Mara Holy Bible: 2 Kawrini Mozy

Showing posts with label 2 Kawrini Mozy. Show all posts

2 Kawrini Mozy 1

Anaona

1 Pawla Khazohpa khonazie ta Krista Zisu apôstôl nata eima unawhpa Timawthy chata Kawrini khih liata Khazohpa awnanopa sahlao a ypazy lâta nata Akaia râh liata mopathaipa a ypa zydua lâta chhao:

2 Khazohpa eima Paw nata Abeipa Zisu Krista tawhtapa ngiachhiena nata adyhna nama hnohta y mawh sy.

Taolapata a y khai nahta Pawla alyna hlâna

3 Eima Beipa Zisu Krista Khazohpa nata Paw, Paw ngiachhienazy, Khazohpa thlahlôhna a phahla leipa cha reithaipata y mawh sy.

4 Khazohpa ta keimo thlah maniah a palôh, chavâta keimo chhao riethei ataopazy thlah eima palôh thei nawpata cha thlahlôhna hawhpa cha Khazohpa tawhta eima hmôpa a châ.

5 Krista pasa taonazy cha eima chô liata a hleikhôpata a ypa hawhna heta eima thlahlôhna he Krista zawhzi ta a hleikhôpata a châ.

6 Châhrasala rietheipata eima y khiahta cha nâmo thlahpalôh nawpa nata pachhana awpa châ ta; thlahlôhpata eima y khiahta cha, nâmo thlahlôhpata nama y hra nawpata châ ta, cha chata eima riethei taopa he tiama ngaitapata nama taona liana chata a hria tyh.

7 Chatawhcha rietheina a to hrapazy nama châna liana heta thlahlôhna a to hrapazy nama châ tahpa eima pahno nata hnabei eima cha seikheina he â i.

8 Unawh saih u, Asia râh liata eima chôta rietheina a vaw tlôpa kyh kha nama pahno lei awpa khoh leipa pi ta, kha hawhta pasana thata tao thei leipa hro chhao hnabeisei leina taihta vipata eima ypa kha.

9 Keimosasy ta a ngâ leipata Khazohpa athihpa a pathyutuhpa cha tlao eimâ ngiapâ via nawpata keimo liana chata thi awpata a pachâna hnei pi ta;’

10 cha Khazohpa chata cha tlatluta thina liatahpa cha maniah pachha haw ta, maniah a pachha heih aw; maniah a pachha lymâ aw tahpa ano liana chata hnabeiseina pahnie pi ta.

11 Chyhsa hluhpi zawhzi ta hmopiepa eima hmôpa vâta chyhsa hluhpi ta eima chô liata alynabie ama reih thei nawpata, nâmo chhaota thlah maniah nama chhâpana liata maniah a châkhei hra ula.

Pawla khitly a hnawna

12 Eimâ palaikheipa cha he he a châ, eima ngiaryhna ryh leina kyh pahnosapa cha pathaihna nata Khazohpa a dona hneipata sapa sona liata châ leipata Khazohpa ngiachhiena ta khizaw liana heta eima ypa kha nâmo lâta a pha viata eima hria.

13 Nama rei tyhpa nata nama palâhâh tyhpa bie tah leipata cha bie hropa rai nâmo lâta roh ma pi; eima Beipa Zisu noh liana chata nâmo eimâ palaikheipa nama châ awpa hawh hra ta,

14 keimo chhao namâ palaikheipa eima châ aw tahpa nâmo thokha ta maniah nama zo hrapa hawhna khata a chhâna taihta eima bie cha nama zo awpata ei hnabei seih hra ta.

15 Cha ngiapâna hneipata ngiachhiena lie no nama hmô thei nawpata nâmo lâta a vy tua aw sala;

16 nâmo chapiapata Masidônia râh lâ sie lymâ sala. Masidônia râh tawhta nâmo lâ vaw kua heih sala, tah na ta. chatawhcha Zudia râh lâta ei siena awpa liana chata nâmo pathliepata y sala tah hra na ta.

17 Ei chhuahpa pananopata a y nona khata ei palôhrupa â i leizie a palâsapa ma ei châ? A châ vei khiahtala ei hnohta, “Y,” tahpa nata “Châ vei” tahpa cha y pabao awpata hmo tao ei chhuah tyhpa cha sapa hawhta ma ei chhuah?

18 Khâparai châ sala Khazohpa ngâ a chhihpa hawhta nâmo lâta eima bie he, “Y”, tahpa nata, “Châ vei” tahpa y pabao tlôh lei khâh ta.

19 Khazohpa Sawchapawpa Zisu Krista cha a bie kei nata Silvana nata Timawthy ta eima cha chhopa kha. “Y,” tahpa nata, “Châ vei,” tahpa cha pabao tlôh lei khâh ta, ano liana chata, “Y” tahpa tlao a y.

20 Khazohpa bietaipa cha khazie rai châ sala, ano liana chata Y, tahpa cha y tlôh ta. Chatanachata ano vâta Amen, tahpa cha a y, keimo vâta Khazohpa rônah nawpata.

21 Châhrasala Krista liata nâmo nata maniah a pa-ituhpa nata keimo sathaw maniah a thupa cha Khazohpa a châ.

22 Ano cha ngiana maniah a taotuhpa nata eima pathipalôh liata bietaina Thlahpa maniah a pietuhpa châ hra ta.

23 Châhrasala ei thlahpa chôta pahnotuhpa chata Khazohpa ei aw, nâmo cha pahlô awpata Kawrini khih lâ ei vy leipa a châ.

24 Namâ ngiapâna chô liata abeina eima hnei, tah leipa na ta; namâ lyna a baotuhpa eima châ, tlao ei tah. Ngiapâna liata a duahpa châ tlôh eichi ta.

2 Kawrini Mozy (2 Corinthians)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10	Bo 11	Bo 12	Bo 13

2 Kawrini Mozy 2

1 Châhrasala keima kyh liata la he he khâchâ ei chhuahpa a châ. Pachârôhna chôta cha nâmo lâta a vy khao lei awpata.

2 Kei ta nama pachâ ei cha parôhsa tlôh khiahta cha pachâ ei cha parôhsapa ei, nâmo leipata cha ahyma na palysatuhpa a châ aw.

3 Chatanachata kha tlai kha ei roh, chata leipata cha ei vy tita ei lyna awpazy liana chata pachârôhna tlao ei hmô pathlei aw na, ei lyna cha nâmo zydua alyna a châpata cha pangiasa chyu tlôh ei na ta.

4 Mothlih hluhpi tlana chôta pathipalôh rietheipa nata thlahzo ngaitapata ei ropa a châ. Pachâ cha parôhsapata nama yna awpa châ leipata nama chôta kyhpachâna thata ei hneipa he tlao nama pahno theina awpata a châ.

Hmo a paraotuhpa châta ngiahthaina

5 Châhrasala ahyrai ta chyhsazy pachâ a parôhsa khiahtala, keima dei pachâ eina parôhsapa châ leipata ei tah tu lei nawpata nama zydua ta nama pachâ a cha parôhsa chyu ei.

6 Cha hawhpa chyhsa châna chata chyhsa hluhpi ta ama hriepa cha a daih haw;

7 chatanachata hrie heih awpa hlâta cha a ngiahthaipata thlah namâ palôh awpa a châ, chata leipata cha cha hawhpa chyhsa cha pachârôh tuna ta a vaosao pathlei aw na.

