1 Zawhana 3

1 Zawhana 3

Khazohpa sawzy

1 Pachâ teh u, Paw ta kyh maniah a pachâna cha thata a châ kaw dia. Khazohpa sawzy ta maniah a bi haw hih; cha hawhpa cha eima châ tlai na. He vâna heta khizaw ta maniah pahno vei, ano cha ama pahno leipa vâta.

2 Kho ngaitapa saih u, atahmâ he Khazohpa sawzy châ pi ta; kheihta eima y aw tahpa deikua cha a lâ mâh vei, ano a vaw luah khiahta cha, ano hawhta eima y aw tahpa eima pahno. Ano cha a y ualuapa hawh tlaita hmô tlôh aw pi ta.

3 Ahyrai ano chôta cha hnabeiseina cha a hneipa maihta ano a pathaihpa hawhta a pathaisa tyh-

4 Ahyrai hmo a paraopa maihta ryhpa chhao a parao tyh; moleina he ryhpa paraona châ tlôh ta.

5 Ano cha moleinazy siekhei awpata a vaw luah haw tahpa nama pahno na, ano liana chata moleina khâpahma y tlôh lei khâh ta,

6 Ahyrai ano liata a y thlâh hapa chata hmo parao vei; ahyrai hmo a paraopa chata ano cha hmô leipata a pahno chhao pahno hra vei.

7 Ei nawhta saih u, ahy dôpata hmah y khah u. Siana a taotuhpa cha a siapa a châ, ano a siapa hawh hra ta.

8 Hmo a paraotuhpa cha Ahripa tawhta a puapa a châ; Ahripa cha a thaona tawhta hmo parao tlôh ta. Khazohpa Sawchapawpa a vaw luah chhâpa cha Ahripa raihriazy a pahleipadia thei nawpata a châ.

9 Ahyrai Khazohpa sapa chata Khazohpa chi ano liata a y thlâh hapa vâta hmo parao tyh vei, Khazohpa sapa a châpa vâta hmo parao thei hra vei.

10 He liana heta Khazohpa sawzy nata Ahripa sawzy a hno; ahyrai siana a tao leipa cha Khazohpa tawhta a puapa châ vei, a unawhpa kyh a pachâ leipa chhao cha Khazohpa tawhta a puapa châ hra vei.

Kyh a pachâ rairiena

11 He he cha hlâ tawhta bietapa nama pahnopa kha châ tlôh ta, kyh eimâ pachâ rairie chyu awpa a châ tahpa hih.

12 Kaina, moleipa tawhta a puapa ano unawhpa a thietuhpa hawhna khata y leipata. Khapa vâta ma a thie tly? Ano hmotaopazy pha leipata a unawhpa hmotaopazy a siapa vâta.

13 Unawh saih u, khizaw ta a châ hao khiah ei tala, nama noâh kha se.

14 Unawhzy kyh eimâ pachâpa vâta thina tawhtapa pua pi ta, hrona liata eimâ ngia haw tahpa eima pahno na. Ahyrai kyhpachâna a hnei leipa maih thina liata a y thlâh haw.

15 Ahyrai a unawhpa a haopa cha liany a cheihpa a châ. Lianycheituhpa ahyhma chhâzaw hrona a chakaihpa rai y veih ei tahpa pahno tlôh eichi ta.

16 He liana heta kyhpachâna khâpama a châ tahpa eima pahno. Ano chata eima châta a hrona a pie hawpa vâta; keimo chhaota unawhpazy châta eima hrona eimâ pie hra awpa a châ.

17 Châhrasala ahyrai khizaw sôh hneipata a unawhpa phahlapata hmô sala, thapasa tlôh leipa sala Khazohpa kyhpachâna cha ano liata kheihta e a y aw?

