1 Timawthy 1

1 Timawthy 1

Anaona

1 Pawla, Krista Zisu apôstôl, Khazohpa eima Pachhatuhpa nata Krista Zisu eima hnabeiseina ta raopa chata—

2 Ngiapâna liata ei sawchapaw hmeiseihpa Timawthy hnohta: Paw Khazohpa nata Krista Zisu eima Beipa tawhtapa ngiachhiena zy, zawngiahna zy, adyhna zy nama hnohta y mawh sy.

Pachuna do leipa kyh ta zikyurâna

3 Pachuna nanopa rai ama cha pachu lei nawpa nata phôhpa thlâthlipa nata laichadai tiah leipa pathlatuhpazy kyh, cha chata ngiapâna liata Khazohpa pachunazie a ypa he paphahnaisapa hlâta a eina tlao a tao tyh,

4 ama pachâ lei nawpata chyhsa thokhazy kha na chhorei thei nawpa ta Masidônia râh lâ ei sie chyta Ephesi khih liata y thlâh ha awpata ei châ hawpa hawhna khata atahmâ chhao kha ei châ haw;

5 châhrasala chhoreina chhâpa cha pathipalôh pathaihpa nata ngiaryna ryh leina pathaihpa nata ngiapâna hmeiseihpa tawhta a vaw puapa kyhpachâna cha ama hnei thei nawpata a châ.

6 Chyhsa thokhazy ama paviapa vâta cha cha tleisai ei ta, bie hrao leipa reina lâta sie haw ei ta,

7 ama bie rei yzie nata a ipata ama bie chhopa thâtih cha pahno tlôh leipata, Ryhpa pachutuhpazy châ awpata ama khoh tyh.

8 Ryhpa cha a pha tahpa pahno tlôh pi, chyhsa ta a phapata a hmâh khiahtala,

9 hezy he pahno ei sala, ryhpa he chyhsa siapa châta taopa châ leipata, ryhpa a papeisa leipa sahlao nata ryhpa a paraotuhpa sahlao châta zy, Khazohpa a pachâ leipa sahlao nata moleipa sahlao châta zy, mopathaih leipa sahlao nata Khazohpa a za leipa sahlao châta zy, pawzy a thietuhpa sahlao nata nôzy a thietuhpa sahlao châta zy, chyhsa a thietuhpa sahlao châta,

10 apheihmâhpa sahlao châta zy, chaohaopa sahlao châta zy, chyhsa paruhmâhpa sahlao châta zy, haithaipa sahlao châta zy, chhiesa pakheipa sahlao châta zy nata

11 reithai tlâh Khazohpa Thâtihpha rônahpa pachuna dopa kei liata pavaosapa hawhpa châ leipata kyh hropa rai a ypa maih châta chhao taopa tlao a châ.

Zawngiahna vâta Pawla alyna

12 Tha na patlôtuhpa Krista Zisu eima Beipa liana chata alynabie ei reih, eikhano ta reipachhietuhpa nata taolatuhpa nata pasipasawtuhpa châ haw hra sala;

13 ngâchhihpa ta na pachâ ta, ano chakaotuhpa ta eina rao hawpa vâna heta; châhrasala ngiapâ leina chôta pahno leipata a taopa ei châpa vâta, zawngiahna ei hmô;

14 chatawhcha eima Beipa ngiachhiena cha. ngiapâna nata Krista Zisu liata kyhpachâna ta thata a bie pakhô haw.

15 Krista Zisu moleipazy pachha awpata khizaw liata a vy tahpa he ngâchhihpa nata a pyh tlâh ngaitapa a châ. Ama hry liata molei chaipa ei châ hih;

16 châhrasala he vâna heta zawngiahna ei hmô, Zisu Krista chata molei chaipa keima liana heta a nôphanazie zydua a paluahsa thei nawpata, atahmâ tawhta chhâzaw hrona hmô awpata, ano a ngiapâtuh awpazy pahmô nawpata.

17 Abeichaipa chhâzaw ta a ypa, a rao thei leipa, hmô thei leipa. Khazohpa hmeiseihpa deita cha, chhâzaw ta palyupalihpa nata rônahpata y mawh sy. Amen.

