2 Timawthy 1

2 Timawthy 1

Anaona

1 Pawla, Krista Zisu liata hrona a ypa taina bie chhona kyh liata Khazohpa khonazie ta Krista Zisu apôstôl chata—

2 Ei saw kho ngaitapa Timawthy hnohta: Khazohpa eima paw nata Krista Zisu eima Beipa tawhtapa ngiachhiena zy, zawngiahna zy, adyhna zy vaw y mawh sy.

Zakhei leina

3 Alyna biepata ei y thei nawpata, hmô cha khoh ngaita na ta, na mothlih pahno thlâhpata a chhô zâ ta bâh leipata ei thlahchhânazy liana chata ei cha pahnokhei tyhpa vâta Khazohpa lâta alynabie ei reih,

4 na pathlatuhpazy tawhta, ngiaryna ryh leina pathaih ngaitapa hneipata ei chakao tyhpa liana chata.

5 Ngiapâna hmeiseihpa nâma liata a ypa cha pahno thlâh ha tlôh na ta, cha ngiapâna cha a hmiatuata na mahnô Loi liana chata y ta, na nô Eunisi liana chata y hra ta, nâma liata chhao a y tahpa a dopata ei pahno.

6 Chavâta ei ku pahniepa vâta Khazohpa hmopiepa nâma liata a ypa kha pa-ia awpata ei cha pahnokhei;

7 Khazohpa ta china Thlahpa maniah pie leipata, hmotaotheina nata kyhpachâna ta nata palôhrupa sia ngaitapa hneina Thlahpa tlao maniah pie tlôh ta,

8 Chatanachata eima Beipa bie pahnosana cha zakhei leipa la, kei ano vâta atâhpa chhao na he na zakhei hra kha y, Thâtihpha vâta rietheipa he Khazohpa hmotaotheinazie hawhta pasa tlao na tao khei mah y,

9 ano chata eima hmotaopazy hawhta châ leipata, ano raopa nata ngiachhiena hawhta maniah pachha ta, awna pathaihpata maniah aw hra ta, cha ngiachhiena cha aleilô y hlâta Krista Zisu liana chata maniah a pie haw.

10 Châhrasala maniah Pachhatuhpa Krista aluahna vâna heta atahmâ paluahsapata a y haw, ano chata thina pahleipadiapata Thâtihpha lâ hrona nata leidia thei leina a paluahsa haw.

11 Cha Thâtihpha bie cha pahnosa awpata tlâh-awhkheituhpa nata apôstôl nata achutuhpa ta raopa ei châ,

12 cha vâna chata he hmozy chhao he pasa ei tao. Châhrasala ei no za vei, ei ngiapâna cha ei pahno, a hnohta ei pavaosapa cha, cha noh châna chata a vao thei tahpa a dopata ei pahno hra.

13 Krista Zisu liata a ypa ngiapâna nata kyhpachâna hneipata biedopa yzie ei pakah tawhta na theipazy kha khâchâ zi teh;

14 hmophapa na hnohta pavaosapata a ypa kha nama chhôh liata Thlahpa Pathaihpa a ypa heta a phapata a vao teh.

15 Asia râh liata a ypa zydua ta einâ heisai haw ei tahpa pahno chi ta, ama hry liana chata Phukela nata Hamôkene amâ hlao.

16 Abeipa chata Ônesiphôra chhôhkhazy hnohta zawngiahna pie mawh sy, ano chata khâ na palysa ta; ei bâlia a kypa chhao na zakhei tlôh lei khâh ta,

17 Rawma khih liata a y nona khata pakhâtata tlao eina tlua.

18 cha Noh liana chata Abeipa lâta zawngiahna hmô awpata Abeipa chata ano cha rao mawh sy. Ephesi khih liata thata a chakaonazie kha na pahno kaw. 

2 Timawthy (2 Timothy)

Bo 1	Bo 2	Bo 3	Bo 4

2 Timawthy 2

2 Timawthy 2

Zisu Krista pheisaih phapa

1 Nâ ei saw y. Krista Zisu liata ngiachhiena a ypa liana heta hmotaotheina hneipata y mah y.

2 pahnotuhpa hluhpizy hryta ei pakah tawhta bie na theipazy kha, cha cha chyhsa ngâchhihpa mo hropazy a pachu pachhuah thei awpa hawhpazy hnohna chata pavaosa teh.

