Zeremiah 44
Izi râh liata Zu mozy hnohta Zeremiah ta a chhochhielie
1 Izi râh liata Zuzy pahrâpa zydua Mikadô khih zy, Tahpahe khih zy, Memphi khih zy nata Pathrô râh liata a pahrâpa zydua kyh liata Zeremiah hnohta bie a vaw tlôpa cha,
2 “Pheisaihzy ABEIPA Izarel Khazohpa chata he tana heta a tah: Zerusale nata Zudah khihpi zyduazy chô liata hmopha leipa ei patlôsapa zydua zy cha hmô haw eichi ta. Atahmâ heta roryhrapa ta châ haw ta, ahy hmah pahrâ khao veih ei,
3 âmo chhaota, nâmo chhaota, nama pathlapazy chhaota khazoh hrohpazy ama pahno beih leipa chakao awpa nata âmo lâta rohpahâhpa raopa ta ei hie na pahâh awpa ta ama hmoparaona zy ama tao hawpa vâta.
4 Chata hra sala nâmo hnohna chata na chakaotuhpa hrohsopa zydua zy mydi ta thyupa ta tuah na ta, ama hnohta, ‘He hmo pasichhihpa ei hao ngaitapa he tao khao khah u!’ tahpa ta.
5 Châhrasala nahthlie veih ei, ama hmoparaona khazoh hropazy lâta rohpahâhpa rao lei awpa cha ama nah pachôh hra veih ei.
6 Chavâta ei pathi-iana nata hiehâhna cha Zudah khihpizy liata nata Zerusale othliah zy liata ei patlai nah ta, ia haw ta, atanoh ta a ypa hawhna heta pathaihparohpa nata roryhrapa ta a y hih.
7 Atahmâ ABEIPA Pheisaihzy Khazohpa, Izarel Khazohpa chata: Nâmo hry tawhtapa a chanô a chapaw, hawsaih zy, sâhpi a pazy haipazy Zudah hry tawhtapa ahy hmah pahlôh leipa ta chhawh pathla khai nawpa ta khazia e, he hmopha leipa he nama hrona chô tlai liata nama tao tly?
8 Nama kei pahrâna Izi râh khazohzy lâta rohpahâhpa raopa ta, khizaw phopi zydua hry liata chhiesapa nata reipachhiepa nama châ theina awpa ta nata chhawh pathlapa nama châ thei nawpa ta nama ku hriapa tlaita ei hie nama pahâh?
9 Nama pathlatuhpazy hmoparaona, Zudah abei sahlao hmoparaonazy, nâmo tlai hmoparaona zy nata nama lahpinô zy hmoparaona, Zudah râh nata Zerusale othliah liata ama tao hawpa zy cha nama my haw ma?
10 Atanoh taih chhao heta a ngiapachhi hlei leipa ei ta, nama pathlatuhpazy nata nama hmiakô liata ei paluahsapa, ei ryhpa nata ei bieraopazy cha a chhih leipa ei ta, chi hra veih ei.
11 “Chavâta Pheisaihzy ABEIPA Izarel Khazohpa chata he tana heta a tah: Pachâ teh u, nama raona awpa ta Zudah sahlao zydua chhawh pathla khai awpa ta ei cha heihnao aw ei.
12 Zudah laibâhpa Izi râh liata pahrâpa a chhuahpa ta a heih raruahtuhpazy cha patu aw na ta, amâ mo khai aw; Izi râh liana chata pao aw ei ta, zaozi nata chakâhna zy ta pahleipadiapa ta ama y aw; a chyh chaipa tawhta a lai chaipa taihta zaozi nata chakâhna ta ama thi aw; chhisapa nata noapa nata pakah my papaina nata reipachhiepa ama châ aw.
13 Zerusale ei hriepa hawh hra ta, Izi râh liata a pahrâpazy cha zaozi zy, chakâhna zy nata potlana zy ta hrie tlôh aw na ta,
14 Izi râh liata pahrâ awpa ta a siepa Zudah laibâhpazy cha, Zudah râh ama yna lâta kua heih ama byuh ngaitana liana chata kua awpa ta pakha hmah a hrohpa ta pua aw veih ei; a ru lâta a râpazy deita leipa ta cha ahy hmah kua aw veih ei.
15 Chyhsa zydua ama lahpinôzy ta khazoh hropazy lâta rohpahâhpa ama rao tahpa pahnopazy nata chanô cha liata a duahpa zy, zawpi hluhpi Izi râh Pathrô liata a pahrâpa zawpi zydua chata Zeremiah a chhy ei ta, he tana heta tah ei ta:
16 “ABEIPA moh ta eima hnohta bie na reipazy kha cha nahthlie aw ma pi.