18 Ei saw Timawthy y, eikhano ta na thâtih ama chhochhieliepa biezy hawhna khata, cha chhoreina bie cha ei cha pavaosa, chazy chata adyuhna phapa cha na dyuh thei nawpata,

19 ngiapâna nata ngiaryna ryh leina pathaih ngaitapa khâchâ a pyhpata. Chyhsa thokhazy ta chazy cha thy pathlapata ngiapâna kyh liana chata balyh raopa hawhta rao haw ei ta,

20 chazy hry liana chata Humenia nata Alezanda châ ei ta, Khazohpa reipachhiena ama pachuna ama bâh thei nawpata âmo cha Sâtâ ei pie. 

1 Timawthy (1 Timothy)

Bo 1	Bo 2	Bo 3	Bo 4	Bo 5	Bo 6

1 Timawthy 2

1 Timawthy 2

Thlahchhâna zie achuna

1 Chatanachata a hmiatua chaipa ta, hmo hiapa thlahchhâna zy, thlahchhâna tlaipa zy, chyhsa châta thlahchhâna zy, alynabie reina zy chyhsa zydua châta taopa awpata ei cha pasyu;

2 abeizy nata bie hneituhpa zydua châta chhao, Khazohpa pachâpa nata zachhih ngaitapata adyhpata, thlalôhpata eima y thei nawpata.

3 Cha cha maniah Pachhatuhpa Khazohpa pachâ ta a pha nata aly tlâh a châ,

4 ano chata chyhsa zydua pachhapata y awpa nata bie hmeiseihpa pahno awpata a khoh.

5 Khazohpa pakha deita y ta, Khazohpa nata chyhsapa likawhta lyuhchâpa pakha deita y hra ta, ano cha chyhsapa a châ, Krista Zisu,

6 chyhsa zydua chatlai nawpata anosasy ta a piepa cha, cha cha daihti zydua chata ano chânazie pahnosapata a y awpa a châ.

7 Cha cha tao awpata tlâh awhkheituhpata nata apôstôl ta raopa ei cha, bie hmeiseihpa ei reih, haih va na, ngiapâna nata bie hmeiseihpata Zenitaizy pachutuhpata raopa ei châ.

8 Chapaw sahlao ta su to liata ku pathaihpa pazawhpata, hiehâh leipa nata a ei leipata, thlahchhâ ei sala ei khoh;

9 cha hawhna hra chata chanô sahlao diathlâ leipa nata a tobi tu leipata, a phuhpata a tobi ei sala, sâ phiehpata tlyma, ngôh ta tlyma, taikulô ta tlyma, poh mâ ru ngaitapa zy ta tlyma a tobi leipata,

10 cha hawhna hra chata chanô Khazohpa pachâpa a tahpazy cha a phuhpata hmopha taopata a tobi ei sala ei khoh.

11 Chanô ta rei a ngiapata a thlih thlâh hapata achu mawh sy.

12 Chanô ta pachupa la pasaih va na, chapaw chôta biehnei pasaih hra va na; a thlih thlâh hapata tlao y mawh sy.

13 Adâh cha tao tuapa châ ta. cha hnôh lâna chata Ivy cha taopa châ tlôh ta;

14 Adâh cha dôpata y leipata, chanô deikua cha dôpata y ta, moleina liata pao haw ta.

15 Châhrasala ngiapâna nata kyhpachâna nata pathaihna hneipata, palôhrupa sia ngaitapata khâ ama y khiahtala saw sana vâta pachhapata ama y aw. 

1 Timawthy (1 Timothy)

Bo 1	Bo 2	Bo 3	Bo 4	Bo 5	Bo 6

1 Timawthy 3

1 Timawthy 3

Awnanopa hyutuhpazy duahmo

1 Ahyrai awnanopa hyutuhpa a châ khohpa ta cha raihria phapa a khoh, tahpa he â do.

2 Chatanachata awnanopa hyutuhpa cha seina hnei leipa, lahpinô pakha a hneipa, a sohsi theipa, palôhrupa a dopa, chyhsa siapa, chyhsa papyupahly a thaipa, pachu a thaipa,

3 kresawti pari a hmâh leipa, chyhsa tu a hmâh leipa, chyhsa nônaipa tlao châ awpa a châ, a hryu khoh leipa, tâkâ sôh tlaichhai leipa.