18 Ei nawhta saih u, bie deitata kyh a pachâ kha ei suh u, hmotaopa nata hmeiseihpata tlao châ mawh sy.

Khazohpa mohmô ta riahphana

19 Cha liana chata bie hmeiseihpa liatahpa eima châ tahpa a pahno aw pi ta, eima palôhrupa ta thai lei maniah a pachâsana kyh liana chata

20 ano mohmô tlai liata eima palôhrupa eima pa-isa hra aw; Khazohpa cha eima palôhrupa hlâta rônah via ta, ato pahno tlôh ta.

21 Kho ngaitapa saih u, eima palôhrupa ta thai lei maniah a pachâsa leipa khiahtala, Khazohpa lâta eima ria a pha.

22 A biepipazy zyhpata a mohmô liata hmo a lypa eima tao tyhpa vâta, eima hiapa maih ano tawhtapa eima hmô lymâ tyh.

23 A biepipa cha he he a châ, a Sawchapawpa Zisu Krista moh a ngiapâ ei sih la, ano ta bie maniah a piepa hawhta kyh a pachâ rairieh ei sih la.

24 A biepiepazy a zyhpa cha ano liata y thlâh ha ta, ano chhao cha ano liata a y thlâh ha hra. Chatawhcha he liana heta ano cha keimo liata a y thlâh haw tahpa eima pahno, Thlahpa maniah a piepa liana heta. 

1 Zawhana (1 John)

Bo 1	Bo 2	Bo 3	Bo 4	Bo 5

1 Zawhana 1

1 Zawhana 1

Hrona bie

1 Hrona bie, âthaona liata a ypa kha, eima nah ta eima theipa kha, eima mo ta eima hmôpa kha, moh thlâh ha pi ta, eima ku ta eima hriapa kha, cha thâtih cha,

2 cha hrona cha a vaw luah ha ta, hmô pi ta, pahnosa hra pi ta, cha chhâzaw hrona Paw hnohta a ypa keimo lâta a vaw luahpa cha eima cha chho hih.

3 Cha eima hmôpa nata eima theipa cha nama hnohta eima cha chho hra hih, nâmo chhaota maniah namâ kao thei nawpata; keimo maniah namâ kaona cha Paw nata a Sawchapawpa Zisu Krista akaona châ tlôh ta.

4 Chatanachata eimâ lyna â ki thei nawpata he biezy he eima roh hih.

Khazohpa cha khaihna

5 Bietapa ano tawhta pahnopata nâmo lâ eima cha chho pachhuah awpa cha he he a châ, Khazohpa cha a khaihpa châ ta, ano liana chata zohna rai y vei.

6 Zohna liata y thlâh ha tlôhpata ano ei kao eima tah khiahta cha haipa eima reih, bie hmeiseihpa chhao cha zyh ma pi.

7 Châhrasala ano cha khaihpa liata a ypa hawhta keimo chhao a khaihpa liata a ypa eima châ khiahta cha, a kao chyu aw pi ta, a Sawchapawpa Zisu thisaih ta eima moleina zydua maniah a pasipa tyh.

8 Moleina hnei va na eima tah khiahtala, keimosasy ta eimâ dô, bie hmeiseihpa cha keimo liata y vei.

9 Eima moleinazy reihpha eimâ chei khiahtala, eima moleinazy a ngiahthai awpa nata eima sia leina zydua pasia awpata ano cha ngâchhihpata a siapa a châ.

10 Hmoparao va na eima tah khiahtala, ano cha haipata tao pi ta, ano bie chhao keimo liata y vei. 

1 Zawhana (1 John)

Bo 1	Bo 2	Bo 3	Bo 4	Bo 5

1 Zawhana 2

1 Zawhana 2

Krista miah reikheituhpa

1 Ei nawhta saih u, hmo nama parao lei nawpata he biezy he nâmo lâta ei roh hih; ahyrai ta hmo a parao khiahtala, Paw lâta maniah a reikheituhpa, Zisu Krista mo siapa cha eima hnei na;

2 ano cha eima moleinazy reihpha cheina a châ, keimo moleina dei châ leipata, khizaw zydua moleina reihpha cheina chhao a châ.