8 Chatanachata ano lâta nama kyhpachâna cha pa-i awpata ei châ haw ei.

9 He vâna chhao heta ei roh, kyh to liata rei namâ ngiah nata ngiah leipa ei cha pasia theina awpa ei ta.

10 Khâpa kyh liata rai chyhsa namâ ngiahthaipa maih kei chhaota a ngiahthai hra na ta. Kei chhaota ei ngiahthai chiehpa cha, khâparai ei ngiahthai haw khiahtala, nâmo vâta Krista hmiakô liana chata ei ngiahthai,

11 chata leipata cha Sâtâ ta eima chôta bie a hnei pathlei aw na; ano tao a chhuahpa cha pahno leipata y tlôh lei khâh pi ta.

Trôsa liata Pawla tymâna

12 Krista Thâtihpha chho awpata Trôsa khih ei tlô nona khata. Abeipa liana chata ochhi eina vaw pahypa tarawpata;

13 ei unawhpa Titu cha ei hmô leipa vâta ei thlahpa liana chata thlahlôna rai hnei leipa na ta. Chatanachata âmo cha reikah phapata a chhaih na ta, pua na ta, Masidônia râh lâ si ha na ta.

Krista liata tiahna

14 Châhrasala Krista liata pahniena ta khâ maniah a chhituhpa nata keimo hmâpata su to liata ano pahnona roh a patheisatuhpa Khazohpa lâna chata alynabie y mawh sy.

15 Pachha haipazy liata nata leidia haipazy liana chata Khazohpa chata Krista rohpahâhpa châ tlôh pi ta,

16 hlao khazy châna chata thina tawhtapa thina roh châ pi ta, hlao khazy châna chata hrona tawhtapa hrona roh châ pi ta, chazy hawhpa châna chata ahy a daih thei aw?

17 Chyhsa hluhpi ta Khazohpa bie he, chyhsazy dôpata sôhry nawpata ama hmâpa hawhta keimo tala hmâh tlôh lei khâh pi ta; hmeiseipata Khazohpa tuapata, Khazohpa mohmô ta Krista liana chata bie eima reih tyh.

2 Kawrini Mozy (2 Corinthians)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10	Bo 11	Bo 12	Bo 13

2 Kawrini Mozy 3

Biehrai thiehpa chakaotuhpazy

1 Keimosasy ta a reipaphana eimâ thao heih aw mâ? Châ vei khiahtala nama hnohta pie awpa tlyma, nâmo tawhtapa tlyma; reipaphana cha, chyhsa thokha châta a byuhpa hawhta keimo châta a byuh hra aw ma? Nâmo he eima châ eima pathipalôh liata ropa, chyhsa zydua pahnopa nata reipa cha nama châ na;

3 Krista cha keimo maniah a parosapa châti ta ropa a châ leipa, Khazohpa hropa Thlahpa ta tlao ropa, lôphiapa liata ropa châ leipa, sapa pathipalôh phiapa liata tlao ropa nama châ tahpa a siapata paluahsapa châ tlôh ta.

4 Khazohpa lâta cha hawhpa ngiapâna cha Krista zawhzi ta eima hnei.

5 Khâparai keimo tawhta a puapata rao awpata keimo deitata eima tlô tah leipa pi ta; eima tlô theina cha Khazohpa tawhtapa tlao a châ,

6 ano chata biehrai thiehpa chakaotuhpatazy maniah patlôsa ta, a châ bie dei chakaotuhpatazy châ leipata, a Thlahpa chakaotuhpatazy tlao a châ; ryhpa bie châta thi tyh tlôh ta, Thlahpa deikua chata a pahro tyh.

7 Ryhpa piepa cha alô liata ropa a châ. A chhâna chhao cha thina a châ. Cha hmahta rônah ngâsâ ta, Mawsi hmia chhao Izarel sawzy ta ama moh ngâh leipa kha, châhrasala cha cha a dia lymâ.

8 Cha khiah Thlahpa chakaona chhochhi cha kha tluta rônahpa e a châ aw?

9 Thai lei pachâsana chakaona hmahta arônah khiahtala, siana chakaona cha a rônah via syulyu aw.

10 “Parônahsapata a y hawpa chata, he lâna heta cha rônahna rai hnei khao tlôh lei khâh ta, rônahna tha viapa chata a khopa vâta.

11 A dia via ngâpa hmahta rônahpata a châ khiahta cha, a y thlâh ha awpa cha rônahpata pahlypata a y via syulyu awpa a châ.

12 Cha hawhpa hnabeiseina eima hneipa vâta, riahphapata eima reih tyh.

13 Mawsi hawhna khata châ vei, ano chata dia lymâpata a chhâna cha Izarel sawzy chata ama moh thlâh ha lei nawpata a a hmia cha hmia khuna ta khu ta.

14 Ama palôhrupa deikua cha kuh pachhasapata tlao y ta; atanoh taih chhao heta, biehrai parohpa cha ama reih nata khuna tyhpa cha pahy leipata y thlâh ha tlôh ta, cha khuna cha Krista liana chata pahleipata y haw ta.

15 Châhrasala atanoh taihna heta Mawsi châbu ama reina maihta ama pathipalôh liana chata khuna a y lymâ;

16 châhrasala ama pathipalôh cha Abeipa lâta a heina maihta khuna cha lapa a châ ha aw.

17 Abeipa cha Thlahpa châ ta, Abeipa Thlahpa yna maih liana chata khotalaina a y tyh.

18 Chatanachata keimo cha eima zydua ta hmia khu leipata, thlalâ hawhta Abeipa rônahna khai pahliepata rônahna hawhta rônah lymâpata, cha lyupa tlaita y awpata pananopata eima y tyh; Abeipa Thlahpa tawhtapa cha eima hmôpa lymâ hawhta.

2 Kawrini Mozy (2 Corinthians)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10	Bo 11	Bo 12	Bo 13

2 Kawrini Mozy 4

Alei hmobaoh liata ryu

1 Chavâta ngiachhiena eima hmôpa lymâ hawhta he chakaona he eima hneipa vâta panao leipa pi ta.

2 Hmo nozachhihpa a nyupazy cha tlao pahlei pi ta; dôpakheina bie hmâh leipa pi ta, Khazohpa bie chyhsa dô nawpata hmâh hra ma pi, bie hmeiseihpa pahnosapata Khazohpa mohmô ta chyhsa to ngiaryhna ryh leina moh a patlohsapata eima y tyh.

3 Châhrasala eima Thâtihpha he khupata a y khiahtala, leidia haipazy liana heta khupata a y.

4 Krista Khazohpa lyupa a rônahzie Thâtihpha khaihpa chata âmo a khaih pahlie thei lei nawpata, chazy liana chata he khizaw khazoh heta ngiapâ leipazy palôhrupa mo pachao haw ta.

5 Keimo bie chho tlôh lei khâh pi ta. Krista Zisu cha Abeipa a châpa tlao chho tyh pi ta, keimo chhao Zisu vâta nama sei eima châpa eima chho tyh hra.