4 Zachhih ngaitapata sawzy mohôhpata, ano chhôhkha khihsa a siapata a pachâ thaipa chyhsa a châ awpa a châ;

5 chyhsa ta ano chhôhkha khihsa hmahta a siapata a pachâ thei tlôh leipa khiahta cha, kheihta e Khazohpa awnanopa sahlao a mohôh thei aw?

6 Ngiapâ thiehpa chyhsa a châ awpa châ vei, chata leipata la a palaipata y aw ta, ahripa thai lei châna cha a to pathlei aw na;

7 chazy leipa chhao cha khôtho lâta chyhsazy reithaipata a y hra awpa a châ, chata leipata la reipachhiepata ypata ahripa khohei liata a ao pathlei aw na.

8 Cha hawhna hra chata awnanopa sahlao chakaotuhpazy cha chyhsa zachhihpa ama châ awpa a châ; reih hluhpa zy, kresawti parâpa zy, a vyuhna puapa liata karâ-ypa chyhsa zy ama châ awpa châ vei;

9 ngiaryna ryh leina pathaihpata ngiapâna bienyupa cha a pyhpa tlao ama châ awpa a châ.

10 Chatawhcha chazy chhao cha pasiapata y tua mawh sy; cha hnôh lâna chata a tlâh châpa ama châ khiahtala awnanopa sahlao chakaona rai hria mawh sy.

11 Cha hawhna hra chata chanôzy chhao chyhsa zachhihpa ama châ awpa a châ, a leituhpazy châ leipata, a sohsi theipa nata ato liata ngâchhihpa ama châ awpa a châ.

12 Awnanopa sahlao chakaotuhpazy cha ama sawzy nata âmo chhôhkha khihsa a siapata pachâpata, lahpinô pakha hneipa châ mawh sy;

13 awnanopa sahlao chakaona raihria a phapata a hria hawpa zy chata a duana pha ngaitapa nata Krista Zisu liata ngiapâna kyh liana chata riahphana thata âmosasy ta a tao tyh ei ta.

Eima zyhna bieru

14 Bohpi leipa rakha tawhta nâ lâta a vy awpa hnabeiseipata he biezy he nâ lâta ei roh,

15 châhrasala bohpi ei y pathlei ha khiahtala, Khazohpa chhôhkhazy hrytahpa kheihta ama y awpa ma tahpa na pahno thei nawpata ei roh, Khazohpa chhôhkhazy cha Khazohpa hropa awnanopa sahlao bie hmeiseihpa to nata a bohna cha ama châ.

16 Khazohpa pachâna bienyupa cha ei awpa rimâ châ leipata, a rônah: Chyhsapa ta a vaw luah ta, Thlahpa ta thaipachâpata, vâlyuhchâpazy ta hmôpata, Zenitaizy hryta tlâh awhkheipata, Khizaw zydua liata a ngiapâpata, avâ lâ lapata a y haw. 

1 Timawthy (1 Timothy)

Bo 1	Bo 2	Bo 3	Bo 4	Bo 5	Bo 6

1 Timawthy 4

1 Timawthy 4

Paosaina chhochhieliena

1 Châhrasala a nohro ta cha chyhsa thokhazy cha, chyhsa haithaipazy piepiena vâta, paviasana thlahpazy nata ahripazy pachuna bie pachâpata ngiapâna cha ama bâhsai aw tahpa Thlahpa chata a siapata reih ta,

2 cha chyhsa haithaipazy cha âmo ngiaryna ryh leina tlaita thua sapata pakâpa hawhta châ ei ta,

3 nô pakiapa pakhâ tyh ei ta, khâpaleipa niepazy bie hmeiseihpa pahnopata ngiapâtuhpazy ta alynabie reipata nie awpata Khazohpa ta a taopazy cha nie lei awpa ama tah

4 Khazohpa hmotaopa to he pha tlôh ta, alynabie reipata a pyhpa a châ khiahtala, khâpahma khoh lei awpa châ vei;

5 Khazohpa bie nata thlahchhâna ta pathaisapa châ haw tlôh ta.

Zisu Krista chakaotuhpa phapa

6 Chazy cha unawhzy na pahnosa khiahtala, Krista Zisu chakaona pha ngaitapa, ngiapâna nata pachuna phapa, atahmâ taihta na zyhpa bie ta pasapa na châ aw.

