2 Pity 1

2 Pity 1

Anaona

1 Saimaw Pity, Zisu Krista sei nata apôstôl chata—Zisu Krista eima Khazohpa nata Pachhatuhpa siana vâta ngiapâna sôh ngaitapa eima topa hawhta a to hrapazy hnohta:

2 Khazohpa nata eima Beipa Zisu Krista pahnona liana chata nama chô liata ngiachhiena nata adyhna papôhsapata y mawh sy.

Nâmo awna nata atlyna

3 Ano rônahna nata phana zawhzi ta hrona nata Khazohpa pachâna lâ kyh liana chata hmo zydua maniah pie tlôh ta,

4 chazy zawhzina chata a bietaipa sôh ngaitapa nata rônah ngaitapazy cha maniah a pie, chatanachata aohraona vâta khizaw liata paraona a vaw ypa he a râsaipata, cha bietaipa sôh ngaitapazy nata rônah ngaitapazy vâna chata Khazohpa nôchâ namâ hlykhei thei hra aw.

5 Cha vâna tlai chata tiama papuapata, namâ ngiapâna liana chata phana pahlao ula, nama phana liana chata pahnona pahlao ula,

6 nama pahnona liana chata a sohsina pahlao ula, namâ sohsina liana chata tiamana pahlao ula, nama tiamana liana chata Khazohpa pachâna pahlao ula,

7 nama Khazohpa pachâna liana chata unawhzy kyhpachâna pahlao ula, nama unawhzy kyhpachâna liana chata kyhpachâna pahlao teh u.

8 Chazy cha nama ei châpata a pôh lymâ tlôh khiahta cha, eima Beipa Zisu Krista pahnona kyh liana heta thathi leipa nata pathei leipata nama y lei nawpata a cha tao tyh ei.

9 Ahyrai cha hmozy a hnei leipa cha mochaopa châ ta, a hniapata dei hmô thei ta, hlâno ta moleinazy cha my ha tlôh ta.

l0 Chavâta unawh saih u, a cha awna nata a châ tlyna ei cha pa-i awpata tiama papua rili teh u, chazy cha nama tao khiahtala khatita hmah pao aw veih ei chi;

11 chatanachata Zisu Krista eima Beipa nata Pachhatuhpa chhâzaw Khihnarâh liata a ngiana cha cha pahmôsa ngaita tlôh aw ei ta.

12 Cha vâta cha hmozy pahnopata bie hmeiseihpa nama hnohta a ypa liana chata namâ i tarawpata cha hmozy cha cha pahnokhei awpata khâ ei mâ thlâh ha aw.

13 He pôhpa liata ei y chhôhna heta, nâmo pahnokheipata cha pasyu ngâhpata a pha ei tah.

14 eima Beipa Zisu Krista ta eina pahnosapa hawhna khata, ei pôhpa so ti cha a tlô patoh aw tahpa pahno tlôh na ta.

l5 Ei sie tawhta cha hmozy cha khâ nama pahno thlâh ha thei nawpata ei tei aw.

Krista rônahna mohmô ta a pahnokhei tyhpazy

16 Eima Beipa Zisu Krista hmotaotheizie nata a vy heihna kyh cha eima cha pahnosa nona ei khata, phôhpa bie so ngaitapata tao thlâhthlipazy a zyhpa châ leipa pi ta, a rônahna a hmôtuhpazy tlao eima châ mâ tâh.

17 Ano chata Paw Khazohpa tawhtapa palyupalihna nata rônahna hmô ta, cha nona chata rônah ngaitana tawhna chata he hawhpa ao he ano liata vaw tlô ta, “He he ei Sawchapawpa kho ngaitapa, ei ly ngaitapa cha a châ,” tahpata.

18 Tlâh pathaihpa liana chata a hnohta eima y nona khata cha ao cha avâ tawhta a vaw puapa keimo tlaita eima thei.

l9 Chatawhcha chhochhieliena bie â i via pachaipa cha hnei pi ta. Khih vaw dei ta awhkho ta awhsi cha nama pathipalôh liata a vaw pua hlâ lei cha, cha cha meiôh, su zohna liata a khaihpa ama pachâpa hawhta nama pachâ khiahta bie cha nama tao pha aw.

20 Khazohpa châ liata bie chhochhieliepa rai he ahyrai ta anosasyh ta chhopasia awpa châ vei, tahpa pahno tua ula,

21 bie chhochhieliepa rai he, chyhsapa bie ta a puapa châ beih tlôh leipata, chyhsazy ta Thlahpa Pathaihpa tuapata Khazohpa tawhtapa tlao ama reih tyh. 

2 Pity (2 Peter)

Bo 1	Bo 2	Bo 3

2 Pity 2

2 Pity 2

Hrohsopa pakheipazy nata pachutuhpa pakheipazy (Zu 4-13)

1 Châhrasala chyhsazy hry liana chata hrohso pakheipazy chhao ama vaw puapa kha, cha hawhna hra chata nama hry liata chhao pachutuhpa pakheipazy ama vaw y aw, âmo chata âmo a pachhatuhpa Abeipa tlai cha apaphasaipata chyhsa aparao theipa ngiapâna nanopazy a ru lâta a vaw ngiakhei aw ei ta, âmo chô liata sôkha ta leidiana a vaw tlô aw.