6 Zisu Krista hmia liana chata Khazohpa rônahzie pahnona khaihpa cha maniah a pie awpata, “Zohna tawhta khaihna a khai aw,” a tahtuhpa Khazohpa chata eima pathipalôhzy he khaipahlie haw tlôh ta.

7 Châhrasala hmotaothei ngaitanazie cha keimo tawhtapa châ leipata, Khazohpa eih a châ thei awpata cha ryu cha alei hmobaozy liata eimâ vao.

8 Hiakha lâta, hiakha lâta cha-iepata y pi ta, châhrasala eima hu po tlôh va; nôpopata y pi ta, châhrasala eima hnabei dy tlôh va;

9 taolapata y pi ta, châhrasala siesaipata y tlôh pi va; chheipata y pi ta, châhrasala pahleipadiapata y tlôh pi va;

10 eima pôhpa liana heta khati no raita Zisu thina cha phaoh lymâ tyh pi ta, Zisu hrona chhao eima pôhpa liana heta a luah thei nawpata.

11 Keimo ahrohpazy pi he Zisu vâta thi awpata patusapata y tyh pi ta, Zisu hrona chhao eima sapa thi theipa liana heta a luah thei nawpata.

12 Chatanachata keimo liana heta thina ta hria tyh ta, nâmo liata deikua cha hrona ta tlao a hria tyh.

13 Anodeikuacha, “Angiapâ na ta, chavâta bie ei reih,” tahpata Khazohpa châ ropa hawhna khata, cha ngiapâna palôhrupa tlai phaohpata keimo chhaota angiapâ hra pi ta, chavâta bie reih hra pi ta,

14 Abeipa Zisu a pathyutuhpa chata keimo chhao Zisu hnohta maniah pathyu hra aw ta, nâmo nata maniah a paduasa aw tahpa pahno tlôh pi ta.

15 Ato nâmo phana awpa châ tlôh ta, ngiachhiena cha chyhsa hluhpi zawhzi ta papôhsapata ypata, Khazohpa rônah nawpata alynabie thata a pareisa thei nawpata.

Ngiapâna ta hrona

16 Cha vâna chata panao leipa pi ta. Eima khôtho lâ chyhsapa he rao lymâpata y hra sala, eima chhôh lâ chyhsapa cha nohcharei tao pathi lymâpata tlao a châ.

17 Eima rietheina ahuana cha movi hlâ likawh deitata y awpa heta, rônah ngaitapa chhâzaw châta maniah a chhuahnoh rilipa a châ,

18 hmo hmô theipazy he moh leipata, hmo hmô thei leipazy cha tlao moh tlôh pi ta; hmo hmô theipazy he bohpi leipa châta châ ta, hmo hmô thei leipazy deikua cha chhâzaw châta châ tlôh ta.

2 Kawrini Mozy (2 Corinthians)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10	Bo 11	Bo 12	Bo 13

2 Kawrini Mozy 5

1 Eima pahrâna alei byureih o he phiepa châ hrasala, avâ liata o ku ta sa leipa, chhâzaw ta a y awpa, Khazohpa tawhtapa o a ipa cha eima hnei tahpa pahno tlôh pi ta.

2 Avâ tawhtapa eima pahrâna awpa a bupa byuh ngaitapata, he o liana heta a rôh tyh tlôh pi ta.

3 Cha hawhta a bupata y ei sih la, thluahruapata y aw ma pi.

4 Keimo, he pahrâna liata a ypazy pi he phaohripata a rôh tlôh pi ta; a bu leipata ypa eima khohpa vâta châ leipata, a bupata ypa eima khohpa vâta tlao a châ, thi theipa he hrona palâ khaipata a y thei nawpata.

5 He châna tlai heta maniah a chhuahnohtuhpa cha Khazohpa a châ, bietaina Thlahpa maniah a pietuhpa kha.

6 Chatanachata pôhpa o liata eima y chhôhta Abeipa liata eima y leipa pahnopata khati no raita riahpha ngaitapata eima y tyh,

7 hmô theipata sie leipata, ngiapâna ta tlao sie tlôh pi ta.

8 Riahpha ngaitapata eima y, ei tah, pôhpa liata y leipata, Abeipa liata ypa tlao eima khoh via.

9 Chavâta y ei sihla, y vei ei sihla, ano aly viapa châ eimâ chhuah tyhpa a châ.

10 Chyhsa tota pôhpa liata hmotaopazy a chhiepa khiahta, a phapa khiahta eima taopa lymâ hawhta eima hmô chyu thei nawpata Krista ryureina dyuchhai hmiakô liata paluahsapata eima y khai awpa châ tlôh ta.

Aryhna raihria

11 Chavâta Abeipa china cha pahnopata chyhsazy cha reipasao tyh pi ta; Khazohpa lâ deikua cha paluahsapata y pi ta, nâmo ngiaryhna ryh leina liata chhao paluahsapata eima ypa ei hnabei a sei.

12 Nâmo lâta eima reipapha heihpa châ leipata, pathipalôh lâ châ leipata, a chôpho dei a palaikheituhpazy cha achhyna awpa nama hnei thei nawpata keimo lâta apalaikhei chhâpa nama hnei thei nawpata tlao eima reih.

13 Eima hru khiahta Khazohpa châta châ ta; eima so khiahta nâmo châta châ tlôh ta.

14 Krista kyhpachâna chata eima chôta bie hnei ta, chyhsa zydua thi vyuhpata mo pakha a thi tahpa atahmâ eima pahnopasiapa vâta; chavâta chyhsa zydua cha ama thi.

15 Chatawhcha ahrohpazy cha âmo châta hroh khao leipata ama thi vyuhpata a thipa a thyuheihpa châna chata tlao ama hroh nawpata a châ. Chyhsa zydua vyuhpata a thi.

16 Chavâta atahmâ tawhna heta, keimo cha sapa lâna chata ahyhmah pahno khao aw ma pi, sapa lâta Krista cha vaw pahno haw hra ei sihla, atahmâ cha pahno heih khao ma pi.

17 Chavâta ahyrai Krista liata a ypa chata hmo tao thiehpa vaw châ ta; hmo parohpazy cha lei haw ta, pachâ teh u, a thiehpa a vaw châ haw.

18 Ato Khazohpa tawhta a puapa châ ta, ano chata Krista vâta ano nata a ryhpata maniah tao ta, a ryhna chakaona raihria maniah pie ta;

19 kha hawhta Khazohpa ta Krista liana chata khizaw he ano nata a ryhpata tao ta, ama paraonazy cha paraona ta rao leipata, aryhna bie maniah a pavaosapa kha.

20 Chatanachata Krista vyuhpata lyuhchâpa châ pi ta, Khazohpa ta keimo maniah hmâpata a châ haw chaimâh ei tah theipa a châ. Khazohpa nata a ryhpata y teh u tahpata Krista vyuhpata eimâ châ haw.

21 Ano liana chata Khazohpa siana eima châ thei nawpata moleina rai a pahno leipa cha Khazohpa ta keimo vâta moleipa hawhta tao ta.