7 Châhrasala Khazohpa za leina nata nôpipazy phôhpa thlâthlihpa khoh khâ. Khazohpa pachâ awpata a hrie teh; pôhpa a hriena he phahnai hra tlôh ta, Khazohpa pachâna deikua he hrona atahmâ a y chiehpa vâta a y heih awpa pie awpa bietaina a hneipa vâta, kyh to liata a phahnai.

9 He bie he ngâ a chhih ta, a pyh tlâh a châ ngaita.

10 Cha vâna chata Khazohpa hrohpa liana chata eima hnabeiseina cha eimâ bôpa vâta, hriapasa pi ta, eima tei lyliah, ano cha chyhsa zydua Pachhatuhpa châ ta, ngiapâtuhpazy Pachhatuhpa a châ via pachai.

11 He biezy he pie la, pachu teh.

12 Na hawtina ahyhma ta cha mohnao kha se, bie rei kyh liata zy, yzie kyh liata zy, kyhpachâna kyh liata zy, ngiapâna kyh liata zy, pathaihna kyh liata zy ngiapâtuhpazy a pamosatuhpa tlao châ mah y.

13 Ei vy hlâ lei la Khazohpa châ reipa zy, bie chhopa zy, pachupa zy tei teh.

14 Nâma liata a ypa hmopiepa chhochhieliepa hawhta, machâ sahlaozy ku pahniehpata Khazohpa ta a cha pahneisapa kha diathlâ khâ.

15 Chyhsa zydua lâta hmialâ tôhnazie a la thei nawpata cha hmozy liana chata tiama la, chazy liana chata a hmâh khai teh.

16 Nâma nata na pachuna liana chata a chado la; cha hmozy taopata y thlâh ha teh. cha hawhta taopata nâma nata na bie a nahthlietuhpazy cha pachhapata ama yna hâh ta. 

1 Timawthy (1 Timothy)

Bo 1	Bo 2	Bo 3	Bo 4	Bo 5	Bo 6

1 Timawthy 5

1 Timawthy 5

Mohropazy chôta taonazie

1 Machâ viapazy ra khâ, paw hawhta tlao reipasao teh; satlia viapazy cha unawh hawhta,

2 nôpi viapazy cha nô hawhta, laihsa viapazy cha pathaih ngaitapata sietanô hawhta.

3 Nôhmei, nôhmei hmeiseihpazy cha palyupalih teh.

4 Châhrasala nôhmei ahyrai ta sawzy tlyma, samohzy tlyma hnei sala, chazy chata ama chhôhkha lâta Khazohpa pachâpa ypa nata âmo a satuhpazy chô liata pha hri awpa a chu mawh sy; cha cha Khazohpa mohmô ta a khonazie châ tlôh ta.

5 Nôhmei hmeiseihpa, ano deita a ypa chata Khazohpa chô liata hnabeiseina khâchâ hnei ta, a chhô a zâ ta hiapa nata thlahchhâpata khâ y tyh ta;

6 anodeikuacha nôhmei ano pasana deita liata a ypa cha a hro chhôh tlai chhaota athipa a châ.

7 Seina hnei leipata ama y thei nawpata, cha biezy chhao cha pie teh.

8 Châhrasala ahyrai ta ano chyhsazy châta pachâ chhielie leipata, âmo ochhôh liata chyhsazy châta hmahta a pachâ chhielie leipa khiahtala, ngiapâna cha a paphasai ta, ngiapâ leipa hlâta tlao a molei via.

