Zeremiah 36
Châ chatyna raona
1 Zudah bei Zôsiah sawchapawpa Zehôiki abeina kô palihna liata he bie he ABEIPA tawhtapa Zeremiah hnohta vaw tlô ta:
2 “Châ chatypa la la, cha liana chata na hnohta bie ei reipa zydua, Zerusale thâtih zy, Zudah thâtih zy, phopi zydua thâtih zy na hnohta bie ei rei no tawhta, Zôsiah daihti no tawhta atanoh taihta bie cha roh teh.
3 Zudah chhôhkhapazy chata ama chô liata hmopha leipa tao ei chhuahpa zydua cha nahthliepa ta, chyhsa to ama yzie moleina amâ heisai thei ngyu aw, ama hmoparaona nata ama moleinazy ei ngiahthai thei nawpa ta,” tah ta.
4 Zeremiah chata Neriah sawchapawpa Baruka aw ta, Baruka chata ABEIPA bie zydua a hnohta a vaw rei ha chiehpa cha Zeremiah pakah tawhta châ chatypa liana chata roh ta.
5 Zeremiah chata Baruka hnohta bie pie ta, “Kei cha patâhpa ta y na ta. ABEIPA o liata a ngia thei va na;
6 chavâta nâ cha sie la, ABEIPA bie ei pakah tawhta châ chatypa liata na ropa kha, chaheina noh liata ABEIPA o liata zawpizy theina liata reih teh, ama khihpi tawhta a vaw puapa Zudah mo zydua theina liata chhao na rei hra awpa a châ.
7 Chyhsa to ta ama yzie moleina kuasaipa ta, ABEIPA hmiakô liata ngiachhiena ama hiapa cha ama tlôkhei thei ngyu la, he chyhsazy chô liata hiehâna nata pathi-iana ABEIPA ta a phuah ha chiehpa cha pasa ngaita kaw tlôh ta,” tahpa ta bie pie ta.
8 Neriah sawchapawpa Baruka chata hrohsopa Zeremiah biepiepa zydua hawhna chata ABEIPA o liata ABEIPA bie châbu liatahpa cha reih haw ta.
9 Zudah beipa Zôsiah sawchapawzy Zehôiki abeina kô pangawhna, thla chakina liana chata ABEIPA hmiakô liata Zerusale liata chyhsa zydua nata Zudah khihpi zydua tawhta Zerusale liata a vypa zydua chata nie leina bie phuah haw ei ta.
10 “Baruka chata ABEIPA o ochhi thiehpa a ngiana liata chhôhpadâhpa, ABEIPA o liana chata Zeremiah bie châbu liatahpa cha chyhsa zydua pahnopa ta reih ta.
11 Shaphana sawchapawpa Kemariah sawchapawpa Mikai chata, châ chatypa liatahpa ABEIPA bie zydua cha a pahno nahta,
12 abei o lâ zu ta, châ rohtuhpa chhôhpadâhpa liana chata a ngia ta; cha liana chata abeisaw zydua cha a vaw tyuh ei ta: châ rohtuhpa Elisama zy, Shemaiah sawchapawpa Delaiah zy, Akabaw sawchapawpa Elnatha zy, Shaphana sawchapawpa Kemariah zy, Hananiah sawchapapaw Zedekiah zy nata abeisaw zydua cha.
13 Mikai chata chyhsazy theipa ta, Baruka ta châbu liata a reipa bie a pahnopa zydua cha chho ta.
14 Chatanachata abeisaw zydua chata Kusi sawchapawpa, Shelemiah sawchapawpa Nethaniah sawchapawpa Zehudi cha Baruka hnohta tuah ei ta, a hnohta, ‘Chyhsazy pahnopa ta na reipa châ chatypa cha na ku liata chaba la, a vy teh,” tahpa ta. Neriah sawchapawpa Baruka cha a ku liata châ chatypa cha chabapa ta ama hnohta a vy ta.
15 A hnohta, “A tyuh la, eima nah theipa lia tlaita reih teh,” tah ei ta. Chatawhcha Baruka chata ama nah theina liana chata reih haw ta.
