Zeremiah 40
Zeremiah nata Kedaliah hnohta laibâhpa
1 Zerusale nata Zudah sei zydua Babylaw lâta sei ta amâ chhipa zydua hry liata Zeremiah bâlia patuna chôta, a chhi nota vaihtuhpa hyutuhpa Nebuzarada ta Ramah tawhta a papua tawhta, ABEIPA tawhtapa Zeremiah hnohta bie a vaw tlôpa cha.
2 Vaihtuhpa hyutuhpa chata Zeremiah cha a chhi ta, a hnohta, ‘’ABEIPA na Khazohpa chata he su liana heta hmo pha leipa a vaw tlô awpa cha vaw phuah haw ta;
3 ABEIPA chata patlôsa haw tlai ta, a reipa lymâ hawhta tao haw ta. ABEIPA chô liata hmo parao eichi ta, a bie namâ ngiah leipa vâta he hmo he nama chô liata a tlô hih.
4 Atahmâ pachâ teh, he noh liana heta na ku liata bâlia pakypa cha ei cha pathlâpa. Babylaw lâta ei hnohta a vypa na khoh khiahtala a vy la, a phapa ta ei cha hrôbieh aw; Babylaw lâta ei hnohta nâ vy khoh vei khiahta deikua cha, a vy leipa ta y teh. Râh zydua na hmiakô liata a y hih; sie a ry na tah nahta a pha na tahna maih lâta sie mah y, tah ta.
5 A kua hlâta ano chata Zudah khihpizy chô liata ryureituhpa Babylaw beipa ta a taopa Shaphana sawchapawpa Ahika sawchapawpa Kedaliah lâta kua la, chyhsazy liata a hnohta y teh; a châ vei khiahtala sie awpa a ryh na tahpa maih lâta sie teh,” tah ta. Chatanachata vaihtuhpa hyutuhpa chata niepa nata hmopiepa pie ta, pasiesa haw ta.
6 Zeremiah cha Ahika sawchapawpa Kedaliah hnohta Mizpah lâta sie ta, a hnohta a râh liata chyhsa a ypazy hry liana chata y haw hra ta.
7 Pheisaih sahlao hyutuhpa zydua lyurâhpa liata a ypa zydua chata âmo nata ama sahlaozy ta Babylaw beipa ta Ahika sawchapawpa Kedaliah cha cha râh liata chyhsa sipasa chaipazy, chapawzy, chanô zy, sawnawh zy Babylaw lâta sei ta a chhi leipa zydua cha a pavaosa tahpa ama pahno nahta,
8 Mizpah liata Kedaliah lâta a vy ei ta, Nethaniah sawchapawpa Ishmael zy, Kariah sawchapawpa Zôhana nata Zawnatha zy, Tahuma sawchapawpa Seraiah zy, Netôpha khihpi Ephai sawchapawpazy nata Makatha khihpa sawchapawpa Zezaniah zy nata ama sahlaozy cha.
9 Shaphana sawchapawpa Ahika sawchapawpa Kedaliah chata âmo nata ama sahlaozy hnohta, “Kaldia mozy chakao awpa ta chi khah u, râh liana heta molo ta y teh u, Babylaw beipa chakao ula, nama châta a pha aw.
10 Kei cha Kaldia mo Mizpah liata pahrâ aw na ta, ei hnohta a vy awpazy hmiakô liana chata nama vyuhpa ta ei duah aw; nâmo deikua chata kresawti zy, nopinoh theilâpazy, sathaw zy pahmaoh ula, nama beihzy liata soh ula, khihpi nama lapazy liana chata pahrâ teh u,” tahpa ta chhie sa ta.
11 Cha hawhna hra chata Zu chyhsa zydua Môaba râh liata a pahrâpazy Amawni chyhsazy hryta a pahrâpazy nata Edôma râh liata a pahrâpazy nata râh hropa liata a ypazy chata Babylaw beipa ta Zudah chyhsa thokha siesai ta, âmo chô liata Shaphana sawchapawpa Ahika sawchapawpa Kedaliah a sopa ama pahno nahta,
12 Zunaw sahlao zydua ama tona râh zydua tawhta vaw kua ei ta, Zudah râh liata Mizpah liata Kedaliah hnohta vaw tlô ei ta, Kresawti nata nopinoh theilâpa thata la pakhy ei ta.
Kedaliah chôta Ishmael bie paraopa
13 Chatawhcha Kariah sawchapawpa Zôhana nata pheisaih sahlaozy hyutuhpa râh liata a ypa zydua cha Mizpah liata Kedaliah hnohta a vy ei ta!
14 a hnohta, “Amawni chyhsazy beipa Baali chata na hrona la awpa ta Nethaniah sawchapawpa Ishmael a tuah tahpa na pahno ma?” tah ei ta. Ahika sawchapawpa Kedaliah deikua chata zo leipa ta.
15 Kariah sawchapawpa Zôhana chata Mizpah liata Kedaliah hnohta chyhsa tuah ta, Nethaniah sawchapawpa Ishmael cha ei kei thie ha aw na, ahy hmah ta pahno aw veih ei, Zu chyhsa na hnohta a y pakhypa zydua pai khai haw ei ta, Zudah chyhsa a y tlakaihpazy leidiana tao awpa ta khazia e na hrona a la aw tly?” tahpa ta a ru lâta reih ta,
16 Ahika sawchapawpa Kedaliah deikua chata Kariah sawchapawpa Zôhana hnohna chata, “He hmo he na tao awpa châ vei, Ishmael na reina zie he a do vei,” tah ta.