2 Thysalawnika Mozy 1

2 Thysalawnika Mozy 1

Anaona

1 Pawla nata Silvana nata Timawthy chata— Khazohpa eima Paw nata Abeipa Zisu Krista liata Thysalawnika khih liata awnanopa sahlaozy hnohta:

2 Paw Khazohpa nata Abeipa Zisu Krista tawhtapa ngiachhiena nata adyhna nama hnohta y mawh sy.

Krista a vyna liata pachiana

3 Unawh saih u, nâmo kyh liata Khazohpa lâta alynabie khâ a reih awpa rai eima châ, cha cha a ngiahpa rai a châ, namâ ngiapâna cha thata laiseihpata, nama zydua ta kyh namâ pachâ rairiena cha pôh rili tlôh ta.

4 He vâna heta chyhsa ama cha taolana zydua liata nata rietheina nama taonazy liana khata, nama tiamanazie nata namâ ngiapânazie vâta Khazohpa awnanopa sahlaozy hry liana chata keimo ta eima châ palaikhei tyh.

5 Chazy cha Khazohpa Khihnarâh chyhsa tlâ châpata raopa nama châ thei aw tahpa, Khazohpa pachiana sia ngaitapa ngiana sia ngaitapa a châ, cha Khihnarâh vâta pasa a taopa nama châ hih,

6 Abeipa Zisu, Khazohpa a pahno leipa chyhsa nata eima Beipa Zisu Krista Thâtihpha a zyh leipazy chôta phuh lapata, a vâlyuhchâpa thatlô ngaitapazy chhaota,

7 mei paleih hryta avâ tawhta a luah tita, nama rie cha patheituhpazy cha rietheina viarithôpa nata nâmo rietheina a taotuhpazy chi he,

8 keimo nata pahâna liata viarithôpa cha Khazohpa chata hmo sia ngaitapa châ tlôh ta.

9 Cha noh liana chata a mopathaihpazy liana chata palyupalihpata y awpa nata ngiapâtuhpa zydua liana chata, eima bie eima cha pahnosapa kha a ngiapâ tlôh eichi ta, noâh awpata a vy tina chata,

10 cha Khazohpa a pahno leipa chyhsa nata eima Beipa Zisu Thâtihpha a zyh leipazy châta hriena ama tao aw. Abeipa tawhtapa nata a thatlôna rônahna tawhta chhâzaw ta leidiana cha.

11 Cha hawhta palyupalihna noâhpa a châ thei nawpata eima Khazohpa ta a cha awna liana chata aw tlâh châpata a cha rao thei nawpa ei nata, pha khona to nata ngiapâna raihria to a hmotaotheina ta a hlao patlohsapata a y thei nawpata thlah khâ eima cha chhâ pa tyh,

12 chatanachata eima Khazohpa nata Abeipa Zisu Krista ngiachhiena lymâ hawhta eima Beipa Zisu moh cha nâmo liata palyupalihpata y thei aw ta, nâmo chhao ano liata palyupalihpata nama y thei aw. 

2 Thysalawnika Mozy (2 Thessalonians)

Bo 1	Bo 2	Bo 3

2 Thysalawnika Mozy 2

2 Thysalawnika Mozy 2

Ryhpa paraotuhpa

1 Châhrasala unawh saih u, eima Beipa Zisu Krista a vyna nata ano hnohta eima kaw pakhyna awpa kyh liana chata,

2 Abeipa Noh cha a tlô haw tahpa vâta nama palôh thlai a chalyu lei nawpata, chhochhieliena vâta tlyma, pachuna vâta tlyma keimo tawhta châ paphaopa hawhpa vâta tlyma namâ tymâ lei nawpata eima châ haw.

3 Ahyhma ta khâpata hma cha dô kha ei se; paosaina cha vaw tlô tuapata, Ryhpa paraotuhpa leidia sawchapawpa cha a vaw luah vei khiahtala, cha Abeipa Noh cha tlô tlôh leipa aw ta,

4 ano chata Khazohpa ta ama bipa maih nata phôryhpa zydua adyuhpata ama chôta y a chhuahpata apalyupalih aw, chatanachata Khazohpa achhyna-o liata atyupata, Khazohpa hawhta a chaluah aw.

5 Nama hnohta ei y nona khata cha biezy cha ei cha chho tyh ei tahpa a thei thlâh ha veih eichi mâ?

6 Atahmâ a vaw luah thei nawpata a pakhâpa a y tahpa nama pahno na. A daihti ta liata Ryhpa paraotuhpa cha a vaw luah aw.

7 Ryhpa paraona bienyupa chata atahmâ chhao hria hai tlôh ta; châhrasala pakhâtuhpa lapata a y hlâ lei cha atahmâ a pakhâtuhpa a y.

8 Cha lapata a y tina chata Ryhpa paraotuhpa cha a vaw luah aw, Abeipa Zisu ta ano cha a pakah hu ta thi aw ta, ano a vyna a rônahna ta a pahleipadia aw.

