Zeremiah 39
Zerusale paona (2 Ab 24:20-25:21; 2 Tr 36:17-21; Zer 52:3-30)
1 Zudah beipa Zedekiah abeina kô chakina, thla hrawhna liana chata Babylaw beipa Nebukareza nata a pheisaih zydua zy chata Zerusale adyuhpa ta padô ei ta;
2 Zedekiah abeina kô hrawhleikhana, thla palihna, cha thla noh chakina liana chata khihpi kuh cha su pathla ei ta.
3 Zerusale ama la nata Babylaw beipa abeisaw zydua cha a ngia ei ta, chhikao a liahliah liatahpa liana chata atyuh ei ta, Nekashareza Samkanebô beipa zy, Sarseki hrilyupa hyutuhpa Nekashareza pheisaihzy hyutuhpa zy nata Babylaw beipa abeisaw hropa zydua zy chhao,
4 Zudah beipa Zedekiah nata adyuhna chyhsa zydua chata âmo cha ama hmô nahta a râ ei ta, khihpi tawhtapa zâlâ ta abeipa sahdô lâpi lâta kuh pâhchhô miano likawh ta chhikao liata pua ei ta; âmo cha Arabah lâpi lâta pua ei ta.
5 Châhrasala Kaldia mo pheisaih sahlao chata ano cha a chadai ei ta, Zerikô bypi liata Zedekiah cha pha haw ei ta; chatawhcha ama patu nahta Babylaw beipa Nebukareza hnohta Hama râh liata Riblah lâna chata a thâtih pachia ta.
6 Babylaw beipa chata Riblah liata Zedekiah sawchapawpazy cha ano mohmô tlai liana chata thie ta; Babylaw beipa chata Zudah chyhsa phapa zydua zy thie hra ta.
7 Zedekiah mo thaoh ta, bâliazy ta buh ta, Babylaw râh lâta a chhi haw ta.
8 Kaldia mozy chata abei o nata vâtlâh o zydua mei ta rao ei ta, Zerusale kuh pâhchhôzy chhao parao ei ta.
9 Chatawhcha vaihtuhpa hyutuhpa Nebuzarada chata khihpi liata zawpi a ypazy a hnohta amosasyh ta a pihpazy nata zawpi a laibâhpazy cha sei ta a chhi ta.
10 Châhrasala vaihtuhpa hyutuhpa Nebuzarada Zudah râh liata chyhsa sipasapa, khâpa hmah a hnei leipazy cha siesai ta, kresahdôzy nata lyuzy pie ta.
Nebukareza ta Zeremiah hrôbieh ta
11 Babylaw beipa Nebukareza chata Zeremiah kyh liata vaihtuhpa hyutuhpa Nebuzarada hnohta,
12 “Ano he la la, a phapa ta pachâ la pasana rai pie khâ, na hnohta a reipa lymâ hawhta tlao tao teh,” tahpa ta bie pie ta.
13 Vaihtuhpa hyutuhpa Nebuzarada chata Nebushaba hrilyupa hyutuhpa zy, Nekashareza pheisaih hyutuhpa zy nata Babylaw pheisaih hyutuh viapa maih bie ta khai ta,
14 âmo chata Zeremiah cha vaihtuhpa dôhpachhôh tawhtapa la ei ta; Shaphana sawchapapaw Ahika sawchapawpa Kedaliah hnohta a o lâta a chhi awpa ta pavaisa ei ta. Cha lâna chata chyhsa hry liana chata y haw ta.
Ebemeleka pachhana tona
15 Vaihtuhpa dôhpachhôh liata patâhpa ta a y nona chata, ABEIPA bie cha Zeremiah hnohta vaw tlô ta;
16 “Sie la, Ethiôpia chyhsa Ebemeleka hnohta, ‘Pheisaihzy ABEIPA Izarel Khazohpa chata he tana heta a tah: Pachâ teh, a phana awpa châ leipa ta he khihpi raona awpa ta ei biezy vaw tlôkhei aw na ta, cha noh liana tlai chata na hmiakô liata patlôpa a châ aw.
17 Cha noh liana deikua cha ei cha pachha aw, ABEIPA ta a tah, na chyhsa chipazy ku liata piepa châ aw va chi.
18 Cha pachha tlai tlôh aw na ta, zaozi ta pao aw va chi, na hrona cha na paboh aw, kei eina ngâpa vâ chi ta, ABEIPA ta a tah,’ tahpa ta reih teh,” tah ta.