2 Kawrini Mozy (2 Corinthians)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10	Bo 11	Bo 12	Bo 13

2 Kawrini Mozy 6

1 Khazohpa ngiachhiena nama hmôpa cha phahnaikheipata ano hrialâhpa nama châ nawpata ei châ haw ei.

2 Khazohpa ta, “Daihti rypaohpa liata cha nahthlie na ta. pachhana noh liata ei cha bao.” tah tlôh ta. Atahmâ he daihti rypaohpa cha châ ta; atahmâ he pachhana noh cha a châ.

3 Eima chakaona raihria he seipata a y lei nawpata, khâpa kyh liata hmah paona awpa rai tao leipa pi ta.

4 Khazohpa chakaotuhpazy hawhta ato liata chyhsa modypata tlao eima y tyh. Thata pasa taona liata zy, rietheina liata zy, aruna kyh liata zy, vâchhiena liata zy,

5 chheina liata zy, lô-o patâhna liata zy, tymâna liata zy, hriapasana liata zy, mokuhsaihna liata zy, pati nie leina liata zy,

6 pathaihna liata zy, nôphana liata zy, ngiachhiena liata zy, Thlahpa Pathaihpa liata zy, kyhpachâna hmeiseihpa liata zy,

7 hmeiseihna kyh liata zy, Khazohpa hmotaotheina liata zy; chachâh lâ nata chavei lâta siana chaihraihzy ta;

8 rônahna nata nozana ta moh reipachhiepa nata moh reipaphapata. A dôtuhpa hawhta chyhsa dôpa châ tlôhpata;

9 chyhsa pahno khi leipa hawhta, moh pathâh kaw tlôhpata; thi daihmâpa hawhta, pachâ teh u, hroh tlôh pi ta; hriepa hawhta, thi tlôh leipata;

10 pachârôhpa hawhta, châhrasala aly kaw tlôhpata; sipasapa hawhta, châhrasala chyhsa hluhpi pahneirôhsa tlôh pi ta; khâpahmah hnei leipa hawhta, châhrasala ato hnei tlôhpata.

11 Hy Kawrini mozy saih u, nama hnohta eima pakah â aw pi ta; eima pathipalôh a kawh haw.

12 Cha pakhâpa leipa pi ta, nâmo pathipalôh liata pakhâpata tlao nama y.

13 Chatanachata nama palôhzy pahypata eima palôh hawhta phaoh hra teh u. Sawzy lâta reipa hawhta ei reih hih.

Khazohpa hropa achhyna-o

14 Ngiapâ leipazy nata a pazao khah u. Siana nata moleina ta khâpa a hlyna ama hnei? A châ vei khiahtala, zohna nata khaihna ta khâpa a kaona ama hnei?

15 Ahripa nata Krista chhaota khâpa aryhna ama hnei? A châ vei khiahtala, ngiapâ leipa nata ngiapâtuhpa chata khâpa to khohpa ama hnei?

16 Khazoh nohthlahpazy nata Khazohpa achhyna-o chhaota khâpa aryhna ama hnei? Keimo cha Khazohpa hrohpa achhyna-o châ tlôh pi; Khazohpa ta, “Âmo liata y aw na ta, âmo liata ei charei hra aw, ama Khazohpa châ aw na ta. âmo chhao ei chyhsazy ama châ aw. a tahpa hawhna kha ta.

17 Chavâta ama hry tawhta vaw pua ula, â nano ta y teh u, Abeipa ta a tah, hmo pathaih leipa rai hria khah u; chatanachata châ ly aw ei na ta.

18 nama châta paw châ aw na ta. nâmo chhao ei châta sawchapawzy nata sawchanôzy nama châ aw, Abeipa Atotaotheipa chata a tah,”tah ta.

2 Kawrini Mozy (2 Corinthians)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10	Bo 11	Bo 12	Bo 13

2 Kawrini Mozy 7

1 Chatanachata kho ngaitapa saih u, cha bietaipazy cha eima hneipa vâta, sapa nata thlahpa puana zydua liata a pathai ei suh u. Khazohpa china chôta pathaihna pakipata.

Awnanopa rona vâta Pawla thaphana

2 Nama pathipalôh maniah pahypa teh u; ahy chô liata hmah hmo parao leipa pi ta, ahyhmah parao leipa pi ta, ahyhmah pakhâpadie ma pi.

3 Cha cha thai lei cha pachâsa awpata ei tahpa châ leipata, thi mawh la thi khohpata, hroh mawh la hroh khoh awpata, eima pathipalôh liana heta eima cha vao tahpa a tliana khata ei reipa kha.

4 Nâmo lâna chata ei rei ngânazie he thata châ ta; ei châ palaikheizie ei he thata a châ; thlahlôhna ta bie na ta. Eima rietheina zydua liana chata thaphapata khô pathlah na ta.

5 Masidônia râh eima tlô nona chhao khata eima sapa ta thlahlôhna rai hnei hlei leipa ta hiakha lâ hiakha lâna chata riepatheipata tlao y pi ta, khôtho lâta atunazy y ta, a chhôh lâta chinazy y ta.

6 Châhrasala hnabeidypazy thlahpalôhtuhpa Khazohpa chata, Titu â vy nah chata eima thlah maniah palôh haw ta,

7 a vyna dei châ leipata, nama ngiachhiezie zy, nama chanazie zy, ei chôta nama phahnai khonazie zy maniah a chho nahta nâmo liata thlahlôhna chhao chata eima thlah maniah a palôh. Chatanachata ei ly pachai.

8 Ei châ paphaopa khata nama pachâ cha parôhsa hra ei sala, angiapachhi khao va na, a thao tua nona deikua kha ei ngiapachhi, kha châ paphaopa khata nama pachâ a cha parôhsa ei tahpa ei pahnopa vâta, châhrasala bohpi leipa deita a châ.

9 Atahmâ cha ei ly. Pachâ parôhpata nama ypa vâta châ leipata, rona awpata nama pachâ a rôhpa vâta tlao a châ; keimo vâta khâpahmah nama ky lei nawpata Khazohpa khopa hawhta pachâ parôhpata y tlôh eichi ta.

10 Khazohpa khopa hawhta pachârôhna chata rona tao ta, cha chata pachhana a tlôkhei, a ngiapachhipa châ vei, khizaw pachârôhna deikua chata thina tlao a tao tyh.

11 Khazohpa khopa hawhta pachâ parôhpata nama ypa tlai cha pachâ teh u; cha chata a chadona zy, a reithaina zy, pathi-iana zy, china zy, ngiachhiena zy, phahnai khona zy, phulana zy nâmo liata a tao ngaita dia! Ato liata chazy kyh liana chata nama pathaih tahpa nâmosasy ta a paluahsa haw eichi ta.

12 Chatanachata nama hnohta roh hra aw sala, a moleina a taotuhpa vâna khata roh leipa na ta, a moleina pasa a taotuhpa vâna khata roh hra leipa na ta, ei chôta nama phahnai khohzie Khazohpa mohmô ta nâmo liata pahnosapata a y thei nawpata tlao ei roh.

13 Chavâta thlahlôhpata y thlâh ha pi ta. Keimo thlahlôhna dei leipa chhaota, Titu alyna vâta aly pachaih pi ta, nâmo zydua ta a palôhrupa nama pahra hawpa vâta.

14 A hnohta khâpa kyh liata rai nâmo châ palaikhei hra aw ei sala, maohphyu tlôh lei khâh na ta; maophyupa cha rei leipata ato nama hnohta bie hmeiseihpata eima reih tyhpa hawhna khata. Titu hmiakô liata ei palaikheipa bie hmeiseihpa vaw châ haw tlai ta.