9 Cha Ryhpa paraotuhpa Sâtâ hmotaotheina chhaota a vy aw, hmonoâhpa a hluhpi taopata ngiana doleipa nata noâhpazy chhaota,

10 leidia haipazy chata sia leina dôna to chhaota a châ aw, pachhapata ama y thei nawpata bie hmeiseihpa kyhpachâna cha amâ pyh leipa vâta a châ.

11 Cha vâna chata haipa bie cha ama zo nawpata Khazohpa ta molei raihriana cha ama hnohta a patlôsa aw.

12 Bie hmeiseihpa zyh leipata sia leina liata aly viapazy chata thai lei ama châ khai thei nawpata.

Pachha châ awpata atlyhna

13 Abeipa liata unawh kho ngaitapa saih u, Thlahpa Pathaihpa nata bie hmeiseihpa zyhpata pachhapata y awpata, cha hlâ tawhta Khazohpa ta a châ tlypa vâ ei ta, nâmo kyh liana heta Khazohpa lâta alynabie khâ a reih awpa rai eima châ.

14 Cha hawhpa châna chata ano chata eima Thâtihpha heta a cha awpa ei kha, eima Beipa Zisu Krista rônahna to awpata.

15 Chatanachata unawh saih u, a ipata a duah ula, bie ryuhipazy cha bie reipata tlyma, eima châ paphaopa ta tlyma, eima cha pachupa kha, khâchâ a pyh teh u.

16 Chatanachata eima Beipa Zisu Krista tlai nata Khazohpa eima Paw kyh maniah a pachâtuhpa nata, ngiachhiena vâta chhâzaw ta thlalôhna nata hnabeiseina phapa maniah pietuhpa chata,

17 nama pathipalôhzy cha thlahpalôhpata hmophapa tao nata bie phapa reipa to liata cha pa-i ei se. 

2 Thysalawnika Mozy (2 Thessalonians)

Bo 1	Bo 2	Bo 3

2 Thysalawnika Mozy 3

2 Thysalawnika Mozy 3

Keimo châta thlahchhâ teh u

1 A chhâ chaina ta cha, unawh saih u, Abeipa bie he nama hryta a ypa hawhna khata, pôh lymâpata palyupalihpata a y thei nawpa nahta

2 chyhsa chhorupa nata moleipazy liata eimâ boh thei nawpata thlah maniah chhâpa teh u; chyhsa zydua chata ngiapâna hnei khai tlôh lei khâh ei ta.

3 Anodeikuacha Abeipa cha ngâ a chhih na; ano chata tha cha patlô aw ei ta, moleipa liana chata a cha hrôbieh aw ei.

4 Bie eima cha piepa maih kha zyh tyh eichi ta, nama zyh lymâ awpa chhao Abeipa liana chata eima cha ngâ.

5 Abeipa chata nama pathipalôhzy cha Khazohpa kyhpachâna liata nata Krista tiamana liana chata cha chhihtha ei se.

Rai hria awpa a chânazie

6 Unawh saih u, keimo tawhta bie ryuhipa nama hmôpa hawhta a y leipa thathipata a ypazy hrozie tawhna chata a panano awpata eima Beipa Zisu Krista mohta bie eima cha pie.

7 Nâmo tlaita eima hâ maniah namâ lanazie awpa pahno tlôh eichi ta; nama hry liata thathiehpata eima y beih leipa kha,

8 ahy ku tawhtapa hmahta asaipata nama viahchhâ nie beih hra ma pi, nama hry liata ahyhma rie eima cha pathei lei nawpata, a chhô a zâ ta rietheipa nata hria pasapata hriana chôta tlao eima nie tyh.

9 Eima tah thei leipa vâta châ leipata, nâmo ta eima hâ a lapata maniah nama mopâ nawpata tlao eima tao.

10 Nama hnohta eima y no chhao khata he bie he eima cha piepa kha; ahyrai ta rai a hria khoh vei khiahtala, a nie chhao nie kha se, tahpa hih.

11 Nama hryta thokha thathipata ama y tahpa thâtih pahno tlôh pi ta, chazy chata rai hria leipa ei ta, tlao ama y chakhy tyh.

12 Cha hawhpazy cha a thlihthlâhpata hria awpa nata âmo viahchhâ nie awpata Abeipa Zisu Krista liana chata biepiepa ta eima pasyu.

13 Unawh saih u, nâmo deikua cha hmophapa taopa ai kha u.

14 Ahyrai ta he châ paphaopa liata eima bie he a zyh vei khiahtala, cha chyhsa cha nama pahlao chachei lei nawpata ngiah teh u, a no a za nawpata.

15 Chârasala khakhaipa hawhta la rao leipa ula, unawh hawhta tlao chhorei teh u.

Byhnâ awna

16 Adyhna Beipa tlai chata chhâzaw ta kyh to liata adyhna cha pie ei se. Abeipa cha nâmo zydua hnohta y mawh sy.

17 Kei Pawla ta, keima ku tlaita ei châ naohna ei a châ hih. He he ei châ paphaopa to liata ngiana a châ; he hawhta ei ropa he.

18 Eima Beipa Zisu Krista ngiachhiena nama zydua hnohta y mawh sy. 

2 Thysalawnika Mozy (2 Thessalonians)

Bo 1	Bo 2	Bo 3