1 Thysalawnika Mozy 1

1 Thysalawnika Mozy 1

Anaona

1 Pawla nata Silvana nata Timawthy chata—Thysalawnika khih liata awnanopa sahlao, Khazohpa nata Abeipa Zisu Krista eihzy hnohta: Ngiachhiena nata adyhna nama hnohta y mawh sy.

Thysalawnika mo ngiapâna nata mopâtlâh châna zie

2 Eima Khazohpa nata Paw hmiakô liana chata ngiapâna vâta nama hmotaozie zy, kyhpachâna vâta nama hriapasazie zy, eima Beipa Zisu Krista hnabeiseipa vâta nama tiamazie zy kha my leipata,

3 a thei thlâh hapata, eima thlahchhânazy liana chata nama moh reipata, nama zydua châta Khazohpa lâta alynabie eima reih tyh.

4 Unawh saih u, Khazohpa ta kyh cha pachâ ei ta, ano chata a châ tlyh ei tahpa eima pahno.

5 Thâtihpha vaw tlôkhei pi ta, bie deitata châ leipata hmotaotheina nata Thlahpa Pathaihpa nata thata angiapâna chhaota tlao a châpa kha. Nâmo hry liata eima hrozie pahno tlôh eichi ta.

6 Chatawhcha bie cha riethei taona chôta Thlahpa Pathaihpa liata alypata a pyh eichi ta, keimo nata Abeipa hâ alapa vaw châ eichi ta;

7 chatanachata Masidônia nata Akai râh liata ngiapâtuhpa zydua chata mopakhona nama châpa kha.

8 Abeipa bie cha nâmo tawhta pathâh ha tlôh ta, Masidônia nata Akai râh liata dei châ leipata su to liata chhao Khazohpa lâta namâ ngiapâzie pathâh haw ta, chatanachata keimo ta khâpahma rei a ngiah khao vei.

9 Âmo zydua heta eima cha vaw tlyh nota maniah namâ lyzie zy, nohthlahpa tawhta Khazohpa lâta namâ vaw heih hanazie zy, Khazohpa hrohpa nata hmeiseihpata nama chakaozie zy nata a Sawchapawpa avâ tawhta a vy heihna nama hâzie zy-

10 a Sawchapawpa athihpa hry tawhta a pathyupa khata Khazohpa hiehâhna tawhtapa a cha pachhazie ei cha ama reih. 

1 Thysalawnika Mozy (1 Thessalonians)

Bo 1	Bo 2	Bo 3	Bo 4	Bo 5

1 Thysalawnika Mozy 2

1 Thysalawnika Mozy 2

Thysalawnika liata Pawla chakaona

1 Unawh saih u, nama hryta eimâ vyna kha khâpahrao leipa a châ leipa nâmo tlaita pahno tlôh eichi ta;

2 nama hnohta Thysalawnika lâta eimâ vy hlâna khata. Philipi khih liata riethei taopa nata nozachhihpata eima y tahpa nama pahno. Thata pakhâna chô chhaota nama hnohta Khazohpa Thâtihpha reih awpata eima Khazohpa liana chata eima ria tlao a pha via hawpa kha.

3 Eima biechhopa he haipata a puapa châ tlôh lei khâh ta, pathaih leipata a puapa châ hra leipata, dôna ta châ hra leipa ta;

4 Thâtihpha pavaosapata y awpata Khazohpa a pha tahpa eima châpa hawh tlaita, chyhsapa palysa awpa hawhta châ leipata, eima pathipalôh pasiatuhpa Khazohpa tlao palysapata, bie tlao eima reih tyh.

5 Khati nota hmahta reithai pakheina bie tlyma, karâ-yna khuna tlyma, eima hmâpa pahno beih veih ei tahpa nama pahnopa kha, Khazohpa maniah pahnokheituhpa a châ;

6 Krista apôstôlzy eima châpa vâta nâmo liata palyupalihna hmô theipa châ hra ei sihla; chyhsapa liata tlyma, nâmo liata chhao tlyma, mo hropa liata chhao rai palyupalihna ahnaw beih hra ma pi.

7 Nô ta sawzy nônaipata a pasôpa hawhta nama hry liata nônai ngaitapata eima ypa kha.

8 Cha hawhna hra chata eima kho ngaitapa nama vaw châ hawpa vâna khata cha khoh ngaita pi ta, Khazohpa Thâtihpha dei châ leipata, keimo hrona chhao taih pie awpata eima mâpa kha.