3 Krista Zisu pheisaih phapa hawhta rietheina tao teh.

4 Pheisaih ta y awpata a tlytuhpa cha a palysa thei nawpata, pheisaih ahyhma ta adyuh nota hrochhôh khihsanazy heta apatypamâ beih leipata.

5 Ataopasuana liata chhao chyhsa ta tei hrasala, ryhpa hawhta a tei leipa khiahtala pakhosapata y beih leipata.

6 Lyu hneituhpa hriapasapa cha a thei a to tua awpa a châ.

7 Ei biereipa he pachâ teh, Abeipa chata kyh to liata pahno theina na pie tlôh aw ta.

8 Zisu Krista Davi pathla liatahpa ei Thâtihpha reipa hawhta, athihpa hry tawhta a thyu heihpa kha, a thei thlâh ha teh.

9 Cha Thâtihpha vâna chata hmoparaotuhpa hawhta chahryna taihta riethei ei tao tyh. Châhrasala Khazohpa bie cha chahrypata y tlôh va.

10 Chavâta Krista Zisu liata a ypa pachhana cha chhâzaw ta rônahna chhaota ama hmô thei hra nawpata, atlypazy vâna chata ato pasa ei tao

11 He bie he ngâ â chhih: A thina liata eima thi haw tlôh khiata cha,a hrona liata eima hroh hra aw;

12 pasa eima tao khiahtala, a ryureina liata ryu eima reih hra aw; ano eimâ paphasai khiahtala, ano chhaota maniah a paphasai hra aw;

13 keimo ngâchhih leipata y hra ei sih la, ano cha ngâchhihpata a y— anosasy a papha thei tlôh lei khâh ta,tahpa hih.

Raihriatuhpa hmeiseihpa

14 Cha biezy cha pahnokhei la, bie thlâthlipa chôta ama ei lei nawpata Khazohpa mohmô ta phahnai khoh ngaitapata pahnosa teh, cha cha khâpahma phahnai leipata, a nahthlietuhpazy châta leidiana tlao a châ tyh.

15 Raihriatuhpa bie hmeiseihpa bie sia ngaitapa hmâpa cha noza awpa a châ leipa hawhta, Khazohpa pachâta a phapata a pamosa awpata phahnai khoh teh.

16 Khazohpa lâ za leina bie a reipa cha a heisai tyh mah y, cha hawhpa chyhsa cha Khazohpa pachâ leina lâta chhihtha rili aw ei ta,

17 ama bie chhao chata hmahchhiepa ta a niepa hawhta a nie lymâ aw. Ama hry liana chata Humenia nata Phileta amâ hlao.

18 Cha chyhsazy chata thyuheihna cha atahmâ a khô haw tahpata bie hmeiseihpa kyh cha paviasa ei ta. Chyhsa thokhazy ngiapâna pahlei tyh ei ta.

19 Châhrasala Khazohpa lôbô a ipa cha a duah thlâh ha ta, he pahnona he hnei teh: “Abeipa chata ano eihzy cha a pahno,” tahpa nata “Abeipa moh a padopa maih chata moleina siesai mawh sy,” tahpa hih.

20 Châhrasala o rônahpa liana heta hmobao tâkâ nata ngôh ta taopa dei y leipata, tho nata beih-lei ta taopazy chhao y tyh ta, thokha pasô awpa y ta; thokha deikua cha pasô lei awpa a y hra.

21 Chavâta chyhsa ta pasô leipa hmozy tawhtapa anosasy ta a pathai khiahtala hmobaoh pathaihpa Abeipa hmâtlâhpa raihria phapa to liata amâchiehpa pasô awpa a châ aw.

22 Châhrasala satlia aohraonazy cha a râsai la, pathipalôh pathaihpata Abeipa a padopa maih hry liana chata siana zy, ngiapâna zy, kyhpachâna zy, adyhna zy a chadai hra teh.