15 Chatawhcha nama zydua ta a bie namâ ngiahzie zy, china nata a chalyuna chôta ano namâ lyziezy cha pahno thlâh hapata a pathipalôh cha nâmo liata thata a y.

16 Kyh to rai liata nama chôta ei thlah a lôhpa vâta ei ly.

2 Kawrini Mozy (2 Corinthians)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10	Bo 11	Bo 12	Bo 13

2 Kawrini Mozy 8

Pasaina chôta hmopiepa

1 Unawh saih u, Masidônia râh liata awnanopa sahlaozy hryta, Khazohpa ngiachhiena piepa cha eima cha pahnosa aw.

2 Rietheina hluhpi ta pasiapata ama ypa chhaota aly ei ta, ama thaphana a khô pathla, riethei kaw hra ei sala pasaih ngâsâpata ama thyu hluh zie kha.

3 Khazohpa chyhsazy chakaopata a hlao hrapa cha thata maniah hiapata,

4 ama hneina khôlâ taihta a pasai ngaita ei ta, ama pasaina hawh tlaita ama pie tahpa eima cha pahnosa hih,

5 cha chhao cha eima pangiasa leipa hawhta tao ei ta, Khazohpa khopata âmo tlai Abeipa lâta nata keimo lâta âmosasy ta a pie tua ei ta.

6 Chatanachata eikhanota a vaw tao pathao hawpa vâna khata, he ngiachhiena chhao he nâmo liata tao khaipa awpata Titu cha a haw pi ta.

7 Chatanachata ato, ngiapâna zy, bie rei thaina zy, pahnona zy, phahnai khona zydua zy, kyh maniah nama pachâna zy thata nama hneipa hawhna heta, cha ngiachhiena chhao cha nama hnei pachai thei nawpata tiama papua teh u.

8 Biepiepa lâta reih leipa na ta, mo hropa phahnai khona ta nama kyhpachâna hmeiseihzie chhao cha pasia awpata tlao ei reih.

9 Eima Beipa Zisu Krista ngiachhiena cha, a sipasana vâta nama hneirôh thei nawpata, hneirôh hrasala nâmo vâ tlaita sipasapata a y hawpa kha pahno tlôh eichi ta.

10 Cha liana chata ei pachânazie hawhta ei reih: cha cha nama châta pha tlôh ta, kô kha a châ haw, a pathao tuatuhpazy châ eichi ta, nama pathaopa dei chhao châ leipata, a khô chhao khô pathao haw hra eichi ta,

11 chatanachata khô awpata a pasaipa hawhna khata, nama hneipa lymâ hawhta patlôna chhao a y thei nawpata, atahmâ la patlô bâ teh u

12 A pasaina cha a y khiahta cha chyhsa ta a hnei leipa châ leipata, a hneipa lymâ hawhta a piepa cha aly tlâh châ tlôh ta.

13 Mo hropa hriapasa leipata nâmo nama hriapasa nawpata ei tahpa châ leipata,

14 a paraopahâh nawpata nama hnei laikhôpa cha, atahmâhlâ heta amâ phahlapa pazaona vaw châpata ama hnei laikhôpa chhao, namâ phahlapa pazaona a vaw châ thei nawpata tlao ei tah. Chatanachata a raohâhna a vaw y thei aw.

15 A hluhpi a huahpa chata a laipa hnei leipata, a chyh via a huahpa chata a phahla hlei vei,” tahpa ropa hawhna khata.

Titu nata a viasazy

16 Châhrasala nama chôta ei phahnai khona hawhta Titu pathipalôh liata a pietuhpa Khazohpa lâna chata alynabie y mawh sy.

17 Ano chata eimâ hawna cha a pyh ta, châhrasala eimâ hawpa vâta dei châ leipata, ano tlai cha phahnai khoh ngaitapa châ ta, ano reisai ta nâmo lâ a vy awpata a pua aw.

18 Ano hnohta unawhpa tuah hra aw pi ta, ano cha Thâtihpha kyh liata ama reithaina kyh awnanopa sahlao zydua liata pathâh ta;

19 cha dei chhao châ leipata, Abeipa rônahna awpa nata eima khonazie pamosa awpata, eima chakaopa he ngiachhiena kyh liana heta eima hnohta khih chahryh hra awpata awnanopa sahlaozy rao hrapa rai châ ta.

20 Eima chakaopa he hmopiepa kyh liana heta ahyhmah ta maniah ama sei lei nawpata a chado pi ta,

21 Abeipa pachânazie liata dei châ leipata, chyhsa pachânazie lia chhaota hmo zachhihpa eima pachâ chhielie tyh.

22 Chatawhcha ama hnohta eima unawhpa pasiesa hra aw pi ta, ano cha kyh hluhpi liata phahnai khoh ngaitapa a châpa ei hluhpi pasia haw pi ta, atahmâ chhochhi cha a cha ngâ ngaitapa vâ eita phahnai a khoh pachai.

23 Titu he cha ei viasa nata nâmo lâta ei hrialâhpa châ ta; eima unawhpazy he cha awnanopa sahlaozy tuapa Krista rônahna ama châ.

24 Cha vâna chata a kyh nama pachâ tahpa pahnona nata eima châ palaikheina pahnona cha awnanopa sahlaozy hmiakô liana chata ama hnohta paluahsa teh u.

2 Kawrini Mozy (2 Corinthians)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10	Bo 11	Bo 12	Bo 13

2 Kawrini Mozy 9

Mopathaihpazy châta hmohlâna

1 Mopathaihpazy châta chakaona kyh cha nâmo lâta ei roh awpa byuh vei,

2 namâ pasaizie cha pahno tlôh na ta, cha kyh liana chata kô kha a châ haw, Akaia râh cha pasaipata ama y haw tahpata, Masidônia râh liata chyhsa lâta cha palaikhei tyh ei na ta; chatanachata nama phahnai khona chata ama hryta chyhsa hluhpi pahra haw ta.

3 Châhrasala cha kyh liana chata ei châ palaikheina cha khâpahrao leipa a châ lei nawpata unawhzy he pasisa aw na ta, ei reipa hawh tlaita a chhuahnohpata nama vaw y thei nawpata;

4 chata leipata cha Masidônia râh liata chyhsa ahyzy tlyma na vaw zi pathleipata, a chhuahnoh leipata ama cha vaw hmô khiahta cha, keimo (nâmo cha tah ma pi) he eima cha ngâna kyh liana heta eima maophyu pathlei aw na.

5 Chavâta unawhzy he nâmo lâ a vy tuapata pasaih ngaitapata hmopiepa namâ taih chhieliepa kha vaw tao chhielie awpata a haw awpa a byuhpata ei pangiasa, cha tlai cha chhupa hawhta châ leipata pasai ngaitapata piepa hawhta amâ chiehpata a vaw y thei nawpata.

6 He he cha kyh cha a châ: a chyhta a hiepa chata a chyhta hria hra aw ta, a hluhpi a hiepa chata a hluhpi a hria hra aw.

