1 Pity 1

1 Pity 1

Anaona

1 Pity. Zisu Krista apôstôl chata-Pawntu râh zy, Kalatia râh zy, Kapadôkia râh zy, Asia râh zy, Bithunia râhzy liata a paipatlapa sahlao a ypa.

2 Paw Khazohpa ta a chhaichhi châta a tlypa, Thlahpa ta pathaisapa nata Zisu Krista angiapâta a thisaih ta a pathaisapazy hnohna chata: Nama chô liata ngiachhiena nata adyhna papôhsapata y mawh sy.

Hnabeiseina hrohpa

3 Eima Beipa Zisu Krista nata Paw cha reithaipata y mawh sy! Ano chata a ngiachhiena hluh ngaitapa lymâ hawhta athihpa hry tawhta Zisu Krista thyuheina hrohpa hmô awpata maniah sa heih ta,

4 ryuto rao thei leipa, a puapa a hlao leipa, alo thei leipa, avâ liata nama châta akhaihpa cha hmô nawpata,

5 pachhana deita hnôh lâta a lâ awpa, amâ chiehpa cha hmô awpata ngiapâna vâta Khazohpa hmotaotheina liata vaipa cha nama châ.

6 Cha liana chata thata nama tha a pha, atahmâ a byuh khiahtala reipasaona to vâta pachârôh chy hra ula,

7 namâ ngiapâna pasiana, ngôh mei liata pasia tawh chhaota, a leidia tyhpa hlâta a sôh viapa cha Zisu Krista a luah daihtina chata reithaina nata palyupalihna nata rônahna awpa a vaw châ thei nawpata.

8 Ano cha hmô beih leipa chhaota kyh pachâ ei ta; ano cha atahmâ hmô hra vei ula, a ngiapâ eichi ta, alyna reih hlei thei leipa nata rônah ngaitapata namâ ly ngaita kaw tyh.

9 Namâ ngiapâna chhâpa nama thlahpa pachhana cha hmôpata.

10 Nama chô liata ngiachhiena a vaw tlô awpa bie chhochhielietuhpa hrohsopazy ta, Krista Thlahpa âmo liata a ypa chata

11 Krista pasa taona awpazy nata cha tawhta rônahna a y awpazy nata cha a pahno chhielie nozy khata, khâpa daihti e a châ, kheihawhpa daihti e cha ta a pahnosa ty tahpa a laichadai a chhuapata, cha pachhana thâtih cha tlua ei ta, liahsa amâ laichadai tyh.

12 Cha hmozy chata âmosasy a chakao leipata, nâmo tlao ama cha chakao tahpa ama hnohta pahnosapa a châ haw, cha kyhzy cha avâ tawhta tuapa Thlahpa Pathaihpa baona ta Thâtihpha cha chhotuhpa khata atahmâ cha chho ei ta, cha hmozy cha vâlyuhchâpazy ta ama sai khoh tyh.

Hrozie pathaihpa hnei awpata awna

13 Chavâta nama palôhrupa chai a saipata a hrohrua ula, Zisu Krista a luah tita ngiachhiena a cha vaw cheipa awpa ei châ hnabeisei ngaitapata y lymâ teh u.

14 Saw dopazy hawhta ypata nama pahno vei nota, hlâno ta aohraonazy hawhta y leipata,

15 châ awtuhpa ei cha a pathaihpa hawhta nâmo chhao nama yzie zydua liata a pathaihpata tlao y teh u;

16 “Nâmo nama pathaih awpa a châ, kei pathaih tlôh na ta,” tahpa ropa a châpa kha.

17 Chatawhcha thlei hlei hnei leipata chyhsa to raihriapa chyu hawhta a pachiah tyhtuhpa cha Paw hawhta nama pado khiahta cha, he alei liata nama y chhôh cha chipata y teh u,

18 nama pathlatuhpazy pie pachhuahpa nama yzie khâpahrao leipa tawhtapa cha hmo a rao theipa tâkâ nata ngôh ta chatlaipa châ leipa eichi ta.