3 Chatawhcha a biepiepazy a zyhpa eima châ khiahtala cha liana chata ano eima pahno tahpa eima pahno pasia.

4 A biepiepazy a pyh tlôh leipata, “Ano ei pahno,” a tahtuhpa cha a haihpa a châ, bie hmeiseihpa ano liata y vei;

5 ahyrai a bie a pyhpa deikua cha ano liana chata Khazohpa kyh a pachâna a paki hmeiseih. Ano liata eima y tahpa he liana heta eima pahno:

6 ano liata ei y thlâh ha tyh a tahtuhpa cha, ano a ypa hawhna hra khata a y hra awpa a châ.

Biepie thiehpa

7 Kho ngaitapa saih u, biepie thiehpa la nama hnohta vaw roh leipa na ta, biepie parohpa cha hlâ tawhta nama hneipa kha tlao ei roh. Cha biepie parohpa cha bie nama pahno chiehpa kha a châ.

8 Châhrasala biepie thiehpa a rohpa ei châ hra aw tly, cha cha ano liata nata nâmo liata â lâ. Zohna cha a lei haipa vâta nata a khaihpa hmeiseihpa cha a vaw khaih hawpa vâna heta.

9 Ano unawhpa a hao tlôh ta, khaihna liata ei y, a tahtuhpa cha atahmâ taih chhaota zohna liata a y thlâh haw.

10 Ano unawhpa kyh a pachâtuhpa cha khaihna liata y thlâh ha ta, ano liana chata a hluana rai y vei.

11 Ano unawhpa, a haotuhpa deikua cha zohna liata y ta, zohna liata a charei hra; zohna ta a mo a pachao hawpa vâta a siena chhao pahno tyh vei.

12 Ei nawhta saih u, ano moh vâta nama moleinazy a ngiahthaipa a châpa vâta nâmo lâta ei roh hih.

13 Paw saih u, ano, cha hlâ tawhta a y thlâh hapa cha nama pahnopa vâta nâmo lâta ei roh hih. Satlia saih u, moleina cha nama tiah hapa vâta nâmo lâta ei roh hih. Ei nawhta saih u, Paw cha nama pahnopa vâta nâmo lâta ei roh khawh.

14 Paw saih u, ano, cha hlâ tawhta a y thlâh hapa cha nama pahnopa vâta nâmo lâta ei roh khawh. Satlia saih u, nama thatlô ta, Khazohpa bie nâmo liata y thlâh ha ta, moleipa nama tiah hawpa vâta nâmo lâta ei roh khawh.

15 Khizaw he kyh pachâ leipa ula, khizaw liata hmo a ypazy chhao he a kyh pachâ hra kha u. Chyhsa ahyrai ta khizaw he a kyh a pachâ khiahtala, Paw kyh a pachâna ano liata y vei.

16 Khizaw liata hmo a ypa zydua, sapa aohraona zy, mokhaoh aohraona zy, hro chhôh rônahna pakheipa zy he Paw tawhta a puapa châ leipata, khizaw tawhta a puapa tlao châ tlôh ta.

17 Khizaw he a aohraona chhaota a leidia hai; Khazohpa khopa a taotuhpa deikua cha chhâzaw ta a y thlâh ha aw.

Krista adyuhtuhpa

18 Ei nawhta saih u, daihti hnôh chaipa a châ ha na; Krista adyuhtuhpa a vy aw tahpa nama pahnopa hawhna khata, atahmâ chhao Krista adyuhtuhpa hluhpi ama vaw pua haw; chavâta daihti hnôh chaipa a châ haw tahpa eima pahno.

19 Âmo cha eima hry tawhta pua ei ta, châhrasala keimo chyhsa hmeiseihpa châ veih ei; keimo chyhsa hmeiseihpa châ ei sala, eima hnohta ama y lymâ hra awpa châ tlôh ta; châhrasala ama zydua ta keimo chyhsa hmeiseihpa châ tiah veih ei tahpa a lâ pasia thei nawpata maniah ama puasai haw.