9 Nôhmei cha kô sycharu ry lâtahpa châ leipata, chyhsa pakha lahpinô a vaw châ hawpa, hmophapa taona kyh liata chyhsa reithaipata a y khiahtala,

10 nôhmei ta ro theipa a châ. Sawzy vaw paly haw ta, khichhaizy patlôsa hawpata, mopathaihpazy phei vaw pasi hawpata, chyhsa nôpopazy vaw deichhy hawpata, hmophapa to tiama ngaitapata a vaw tao hawpa a châ khiahtala.

11 Nôhmei laihsa viapazy deikua cha roh khâ; Krista lâta amâ vaw i vei nahta vahpa hnei khoh tyh tlôh ei ta,

12 amâ ngiapâ tuana cha ama thypa vâta thai lei châpata ama y tyh.

13 Cha leipa chhao cha o to ta a khiekhâ ei ta, thathipata ama y tyh, thathipa dei chhao châ leipata, bie rei lei awpa reipata, hohiahpa nata chyhsazy hmotaopa ama pachia tyh hra.

14 Chatanachata nôhmei laihsa viapazy chata dyhchâ ei sala, sawzy hnei ei sala, ochhôh khihsa pachâ ei sala, seina awpa rypaohpa rai khakhaipa cha pahmôsa leipa sala ei khoh.

15 Atahmâ chhao chyhsa thokha chata Sâtâ lâ pangaipa ta tleisai haw tlôh ei ta.

16 Ngiapâtuhpa chapaw tlyma, chanô tlyma ta ama sanawh liata nôhmeizy y sala ano ta deichhy mawh sy, awnanopa sahlao cha patypamâpata y kha se. nôhmei hmeiseihpazy cha ama deichhy thei nawpata.

17 Awnanopa machâ ryureituhpa phapazy cha a lie no ta palyupalih tlâhpata pachâpa châ mawh sy, bie chhopa nata pachuna liata hriapasapazy cha palyupalih tlâhpata pachâ via pachaipa châ mawh sy;

18 Khazohpa châ bie chata, “Viahchao tôhpa ta sâh a tly nota a hmao hi kha y,” tah ta. “Raihriatuhpa cha a hlao a hmô tlâh a châ,” tah hra ta.

19 Awnanopa machâ ama leina cha pahnotuhpa pano tlyma, pathôh tlyma pakah tawhtapa leipata cha a pyh khâ.

20 Moleipazy cha chyhsa zydua hmiakô liata chhorei teh. Mo hropazy chhaota ama chi thei nawpata.

21 He biezy he thleina hlei hnei leipata, thleina hneipata khâpahma tao leipata, Khazohpa nata Krista Zisu nata vâlyuhchâpa a tlyhpazy mohmô liata zyh awpata phahnai khoh ngaitapata ei cha pahnosa.

22 Panano nawpata ahy chô liata hmah sôkhata ku pahnieh leipa la, chata leipata la mo hropa moleinazy liana chata nâ hlao tlamaw aw; a pathaisa thlâh ha teh.

23 Ti dei a dopa châ leipa la, na chhôh vâta nata khâ na tlâh leipa vâta kresawti a chyhta hmâh tyh mah y.

24 Chyhsa thokha moleinazy cha a lâ thlâh ha ta, pachiana lâta a tlô tua tyh, chyhsa thokha deikua cha ama hnôh lâta tlao a pazi tyh.

25 Cha hawhna hra chata hmophapa taopa a lâ thlâh hapa a y; cha hawhpa a lâ leipa zy chhao cha, nyu theipa châ vei. 

1 Timawthy (1 Timothy)

Bo 1	Bo 2	Bo 3	Bo 4	Bo 5	Bo 6

1 Timawthy 6

1 Timawthy 6

1 Khazohpa moh nata a pachuna bie reipachhiepata a y lei nawpata, sei raopaky a kypa maihzy chata âmo zibeipazy ato liata palyupalih tlâhpata pachâ mawh sy.

2 Ngiapâtuhpa zibeipa a hneipazy chata unawh ama châpa vâta hno kha se; châhrasala phahnaina a hmôtuhpazy cha ngiapâtuhpa nata kho ngaitapazy ama châpa vâta chakao rili mawh sy.

Palôhtlâhna ta Khazohpa lyuna

Châ biezy cha pachu la, pasyu teh.