19 mietahkupa taw seina a hnei leipa nata a puapa a bai leipa thisaih hawhta, Krista thisaih sôhpa chata chatlaipa nama châ tahpa pahno tlôh eichi ta.

20 Ano cha aleilô y hlâta raochhieliepata y tlai ta, châhrasala daihti hnôh lâzy liana chata nâmo vâta aluahpata y ta.

21 Ano vâta athihpa hry tawhta a pathyutuhpa nata a rônahna a pietuhpa Khazohpa cha angiapâtuhpazy châ eichi ta, namâ ngiapâna nata namâ hnabeiseina cha Khazohpa liata a y thei nawpata.

22 Unawhzy kyhpachâ hmeiseih awpata bie hmeiseihpa zyhpata nama thlahpa nama pathaisa hawpa vâta, pathipalôh ta phahnai khoh ngaitapata kyh a pachâ rairieh teh u.

23 Chi a rao theipa liatahpa châ leipata. Khazohpa bie a hroh thlâh hapa nata a y thlâh hapa liana chata chi a rao thei leipa liata a pihpathipa tlao châ tlôh eichi ta.

24 Khazohpa châ bie ta:“Chyhsa zydua sibiepa hawhta châ ei ta, ama rônahna zydua chhao sibiepapaw hawhta a châ. Sibiepa cha uah ta, a paw cha zô ta.

25 Abeipa bie deikua cha chhâzaw ta a y thlâh haw,” tahpa châ tlôh ta. Cha cha Thâtihpha bie ama cha chhopa cha a châ. 

1 Pity (1 Peter)

Bo 1	Bo 2	Bo 3	Bo 4	Bo 5

1 Pity 2

1 Pity 2

Alô hrohpa nata phopi pathaihpa

1 Chatanachata moleina zydua zy, haidihaiduana zydua zy, piepiena zydua zy, hnâchhaona zy, reipachhiena zydua zy bâh sai ula,

2 Hawsai a pihthiehpazy hawhta thlahpa lâ sâhpiti khâpahma pahlao leipa cha vâ teh u, cha liana chata pachhana tlôna taihta nama laiseih thei nawpata;

3 Abeipa cha ngiachhie thei ngaitapa a châ tahpa nama pahno hnokua cha.

4 Ano cha alô hropa chyhsazy khoh leipa tlai, Khazohpa pachâta cha atlypa nata sôh ngaitapa cha a châ, ano lâna chata a vypata;

5 Zisu Krista zawhzi ta Khazohpa alynazie thlahpa lâ atheihna hlâ awpata theihthaipa pathaihpa sahlao nama vaw châ nawpata.

6 Chavâta Khazohpa châ bie liana chata; “Zai-o liana chata a ki liata alô peichaipa, atlypa sôh ngaitapa ei paryh, ano a ngiapâtuhpa cha maophyu aw vei,” tahpa ropa a châ.

7 Chata nâmo angiapâpazy chata hmo sôh ngaitapa a châ, ngiapâ leipazy châta deikua chata: “O satuhpazy ta alô ama kho leipa kha, cha tlai cha a ki liata alô phahnai chaipa a vaw châ haw.

8 “Chapiana alô nata a hluana lôpanô,” chhao. A ngiapâ leipa ei ta, bie liana chata pao tyh tlôh ei ta, cha hawhta tao awpata raopa ama châ hra.

9 Châhrasala zohna tawhta puapata, a khaihpa noâh ngaitapa liata a ngia awpata cha awtuhpa ei phana cha nama pamosa thei nawpata, nâmo la chi atlypa, abei theihthaipa sahlao, pho pathaihpa, Khazohpa chyhsazy tlai châ tlôh eichi ta.

10 Hlânona khata chyhsa rai châ leipa eichi ta, atahmâ deikua cha Khazohpa chyhsa châ haw eichi ta; hlânona khata zawngiahna hmô leipa eichi ta, atahmâ deikua cha zawngiahna nama hmô haw.

