo noh pha leipa a hlapi ta a sopa nata nôchhiepa atyuna a pahniasa tuhpazy saih u.

4 “Sianaoh rakhô liata a ziapa ta, ama dyuchhai seipa chô liatazy apatlâpaziapa ta, mietahkupa zaw hry liata mietahkupa tawzy niepa ta;

5 totâ ta diathlâna hlazy sapa ta, Davi hawhta âmo chata hla ao chhaichhizy taopa ta;

6 biebuh laipa ta kresawti dopa ta, sathaw pha chaipa ta a chanôpazy cha, châhrasala Zawsi mo rietheina liata ama pachâ rôh vei!

7 Chavâta atahmâ ta seichâna lâta asie tuapazy nata sei ta sie aw ei ta, a patlâpaziapazy thapha ngaitana cha a lei aw,” tah ta.

8 ABEIPA, Pheisaihzy Khazohpa chata, Abeipa KHAZOHPA chata anosasyh a reipa ta chhie sa ta: “Zakaw apalaina cha pasie na ta,a abei ozy a hao na ta; chavâta khih nata a chhôh liata a ypa zydua cha ei patusa aw.

9 Chatawhcha o miakha liata chyhsa pahrawh ama y khiahtala thi aw ei ta.

10 Chatawhcha chyhsa pakha puhpa mei ta a raotuhpa tlai chhaota la ta. Ochhôh tawhtapa a rupa la awpa ta, o chhôh liahliahpa liata a ypa hnohta, “Na hnohta ahyrai ama y ma?” tah ta, ano ta, “Y vei” a tah khiahtala; ano ta, “Palo khâ! ABEIPA moh cha ei pado awpa châ tlôh leipa ta,” tah aw ta.

11 ABEIPA chata bie pie tlôh ta; chatawhcha o laipa cha cho aw ta, o chyhpa chhao a kai hôlô aw.

12 Arâzy cha lôpanô chô lâta amâ râ aw ma? Cha liata chyhsa ta viahchao ta alei palie aw ma? Nâmo ta ryureina cha thina hlyuta nata siana cha hmo kha pa nama pachâsapa he;

13 nâmo hrao leipa chô liata alypa ta, “Keimo thatlôna ta vei ma kizy* eima pahnie,” a tahpazy saih u.

14 “Moh teh u, hy Izarel chhôhkha saih u, nâmo adyuh awpa ta phopi padua aw na ta; Hama hawka tawhta Arabah chavah taihta cha taola aw ei ta, ”ABEIPA Pheisaihzy Khazohpa chata tah tlôh ta.

Amos (Amosa)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9

Amôsa 7

Parao nawpa kyh thôh khawsu, mei nata padona ri

1 He hawhna heta Abeipa KHAZOHPA chata na pamosa ta: ama chi cheipazy a kaw pyuh khai tawhna chata, khawsu paysa ta, he he abei ta a pataisa khai tawhta a kaw pyuh hnôh viapa a châ.

2 cha râh liata sibiepa cha ama nie khai tawhta, “Hy Abeipa KHAZOHPA y, a ngiahthai teh, ei châ hawna! Zakaw cha kheihta e a duah thei aw? Ano chyh tlôh ta!” tah na ta.

3 He kyh lâna heta ABEIPA cha a ngiapachhi ta; ABEIPA chata, “Tlô khao aw vei,” tah ta.

4 He hawhna heta Abeipa KHAZOHPA chata na pamosa ta: Abeipa KHAZOHPA chata mei ta adyuh awpa ta aw ta; mei chata ti a thuhpa laipa cha kâ khai ta, râh chhao cha kâ tlôh ta.

5 Chatawhcha kei ta, “Hy Abeipa KHAZOHPA y, bâh teh, ei châ haw na! Zakaw cha kheihta e a duah thei aw? Ano chyh tlôh ta!” tah na ta.

6 He kyh lâna heta ABEIPA cha a ngiapachhi ta; Abeipa KHAZOHPA chata, “He chhao he châ khao aw vei,” tah ta.

7 He hawhna heta na pamosa ta: Abeipa cha padona ri taopa pâhchhô kiapâh liata a duah ta, a ku liata padona ri y ta.

8 Chatawhcha ei hnohta ABEIPA chata; “Amôsa khâpa na hmô?” tah ta. Chatawhcha kei ta, “Padona ri” tah na ta. Chatawhcha ABEIPA chata, “Pachâ teh, ei chyhsa Izarelzy hry liata padona ri soh aw na ta; âmo sie pakhô khao leipa aw na ta;

9 Aisika su sâhpazy cha roryhrapa ta vaw châ aw ta, Izarel su pathaihpazy cha paraopa châ aw ta; chatawhcha Zerôbaw chhôhkhazy zaozi ta adyuh aw na ta,” tah ta.

Amôsa nata Amaziah

10 Chatawhcha Bethel theihthaipa Amaziah chata Izarel beipa Zerôbaw hnohta: “Amôsa chata Izarel chhôhkha hry liata cha tei ta; râh chata a bie zydua cha pasa tao thei vei.