7 Chyhsa tota pasaih leina chôta pie leipata, pie lei thei lei awpa hawhta pachâpata pie hra leipata, ama pathipalôh ta amâ chhuahpa lymâ hawhta pie chyu mawh sy. Khazohpa chata aly ngaitapata a pietuhpa kyh a pachâ.

8 Chatawhcha ngiachhiena to nama chô liata a vaohei thei, chatanachata nâmo ta ato liata a daihpata khâ hneipata, raihria phapa to châta nama hnei thei aw.

9 Khazohpa châ bie ta, “Hiepatla ta, sipasapazy hnohta pie ta; a siana cha chhâzaw ta a y thlâh haw,” a tahpa hawhna khata.

10 Chatawhcha riahphana to keimo vâta Khazohpa lâta alynabie reina a taotuhpa cha hnei awpata, ato liata pahneirôhsapata ypata a hietuhpa hnohta chi a pietuhpa nata niepa chata viahchhâ a pietuhpa chata

11 nama hie awpa chi cha, cha piepata, cha papôhsa pa aw ei ta, nama siana patheipazy cha a papôhsa hra aw.

12 He deichhyna chakaona heta mopathaihpazy phahlanazy cha a pazaopa dei châ leipata, Khazohpa lâta alynabie reina a hluhpi lâta châpata a khô hra;

13 he chakaona heta a cha pasiana vâta Krista Thâtihpha lâta nama bie zyhpa namâ ngiahnazie vâta nata âmo châta nata chyhsa zydua châta thyuna liata nama riaphanazie vâna heta Khazohpa ama parônahsa tyh mâ tâh.

14 Âmo tlai chhaota nama chôta Khazohpa ngiachhiena rônah ngaitapa vâta nama châta thlahchhâna chôta cha vâ ngaita ei ta.

15 A hmosaipiepa reitiah leipa vâta Khazohpa lâta alynabie y mawh sy!

2 Kawrini Mozy (2 Corinthians)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10	Bo 11	Bo 12	Bo 13

2 Kawrini Mozy 10

Chakaona rai liata Pawla thaichâna

1 Kei Pawla, nama hryta nama mohmô ta a reisi ngaitapata ypa ta, nama hnohta y khao leipata nata nâmo lâ riahpha ngaitapata a y tyhpa tlai heta, Krista nôphana nata nônaina ta ei châ haw ei!

2 Nama hnohta ei y tita thokha sapa hawhta a ypata na raopazy chô liata riahpha ngaitapata y awpa ei chhuah ngâna hawhna heta, nâmo lâ ei riah a pha leina awpata ei châ haw ei.

3 Sapa liata y hra ei sihla, sapa adyuhpa hawhta adyu leipa pi ta,

4 keimo chariah chaihraizy cha sapa liatahpa châ tlôh leipata, kuh a i ngaitapazy parao nawpata Khazohpa zawhzi ta hmotaothei ngaitapa tlao a châ.

5 Einahzy nata pachâna sâhpa to rai Khazohpa pahnona pakhâ awpata a sâh ngaitapata taopazy cha paraopata, pachâna to rai Krista rei ngiahna sei ta a chhih pi ta,

6 nama rei ngiahna a paki tita cha, rei ngiah leina zydua phuh la awpata amâ chiehpata y pi ta.

7 Nama mohmô liata hmo a ypazy cha moh teh u. Ahyrai ta Krista eih a châpata a pangiasa khiahtala, he he âmo ta pachâ heih mawh sy, ano cha Krista eih a châpa hawh hra ta, keimo chhao eima châ hra hih.

8 Eima biehneina nâmo parao nawpata châ leipata, nâmo tlao tao pathi nawpata Abeipa ta maniah a piepa he a palaikhei ngaita hra ei sihla, maophyu tlôh lei khâh aw pi ta.

9 Ei châ paphaopazy chata cha pachisa a chhuahpa hawhta ei lâ lei nawpata cha cha ei tah.

10 “‘A châ paphaopazy cha pasapata, hmotaothei ta, a pôhpa deikua cha chieh-leipa châ ta, a reikah chhao khâpahma châ vei,” tah tlôh ei ta.

11 Cha hawhpa chyhsa chata he he pachâ mawh sy, nama hnohta ei y vei nota châ paphaopa bie liata eima ypa hawhta nama hnohta eima y tita chhao, hmotaopa liata eima y hra aw.

12 Thokha âmo a rei paphapazy hry liana chata a rei pâ ngâh leipa pi ta, âmo nata a pakho ngâh hra ma pi. Anodeikuacha âmo cha âmo nata âmo athliepata, âmo nata âmo apakhopata palôhrupa hnei leipata ama y.

13 Keimo deikua cha eimâ thliena hlei khôpa cha a palai leipa aw pi ta, Khazohpa ta râhri maniah patosa ta, cha thliena lymâ hawhta tlao eimâ palai aw, nâmo chhao a cha vaopa awpata.

14 A vao pha lei awpa eima châ vaopa hawhta a kawh tupata pahly tlôh pi va; Krista Thâtihpha chhopata nama khih taih tlai chhaota eimâ vypa kha.

15 Eimâ phana rakha khô lâtahpa mo hropa hriapasapazy cha a palaikhei leipa pi ta; namâ ngiapâna a laiseihnazie lymâ hawhta eimâ vaona rakha hawhpa liata nama hry liata thata pakawhpata eima y aw tahpa hnabeiseina tlao hnei pi ta.

16 hria chiehpa kyh liana chata mo hropa a vaopa a palaikhei leipata, nama khô lâ râh taih chhaota Thâtihpha eima chho thei nawpata.

17 Châhrasala, “A palaipa maihta Abeipa cha a palaikhei mawh sy.”

18 Âmosasy ta a reipaphapa chata reithaina hlao tlôh lei khâh ta, Abeipa ta a reipaphapa chata reithaina tlao a hlao.

2 Kawrini Mozy (2 Corinthians)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10	Bo 11	Bo 12	Bo 13

2 Kawrini Mozy 11

Pawla nata lyuhchâpa pakheipazy

1 Eima hruna kyh liana heta nâmo ta einâ chhy thai awpa eichi ei kho kaw dia. Achhy chhao einâ chhy thai kaw tlai eichi!

2 Khazohpa hiatliana ta ei hia ei cha tlia ei, Krista lâna chata laihsakôpa hawhta ei cha pie thei nawpa ei ta, vahpa pakha châta châ pahawh tlôh ei na ta.

3 Châhrasala parih chata a dôpakheina ta Ivy a dôpa hawhna khata Krista lâta hmeiseihna nata pathaihna tawhtapa cha, nama palôhrupa cha khâpahrao leipata a pachâsa pathlei aw na tahpa eichi na.

4 Chyhsa ta a vy sala Zisu hrohpa a bie eima chho beih leipa chho pata, thlahpa nanopa nama to beih leipa nata thâtihpha nanopa namâ ly beih leipa cha, a cha chho khiah ei tala a naota ta namâ pyh aw!

5 Cha apôstôl laichaipazy cha khâpa kyh liata hmah a tlu leipata a pangiasa va na.

6 Biereina liata cha reih hmâh thai vei hra sala, pahnona liana chata cha hawhpa châ va na; ato liata chyhsa zydua hry liata nâmo lâta eima paluahsapa kha.