Khazohpa sei hawhta hro zie

11 Kho ngaitapa saih u, khichhaipa nata khitlyhpa nama châpa vâta thlahpa adyuh tyhtuhpa sapa aohraonazy bâhsai awpata ei châ haw ei.

12 Zenitaizy hryta nama yzie cha angia ngaitapa châ mawh sy, chatanachata hmoparaotuhpazy hawhta ama cha reipachhiena kyh liana chata nama hmotao phapa ama hmôpazy vâta pachia awpata a vaw tlô tina chata Khazohpa ama palyupalih thei aw.

13 Abeipa vâna chata chyhsapa raopa maih hnohta a ngiarih teh u, a chônôpata a ypa abeichaipa lâta tlyma,

14 hmo paraotuhpazy chôta phuh la awpata nata hmo a tao phatuhpazy reithai awpata ano tuapachhuahpa râh avaotuhpa lâta chhao.

15 He he Khazohpa khona zie châ tlôh ta, ahrupazy bierei so leipa cha hmophapa taopata nama khupa he.

16 Khotalaipa châ eichi ta, chârasala nama khotalaina cha molei khu nawpata hmâh leipata, Khazohpa chakaopata y nawpata tlao hmâh teh u.

17 Chyhsa zydua za teh u. Unawh sahlaozy cha kyhpachâ teh u. Khazohpa chi teh u. Abeichaipa cha za teh u.

Krista taona amopâna

18 Chakaopa saih u, nama hyutuhpazy cha a ngiarihpata ama rei sai ta y teh u, chyhsa phapa nata nônaipazy liata dei châ leipata chyhsa nôchhiepazy liata chhao.

19 Chyhsa ta Khazohpa pahnona vâta pasa tao lei awpa taopata, pachârôna a tao hualua khiahta cha, cha cha Khazohpa khona zie châ tlôh ta.

20 Molei ei chi ta, tuna pasa taopata tiama ngaitapata pasa tao hra ula, reithaina khâpa nama hlao tyh? Anodeikuacha hmo aphapata taopata pasa nama tao nata tiama ngaitapata nama tao khiahta cha, cha cha Khazohpa khona zie a châ.

21 Krista chhao khata nama châta pasa a taopa vâta, he hawhta tao awpata awpa châ tlôh eichi ta, a hnie nama zina awpata mopâ awpa a cha sopa ei kha.

22 Ano chata hmo rai parao leipata; a pakah liata haidihaiduana y hra vei.

23 Chyhsa rapata a y nota ra hri leipata; pasa a tao nota pachhipary leipata; a sia ngaitapata a pachia tyhtuhpa hnohna chata tlao a pie ta.

24 Moleina lâta zy thi hapata, siana lâta eima hroh thei nawpata, ano tlaita a pôhpata tho liana kha eima moleinazy phaoh ta. Ano ama chheina hmahzy chata patlâhpata y haw eichi ta.

25 Mietahkupa aleipa hawhta nama leipa kha, atahmâ deikua cha nama thlahpa Vaituhpa nata Hyutuhpa lâna chata nama kua haw heih hih. 

1 Pity (1 Peter)

Bo 1	Bo 2	Bo 3	Bo 4	Bo 5

1 Pity 3

1 Pity 3

Lahpinô nata vahpazy hrozie

1 Cha hawhna hra chata nâmo lahpinô saih u, nama vahpazy rei sai ta y teh u, chatanachata nama hryta ahyrai ta Khazohpa bie cha zyh hra vei sala, bie leipata ama lahpinôzy yzie ta pahniepata ama y thei aw.

2 China chôta nama yzie pathaihpa mona chô ta.

3 Namâ tobina cha khôtho lâ a tobina, sâ phiehpa zy, ngôh pachhih a aopazy, chysia ta a tobipa zy châ leipata,

4 pathi palôh liata chyhsapa pachâna zie cha palôhrupa reisipa nata nônai chysia rao thei leipata a tobipa tlao châ se. Cha cha Khazohpa mohmô ta a sôh ngaitapa a châ.