11 Amôsa chata he tana heta tah tlôh ta, Zerôbaw cha zaozi ta thie aw ta, a râh tawhta Izarel cha seichâna ta a chhi tlai aw ta,’ tahpa ta,” bie paphao ta.

12 Chatawhcha Amôsa hnohta Amaziah chata, “Hy nâ hrohsopa y, sie la, Zudah râh lâta a râ syulyu la, cha liata pati nie la, chhochhielie teh;

13 châhrasala Bethel liata chhochhielie khao khâ, abei pathaihpa nata abei o a châpa vâta,” tah hra ta.

14 Chatawhcha Amaziah hnohta Amôsa chata, “Hrohsopa châ leipa na ta, hrohsopa sawchapawpa chhao châ va na; sahroh zaw a vaihtuhpa nata theiku kô a mohôhtuhpa tlao ei châ,

15 ABEIPA chata mietahkupa zaw vaina tawhtapa cha nâ lâta, ABEIPA chata ei hnohta, ‘Sie la, ei chyhsa Izarelzy hnohta chhochhielie teh,’ na tah ta.

16 “Chatanachata atahmâ ABEIPA bie cha pahno teh, nâ ta, ‘Izarel chakhiapa ta chhochhielie khah la, Aisika chhôhkhazy chakhiapa ta na reih pathlie khah la,’ tah chi ta.

17 Chavâta ABEIPA chata he tana heta,‘Na lahpinô cha khihpi liata sihrypa châ aw ta, na sawchapawpazy, na sawchanôzy cha zaozi ta pao aw ei ta, na râh cha thliena ri ta pachhaih aw ei ta; nâma tlai cha râh pathaih leipa chhôh liana chata thi aw chi ta, Izarel cha âmo râh tawhtapa sei ta a chhi tlai ei ta, ’tahpa ta,” a chhy ta.

Amos (Amosa)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9

Amôsa 8

Aluahna miapalihna nopinoh theilâpa hrâbyh

1 He hawhna heta Abeipa KHAZOHPA ta na pamosa ta: hrâbyh liata nopinoh theilâpa cha y ta.

2 Chatawhcha ano ta, “Amôsa, khâpa na hmô?” tah ta. Kei ta, “Hrâbyh liata nopinoh theilâpa,” tah na ta, ABEIPA chata ei hnohta, “Ei chyhsa Izarelzy chô liata chhâna a vaw tlô haw; âmo sie pakhô khao leipa aw na ta,” tah ta.

3 Abeipa KHAZOHPA chata, “Cha noh liana chata achhyna-o hlazy cha riesâ ta sâna vaw châ aw ta; Athihpa ri hluh aw ta; su to liata a thlie thlâpa ta amâ thy aw,” tah ta.

Izarel raona a hniazie

4 He he nahthlie teh u, hy phahlapazy nie khai khohpa ta râh sipasapa a pahlei khohpazy saih u,

5 “Sa eima zuah thei nawpa ta thla thiehpa cha khatita ma lei aw ta? Viahdie sâh eima papua thei nawpa ta pahânoh cha khatita e a lei aw, ephah pachyhpa ta, sekel palaipa ta a do lei ngaitapa ta dona pathliah hmâhpa ta.

6 tâkâri ta sipasapa châleipa ta, chyhsa a phahlapazy cha pheiky baokha ta châleipa ta, sâh sihpa eima zuah thei nawpa ta?” tahpa ta.

7 ABEIPA chata Zakaw rôhnahna reipa ta chhie sa ta: “Ama raihria rai my tlai aw va na.

8 He vâna heta râh cha a chalyupa ta a chhôh liata a ypa maih cha pachârôhpa ta y aw veih ei ma? Nile hawhta vaw lai khai aw ei ta; Izi râh chavah hawhta atymâpa ta kua aw ta,” tahpa ta.

9 “Chatawhcha Abeipa KHAZOHPA chata, “Cha noh liana chata he tana heta vaw châ aw ta, nohchhô ta noh patlasa aw na ta, noh sa nota alei pazohsa aw na ta.

10 Nama kyhchhipazy cha pachârôhna ta nata nama hla zydua cha chana ta pachâsa aw na ta; chai zydua latho poh pasaisa awna ta, luh to laki liata pôlôna ei patlôsa aw; sawchapaw matlupa chata mâchhiesana hawhpa nata a chhâna cha khana noh hawhta tao aw na ta.

11 Abeipa KHAZOHPA chata, “Pachâ teh u, nohzy cha ama vaw tlô hai; cha nohzy liana chata râh liata chakâhna tuah aw na ta, niepa chakâhna châ leipa ta, ti chakâhna châ hra leipa ta, ABEIPA bie pahnona chakâhna tlao a châ.