23 Châhrasala adyuhnazy a papua tyh tahpa pahnopata, a eina hrupa nata so leipazy liana chata a hlao khoh khâ.

24 Abeipa chakaotuhpa châta cha adyuh awpa châ tlôh leipata, chyhsa zydua chô liata nôphapata nata pachu thaipata, moleina chôta dao theipata,

25 adyuh awpata a taopazy cha a reisi ngaitapata tlao a pachu awpa a châ. Khazohpa ta ama roh theina awpata nata, bie hmeiseihpa cha ama pahno paki nawpata pasai ngyu aw ta,

26 ahripa khopa tao awpata patupata ama châpa cha, ano khohei tawhta ama pua thei nawpata. 

2 Timawthy (2 Timothy)

Bo 1	Bo 2	Bo 3	Bo 4

2 Timawthy 3

2 Timawthy 3

Noh hnôh lâ daihti liata chyhsa yzie

1 He he pahno teh, noh hnôh lâzy liana chata daihti ru ngaitapazy a vaw y aw.

2 Chyhsa âmo kyh apachâpazy, tâkâ sôh a tlaichhaipazy, atahsapazy, apalaipazy, Khazopa a reipachhietuhpazy alyna cha a pahno leipazy, pathaih leipazy, kyhpachâna a pikhei leipazy, chhorei a khoh leipazy, aleituhpazy, a sohsi thei leipazy, chyhsa a hraohraopazy, a phapa a khoh chachei leipa zy,

4 piepiepazy, hmia hnoh a rao leipa zy, apasâhsapazy, Khazohpa kyhpachâna hlâta haosailôh lia a pachâtuhpazy châ tlôh ei ta,

5 Khazohpa pachâna lyuna hnei aw ei ta. Châhrasala a hmotaotheina cha zo aw veih ei. Chazy hawhpa cha a heisai teh.

6 Chazy hawhpa hry liatahpazy cha, ozy liata angiapata molei phaohri a phaohpa chanô hrupazy sei ta a patu tyhpazy kha châ tlôh ei ta, cha hawhpa chanôzy cha aohraona tota chhihthapata,

7 a chu tyh tlôh ta, bie hmeiseihpa pahno beih leipa ama châ.

8 Zane nata Zambre ta Mawsi amâ dyuhpa hawhna khata cha chyhsazy chhao chata bie hmeiseihpa he ama dyuh tyh. Palôhrupa chhiepa, ngiapâna kyh liata khâpahrao leipa ama châ.

9 Châhrasala chazy hleikhô cha tao aw veih ei, ama hrunazie chyhsa zydua lâta a vaw lâ tlôh aw ta. Zane nata Zambre hruzie a vaw lâpa hawhna khata.

Timawthy hnohta Pawla biepiena

10 Nâ deikua chata ei pachuna zy, ei yzie zy, ei hmochhuahpa zy, ei ngiapâna zy, ei dao theina zy, ei kyhpachânazy, ei tiamana zy,

11 chyhsa eina taolana zy, pasa ei taona zy na pahno na, Antiôka khih liata zy, Ikônia khih liata zy, Lystra khih liata zy ei chô liata hmo a tlôpa nata taolana ei taona zydua kha; cha zydua liana chata Abeipa chata na pachha haw tlôh ta.

12 Ahyrai Krista Zisu liata Khazohpa pachâpata y a chhuahpa maih chata taola ama tao hra aw.

13 Moleipa nata dôtuhpazy deikua cha chyhsa dôpa nata dôpata ypata ama molei rili aw.

14 Chârasala nâ la, ahy hnohta achupa ma na châpa nata Krista Zisu liata ngiapâna a ypa vâna chata

15 pachhana hmôna taihta cha paso theipa, châ pathaihpazy cha na hawtita tawhta a pahnopa na châpa a pahnopata, na hmo achupa nata na hmo pahnopasiapazy liana chata y thlâh ha mah y.

16 Khazohpa châ bie to Khazohpa huso thlupa maih cha, pachuna kyh liata zy, thailei pachâsana kyh liata zy, chhoreina kyh liata zy, siana pachuna kyh liata zy, a phahnai hra.