9 Unawh saih u, eima thachhâzie nata eima hriapasazie kha nama pahno thlâh ha na; nama hry liata ahyhma a rie eima cha pathei lei nawpata, a chhô zâ ta hriapata, Khazohpa Thâtihpha eima cha chho tyhpa kha.

10 Nâmo ngiapâtuhpazy chôta pathaih ngaitapa nata sia ngaitapa nata seina y leipata eima yzie kha maniah a pahnokheituhpa nama châ, Khazohpa chhao tlaita.

11 Ano khihnarâh nata rônahna liata châ awtuhpa Khazohpa chyhsa tlâh châpata nama y thei nawpata,

12 Paw ta ano sawzy châta a taopa hawhta, pasyupa nata thlahpalôhpa nata pahnosapata nama chôta eima taona zie kha pahno tlôh eichi ta.

13 He vâna heta bâh leipata Khazohpa lâta alynabie eima reih tyh hra, Khazohpa bie keimo tawhta nama theipa namâ pyh nona khata, chyhsapa bie a pyhpa hawhta a pyh leipa eichi ta. Khazohpa bie a pyhpa hawhta tlao namâ pyhpa vâna khata, cha cha Khazohpa bie rai châ ta, nâmo angiapâtuhpazy chôta a hria tyh hrapa cha a châ.

14 Nâmo unawh saih u, Zudia râh liata Khazohpa awnanopa sahlao Krista Zisu liata a ypazy liata a tlôpa hawhpa kha, nama hnohta a tlô hra; ano chata Zuzy liata pasa ama taopa hawhta nâmo chhaota nâmo râh chyhsa liata pasa tao hra tlôh eichi ta,

15 cha Zuzy chata Abeipa Zisu nata hrohsopazy chhao thie ei ta, keimo chhao maniah papua ei ta, Khazohpa palysa leipa ei ta, chyhsa zydua ama pakhâ tyh.

16 Zenitaizy pachha ama châ thei nawpata ama hnohta bie chhopa maniah pakhâ tyh tlôh ei ta, ama molei panuana kha pabie awpata. Châhrasala Khazohpa hiehâhna cha a chhâna taihta ama chôta a vaw tlô haw.

Awnanopa tly heipata Pawla khona

17 Châhrasala unawh saih u, bohpi leipa chata nâmo nata pathipalôh lâta a chhaih leipata, hmia deita a chhaihpata eima y chypa vâta, byuh ngaitapata nama hmia hmô awpata eima tei pachai tyh;

18 nâmo lâta a vy awpa liahsa a chhuah tlôh pi ta, kei Pawla tlai chhao heta ei no dua a vy awpa a chhuah ha na ta, châhrasala Sâtâ ta eina pakhâ tyh.

19 Eima hnabeiseina tlyma, eima thaphana tlyma, eima lakho apalaikheipa tlyma châ aw veih eichi mâ?

20 Nâmo sahlao he eima rônahna nata eima thaphana nama châ mâ tâh. 

1 Thysalawnika Mozy (1 Thessalonians)

Bo 1	Bo 2	Bo 3	Bo 4	Bo 5

1 Thysalawnika Mozy 3

1 Thysalawnika Mozy 3

1 Chatanachata pasa eima tao thei vei rakha tawhna chata, Atheni khih liata keimo deitata siesaipata y ei sihla a pha tah pi ta,

2 Timawthy eima unawhpa, Krista Thâtihpha lâta chakaotuhpa he cha pa-ipa awpa nata namâ ngiapâna kyh liata thlah cha palôh awpa ei ta, eima vaw tuah.

3 He riethei taonazy vâna heta ahyhma ta amâ chalyu lei nawpata. Hezy he pasa tao awpata raopa eima châ tahpa nâmo tlaita pahno tlôh eichi ta.

4 Nama hnohta eima y nona khata, riethei tao awpa eima châpa eima cha chhochhielie hawpa kha; cha hawhna tlai chata tlô haw ta, cha cha nama pahnopa kha.

5 Cha vâna chata pasa ei tao thei khao vei tawhta, reipasaotuhpa chata cha papao pathleipata eima hriapasana cha khâpa hrao leipa a châ pathlei aw na, tahpata namâ ngiapâna, zie eima pahno thei nawpata, Timawthy ei vaw tuah.

6 Châhrasala Timawthy cha nâmo tawhta atahmâ keimo lâ vaw tlô ta, nama kyhpachâna nata angiapâna vâta namâ vaw lynabie vaw tlôkhei ta. Khâ maniah a thei eichi ta, hmô eima cha byuhpa hawhta hmôpa maniah nama byuhna thâtihzy maniah chho ta.