17 Keimo nata eima pathlapazy, eima beizy, eima beisawzy ta Zudah khihpizy liata nata Zerusale othliahzy liata ama tao haw tyhpa hawhna khata avâ beinô lâta rohpahâhpa raopazy nata ano lâta dopa hlâna patlaipazy eima reikah puapa maih tlyma hawhna khata eima tao tlai aw; cha nona chata niebaw hluhpi hnei pi ta, a tlâhpa ta y pi ta, hmopha leipa rai hmô ma pi.
18 Avâ beinô lâta rohpahâhpa raopa nata ano lâta dopa hlâna patlaipazy eima bâh sai rakha tawhna heta ato tlao a phahla pi ta, zaozi nata chakâhnazy ta pahleipadiapa ta eima y haw.”
19 Chatawhcha chanôzy chata, “Avâ beinô lâta rohpahâhpa eima rao nota nata ano lâta dopa hmohlâpa eima patlai nona zy khata, eima vahpazy a ry tah leipa ta ma, achhyna châta viahchhâ tao pi ta, ano lâta dopa hmohlâpazy eima patlai tly?” tah ei ta.
20 Zeremiah chata zawpi zydua, a chapaw a chanô ta, ano achhytuhpa zydua hnohna tlai chata:
21 “Zudah khihpi liata zy, nata Zerusale othliah liata nâmo nata nama pathlatuhpazy, nama beipa zy, nama abeisawzy, nata râh liata zawpizy rai ta, rohpahâhpa ama raopazy cha ABEIPA ta pahno thlâh ha ta, a palôhrupa liata ngia vei ma?
22 Nama hmo moleina taopa vâta nata hmo pasichhihpa taopazy vâta ABEIPA ta a tao thei khao leipa kha; chavâta nama râh cha atanoh ta a ypa hawhna heta râh roryhrapa, noâhpa chhiesapa, pahrâtuhpa y leipa a vaw châ haw hih.
23 Rohpahâhpa rao eichi ta, ABEIPA chô liata molei eichi ta, ABEIPA bie a ngiah leipa eichi ta, a ryhpa tlyma a bieraopazy tlyma, a biepahnosapazy tlyma nama ngiah hra leipa vâta, he vâchhiena he atanoh ta a ypa hawhna heta nâmo chô liata a vaw tlô hih,” tah ta.
24 Zeremiah chata zawpi zydua nata chanô zydua hnohta, “Izi râh liata Zudah sahlao zydua saih u, ABEIPA bie he thei teh u,
25 Pheisaihzy ABEIPA, Izarel Khazohpa chata he hawhna heta a tah: Nâmo nata nama lahpinôzy chata, ava beinô lâta rohpahâhpa raopa nata dopa hlâpa patlaipazy cha bie eima vaw taih hawpa lymâ hawhta eima tao tlai aw,’ tahpa ta nama pakah ta reih haw eichi ta, nama ku ta patlô haw hra eichi ta. Nama bietaipazy cha pa-i ula, nama bie a chhuahpazy cha patlô lâlao teh u.
26 Chavâta nâmo Zudah sahlao Izi râh liata a pahrâpa zydua saih u, ABEIPA bie he nahthlie teh u: Pachâ teh u, ‘ABEIPA Khazohpa a hroh,’ tahpa ta Izi râh zydua liata a pahrâpa Zudah chyhsa ahy pakah liata hmahta ei moh paro beih khao aw vei, tahpa ta ei moh rôhnahpa reipa ta chhie ei sa, ABEIPA ta a tah.
27 Ama phana awpa châ leipa ta, ama chhiena awpa ta âmo ei byh thlâh haw; Zudah chyhsa Izi râh liata a ypa zyduazy cha zaozi zy, chakâhna zy ta patlôpa ta ama y aw, ama leidia khai hlâ lei cha.
28 Chatawhcha zaozi ta a pahlei laibâhpa a chyhta zy cha Izi râh tawhta puapa ta Zudah râh liata ama ngia aw; chatawhcha Zudah chyhsa a laibâhpa zydua Izi râh liata pahrâ awpa ta a siepazy chata ahy bie ma a duah aw, kei bie ma, ama bie ma ama pahno aw.
29 He he nama châta pahnona a châ aw, ei bie he nama chôta hmopha leipa lâ chata a duah tlai aw, tahpa nama pahno theina awpa ta he su liana heta ei cha hrie aw ei, ABEIPA ta a tah:
30 ABEIPA chata he tana heta a tah, Phirao Hôphra Izi beipa cha a khakhaipa a hrona a tluatuhpazy ku liata ei patusa aw, Zudah beipa Zedekiah khakhaipa a hrona a tluatuhpa Babylaw beipa Nebukareza ku ta ei piepa hawhna khata,” tah ta.