17 Khazohpa chyhsa cha raihria phapa to hria awpata a kipata a tobipata a paki thei nawpata. 

2 Timawthy (2 Timothy)

Bo 1	Bo 2	Bo 3	Bo 4

2 Timawthy 4

2 Timawthy 4

1 Khazopa mohmô nata ahrohpa nata athihpa pachiatuh awpa Krista Zisu mohmô liana chata aluahna nata a Khihnarâh ta phahnai khoh ngaitapata ei cha pahnosa;

2 bie cha chho teh, a daihti liata zy, a daihti leipa liata zy chhao tei lymâ teh, dao thei ngaitana chôta nata pachuna chôta ama thai leizie pahnosa la, chhorei la, pasyu teh.

3 Pachuna dopa ama nahthlie hoh leina daihti tlô tlôh aw ta, ama nahzy â zapa vâta ama khozie hawhta pachutuhpazy âmo lâta tlao pakhy aw ei ta,

4 ama nahzy cha bie hmeiseihpa lâta papâ aw ei ta, phôhpa lâ pangaipata ama tlei hra aw.

5 Nâ deikua cha ato liata a sohsi la, riethei tao la, Thâtihpha chhotuhpa lâ rai hria la, na chakaona kha patlô teh.

6 Kei la atahmâ chhao hlâpata y hai tlôh na ta; ei puana daihti a tlô haw.

7 Adyuhna phapa tei khai haw na ta, ei râpasuana lâpi patlô haw na ta, angiapâna cha ei vao thlâh haw.

8 Atahmâ siana lakho cha kei châta sopata y haw ta, cha cha Abeipa pachiatuhpa sia ngaitapa chata cha Noh liana chata eina pie aw. Kei dei châ leipata aluahna a mokhâhtuhpa maih lâta chhao.

Mo pakha thâtih reina

9 A chatliepata kei lâ a vy teh.

10 Dema chata atahmâhlâ khizaw he a tlaichhaipa vâta na siesai ta. Thysalawnika lâta sie ha tlôh ta; Krekisa cha Kalatia râh lâta sie haw ta. Titu cha Dalmatia râh lâta sie haw ta.

11 Luka deita ei hnohta y ha ta. Maka kha hrua la, a vaw chhi hra teh; ano cha chakaona lâta kei châta phahnai tlôh ta.

12 Tykika cha Ephesi lâta ei tuah haw.

13 Nâ vy tita Trôsa liata Karpa hnohta viahpakao pasihpa ei siesaipa kha, châbuzy chhao khata vaw cheih la, cha ropazy tlai kha vaw cheih mah y.

14 Alezanda dawh a leih thaipa kha ei chôta a molei ngaita kaw tyh. Abeipa chata a hmotaopa lymâ hawhta viari a thô aw.

15 Ano liana khata nâ chhao a chado teh, eima bie a dyuh ngaita kaw tlôh ta.

16 Ei thaina bie ei reih tua nona chata ahyhma ta na bao leipa ei ta; tlao na pathlua khai haw ei ta. Maochhiepata y kha ei se!

17 Thâtihpha keima vâta chho pakipata a y thei nawpa nata Zenitai zydua châta ama pahno thei nawpata, Abeipa ta na bao ta, tha tlao na patlô ta. Chatawhcha chakeibarôhneipa pakah tawhtapa kha pachhapata ei vaw y haw.

18 Abeipa chata moleipa zydua liata na pachha aw ta, avâ Khihnarâh liana chata a bohpata eina tlôkhei aw. Ano cha chhâzaw ta rônahpata y mawh sy. Amen.

Byhnâ awna chhâna

19 Priska nata Akuila, Ônesiphôra chhôhkhazy chhao kha nâ naohpa mah y.

20 Erasta cha Kawrini liata y thlâh ha ta; Trôphima deikua cha Mileta khih liata tlâh leipata siesai haw na ta, chasipaw hlâta a vy thlyu mah y. Eubula zy, Pudena zy, Lina zy, Klaudia zy, unawh zydua chhaota amâ châ naoh ei.

22 Abeipa cha na thlahpa hnohta y mawh sy. Ngiachhiena na hnohta y mawh sy. 

2 Timawthy (2 Timothy)

Bo 1	Bo 2	Bo 3	Bo 4