Zeremiah 43
Izi râh lâ paina
1 Zeremiah ta vâtlâh mo zydua hnohta ABEIPA ama Khazohpa bie zydua, ABEIPA ama Khazohpa ta rei awpa ta ama hnohta a tuana bie, he bie zydua tlai he a rei khai nah chata
2 Hôshaiah sawchapawpa Azariah nata Kariah sawchapawpa Zôhana nata chyhsa a palaipa zydua zy chata Zeremiah cha chho ei ta, a hnohta, “Na haih na, ABEIPA eima Khazohpa ta, Izi râh liata pahrâ awpa ta nama sie awpa châ vei,’ tahpa reih awpa ta cha tuah vei;
3 Kaldia mo ku liata patusapa ta ypa ta maniah ama thie theina awpa nata Babylaw sei ta maniah amâ chhi theina awpa ta Neriah sawchapawpa Baruka chata maniah a tei awpa ta tlao a cha tuah he,” tah ei ta.
4 Chatanachata Kariah sawchapawpa Zôhana nata pheisaih sahlao hyutuhpa zydua nata zawpi zydua chata Zudah râh liata pahrâ awpa ta ABEIPA reikah cha a ngiah leipa ei ta.
5 Kariah sawchapawpa Zôhana nata pheisaih sahlao hyutuhpa zydua chata Zudah laibâhpa zydua, Zudah râh liata pahrâ awpa ta to pathlahpa ta ama yna phopizy hry tawhta a vaw kuapa
6 chapaw zy, chanô zy, hawti zy, abei sawchanô zy nata chyhsa to vaihtuhpa hyutuhpa Nebuzarada ta Shaphana sawchapawpa Ahika sawchapawpa Kedaliah nata a hnohta ama siesaipa zy cha; hrohsopa Zeremiah nata Neriah sawchapawpa Baruka zy chhao, a chhi khai haw hra ei ta.
7 Chatawhcha Izi râh cha tlô haw ei ta, ABEIPA reikah cha a ngiah tlôh leipa ei ta. Chatawhcha Tahpahe khih cha tlô ei ta.
8 Tahpahe liana chata Zeremiah hnohta ABEIPA bie vaw tlô ta:
9 “Alô laipapizy la la, Tahpahe liata Phirao o a ngiana thaby liata beih-lei raopa paraipa liana chata Zudah chyhsazy mohmô lia tlaita pabu teh,
10 ama hnohna chata, ‘Pheisaihzy ABEIPA Izarel Khazohpa chata he tana heta a tah: Na chakaotuhpa Babylaw beipa Nebukareza cha la aw na ta, ano chata he alôzy ei nyupa chô liana heta a ryureina dyuchhai a patyuh aw, ano chata ama chô liata abei poh-o a parai aw.
11 A vy aw ta Izi râh cha a tusao aw, thina eipa cha thina liata, seichâna eipa cha seichâna liata, zaozi eipa cha zaozi liata ei pie aw.
12 Izi chyhsazy khazoh ozy liana chata mei patih aw na ta; kâ aw ta, sei ta a chhi aw; mietahkuvaihtuhpa poh a bupa hawhta Izi râh cha a bu aw; chatawhna chata thlalôhpa ta pua aw ta.
13 Izi râh liata Heliôpôli o a sâhpazy pacho aw ta, Izi mozy khazoh ozy cha mei ta a rao aw a tah,’ tah teh,” tah ta.