2 Chatawhcha chyhsa hluhpi ta ama hmotao pha leipa cha hmâh aw ei ta, âmo vâta hmeiseihna lâpi cha reipachhiepa a châ aw.

3 Chatawhcha sôh tlaichhaina vâta haipa bie ta sôhdao nawpata cha hmâh aw ei ta; châhrasala hmialâta ama thai leina cha a pahâ leipata, ama leidiana chhao a mô vei.

4 Vâlyuhchâpazy ta hmo ama parao nona khata Khazohpa ta pahlôh leipata, hrienasu liata thy ta, pachiapata pakhei awpata khaotlô zohpa liata tlao khô tlôh ta;

5 ano a pachâ leipazy yna khizaw liana khata tipa-ua patlôsapata hlâno khizaw cha pahlôh leipata, châhrasala Naw siana bie a chhotuhpa mo hropa pasari chhaota pachha haw ta;

6 Sawdawma nata Kawmawra khihzy cha ano a pachâ leipa a vaw y awpazy pamosa nawpata hmâh ta, buhchâ ta pachâpata pahleipadiapata thai lei pachâsa haw ta;

7 Lawta chyhsa siapa, moleipazy ta yzie chhie ngaitapata pachâ ama parôhsapa cha pachha haw ta.

8 Cha chyhsa siapa cha ama hry liata ypata, a mo ta hmô ta, a nah ta thei ta, yzie leipa hawhta ama hmo taopazy chata a palôhrupa siapa cha nohcharei a pasâhsa ngaita tyh tlôh ta.

9 Abeipa chata ano a pachâtuhpazy cha reipasaona tawhta a pachhazie nata a sia leipazy cha ryureina noh châna chata hriena chôta a pakheinazie pahno ta,

10 piepie aohraona kyh liata a sapa hawhta a ypa nata biehneina a nawhtawtuhpazy chhochhi cha ryurei noh châta hriena chôta a pakheizie a thai pachai. A hrupa riahphapa nata chhorupa châ ei ta, rônahnazy ama reipachhiepa chhaota chi beih veih ei,

11 vâlyuhchâpa âmo hlâta thatlôna nata hmotaotheina a hnei viapazy hmahta, Abeipa hmiakô liata ama thâtih pachiapata ama reipachhie tlôh leipa kha.

12 Châhrasala he hmohrohneipa pachâna a hnei leipa, patupata pahleipadia awpata, sa hawh deitata a piepazy hawhna heta, hmo ama pahno leipazy cha reipachhiepata, âmo raona ta ama rao tlai aw,

13 hmo paraona mâ ta hmo moleipa pasa taopata. Nohchhô ta kyhchhi atymâpa a khohpa châ ei ta. Nama hnohta kyh ama chhi nota âmo a dona kyh a chhipa ama châpa vâta a pualeipa a hlaopazy nata paraopazy châ ei ta.

14 Mokhaoh apheina ta a biepa, molei pathlei thei leipazy châ ei ta. Chyhsa a i leipazy papao thei ei ta. Uava a hmâhpa pathipalôh phaoh ei ta. Chhiesapa sawzy châ ei ta!

15 Bôsôra sawchapawpa Balama hmoparaona hlao a pasotuhpa lâpi cha amâ chhih hawpa vâta, lâpi dopa cha siesai ei ta, pavia haw ei ta,

16 châhrasala ano cha a hmotaona vâta rapata y haw ta, alâ reih pathlie thei leipa cha chyhsapa reih ta vaw reih ta, hrohsopa hruna cha a pakhâ.

17 Chazy cha tikhao ti a y leipa nata meihdo thlihpipa hmôpata a phaohpa ama châ; chazy châna chata zohna chhakalupa cha pakheipa a châ haw.

18 Bie hrao leipa reipata, moleipa ta a ypazy hry tawhtapa a râ haipazy cha sapa aohraona moleina liata ama pahluasa tyh.

19 Âmo cha paraona sei ama châna chôta chyhsazy cha sei papuapa kyh bietaih tyh ei ta; chyhsa a pahnietuhpa maihta, cha tlai chata sei ta a tao tyh.

20 Abeipa nata Pachhatuhpa Zisu Krista ama pahnopa vâta, khizaw puanazy amâ râsai tawhta, cha lilaw liana chata atâh heipata pahniepata ama y heih tlôh khiahta cha, ama yzie hnôh lâtahpa cha a hmialâtahpa hlâna chata a chhie via hapa a châ aw.

21 Kyh siapa cha pahno tawhta, biepipa pathaihpa ama hnohta pavaosapa cha a heisai hlâta cha, kyh siapa cha pahno leipa ei sala ama châta a pha via awpa châ tlôh ta.