20 Mo Pathaihpa tawhtapa sathaw thuna to eichi ta, ato nama pahno.

21 Bie hmeiseihpa cha nama pahno leipa vâta ei ropa châ vei, nama pahnopa vâta nata, bie hmeiseihpa liata haipa khâpahma a papua beih leipa vâta tlao ei roh.

22 Zisu cha Krista a châ tahpa a zo leituhpa hlei tawhta a haihpa ahyma a y? Krista adyuhtuhpa cha Paw nata Sawchapawpa a zo leituhpa he a châ.

23 Ahyrai Sawchapawpa a zo leipa chata Paw chhao a pyh vei. Sawchapawpa a zotuhpa deikua chata Paw chhao a pyh.

24 Nâmo la cha hlâ tawhta nama pahnopa kha, nâmo liata paysa thlâh ha teh u. Cha hlâ tawhta nama pahnopa cha nâmo liata a y thlâh ha khiahtala nâmo chhao Sawchapawpa liata nata Paw liana chata nama y thlâh ha aw.

25 Chatawhcha he he ano tlaita hmo maniah a taihpa kha a châ, chhâzaw ta hrona hih.

26 Cha nâmo paviasa châ chhuahtuhpazy kyh cha nâmo lâta ei roh;

27 nâmo la ano tawhta sathaw thuna nama hmôpa kha nâmo liata y thlâh ha ta, ahyhma pachu a ngia veih eichi; ano sathaw thuna chata hmo zydua kyh tlao a cha pachupa vâta nata a do ngaitapa châ ta, haipa chhao a châ leipa vâta, cha chata a cha pachupa hawhna ei khata ano liata y thlâh ha teh u.

28 Chatanachata ei nawhta saih u, ano liata y thlâh ha teh u, ano cha a vaw luah hrasala, a vy nata a hmiakô liata noza leipata riahpha ngaitapata eima y thei aw.

29 Ano cha mo siapa a châ tahpa nama pahno khiahtala chysa ahyrai siana a taopa cha ano sapa a châ tahpa nama pahno na. 

1 Zawhana (1 John)

Bo 1	Bo 2	Bo 3	Bo 4	Bo 5

1 Zawhana 4

1 Zawhana 4

Khazohpa Thlahpa nata Krista adyuhtuhpa thlahpa

1 Kho ngaitapa saih u, thlahpa momaihta a ngiapâ khah u; anodeikuacha thlahpazy cha Khazohpa tawhtapa a châ ma, châ vei ma pasia teh u; hrohsopa pakheipa hluhpi khizaw liata ama vaw pua hawpa vâta.

2 He liana heta Khazohpa Thlahpa cha nama pahno aw: thlahpa kheihawhpa tawhtapa a châ,

3 thlahpa kheihawhpa rai Zisu a châkhei leipa cha Khazohpa tawhtapa châ vei. Cha cha ‘Krista adyuhtuhpa thlahpa a vy awpa nama pahnopa kha a châ, atahmâ chhao khizaw liata a y thlâh haw.

4 Ei nawhta saih u, Khazohpa tawhtapa châ eichi ta, chazy cha nama tiah haw; nâmo liata a ypa cha khizaw liata a ypa hlâna chata a rônah viapa vâta.

5 Âmo cha khizaw liatahpa châ ei ta, chavâta khizaw liatahpa hawhta ama reih pathlie ei ta, khizaw ta ama bie ama nahthlie tyh.

6 Keimo Khazohpa tawhtapa châ pi ta. Khazohpa a pahnotuhpa chata eima bie nahthlie tyh ta. Khazohpa tawhtapa leipa chata eima bie nahthlie tyh vei. Chazy liana chata hmeiseihna thlahpa nata thlahpa a do leipa eima pahno.