5 Cha hawhna hra chata hlâno ta chanô pathaihpa, Khazohpa ngiapâtuhpazy chhao khata ama vahpa rei sai ta ypata, a tobi tyh tlôh ei ta.

6 Sarai ta Abaraha cha “Beipa” tahpata a bie â ngiahpa hawhna khata. Hmophapa nama tao khiahtala china y leipata, Sarai sawzy nama châ aw.

7 Nâmo vahpa saih u, cha hawhna hra chata chanô he hmobao rao nao viapa ama châpa vâta nata, ngiachhiena hrona a tolâhtuhpa ama châpa vâta, palyupalihna chôta pahnona lymâ hawhta nama lahpinô zy hnohta y teh u, nama thlahchhânazy pakhâpata a y lei nawpata.

Siana nata taona

8 A chhâ chaina ta cha, nama palôhrupa su khata y ula, tha a pasa rairieh teh u, unawh hawhta kyh a pachâ ula; ngiachhiena hnei ula, reisipata y teh u.

9 Moleina cha moleina ta viarithô leipa ula; rana, rana ta viarithô leipa ula, byhnâ tlao awpa teh u, he vâna heta awpa châ tlôh ei chi ta, byhnâ to awpata

10 Khazohpa châ bie ta: “Hrona kyh a pachâ khohpa nata nôphazy a hmô khohpa chata, moleina liata a paleih a phapata vaih sala, a hmao chhao haidihaiduana bie reih lei awpata a phapata vaih mawh sy;

11 moleina a heisaipata hmophapa tao mawh sy. Adyhna tluapata a chadai lymâ mawh sy.

12 Abeipa mo cha chyhsa siapazy chôta su ta,a nahkhao ama thlahchhânazy lâta nahthlie tyh tlôh ta. Châhrasala Abeipa hmia cha hmoparaotuhpazy chôta a y tyh,” tahpa châ tlôh ta.

13 Hmophapa lâta phahnai namâ ngiah khiahta cha, ahyma cha parao thei aw ei?

14 Châhrasala siana vâta pasa a tao hawpa nama châ khiahta cha, nama nohhlao aw. Ama chichhihna cha chi leipa ula, nôpopata y hra khah u;

15 châhrasala nama pathipalôh liata Krista cha Abeipa ta rao teh u. Nâmo liata a ypa nama hnabeisei chhâpa cha hiahripa maih a chhy awpata amâchiehpata y teh u, châhrasala reisi ngaitapata nata china chôta;

16 ngiaryna ryh leina pathaih ngaitapa hnei ula, chatanachata ama cha reipachhiena kyh liana chata Krista liata nama yzie pha ngaitapa a reipachhietuhpazy cha pamaophyusapata ama y thei aw.

17 Hmo moleipa taopa vâta pasa taopa hlâta cha Khazohpa a ryh atahna zie a châ khiahta cha, hmo phapa taopa vâta pasa taopa he pha via tlôh ta.

18 Khazohpa lâta maniah a chhihtha thei nawpata. Krista chata moleipazy vâta eikha pasa tao haw tlôh hra ta. Chyhsa siapa chata chyhsa sia leipa vyuhpata pasa tao ta, sapa liata pathipata y ta, thlahpa liata deikua cha pahropata y haw ta;

19 cha chata patâhna o liata thlahpa a ypazy lâna chata, bie tlâh za awhkhei ta,

20 chazy chata hlâno ta Naw a hro nota balyh a tao chhôh zydua liata Khazohpa nôphana ta a hâ nona khata angiapâ leipa ei ta, cha balyh liana chata chyhsa chyhta (chyhsa pacharie tahna a châ), ti tawhta pachhapata ama y haw.