7 Cha vâna chata unawh saih u, eima nôpona nata rietheina zydua liata namâ ngiapâna vâta nama chôta thlalôh ngaitapata eima y;

8 atahmâ la eima hroh haw, Abeipa liata a ipata namâ duah khiahtala.

9 Nama hmia hmô thei nawpata nata namâ ngiapâna lâta namâ phahlana eima cha pazaopa thei nawpata, a chhô a zâ ta thlahchhâpata 

10 eima Khazohpa hmiakô lâta khâpa alynabie ma eima chho thei hri hra aw tly?

11 Chatanachata Khazohpa eima Paw tlai chata, eima Beipa Zisu chhaota nâmo lâ maniah chhihtha se;

12 nâmo lâta kyhpachâna eima hneipa hawhta, nâmo lâta kyh a pachâ rairieh nata chyhsa zydua lâta kyhpachâna cha Abeipa châta papôhsapata cha pahneirôhsa ei se.

13 Chatanachata eima Beipa Zisu, a mopathaihpa zydua chhaota a vy ti ta, eima Khazohpa nata eima Paw hmiakô liata nama pathipalôhzy pathaina kyh liata seina hnei leipata a cha pa-i thei aw ei. 

1 Thysalawnika Mozy (1 Thessalonians)

Bo 1	Bo 2	Bo 3	Bo 4	Bo 5

1 Thysalawnika Mozy 4

1 Thysalawnika Mozy 4

Hrona Khazohpa apalysapa

1 A chhâ chaipata cha, unawh saih u, nama yzie awpa nata Khazohpa nama palysanazie awpa, atahmâ ta nama yzie hawhpa he keimo tawhta nama lapa hawhna khata, nama hnei pachai nawpata Abeipa Zisu liana chata a hawpata eima cha pasyu.

2 Abeipa Zisu zawhzi ta khâpa biezy ma eima cha piepa kha pahno tlôh eichi ta.

3 Khazohpa khona zie, nama pathaihna awpa cha he he a châ; apheina bâhsai ula;

4 Khazohpa pahnona a hnei leipa Zenitaizy hawhta parâna kyh liata y leipata,

5 pathaih nata palyupalihpata nama lahpinô a vao chyu ula;

6 cha kyh liana chata ahyhma ta paraopata a unawhpa chô liata hmopha leipa tao leipa sala, Abeipa cha chazy hawhpa hmo a taotuhpa zydua phulatuhpa a châpa vâta, keimo chhaota cha chhochhieliepata eima cha pahnosa hawpa hawhna khata.

7 Khazohpa ta pualeipata y awpata maniah aw tlôh leipata, pathaih awpata tlao maniah a aw.

8 Chavâta a papeisa leituhpa chata chyhsa a papeisa leipa châ leipata, Khazohpa a Thlahpa Pathaihpa a pie tyhtuhpa cha a papeisa leipa tlao a châ.

9 Châhrasala unawhzy kyhpachâna kyh lâta châ ropa awpa a ngiah veih eichi; kyh a pachâ rairieh awpata nâmo tlai Khazohpa pachupata y tlôh eichi ta;

10 Masidônia râh zydua liata unawh a ypa zydua chô liana chata kyhpachâna nama hnei tlai hra. Châhrasala unawh saih u, hria via awpata ei châ haw ei,

11 a chalih viapata ypa nata nama hmotaopa nata bie eima cha piepa hawhna khata, nama ku ta hria awpata namâ chhuah nawpata eima cha pasyu;

12 chatanachata khôtho lâta chyhsazy chô liata angiapata y thei aw eichi ta, khâpahma apahla thei aw veih eichi.

Athihpa nata ahrohpa Abeipa a vyna liata

13 Châhrasala unawh saih u, mo hropa hnabeiseina rai a hnei leipa hawhta nama pachâ a rôh lei nawpata, a môpazy thâtih nama pahno leipa khoh ma pi.

14 Zisu thi ta a thyu heihpa eimâ ngiapâ tlôh khiata cha, Zisu liata a mô hawpazy cha Khazohpa ta ano hnohta a vaw chhi hra aw.

15 He he Abeipa bie ta nama hnohta eima reih, keimo Abeipa a vyna taihta ahrohpata a y thlâh hapazy pi heta a môpazy cha chhao cheita aw ma pi, tahpa hih.