Khazohpa cha kyhpachâna

7 Kho ngaitapa saih u, kyh a pachâ rairie ei suh u; kyhpachâna he Khazohpa tawhta a puapa châ tlôh ta, chyhsa to kyhpachana a hneipa maih Khazohpa sapa châ haw ei ta. Khazohpa ama pahno hra.

8 Kyhpachâna a hnei leipa chata Khazohpa pahno vei; Khazohpa cha kyhpachâna châ tlôh ta.

9 He liana heta Khazohpa kyhpachâna eima chô liata a vaw luah haw. Ano vâta eima hroh thei nawpata, Khazohpa ta a Sawchapaw matlupa khizaw lâ a vaw tuapa liana heta.

10 He liana heta kyhpachâna a y, keimo ta Khazohpa kyh eima pachâ ei tahpa châ leipa ta, ano ta kyh maniah pachâ ta, eima moleinazy reiphacheina châ awpata a Sawchapawpa a vaw tuah tlao ei tah.

11 Kho ngaitapa saih u, Khazohpa ta cha tlatluta kyh maniah pachâ khiahtala keimo chhao kyh eimâ pachâ rairieh chyu awpa a châ.

12 Ahyhma ta khati nota hmah Khazohpa hmô beih veih ei; kyh eimâ pachâ rairieh khiahtala Khazohpa keimo liata y thlâh ha aw ta, a kyhpachâna chhao keimo liata a paki hra aw.

13 Ano liata eima y thlâh hapa nata ano cha keimo liata a y thlâh haw tahpa he liana heta eima pahno. Thlahpa maniah a pi hawpa vâna heta.

14 Chatawhcha Paw ta Sawchapawpa cha khizaw Pachhatuhpa ta y awpata a vaw tuah tahpa hmô haw pi ta, eima pahnosa.

15 Ahyrai Zisu Khazohpa Sawchapawpa a châ tahpa a châkheipa maih cha, ano liana chata Khazohpa y thlâh ha ta, ano chhao cha Khazohpa liata a y thlâh ha hra.

16 Khazohpa ta kyh maniah a pachâpa cha pahno pi ta, eimâ ngiapâ hra. Khazohpa cha kyhpachâna a châ. Kyhpachâna ta a y thlâh hapa cha Khazohpa liata y thlâh ha ta. Khazohpa chhao ano liata a y thlâh haw.

17 He liana heta eima chô liata kyhpachâna a paki haw. Ryurei noh liata chi leipata eima y theipa liana heta; ano ypa hawhta khizaw liana heta eima ypa vâta.

18 Kyhpachâna liana chata china rai y vei. Kyhpachâna pakipa chata china tlao â chadai tyh. China liana chata hriena y tlôh ta, a chituhpa cha kyhpachâna liata paki vei.

19 Ano ta kyh maniah a pachâ vâta a kyh eima pachâ.

20 Chyhsa ta, “Khazohpa kyh ei pachâ,” tahpata a unawhpa a hao tlôh sala, ano cha a haipa a châ; a unawhpa a hmô thlâh hapa hmahta kyh a pachâ vei khiahta cha Khazohpa a hmô leipa cha kheihta e a kyh a pachâ thei aw?

21 Ano tawhtapa he biepiepa he eima hnei. “Ahyrai ta Khazohpa kyh a pachâ khiahta cha a unawhpa chhao kyh a pachâ hra awpa a châ,” tahpa hih. 

1 Zawhana (1 John)

Bo 1	Bo 2	Bo 3	Bo 4	Bo 5

1 Zawhana 5

1 Zawhana 5

Ngiapâna cha khizaw pahniena a châ

1 Ahyrai Zisu he Krista a châ tahpa a ngiapâpa cha Khazohpa sapa a châ; ahyrai a satuhpa kyh a pachâpa chata a sapa chhao kyh a pachâ tyh.