22 I ano pali lâta kua heih ta,” tahpa nata “Vaopanô a si chiehpa chhao chiatlao liata a si awpata kua hei ta,” tahpa bieso do ngaitapa hawhpa bie cha ama chô liata a y haw. 

2 Pity (2 Peter)

Bo 1	Bo 2	Bo 3

2 Pity 3

2 Pity 3

Abeipa a vyna bietaina

1 Kho ngaitapa saih u, atahmâ nama hnohta ei ropa he ei châ paphaopa mianona châ ta, chazy chata cha pahnokhei awpa ei ta, nama palôhrupa pathaihpa pahra rairieh na ta;

2 hrohso pathaihpazy bie reichhieliepa nata nama lyuhchâpazy pakah ta Abeipa nata Pachhatuhpa biepiepa cha nama thei thlâh hana awpata.

3 He he pahno tua ula, noh hnôh lâzy liana chata pahneisaotuhpazy cha âmo khonazie hawhta ypata pahneisaona chôta a vy aw ei ta,

4 “A vy heihna bietai cha khataihta e? Tao pathao tua no tawhta ato a y tyhpa hawhta chi pathlatuhpazy a mô no tawhna khata a y lymâ mâ tâh,” ama tah aw.

5 Hezy he pahno lei a pachâ raruah tyh ei ta, Khazohpa bie ta hlâno ta avâzy vaw y ta, alei chhao ti tawhtapa nata ti ta padopata vaw y ta,

6 chazy liana chata cha no ta khizaw a ypa cha ti ta vao ta, a leidia haw, tahpa hih.

7 Châhrasala atahmâ avâzy nata alei a ypazy he cha bie vâna chata Khazohpa pachâ leipa chyhsazy pachiapa nata leidia noh châta pakheipata, mei châta pachôpa a châ haw.

8 Châhrasala kho ngaitapa saih u, he bie kawh kha he my khah u, Abeipa pachâ ta cha noh kha he kô sâh kha hawhta châ ta, kô sâh kha chhao noh kha hawhta a châ, tahpa hih.

9 Chyhsa thokha ta nainôsôpata ama raopa hawhta Abeipa cha a bietai kyh liana chata a nainôsô vei, ahyhma ta ama leidiapa khoh leipata, ama moleina siesaipata ano lâ tlao ama vaw thei nawpata a nohphapa tlao a châ.

10 Chata hrasala Abeipa Noh cha parutuhpa hawhta a vaw tlô tlai aw, cha noh liana chata avâzy cha thata paropata leidia aw ta, hmo thabypazy cha mei ta patlôpata y ha aw ta, alei nata a chhôh liata a ypa zydua a kâ patlô aw.

11 Cha hmozy cha cha hawhta leidia khai awpa a châ tahpa nama pahnopa vâta, Khazohpa Noh vaw tlôna daihti awpa cha hnabeiseipa nata phahnai khoh ngaitapata khopata yzie pathaihpa nata Khazohpa pachâna kyh liana chata kheihawhpa e nama châ aw tly?

12 Cha Noh a vaw tlôpa vâta avâzy kâpata leidia aw ta, hmo thabypazy chhao cha mei ta pazaopata a y ha aw!

13 Châhrasala a bietaipa hawhna chata avâ thiehpa zy nata alei thiehpa, a chhôh liata siana a ypazy cha eima hnabei a sei.

14 Chavâta kho ngaitapa saih u, cha hawhpa hmozy cha nama hnabei a seihpa vâta, a puapa a bai leipa nata seina hnei leipata, thlalôh ngaitapata nama ypa a cha hmô thei nawpa ei ta, tiama papua teh u.

l5 Chatawhcha eima Beipa nôphanazie cha pachhana daihti rypaona châta rao teh u. Eima unawhpa kho ngaitapa Pawla chhaota a hnohta sona piepa lymâ hawhta nâmo lâta a ropa hawhna khata,

16 a châ paphaopa zydua liana chata cha biezy cha reipata cha hawhna hra chata a roh. Chazy liana cha bie pahno ru ngaitapazy y ta, chazy cha chyhsa so leipa nata chyhsa a i leipazy ta Khazohpa cha bie hropa ama pachâ pasipa hawhta pachâ pasi ei ta, âmosasy ta ama pahleipadiapa tyh.

17 Chavâta kho ngaitapa saih u, nâmo ta cha biezy cha nama vaw pahno chhieliepa vâta a chado teh u, chata leipata la moleipazy a do leina liata chhihthapata namâ duana pha nota nama pao pathlei aw na.

18 Anodeikuacha eima Beipa nata Pachhatuhpa Zisu Krista ngiachhiena nata pahnona liana chata vaw laiseih teh u. Atahmâ nata chhâzaw taihta ano hnohna chata rônahna y mawh sy. Amen. 

2 Pity (2 Peter)

Bo 1	Bo 2	Bo 3