3 Chyhsa ahyrai ta pachuna hropa pachu ta, bie hmeiseihpa eima Beipa Zisu Krista bie cha, Khazohpa pachâpa la pachuna a pyh vei khiahtala.

4 ano cha a palai ta, * khâpahmah pahno leipata; a pahno leipa dei châ leipata, a eina nata bie chakhiana kyh liata tlao a hru haw, chazy tawhna chata uavana zy, atuna zy, reipachhiena zy, a pha leina lâta pangiasana zy,

5 bie ei chahrana zy pua tyh ta, cha hawhta bie ei chahrapa chyhsazy cha palôhrupa chhiepa a hneipa nata bie hmeiseihpa a hnei leipa, Khazohpa pachâpa he hlaona khiah ma a tahtuhpa ama châ.

6 Khazohpa pachâna he palôhtlâhna a hlaopata la thata a thôhna rai a châ;

7 khizaw liana heta khâpahma a ngiakhei tlôh lei khâh pi ta, khâpahma puakhei thei hra ma pi;

8 câahrasala niepa nata chysia hneipata chazy liana chata eima palôh a tlâh awh.

9 Anodeikuacha hneirôh a chhuahpazy cha reipasaona liata zy, khohei liata zy, hruna nata a parao theipa khona a hluhpi liata zy ama pao tyh, cha khonazy chata raona nata leidiana liana châta chyhsazy a pamô ty.

10 Tâkâ sôh tlaichhaina he moleina to thabypa châ tlôh ta; cha cha thokhazy ta uava ei ta, ngiapâna cha siesai ei ta, âmosasy ta pachârôhna hluhpi ta ama palôh ama parao.

Ngiapâna adyuhna phapa

11 Châhrasala na Khazohpa chyhsa, cha hmozy cha a râsai la; siana zy, Khazohpa pachâna zy, ngiapâna zy, kyhpachâna zy, nôphana zy, reisina zy a chadai lymâ teh.

12 Ngiapâna adyuhna phapa cha adyuh la; chhâzaw hrona cha patu teh, cha cha to awpata awpa châ chi ta, pahnotuhpa hluhpizy mohmô liata palâhâhna phapa cha na palâhâh hawpa kha.

13 Khazohpa hmo ato liata hrona a pietuhpa nata Krista Zisu Pawtia Pila hmiakô liata palâhâhna phapa a palâhâhtuhpa mohmô liana chata bie ei cha pie.

14 Eima Beipa Zisu Krista a vaw luah heih hlâ lei la, biepiepa kha a pathaih ngaitapa nata seina y leipata a pyh awpata;

15 cha aluahna liana chata a daihti tlai liana chata reithai tlâh biehneituhpa hmeiseihpa deita a beichaipazy Beichaipa, abeizy Beipa chata a pamosa aw,

16 ano deita cha thi thei leina hnei ta, a khaihpa a hnia thei rimâ leipa liana chata y ta, ano cha ahyhma hmô beih leipa ei ta, hmô thei hra veih ei. Ano liana chata chhâzaw ta palyupalihna nata hmotaotheina y mawh sy. Amen.

17 He khizaw liata ahneirôhpazy he a palai lei awpa nata sôh ngâchhih leipa liana heta ama hnabeiseina pachhô leipata, hmo zydua alyna awpa hluhpi maniah a pietuhpa Khazohpa chô liana chata tlao pachhô awpata pachu teh. Hmopha tao awpata, hmophapa tao hluh ngaita awpata, riahphapata, thyu pakhy hohpata,

19 hrona hmeiseihpa cha ama patu thei nawpata daihti a vaw tlô awpa châna chata lôbô pha ngaitapa ama châta pachô awpata pasyu teh.

20 Hy Timawthy y, nâ liata pavaosapata a ypa cha a phapata a vao teh. Khazohpa za leina lâ kyh reih thlâhthlipa nata do lei ngaitapata, sona ama patupa eina he a heisai teh.

21 Cha cha thokhazy ta zi ei ta, amâ ngiapâna cha lei haw ta. Ngiachhiena na hnohta y mawh sy. 

1 Timawthy (1 Timothy)

Bo 1	Bo 2	Bo 3	Bo 4	Bo 5	Bo 6