7 Cha vei khiahtala, Khazohpa Thâtihpha a saipata chho na ta, pasâhsapata nama y thei nawpata keisasy ta ei pahnaipa khata hmo ei parao ma?

8 Nâmo ei cha chakao thei nawpata âmo tawhta hlao lapata awnanopa hlao hropazy paru pa na ta.

9 Chatawhcha nama hnohta y na ta, ei phahla nona khata, ahyhmah ama rie pathei leipa na ta, unawhzy cha Masidônia râh tawhta amâ vy nahta ei phahlana cha na vaw pazao pa tlôh ei ta. Ato liata nâmo rie pathei leipata keisasy ta ei taopa kha, kha hawhna khata keisasy ta ei tao lymâ aw.

10 Krista bie hmeiseihpa keima liata a ypa hawhna heta. Akaia râh lâta he ei palaikheina he ahyhma ta na padiapa aw veih ei.

11 Khâpa vâta e? Nâma kyh ei pachâ leipa vâta ma? Khazohpa ta a pahno!

12 Châhrasala amâ palaikheina liana chata keimo ypa hawhna heta ama vaw y thei nawpata, keimo hâ maniah a lapazy tawhtapa rypaohna cha ei parao thei nawpata, ei tao tyhpa he ei tao lymâ aw.

13 Chyhsa cha hawhpazy cha Krista apôstôlzy ta âmosasy ta ataopata apôstôl pakheipazy raihriatuhpa dô a hmâhpazy châ tlôh ei ta.

14 Cha cha noâhchhihpa châ vei, Sâtâ tlai chhao khaihna vâlyuhchâpa ta anosasy ta a tao tyh tlôh ta.

15 Chavâta a chakaotuhpazy chhao cha, siana chakaotuhpa ta âmosasy ta atao hra ei sala, hmonoâhchhihpa châ vei. Cha sahlao chhâna cha ama hmotaopa lymâ hawhta a châ aw.

Pawla Apôstâl châna liata pasataopazy

16 Ei rei heih aw, ahyhma ta ahrupata na rao khah ei se; châhrasala raopata a châ khiahtala, kei chhaota a chyhta chhâta ei palaikhei thei nawpata ahrupa hawhta na chhy thai teh u.

17 Ei reipa he Abeipa bie ta reih leipa na ta, ei palaikheipa ngiapâna heta ahrupa hawh tlaita tlao ei reih.

18 Chyhsa hluhpi ta sapa hawhta amâ palaikheipa vâta, kei chhaota ei palaikhei hra aw.

19 Nâmo cha chyhsa sopa nama châpa vâta. ahrupazy cha palôh phapatata chhy thai tlôh eichi ta!

20 Chyhsa ta sei ta cha tao ei sala, cha nie khai ei sala. sei ta cha patu ei sala, âmo a palyupalih ei sala, nama hmia liata cha chabaih ei sala, chhyh thlâh ha tyh tlôh eichi ta.

21 Eima tha a tlô khao leipa hawhta a pasipata ei reih. Châhrasala ahyrai ta khâpa kyh liata rai ama ngâpa maih, (hru kawpata reih aw sala) kei chhaota ei ngâ.

22 Hebrai mozy ama châ ma? Kei chhao ei châ. Izarel mozy ama châ ma? Kei chhao ei châ. Abaraha pathlazy ama châ ma? Kei chhao ei châ.

23 Krista chakaotuhpazy ama châ ma? (ahrupa hawhta reih aw sala) tlao ei cha via, hriapasanazy liata tha via syulyu ta, atâhna-o liata patâhnazy liata tha via syulyu ta, chheinazy liata a hlei khôpata thinazy liata ei hluhpi.

24 Zuzy liata chheina ei khata ei sypalih a tloh leipa ei pangawh a tyh na ta.

25 Ei thôh sôsi ta chheipata y na ta; ei kha alô ta vawpata y na ta, Ei thôh balyh raona a tyh na ta; zâ kha nata noh kha tilaipi liata y na ta;

26 khih chahryna liata zy ei hluhpi. chavahzy tawhta chichhihpa liata zy, phihmâhpazy tawhta chichhihpa liata zy, ei chiheihzy tawhta chichhihpa liata zy, Zenitaizy tawhta chichhihpa liata zy, khihpi liata chichhihpa liata zy, râhpathopa liata chichhihpa liata zy, tilaipi liata chichhihpa liata zy, unawh pakheipazy hryta chichhihpa liata zy;

27 rietheina nata hriapasana liata zy, mokusaihna liata zy ei hluhpi, nodina nata dâhphina liata zy, nie leipata yna liata zy ei hluhpi, chasina nata thluahruapata yna liata zy,

28 Chatawhcha ei rei leipazy chhao cha, awnanopa hlao zydua ei pachâna nohchareih na vi thlâh hapa he y hra ta.

29 Ahy chieh-leina ma chieh-leikhei leipata ei y? Ahyrai pahluasapata y sala, hiehâhpata y beih va na mâ?

30 Apalai awpa ei châ khiahtala, ei chieh-leina lâ hmozy ei palaikhei aw.

31 Abeipa Zisu, Khazohpa nata Paw chhâzaw ta a moh reithaipata y mawh sy! Ano chata haipa ei reih leizie a pahno na.

32 Damaska khih liana khata Abei Areta ry liata ryureituhpa chata na patu awpata Damaska chyhsazy khihpi cha pavaisa ta,

33 châhrasala opy liata kuh khôtho lâna chata hrâbyh ta na pathlia ei ta, chatanachata a ku tawhtapa cha a râsai haw na ta.

2 Kawrini Mozy (2 Corinthians)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10	Bo 11	Bo 12	Bo 13

2 Kawrini Mozy 12

Pawla liata aluahna nata pahnosana

1 Ei palai awpa raina a châ; phahnaina y vei hrasala, châhrasala Abeipa tawhtapa aluahna nata pahnosana kyh ei reih lymâ tua aw.

2 Krista liata chyhsa pakha ei pahno, cha tlai cha kô hrawhleipalih a châ haw, pôhpa ta ma a y tly pahno va na, pôhpa leipata ma a y tly pahno va na, Khazohpa ta a pahno, avâ miathôhna lâna khita lapata y ta.

3 Cha chyhsa cha ei pahno, pôhpa ta ma a y tly, pôhpa leipata ma a y tly pahno va na, Khazohpa ta a pahno,

4 Paradi liata lapata a ypa nata bie rei hlei thei leipa, chyhsapa rei ânapazy cha a thei tahpa ei pahno.

5 Cha hawhpa chyhsa châ ei palaikhei aw, châhrasala ei chieh-leina leipata cha keima a palaikhei aw va na.

6 A palaikhei khoh hra aw sala, ahrupa châ aw va na, bie hmeiseihpa rei tlôh aw na ta. Châhrasala ei sohsi aw, chata leipata la ahyrai ta eina hmôpa hawhta nata kei tawhta bie ama theipa hlâta a rônah viapata eina pachâ pathlei aw ei na.

7 Chatawhcha pahnosanazy cha a rônah ngaitapa vâta ei pasâhsa tu lei nawpata, sapa liata chieh-leina eina pie, Sâtâ lyuhchâpa, einâ dyuhna chu, chata leipata la ei pasâhsa tu pathlei aw na.