16 Abeipa tlai cha rahaopa nata vâlyuhchâpa chônôchaipa ao nata Khazohpa chiahmie pyu chhaota, avâ tawhta za chô tlôh aw ta. Chatawhcha Krista liata a thi hawpazy cha thyu tua aw ei ta;

17 cha hnôh lâna chata keimo a hrohpata a ypazy pi he a ruapa liata Abeipa dy awpata âmo hnohta meihdozy hry liana khita lapata eima y aw; chatanachata chhâzaw ta Abeipa hnohta eima y ha aw.

18 Chavâta he biezy heta thlah a palôh rairieh teh u. 

1 Thysalawnika Mozy (1 Thessalonians)

Bo 1	Bo 2	Bo 3	Bo 4	Bo 5

1 Thysalawnika Mozy 5

1 Thysalawnika Mozy

Abeipa a vyna châta a chhuahdyna

1 Châhrasala unawh saih u, a daihti nata a nohzy kyh cha ropa awpa a ngiah veih eichi.

2 Abeipa Noh cha zâ ta parutuhpa hawhta a vaw tlô aw tahpa nâmo tlaita pahno tlôh eichi ta.

3 “Adyhna nata abohna,” tahpata ama rei no tlaita, chanô saw a zeihpa hawhta sôkhata leidiana ama chôta tlô aw ta, khôkhâh chachei aw veih ei.

4 Châhrasala unawh saih u, nâmo lâ cha noh liana chata parutuhpa hawhta a cha pachhai lei nawpa ei ta, zohna liata y veih eichi.

5 Khaihna sawzy nata noh sawzy châ khai tlôh eichi ta; zâ chyhsa châ leipa pi ta, zohna liatahpa châ hra ma pi.

6 Chatanachata mo hropazy hawhta a mô kha ei suh u, a hrapata tlao mokhâh ei suh u.

7 A môpazy cha zâ ta amâ mô tyh, sahma paripazy chhao zâ ta ama pari tyh.

8 Châhrasala keimo la noh chyhsazy eima châpa vâta, ngiapâna nata kyhpachâna vyhphao ta a kypata, pachhana hnabeiseina cha lakhu ta hmâpata tlao mokhâh ei suh u.

9 Khazohpa ta hiehâhna pasa tao awpata châ leipata, eima Beipa Zisu Krista zawhzi ta pachhana tlao hmô awpata maniah rao tlôh ta;

10 eimâ hrapa chhaota, eimâ môpa chhaota, ano nata eima hro khoh thei nawpata ano cha eima thi vyuhpata a thi.

11 Chavâta a pasyu rairiehpata a paphahnai rairieh chyu teh u, nama tao tyhpa hawhna khata.

Chhoreina chhâna nata byhnâ awna

12 Châhrasala unawh saih u, nama hryta hriapasapa nata Abeipa liata nama hyutuhpa ta a ypa nata cha chhoreituhpazy,

13 cha pahno awpata nata ama raihria vâta kyhpachâ ta pasô ngaita awpata eima châ haw. Adyhpata y teh u.

14 Unawh saih u, eima châ hawna, ryhpa leipa hawhta a ypazy cha chhorei ula, palôhrupa chyhpazy cha pasyu ula, chieh-leipazy cha bao ula, chyhsa zydua liata nôpha ngaitapata y teh u.

15 Ahyhma ta ahy moleina rai moleina ta viarithô lei awpata a chado teh u, nama hmopha a taopa rairiena lâta nata chyhsa zydua chôta nama taopana lâta chhao, a phapa maih kha a chadai teh u.

16 Khâ aly thlâh ha ula,

17 bâh leipata thlahchhâ ula,

18 ato liata alynabie khâ reih teh u; cha cha nâmo lâ kyh liata Krista Zisu liana chata Khazohpa khonazie châ tlôh ta.

19 Thlahpa cha pachhai khah u;

20 chhochhieliena mohnao khah u,

21 ato tlao pasia ula; a phapa maih khâchâ a pyh ula,

22 moleipa alyupata a lâpa zydua liana cha a pasiesai teh u.

23 Adyhna Khazohpa chata nama pôhpa duata cha pathai ei se; nama thlahpa nata nama thlahmipa nata nama pôhpa eima Beipa Zisu Krista a vy heih tita seina y leipata a pôhpa duata pabohpata y mawh sy.

25 Unawh saih u, thlah maniah chhâpa teh u.

26 Unawh zydua kha sy pathaihpata nâ naohpa teh u.

27 He châ he unawh zydua hnohta rei awpata ei châ haw ei.

28 Eima Beipa Zisu Krista ngiachhiena cha nama zydua hnohta y mawh sy. 

1 Thysalawnika Mozy (1 Thessalonians)

Bo 1	Bo 2	Bo 3	Bo 4	Bo 5