12 Tilaipi tawhta tilaipi lâta nata maw tawhta nochhi lâta chhao viavi aw ei ta; ABEIPA bie cha tluapa ta su to liata a râ aw ei ta, hmô aw veih ei.

13 “Cha noh liana chata laihsa phapa nata satliazy cha dâhphipa ta thipâ hra aw ei ta.

14 Samari moleina reipa ta chhie sapa ta, ‘Hy Dana, na khazoh a hrohpa hawhta,’ nata ‘Besheba lâthlôh a hrohpa hawhta,’ tahpazy kha, cha chyhsazy chhao cha pao aw ei ta, thyu khao leipa aw ei ta.

Amos (Amosa)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9

Amôsa 9

ABEIPA ryureina khôkhâh thei leinazy

1 Maisâh kiapâh ta a duahpa ta ABEIPA cha hmô na ta, chatawhcha ano ta: “Chhikao thabyzy cha a chalyu tlai nawpa ta a laki byuhpazy cha tu la, ama zydua luh chô liata pakei khai teh; a laibâhpazy cha zaozi ta thie aw na ta, pakha hmahta a râ leipa aw ei ta, pakhata hmahta ra pathla hra leipa aw ei ta.

2 “Athihpa khih taihta a hliepa ta chao hra ei sala, cha tawhtapa cha ei ku ta la aw na ta; avâ lâ kiah hra ei sala, cha tawhtapa cha ei daophi aw.

3 Kamel laki liata a nyu hra ei sala, tlua aw na ta, cha tawhtapa cha âmo chôkhei aw ei na ta; chatawhcha tilaipi ry liata ei mohmô leipa liata a nyu hra ei sala, cha liatahpa parih cha bie pie aw na ta, âmo pachu aw ta.

4 Ama khakhaipa hmiakô liata sei ta sie hra ei sala, cha liata zaozi cha bie pie aw na ta, âmo thie aw ta; phana châ leipa ta pha leina chata ama chô liata ei mo tawpâ aw na ta,” tah ta.

5 Râh cha atypa ta a pati khaituhpa cha, Abeipa, Pheisaihzy KHAZOHPA châ tlôh ta; cha liata a ypa zydua cha pachârôhpa ta ama y aw; Nile hawhta vaw lai aw ta, Izi Nile hawhta a kua hei aw;

6 avâ liata a chhôhpadâhpazy taopa ta, alei chô liata ynazy taopa ta, tilaipi tizy awpa ta alei chô liata a patlaituhpa, a moh cha ABEIPA a châ.

7 ABEIPA chata, “Hy Izarel pathla saih u, ei chô liata Ethiôpia sawzy hawhta y vei eichi ma? Izi râh tawhtapa Izarel nata Kafatawra tawhtapa Philistina mozy nata Kira râh tawhtapa Suria mozy chhihtha vana ma?” tah ta.

8 ABEIPA chata, “Pachâ teh u. Abeipa KHAZOHPA moh cha râh moleipa chô liata tawpa ta, alei chô tawhtapa pahlei aw na ta; anodeikuacha Zakaw chhôhkhazy cha parao khai leipa aw na ta,” tah ta.

9 “Pachâ teh u, bie pie tlôh aw na ta, sâh cha sohri ta ripa hawhta Izarel chhôhkha zydua cha pho zydua hry liata ri aw na ta; châhrasala hmo chyh chaipa chhao alei chô liata tla leipa aw ta.

10 Ei chyhsazy moleipa zydua, ‘Pha leina chata na pha leipa aw ta, na pachhaih hra leipa aw ta,’ a tahpazy cha zaozi ta ama thi aw, tah ta.

Nohhro ta Izarel taopathi heih nawpazie

11 ABEIPA he hmo a taotuhpa heta, “Cha noh liana chata Davi byurei chopa cha padua aw na ta, a pyupazy cha pamai aw na ta, a raopazy cha paryh aw na ta, hlâno ta a ypa hawhna khata sa heih aw na ta;

12 Edôma su liata a ypazy nata ei moh bipa pho zydua cha ama hnei thei nawpa ta,” tah ta;

13 “ABEIPA chata, “Nohzy a vaw tlô hai, cha nohzy liana chata a lei a palituhpa cha sâh a hriatuhpa nata kre a tlytuhpa chata chi a hietuhpa cha a chadaipa ta pha aw ta; tlâh sâhpa chata kresawti thlôhpa palosa aw ta, tlâh zydua zao aw ei ta.

14 Ei chyhsa Izarelzy cha seichâna tawhta pakuasa heih aw na ta; khih rypazy cha tao heih aw ei ta, pahrâ aw ei ta; chatawhcha kresahdôzy tao aw ei ta, a kresawti cha doh aw ei ta; sahdôzy chhao tao aw ei ta, a theilâpa cha nie aw ei ta.

15 Ama râh liata âmo loh aw na ta, ama hnohta ei piepa râh tawhtapa cha phiapa ta y heih khao aw veih ei,” ABEIPA na Khazohpa ta a tah.

Amos (Amosa)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9