2 He liana heta Khazohpa sawzy kyh eima pachâ tahpa eima pahno, Khazohpa kyh pachâ pi ta, a biepiepazy eima zyhpa heta.

3 Khazohpa kyh eima pachâna cha he he a châ, a biepiepazy eima zyhpa hih. A biepiepazy cha a hri tlôh lei khâh ta.

4 Khazohpa sapa maih chata khizaw tiah lymâ tlôh ta; he he khizaw pahniepata tiahna cha a châ, eimâ ngiapâna hih.

5 Zisu he Khazohpa Sawchapawpa a châ tahpa a ngiapâtuhpa dei leipata cha ahyma khizaw a tiah tyh tly?

Sawchapawpa pahnosana

6 Ti nata thisaih ta a vypa cha Zisu Krista he a châ. Ti deita ta châ leipata, ti nata thisaih ta tlao a châ.

7 Pahnosatuhpa cha Thlahpa a châ. Thlahpa cha hmeiseihna a châpa vâta.

8 Pahnosatuhpa cha pathôh ama y. Thlahpa nata ti nata thisaih zy cha; cha pathôh cha amâ paraoh.

9 Chyhsapa pahnosana hmahta eimâ pyh khiahta cha Khazohpa pahnosana cha rônah via tlôh ta; Khazohpa pahnosana cha he he a châ, a Sawchapawpa thâtih a pahnosapa he châ tlôh ta.

10 Khazohpa Sawchapawpa a ngiapâpa chata anosasy liata pahnona a hnei. Khazohpa a ngiapâ leituhpa chata ano cha a haipata a tao, Khazohpa ta a Sawchapawpa thâtih a pahnosapa cha a ngiapâ leipa vâta.

11 Pahnosana cha he he a châ, Khazohpa ta chhâzaw hrona maniah pie ta, cha hrona cha a Sawchapawpa liata a y.

12 Sawchapawpa a hneituhpa chata hrona cha a hnei; Khazohpa Sawchapawpa a hnei leituhpa chata hrona cha hnei vei.

Chhâzaw hrona pahnona

13 Chhâzaw hrona nama hneipa nâmosasy ta nama pahno thei nawpa ta, nâmo Khazohpa Sawchapawpa moh a ngiapâtuhpazy lâta he biezy he ei roh.

14 He he ano chôta eima riaphana cha a châ. Khâparai a khonazie hawhta eima hiah khiahta cha ano ta maniah a nahthlie tyhpa hih.

15 Khâparai eima hiapa maih maniah a nahthlie tahpa eima pahno khiahta cha, ano lâta eima hmo hiapa cha eima hmô haw tahpa eima pahno.

16 Ahyrai ta a unawhpa thina taih a châ leipa moleina a taopata hmô sala, hiapa aw ta. Khazohpa ta a hiahtuhpa vâna chata thina taih a châ leipa moleina a taotuhpazy châna chata hrona a pie aw. Thina taih moleina y ta; cha hawhpa châna chata a hiapa awpa ei tahpa châ vei.

17 Sia leina zydua he moleina a châ, thina taih a châ leipa moleina chhao a y hra.

18 Ahyrai Khazohpa sapa chata hmoparao vei tahpa eima pahno. Khazohpa sapa khata ano cha hrôbieh ta, moleipa chata a hria chhao hria thei vei.

19 Khazohpa tawhtapa eima châpa nata, khizaw pôhpalôhpa he moleipa reisai ta a y tahpa eima pahno.

20 Khazohpa Sawchapawpa cha a vy ta, hmeiseihpa chyhsa cha pahno thei awpata pahno theina maniah a pie tahpa pahno hra pi ta, keimo a Sawchapawpa Zisu Krista liata eima ypa heta hmeiseihpa chyhsa liana chata eima y. Ano cha Khazohpa hmeiseihpa châ ta, chhâzaw ta hrona chhao a châ.

21 Ei nawhta saih u, khazoh nohthlahpa tawhta a panano teh u. 

1 Zawhana (1 John)

Bo 1	Bo 2	Bo 3	Bo 4	Bo 5