Zeremiah 37
Zeremiah ama patâh
1 Zôsiah sawchapawpa Abei Zedekiah cha Babylaw beipa Nebukareza ta Zudah râh beipa ta a taopa cha Zehôiki sawchapawpa Kôniah vyuhpa ta ryu vaw reih ta.
2 Châhrasala ano nata a chakaotuhpazy nata a râh liata chyhsazy chata ABEIPA bie hrohsopa Zeremiah pakah ta a reipa cha nahthlie leipa ei ta.
3 Beipa Zedekiah chata Shelemiah sawchapawpa Zehuka nata Maasei sawchapawpa theihthaipa Zephania cha hrohsopa Zeremiah hnohta, “ABEIPA eima Khazohpa lâta thlah maniah chhâpa teh,” tah awpa ta tuah ta.
4 Chatawhcha Zeremiah cha zawpizy hry liata a khopa hawhta charei thei ta, patâhna o liata soh tlôh lei khâh ei ta.
5 Phirao pheisaih sahlaozy cha Izi râh tawhta vaw pua haw ei ta; Kaldia sahlao Zerusale adyuhpa ta a padotuhpazy chata ama thâtih ama pahno nah ta, Zerusale cha bâsai haw ei ta.
6 Chatanachata ABEIPA bie cha hrohsopa Zeremiah hnohta vaw tlô ta:
7 ABEIPA Izarel Khazohpa chata he tana heta a tah: Zudah beipa keima na chhohia awpa ta châ tuahtuhpa hnohna chata he tana heta nama reih aw, ‘Phirao pheisaih sahlao nâmo châ bao awpa ta a vypazy cha âmo râh Izi liana chata ama kua heih aw.
8 Kaldia mozy deikua cha a vy aw ei ta, he khihpi he adyuh aw ei ta; la aw ei ta, mei ta ama rao aw.
9 ABEIPA chata he tana heta a tah, “Kaldia mozy chata maniah ama siesai tlai aw,” tahpa ta nâmo sasyh ta a dô khah u, sie aw veih ei.
10 Nâmo cha dyupa ta Kaldia pheisaih sahlao zydua he tusao haw hra ula, ama hry liata hmah phaopa a ypazy deita chhaota âmo poh-o tawhta vaw thyupa ta, he khihpi he mei ta ama rao thlyu aw,’ tahpa ta na rei awpa a châ,” tahpa ta.
11 Phirao pheisaih sahlaozy chipa ta Kaldia pheisaih sahlaozy chata Zerusale ama sisai nona chata,
12 Zeremiah chata chyhsazy hry liata a tovyuh la awpa ta Benzami râh liata a ngia awpa ta Zerusale puasai ta.
13 Benzami kuh chhikao a tlô nata a vaihtuhpa hyutuhpa Hananiah sawchapawpa Shelemiah sawchapawpa a moh Iriza vaw y ta, cha chata, “Kaldia mozy hnohta na pie,” tahpa ta hrohsopa Zeremiah cha patu ta.
14 Zeremiah chata, “Haipa bie a châ, Kaldia mo hnohta a pie va na,” tah ta. Châhrasala nahthlie leipa ta, chatanachata Iriza ta Zeremiah patu ta, abeisawzy hnohta a chhi ta.
15 Chatawhcha abeisawzy cha Zeremiah chô liata ama hiehâh ngaita ta, tu ei ta, chârohtuhpa Zawnatha o liata patâh ei ta, cha cha atâhna o châta ama hmâpa châ tlôh ta.
Zedekiah ta Zeremiah hnohta â pakyh
16 Zeremiah cha alei ry atâhna liata a ngiapa ta noh hluhpi a y tawhta,
17 beipa Zedekiah chata papua ta, abei chata a o liata a ru lâta hiahri ta, a hnohta, “ABEIPA tawhta bie miakha chhâ a y ma?” tah ta. Zeremiah chata, “A y cha,” tah ta. A hnohta, “Babylaw beipa ku liata patusapa ta na y aw,” tah ta.
18 Zeremiah ta Abei Zedekiah hnohna chata, “Nâma tlyma, na chakaotuhpa tlyma he chyhsazy chô liata khâpa hmo ma paraopa ta eina patusa chi?
19 Na hnohta, ‘Babylaw beipa cha nâma nata he râh adyuh awpa ta a vy aw vei,’ tahpa ta a chhochhielietuhpa hrohsopazy cha atahmâ khataih lia ama y haw?
20 Hy ei beipa, abei y, atahmâ pachâ teh, ei châ haw na, ei cha hiana he na pachâpa la, ei châ haw na, chârohtuhpa Zawnatha o liana chata na pakuasa cheita khâ, cha liana cha ei thi pathlei aw na,” tah ta.
21 Chatanachata Beipa Zedekiah chata bie pie ta. chatanachata Zeremiah cha vaihtuhpa dôhpachhôh liana chata patâhsa ta; viahchhâ a taotuhpazy othliah tawhta noh chareih viahchhâ tlâ kha khihpi liata viahchhâ a y chhôhpa pie ei ta. Cha hawhna chata Zeremiah cha vaihtuhpa dôhpachhôh liana chata y thlâh ha ta.