21 Cha alyupa bâtina chata Zisu Krista thyutheihna vâta atahmâ a cha pachha ei, sapa pualeina pathaihpa dei châ leipata, ngiaryna ryh leina pathaihpata Khazohpa padopa he tlao a châ;

22 Zisu Krista cha avâ lâ kiapata, Khazopa chachâh lâta y ta, a vâlyuhchâpa sahlaozy, biehneina zy, hmotaotheina zy, ano rei sai ta pa-ysapata y ei ta. 

1 Pity (1 Peter)

Bo 1	Bo 2	Bo 3	Bo 4	Bo 5

1 Pity 4

1 Pity 4

Khazohpa ngiachhiena sôh mokhâhtuhpa phapa

1 Chatanachata Krista sapa ta pasa a taopa vâna chata nâmo chhao cha hawhpa pachâna cha a tobi hra teh u, sapata pasa a tao hawpa chata moleina bâhsai haw tlôh ta.

2 chatanachata atahmâ tawhta sapa ta nama y chhôhta cha chyhsapa aohraona lâtazy y khao leipata Khazohpa khona zie liata nama y ha aw.

3 Zenitaizy khopa taona liata nata parâna liata zy, pôhpa aohraona liata zy, kresawti parâna kyh liata zy, nohthlahpa chhyna pasichhih ngaitapa liata zy ypata, nama daihti vaw pahryu hapazy cha â daih haw.

4 Cha zy liana chata âmo phasana chakao tuna hawhta nama chakao hra leipa he ama noâh kaw ta, ama cha reipachhie tyh;

5 âmo chata ahrohpa nata athihpazy pachia awpata amâchiehpa hnohna chata ama thâtih ama reih aw.

6 He vâna heta athihpa hnohta chhao Thâtihpha chhopa a châ, sapa ta a ypa chyhsazy hawhta pachiapata y aw ei ta, thlahpa deikua a Khazohpa hawhta ama hroh thei nawpa ta.

Siana nata taona

7 Hmo zydua chhâna cha a hnia haw ta; chavâta thlah nama chhâ thei nawpata palôhrupa a sia ngaitapata phaoh teh u.

8 Ato hlâta phahnai khoh ngaitapata kyh apachâ rairieh teh u. Kyhpachâna ta moleina hluhpi khu tyh tlôh ta.

9 Paphôh leipata a pasa rairieh teh u.

10 Chyhsa tota hmopiepa nama hmô lymâpa hawhta Khazopa ngiachhiena to mokhâhtuhpa phapazy hawhta, chazy chata a chakao rairieh teh u;

11 chyhsa ahyrai ta bie a reih khiahtala Khazohpa bie hawhta reih mawh sy; chyhsa ahyrai ta ama chakao khiahtala Khazohpa ta thatlôna a piepa lymâ hawhta chakao mawh sy, chatanachata Zisu Krista vâta Khazohpa cha hmo to liata palyupalihpata a y thei aw, rônahna nata ryureina cha chhâzaw ta ano eih châ tlôh ta. Amen.

Krizyhpa châna vâta taona

12 Kho ngaitapa saih u, nama hryta pasiana thata a vaw ypa nâmo pasiana awpata nama chôta a vaw tlôpa he hmonoâhpa nama chôta a tlôpa hawhta raopata y khah u.

13 Krista pasa taonazy liata a taolatuhpa nama chânazie lymâ hawhta alypata tlao y teh u, chatanachata a rônahna a vaw luah tina chata, nâmo chhao thapha ngaitapata namâ ly thei aw.

14 Krista moh vâta rapa nama châ khiahtala nama nohhlao na, rônahna Thlahpa nata Khazohpa Thlahpa cha nama chô liata y tlôh ta.

15 Châhrasala nama hry liata ahyhma ta lianycheituhpa a châpa vâta tlyma, parutuhpa a châpa vâta tlyma, hmoparaotuhpa a châpa vâta tlyma, mo hropazy hmotaopa a pachiatuhpa a châpa vâta tlyma, pasa tao kha se;

16 anodeikuacha Krizyhpa a châpa vâta pasa tao sala, za kha se, cha moh vâna chata Khazohpa tlao palyupalih mawh sy.