16 Cha bie zydua cha ama thei nahta chipa ta a moh chyu ei ta; Baruka hnohna chata. “He bie zydua he abei eima chho thlyu aw,” tah ei ta.
17 Baruka hnohta, “He bie zydua he a pakah tawhta kheihta zie ta ropa ama châ? Maniah chho teh,” tahpa ta hiahri ei ta.
18 Baruka chata, “He bie zydua he a pakah ta na chho ta, châti ta châbu liana chata ei roh,” tahpa ta a chhy ta.
19 Abeisawzy chata Baruka hnohta, “Sie la, Zeremiah chhao chata a nyu teh u,” tah ei ta.
20 Chatawhcha dôhpachhôh liata abei lâta a ngia ei ta, châ chatypa deikua cha châ rohtuhpa Elisama chhôhpadâhpa liata paso haw ei ta; a bie zydua cha abei chho ei ta,
21 abei chata châ chatypa la awpa ta Zehudi tuah ta, châ a rohtuhpa Elisama chhôhpadâhpa tawhna chata la ta; chatawhcha Zehudi chata abei nata abei kiapâh ta a duahpa abeisaw zydua nah theipa ta reih ta.
22 Thla chakina noh liata, abei cha chasipaw o liana chata a tyuh ta, a hmiakô liana chata chakoh liana chata mei vaw kâ lymâ ta.
23 Zehudi chata tho thôh tlyma, tho palih tlyma a rei nata, abei chata a chaizôh ta tai pachhô ta, chakoh mei liana chata a tlô khaina taih kâ awpa ta thy lymâ ta.
24 Abei nata a chakaotuhpa, he bie zydua a theituhpa ahy hmah ta chi leipa ei ta, ama chysia hrie hra veih ei.
25 Cha dei châ leipa ta Elnatha nata Delaiah nata Kemariah zy chata châ chatypa cha a rao lei awpa ta abei hnohta a haw ei ta. Châhrasala nahthlie khoh vei.
26 Abei chata abei sawchapawpa Zeramel nata Azriel sawchapawpa Seraiah nata Abdel sawchapawpa Shelemiah zy cha, châ rohtuhpa Baruka nata hrohsopa Zeremiah zy patu awpa ta bie pie ta, châhrasala ABEIPA chata âmo cha a nyu.
27 Chatawhcha châ chatypa nata Zeremiah pakah tawhta Baruka ta a ropa zydua biezy abei ta a rao khai tawhna chata ABEIPA bie cha Zeremiah hnohta tlô ta:
28 “Châ chatypa a hropa la heih la, châ chatypa hmia tuapa bie zydua Zudah beipa Zehôiki ta a rao hapazy cha roh khai heih teh.
29 Chatawhcha Zudah bei Zehôiki kyh liana chata he tana he tah mah y, ‘ABEIPA chata he tana heta a tah, “Babylaw beipa a vy thlyu aw ta, he râh he pahleipadiapa ta he liata chyhsa nata sahroh cha a pahleipadia khai aw, tahpa ta ropa cha khazia cha hawhpa bie na roh?” tahpa ta châ chatypa cha vaw rao ha chi ta.
30 Chavâta Zudah beipa Zehôiki kyh liana chata ABEIPA ta he tana heta a tah, Davi ryureina dyuchhai liana chata chyhsa atyu awpa hnei aw vei, a ri chhao cha nohchhô noh sapa liata nata zâ chhôhta dâhaw ry liata thypa a châ aw.
31 Ama hmoparaona vâta; ano nata a pathlazy nata a chakaotuhpazy ei hrie aw, chatawhcha âmo nata Zerusale liata a pahrâpazy nata Zudah chyhsazy chô liana chata ama châta ei phuah hawpa ama nahthlie leipa hmopha leipa zyduazy cha ei vaw patlôsa aw,’ tahpa ta.
32 Chatanachata Zeremiah chata châ chatypa hropa la ta, Neriah sawchapawpa Baruka châ rohtuhpa cha pie ta, ano chata cha liana chata Zeremiah pakah tawhta châbu ro hawpa zydua Zehôiki ta mei liata a rao hawpa kyh cha roh ta, cha hawhpa a lyupa bie hluhpi baichha hra ta.