8 Cha kyh liata cha eina siesai thei nawpata Abeipa cha ei thôh hiah na ta;

9 châhrasala ano chata ei hnohta, “Ei ngiachhiena na châta â daih na, ei hmotaotheina he chieh-leina liata pakipata a y mâ tâh,” tah ta. Chatanachata Krista hmotaotheina cha ei chôta a y thei nawpata aly ngaitapata ei chieh-leinazy he tlao ei palaikhei ha aw.

10 Chavâta Krista vâta chieh-leina liata zy, raona liata zy, rietheina liata zy, taolana liata zy, vâchhiena liata zy alypata ei y tyh; ei chieh-lei no maihta thatlopa ei châ tyh.

Kawrini Awnanopa Pawla ta a saiheina

11 Ei hru ha hih? Nâmo ta hru lei thei leipata eina tao eichi, kei cha nâmo palyupalih awpa ei châ mâ tâh. Khâpahmah châ vei hra aw sala, khâpa kyh liata rai apôstôl lai chaipazy cha a tlu leipa châ tlôh lei khâh na ta.

12 Apôstôl hmeiseih châna ngianazy cha tiamana to hneipata, pahnonazy, hmonoâhpazy, hmotaotheinazy ta nama hryta taopa a châpa kha.

13 Khâpa kyh liata ma awnanopa hlao hropazy hlâta a hnai viapata taopata nama yna cha, keima tlai heta nama rie ei cha pathei leipa kyh liana khata a châ leipa khiahta cha? Cha a do leina kyh liana chata na ngiahthai teh u.

14 Pachâ teh u, he he nâmo lâ a vy awpata ei chhuahna eithôhna a châ. Chatawhcha nama rie cha pathei aw veih ei na, nâmo eih a tluapa châ tlôh lei khâh na ta, nâmo tlao ei cha tlua ei; sawzy ta nô nata pawzy chata ama pachôpa awpa châ leipata, nô nata pawzy ta sawzy châta tlao ama pachô awpa châ tlôh ta.

15 Kei cha nama thlahpa châta aly ngaitapata hmâh khai aw na ta, keisasy ta ei hmâh khai hra aw. A hlei khôpata nâma kyh ei pachâpa vâna khata, kei ta kyhpachâna a chyhta ei to hra ma?

16 Anodeikuacha kei chata nama rie ei cha pathei leipa ei châ ha sala, châhrasala chyhsa piepiepa rai châpata reipasaopata ei cha patupa ei a vaw châ.

17 Nâmo lâta ei tuapazy hry liana khata, ahy tlyma chhâ hmâpata ei thôhna nama châ ma?

18 Titu cha pasyu na ta, ano hnohta unawhpa cha ei tuah. Titu chata nâmo cha athôhna ta a cha hnei ei ma? Palôhrupa miakha phaopata châ ma pi mâ? Tlyna miakha liata a charei khohpa châ ma pi mâ?

19 Atahmâ chhôh zydua liana heta nâmo lâta thaina bie reipa ta eina pangiasapa châ ngyu aw ta. Krista liana chata Khazohpa mohmô ta bie eima reih, châhrasala kho chaipa saih u, ato he nâmo taopathi nawpa a châ.

20 Ei vy tita ei khopa hawhta cha hmô leipata, kei chhao nama khopa hawhta eina hmô lei pathlei aw eichi tahpa nata, ahryuna zy, ahnâchhaona zy, hiehâhna zy, a eina zy, kyh a reina zy, palaikheina zy, apasâhsana zy, atymâna zy a y pathlei aw tahpa nata, ei vy tita ei Khazohpa ta nâma hry liata maoh na paphyusa heihpata, cha hlâta hmo a paraotuhpazy hryta hmo pathaih leipa taopa zy, apheipa zy, parâpa zy hmâpata a ro tlôh leipa chyhsa hluhpi cha ei châkhei pathlei aw na tahpa ei chi mâ tâh.

2 Kawrini Mozy (2 Corinthians)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10	Bo 11	Bo 12	Bo 13

2 Kawrini Mozy 13

Zikyurâna chhâna nata byhnâ awna

1 He he nâmo lâ ei vy eithôhna awpa a châ. Pahnotuhpazy pano tlyma, pathôh tlyma pakah liana chata bie to pa-ipata a y aw.

2 Reih chhielie haw na ta, Krista keima liata bie a reih tyhtuhpa cha pasiana nama tluapa vâta einona liata nama hnohta ei y nota ei reipa hawhna khata, atahmâ nama hnohta y leipata hmialâta hmo a paraotuhpazy hnohta nata, mo hropa zydua hnohta ei rei chhielie heih aw, ei vy heih khiahtala pahlôh aw va na, tahpa hih.

3 Ano cha nâmo lâta chieh-leipa châ leipata, nama hry liata hmotaothei ngaitapa tlao a châ,

4 ano cha chieh-leina vâta khaipâpata y ta, châhrasala Khazohpa hmotaotheina vâta a hroh thlâh haw. Keimo chhao ano liata chieh-leipa eima châ, châhrasala Khazohpa hmotaotheina vâta ano hrona a hlykhei pi ta eima cha chakao.

5 Ngiapâna liana chata nama y tlyma, nâmosasyh ta a ngia tyh ula, nâmosasy ta a pasia tyh teh u. Nâmo liata Zisu Krista cha a y tahpa nâmo tlaita pahno pasia veih eichi mâ? Nama tlô leipa a châ dei leipa khiahta cha!

6 Keimo deikua cha khoh leipata y ma pi tahpa, nama pahno nahta ei pangiasa.

7 Chatawhcha hmo rai nama parao lei nawpata Khazohpa lâta hiah tyh pi ta, cha cha keimo a donazie a vaw luah theina awpata châ leipata, nâmo ta a dopa maih nama tao thei nawpata tlao a châ, keimo cha khoh leipa hawhta y hra ei sihla.

8 Bie hmeiseihpa a châkhei awpa leipata cha, bie hmeiseihpa adyuh awpata khâpahmah tah thei ma pi.

9 Keimo eima chieh vei no chhaota, nâmo nama tha a tlô nona heta eimâ ly kaw tyh mâ tâh. He he eima hiah tyh hra; nâmo pha pakina awpa hih,

10 cha vâna chata parao awpa châ leipata, tlao taopathi awpata, Abeipa ta biehneina eina piepa lymâ hawhna khata, ei vy tita a pasa ngaitapata ei cha chhorei leina awpa ei ta, nama hnohta ei y vei nona heta he biezy he ei roh.

11 A chhâ chaina ta cha unawh saih u, aly ngaitapata y teh u. Pha pakipata y ula, thlahlôh ngaitapata y ula, palôhrupa miakha phaoh ula, palôh a raoh ngaitapata y teh u, chatanachata kyhpachâna nata adyhna Khazohpa cha nama hnohta a y aw.

12 Sy pathaihpata a naoh rairieh teh u.

13 Mopathaihpa zydua heta ama châ naoh.

14 Abeipa Zisu Krista ngiachhiena zy, Khazohpa kyhpachâna zy, Thlahpa Pathaihpa akaona zy cha nama zydua hnohta y mawh sy.

2 Kawrini Mozy (2 Corinthians)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10	Bo 11	Bo 12	Bo 13