17 Pachiana cha Khazohpa chhôkhazy liana heta pathao a daih ha tlôh ta; chatawhcha keimo lia hmahta a pathao tua khiahta cha Khazohpa Thâtihpha bie a zyh leipazy chhâna cha kha tluta ma a châ aw tly?

18 Khazohpa châ bie ta. “Chyhsa siapa hmahta pachha lyliahpa a châ khiahta cha, Khazohpa a pachâ leipa nata moleipa cha khataih liata amâ luah aw?” tah ta.

19 Chavâta Khazohpa a ryh a tahnazie hawhta pasa a taopazy chata hmo phapa taopata ama thlahpazy cha Taotuhpa ngâchhih ngaitapa lâta pavaosa mawh sy. 

1 Pity (1 Peter)

Bo 1	Bo 2	Bo 3	Bo 4	Bo 5

1 Pity 5

1 Pity 5

Khazohpa mietahkupazy pasana

1 Chatanachata nama hryta awnanopa machâzy cha kei nama machâ heih, Krista pasa taonazy a pahnotuhpa rônahna a vaw luah awpa a to hra tuh awpa heta ei cha pasyu ei.

2 Nama hryta Khazohpa a kaopa sahlao a ypa cha mokhâh teh u, tao awpa a châpa vâta châ leipata, Khazohpa bie hawhta byuh ngaitana chôta, a vyuhna puapa khopa vâta châ leipata, palôhrupa ta tlao kho ngaitapata.

3 Nama topazy chô liata a pabeisa hra leipata, a kaopa sahlao mopakhô nawpata tlao a taopata hyu teh u.

4 Chatawhcha mietahkuvaituhpa Beichaipa cha a vaw luah tita, rônahna beilakho a rao thei leipa cha nama hmô aw.

5 Cha hawhna hra chata nâmo satlia viazy saih u, machâ hnohta zy a ngiarih teh u. Nama zydua ta a chakao rairieh chyu awpata reisina ta atobi teh u, “Khazohpa ta a palaipazy a dyuh ta, a reisipazy deikua cha ngiachhiena a pie tyh.”

6 Chavâta a daihti liana chata a cha palyupalih theina awpa ei ta, Khazohpa ku thatlô ngaitapa ry liana chata a panawh ula.

7 Ano ta a cha pachâ tyhpa vâ ei ta, nama nôpona zydua ano chô liata pahnieh khai teh u.

8 Mokhâh ula, a hrohrua teh u. Nama dyutuhpa ahripa cha chakeibarôhneipa a rôh tyhpa hawhta, a nie thei awpa tluapata a khie tyh.

9 Nama unawhpa khizaw liata a ypa sahlao chô liana chata cha hawhta pasa taona châ a tlôh hra tahpa pahnopata ngiapâna â i ngaitapata ypata ano cha adyuh teh u.

10 Chatawhcha ngiachhiena zydua Khazohpa, a chhâzaw rônahna to awpata Krista liata châ awtuhpa tlai chata bohpi leipata pasa nama tao khai tawhta tao pakipata, pa-ipata tha a cha patlô aw ei.

11 Ano hnohna chata ryureina cha chhâzaw ta y mawh sy, Amen.

Pasyuna

12 Ei unawhpa ngâchhih ngaitapata ei raopa Silvana ku liana heta nâmo pasyupa nata cha cha Khazohpa ngiachhiena hmeiseihpa a châ tahpa pahnosapata a chyuta nâmo lâta ei roh; chazy liana chata â ipata a duah teh u.

13 Babylaw khih liata a ypa, nâmo hawhta a tlyhpa nô heta a châ naoh ei; cha hawhna hra chata ei sawchapawpa Maka chhaota a châ naoh ei.

14 Kyhpachâna syna ta sypata a naoh rairieh teh u. Nama hryta Krista liata a ypa maih hnohna chata adyhna y mawh sy. 

1 Pity (1 Peter)

Bo 1	Bo 2	Bo 3	Bo 4	Bo 5